Kuwasaidia Watu Wamkaribie Yehova

“Hakuna ajaye kwa Baba ila kupitia mimi.”—YOHANA 14:6.

1. Yesu aliyefufuliwa aliwapa wanafunzi wake amri gani, na matokeo yamekuwa nini Mashahidi wa Yehova waendeleapo kuitii?

YESU KRISTO aliwaamuru wafuasi wake “[wa]fanye wanafunzi kutoka kwa watu wa mataifa yote, kuwabatiza katika jina la Baba na la Mwana na la roho takatifu.” (Mathayo 28:19) Kwa muda wa miaka kumi iliyopita, Mashahidi wa Yehova wamewasaidia watu zaidi ya milioni tatu waje kwa Mungu, kisha wakiwabatiza kwa kuonyesha wakfu wao kwake ili wafanye mapenzi yake. Sisi twafurahi kama nini kuwasaidia wamkaribie Mungu!—Yakobo 4:8.

2. Ingawa watu wapya wengi hubatizwa, ni nini kimetokea?

² Hata hivyo, katika nchi fulani ambako wanafunzi wapya wengi wamebatizwa, idadi ya wahubiri wa Ufalme haiongezeki kwa kiwango kilekile. Bila shaka, ni lazima tukubali kwamba wengine wamekufa, kwa kuwa kiwango cha vifo kila mwaka ni asilimia 1 hivi. Ingawa hivyo, kwa miaka michache iliyopita, sababu fulani zimefanya watu wengi waanguke. Kwa nini? Makala hii na ile inayofuata zitachunguza jinsi watu wanavyovutwa kwa Yehova na zile sababu zinazoelekea kufanya wengine waanguke.

Kusudi la Kuhubiri Kwetu

3. (a) Kazi ambayo wanafunzi wa Yesu wamekabidhiwa yatimizwaje kwa wakati mmoja na ya yule malaika anayetajwa katika Ufunuo 14:6? (b) Ni njia gani imethibitika kuwa yenye mafanikio katika kuvutia upendezi wa watu katika ujumbe wa Ufalme, lakini kuna tatizo gani?

³ Katika huu “wakati wa mwisho,” wanafunzi wa Yesu wana utume wa kueneza “maarifa” juu ya “habari njema hii ya ufalme.” (Danieli 12:4; Mathayo 24:14) Kazi yao yatimizwa wakati mmoja na ya yule malaika “ali[ye]kuwa na habari njema idumuyo milele ili aitangaze kuwa taarifa za mteremo kwa wale wakaao juu ya dunia, na kwa kila taifa na kabila na lugha na watu.” (Ufunuo 14:6) Katika ulimwengu huu unaojishughulisha mno na mambo ya kilimwengu, mara nyingi njia yenye mafanikio zaidi ya kuwavutia watu kwa Ufalme wa Mungu na kuwasaidia wamkaribie Yehova ni kuwaambia kuhusu tumaini la uhai udumuo milele katika dunia paradiso. Ingawa hilo lafaa, wale wanaoshirikiana na watu wa Mungu kwa sababu tu wanataka kuingia katika Paradiso hawajasimama imara katika barabara nyembamba inayoongoza kwenye uhai.—Mathayo 7:13, 14.

4. Kulingana na Yesu na pia yule malaika anayeruka katika mbingu, ni nini kusudi la kazi yetu ya kuhubiri?

⁴ Yesu alitaarifu hivi: ‘Hii yamaanisha uhai udumuo milele, wao kuendelea kutwaa ujuzi juu yako wewe, Mungu pekee wa kweli, na juu ya yule uliyemtuma, Yesu Kristo.’ (Yohana 17:3) Malaika anayeruka katika mbingu atangaza “habari njema idumuyo milele” na kuwaambia wakazi wa dunia hivi: “Hofuni Mungu na kumpa utukufu, kwa sababu saa ya hukumu yake imewasili, na kwa hiyo mwabuduni Yeye aliyezifanya mbingu na dunia na bahari na mabubujiko ya maji.” (Ufunuo 14:7) Basi kusudi kuu linalofanya tuhubiri habari njema ni kuwasaidia watu wamkaribie Yehova kupitia Kristo Yesu.

