Yehova Huleta Wana Wengi Kwenye Utukufu
“Ilifaa [Mungu], katika kuleta wana wengi kwenye utukufu, amfanye Wakili Mkuu wa wokovu wao kuwa mkamilifu kupitia mateso.”—WAEBRANIA 2:10.
YEHOVA aliumba dunia iwe makao ya milele ya familia kamilifu ya kibinadamu ikionea shangwe uhai usiokoma. (Mhubiri 1:4; Isaya 45:12, 18) Ni kweli kwamba, baba yetu wa zamani Adamu alitenda dhambi na hivyo akapitisha dhambi na kifo kwa wazao wake. Lakini kusudi la Mungu kwa ajili ya jamii ya kibinadamu litatimizwa kupitia Mbegu yake Iliyoahidiwa, Yesu Kristo. (Mwanzo 3:15; 22:18; Waroma 5:12-21; Wagalatia 3:16) Kuupenda ulimwengu wa wanadamu kulimsukuma Yehova atoe “Mwana mzaliwa-pekee wake, ili kila mtu anayedhihirisha imani katika yeye asipate kuangamizwa bali awe na uhai udumuo milele.” (Yohana 3:16) Nao upendo ulimchochea Yesu “kutoa nafsi yake kuwa fidia katika kubadilishana kwa ajili ya wengi.” (Mathayo 20:28) “Fidia [hiyo] inayolingana” hununua haki na mataraja yaliyopotezwa na Adamu na hufanya uhai udumuo milele uwezekane.—1 Timotheo 2:5, 6; Yohana 17:3.
2 Utumizi wa dhabihu ya fidia ya Yesu uliwakilishwa katika Siku ya Kufunika ya kila mwaka. Siku hiyo, kuhani wa cheo cha juu wa Israeli kwanza alimdhabihu fahali akiwa toleo la dhambi na kutoa damu yake kwenye Sanduku takatifu katika Patakatifu Zaidi pa tabenakulo, na baadaye hekaluni. Hilo lilifanywa kwa niaba yake mwenyewe, nyumba yake, na kabila la Lawi. Vivyo hivyo, Yesu Kristo alimtolea Mungu thamani ya damu yake kwanza ili kufunika dhambi za “ndugu” zake wa kiroho. (Waebrania 2:12; 10:19-22; Mambo ya Walawi 16:6, 11-14) Siku ya Kufunika, kuhani wa cheo cha juu alimdhabihu mbuzi pia akiwa toleo la dhambi na kutoa damu yake katika Patakatifu Zaidi, hivyo akifunika dhambi za yale makabila 12 ya Israeli yasiyo ya kikuhani. Vivyo hivyo, Kuhani wa Cheo cha Juu Yesu Kristo atatumia damu yake ya uhai kwa niaba ya wanadamu wadhihirishao imani, akifuta dhambi zao.—Mambo ya Walawi 16:15.
Aletwa Kwenye Utukufu
3 Kwa miaka 1,900, Mungu amekuwa akifanya jambo fulani lenye kutokeza kuhusiana na “ndugu” za Yesu. Kuhusu hilo, mtume Paulo aliandika hivi: “Twamwona Yesu, ambaye amefanywa akawa chini kidogo kuliko malaika, akavikwa taji la utukufu na heshima kwa kuwa alikwisha kupatwa na kifo, ili kwa fadhili isiyostahiliwa ya Mungu aonje kifo kwa ajili ya kila mtu. Kwa maana ilifaa [Yehova Mungu] yule ambaye kwa ajili yake vitu vyote vipo na kupitia kwake vitu vyote vipo, katika kuleta wana wengi kwenye utukufu, amfanye Wakili Mkuu wa wokovu wao kuwa mkamilifu kupitia mateso.” (Waebrania 2:9, 10) Wakili Mkuu wa wokovu ni Yesu Kristo, aliyejifunza utii mkamilifu kupitia mambo aliyoteseka alipokuwa akiishi akiwa mwanadamu duniani. (Waebrania 5:7-10) Yesu alikuwa wa kwanza kuzaliwa akiwa mwana wa kiroho wa Mungu.
