Wajumbe wa Amani ya Kimungu Wakusanyika

“TUMEJENGWA na kila mkusanyiko wa wilaya ambao tumehudhuria,” asema mzee Mkristo kutoka Marekani. “Hata hivyo, mwaka huu ulikuwa usioelezeka. Kila siku tuliondoka tukijiuliza jinsi siku itakayofuata ingepita mataraja yetu, nasi hatukutamaushwa!”

Ikiwa ulihudhuria mojawapo ya Mikusanyiko ya Wilaya ya “Wajumbe wa Amani ya Kimungu,” bila shaka utakubaliana na mjumbe huyu mwenye idili. Kila siku ya mkusanyiko huo ilielekeza fikira kwenye sehemu tofauti ya utume ambao Mashahidi wa Yehova wanatimiza wakiwa wajumbe wa Mungu. Acheni tupitie hiyo programu ya siku tatu.

‘Jinsi Alivyo Mwenye Kupendeza Atangazaye Habari Njema’

Hicho ndicho kilichokuwa kichwa cha siku ya kwanza ya Mkusanyiko. Kilitegemea Isaya 52:7. Katika nyakati hizi ngumu, wengi wanamtumikia Yehova chini ya hali ngumu. Ile hotuba “Kusikia Kutoka kwa Wapiga-Mbiu wa Amani Wenye Bidii” ilitia ndani mahojiano pamoja na baadhi ya waaminifu hao. Kusikia maneno yao wenyewe kulitia moyo kwelikweli, na hivyo wakusanyikaji walihakikishiwa kwamba Yehova aweza kuwatia nguvu wao pia, hata akiwaandalia “nguvu ipitayo iliyo ya kawaida” ili iwasaidie wavumilie.—2 Wakorintho 4:7.

Matakwa ya Yehova si yenye kulemea. (1 Yohana 5:3) Wasikilizaji walieleweshwa wazi katika hotuba ya mwisho ya programu ya asubuhi, iliyofikia upeo kwa kutolewa kwa broshua yenye kurasa 32 Mungu Anataka Tufanye Nini? Msaada huo mpya wa kujifunza wenye vielezi vizuri bila shaka utakuwa na fungu la maana katika kusaidia wengi zaidi wajifunze juu ya makusudi ya Mungu. Maelezo juu ya matumizi ya kichapo hicho kipya yanapatikana katika makala ya funzo ya mwisho katika gazeti hili na kwenye kurasa 16 na 17.

Ile hotuba “Kuvumilia Katika Kazi Iliyo Njema” ilikazia kwamba Yehova ajua sana majaribu yetu. Kuvumilia humaanisha kwamba tusimame imara na tusipoteze tumaini. Yehova ametupa sisi Neno lake, roho yake, na tengenezo lake ili kutusaidia. Kuhubiri hutaka uvumilivu, nako kuhubiri hutusaidia kuvumilia, kwa kuwa huko hudumisha imani yetu ikiwa hai. Tukiwa tumekaribia sana mstari wa kumalizia, tusiache matatizo yetu yadidimize bidii yetu, kwa kuwa wale tu wanaovumilia hadi mwisho ndio watakaookolewa.—Mathayo 24:13.

Hotuba ya msingi, “Fungu Letu Tukiwa Wajumbe wa Amani ya Kimungu,” ilielekezea uangalifu kule kuachiliwa kwa wahamishwa Wayahudi toka Babiloni na kurudishwa kwa ibada safi katika Yerusalemu katika 537 K.W.K. Tukio hilo, msemaji alieleza, lilikuwa mwonjo wa kimbele tu wa yale ambayo Ufalme wa Mungu utatimiza karibuni ulimwenguni pote. (Zaburi 72:7; Isaya 9:7) Mgawo wetu wa sasa ni kuhubiri habari njema juu ya Ufalme huo na kuishi kwa kupatana na ujumbe huo. Kumpenda Mungu na jirani kwapaswa kutusukuma kuendelea katika kazi hii bila kuacha.—Matendo 5:42.

