Iweni Watakatifu Katika Mwenendo Wenu Wote”

“Kama yeye aliyewaita alivyo mtakatifu, ninyi nanyi iweni watakatifu katika mwenendo wenu wote; kwa maana imeandikwa, Mtakuwa watakatifu kwa kuwa mimi ni mtakatifu.”—1 PETRO 1:15, 16.

1. Kwa nini Petro aliwatia moyo Wakristo wawe watakatifu?

KWA nini mtume Petro alitoa shauri lililo juu? Kwa sababu aliona uhitaji kwa kila Mkristo kulinda mawazo na matendo yake ili kuyapatanisha na utakatifu wa Yehova. Kadhalika, alitanguliza maneno yaliyo juu kwa kusema hivi: “Vifungeni viuno vya nia zenu, na kuwa na kiasi. . . . Kama watoto wa kutii msijifananishe na tamaa zenu za kwanza, za ujinga wenu.”—1 Petro 1:13, 14.

2. Kwa nini tamaa zetu hazikuwa takatifu kabla ya kujifunza kweli?

² Tamaa zetu za kwanza zilikuwa zisizo takatifu. Kwa nini? Kwa sababu wengi wetu tulifuata mwendo wa kilimwengu wa kutenda mambo, kabla ya kuikubali kweli ya Kikristo. Petro alijua hilo alipoandika waziwazi hivi: “Wakati wa maisha yetu uliopita watosha kwa kutenda mapenzi ya Mataifa; kuenenda katika ufisadi, na tamaa, na ulevi, na karamu za ulafi, na vileo, na ibada ya sanamu isiyo halali.” Bila shaka Petro hakuorodhesha matendo yasiyo matakatifu yaliyo kawaida katika ulimwengu wetu wa kisasa, kwa kuwa hayakujulikana wakati huo.—1 Petro 4:3, 4.

3, 4. (a) Twaweza kupambanaje na tamaa mbaya? (b) Je, Wakristo wasiwe na hisia-moyo? Eleza.

³ Je, uliona kwamba tamaa hizi ndizo zile ambazo huvutia mwili, hisia, na hisia-moyo? Turuhusupo hizo zitutawale, ndipo mawazo na matendo yetu yanapokuwa yasiyo matakatifu kwa urahisi. Hilo hutolea kielezi uhitaji wa kuacha uwezo wa kufikiri udhibiti matendo yetu. Paulo alieleza jambo hilo hivi: “Basi, ndugu zangu, nawasihi, kwa huruma zake Mungu, itoeni miili yenu iwe dhabihu iliyo hai, takatifu, ya kumpendeza Mungu, ndiyo ibada yenu yenye maana.”—Warumi 12:1, 2.

⁴ Ili kumtolea Mungu dhabihu takatifu, ni lazima turuhusu uwezo wa kufikiri utawale, wala si hisia-moyo. Ni wengi kama nini ambao wamehusika katika ukosefu wa adili kwa kuwa waliruhusu hisia zao zidhibiti mwenendo wao! Hilo halimaanishi kwamba hisia-moyo zetu zapasa zizuiwe; ama sivyo, tungeweza kuonyeshaje shangwe katika utumishi wa Yehova? Hata hivyo, ikiwa twataka kuzaa tunda la roho badala ya kazi za mwili, basi ni lazima tufanye upya akili zetu ili zifikiri katika njia ya kufikiri ya Kristo.—Wagalatia 5:22, 23; Wafilipi 2:5.

Bei Takatifu, Uhai Mtakatifu

5. Kwa nini Petro alihangaikia uhitaji wa utakatifu?

⁵ Sababu gani Petro alihangaikia sana uhitaji wa utakatifu wa Kikristo? Kwa sababu alijua vizuri juu ya ile bei takatifu iliyokuwa imelipwa ili kukomboa jamii ya kibinadamu tiifu. Yeye aliandika hivi: “Mfahamu kwamba mlikombolewa si kwa vitu viharibikavyo, kwa fedha au dhahabu; mpate kutoka katika mwenendo wenu usiofaa mlioupokea kwa baba zenu; bali kwa damu ya thamani, kama ya mwana-kondoo asiye na [h]ila, asiye na waa, yaani, ya Kristo.” (1 Petro 1:18, 19) Ndiyo, Yehova Mungu, Chanzo cha utakatifu, alikuwa amemtuma Mwanae mzaliwa-pekee, “Mtakatifu,” duniani ili alipe fidia ambayo ingewezesha watu wawe na uhusiano mzuri pamoja na Mungu.—Yohana 3:16; 6:69; Kutoka 28:36; Mathayo 20:28.