4 Yehova alitumia roho yake takatifu, au kani ya utendaji, kumzaa Yesu akiwa Mwana wake wa kiroho, ili amlete kwenye utukufu wa kimbingu. Alipokuwa peke yake pamoja na Yohana Mbatizaji, Yesu alizamishwa kabisa katika maji akionyesha kujitoa kwake kwa Mungu. Simulizi la Gospeli ya Luka lasema hivi: “Watu wote walipokuwa wamebatizwa, Yesu pia akabatizwa na, alipokuwa akisali, mbingu ilifunguliwa na roho takatifu katika umbo la kiwiliwili kama njiwa ikateremka juu yake, na sauti ikaja kutoka mbinguni: ‘Wewe ni Mwana wangu, mpendwa; nimekukubali wewe.’” (Luka 3:21, 22) Yohana aliona roho takatifu ikimjia Yesu na kumsikia Yehova akisema kwa kumkubali waziwazi kuwa Mwana Wake mpendwa. Wakati huo na kupitia roho takatifu, Yehova alimzaa Yesu akiwa wa kwanza wa ‘wana wengi ambao wataletwa kwenye utukufu.’
5 “Ndugu” za Yesu wamekuwa wa kwanza kunufaishwa na dhabihu yake. (Waebrania 2:12-18) Katika ono, mtume Yohana aliwaona wakiwa tayari katika utukufu kwenye Mlima Zayoni pamoja na Mwana-Kondoo, Bwana Yesu Kristo aliyefufuliwa. Yohana pia alifunua idadi yao, akisema hivi: “Nikaona, na, tazama! Mwana-Kondoo amesimama juu ya Mlima Zayoni, na pamoja naye mia arobaini na nne elfu wakiwa na jina lake na jina la Baba yake limeandikwa juu ya vipaji vya nyuso zao. . . . Hawa walinunuliwa kutoka miongoni mwa wanadamu wakiwa matunda ya kwanza kwa Mungu na kwa Mwana-Kondoo, na lolote lisilo la kweli halikupatikana katika vinywa vyao; wao hawana waa.” (Ufunuo 14:1-5) Kwa hiyo ‘wana wengi walioletwa kwenye utukufu’ mbinguni wanajumlika kuwa 144,001 tu—Yesu na ndugu zake wa kiroho.
‘Kuzaliwa Kutokana na Mungu’
6 Wale ambao wamezaliwa na Yehova “[wa]mezaliwa kutokana na Mungu.” Akizungumza na watu hao, mtume Yohana aliandika hivi: “Kila mtu ambaye amezaliwa kutokana na Mungu haendelezi dhambi, kwa sababu mbegu Yake [ya Yehova] ya uzazi hukaa katika mtu kama huyo, na hawezi kuzoea dhambi, kwa sababu amezaliwa kutokana na Mungu.” (1 Yohana 3:9) ‘Mbegu hiyo ya uzazi’ ni roho takatifu ya Mungu. Ikifanya kazi pamoja na neno lake, imempa kila mmoja wa 144,000 “uzaliwa mpya” kwenye tumaini la kimbingu.—1 Petro 1:3-5, 23.
7 Yesu alikuwa Mwana wa Mungu tangu kuzaliwa kwake kwa kibinadamu, kama vile mwanadamu mkamilifu Adamu alivyokuwa “mwana wa Mungu.” (Luka 1:35; 3:38) Hata hivyo, baada ya kubatizwa kwa Yesu, lilikuwa jambo la maana kwamba Yehova alijulisha wazi hivi: “Wewe ni Mwana wangu, mpendwa; nimekukubali wewe.” (Marko 1:11) Kupitia julisho hilo lenye kuandamana na mtiririko wa roho takatifu, ilikuwa wazi kwamba Mungu alimzaa Yesu wakati huo akiwa Mwana Wake wa kiroho. Kitamathali, wakati huo Yesu alipewa “uzaliwa mpya” pamoja na haki ya kupokea uhai mara nyingine tena akiwa Mwana wa Mungu aliye roho mbinguni. Kama yeye, ndugu zake wa kiroho 144,000 ‘wanazaliwa tena.’ (Yohana 3:1-8; ona Mnara wa Mlinzi, la Novemba 15, 1992, ukurasa wa 3-6.) Pia kama Yesu, wanatiwa mafuta na Mungu na kupewa utume wa kutangaza habari njema.—Isaya 61:1, 2; Luka 4:16-21; 1 Yohana 2:20.