Jambo kuu la programu ya Ijumaa lilikuwa ule mfululizo wa hotuba “Jihadharini na Mitego Iliyofichwa ya Vitumbuizo.” Muziki, sinema, vidio, maonyesho ya televisheni, michezo ya vidio, vitabu, magazeti, na vitabu vya ucheshi mara nyingi huonyesha kufikiri kwa roho waovu. Kwa hiyo, twahitaji ‘kukirihi lililo ovu’ na ‘kuambatana na lililo jema.’ (Waroma 12:9) Ndiyo, lazima tuone vitumbuizo vyenye ufisadi kuwa vyenye kuchukiza na kuviepuka, huku tukidumu katika mambo yaliyo safi, yenye wema wa adili, na yenye kustahili sifa. (Wafilipi 4:8) Vichapo na vifaa vya utafiti vinavyoandaliwa na tengenezo la Yehova huchochea akili zetu kwa mawazo yenye kujenga navyo hutuzoeza kutofautisha lililo sahihi na lililo kosa. (Waebrania 5:14) Lazima tuambatane na maandalizi hayo kama vile tungeambatana na chelezo kwenye bahari iliyochafuka.

Kisha ikaja ile hotuba “Mpinge Ibilisi—Usivumilie Ushindani.” Maelfu ya Waisraeli walianguka katika ukosefu wa adili muda mfupi kabla ya wao kuingia katika Bara Lililoahidiwa. Finehasi hakuvumilia ushindani wowote kuelekea ibada ya kweli. Alichukua hatua ya kukata maneno dhidi ya wakosaji, na ujitoaji wake usiohusisha wengine ulimfurahisha Yehova. (Hesabu 25:1-13) Lengo la Shetani ni kufanya kila mmoja wetu asistahili kuingia katika ulimwengu mpya wa Mungu. Kwa hiyo, sawa na Finehasi, lazima tupinge jitihada za Ibilisi za kutuchafua. Tuwe tumefunga ndoa au tu waseja, twapaswa ‘kuukimbia uasherati.’—1 Wakorintho 6:18.

Hotuba ya kumalizia siku ya kwanza ya mkusanyiko ilikuwa “Kutegemeza Ukweli wa Neno la Mungu kwa Uaminifu-Mshikamanifu.” Watafsiri wengi hubadili au huruka visehemu vya Maandiko. Mathalani, ili kuwapendeza watetezi wa haki za wanawake, watafsiri wa The New Testament and Psalms: An Inclusive Version hawamrejezei Mungu, kuwa Baba, bali Baba-Mama, na Yesu Kristo hurejezewa kuwa “yule Aliye wa Kibinadamu” badala ya “Mwana wa Binadamu.” Kwa kutofautisha, Tafsiri ya Ulimwengu Mpya hushikamana kiaminifu sana na maandishi ya lugha ya awali hivi kwamba imeelewesha wazi kufikiri kwetu juu ya mambo kadhaa ya Kimaandiko. Kwa kielelezo, msemaji alisema hivi: “Ni zile fasiri sahihi katika Tafsiri ya Ulimwengu Mpya zilizoandalia msingi kupanga kwetu upya makutaniko kwa kuweka rasmi mabaraza ya wazee, kwa kupatana zaidi na kigezo kilichowekwa na kutaniko la Kikristo la karne ya kwanza.” Twaonyesha uaminifu-mshikamanifu wetu kwa Neno la Mungu kwa kulisoma kila siku na kwa kutumia shauri lalo. Msemaji alisema hivi pia: “Twaonyesha kwamba sisi ni waungaji-mkono waaminifu-washikamanifu wa Neno la Mungu kwa kulihubiri wengine kwa bidii na kwa kulitumia kwa uangalifu tunapofundisha wengine, bila kujaribu kamwe kulifanya lifaane na maoni yetu kwa kupotosha au kuongezea yale linayosema.”

‘Amani ya Mungu Huzidi Fikira Yote’

Kichwa hicho, chenye kutegemea Wafilipi 4:7, kiliwekea msingi siku ya pili ya mkusanyiko. Nyingi za habari zilizotolewa zilishughulikia mtazamo unaofaa wa huduma, familia, wakfu wa mtu, na nyanja nyinginezo za maisha ya kila siku.

