“Panukeni”
1 Kila mmoja wetu ana wajibu wa kuchangia uchangamfu wa kutaniko katika undugu wetu wa Kikristo. (1 Pet. 1:22; 2:17) Uchangamfu huo huchochewa ‘tunapopanua’ upendo wetu mwororo kwa wenzetu. (2 Kor. 6:12, 13) Kwa nini ni muhimu kuwajua ndugu na dada zetu vizuri?
2 Urafiki Huimarika Zaidi: Tunapofahamiana vizuri zaidi na waamini wenzetu, tunathamini zaidi imani yao, uvumilivu wao, na sifa zao nyingine nzuri. Tunapofanya hivyo, makosa yao huonekana kuwa madogo zaidi na urafiki huimarika. Tunapofahamiana vizuri tunaweza kujengana na kutiana moyo. (1 The. 5:11) Tunaweza kuwa ‘msaada wenye kutiana nguvu’ ili kukabiliana na uvutano mbaya wa ulimwengu wa Shetani. (Kol. 4:11) Kwa sababu ya mikazo ya siku hizi za mwisho, tunashukuru kama nini kuwa na marafiki wazuri kati ya watu wa Yehova!—Met. 18:24.
3 Marafiki wa karibu wanaweza kututia nguvu na kutufariji tunapokabili majaribu makali. (Met. 17:17) Mkristo mmoja aliyejiona kuwa hafai akumbuka: “Kuna marafiki waliosema mambo mazuri kunihusu ili kunisaidia kushinda mawazo mabaya niliyokuwa nayo.” Marafiki wa aina hiyo ni zawadi kutoka kwa Yehova.—Met. 27:9.
4 Pendezwa na Wengine: Tunawezaje kupanua upendo wetu mwororo kwa waamini wenzetu? Mbali na kuwasalimu wengine katika mikutano ya Kikristo, jitahidi kuzungumza nao kwa njia yenye kujenga. Jaribu kuonyesha unapendezwa nao, lakini usiingilie mambo yao ya kibinafsi. (Flp. 2:4; 1 Pet. 4:15) Njia nyingine ya kupendezwa na wengine ni kuwaalika chakulani. (Luka 14:12-14) Au unaweza kupanga kuhubiri pamoja nao shambani. (Luka 10:1) Tunapochukua hatua kuwajua ndugu zetu vizuri zaidi, tunaendeleza umoja kutanikoni.—Kol. 3:14.
5 Je, tuna mwelekeo wa kuchagua marafiki wetu kutoka kwa marika wetu au wale walio na mapendezi kama yetu? Tusiache mambo hayo yatuzuie kusitawisha urafiki na wengine kutanikoni. Daudi na Yonathani na vilevile Ruthu na Naomi walisitawisha urafiki wa karibu ingawa walitofautiana kwa umri na malezi. (Rut. 4:15; 1 Sam. 18:1) Je, unaweza kupanua urafiki wako? Kufanya hivyo kunaweza kuleta baraka zisizotarajiwa.
6 Kwa kupanua upendo wetu mwororo kwa wengine, tunatiana nguvu na kuendeleza amani kutanikoni. Isitoshe, Yehova mwenyewe hutubariki tunapowaonyesha ndugu zetu upendo. (Zab. 41:1, 2; Ebr. 6:10) Kwa nini usiweke mradi wa kuwafahamu vizuri zaidi ndugu wengi iwezekanavyo?
[Maswali ya Funzo]
1. Kila mmoja wetu ana wajibu gani?
2. Kwa nini ni muhimu kusitawisha urafiki na waamini wenzetu?
3. Tunawezaje kuwa msaada wenye kuwatia nguvu wengine?
4. Tunawezaje kuwajua wengine vizuri zaidi kutanikoni?
5. Taja njia moja ya kupanua urafiki wetu.
6. Ni faida gani tunazopata tunapopanua upendo wetu mwororo kwa ndugu zetu?