Ithibati ya Kuzaliwa
8 Kulikuwa na ithibati ya kwamba Yesu alikuwa amezaliwa kwa roho. Yohana Mbatizaji aliona roho ikimshukia Yesu na akasikia julisho rasmi la Mungu juu ya uana wa kiroho wa Mesiya aliyetoka tu kutiwa mafuta. Lakini wanafunzi wa Yesu wangeweza kujuaje kwamba walikuwa wamezaliwa kwa roho? Siku ya kupaa kwake kwenda mbinguni, Yesu alisema hivi: “Yohana, kwa kweli, alibatiza kwa maji, lakini nyinyi mtabatizwa katika roho takatifu si siku nyingi baada ya hili.” (Matendo 1:5) Wanafunzi wa Yesu ‘walibatizwa katika roho takatifu’ siku ya Pentekoste mwaka wa 33 W.K. Kumwagwa huko kwa roho kuliandamana na ‘kelele kutoka mbinguni sawa na pepezi yenye nguvu inayovuma kwa kasi’ na “ndimi kama kwamba za moto” juu ya kila mmoja wa wanafunzi. Jambo lenye kutokeza zaidi lilikuwa uwezo wa wanafunzi wa “kusema katika lugha tofauti, kama vile roho ilivyokuwa ikiwaruhusu kufanya tamko.” Kwa hiyo kulikuwa na ithibati yenye kuonekana na yenye kusikika ya kwamba njia ya kuingia katika utukufu wa kimbingu wakiwa wana wa Mungu ilikuwa imefunguliwa kwa ajili ya wafuasi wa Kristo.—Matendo 2:1-4, 14-21; Yoeli 2:28, 29.
9 Wakati fulani baadaye, Filipo mweneza-evanjeli alihubiri katika Samaria. Ingawa Wasamaria walikubali ujumbe wake na kubatizwa, walikosa ithibati ya kwamba Mungu alikuwa amewazaa wawe wana wake. Mtume Petro na mtume Yohana waliposali na kuweka mikono yao juu ya waamini hao, “wakaanza kupokea roho takatifu” katika njia fulani iliyodhihirika kwa watazamaji. (Matendo 8:4-25) Hilo lilikuwa ithibati ya kwamba Wasamaria waliokuwa waamini walikuwa wamezaliwa kwa roho kuwa wana wa Mungu. Vivyo hivyo, mwaka wa 36 W.K., Kornelio na Wasio Wayahudi wengine walikubali kweli ya Mungu. Petro na waamini Wayahudi waliokuwa wameandamana naye “wakashangaa, kwa sababu zawadi ya bure ya roho takatifu ilikuwa ikimwagwa pia juu ya watu wa mataifa. Kwa maana waliwasikia wakisema katika lugha na wakimtukuza Mungu.” (Matendo 10:44-48) Wakristo wengi wa karne ya kwanza walipokea “zawadi za roho,” kama vile kusema katika lugha. (1 Wakorintho 14:12, 32) Hivyo watu hao walipata kuwa na udhihirisho wa wazi wa kwamba walikuwa wamezaliwa kwa roho. Lakini Wakristo wa baadaye wangeweza kujuaje ikiwa walikuwa wamezaliwa kwa roho au la?
Ushahidi wa Roho
10 Wakristo wote watiwa-mafuta 144,000 wamekuwa na uthibitisho kamili wa kwamba wana roho ya Mungu. Kwa habari hiyo, Paulo aandika hivi: “Mlipokea roho ya tendo la kufanywa kuwa wana, roho ambayo kwayo twapaaza kilio: ‘Abba, Baba!’ Hiyo roho yenyewe hutoa ushahidi pamoja na roho yetu kwamba sisi ni watoto wa Mungu. Basi, ikiwa sisi ni watoto, sisi pia ni warithi: warithi wa Mungu kwelikweli, lakini warithi-washirika pamoja na Kristo, mradi twateseka pamoja ili tupate pia kutukuzwa pamoja.” (Waroma 8:15-17) Wakristo watiwa-mafuta wana roho ya uana, hisia kubwa ya uana, kuelekea Baba yao wa kimbingu. (Wagalatia 4:6, 7) Wana uhakika kabisa kwamba wamezaliwa na Mungu katika uana wa kiroho wakiwa warithi-washirika pamoja na Kristo katika Ufalme wa kimbingu. Katika njia hii, roho takatifu ya Yehova ina fungu hususa.
