Yehova—Mungu Afunuaye Siri

“Yuko Mungu mbinguni afunuaye siri.”—DANIELI 2:28.

1, 2. (a) Yehova anatofautianaje na Mpinzani wake mkubwa? (b) Wanadamu huonyeshaje tofauti hiyo?

YEHOVA, Mungu wa ulimwengu wote mzima aliye mkuu kuliko wote na mwenye upendo, Muumba mmoja na wa pekee, ni Mungu wa hekima na haki. Hahitaji kuficha utambulisho wake, kazi zake au makusudi yake. Kwa wakati wake mwenyewe na kwa busara yake mwenyewe, yeye hujifunua. Kwa njia hiyo yeye hutofautiana na Mpinzani wake, Shetani Ibilisi, anayejaribu kuficha utambulisho wake wa kweli na nia zake.

² Kama tu vile Yehova na Shetani wanavyotofautiana kabisa, ndivyo walivyo waabudu wao. Wanaofuata uongozi wa Shetani wana sifa ya kuwa na nyutu mbili na udanganyaji. Wao hujaribu kujionyesha wenyewe kuwa wafadhili, huku wakifanya kazi za giza. Wakristo Wakorintho waliambiwa wasishangazwe na jambo hilo la hakika. “Kwa maana watu wa namna hiyo ni mitume wasio wa kweli, wafanyakazi wenye udanganyifu, wakijigeuza umbo wenyewe kuwa mitume wa Kristo. Na si ajabu, kwa maana Shetani mwenyewe hufuliza kujigeuza umbo mwenyewe kuwa malaika wa nuru.” (2 Wakorintho 11:13, 14) Kwa upande mwingine, Wakristo humtegemea Kristo akiwa Kiongozi wao. Alipokuwa duniani alirudisha kikamilifu utu wa Baba yake, Yehova Mungu. (Waebrania 1:1-3) Hivyo, kwa kumfuata Kristo, Wakristo wanamwiga Yehova, Mungu wa kweli, wa udhahiri, na wa nuru. Wao pia hawana uhitaji wa kuficha utambulisho wao, kazi zao, au makusudi yao.—Waefeso 4:17-19; 5:1, 2.

3. Twaweza kukanushaje lile shtaka la kwamba watu wanaokuwa Mashahidi wa Yehova wanashurutishwa kujiunga na “farakano la siri”?

³ Nyakati ajuazo kuwa ni bora zaidi, Yehova hufunua kinaganaga makusudi yake na habari juu ya wakati ujao ambao hapo awali haukujulikana kwa wanadamu. Katika maana hiyo yeye ni Mungu afunuaye siri. Hivyo, watu wanaotaka kumtumikia wanaalikwa—ndiyo wanasihiwa sana—wajifunze habari hizo zilizofunuliwa. Uchunguzi uliofanywa mwaka wa 1994 wa Mashahidi zaidi ya 145,000 katika nchi moja ya Ulaya ulifunua kwamba, kwa wastani, kila mmoja wao alichunguza kibinafsi mafundisho ya Mashahidi wa Yehova kwa miaka mitatu kabla ya kuchagua kuwa Shahidi. Walifanya uchaguzi wao kulingana na hiari yao wenyewe bila kushurutishwa. Na wakaendelea kuwa na uhuru wa hiari na wa kutenda. Kwa kielelezo, kwa sababu wachache walikuja kutokubaliana na viwango vya juu vya adili kwa ajili ya Wakristo, baadaye baadhi yao waliamua kwamba hawakutaka kuendelea wakiwa Mashahidi. Hata hivyo, inapendeza kwamba, katika miaka mitano iliyopita, sehemu kubwa ya hao waliokuwa Mashahidi walichukua hatua ya kurudia ushirika na utendaji wao wakiwa Mashahidi.