Fungu Letu Katika Kazi ya Yehova

5. Yesu na Paulo walitoa taarifa gani zinazoonyesha kwamba tunafanya kazi ya Yehova, wala si yetu?

⁵ Mtume Paulo ataja “huduma ya upatanisho” anapowaandikia Wakristo wenzake watiwa-mafuta, na kusema kwamba Mungu huwapatanisha watu kwake mwenyewe kwa msingi wa dhabihu ya fidia ya Yesu Kristo. Paulo asema kuwa ni “kama kwamba Mungu alikuwa akisihi sana kupitia sisi” na kwamba “kama walio badala ya Kristo twaomba: ‘Iweni wenye kupatanishwa na Mungu.’” Wazo hilo lauchangamsha moyo kama nini! Hata ikiwa sisi ni “mabalozi walio badala ya Kristo” au tuwe wajumbe wenye matumaini ya kidunia, tusisahau kamwe kuwa hii ni kazi ya Yehova, wala si yetu. (2 Wakorintho 5:18-20) Mungu hasa ndiye huvuta watu na kuwafundisha wale wanaomjia Kristo. Yesu alitaarifu hivi: “Hakuna mtu awezaye kuja kwangu isipokuwa Baba, aliyenituma, amvute yeye; nami hakika nitamfufua siku ya mwisho. Imeandikwa katika Manabii, ‘Na wote watafundishwa na Yehova.’ Kila mtu ambaye amesikia kutoka kwa Baba na ambaye amejifunza huja kwangu.”—Yohana 6:44, 45.

6. Yehova anayatikisaje mataifa katika hatua ya mwanzo-mwanzo, na wakati huohuo, ni nani wanaopata usalama katika “nyumba” yake ya ibada?

⁶ Katika siku hizi za mwisho, Yehova huwavutaje watu na kuwafungulia “mlango wa imani”? (Matendo 14:27, NW, kielezi-chini; 2 Timotheo 3:1) Njia moja kuu ni kwa kuwatumia Mashahidi wake kutangaza jumbe zake za wokovu na za hukumu dhidi ya mfumo huu mwovu wa mambo. (Isaya 43:12; 61:1, 2) Hilo tangazo la ulimwenguni pote linasababisha mtikiso wa mwanzo-mwanzo katika mataifa—ishara ya hukumu yenye kuvunjavunja itakayokuja hivi karibuni. Na wakati huohuo, watu wenye “thamani” machoni pa Mungu wanavutwa kutoka katika mfumo huu nao wanapata usalama katika “nyumba” yake ya ibada ya kweli. Kwa hiyo Yehova anatimiza maneno yake ya kiunabii yaliyorekodiwa na Hagai: “Nitatikisa mataifa yote, na vitu vinavyotamaniwa na mataifa yote vitakuja; nami nitaijaza nyumba hii utukufu, asema BWANA wa majeshi.”—Hagai 2:6, 7, NW, kielezi-chini; Ufunuo 7:9, 15.

7. Yehova hufunguaje mioyo ya watu, naye huvutaje watu mmoja-mmoja kwake na kwa Mwana wake?

⁷ Yehova hufungua mioyo ya watu hao wanaomwogopa Mungu—“vitu vinavyotamaniwa na mataifa yote”—ili waweze ‘kukazia uangalifu mambo yanayosemwa’ na Mashahidi wake. (Hagai 2:7; Matendo 16:14) Kama katika karne ya kwanza, nyakati nyingine Yehova hutumia malaika zake ili kuelekeza Mashahidi wake kwa watu wenye mioyo minyofu ambao wamemlilia awape msaada. (Matendo 8:26-31) Watu mmoja-mmoja wajifunzapo kuhusu maandalizi mazuri ajabu ambayo Mungu amewaandalia kupitia Mwana wake, Yesu Kristo, upendo wa Yehova unawavuta Kwake. (1 Yohana 4:9, 10) Naam, Mungu huvuta watu waje kwake mwenyewe na kwa Mwana wake kupitia “fadhili” Zake, au “upendo [wake] mwaminifu-mshikamanifu.”—Yeremia 31:3; NW, kielezi-chini.

