Enoki—Asiye na Hofu Kujapokuwa Magumu

KWA mtu mwema, zilikuwa nyakati mbaya sana. Hali ya kutomcha Mungu ilienea duniani. Hali ya kiadili ya wanadamu ilikuwa ikizidi kupotoka. Kwa kweli, upesi ingeweza kusemwa hivi: “BWANA akaona ya kuwa maovu ya mwanadamu ni makubwa duniani na kwamba kila kusudi analowaza moyoni mwake ni baya tu sikuzote.”—Mwanzo 6:5.

Enoki, mtu wa saba katika nasaba kutoka Adamu, alikuwa na moyo mkuu wa kuwa tofauti. Alisimama thabiti kwa ajili ya uadilifu bila kujali matokeo. Ujumbe wa Enoki ulikuwa wenye kusumbua watenda-dhambi wasiomwogopa Mungu hivi kwamba alikuwa shabaha ya uuaji kimakusudi, na Yehova tu ndiye aliweza kumsaidia.—Yuda 14, 15.

Enoki na Lile Suala la Ulimwengu Wote Mzima

Muda mrefu kabla ya kuzaliwa kwa Enoki, suala juu ya enzi kuu ya ulimwengu wote mzima lilizushwa. Je, Mungu alikuwa na haki ya kutawala? Kwa kweli, Shetani Ibilisi alikataa. Alisisitiza kwamba viumbe wenye akili wangefanya vizuri zaidi kama wangekuwa huru na uelekeo wa Mungu. Shetani alijaribu kuthibitisha kesi yake dhidi ya Yehova Mungu kwa kuelekeza wanadamu kwa hila kwenye upande wake. Adamu, mke wake Hawa, na mtoto wao wa kwanza Kaini, wana sifa mbaya ya kumwunga mkono Shetani kwa kuchagua kujitawala badala ya utawala wa Mungu. Hao wanadamu wawili wa kwanza walifanya hivyo kwa kula tunda ambalo Mungu alikuwa amekataza, na Kaini alifanya hivyo kwa kumwua kimakusudi ndugu yake mwadilifu, Abeli.—Mwanzo 3:4-6; 4:8.

Abeli alikuwa amesimama kwa moyo mkuu upande wa Yehova. Kwa kuwa, uaminifu-maadili wa Abeli ulikuwa umeendeleza ibada safi, bila shaka Shetani alifurahi kumwona Kaini akimwonyesha ghadhabu ya kutaka kuua kimakusudi. Tangu wakati huo na kuendelea, Shetani ametumia “hofu ya kifo” kuwa silaha yenye kutisha sana. Yeye hutaka kutia hofu moyoni mwa yeyote aliye na mwelekeo wa kumwabudu Mungu wa kweli.—Waebrania 2:14, 15; Yohana 8:44; 1 Yohana 3:12.

Kufikia wakati wa kuzaliwa kwa Enoki, maoni ya Shetani kwamba wanadamu hawangetetea enzi kuu ya Yehova yamkini yalionekana kuungwa mkono vizuri. Abeli alikuwa amekufa, na kielelezo chake cha uaminifu hakikuwa kikifuatwa. Hata hivyo, Enoki alijithibitisha kuwa tofauti. Alikuwa na msingi imara wa imani, kwa sababu alikuwa amefahamu vizuri matukio ya shamba la Edeni.a Lazima aliutunza kama nini unabii wa Yehova ulioonyesha kwamba Mbegu iliyoahidiwa ingeleta mwisho wa Shetani na mbinu zake!—Mwanzo 3:15.

Tumaini hilo likiwa mbele yake daima, Enoki hakutishwa na lile tukio maarufu katika historia la uuaji kimakusudi wa Abeli uliochochewa na Ibilisi. Badala ya hivyo, aliendelea kutembea pamoja na Yehova, akifuatia mwendo-maisha wa uadilifu. Enoki alijitenga na ulimwengu, akiepuka roho yao ya kujitegemea.—Mwanzo 5:23, 24.

Na zaidi, Enoki alisema kwa moyo mkuu na akaelewesha wazi kwamba kazi za Ibilisi zenye uovu zingeshindwa. Chini ya uvutano wa roho takatifu ya Mungu, au kani ya utendaji, Enoki alitabiri kuhusu waovu hivi: “Tazama! Yehova alikuja na makumi ya maelfu yake watakatifu, kutekeleza hukumu dhidi ya wote, na kuwathibitisha ni wenye hatia wote wasiomwogopa Mungu kuhusu vitendo vyao vyote vya kutomwogopa Mungu ambavyo walitenda kwa njia ya kutomwogopa Mungu, na kuhusu mambo yote ya kushtua ambayo watenda-dhambi wasiomwogopa Mungu walisema dhidi yake.”—Yuda 14, 15.