4. Ni nini ambacho hakipaswi kuwasumbua Wakristo, na kwa nini?

⁴ Bila shaka, si wote waliokuwa Mashahidi hapo zamani hurudi, na miongoni mwao mna baadhi ya wale waliokuwa na nyadhifa za madaraka ndani ya kutaniko la Kikristo. Hilo halipasi kuwa lenye kushangaza, kwa kuwa hata mmoja wa wafuasi wa karibu zaidi wa Yesu, mtume Yudasi, aligeukia mbali. (Mathayo 26:14-16, 20-25) Lakini je, hiyo ni sababu ya kusumbuka juu ya Ukristo wenyewe? Je, hilo labatilisha mafanikio wanayopata Mashahidi wa Yehova wakiendeleza utendaji wao wa kuelimisha? La hasha, kama tu vile utendaji wa kusaliti wa Yudasi Iskariote haukusimamisha makusudi ya Mungu.

Mweza Yote na Bado Mwenye Upendo

5. Twajuaje kwamba Yehova na Yesu wanawapenda wanadamu, nao wameonyeshaje upendo huo?

⁵ Yehova ni Mungu wa upendo. Yeye huwajali watu. (1 Yohana 4:7-11) Ujapokuwa wadhifa wake mtukufu, yeye hufurahia kuwafanya wanadamu wawe marafiki wake. Twasoma hivi kuhusu mmoja wa watumishi wake wa kale: “‘Abrahamu aliweka imani katika Yehova, na ilihesabiwa kwake kuwa uadilifu,’ naye akaja kuitwa ‘rafiki ya Yehova.’” (Yakobo 2:23; 2 Mambo ya Nyakati 20:7; Isaya 41:8) Kama vile wanadamu walio marafiki hushiriki pamoja mambo ya siri, ndivyo Yehova afanyavyo na marafiki wake. Kwa habari hii Yesu alimwiga Baba yake, kwa kuwa alifanya urafiki na wanafunzi wake naye alishiriki siri pamoja nao. “Siwaiti nyinyi tena watumwa,” akawaambia, “kwa sababu mtumwa hayajui yale afanyayo bwana-mkubwa wake. Lakini nimewaita nyinyi marafiki, kwa sababu mambo yote ambayo nimeyasikia kutoka kwa Baba yangu nimewajulisha nyinyi.” (Yohana 15:15) “Siri” zinazoshirikiwa kati ya Yehova, Mwana wake, na marafiki wao huwaunganisha katika kifungo kisichoweza kuvunjika cha upendo na ujitoaji.—Wakolosai 3:14.

6. Kwa nini Yehova hahitaji kuficha nia zake?

⁶ Maana ya jina Yehova, “Yeye Husababisha Iwe,” huonyesha uwezo wake wa kuwa chochote anachohitaji kuwa ili kutimiza kusudi lake. Tofauti na wanadamu, Yehova hana uhitaji wa kuficha nia zake kwa sababu ya kuhofu kwamba huenda wengine wakaweza kumzuia kuyatimiza. Kwa wazi hawezi kushindwa, kwa hiyo yeye hufunua waziwazi katika Neno lake, Biblia, mengi ya yale anayokusudia kufanya. Anaahidi hivi: “Neno langu . . . halitanirudia bure, bali litatimiza mapenzi yangu, nalo litafanikiwa katika mambo yale niliyolituma.”—Isaya 55:11.

7. (a) Yehova alitabiri nini katika Edeni, na Shetani alimthibitishaje Mungu kuwa wa kweli? (b) Ile kanuni kwenye 2 Wakorintho 13:8 inakuwaje ya kweli sikuzote?

