Sura ya Nane
‘Kushindana Mwereka Dhidi ya Majeshi ya Roho Waovu’
1. Kwa nini tunapaswa kufahamu utendaji wa roho waovu?
WATU wengi hudhihaki wazo la kwamba kuna roho waovu. Lakini si mzaha. Watu waamini wasiamini, roho waovu wapo, nao hujaribu kumshambulia kila mtu, kutia ndani waabudu wa Yehova. Wao ndio shabaha kuu. Mtume Paulo anaonyesha jambo hilo kwa kusema hivi: “Tuna kushindana mwereka, si dhidi ya damu na mwili, bali dhidi ya serikali [zisizoonekana], dhidi ya mamlaka, dhidi ya watawala wa ulimwengu wa giza hili, dhidi ya majeshi ya roho waovu katika mahali pa kimbingu.” (Waefeso 6:12) Roho waovu wanawashambulia watu vikali sana leo kwa sababu Shetani ametupwa kutoka mbinguni akiwa na hasira kali, akijua kwamba ana muda mfupi.—Ufunuo 12:12.
2. Tunawezaje kushinda roho wenye nguvu nyingi sana kuliko wanadamu?
2 Je, tunaweza kuwashinda roho wenye nguvu nyingi sana kuliko wanadamu? Ndiyo, lakini ni lazima tumtegemee Yehova kabisa. Ni lazima tumsikilize na kutii Neno lake. Tukifanya hivyo, tunaweza kuepuka madhara mengi ya kimwili, kiadili, na ya kihisia ambayo yanawapata wale wanaoongozwa na Shetani.—Yakobo 4:7.
Watawala wa Ulimwengu Katika Mahali pa Kimbingu
3. Shetani huwapinga nani vikali, naye hufanyaje hivyo?
3 Akiwa mbinguni, Yehova anatueleza waziwazi mambo anayoona yakitukia ulimwenguni. Alimpa mtume Yohana njozi ambayo inamwonyesha Shetani kuwa “joka kubwa la rangi-moto.” Ikiwezekana, alikuwa tayari kuunyafua Ufalme wa Kimesiya wa Mungu mara tu baada ya Ufalme huo kuzaliwa mbinguni mnamo mwaka wa 1914. Shetani aliposhindwa kufanya hivyo, alizusha upinzani mkali sana dhidi ya wawakilishi wa Ufalme huo hapa duniani. (Ufunuo 12:3, 4, 13, 17) Shetani angemtumia nani kupigana vita? Angewatumia wawakilishi wake duniani.
4. Ni nani anayezipa serikali za wanadamu nguvu, nasi twajuaje?
4 Kisha Yohana alionyeshwa hayawani-mwitu mwenye vichwa saba na pembe kumi, ambaye ana mamlaka “juu ya kila kabila na watu na lugha na taifa.” Hayawani huyo anawakilisha mfumo wote wa kisiasa ulimwenguni. Yohana aliambiwa kwamba ‘joka kubwa [Shetani Ibilisi] lilimpa huyo hayawani nguvu yake na hicho kiti chake cha ufalme na mamlaka kubwa.’ (Ufunuo 13:1, 2, 7) Naam, Shetani ndiye anayezipa serikali za wanadamu nguvu na mamlaka. Kwa hiyo, kama mtume Paulo alivyoandika, kwa kweli, “watawala wa ulimwengu” ambao ni “majeshi ya roho waovu katika mahali pa kimbingu,” ndio wanaoziongoza serikali za wanadamu. Wote wanaotaka kumwabudu Yehova wanapaswa kuelewa kabisa jambo hilo.—Luka 4:5, 6.
5. Kwa nini watawala wa kisiasa wanakusanywa sasa?
5 Ijapokuwa watawala wengi wa kisiasa hudai kuwa watu wa kidini, hakuna taifa lolote linalojitiisha kwa utawala wa Yehova au kwa Mfalme ambaye amemteua, Yesu Kristo. Wote hupambana kufa kupona kushikilia mamlaka zao. Leo, kama simulizi la Ufunuo linavyosema, “semi zilizopuliziwa na roho waovu” zinawakusanya watawala wa ulimwengu kwa “vita ya siku kubwa ya Mungu Mweza-Yote,” kwenye Har–Magedoni.—Ufunuo 16:13, 14, 16; 19:17-19.