Kwa sababu ya upigaji-mbiu wa Enoki usio na hofu, mtume Paulo, katika kuwaandikia barua Wakristo Waebrania, alimtia ndani miongoni mwa ‘wingu kubwa la Mashahidi’ walioweka kielelezo chema cha imani yenye kutenda.b (Waebrania 11:5; 12:1) Akiwa mwanaume wa imani, Enoki alistahimili katika mwendo wa uaminifu-maadili kwa miaka zaidi ya 300. (Mwanzo 5:22) Uaminifu wa Enoki uliwasumbua kama nini maadui wa Mungu mbinguni na duniani! Unabii mkali wa Enoki ulitokeza chuki ya Shetani, lakini ukaleta ulinzi wa Yehova.

Mungu Alimtwaa Enoki —Jinsi Gani?

Yehova hakumruhusu Shetani au watumishi wake wa kidunia wamwue Enoki. Badala ya hivyo, rekodi yenye kupuliziwa husema hivi: “Mungu alimtwaa.” (Mwanzo 5:24) Mtume Paulo hufafanua mambo hivi: “Kwa imani Enoki alihamishwa ili asione kifo, naye hakupatikana mahali popote kwa sababu Mungu alikuwa amemhamisha; kwa maana kabla ya uhamisho wake alikuwa na ushahidi kwamba alikuwa amempendeza Mungu vema.”—Waebrania 11:5.

Enoki ‘alihamishwaje ili asione kifo?’ Au kama ambavyo imetafsiriwa katika tafsiri ya Habari Njema kwa Watu Wote, Enoki ‘alichukuliwaje na Mungu asipate kufa’? Mungu alikatiza kwa amani uhai wa Enoki, akimwepusha asipatwe na maumivu makali ya ghafula ya kifo kutokana na ama ugonjwa ama jeuri mikononi mwa maadui wake. Ndiyo, Yehova alifupiza uhai wa Enoki alipokuwa na umri wa miaka 365—alikuwa kijana akilinganishwa na watu walioishi wakati wake.

Enoki alitolewaje “ushahidi kwamba alikuwa amempendeza Mungu vema”? Alikuwa na uthibitisho gani? Yamkini, Mungu alimtia Enoki katika njozi, kama vile mtume Paulo ‘alivyonyakuliwa’ au kuhamishwa, yaonekana akipokea ono juu ya paradiso ya kiroho ya wakati ujao ya kutaniko la Kikristo. (2 Wakorintho 12:3, 4) Ushahidi, au uthibitisho, kwamba Enoki alikuwa amekuwa mwenye kumpendeza Mungu ungaliweza kuhusisha ono juu ya Paradiso ya kidunia ijayo ambamo wale wote wenye kuishi wataunga mkono enzi kuu ya Mungu. Huenda ikawa ni wakati Enoki alipokuwa akipatwa na ono lenye furaha nyingi kwamba Mungu alimtwaa katika kifo kisicho na maumivu kulala hadi siku ya ufufuo. Yaonekana kwamba, kama vile katika kisa cha Musa, Yehova aliondolea mbali mwili wa Enoki, kwa kuwa ‘haukupatikana mahali popote.’—Waebrania 11:5; Kumbukumbu la Torati 34:5, 6; Yuda 9.

Ule Unabii Kutimizwa

Leo, Mashahidi wa Yehova hutangaza maana halisi ya unabii wa Enoki. Kutokana na Maandiko, wao huonyesha jinsi utakavyotimizwa wakati Mungu aharibupo wale wasiomwogopa Mungu hivi karibuni. (2 Wathesalonike 1:6-10) Ujumbe wao hufanya wasipendwe, kwa maana uko tofauti sana na maoni na miradi ya ulimwengu huu. Upinzani wanaokabili hauwashangazi, kwa kuwa Yesu aliwaonya wafuasi wake hivi: “Nanyi mtakuwa vitu vya kuchukiwa na watu wote kwa sababu ya jina langu.”—Mathayo 10:22; Yohana 17:14.