Yehova Huvuta Nani?

8. Yehova huvuta watu wa aina gani?

⁸ Yehova huwavuta watu wanaomtafuta waje kwake na kwa Mwana wake. (Matendo 17:27) Hao ni pamoja na watu “wanaougua na kulia kwa sababu ya machukizo yote yanayofanyika” katika Jumuiya ya Wakristo na hata ulimwenguni pote pia. (Ezekieli 9:4) Wao ‘huona uhitaji wao wa kiroho.’ (Mathayo 5:3) Kwa hakika, wao ndio “wanyenyekevu wa dunia,” watakaokaa katika dunia paradiso milele.—Sefania 2:3.

9. Yehova aweza kuonaje ikiwa watu wana “mwelekeo ufaao kwa ajili ya uhai udumuo milele,” naye huwavutaje watu hao?

⁹ Yehova aweza kusoma moyo wa mtu. Mfalme Daudi alimwambia Solomoni mwanaye hivi: “BWANA hutafuta-tafuta mioyo yote, na kuyatambua mawazo yote ya fikira; ukimtafuta, ataonekana nawe.” (1 Mambo ya Nyakati 28:9) Kwa kutegemea hali ya moyo wa mtu na ya roho yake, au mtazamo wake mkuu, Yehova aweza kuona ikiwa huyo ataitikia maandalizi ya kimungu kwa ajili ya kusamehewa dhambi na tumaini la uhai udumuo milele katika mfumo mpya wa Mungu wenye uadilifu. (2 Petro 3:13) Kupitia Neno lake, ambalo Mashahidi wake wanalihubiri na kulifundisha, Yehova huwavuta kwake na kwa Mwana wake ‘wote wale walio na mwelekeo ufaao kwa ajili ya uhai udumuo milele,’ nao huja ‘kuwa waamini.’—Matendo 13:48.

10. Ni nini kionyeshacho kuwa hatua ya Yehova ya kuwavuta watu fulani na kuwaacha wengine haihusishi kuamuliwa kimbele yatakayompata mtu?

¹⁰ Je, hatua ya Yehova ya kuvuta watu fulani na kuacha wengine yahusisha namna fulani ya kuamuliwa kimbele yatakayompata mtu? Sivyo hata kidogo! Hatua hiyo ya Mungu ya kuwavuta watu hutegemea tamaa zao wenyewe. Yeye huheshimu hiari yao. Yehova huweka mbele ya wakazi wa dunia leo uchaguzi uleule alioweka mbele ya Waisraeli zaidi ya miaka 3,000 iliyopita, Musa aliposema hivi: “Nimekuwekea leo mbele yako uzima na mema, na mauti na mabaya; . . . Nazishuhudiza mbingu na nchi juu yenu hivi leo, kuwa nimekuwekea mbele yako uzima na mauti, baraka na laana; basi chagua uzima, ili uwe hai, wewe na uzao wako; kumpenda BWANA, Mungu wako, kuitii sauti yake, na kushikamana naye; kwani hiyo ndiyo uzima wako, na wingi wa siku zako; upate kukaa katika nchi BWANA aliyowaapia baba zako, Ibrahimu, na Isaka, na Yakobo, kuwa atawapa.”—Kumbukumbu la Torati 30:15-20.

11. Waisraeli walipaswa kuchaguaje uhai?

¹¹ Ona kwamba Waisraeli walipaswa kuchagua uhai kwa ‘kumpenda Yehova, kwa kuitii sauti yake, na kwa kushikamana naye.’ Maneno hayo yaliposemwa, watu wa Israeli hawakuwa wameanza kumiliki Bara Lililoahidiwa. Walikuwa wakijiandaa kwenye Nyanda za Moabu, wakijitayarisha kuvuka Mto Yordani na kuingia Kanaani. Na ingawa lilikuwa jambo zuri kwao kuwazia juu ya nchi hiyo “njema, kisha pana . . . ijaayo maziwa na asali” ambayo wangepokea karibuni, kutimizwa kwa matazamio yao kulitegemea upendo wao kwa Yehova, kutii kwao sauti yake, na kushikamana kwao naye. (Kutoka 3:8) Musa alieleza hivyo waziwazi, akitaarifu hivi: “Kama mkitii amri za Mwenyezi-Mungu, Mungu wenu, ambazo ninawapa leo, mkampenda Mwenyezi-Mungu, Mungu wenu, na kufuata njia zake na kushika masharti na maagizo yake, basi, mtaishi na kuongezeka; naye Mwenyezi-Mungu, Mungu wenu, atawabariki katika nchi ambayo mnakwenda kuimiliki.” (Italiki ni zetu.)—Kumbukumbu la Torati (Kumbukumbu la Sheria) 30:16, Biblia Habari Njema.