6. Kwa nini tunapaswa kuwa waangalifu ili tusishawishiwe kuunga mkono mfumo wa Shetani?
6 Kila siku, maisha ya watu huathiriwa na mapambano ya kisiasa, kijamii, kiuchumi, na ya kidini ambayo yanawagawanya wanadamu. Kwa kawaida watu huunga mkono taifa, kabila, au tabaka lao katika mapambano hayo kwa usemi au kwa njia nyinginezo. Hata watu wasipoingilia mapambano hayo moja kwa moja, mara nyingi wao hujikuta wakipendelea upande mmoja. Lakini wanapounga mkono mtu au upande fulani, kwa kweli wanamuunga mkono nani? Biblia inasema waziwazi hivi: “Ulimwengu mzima unakaa katika nguvu ya mwovu.” (1 Yohana 5:19) Basi mtu anawezaje kuepuka kupotoshwa pamoja na wanadamu wengine? Ni kwa kuunga mkono kabisa Ufalme wa Mungu na kutounga mkono kamwe mapambano ya ulimwengu huu.—Yohana 17:15, 16.
Mbinu Zenye Hila za Yule Mwovu
7. Shetani ametumiaje dini za uwongo kwa hila?
7 Miaka nenda miaka rudi, Shetani amewanyanyasa watu kimwili na kwa maneno ili waache ibada ya kweli. Ametumia pia mbinu zenye hila na ujanja. Amewapofusha watu wengi sana kwa kutumia dini za uwongo, na hivyo kuwafanya wafikiri kwamba wanamtumikia Mungu. Huenda wakavutiwa na dini za kifumbo zinazochochea hisia tu au huenda wakavutiwa na miujiza kwa sababu ya kukosa ujuzi sahihi juu ya Mungu na kutopenda kweli. (2 Wathesalonike 2:9, 10) Lakini tunaonywa kwamba hata baadhi ya waabudu wa kweli, “wataanguka . . . , wakikazia uangalifu matamko yaliyopuliziwa yenye kuongoza vibaya na mafundisho ya roho waovu.” (1 Timotheo 4:1) Jambo hilo linawezekanaje?
8. Shetani anawezaje kutushawishi tujiunge na dini za uwongo hata ingawa tunamwabudu Yehova?
8 Ibilisi hutumia udhaifu wetu kwa hila. Je, bado tunahofu wanadamu? Ikiwa ndivyo, watu wa ukoo au jirani zetu wanaweza kutushurutisha tushiriki desturi fulani za dini za uwongo. Je, tuna kiburi? Ikiwa ndivyo, tunaweza kuudhika tunaposhauriwa au wengine wanapokataa maoni yetu. (Mithali 15:10; 29:25; 1 Timotheo 6:3, 4) Badala ya kubadili maoni yetu ili yapatane na ya Kristo, huenda tukawasikiliza wale ‘wanaotekenya masikio yetu’ kwa kusema kwamba kusoma Biblia na kuishi maisha mema kwatosha. (2 Timotheo 4:3) Shetani hajali tukijiunga na dini nyingine au tukifuata maoni yetu wenyewe ya kidini, maadamu hatumwabudu Yehova kwa kupatana na maagizo ya Neno lake na ya tengenezo lake.
9. Shetani hutumiaje ngono kwa hila ili kutimiza malengo yake?
9 Shetani pia huwashawishi watu kwa hila watosheleze tamaa za kawaida kwa njia zisizofaa. Ametumia tamaa ya ngono. Watu wengi ulimwenguni hupuuza kanuni za Biblia za maadili na wanaona ngono kati ya watu wasiofunga ndoa kuwa raha inayokubalika au wao hufanya ngono ili kuonyesha kwamba wao ni watu wazima. Vipi wale waliofunga ndoa? Wengi wao hufanya uzinzi. Na hata kama hawafanyi uzinzi, wengi humtaliki mwenzi wao au hutengana ili wakae na mtu mwingine. Kwa hila, Shetani hujaribu kuwachochea watu waponde raha sasa, na hivyo kupuuza jinsi jambo hilo litakavyowaathiri wao wenyewe na wengine, na hasa uhusiano wao pamoja na Yehova na Mwanaye.—1 Wakorintho 6:9, 10; Wagalatia 6:7, 8.