11 Chini ya uvutano wa roho takatifu ya Mungu, roho, au mtazamo mkubwa, wa watiwa-mafuta huwashurutisha kuitikia kwa njia chanya yale ambayo Neno la Mungu husema juu ya tumaini la kimbingu. Kwa mfano, wasomapo mambo ambayo Maandiko husema juu ya watoto wa kiroho wa Yehova wanakiri mara moja kwamba maneno hayo yawahusu. (1 Yohana 3:2) Wanajua kwamba ‘wamebatizwa katika Kristo Yesu’ na katika kifo chake. (Waroma 6:3) Usadikisho wao ulio imara ni kwamba wao ni wana wa kiroho wa Mungu, ambao watakufa na kufufuliwa kuingia katika utukufu wa kimbingu, kama Yesu.
12 Kuzaliwa kwao kwenye uana wa kiroho si tamaa iliyositawishwa. Wazaliwa kwa roho hawataki kwenda mbinguni kwa sababu ya kusononeshwa na shida zilizopo duniani. (Ayubu 14:1) Badala ya hivyo, roho ya Yehova imetokeza katika walio watiwa-mafuta kikweli tumaini na tamaa isiyo ya kawaida kwa wanadamu kwa ujumla. Watu hao waliozaliwa hivyo wanajua kwamba uhai udumuo milele katika ukamilifu wa kibinadamu katika dunia iliyo paradiso uliozungukwa na familia na marafiki wenye furaha ungekuwa wa ajabu sana. Hata hivyo, uhai huo sio tamaa kuu ya mioyo yao. Watiwa-mafuta wana tumaini la kimbingu lenye nguvu hivi kwamba wana nia ya kudhabihu matazamio yote na ufungamano wote wa kidunia.—2 Petro 1:13, 14.
13 Tumaini lenye kupewa na Mungu la uhai wa kimbingu ni lenye nguvu sana katika hao hivi kwamba hisia zao ni kama zile za Paulo, aliyeandika hivi: “Twajua kwamba nyumba yetu ya kidunia, hema hili, ikifumuliwa, twapaswa kuwa na jengo kutoka kwa Mungu, nyumba isiyofanyizwa kwa mikono, yenye kudumu milele katika mbingu. Kwa maana katika nyumba hii ya kukaa twapiga kite kwelikweli, tukitamani kwa bidii kuvaa ile yetu kutoka mbinguni, ili kwamba, tukiisha kuivaa kwa kweli, hatutapatikana tukiwa uchi. Kwa kweli, sisi tulio katika hema hili twapiga kite, tukiwa tumelemewa; kwa sababu twataka, si kulivua, bali kuvaa lile jingine, ili kiwezacho kufa kipate kumezwa na uhai. Basi yeye aliyetutokeza kwa ajili ya jambo hilihili ni Mungu, aliyetupa arbuni ya kitakachokuja, yaani, roho.” (2 Wakorintho 5:1-5) ‘Tamaa yenye bidii’ ya Paulo ilikuwa kufufuliwa na kuingia mbinguni akiwa kiumbe kisichoweza kufa. Akirejezea mwili wa kibinadamu, alitumia sitiari ya hema lenye kukunjika, makao yaliyo rahisi kuharibika na ya muda yalinganishwapo na nyumba. Ingawa wanaishi duniani wakiwa na miili yenye nyama, iwezayo kufa, Wakristo walio na roho ikiwa ishara ya uhai wa kimbingu ujao watazamia “jengo kutoka kwa Mungu,” mwili wa roho usioweza kufa, usioweza kuharibika. (1 Wakorintho 15:50-53) Kama Paulo, wao waweza kusema hivi kwa bidii: “Sisi ni wenye moyo mkuu na twapendezwa vema tusiwepo katika mwili [wa kibinadamu] na badala ya hivyo tufanye nyumba yetu [mbinguni] kuwa pamoja na Bwana.”—2 Wakorintho 5:8.
