Kuwaonyesha Upendo Wenye Uhitaji

WAKRISTO wana wajibu na pia pendeleo la kuwaonyesha upendo ndugu na dada zao wenye uhitaji. (1 Yohana 3:17, 18) Mtume Paulo aliandika hivi: “Acheni sisi tufanye lililo jema kuelekea wote, lakini hasa kuelekea wale ambao katika imani ni jamaa zetu.” (Wagalatia 6:10) Hivi majuzi, ndugu fulani ambaye amekuwa akimtumikia Yehova kwa karibu miongo minne alipata kujionea upendo wa udugu wa Kikristo wakati wa ugonjwa wa mke wake na kifo kilichofuata. Yeye aandika hivi:

“Kwa kuwa nilimtunza mke wangu nyumbani wakati wa ugonjwa wake, sikuweza kufanya kazi ya kimwili kwa muda wa karibu miezi miwili. Nilitulizwa kama nini marafiki kutanikoni walipotusaidia kwa kupenda! Tulipata zawadi nyingi za kifedha—‘ili kusaidia kulipia gharama za ziada,’ kama kadi zilizoandamana na hizo zawadi zilivyokuwa zikisema—zilizolipia amana, huduma za umma, na gharama nyingine.

“Majuma mawili kabla ya kifo cha mke wangu, mwangalizi wa mzunguko wetu alifanya ziara yenye kututia moyo. Hata alionyesha slaidi ambazo kutaniko lilikuwa lizione mwishoni mwa hilo juma. Tuliweza kusikiliza mikutano kupitia simu—kutia ndani mikutano ya utumishi wa shambani iliyoongozwa na huyo mwangalizi wa mzunguko. Kwenye mmojawapo wa mikutano hiyo, alifanya wale wote waliokuwapo kwa ajili ya utumishi wa shambani waseme ‘jambo’ wakiwa kikundi, kwa mke wangu. Hivyo, ijapokuwa alikuwa peke yake kimwili, hakujihisi kamwe akiwa peke yake.

“Katika muda wa saa moja baada ya kifo chake, wazee karibu wote walikuwa nyumbani kwangu. Siku hiyo peke yake ndugu na dada zaidi ya mia moja walizuru. Chakula kilitokea kimuujiza mezani kilichowatosha wote waliokuwapo. Siwezi kuanza kusimulia zile zawadi zote, semi zenye huruma, maneno yenye kufariji, na sala zilizotolewa kwa niaba yangu. Walikuwa wenye kutia nguvu kama nini! Hatimaye nililazimika kuwaomba ndugu waache kuandaa msaada wa milo na usafi wa nyumba!

“Ni wapi kwingineko isipokuwa ndani ya tengenezo la Yehova ambako twaweza kupata wonyesho huo usio na ubinafsi wenye huruma, hangaiko, na upendo? Watu walio wengi leo wana marafiki wachache sana wa kweli. Yehova ametubariki kwa familia kubwa ya ndugu na dada za kiroho!”—Marko 10:29, 30.