10. Shetani hutumia nini kujaribu kupotosha maoni yetu kuhusu jeuri na ukosefu wa maadili?
10 Tamaa nyingine ya kawaida ni ya burudani. Burudani zinazofaa zinaweza kumburudisha mtu kimwili, kiakili na kihisia. Lakini sisi hutendaje Shetani anapotumia kwa ujanja pindi za burudani kujaribu kupotosha fikira zetu ili zisipatane na za Mungu? Kwa mfano, twajua kwamba Yehova anachukia jeuri na ukosefu wa maadili. Lakini mambo hayo yanapoonyeshwa kwenye sinema, televisheni, au michezo ya kuigiza, je, tunaketi kitako tu na kuendelea kuyatazama? Kumbuka Shetani atahakikisha kwamba burudani kama hizo zinazidi kuwa chafu wakati wake wa kutupwa katika abiso unapokaribia, kwa kuwa “watu waovu na walaghai wataendelea kutoka ubaya hadi ubaya zaidi, wakiongoza vibaya na kuwa wenye kuongozwa vibaya.” (2 Timotheo 3:13; Ufunuo 20:1-3) Kwa hiyo tunahitaji kujilinda daima dhidi ya mbinu za Shetani.—Mwanzo 6:13; Zaburi 11:5; Waroma 1:24-32.
11. Mtu anayejua ukweli kuhusu kuwasiliana na roho anaweza kutumbukiaje katika mtego asipokuwa mwangalifu?
11 Tunajua pia kwamba Yehova anachukia kabisa wale wanaowasiliana na roho waovu kwa njia yoyote ile—uaguzi, uchawi, au kujaribu kuwasiliana na wafu. (Kumbukumbu la Torati 18:10-12) Tukikumbuka hivyo, hatuwezi kuthubutu kutafuta habari kutoka kwa wale wanaowasiliana na roho waovu, na hatuwezi kuwakaribisha nyumbani mwetu ili wafanye mambo yao ya kishetani. Lakini je, tutawasikiliza wakionyeshwa kwenye televisheni au katika Internet? Ingawa hatuwezi kamwe kukubali kutibiwa na mchawi, je, tunaweza kufunga hirizi mkononi na kiunoni mwa mtoto wetu mchanga, tukidhani kwamba huenda tukamlinda asirogwe? Kwa kuwa tunajua kwamba Biblia inashutumu watu ambao wanawaroga wengine kwa kupiga mafundo, je, tungemruhusu mtu anayetumia uchawi apumbaze akili zetu?—Wagalatia 5:19-21.
12. (a) Muziki hutumiwaje kutufanya tukubali mambo ambayo twajua hayafai? (b) Mavazi, mtindo wa nywele, au namna ya mtu ya kuongea inawezaje kuonyesha kwamba anavutiwa na watu ambao hawampendezi Yehova? (c) Tunahitaji kufanya nini ikiwa tunataka kuepuka kunaswa na mbinu zenye hila za Shetani?
12 Biblia inasema kwamba uasherati na kila namna ya uchafu haupaswi (kwa makusudi machafu) hata kutajwa miongoni mwetu. (Waefeso 5:3-5) Lakini vipi ikiwa mambo hayo yanatajwa kwenye muziki mtamu wenye kuvutia au wenye mdundo motomoto? Je, tutaanza kurudia-rudia maneno ambayo yanatukuza uasherati, kutumia dawa za kulevya ili kupata raha, na matendo mengine maovu? Na ingawa tunajua kwamba hatupaswi kuwaiga watu wanaotenda mambo hayo, je, tunawaunga mkono kwa kuiga mavazi yao, mitindo yao ya nywele, au namna yao ya kuongea? Shetani hutumia njia zenye hila sana ili kuwashawishi wanadamu wafuate fikira zake potovu. (2 Wakorintho 4:3, 4) Ili tusinaswe na mbinu zake zenye hila, ni lazima tuepuke kuufuata ulimwengu. Tunahitaji kukumbuka ni nani walio “watawala wa ulimwengu wa giza” na kupambana kabisa na uvutano wao.—1 Petro 5:8.