Wachukuliwa Katika Maagano ya Pekee
14 Wakristo wazaliwa kwa roho wana uhakika kwamba wamechukuliwa katika maagano mawili ya pekee. Yesu alitaja mojawapo ya hayo alipotumia mkate usiotiwa chachu na divai ili kuanzisha Ukumbusho wa kifo chake kilichokuwa kikija na kusema hivi juu ya hicho kikombe cha divai: “Kikombe hiki chamaanisha agano jipya kwa msingi wa damu yangu, ambayo yapasa kumwagwa kwa ajili yenu.” (Luka 22:20; 1 Wakorintho 11:25) Ni nani wenye kushiriki katika agano jipya? Yehova Mungu na washiriki wa Israeli la kiroho—wale ambao Yehova amekusudia kuwaleta kwenye utukufu wa kimbingu. (Yeremia 31:31-34; Wagalatia 6:15, 16; Waebrania 12:22-24) Likiwa limetendeshwa kazi na damu ya Yesu iliyomwagwa, agano jipya hutoa katika mataifa watu kwa ajili ya jina la Yehova na hufanya Wakristo hao wa kuzaliwa kwa roho kuwa sehemu ya “mbegu” ya Abrahamu. (Wagalatia 3:26-29; Matendo 15:14) Agano jipya huwezesha Waisraeli wote wa kiroho kuletwa kwenye utukufu kwa kufufuliwa na kupata uhai usioweza kufa wa kimbingu. Likiwa “agano lidumulo milele,” manufaa yake yatadumu milele. Wakati ujao utafunua ikiwa agano hilo pia litatimiza fungu fulani katika njia nyinginezo wakati wa ile Milenia na baadaye.—Waebrania 13:20.
15 Wale “wana wengi” ambao Yehova alikusudia ‘kuwaleta kwenye utukufu’ pia wamechukuliwa wakiwa mmoja-mmoja katika agano kwa ajili ya Ufalme wa kimbingu. Kuhusu agano hilo kati yake mwenyewe na wafuasi wa hatua zake, Yesu alisema hivi: “Nyinyi ndio mmeshikamana nami katika majaribu yangu; nami nafanya agano pamoja nanyi, sawa na vile Baba yangu amefanya agano pamoja nami, kwa ajili ya ufalme, ili mpate kula na kunywa kwenye meza yangu katika ufalme wangu, na kuketi juu ya viti vya ufalme kuyahukumu makabila kumi na mawili ya Israeli.” (Luka 22:28-30) Agano la Ufalme lilianzishwa wakati ambapo wanafunzi wa Yesu walitiwa mafuta kwa roho takatifu kwenye Pentekoste 33 W.K. Agano hilo huendelea kufanya kazi milele kati ya Kristo na wafalme-washirika wake. (Ufunuo 22:5) Kwa hiyo, basi, Wakristo watiwa-mafuta kwa roho wana hakika kwamba wako katika agano jipya na katika agano kwa ajili ya Ufalme. Kwa hiyo, katika kushika mwadhimisho wa Mlo wa Jioni wa Bwana, wale watiwa-mafuta tu wanaobaki duniani bado ambao kwa kulinganishwa ni wachache, ndio hushiriki mkate, unaowakilisha mwili wa kibinadamu wa Yesu usio na dhambi, na divai, imaanishayo damu yake kamilifu iliyomwagwa katika kifo na ihalalishayo agano jipya.—1 Wakorintho 11:23-26; ona Mnara wa Mlinzi, la Februari 1, 1989, ukurasa wa 17-20.
Walioitwa, Waliochaguliwa, na Walio Waaminifu
16 Matumizi ya kwanza ya dhabihu ya fidia ya Yesu hufanya iwezekane wale 144,000 waitwe kwenye uhai wa kimbingu na kuchaguliwa kwa kuzaliwa kwa roho na Mungu. Bila shaka, ili waletwe kwenye utukufu, lazima ‘wafanye hata zaidi yote kabisa wawezayo, ili kufanya wito na kuchaguliwa kwao kuwe hakika,’ na lazima wathibitike kuwa waaminifu hadi kifo. (2 Petro 1:10; Waefeso 1:3-7; Ufunuo 2:10) Mabaki wachache wa watiwa-mafuta ambao bado wako duniani wanadumisha uaminifu-maadili wao ingawa hupingwa na “wafalme kumi” ambao huwakilisha mamlaka zote za kisiasa. “Hawa watapigana na Mwana-Kondoo,” malaika fulani akasema, “lakini, kwa sababu yeye ni Bwana wa mabwana na Mfalme wa wafalme, Mwana-Kondoo atawashinda. Pia, wale walioitwa na waliochaguliwa na walio waaminifu pamoja naye watafanya hivyo.”—Ufunuo 17:12-14.