12. Kielelezo cha Waisraeli chapaswa kutufundisha nini juu ya kazi yetu ya kuhubiri na kufundisha?

¹² Je, mambo hayo hayapaswi kutufundisha jambo fulani kuhusu kazi yetu ya kuhubiri na kufundisha katika wakati huu wa mwisho? Sisi huwazia Paradiso inayokuja, nasi huizungumzia katika huduma yetu. Lakini sisi na wanafunzi tunaofanya hatutaona utimizo wa ahadi ikiwa sisi au wao twamtumikia Mungu tukichochewa na sababu za ubinafsi. Sawa na Waisraeli, ni lazima sisi pamoja na wale tunaofundisha tujifunze ‘kumpenda Yehova, kuitii sauti yake, na kushikamana naye.’ Tukikumbuka hilo tuendeleapo kutimiza huduma yetu, kwa hakika tutakuwa tukishirikiana na Mungu katika kuvuta watu waje kwake.

Wafanyakazi Wenzi wa Mungu

13, 14. (a) Kulingana na 1 Wakorintho 3:5-9, sisi hupataje kuwa wafanyakazi wenzi wa Mungu? (b) Ni nani apasaye kusifiwa kwa ajili ya ongezeko lolote, na kwa nini?

¹³ Paulo alirejezea ulimaji wa shamba ili kuelezea ushirikiano na Mungu. Aliandika hivi: “Basi, Apolo ni nini? Ndiyo, Paulo ni nini? Wahudumu ambao kupitia wao mlipata kuwa waamini, kama vile Bwana alivyoruhusu kila mmoja. Mimi nilipanda, Apolo akatia maji, lakini Mungu akafuliza kuikuza; hivi kwamba yeye apandaye si kitu chochote wala yeye atiaye maji, bali Mungu aikuzaye. Basi yeye apandaye na yeye atiaye maji ni mmoja, lakini kila mtu atapokea thawabu yake mwenyewe kulingana na kazi yake mwenyewe yenye jasho. Kwa maana sisi ni wafanyakazi wenzi wa Mungu. Nyinyi watu ni shamba la Mungu lenye kulimwa, jengo la Mungu.”—1 Wakorintho 3:5-9.

¹⁴ Tukiwa wafanyakazi wenzi wa Mungu, ni lazima tupande “neno la ufalme” kwa uaminifu mioyoni mwa watu, kisha tutilie maji upendezi wowote unaoonyeshwa kwa kujitayarisha vizuri ili kufanya ziara za kurudia na mafunzo ya Biblia. Ikiwa udongo, yaani moyo, ni mzuri, Yehova atatimiza sehemu yake kwa kufanya mbegu ya ile kweli ikue hadi iwe mmea wenye kuzaa. (Mathayo 13:19, 23) Atamvuta mtu huyo kwake mwenyewe na kwa Mwana wake. Kwa hiyo, basi, ongezeko lolote katika idadi ya wapiga-mbiu wa Ufalme linasababishwa na kazi ya Yehova anayofanya mioyoni mwa watu, akifanya mbegu ya ile kweli ikue na kuwavuta watu wa aina hiyo kwake mwenyewe na kwa Mwana wake.