Vifaa Vinavyotusaidia Kushinda
13. Tunawezaje kuushinda ulimwengu unaotawaliwa na Shetani licha ya udhaifu wetu?
13 Kabla hajafa, Yesu aliwaambia hivi mitume wake: “Jipeni moyo! Mimi nimeushinda ulimwengu.” (Yohana 16:33) Wao pia wangeweza kuushinda ulimwengu. Miaka 60 hivi baadaye, mtume Yohana aliandika hivi: “Ni nani ambaye hushinda ulimwengu ila yeye ambaye ana imani kwamba Yesu ndiye Mwana wa Mungu?” (1 Yohana 5:5) Tunaonyesha kwamba tunaamini hivyo kwa kutii amri za Yesu na kulitegemea Neno la Mungu, kama yeye alivyofanya. Tunahitaji kufanya jambo gani jingine? Tunahitaji kushirikiana sana na kutaniko ambalo linamfuata akiwa Kichwa. Tukitenda dhambi, ni lazima tutubu kabisa na kumwomba Mungu msamaha kwa msingi wa dhabihu ya Yesu. Tukifanya hivyo, tunaweza pia kuwa washindi licha ya udhaifu na makosa yetu.—Zaburi 130:3, 4.
14. Soma Waefeso 6:13-17, na utumie maswali na maandiko yaliyoonyeshwa kwenye fungu hili kuzungumzia faida za kila silaha ya kiroho.
14 Ili tufaulu, ni lazima tuvae “suti kamili ya silaha kutoka kwa Mungu,” bila kupuuza silaha yoyote. Tafadhali fungua andiko la Waefeso 6:13-17 kwenye Biblia yako, na usome kuhusu suti hiyo. Kisha unapojibu maswali yafuatayo, fikiria jinsi unavyoweza kufaidika na kulindwa na kila silaha.
‘Viuno vimefungiwa kweli’
Hata ingawa huenda tukajua kweli, kujifunza, kutafakari kweli ya Biblia, na kuhudhuria mikutano kwa ukawaida kunawezaje kutulinda? (1 Wakorintho 10:12, 13; 2 Wakorintho 13:5; Wafilipi 4:8, 9)
“Bamba la kifuani la uadilifu”
Ni nani anayeweka kanuni hiyo ya uadilifu? (Ufunuo 15:3)
Eleza jinsi kutotii kanuni za Yehova za uadilifu kunavyoweza kumdhuru mtu kiroho? (Kumbukumbu la Torati 7:3, 4; 1 Samweli 15:22, 23)
‘Miguu imevishwa vifaa vya habari njema ya amani’
Tunapata ulinzi gani tunapoenda kuwaambia wengine kuhusu njia ya Mungu ya kuleta amani? (Zaburi 73:2, 3; Waroma 10:15; 1 Timotheo 5:13)
“Ngao kubwa ya imani”
Tukiwa na imani iliyo thabiti kabisa, tutatendaje tunapokabili hali zinazokusudiwa kututia shaka au hofu? (2 Wafalme 6:15-17; 2 Timotheo 1:12)
“Kofia ya chuma ya wokovu”
Tumaini la wokovu linawezaje kumzuia mtu asihangaikie mno vitu vya kimwili? (1 Timotheo 6:7-10, 19)
“Upanga wa roho”
Nyakati zote tunapaswa kutegemea nini tunapopambana na mambo yanayohatarisha hali yetu ya kiroho au ya wengine? (Zaburi 119:98; Mithali 3:5, 6; Mathayo 4:3, 4)
Tunapaswa kufanya nini zaidi ili kushinda vita vya kiroho? Tunapaswa kufanya hivyo mara ngapi? Na kwa niaba ya nani? (Waefeso 6:18, 19)
15. Tunawezaje kupambana kwa bidii katika vita vya kiroho?
15 Tukiwa askari wa Kristo, sisi ni sehemu ya jeshi kubwa linaloshiriki vita vya kiroho. Tukiendelea kuwa chonjo na kutumia vyema silaha zote kutoka kwa Mungu, hatutashindwa katika vita hivyo. Badala yake, tutawatia nguvu watumishi wenzetu wa Mungu. Tutakuwa tayari na kuwa na hamu ya kupambana kwa bidii katika vita hivyo kwa kueneza habari njema za Ufalme wa Kimesiya wa Mungu, serikali ya kimbingu ambayo inapingwa vikali na Shetani.
Mazungumzo ya Kurudia
• Kwa nini waabudu wa Yehova hawaungi mkono kamwe mapambano ya ulimwengu?
• Taja baadhi ya mbinu zenye hila zinazotumiwa na Shetani kuwaangamiza Wakristo kiroho?
• Silaha za kiroho ambazo Mungu ameandaa zinatulindaje katika vita vya kiroho?
[Picha kaitika ukurasa wa 76]
Mataifa yanakusanywa kwenye Har–Magedoni