6. (a) Kwa nini si rahisi kwetu kufuatia mwenendo mtakatifu? (b) Ni nini kiwezacho kutusaidia kudumisha mwenendo wetu ukiwa mtakatifu?

⁶ Hata hivyo, ni lazima tutambue kwamba si rahisi kuishi maisha matakatifu tukiwa katikati ya ulimwengu mfisadi wa Shetani. Yeye huwawekea mitego Wakristo wa kweli, wanaojaribu kujisalimisha katika mfumo wake wa mambo. (Waefeso 6:12; 1 Timotheo 6:9, 10) Misongo ya kazi ya kimwili, ya upinzani wa familia, ya dhihaka shuleni, na ya msongo wa marika hutaka mtu awe na hali ya kiroho yenye nguvu ili adumishe utakatifu. Hilo hutilia mkazo lile fungu muhimu la funzo letu la kibinafsi na hudhurio letu la kawaida kwenye mikutano ya Kikristo. Paulo alimshauri Timotheo hivi: “Shika kielelezo cha maneno yenye uzima uliyoyasikia kwangu, katika imani na upendo ulio katika Kristo Yesu.” (2 Timotheo 1:13) Sisi husikia maneno hayo yapayo uzima kwenye Jumba la Ufalme letu na katika funzo letu la faragha la Biblia. Maneno hayo yaweza kutusaidia tuwe watakatifu katika mwenendo wetu kila siku katika hali nyingi tofauti-tofauti.

Mwenendo Mtakatifu Katika Familia

7. Utakatifu uathirije maisha yetu ya familia?

⁷ Petro aliponukuu Mambo ya Walawi 11:44, alitumia neno la Kigiriki haʹgi·os, ambalo humaanisha “-liotenganishwa na dhambi na hivyo kutolewa wakfu kwa Mungu, -takatifu.” (An Expository Dictionary of New Testament Words, ya W. E. Vine) Hilo lituathirije katika maisha yetu ya familia ya Kikristo? Lapaswa kwa hakika kumaanisha kwamba maisha yetu ya familia yapaswa kutegemea upendo, kwa kuwa “Mungu ni upendo.” (1 Yohana 4:8) Upendo wenye kujidhabihu ndio mafuta yalainishayo mahusiano kati ya wenzi wa ndoa na kati ya wazazi na watoto.—1 Wakorintho 13:4-8; Waefeso 5:28, 29, 33; 6:4; Wakolosai 3:18, 21.

8, 9. (a) Ni hali gani ambayo nyakati nyingine hutokea katika nyumba ya Kikristo? (b) Biblia hutoa shauri gani timamu juu ya habari hii?

⁸ Huenda tukafikiri kwamba kuonyesha upendo huo ni jambo la moja kwa moja katika familia ya Kikristo. Lakini, lazima ikiriwe kwamba upendo hautawali sikuzote kwa kiwango kile upaswacho kutawala katika nyumba fulani za Wakristo. Huenda ikaonekana kuwa hivyo kwenye Jumba la Ufalme, lakini jinsi utakatifu wetu uwezavyo kupunguka upesi tukiwa nyumbani. Kisha twaweza kusahau kwa ghafula kwamba mke bado ni dada yetu Mkristo au kwamba mume bado ni ndugu yetu yuleyule (huenda hata awe mtumishi wa huduma au mzee) aliyeonekana kustahiwa kwenye Jumba la Ufalme. Sisi twaudhika na mabishano makali yaweza kutokea. Huenda hata viwango maradufu vikanyemelea katika maisha zetu. Uhusiano kati ya mume na mke hauwi tena kama wa Kristo bali tu hali ya kutopatana kati ya mwanamume na mwanamke. Wanasahau kwamba kwapaswa kuwa na hali ya utakatifu nyumbani. Labda wanaanza kusema kama watu wa ulimwengu. Ndipo, inavyokuwa rahisi kama nini kwa neno lenye kuchukiza, la kutia uchungu kutoka kinywani!—Mithali 12:18; linganisha Matendo 15:37-39.

⁹ Hata hivyo, Paulo ashauri hivi: “Neno lo lote lililo ovu [Kigiriki, loʹgos sa·prosʹ, “usemi wenye kutia unajisi,” hivyo usio mtakatifu] lisitoke vinywani mwenu, bali lililo jema la kumfaa mwenye kuhitaji, ili liwape neema wanaosikia.” Nalo hurejezea wote wasikiao walio nyumbani, kutia ndani watoto.—Waefeso 4:29; Yakobo 3:8-10.

