Kuishi kwa Kupatana na Nadhiri Yako ya Ndoa!

SIKU ya arusi ni siku yenye shangwe. Pia ni pindi yenye uzito sana. Bibi-arusi na bwana-arusi hutoa ahadi yenye uzito itakayokuwa na uvutano katika muda wote wa maisha zao. Wale walioko kwenye arusi wakiwa wageni ni mashahidi wa ahadi hiyo yenye uzito, lakini Yehova Mungu ndiye Shahidi mkuu.

Biblia haisisitizi njia fulani hususa au aina fulani ya kipekee ya sherehe ya arusi. Lakini, kwa kutambua chanzo chayo cha kimungu, kidesturi ndoa hufanywa kupitia nadhiri za ndoa katika sherehe ya kidini. Kwa miaka fulani Mashahidi wa Yehova wamekuwa wakitumia nadhiri ya ndoa ifuatayo: “Mimi —— nakuchukua wewe —— uwe (mke/mume) wangu wa ndoa, nikupende na kukutunza sana (Bibi-arusi: na kukuheshimu sana sana) kulingana na sheria ya kimungu iliyoonyeshwa katika Maandiko Matakatifu kwa ajili ya (wake/waume) Wakristo, kwa muda wote ambao sisi wawili tutaishi pamoja duniani kulingana na mpango wa ndoa wa Mungu.”

Jambo la Kufikiria

Ikiwa unafikiria kufunga ndoa, lingekuwa jambo muhimu sana kufikiria uzito na maana ya nadhiri hii kabla ya siku ya arusi. Sulemani alisema: “Usijiharakishe kwa habari ya mdomo wako; na kwa moyo wako, usiwe na haraka kusema neno mbele ya Mungu wa kweli.” (Mhubiri 5:2, NW) Namna gani ikiwa tayari umefunga ndoa? Basi utanufaika kwa kutafakari umaana wa hii ahadi yenye uzito uliyotoa mbele ya Yehova. Je, unaishi kwa kupatana nayo? Wakristo huchukua ahadi zao kwa uzito. Sulemani aliendelea kusema: “Unachonadhiri, lipa. Ni afadhali usiweke nadhiri kuliko kuweka nadhiri na usilipe. Usiruhusu mdomo wako kusababisha mwili wako kufanya dhambi, wala usiseme mbele ya malaika kwamba ilikuwa kosa.”—Mhubiri 5:4-6, NW.

Ufikirio wa fungu kwa fungu wa nadhiri ya arusi bila shaka utafanya uelewe zaidi ahadi hii yenye uzito.

“Mimi —— nakuchukua wewe”: Haya ni maneno ya kwanza ya hiyo nadhiri. Yanakazia kwamba unachukua daraka la kibinafsi kwa uamuzi wako wa kufunga ndoa.

Katika mpango wa Kikristo, hakuna sharti la Kimaandiko la kufunga ndoa. Yesu Kristo mwenyewe alibaki mseja naye alipendekeza useja kwa wale ‘wawezao kuupokea.’ (Mathayo 19:10-12) Kwa upande mwingine, wengi wa mitume wa Yesu walikuwa wanaume waliokuwa wamefunga ndoa. (Luka 4:38; 1 Wakorintho 9:5) Ni wazi kwamba uamuzi wa kufunga ndoa ni wa mtu binafsi. Hakuna mtu yeyote aliye na mamlaka ya Kimaandiko ya kulazimisha mwingine afunge ndoa.

Kwa hiyo, uamuzi wa kufunga ndoa ni daraka lako. Yaelekea, ulichagua yule unayefunga ndoa naye. Unaweka nadhiri ya ndoa, ukisema, ‘Mimi nakuchukua ——,’ unamchukua au kumkubali huyo pamoja na sifa zake nzuri—na vilevile pamoja na makosa yake.

Hatimaye yaelekea utagundua vitabia ambavyo hukudhania viwe katika utu wa mwenzi wako. Kutakuwa na pindi utakapovunjika moyo. Biblia yasema kwamba “wote wamefanya dhambi, na kupungukiwa na utukufu wa Mungu.” (Warumi 3:23) Basi huenda ukahitaji kufanya marekebisho ili kupatana na mwenzi wako. Hilo laweza kuwa jambo gumu, na nyakati nyingine unaweza kuhisi kana kwamba utaacha kujaribu. Lakini kumbuka, nadhiri ya ndoa hufanywa mbele ya Yehova. Anaweza kukusaidia ufaulu.

“Uwe (mke/mume) wangu wa ndoa”: Katika arusi ya kwanza kabisa, Adamu alipopewa Hawa katika ndoa, Yehova Mungu alisema kwamba “ni lazima wawe mwili mmoja.” (Mwanzo 2:24, NW; Mathayo 19:4-6) Basi muungano wa ndoa ni uhusiano wa karibu zaidi uwezao kuwa kati ya wanadamu wawili. Ndoa hukuingiza katika aina mpya ya uhusiano. Unamkubali mtu kuwa ‘mke wako wa ndoa’ au ‘mume wako wa ndoa.’ Huo ni tofauti na aina nyingine yoyote ya uhusiano. Matendo yasababishayo madhara kidogo kwa mahusiano mengine yaweza kusababisha uchungu mwingi sana katika mpango wa ndoa.

