‘Kazi Yenu ya Jasho Si ya Bure’

¹ Hilo ni wazo lenye kutia moyo kama nini! Kazi yako ya jasho katika utumishi wa Yehova si ya bure. (1 Kor. 15:58) Kwa kutofautisha, wafikirie watu ambao hutoa jasho wafanyapo kazi kwa bidii wakijaribu kuboresha hali yao ya maisha, au hali yao ya kiuchumi. Huenda wakafuatia elimu ya juu kwa miaka mingi au wakafanya kazi kama watumwa ili kufanikiwa kimwili. Lakini kwa sababu ya “wakati na tukio lisilotazamiwa,” huenda wasipate kufikia fahari wanayotafuta, au huenda wakalazimika kuridhika na vitu vichache vya kimwili kuliko walivyotaka. Kama “kujilisha upepo,” jitihada zao ni za bure. (Mhu. 1:14; 9:11, NW) Basi, ni jambo la maana kama nini kwamba tuwe na mengi ya kufanya katika kazi pekee ambayo si ya bure kwa sababu ina thamani yenye kudumu!

² Kazi Ambayo Ni ya Maana Kwelikweli: Kuhubiri habari njema ya Ufalme wa Mungu ndiyo kazi ya maana zaidi duniani. Ni kazi ambayo lazima ifanywe, iwe watu watasikiliza au hawatasikiliza. Twataka tuweze kusema kama alivyosema Paulo: “Mimi ni safi kutokana na damu ya watu wote, kwa maana sikuepuka kuwaambia nyinyi shauri lote la Mungu.”—Mdo. 20:26, 27.

³ Watu wasikilizapo na kuitikia ujumbe wa Ufalme, hiyo huwa shangwe iliyoje! Mwanamke mmoja kijana alimpoteza shangazi yake katika kifo. Alijiuliza alikoenda shangazi yake—mbinguni au motoni? Alisali kwa Mungu apate msaada, akitumia jina Yehova, kama alivyofundishwa na dada yake. Upesi akaanza kujifunza Biblia na kuhudhuria mikutano ya Kikristo. Akawa na mtazamo mpya kabisa kuhusu maisha na akavunja ushirika wake na magenge ya mtaani. Mwanamke huyo aliacha kuvuta sigareti, kutumia dawa za kulevya, na kuiba. Yeye akubali hivi: “Ni upendo kwa Yehova tu ndio ulionifanya niache njia hiyo mbaya ya maisha. Ni Yehova pekee katika rehema yake kuu ambaye angeweza kunipa tumaini la uhai wa milele.” Yeye hafuatii tena mambo yasiyo ya maana maishani.

⁴ Hata watu wakatae kusikiliza, bado unatimiza jambo la maana. Wanajua kwamba Mashahidi wa Yehova wamewatembelea. Uaminifu-maadili wako, uaminifu wako, na upendo wako wathibitishwa. Kwa hiyo, je, kazi yako katika Bwana ni ya bure? La kamwe!