10. Shauri juu ya utakatifu huwahusuje watoto?

¹⁰ Mwongozo huu juu ya utakatifu huwahusu watoto pia kwa kiwango kilekile katika familia ya Kikristo. Jinsi ilivyo rahisi kwao kurudi nyumbani kutoka shuleni na kuanza kuiga mazungumzo ya uasi na yasiyo na staha ya marika wao wa kilimwengu! Watoto msivutiwe na mitazamo ionyeshwayo na wale wavulana wenye tabia mbaya waliomtukana nabii wa Yehova na wafananao na wavulana wa leo wenye midomo isemayo mambo machafu na yenye kukufuru. (2 Wafalme 2:23, 24) Usemi wenu haupasi kutiwa unajisi na ule usemi mchafu wa mitaani wa watu walio wavivu mno au wasio na ufikirio wa kutumia maneno yenye adabu. Tukiwa Wakristo, usemi wetu wapaswa kuwa mtakatifu, wenye kupendeza, wenye kujenga, wenye fadhili, na ‘uliokolea munyu.’ Wapaswa ututofautishe na watu wengine.—Wakolosai 3:8-10; 4:6.

Utakatifu Katika Kushughulika na Washiriki Wetu wa Familia Wasioamini

11. Kwa nini kuwa watakatifu hakumaanishi kujihesabia uadilifu?

¹¹ Huku tukijaribu kwa dhamiri nzuri kuzoea utakatifu, hatupaswi kuonekana kuwa wakuu zaidi na kujihesabia uadilifu, hasa tushughulikapo na washiriki wa familia wasioamini. Mwenendo wetu wa Kikristo wenye fadhili wapaswa angalau kuwasaidia kuona kwamba sisi ni tofauti katika njia yenye manufaa, kwamba twajua jinsi ya kuonyesha upendo na huruma, sawa na yule Msamaria mwema wa kielezi cha Yesu.—Luka 10:30-37.

12. Wenzi wa ndoa Wakristo waweza kufanyaje kweli iwe yenye kuwavutia wenzi wao wa ndoa zaidi?

¹² Petro alikazia umaana wa mtazamo ufaao kuelekea washiriki wetu wa familia wasioamini alipowaandikia wake Wakristo hivi: “Kadhalika ninyi wake, watiini waume zenu; kusudi, ikiwa wako wasioliamini Neno, wavutwe kwa mwenendo wa wake zao, pasipo lile Neno; wakiutazama mwenendo wenu safi, na wa hofu.” Mke Mkristo (hata mume) aweza kufanya kweli iwe yenye kumvutia zaidi mwenzi wa ndoa asiyeamini ikiwa mwenendo wake ni safi, wenye ufikirio, na wenye staha. Hilo lamaanisha kwamba kwapaswa kuwa na kubadilikana-badilikana katika ratiba ya kitheokrasi ili mwenzi wa ndoa asiyeamini asidharauliwe au kupuuzwa.a—1 Petro 3:1, 2.

13. Nyakati nyingine wazee na watumishi wa huduma waweza kuwasaidiaje waume wasioamini waithamini kweli?

¹³ Nyakati nyingine wazee na watumishi wa huduma waweza kusaidia kwa kupata kumjua mume asiyeamini kwa kuwa marafiki. Kwa njia hiyo huenda akaona kwamba Mashahidi ni watu wa kawaida, wenye adabu walio na mapendezi mengi, kutia ndani habari tofauti na ya Biblia. Katika kisa kimoja, mzee alionyesha kupendezwa na uvuvi uliokuwa kipitisha-wakati cha mume mmoja. Hilo lilitosha kushinda kizuizi cha kwanza na kuanzisha urafiki. Hatimaye mume huyo akawa ndugu aliyebatizwa. Katika kisa kingine, mume asiyeamini alipendezwa na virumbizi. Wazee hawakushindwa. Mmoja wao alijifunza juu ya virumbizi ili kwamba wakati mwingine alipokutana na mwanamume huyo, angeweza kuanzisha mazungumzo juu ya habari impendezayo mume huyo! Kwa hiyo, kuwa watakatifu, hakumaanishi kuwa wagumu au kuwa wenye kushikilia mambo yao tu.—1 Wakorintho 9:20-23.

Twaweza Kuwaje Watakatifu Katika Kutaniko?