Baada ya mazungumzo juu ya andiko la siku hiyo, mfululizo wa hotuba ulitolewa wenye kichwa “Wajumbe Wanaoleta Habari Njema ya Amani.” Ujumbe wetu ni wa amani, nao wapaswa kutolewa kwa njia ya amani. (Waefeso 6:15) Kusudi letu ni kufikia mioyo, si kushinda majibizano. Mazoezi na vichapo tunavyopokea kutoka tengenezo la Yehova hutusaidia kufanya hilo. Tusiache ubaridi au kutopendezwa kutuvunje moyo. Badala ya hivyo, twapaswa kuendelea kufanya ‘yote tuwezayo kabisa,’ kwa kuwa na kawaida nzuri ya funzo la kibinafsi, hudhurio la mikutano, na kushiriki katika kazi ya kuhubiri. (2 Timotheo 2:15) Jambo lisilopaswa kusahauliwa ni kule kufanya mema kuelekea wengine, hasa kuelekea wale ambao katika imani ni jamaa zetu. (Wagalatia 6:10) Bila shaka, kufanya yote tuwezayo kabisa hakumaanishi kufanya mambo kupita kiasi. Lolote awezalo kufanya mtu kulingana na uwezo na hali zake mwenyewe, lakubalika kwa Yehova.

Watu wa Mungu hutoa wakati wao, nishati zao, na mali zao ili kuendeleza masilahi ya Ufalme. Ile hotuba “Upaji Mchangamfu Ndani ya Tengenezo la Yehova” ilionyesha kwamba huku wengi zaidi wenye mfano wa kondoo wanapoitikia ujumbe wa Ufalme, kuna uhitaji wa kuwa na vifaa zaidi, mahali zaidi pa kukutania, na ofisi za tawi zaidi. Michango yetu huwezesha tengenezo liwe na chochote kinachohitajiwa ili kutimiliza kazi ya kuhubiri ulimwenguni pote. Utoaji wenye ukarimu pia humheshimu Yehova na kumletea mtoaji shangwe. Kwa hiyo, tukiwa Wakristo, hatupaswi kupuuza sehemu hiyo ya maana ya Ibada yetu.—2 Wakorintho 8:1-7.

Kipindi cha asubuhi kilimalizika kwa hotuba ya ubatizo—hotuba ambayo sikuzote huwa jambo kuu katika makusanyiko makubwa ya Mashahidi wa Yehova. Ni shangwe kama nini kuona watu ambao wamejiweka wakfu karibuni wakifuata hatua za miguu za Yesu kwa kunyenyekea ubatizo wa maji! (Mathayo 3:13-17) Wale wote wanaochukua hatua hiyo wameelimishwa kutokana na chanzo kikubwa zaidi cha hekima—Biblia. Isitoshe, wamepata kusudi halisi maishani, nao wamepata baraka ya amani itokanayo na kujua kwamba wanafanya lililo sahihi.—Mhubiri 12:13.

Shauri la moja kwa moja lilitolewa katika ile hotuba “Acha Ufahamu Ukulinde Salama.” Ufahamu ni wa maana sana kuhusiana na shughuli za kibiashara. Hatupaswi kuendeleza utendaji mbalimbali wa biashara ya kibinafsi katika Jumba la Ufalme, wala hatupaswi kutumia vibaya Wakristo wenzetu ili kupata faida ya kifedha. (Linganisha Yohana 2:15, 16.) Ufahamu wahitajiwa pia wakati wa kuweka fedha ili kupata faida katika biashara au wakati wa kukopa au kukopesha fedha. “Kutofaulu kwa biashara za kujasiria miongoni mwa Wakristo kumeongoza kwenye hali ya kukata tamaa na hata kupoteza hali ya kiroho kwa upande wa watu fulani ambao wamejihusisha kwa haraka katika mipango hatari ya kupata fedha,” akasema msemaji. Ingawa si vibaya kwa Wakristo kufanya biashara mmoja na mwenzake, ni jambo la hekima kuwa na hadhari. Na makubaliano ya kibiashara yafanywapo kati ya pande mbili, sikuzote masharti yapasa kuandikwa.

Kiwango cha Mungu kwa wanaume na wanawake kilizungumzwa katika ile hotuba “Mwanamume na Mwanamke Aliwaumba.” Mafungu ya jinsia mbalimbali yamepotoshwa katika historia yote. “Watu wengi huhusianisha ukiume kimakosa na utawala usio na huruma, ukatili, au kiburi cha kiume,” akasema msemaji. “Katika tamaduni fulani ingekuwa nadra, hata jambo la aibu, kwa mwanamume kulia machozi hadharani au hata faraghani. Hata hivyo, Yohana 11:35 hueleza kwamba alipokuwa miongoni mwa umati nje ya kaburi la Lazaro, ‘Yesu akalia machozi.’” Vipi juu ya wanawake? Ukike mara nyingi huhusianishwa na uvutio wa kimwili. Lakini msemaji aliuliza hivi: “Ikiwa mwanamke ni mrembo lakini anakosa busara na ni mwenye kubishana, mwenye kukejeli, au mwenye kichwa kigumu, je, aweza kikweli kuwa mrembo katika maana halisi ya neno hilo, wa kike kikweli?” (Linganisha Mithali 11:22; 31:26.) Katika usemi wao, mwenendo wao, na kujipamba kwao, wanaume na wanawake Wakristo hujitahidi kufuata viwango vya Biblia. Msemaji alisema hivi: “Ni rahisi kumheshimu mwanamume anayedhihirisha matunda ya roho, na ni rahisi kumpenda mwanamke anayefanya hivyo.”—Wagalatia 5:22, 23.