⁷ Muda mfupi baada ya uasi katika Edeni, Yehova alifunua kwa muhtasari tokeo la mwisho la ubishi wenye kuendelea kati yake na Mpinzani wake, Shetani. Mbegu iliyoahidiwa ya Mungu ingechubuliwa kwa maumivu makali, bali si kwa kufishwa, ilhali Shetani hatimaye angepata chubuo lenye kufisha. (Mwanzo 3:15) Katika mwaka wa 33 W.K., Ibilisi kwa kweli aliichubua Mbegu, Kristo Yesu, kwa kusababisha kifo chake. Kwa njia hiyo, Shetani alitimiza Maandiko na wakati huohuo akamthibitisha Yehova kuwa Mungu wa kweli, ingawaje hiyo haikuwa nia ya Shetani. Kuchukia kwake kweli na uadilifu, pamoja na mtazamo wake wenye kiburi na wa kutotubu, zilimwongoza kufanya yale tu Mungu alikuwa ametabiri angefanya. Ndiyo, kwa wapingaji wote wa kweli, hata kwa Shetani mwenyewe, hii kanuni ni ya kweli: “Hatuwezi kufanya jambo lolote dhidi ya kweli, bali kwa ajili tu ya kweli.”—2 Wakorintho 13:8.

8, 9. (a) Shetani anajua nini, lakini je, ujuzi huo huzuia kutekelezwa kwa makusudi ya Yehova? (b) Ni onyo gani la wazi ambalo wapinzani wa Yehova wanapuuza, na kwa nini?

⁸ Tangu Ufalme wa Mungu uliposimamishwa bila kuonekana katika mwaka wa 1914, andiko la Ufunuo 12:12 limetumika: “Kwa ajili ya hili teremeni, nyinyi mbingu nanyi mkaao ndani yazo! Ole wa dunia na wa bahari, kwa sababu Ibilisi ameteremka kwenu, akiwa na hasira kubwa, akijua ana kipindi kifupi cha wakati.” Hata hivyo, je, kujua kwa Shetani kwamba wakati wake ni mfupi kwamfanya abadili mwendo wake? Kufanya hivyo kungekuwa kukubali kwa Shetani kwamba Yehova ni Mungu wa kweli na kwamba akiwa Mtawala Mkuu Kuliko Wote, yeye pekee ndiye astahiliye ibada. Hata hivyo, Ibilisi hayuko tayari kukubali ushinde, ingawa anajua mambo hayo ya hakika juu ya Yehova.

⁹ Yehova hufunua waziwazi litakalotokea Kristo atakapokuja kutekeleza hukumu dhidi ya mfumo wa ulimwengu wa Shetani. (Mathayo 24:29-31; 25:31-46) Kwa habari hiyo, Neno lake hutangaza kuhusu watawala wa ulimwengu hivi: “Wakati wowote ule ambao wanasema: ‘Amani na usalama!’ ndipo uharibifu wa ghafula utakapokuwa hapohapo juu yao kama vile maumivu makali ya ghafula ya taabu juu ya mwanamke mwenye mimba.” (1 Wathesalonike 5:3) Wanaofuata uongozi wa Shetani wanapuuza onyo hilo la wazi. Wamepofushwa kwa sababu ya mioyo yao miovu, na hilo huwazuia kutubu njia zao zenye uovu na kubadili mipango yao na mkakati wao zinazojaribu kuzuia makusudi ya Yehova.

10. (a) Wathesalonike wa Kwanza 5:3 huenda likawa limekuwa na utimizo kwa kadiri gani, lakini watu wa Yehova wapaswa kuitikiaje? (b) Kwa nini watu wasio na imani waweza kuwa wajasiri zaidi wakati ujao katika kupinga watu wa Mungu?

¹⁰ Hasa tangu 1986, Umoja wa Mataifa ulipotangaza Mwaka wa Kimataifa wa Amani, ulimwengu umejawa na majadiliano juu ya amani na usalama. Hatua dhahiri zimechukuliwa katika kujitahidi kupata amani ya ulimwengu, yaonekana kukiwa na kiasi fulani cha mafanikio. Je, huo ndio utimizo wote wa unabii huu, au twaweza kutarajia tangazo lenye kushtusha la aina fulani wakati ujao? Yehova ataweka wazi jambo hilo kwa wakati wake. Kwa wakati uliopo, na tukae macho kiroho, “[tu]kingojea na kuweka karibu akilini kuwapo kwa siku ya Yehova.” (2 Petro 3:12) Wakati uzidipo kupita bado kukiwa na majadiliano zaidi juu ya amani na usalama, watu fulani ambao wanajua juu ya onyo hilo, lakini wanaochagua kulipuuza, huenda wakawa wakaidi wakidhani kwamba Yehova hatatimiza neno lake, au hana uwezo wa kulitimiza. (Linganisha Mhubiri 8:11-13; 2 Petro 3:3, 4.) Lakini Wakristo wa kweli wanajua kwamba Yehova atatimiza kusudi lake!