14. (a) Njia moja ya Shetani ya kudhoofisha kutaniko ni ipi? (b) Twaweza kukinzaje mtego wa Shetani?

¹⁴ Shetani Ibilisi ni mchongezi, kwa kuwa jina la Kigiriki la Ibilisi, di·aʹbo·los, humaanisha “mshtaki” au “mchongezi.” Uchongezi ni mojapo kazi zake, naye hujaribu kuutumia kutanikoni. Njia yake aipendayo sana ni upigaji wa porojo. Je, sisi twajiruhusu kuwa wenye kudanganywa naye katika mwenendo huo usio mtakatifu? Hilo lingewezekanaje? Kwa kuianzisha, kwa kuiendeleza, au kwa kuisikiliza. Mithali yenye hekima yataarifu hivi: “Mtu mshupavu huondokesha fitina; na mchongezi huwafarakanisha rafiki.” (Mithali 16:28) Dawa ya porojo na uchongezi ni nini? Twapaswa kuhakikisha kwamba sikuzote usemi wetu ni wenye kujenga na wenye upendo. Tukitafuta sifa nzuri badala ya sifa mbaya zenye kudhaniwa za ndugu zetu, sikuzote mazungumzo yetu yatakuwa yenye kupendeza na ya kiroho. Kumbuka kwamba kuchambua ni rahisi. Na mtu akupigiaye porojo juu ya wengine aweza pia kuwapigia wengine porojo juu yako!—1 Timotheo 5:13; Tito 2:3.

15. Ni sifa zipi zilizo kama zile za Kristo zitakazosaidia kudumisha wote kutanikoni wakiwa watakatifu?

¹⁵ Ili kuliweka kutaniko likiwa takatifu, sote twahitaji kuwa na akili ya Kristo, nasi twajua kwamba sifa yake kuu ni upendo. Kwa njia hiyo, Paulo aliwashauri Wakolosai wawe wenye huruma kama Kristo: “Basi, kwa kuwa mmekuwa wateule wa Mungu, watakatifu wapendwao, jivikeni moyo wa rehema, utu wema, unyenyekevu, upole, uvumilivu, . . . na kusameheana, . . . Zaidi ya hayo yote jivikeni upendo, ndio kifungo cha ukamilifu.” Kisha akaongeza: “Na amani ya Kristo iamue mioyoni mwenu.” Kwa hakika tukiwa na roho hiyo ya kusamehe, twaweza kudumisha muungano na utakatifu wa kutaniko.—Wakolosai 3:12-15.

Je, Utakatifu Wetu Huonekana Katika Ujirani Wetu?

16. Kwa nini ibada yetu takatifu iwe yenye furaha?

¹⁶ Namna gani jirani zetu? Wao hutuonaje? Je, sisi huonyesha shangwe ya kweli, au twaifanya ionekane kuwa mzigo? Ikiwa sisi ni watakatifu kama Yehova alivyo mtakatifu, basi yapaswa kuonekana katika usemi wetu na katika mwenendo wetu. Yapaswa kuwa wazi kwamba ibada yetu takatifu ni ibada yenye furaha. Kwa nini? Kwa sababu Yehova Mungu wetu ni Mungu mwenye furaha, anayetaka waabudu wake wawe wenye shangwe. Kwa njia hiyo, mtunga-zaburi aliweza kusema hivi juu ya watu wa Yehova katika nyakati za kale: “Heri watu wenye BWANA kuwa Mungu wao.” Je, sisi huonyesha furaha hiyo? Je, watoto wetu pia huonyesha uradhi kwa kuwa miongoni mwa watu wa Yehova kwenye Jumba la Ufalme na kwenye makusanyiko?—Zaburi 89:15, 16; 144:15b.

17. Twaweza kufanya nini katika njia yenye kutumika ili kuonyesha utakatifu wenye usawaziko?

¹⁷ Pia twaweza kuonyesha utakatifu wetu wenye usawaziko kwa roho yetu ya ushirikiano na fadhili ya kijirani. Nyakati nyingine ni lazima majirani waungane, labda ili kusafisha ujirani au, kama ilivyo katika nchi fulani, kusaidia kuboresha barabara ndogo na kubwa. Katika habari hii, utakatifu wetu waweza pia kuonekana kwa jinsi tutunzavyo bustani zetu, nyanja, na mali nyinginezo. Ikiwa twaacha takataka zikiwa zimerundamana au tukiwa na uwanja mchafu, labda hata ukiwa na magari mazee yaliyoharibika yaonekanayo na wapita-njia wote, je, twaweza kusema kwamba twawatendea jirani zetu kwa staha?—Ufunuo 11:18.