17 Watawala wa kibinadamu hawawezi kufanya kitu chochote dhidi ya Yesu, yule “Mfalme wa wafalme,” kwa maana yeye yuko mbinguni. Lakini wao huonyesha uhasama kuelekea mabaki ya “ndugu” zake ambao bado wako duniani. (Ufunuo 12:17) Hilo litafikia mwisho kwenye vita ya Mungu ya Har–Magedoni, ushindi uhakikishwapo kwa ajili ya “Mfalme wa wafalme” na “ndugu” zake—“wale walioitwa na waliochaguliwa na walio waaminifu.” (Ufunuo 16:14, 16) Wakati huu, Wakristo wazaliwa kwa roho wana shughuli nyingi sana. Wanafanya nini sasa, kabla ya kuletwa kwenye utukufu na Yehova?
Jibu Lako Ni Nini?
◻ Ni nani ambao Mungu ‘huleta kwenye utukufu wa kimbingu’?
◻ Yamaanisha nini ‘kuzaliwa kutokana na Mungu’?
◻ ‘Roho hutoaje ushahidi’ pamoja na Wakristo fulani?
◻ Wazaliwa kwa roho wametiwa katika maagano yapi?
[Maswali ya Funzo]
1. Kwa nini twaweza kuwa na hakika kwamba kusudi la Yehova kwa wanadamu litatimizwa?
2. Utumizi wa dhabihu ya fidia ya Yesu uliwakilishwaje katika Siku ya Kufunika ya Israeli ya kila mwaka?
3. Kulingana na Waebrania 2:9, 10, Mungu amekuwa akifanya nini kwa miaka 1,900?
4. Ni wakati gani na jinsi gani Yesu alizaliwa akiwa Mwana wa kiroho wa Mungu?
5. Ni nani ambao wamekuwa wa kwanza kunufaika kutokana na dhabihu ya Yesu, nao ni wangapi?
6, 7. Ni nani “[hu]zaliwa kutokana na Mungu,” na hilo humaanisha nini kwao?
8. Kulikuwa na ithibati gani ya kuzaliwa kwa roho katika kisa cha (a) Yesu (b) wanafunzi wake wa mapema?
9. Kulikuwa na ithibati gani kwamba Wasamaria, Kornelio, na wengineo wa karne ya kwanza walikuwa wamezaliwa kwa roho?
10, 11. Kwa msingi wa Waroma 8:15-17, ungeweza kusemaje kwamba roho hutoa ushahidi pamoja na wale ambao ni warithi-washirika wa Kristo?
12. Roho ya Mungu imetokeza nini katika Wakristo watiwa-mafuta?
13. Kwa kupatana na 2 Wakorintho 5:1-5, ni nini ambalo Paulo ‘alitamani kwa bidii,’ nalo huonyesha nini kuhusiana na wazaliwa kwa roho?
14. Alipokuwa akianzisha kushika mwadhimisho wa Ukumbusho, Yesu alitaja agano jipi kwanza, na hilo hutimiza fungu gani kuhusiana na Waisraeli wa kiroho?
15. Kulingana na Luka 22:28-30, wafuasi wa Yesu watiwa-mafuta walianza kutiwa katika agano jipi jingine, na wakati gani?
16, 17. (a) Ili kuletwa kwenye utukufu, ni jambo gani lapaswa kuwa kweli kuhusiana na wale 144,000? (b) Ni nani wale “wafalme kumi,” nao huwatendeaje mabaki wa kidunia wa “ndugu” za Kristo?
[Picha katika ukurasa wa 15]
Kwenye Pentekoste mwaka wa 33 W.K., uthibitisho ulitolewa kwamba njia ya kuingia kwenye utukufu wa kimbingu ilikuwa imefunguliwa