Staha Ifaayo kwa Mawakili Anaotumia Yehova

11. Danieli na Yosefu walijifunza nini juu ya Yehova?

¹¹ Mfalme Nebukadreza, mtawala wa Milki ya Babiloni Jipya, alipopata ndoto yenye kusumbua ambayo hangeweza kuikumbuka, aliomba msaada. Makuhani wake, wafanya-mizungu, na wachawi hawakuweza wala kumwambia ndoto yake ilikuwa nini wala kumfafanulia ilichomaanisha. Hata hivyo, mtumishi wa Mungu Danieli, aliweza kufanya hivyo, ingawa alikiri kwa utayari kwamba kufunuliwa kwa hiyo ndoto na maana yayo hakukuwa tokeo la hekima yake mwenyewe. Danieli alisema hivi: “Yuko Mungu mbinguni afunuaye siri, naye amemjulisha mfalme Nebukadreza mambo yatakayokuwa siku za mwisho.” (Danieli 2:1-30) Karne nyingi mapema, Yosefu, nabii mwingine wa Mungu, vilevile alikuwa amejionea kwamba Yehova ni Mfunuaji wa siri.—Mwanzo 40:8-22; Amosi 3:7, 8.

12, 13. (a) Ni nani aliyekuwa nabii mkubwa kupita wote wa Mungu, na kwa nini wajibu hivyo? (b) Ni nani leo wanaotumika wakiwa “wasimamizi-nyumba wa siri takatifu za Mungu,” nasi twapaswa kuwaonaje?

¹² Nabii mkubwa kupita wote wa Yehova, aliyepata kutumika duniani alikuwa Yesu. (Matendo 3:19-24) Paulo alieleza hivi: “Mungu, ambaye zamani za kale katika vipindi vingi na katika njia nyingi alisema na baba zetu wa zamani kwa njia ya manabii, mwishoni mwa siku hizi amesema nasi kwa njia ya Mwana, aliyemweka rasmi kuwa mrithi wa vitu vyote, na ambaye kupitia yeye aliifanya mifumo ya mambo.”—Waebrania 1:1, 2.

¹³ Yehova alisema na Wakristo wa mapema kupitia Mwana wake Yesu, ambaye aliwajulisha siri za kimungu. Yesu aliwaambia hivi: “Nyinyi mmeruhusiwa kuzielewa siri takatifu za ufalme wa Mungu.” (Luka 8:10) Baadaye Paulo aliwasema Wakristo watiwa-mafuta kama walio “chini ya Kristo na wasimamizi-nyumba wa siri takatifu za Mungu.” (1 Wakorintho 4:1) Leo, Wakristo watiwa-mafuta wanaendelea kutumikia hivyo, wakifanyiza jamii ya mtumwa mwaminifu na mwenye busara ambaye kupitia kwa Baraza lake Linaloongoza huandaa chakula cha kiroho kwa wakati ufaao. (Mathayo 24:45-47) Ikiwa twastahi sana manabii waliopuliziwa wa Mungu wa siku zilizopita, na hasa Mwana wa Mungu, je, hatupaswi kustahi vivyo hivyo wakili wa kibinadamu ambaye Yehova anamtumia leo ili kufunua habari ya Kibiblia iliyo ya lazima sana kwa watu wake katika nyakati hizi zenye hatari?—2 Timotheo 3:1-5, 13.