Kazi ya Ujenzi Itakayodumu

15. Paulo alitumia kielezi gani kuonyesha jinsi tunavyowasaidia wengine wasitawishe imani?

¹⁵ Ingawa twashangilia ongezeko, twataka kwa unyofu kuona watu wakiendelea kumpenda Yehova, kutii sauti yake, na kushikamana naye. Twahuzunika tuonapo wengine wakipoa na kuanguka. Je, twaweza kufanya jambo lolote ili kuzuia hilo? Katika kielezi kingine, Paulo aonyesha jinsi tuwezavyo kuwasaidia wengine wasitawishe imani. Aandika hivi: “Hakuna mtu awezaye kuweka msingi mwingine wowote zaidi kuliko uliowekwa, ambao ni Yesu Kristo. Basi yeyote akijenga juu ya huo msingi, dhahabu, fedha, mawe yenye bei, vifaa vya mbao, nyasi kavu, mabua, kazi ya kila mmoja itakuwa dhahiri, kwa maana ile siku itaifichua, kwa sababu itafunuliwa kwa njia ya moto; na moto wenyewe utathibitisha ni ya namna gani kazi ya kila mmoja.”—1 Wakorintho 3:11-13.

16. (a) Vielezi viwili ambavyo Paulo alitumia hutofautianaje katika lengo? (b) Kazi yetu ya ujenzi ingeweza kuwaje isiyoridhisha na isiyoweza kustahimili moto?

¹⁶ Katika kielezi cha Paulo juu ya shamba, ukuzi hutegemea upanzi unaofanywa kwa uangalifu, kutia maji kwa ukawaida, na baraka ya Mungu. Kile kielezi kingine cha mtume hukazia daraka la mhudumu Mkristo kwa lile linaloipata kazi yake ya ujenzi. Je, amejenga juu ya msingi imara akitumia vifaa bora? Paulo aonya hivi: “Acheni kila mmoja afulize kuangalia ni jinsi gani anavyojenga.” (1 Wakorintho 3:10) Baada ya kuamsha upendezi wa mtu kwa kumwambia kuhusu tumaini la uhai udumuo milele katika Paradiso, je, kufundisha kwetu hukazia tu ujuzi wa kimsingi wa Maandiko na kisha kusisitiza hasa mambo ambayo mtu huyo apaswa kufanya ili apate uhai wa milele? Je, yawezekana kwamba kufundisha kwetu ni kwa namna hii tu: ‘Ikiwa wataka kuishi milele katika Paradiso, ni lazima ujifunze, uhudhurie mikutano, na ushiriki katika kazi ya kuhubiri’? Ikiwa twafanya hivyo, basi hatuijengi imani ya mtu huyo juu ya msingi thabiti, na huenda kile tukijengacho kisistahimili moto wa majaribu au kisidumu muda mrefu. Kujaribu kuwavuta watu kwa Yehova kwa kutumia tu tumaini la uhai katika Paradiso kwa kubadilishana na utumishi wa miaka michache kwake, ni kama kujenga kwa “mbao, nyasi kavu, mabua.”

Kujenga Upendo kwa Mungu na kwa Kristo

17, 18. (a) Ni jambo gani lililo la lazima kabisa ili imani ya mtu idumu? (b) Twaweza kumsaidiaje mtu ndiposa Kristo akae katika moyo wake?

¹⁷ Ili imani idumu, ni lazima itegemee uhusiano wa kibinafsi na Yehova Mungu kupitia Yesu Kristo. Tukiwa wanadamu wasiokamilika, twaweza kupata uhusiano huo wenye amani na Mungu kupitia Mwana wake tu. (Waroma 5:10) Kumbuka Yesu alisema hivi: “Hakuna ajaye kwa Baba ila kupitia mimi.” Kuwasaidia wengine wajenge imani, “hakuna mtu awezaye kuweka msingi mwingine wowote zaidi kuliko uliowekwa, ambao ni Yesu Kristo.” Hilo lahusisha nini?—Yohana 14:6; 1 Wakorintho 3:11.

