Barua Kutoka Kwa Baraza Linaloongoza
Ndugu na Dada Wapendwa:
TUNAFURAHI kama nini kuwaandikia barua hii! Twawapongeza kwa upendo wenu na roho ya kujitolea ambayo mnaendelea kuonyesha. Katika kitabu Yearbook mtaona kwamba mambo mengi mema yametimizwa katika mwaka wa utumishi uliopita. Kwa mara nyingine tena, tumetumia zaidi ya saa bilioni moja katika kazi ya kuhubiri na kufundisha, tukiwatia watu moyo wamkaribie Yehova. Ni heshima kubwa kuwa wafanyakazi-wenzi pamoja na Mungu wetu mtukufu ambaye ni Baba yetu wa kimbingu.—1 Kor. 3:9.
Tunapotazamia kazi iliyo mbele yetu, tuna hakika kwamba mtaendelea kuiga bidii na imani ya watumishi wa Mungu, ambayo inaelezwa katika Biblia. Kwa mfano, mtume Paulo alitamani sana kuwa mwenye matokeo kwa kadiri iwezekanavyo kuendeleza mambo yanayohusiana na Ufalme. Yaelekea kwamba aliwaandikia Wakristo wa kutaniko la Korintho barua yake ya kwanza katika mwaka wake wa mwisho akiwa Efeso. Aliandika hivi kuhusu mambo aliyohitaji kuyashughulikia wakati huo: “Ninakaa katika Efeso mpaka msherehekeo wa Pentekoste; kwa maana nimefunguliwa mlango mkubwa uongozao kwenye utendaji, lakini kuna wapingaji wengi.”—1 Kor. 16:8, 9.
Paulo alikuwa amekusudia kusafiri hadi Makedonia na Korintho. Hata hivyo, aliiona kuwa fursa nzuri kubaki kwa muda fulani Efeso ili ahubiri huko. Paulo alikuwa tayari kubadilisha ratiba yake ifaane na hali; kwa hiyo akaona kwamba angeweza kuendeleza mambo yanayohusiana na Ufalme kwa kubaki hukohuko. Paulo alikuwa na fursa kubwa iliyoongoza kwenye utendaji, hivyo alitamani sana kuitumia.
Kutimiza hayo kulihitaji bidii ya kuhubiri habari njema na kujenga kutaniko la Efeso. Akiwaandikia wazee wa kutaniko katika jiji hilo, Paulo alisema hivi baadaye: “Sikuepuka kuwaambia nyinyi lolote kati ya mambo yaliyokuwa yenye kuleta faida wala kuwafundisha nyinyi hadharani na kutoka nyumba hadi nyumba. Lakini nilitoa ushahidi kikamili kwa Wayahudi na Wagiriki pia juu ya toba kuelekea Mungu na imani katika Bwana wetu Yesu.”—Mdo. 20:20, 21.
Vivyo hivyo, wengi wenu akina ndugu na dada mmetumia vizuri nafasi ambazo mmepata. Katika mwaka wa utumishi uliopita, wahubiri wapatao 798,938 wameweza kurekebisha hali zao ili wawe mapainia. Baadhi yenu mmesafiri hadi sehemu za mbali za dunia ili kutumikia mkiwa mishonari. Mnahubiri habari njema kwa bidii na kuyajenga makutaniko. Wengine wenu mmejifunza lugha nyingine ili mweze kusaidia watu wa eneo lenu wanaosema lugha ya kigeni. Na hata wengine wamepanga mambo yao ili waweze kuhubiri katika maeneo yasiyogawiwa mtu au mahali penye uhitaji mkubwa. Wengine wamepata fursa ya kuhubiri shuleni, kazini au kuhubiri kwa njia nyingine yenye matokeo kama vile kwa kutumia simu. Mambo yaliyoonwa ulimwenguni pote yanathibitisha kwamba watu wa Mungu, vijana kwa wazee, wanatafuta kwa bidii fursa za kujulisha watu kweli kila mahali.
Mwe na uhakika kwamba Yehova anaona na anathamini sana jitihada zenu. Biblia husema: “Mungu si asiye mwadilifu ili asahau kazi yenu na upendo mlioonyesha kwa ajili ya jina lake.” (Ebr. 6:10) Endeleeni kuwa macho kutumia fursa zinazowawezesha kuendeleza ibada safi. Labda wengine kati yenu wanaweza kupanua huduma yao. Sote tunaweza kujikakamua kufanya huduma yetu iwe yenye matokeo zaidi.
Tunapotimiza kazi yetu ya kuhubiri tutapata upinzani. Kumbuka kwamba baada ya Paulo kusema kuhusu mlango mkubwa wa utendaji uliokuwa umefunguliwa, aliandika hivi: “Kuna wapingaji wengi.” Paulo alipingwa na Wayahudi na Wasio Wayahudi, wengine walimpinga waziwazi na wengine walimpangia njama kwa ujanja.—Mdo. 19:24-28; 20:18, 19.
Leo pia tunakabiliwa na hali kama hiyo. Mfumo huu mwovu unapokaribia kuharibiwa twatazamia upinzani uongezeke. Shetani amejawa na “hasira kubwa,” na ameelekeza hasira yake kwa wale wanaomtumikia Mungu. (Ufu. 12:12) Msisahau kamwe kwamba Shetani ndiye “mtawala wa ulimwengu.” Yesu aliwaambia wanafunzi wake hivi: “Kama mngekuwa sehemu ya ulimwengu, ulimwengu ungependa sana kilicho chao wenyewe. Sasa kwa sababu nyinyi si sehemu ya ulimwengu, bali nimewachagua nyinyi kutoka ulimwenguni, kwa ajili ya hili ulimwengu huwachukia nyinyi.”—Yoh. 14:30; 15:19.
Tumeazimia kutoruhusu mtu yeyote adhoofishe imani yetu katika Mungu au afanye tupunguze bidii yetu ya kuhubiri. Twajua kwamba kuna wale watakaoendelea kutushambulia na kutufitini. Hata hivyo, twaendelea kuhubiri habari njema za Ufalme tukiwa na uhakika kwamba Yesu atamponda Shetani na majeshi yake kwa wakati wa Yehova unaofaa. Wapinzani hawakumkomesha Paulo; wala hawawanyamazishi watumishi wa Yehova leo. Ijapokuwa Shetani ana hasira na ulimwengu unatuchukia, roho ya Yehova inatenda kazi kati ya watu Wake. Ni shangwe iliyoje kujua kwamba idadi ya wahubiri wa habari njema imefikia kilele kipya cha 6,304,645!
Tunatumaini kwamba mtaendelea kutumia fursa za kuendeleza mambo yanayohusiana na Ufalme wa Yehova uliotukuka. Iweni na hakika kwamba tunawapenda sana tunapotumikia “kwa nia moja” katika utumishi wa Mungu Aliye Juu Zaidi, Yehova.—Sef. 3:9.
Ndugu zenu,
Baraza Linaloongoza la Mashahidi wa Yehova