Udhahiri au Siri?

14. Wakristo hutenda kwa siri wakati gani, hivyo wakifuata kielelezo cha nani?

¹⁴ Je, udhahiri wa Yehova katika kufunua mambo humaanisha kwamba Wakristo wapaswa sikuzote na chini ya hali zote kufunua kila jambo wajualo? Wakristo hufuata shauri la Yesu kwa mitume wake la kuwa “wenye hadhari kama nyoka na bado kuwa wasio na hatia kama njiwa.” (Mathayo 10:16) Wakiambiwa kwamba hawawezi kumwabudu Mungu kama dhamiri zao ziwatakavyo wafanye, Wakristo huendelea “[k]umtii Mungu,” kwa kuwa wanang’amua kwamba hakuna wakili wa kibinadamu aliye na haki ya kuzuia kumwabudu Yehova. (Matendo 5:29) Yesu mwenyewe alionyesha kufaa kwa jambo hilo. Twasoma hivi: “Basi baada ya mambo haya Yesu akaendelea kutembea huku na huku katika Galilaya, kwa maana hakutaka kutembea huku na huku katika Yudea, kwa sababu Wayahudi walikuwa wakitafuta sana kumuua. Hata hivyo, msherehekeo wa Wayahudi, msherehekeo wa matabenakulo, ulikuwa karibu. Kwa hiyo Yesu akawaambia [ndugu zake wa kimwili wasioamini]: . . . ‘Nyinyi pandeni kwenda kwenye msherehekeo; mimi bado sipandi kwenda kwenye msherehekeo huu, kwa sababu wakati wangu upasao bado haujaja kikamili.’ Kwa hiyo baada ya kuwaambia mambo haya, akabaki Galilaya. Lakini ndugu zake walipokuwa wamepanda kwenda kwenye msherehekeo, ndipo yeye mwenyewe pia akapanda kwenda, si waziwazi bali kama katika siri.”—Yohana 7:1, 2, 6, 8-10.

Kufunua au Kutofunua?

15. Yosefu alionyeshaje kwamba kuweka siri huwa ni tendo lenye upendo nyakati nyingine?

¹⁵ Katika visa fulani, kuweka jambo likiwa siri ni jambo lenye hekima na pia lenye upendo. Kwa kielelezo, Yosefu, baba mwasilishaji wa Yesu, aliitikiaje alipopata kujua kwamba bibi-arusi wake aliyeposwa, Maria, alikuwa na mimba? Twasoma hivi: “Hata hivyo, Yosefu mume wake, kwa sababu alikuwa mwadilifu na hakutaka kumfanya kuwa kitu cha kutazamwa na watu wote, alikusudia kumtaliki kwa siri.” (Mathayo 1:18, 19) Ungekuwa ukosefu wa fadhili kama nini kumfanya awe kitu cha kutazamwa na watu wote!

16. Wazee na pia washiriki wengine wote wa kutaniko wana daraka gani kwa habari ya mambo ya siri?

¹⁶ Mambo ya siri ambayo yangeweza kusababisha aibu au maumivu hayapasi kufunuliwa kwa watu wasiostahili. Wazee Wakristo hukumbuka hilo walazimikapo kutoa shauri la kibinafsi au kufariji Wakristo wenzao au hata yawezekana kuwatolea nidhamu kwa sababu ya kutenda dhambi nzito dhidi ya Yehova. Kushughulikia mambo hayo katika njia ya Kimaandiko ni kwa lazima; kufunua mambo ya siri kwa wasiohusika hakuhitajiki na ni ukosefu wa upendo. Bila shaka, washiriki wa Kutaniko la Kikristo hawatajaribu kupeleleza habari ya siri kutoka kwa wazee bali watastahi daraka la wazee la kuweka mambo ya siri yakiwa siri. Mithali 25:9 husema hivi: “Ujitetee na mwenzako peke yake; bali usiifunue siri ya mtu mwingine.”