Kisha ukaja ule mfululizo wa hotuba wenye kichwa “Mungu wa Amani Hukujali Wewe.” Wakristo wengi wana mahangaiko ya kifedha. Hata hivyo, Yehova huahidi hivi: “Hakika sitakuacha kwa vyovyote wala kukuachilia mbali kwa vyovyote.” (Waebrania 13:5) Yajapokuwa magumu ya kiuchumi, watu fulani wameonyesha uhakika katika ahadi hiyo kwa kuingia katika utumishi wa upainia msaidizi au wa kawaida. Wengine ambao hawawezi kupainia sasa wanatanguliza masilahi ya Ufalme kwa kutwaa kila fursa ya kutoa ushahidi. (Mathayo 6:33) Jitihada zote hizo zastahili pongezi! Tengenezo la Yehova limeandaa vichapo vingi ili kutusaidia katika huduma yetu na kutusaidia kukabiliana na matatizo yetu. Tukionyesha uthamini kwa maandalizi ya kiroho ya Yehova, atatubariki kwa kutupatia amani katika nyakati hizi zenye msukosuko kiuchumi.—Zaburi 29:11.

Mwishoni mwa hotuba ya mwisho ya siku hiyo, “Fuatia Amani ya Kimungu Katika Maisha ya Familia,” wakusanyikaji walipendezwa kupokea kile kitabu kipya, Siri ya Kupata Furaha ya Familia. “Jifunzeni kwa bidii kitabu hiki kibinafsi na mkiwa vikundi vya familia,” akahimiza msemaji. “Jitahidi sana kutumia shauri lacho linalotegemea Biblia, na kwa hakika utaongeza amani na furaha ya familia yako.”

“Kushika Umoja . . . Katika Kifungo Chenye Kuunganisha cha Amani”

Kikitegemea Waefeso 4:3, hicho kilikuwa kichwa chenye kufaa kwa siku ya mwisho ya mkusanyiko. Mashahidi wa Yehova, kutoka mataifa yote ya ulimwengu, wamefundishwa na Mungu. Kwa hiyo, wanapenda amani. Wanafuata kielelezo cha Yesu na kujitahidi “kushika umoja wa roho katika kifungo chenye kuunganisha cha amani.”

Amani ambayo hupenya tengenezo la Mungu ilikaziwa katika ule mfululizo “Kuwatambua Wajumbe wa Aina Inayofaa.” Manabii wasio wa kweli walikuwapo katika Israeli la kale. Hata hivyo, wajumbe wa kweli wa Mungu—manabii kama Isaya, Ezekieli, na Yeremia—walitabiri kwa usahihi kuanguka kwa Yerusalemu, kipindi cha utekwa, na kuwekwa huru hatimaye kwa watu wa Mungu. Hali iyo hiyo ipo leo. Wajumbe wasio wa kweli wapo kwa wingi katika nyanja za kisiasa na za dini isiyo ya kweli. Hata hivyo, Yehova amewainua Mashahidi wake wapige mbiu ya kusudi lake kuhusiana na mfumo huu wa mambo. Hasa tangu mwaka wa 1919, watumishi wa Yehova wametumiwa kupiga mbiu ya ujumbe wa Mungu. Wao wanatofautiana kama nini na wajumbe wasio wa kweli wa Jumuiya ya Wakristo! Na tutimize fungu letu katika kazi hii kwa bidii mpaka Yehova asema imemalizika.

