Tunafurahia Kutumiwa Kabisa Katika Utumishi wa Yehova!

¹ Mtume Paulo alifurahia “kutumiwa kabisa” ili atimize huduma yake ya Kikristo. (2 Kor. 12:15) Vivyo hivyo leo, Wakristo wengi wanafanya kazi kwa bidii wakiwa mapainia. Wengine wenye majukumu mazito ya familia hutenga wakati, licha ya shughuli zao nyingi, ili washiriki katika huduma kila juma. Wengine wenye matatizo makubwa ya afya hutumia nguvu zao za kadiri kuunga mkono kazi ya Ufalme. Inatia moyo kama nini kuona watu wa Yehova, licha ya umri wao au hali zao, wakikubali kutumiwa kabisa katika utumishi wa Yehova!

² Kumpenda Jirani: Tunakuwa na dhamiri safi tunapofanya yote tuwezayo kumtumikia Yehova na kuonyesha kwamba tunampenda Mungu na jirani. Kwa kuwa Paulo aliitoa nafsi yake ili ahubiri habari njema, angeweza kusema hivi kwa furaha: “Ninawaita ninyi kuona ushahidi leo hii kwamba mimi ni safi kutokana na damu ya watu wote.” (Mdo. 20:24, 26; 1 The. 2:8) Kushiriki katika huduma kwa kadiri ambavyo hali zetu zinaruhusu kutatuzuia tusiwe na hatia ya damu.—Eze. 3:18-21.

³ Kujitahidi kuwasaidia wengine hutupa furaha. (Mdo. 20:35) Ndugu mmoja alisema hivi: “Ni kweli kwamba mimi huwa nimechoka ninapofika nyumbani jioni baada ya kushinda katika utumishi wa Yehova. Lakini mimi huwa na furaha, nami humshukuru Yehova kwa kunipa shangwe ambayo hakuna mtu anayeweza kuninyang’anya.”

⁴ Kumpenda Mungu: Sababu muhimu zaidi inayofanya tukubali kutumiwa kabisa katika utumishi wa Yehova ni kwamba kufanya hivyo kunampendeza Baba yetu wa mbinguni. Kumpenda Mungu hutuchochea kutii amri zake ambazo zinatia ndani kuhubiri na kufanya wanafunzi. (1 Yoh. 5:3) Hata watu wasipopendezwa au wanapopinga, sisi huendelea kufanya kazi kwa shangwe kwa ajili ya Yehova.

⁵ Huu si wakati wa kupunguza mwendo. Tunaishi wakati wa mavuno. (Mt. 9:37) Kwa kawaida mkulima hufanya kazi kwa saa nyingi wakati wa mavuno kwa sababu ana muda mfupi wa kukusanya mazao kabla hayajaanza kuharibika. Wakati uliobaki kwa ajili ya kazi ya mavuno ya kiroho ni mfupi pia. Tunapokumbuka wakati ambapo tunaishi, acheni sisi sote tujitahidi sana katika huduma.—Luka 13:24; 1 Kor. 7:29-31.