17. Kwa nini Wakristo huweka mambo ya siri yakiwa siri katika visa vilivyo vingi, lakini kwa nini hawawezi kufanya hivyo sikuzote?

¹⁷ Kanuni hiyo pia hutumika katika washiriki wa familia au miongoni mwa marafiki wa karibu. Kuweka mambo fulani yakiwa siri ni muhimu ili kuepuka kutoelewana mbalimbali na mahusiano yenye mkazo. “Upepo wa kusi huleta mvua; vile vile asingiziaye huleta uso wa ghadhabu.” (Mithali 25:23) Bila shaka, pindi kwa pindi uaminifu-mshikamanifu kwa Yehova na kanuni zake za uadilifu, na pia upendo kwa watu mmoja-mmoja wanaokosa, zaweza kufanya iwe lazima kuwaambia wazazi, wazee Wakristo, au wengine wastahilio hata mambo yaliyo siri.a Lakini katika visa vilivyo vingi, Wakristo huweka mambo ya kibinafsi ya wengine yakiwa siri, wakiyalinda kama vile wangelinda mambo yao.

18. Ni sifa gani tatu za Wakristo ziwezazo kutusaidia kuamua tupaswalo kusema na tusilopaswa kusema?

¹⁸ Kwa muhtasari, Mkristo humwiga Yehova kwa kuweka mambo fulani yakiwa siri inapohitajika, akiyafunua inapofaa tu. Katika kuamua apaswayo kusema na asiyopaswa kusema, anaongozwa na unyenyekevu, imani, na upendo. Unyenyekevu humzuia kutilia chumvi umaana wake mwenyewe, akijaribu kuwapendeza wengine kwa kuwaambia kila kitu anachojua au kwa kuwatamanisha bure na siri ambazo hawezi kusema. Imani katika Neno la Yehova na kutaniko la Kikristo humchochea kuhubiri habari za Kibiblia zenye kuandaliwa na Mungu huku akijihadhari kusema mambo yawezayo kuwaudhi wengine mwanzoni. Ndiyo, upendo humchochea kusema kwa udhahiri mambo yamtukuzayo Mungu na ambayo watu wanahitaji kujua ili kupata uhai. Kwa upande mwingine, mambo ya kibinafsi yaliyo siri, huyalinda, akitambua kwamba katika visa vilivyo vingi kuyafunua kungekuwa wonyesho wa ukosefu wa upendo.

19. Ni mwendo gani wa kutenda ambao husaidia kutambulisha Wakristo wa kweli, nao hutokeza nini?

¹⁹ Mfikio huo wenye kusawazika husaidia kutambulisha Wakristo wa kweli. Hawafichi utambulisho wa Mungu kwa kutotumia jina lake au kwa kukubali kirasmi na kutumia fundisho la kifumbo la Utatu lisiloweza kufafanuliwa. Miungu isiyojulikana ni kawaida ya dini isiyo ya kweli wala si kawaida ya dini ya kweli. (Ona Matendo 17:22, 23.) Mashahidi watiwa-mafuta wa Yehova kwa kweli wanathamini pendeleo la kuwa “wasimamizi-nyumba wa siri takatifu za Mungu.” Kwa kufunua kwa udhahiri siri hizo kwa wengine, wanasaidia kuvuta watu wenye moyo wa haki watafute urafiki wa Yehova.—1 Wakorintho 4:1; 14:22-25; Zekaria 8:23; Malaki 3:18.

[Maelezo ya Chini]

Ungejibuje?

◻ Kwa nini Yehova hahitaji kuficha nia zake?

◻ Yehova huwafunulia nani siri zake?

◻ Wakristo wana daraka gani kwa habari ya mambo ya siri?

◻ Ni sifa gani tatu zitakazowasaidia Wakristo kujua la kusema na la kutosema?

[Picha katika ukurasa wa 8, 9]

Yehova hufunua siri kupitia Neno lake