Kwa kielelezo, fikiria shauri la Kimaandiko linalopatikana kwenye Waefeso 4:26. Hapo Biblia yasema: “Mwe na hasira, ila msitende dhambi; jua lisichwe na uchungu wenu bado haujawatoka.” Labda sikuzote hujakuwa ukisuluhisha matatizo yako na watu wa ukoo na marafiki haraka kama ulivyopaswa. Lakini mwenzi wako yu karibu zaidi kuliko mtu yeyote wa ukoo au rafiki yeyote yule. Kutosuluhisha mambo haraka pamoja na mwenzi wako wa ndoa kwaweza kuhatarisha uhusiano wa kipekee ulioko kati yenu.

Je, wewe huacha tatizo kati yako na mwenzi wako liwe chanzo cha daima cha kutokeza udhia au uchungu? Je, kutosikilizana au hali zenye kukasirisha hudumu kwa siku kadhaa? Ili uishi kupatana na nadhiri yako, magumu yatokeapo usiruhusu siku moja ipite bila kufanya amani na mwenzi wako. Hilo lamaanisha kusamehe na kusahau na vilevile kukubali makosa yako mwenyewe.—Zaburi 51:5; Luka 17:3, 4.

“Nikupende”: Bwana-arusi huweka nadhiri ya ‘kumpenda na kumtunza’ bibi-arusi. Upendo huo watia ndani upendo wa kimahaba ambao yaelekea uliwaleta pamoja. Lakini upendo wa kimahaba hautoshi. Upendo ambao Mkristo huweka nadhiri kwa ajili ya mwenzi wake ni wa ndani zaidi na ulio kamili zaidi.

Waefeso 5:25 lasema: “Enyi waume, wapendeni wake zenu, kama Kristo naye alivyolipenda Kanisa [“kutaniko,” NW].” Upendo wa Yesu kwa kutaniko hakika si ule wa kimahaba kati ya watu wa jinsia tofauti. Maneno “wapendeni” na “alivyolipenda” yatumiwayo katika andiko hili yatokana na neno a·gaʹpe, linalorejezea upendo wenye kuongozwa na kanuni. Hapa Biblia inaamuru waume kuonyesha wake zao upendo wenye kuvumilia, wa kudumu, na wenye uthabiti.

Si tu aina ya hisia ya “nakupenda kwa sababu unanipenda.” Mume hutanguliza hali-njema ya mke wake hata mbele ya yake mwenyewe, na mke humpenda mume wake kwa njia iyo hiyo. (Wafilipi 2:4) Kukuza upendo wenye kina kwa mwenzi wako kutakusaidia kuishi kwa kupatana na nadhiri yako ya ndoa.

“Kukutunza sana”: Kulingana na kamusi moja, ‘kutunza sana’ kwamaanisha ‘kuthamini, kuonyesha shauku kwa jambo.’ Ni lazima uonyeshe upendo wako kwa maneno na matendo! Mke hasa huhitaji kuonyeshwa upendo wa mume wake kila wakati. Huenda mume wake atunze vizuri mahitaji yake ya kimwili, lakini hilo halitoshi. Kuna wake ambao wana chakula cha kutosha na nyumba yenye starehe lakini hawana furaha kabisa kwa sababu ya kuachwa au kupuuzwa na waume zao.

Kwa upande mwingine, mke anayejua kwamba anapendwa na kutunzwa sana hakika ana sababu za kuwa mwenye furaha. Bila shaka, ndivyo hali ilivyo kwa waume pia. Upendo wa kweli huzidishwa sana na maneno ya kweli ya mapenzi. Katika Wimbo Ulio Bora, mpenzi mchungaji alitoa sauti: “Jinsi zilivyo nzuri pambaja zako, umbu langu, bibi arusi, ni nzuri kupita divai; na harufu ya marhamu yako yapita manukato ya kila namna.”—Wimbo Ulio Bora 4:10.

“Na kukuheshimu sana sana”: Katika karne ambazo zimepita, kumekuwa na wanaume ambao wamewatendea vibaya wanawake na kuwashusha. Hata leo, kulingana na gazeti la World Health, “jeuri dhidi ya wanawake hutukia katika kila nchi na katika kila tabaka ya kijamii na kiuchumi. Katika tamaduni nyingi, kupiga mke huonwa kuwa haki ya mume.” Huenda waume wengi wasiwe na hatia ya mwenendo huo. Lakini, inaonekana kwamba wanaume wengi hukosa kuonyesha upendezi wa kweli katika masuala yanayohusu wanawake. Tokeo ni kwamba wanawake wengi wamesitawisha mtazamo usiofaa dhidi ya wanaume. Wake wengine wamesikika wakisema, “Nampenda mume wangu, lakini siwezi kamwe kumheshimu!”