¹⁸ Kujenga juu ya Kristo akiwa msingi kwamaanisha kufundisha kwa namna inayomfanya mwanafunzi wa Biblia asitawishe upendo mkubwa kwa Yesu kupitia ujuzi kamili wa fungu Lake akiwa Mkombozi, Kichwa cha kutaniko, Kuhani wa Cheo cha Juu mwenye upendo, na Mfalme anayemiliki. (Danieli 7:13, 14; Mathayo 20:28; Wakolosai 1:18-20; Waebrania 4:14-16) Yamaanisha kumfanya Yesu aonekane kuwa halisi kabisa kwao hivi kwamba ni kana kwamba anakaa mioyoni mwao. Sala yetu kwa ajili yao yapasa kuwa kama ombi la Paulo kwa niaba ya Wakristo wa Efeso. Aliandika hivi: “Namkunjia Baba magoti yangu, . . . kwa kusudi la kwamba apate kuwaruhusu nyinyi . . . ili mpate kuwa na Kristo akikaa kupitia imani yenu katika mioyo yenu kwa upendo; ili mpate kutia mizizi na kuimarishwa juu ya ule msingi.”—Waefeso 3:14-17.

19. Tokeo la kujenga upendo kwa Kristo mioyoni mwa wanafunzi wetu wa Biblia lapaswa kuwa nini, lakini ni nini linalopasa kufundishwa?

¹⁹ Ikiwa twajenga kwa njia ya kwamba upendo kwa Kristo wasitawi katika mioyo ya wanafunzi wetu, hilo kwa kufaa litatokeza kujenga upendo kwa Yehova Mungu. Upendo wa Yesu, hisia zake, na huruma zake zaonyesha kwa ukamilifu sifa za Yehova. (Mathayo 11:28-30; Marko 6:30-34; Yohana 15:13, 14; Wakolosai 1:15; Waebrania 1:3) Kwa hiyo watu wapatapo kumjua na kumpenda Yesu, watapata kumjua na kumpenda Yehova.a (1 Yohana 4:14, 16, 19) Twahitaji kuwafundisha wanafunzi wa Biblia kwamba Yehova ametegemeza mambo yote ambayo Kristo amewafanyia wanadamu na kwa hiyo twawajibika Kumshukuru, kumsifu, na kumwabudu akiwa ‘Mungu wa wokovu wetu.’—Zaburi 68:19, 20; Isaya 12:2-5; Yohana 3:16; 5:19.

20. (a) Twaweza kuwasaidiaje watu wamkaribie Mungu na Mwana wake? (b) Ni jambo gani litakalochunguzwa katika makala inayofuata?

²⁰ Tukiwa wafanyakazi wenzi wa Mungu, na tuwasaidie watu wamkaribie yeye na Mwana wake pia, huku tukiwasaidia kusitawisha upendo na imani mioyoni mwao. Kwa njia hiyo Yehova atakuwa halisi kwao. (Yohana 7:28) Kupitia Kristo, wataweza kuanzisha uhusiano wa karibu na Mungu, nao watampenda na kushikamana naye. Hawataupimia wakati utumishi wao wenye kuchochewa na upendo, huku wakidhihirisha imani kwamba ahadi nzuri ajabu za Yehova zitatimizwa kwa wakati wake uliowekwa. (Maombolezo 3:24-26; Waebrania 11:6) Hata hivyo, tunapowasaidia wengine wasitawishe imani, tumaini, na upendo, ni lazima tuijenge imani yetu wenyewe ili iwe kama meli thabiti inayoweza kustahimili dhoruba kali. Jambo hilo litachunguzwa katika makala inayofuata.

[Maelezo ya Chini]

Kwa Kupitia

◻ Mara nyingi sisi huamshaje upendezi wa watu katika ujumbe wa Ufalme, lakini kuna hatari gani?

◻ Yehova huwavuta watu wa aina gani kwake na kwa Mwana wake?

◻ Kuingia kwa Waisraeli katika Bara Lililoahidiwa kulitegemea nini, nasi twaweza kujifunza nini kutokana na jambo hilo?

◻ Sisi hutimiza fungu gani katika kuwasaidia watu wamkaribie Yehova na Mwana wake?

[Picha katika ukurasa wa 10]

Ingawa twawapa watu tumaini la uhai udumuo milele katika Paradiso, lengo letu kuu ni kuwavuta kwa Yehova

[Picha katika ukurasa wa 13]

Ziara zetu za kurudia zaweza kufanikiwa zaidi ikiwa twajitayarisha vema