Ile hotuba “Sikiliza na Utii Neno la Mungu” ilikazia kwamba Maandiko ndiyo chanzo kikubwa zaidi cha mwongozo, faraja, na tumaini. (Isaya 30:20, 21; Waroma 15:4) Ulimwengu wa leo unazidi kuwa wenye uendekevu. Kwa hiyo, zaidi ya wakati mwingine wowote, twahitaji kusikiliza shauri linalotoka katika Neno na tengenezo la Mungu. Yehova ajua udhaifu wetu mbalimbali, na katika Neno lake ameonyesha waziwazi mwendo utakaotunufaisha. Kujua kwamba Yehova anatutegemeza hutupa uhakika wa kusonga mbele katika lolote analotaka tufanye.

Hotuba hiyo ilitayarisha akili za wasikilizaji kwa ajili ya drama yenye mavazi kamili iliyofuata. Ilikuwa na kichwa “Kwa Nini Ustahi Mipango ya Kitheokrasi?” Kwa kutumia simulizi la Biblia la Gideoni likiwa msingi, utoaji huo ulikazia kwa nguvu somo lenye nguvu—lazima tufuate maagizo ya Mungu na kutotumia kufikiri kwetu wenyewe badala ya maagizo hayo au kujaribu kuhepa shauri la kitheokrasi.

Hotuba ya watu wote ilikuwa juu ya “Hatimaye Amani ya Kweli!—Kutoka Chanzo Gani?” Amani anayoahidi Mungu hupita chochote ambacho ulimwengu huu waweza kuwazia. “Amani ya kweli yamaanisha amani kila siku,” akasema msemaji. “Amani ya Mungu yamaanisha ulimwengu usio na ugonjwa, maumivu, huzuni, na kifo.” Biblia hutuambia kwamba Yehova “avikomesha vita hata mwisho wa dunia.” (Zaburi 46:9) Atafanyaje hilo? Kwa kumwondoa mchochezi wa vita, Shetani Ibilisi. (Ufunuo 20:1-3) Hilo litafungulia wasikivu njia ya ‘kuirithi nchi na kujifurahisha kwa wingi wa amani.’—Zaburi 37:11.

Baada ya muhtasari wa makala ya funzo la Mnara wa Mlinzi ya juma hilo, hotuba ya mwisho ya mkusanyiko ilitolewa. Ikiwa na kichwa “Kusonga Mbele Tukiwa Wajumbe wa Amani ya Kimungu,” hotuba hiyo yenye kuchochea ilikazia kwamba kazi yetu ya kuhubiri ni ya pekee na pia ya hima. Huu si wakati wa kupumzika, kukawia-kawia kufanya kazi, au kurudia tena mawazo yenye kosa. Tumeandaliwa vifaa tunavyohitaji—ujumbe wa Mungu, roho takatifu yake, na maandalizi mengi sana yanayotoka katika tengenezo lake la kitheokrasi lenye upendo. Basi, kwa kuwa sisi ni watumishi wa Yehova, na tuendelee kusonga mbele tukiwa wajumbe wa amani ya kimungu!

[Sanduku/Picha katika ukurasa wa 9]

Uandalizi Wenye Upendo kwa Ajili ya Familia

Waliohudhuria siku ya pili ya Mkusanyiko wa Wilaya wa “Wajumbe wa Amani ya Kimungu” walisisimuka kupokea kile kichapo kipya chenye kichwa Siri ya Kupata Furaha ya Familia. Kitabu hicho kina habari ya Kimaandiko ambayo itanufaisha familia zote zinazompenda Mungu.

Mzee mmoja kutoka Connecticut, Marekani, aeleza hivi: “Juni 15, tulipokea kitabu chetu cha Furaha ya Familia. Kufikia Juni 16, nilikuwa nimesoma nusu yacho. Tarehe 17, tulikuwa na funzo letu la familia la kwanza katika kitabu hicho, nasi tulitiwa moyo sana! Siku iyo hiyo, nilimaliza kukisoma hicho kitabu. Kichapo hicho kizuri bila shaka kitathibitika kuwa chenye thamani kwa wote wanaojipatia nakala. Unyoofu wa hicho kitabu na habari yacho ya kisasa yatoa uthibitisho wa ziada kwamba ‘mtumwa mwaminifu na mwenye busara’ anatoa ‘chakula kwa wakati ufaao’ naye ajua sana mahitaji yetu katika nyakati hizi zilizo ngumu sana.”—Mathayo 24:45-47.

[Picha katika ukurasa wa 7]

Wachanga kwa wazee wanataka kujua yale ambayo Mungu anataka