Utakatifu Kazini na Shuleni

18. (a) Wakristo wana shida gani leo? (b) Twaweza kuwaje tofauti na ulimwengu?

¹⁸ Mtume Paulo aliwaandikia Wakristo katika jiji la Korintho lisilo takatifu: “Naliwaandikia katika waraka wangu, kwamba msichangamane na wazinzi. Sisemi msichangamane kabisa na wazinzi wa dunia hii, au na wenye kutamani, au na wanyang’anyi, au na wenye kuabudu sanamu; maana hapo ingewalazimu kutoka katika dunia.” (1 Wakorintho 5:9, 10) Hiyo ni shida kwa Wakristo, ambao lazima wachangamane kila siku na watu wenye kukosa adili au wasio na maadili yoyote. Hilo ni jaribu kubwa la uaminifu-maadili, hasa katika tamaduni ambamo katika hiyo kusumbuliwa kingono, ufisadi, na kutofuatia haki ni mambo yanayoendelezwa au yanayoruhusiwa. Kazini au shuleni hatuwezi kuruhusu viwango vyetu vishuke ili tuonekane kuwa “watu wa kawaida” kwa wale wanaotuzunguka. Badala ya hivyo, mwenendo wetu wa Kikristo wenye fadhili lakini ulio tofauti wapaswa kutufanya tuwe wenye kutokeza kwa watu wenye utambuzi, kwa wale watambuao uhitaji wao wa kiroho na wanaotafuta jambo zuri zaidi.—Mathayo 5:3; 1 Petro 3:16, 17.

19. (a) Ninyi watoto, mnapata majaribu gani shuleni? (b) Wazazi waweza kufanya nini ili kuwategemeza watoto wao na mwenendo wao mtakatifu?

¹⁹ Vivyo hivyo, kuna majaribu mengi yanayowakabili watoto wetu shuleni. Je, ninyi wazazi hutembelea shule ambazo watoto wenu huenda? Je, mnajua ni hali zipi zilizopo hapo? Je, mna uhusiano mzuri pamoja na walimu? Kwa nini maswali haya ni ya maana? Kwa sababu katika miji mingi ya ulimwengu shule zimekuwa kambi za ujeuri, dawa za kulevya, na ngono. Watoto wako waweza kudumishaje uaminifu-maadili wao na mwenendo wao mtakatifu ikiwa hawapati utegemezo kamili wenye huruma wa wazazi wao? Kwa kufaa Paulo aliwashauri wazazi hivi: “Ninyi akina baba, msiwachokoze watoto wenu, wasije wakakata tamaa.” (Wakolosai 3:21) Njia moja ya kuwachokoza watoto ni kushindwa kuelewa matatizo na majaribu yao ya kila siku. Matayarisho kwa ajili ya vishawishi shuleni huanza katika hali ya kiroho ya nyumba ya Kikristo.—Kumbukumbu la Torati 6:6-9; Mithali 22:6.

20. Kwa nini utakatifu ni muhimu kwetu sote?

²⁰ Kwa kumalizia, kwa nini utakatifu ni muhimu kwetu sote? Kwa sababu ni ulinzi dhidi ya uvamizi wa ulimwengu wa Shetani na kufikiri kwake. Huo ni baraka sasa nao utakuwa baraka wakati ujao. Huo husaidia kutuhakikishia uhai utakaokuwa uhai kwelikweli katika ulimwengu mpya wa uadilifu. Huo hutusaidia kuwa Wakristo wenye usawaziko, wenye kuambilika, wenye kuwasiliana—wala si washupavu wa kidini wasio na huruma. Kwa ufupi, huo hutufanya kuwa kama Kristo.—1 Timotheo 6:19.

[Maelezo ya Chini]

Je, Wakumbuka?

◻ Kwa nini Petro aliona uhitaji wa kuwashauri Wakristo juu ya utakatifu?

◻ Kwa nini si rahisi kuishi maisha matakatifu?

◻ Sote twaweza kufanya nini ili kuboresha utakatifu katika familia?

◻ Ili kutaniko libaki likiwa takatifu, tuepuke mwenendo upi usio mtakatifu?

◻ Twaweza kubakije tukiwa watakatifu kazini na shuleni?

[Picha katika ukurasa wa 16, 17]

Tukiwa Mashahidi wa Yehova, twapaswa kuwa wenye shangwe katika kumtumikia Mungu na katika utendaji mwingine mbalimbali