Hata hivyo, Yehova Mungu huthamini mwanamke anayejitahidi kumheshimu mume wake—hata kama mume anapungukia matarajio yake pindi kwa pindi. Yeye hutambua kwamba mume wake ana mgawo, au cheo alichopewa na Mungu. (1 Wakorintho 11:3; Waefeso 5:23) Hivyo, hiyo heshima nyingi sana anayoonyesha mume wake ni sehemu ya ibada yake na utii wake kwa Yehova. Mungu anaona utii wa wanawake wa kimungu.—Waefeso 5:33; 1 Petro 3:1-6; linganisha Waebrania 6:10.

Ni lazima wote katika ndoa waheshimiane, na ni lazima heshima hiyo ifanyiwe kazi badala ya kutarajiwa au kudaiwa. Kwa kielelezo, usemi wenye kuchoma au wenye kuudhi hauruhusiwi katika mpango wa ndoa. Haungekuwa upendo au heshima kusema maneno yenye kushusha kuhusu mume wako au mke wako. Hakuna faida ya kufunua kasoro za mwenzi wako kwa wengine au kuzisema hadharani. Hata katika mizaha, mtu aweza kuonyesha kukosa heshima sana katika habari hii. Maneno ya Waefeso 4:29, 32 hutumika kwa wote mume na mke. Hapo Biblia husema: “Neno lo lote lililo ovu lisitoke vinywani mwenu, bali lililo jema la kumfaa mwenye kuhitaji . . . Iweni wafadhili ninyi kwa ninyi, wenye huruma.”

“Kulingana na sheria ya kimungu iliyoonyeshwa katika Maandiko Matakatifu”: Mungu hutaka tufurahie uhuru wa uchaguzi na matendo. Yeye hatulemezi kwa orodha ndefu ya sheria za kuongoza maisha ya ndoa. Lakini, kwa ajili yetu ameweka miongozo fulani.

Leo, kuna vichapo vya aina nyingi juu ya ndoa, na watu wengi wana falsafa zao wenyewe. Lakini jihadhari! Kwa habari ya ndoa, nyingi za habari zinazoenezwa zapingana na Biblia.

Pia, tambua kwamba hali hutofautiana kati ya kila wenzi wa ndoa. Kwa njia fulani, wenzi wa ndoa ni kama vipande vya theluji; waweza kuonekana kama wanafanana kwa umbali, lakini kihalisi kila wenzi wa ndoa ni wa kipekee, wakiwa tofauti na wengine wote. Mchanganyiko wa utu wako na wa ule wa mwenzi wako haupatikani katika wenzi wengine wa ndoa ulimwenguni pote. Basi usikubali haraka maoni ya binafsi ya wengine. Hakuna suluhisho lolote la kibinadamu liwezalo kutumika katika kila ndoa!

Kwa kutofautisha, amri zote za Biblia ni za kweli na zenye kutumika. Mtume Paulo aliandika: “Kila andiko, lenye pumzi ya Mungu, lafaa kwa mafundisho, na kwa kuwaonya watu makosa yao, na kwa kuwaongoza.” (2 Timotheo 3:16; Zaburi 119:151) Ukisoma Biblia na kukubali mafundisho yayo kuwa mwongozo katika maisha yako ya kila siku, utaweza kuishi kwa kupatana na nadhiri yako ya ndoa.—Zaburi 119:105.

“Kwa muda wote ambao sisi wawili tutaishi pamoja duniani”: Hilo laonyesha kuwa pamoja kwa muda mrefu. Mungu aamuru kwamba “mwanamume atamwacha baba yake na mama yake naye ataambatana na mkewe.” (Mwanzo 2:24) Yehova awataka mwe pamoja. Mtumikieni Mungu pamoja. Jifunzeni Neno lake pamoja. Mwe na wakati wa kutembea pamoja, kuketi pamoja, kula pamoja. Furahieni maisha pamoja!

Wenzi fulani hujitahidi kutenga wakati kila siku ili wazungumze tu. Hata baada ya miaka mingi ya ndoa, hali hiyo ya kuwa pamoja ni muhimu sana kwa furaha ya ndoa.

“Kulingana na mpango wa ndoa wa Mungu”: Ndoa ni zawadi kutoka kwa Yehova Mungu, aliyeanzisha mpango wa ndoa. (Mithali 19:14) Kukosa kufuata mpango wake hakutatisha tu furaha yako ya ndoa bali kutatisha pia uhusiano wako pamoja na Muumba. Kwa upande mwingine, mume na mke wakuzapo uhusiano mzuri pamoja na Yehova, ukionyeshwa kwa utii kwa mipango yake, basi watakuwa na uhusiano wenye amani pamoja na wengine, kutia ndani wao wenyewe.—Mithali 16:7.

Usisahau kwamba Yehova ndiye Shahidi mkuu kwa nadhiri yako ya ndoa. Endelea kuishi kwa kupatana na ahadi hii yenye uzito, na ndoa yako itakuwa chanzo cha sifa na utukufu kwa Yehova Mungu!

[Blabu katika ukurasa wa 22]

Kwa njia fulani, kila wenzi wa ndoa ni kama vipande vya theluji. Wote waweza kuonekana kama wanafanana kwa umbali, lakini kihalisi kila wenzi wa ndoa ni tofauti kwa njia ya kipekee

[Hisani]

Vipande vya Theluji/Dover