Hata hivyo, kama Enoki, Wakristo wa siku hizi wana uhakikishio wa ukombozi wa hatimaye kutoka kwa maadui wao. Mtume Petro aliandika hivi: “Yehova ajua jinsi ya kukomboa watu wenye ujitoaji-kimungu kutoka katika jaribu, bali kuweka akiba watu wasio waadilifu kwa ajili ya siku ya hukumu ili kukatiliwa mbali.” (2 Petro 2:9) Huenda Mungu akaona yafaa kuondoa tatizo au hali yenye kujaribu. Huenda mnyanyaso ukaisha. Lakini, ikiwa sivyo, yeye ajua jinsi ya ‘kufanya njia ya kutokea’ ili kwamba watu wake waweze kuvumilia mitihani yao kwa mafanikio. Yehova hata hutoa “nguvu ipitayo iliyo ya kawaida” ihitajikapo.—1 Wakorintho 10:13; 2 Wakorintho 4:7.

Akiwa “mthawabishaji wa wale wanaomtafuta kwa bidii,” Yehova atawabariki pia watumishi wake waaminifu kwa kuwapa uhai udumuo milele. (Waebrania 11:6) Kwa wengi wao, huo utakuwa uhai wa milele katika paradiso ya kidunia. Kama Enoki, sisi basi na tupige mbiu ya ujumbe wa Mungu bila hofu. Kwa imani, acheni tufanye hivyo kujapokuwa magumu.

[Maelezo ya Chini]

[Sanduku katika ukurasa wa 30]

Jina la Mungu Lachafuliwa

Karne nne hivi kabla ya Enoki, Enoshi mjukuu wa Adamu alizaliwa. “Hapo ndipo watu walipoanza kuliita Jina la BWANA [“Yehova,” NW],” husema Mwanzo 4:26. Wasomi fulani wa lugha ya Kiebrania huamini kwamba mstari huo wapaswa kusomeka “wakaanza kwa njia ya kuchafua” kuliita jina la Mungu au, “ndipo uchafuaji ukaanza.” Kuhusu kipindi hicho katika historia, Jerusalem Targum husema hivi: “Hicho kilikuwa kizazi ambacho katika siku zacho walianza kukosea, na kujitengenezea sanamu, na kuziita sanamu zao majina ya ziada kwa jina la Neno la Bwana.”

Wakati wa Enoshi kulikuwa na mweneo wa utumizi mbaya wa jina la Yehova. Yawezekana kwamba watu walijiita kwa hilo jina la kimungu au waliwaita hivyo watu fulani ambao kupitia kwao walijifanya kuwa wanamwendea Yehova Mungu katika ibada. Au huenda waliziita sanamu zao hilo jina la kimungu. Kwa vyovyote vile, Shetani Ibilisi alikuwa amefunga kabisa jamii ya kibinadamu katika mtego wa ibada ya sanamu. Kufikia wakati wa kuzaliwa kwa Enoki, ibada ya kweli ilikuwa nadra sana. Mtu yeyote kama Enoki, aliyeishi kulingana na kweli na kuihubiri, hakupendwa na watu wengi na kwa hiyo akawa shabaha ya mnyanyaso.—Linganisha Mathayo 5:11, 12.

[Sanduku katika ukurasa wa 31]

Je, Enoki Alienda Mbinguni?

“Kwa imani Enoki alihamishwa ili asione kifo.” Katika kutafsiri kwazo sehemu hiyo ya Waebrania 11:5, tafsiri fulani za Biblia huonyesha kwamba Enoki hakufa kihalisi. Kwa kielelezo, A New Translation of the Bible, ya James Moffatt, hutaarifu hivi: “Ni kwa imani kwamba Enoki alichukuliwa kwenda mbinguni hivi kwamba hakufa kamwe.”

Hata hivyo, miaka ipatayo 3,000 baada ya siku ya Enoki, Yesu Kristo alitaarifu hivi: “Hakuna mtu ambaye amepaa kuingia mbinguni ila yeye aliyeshuka kutoka mbinguni, Mwana wa binadamu.” (Yohana 3:13) The New English Bible husomeka hivi: “Hakuna yeyote aliyekwenda mbinguni wakati wowote isipokuwa yule aliyeshuka kutoka mbinguni, Mwana wa Binadamu.” Wakati Yesu alipotoa taarifa hiyo, hata hakuwa amepaa mbinguni.—Linganisha Luka 7:28.

Mtume Paulo hutaarifu kwamba Enoki na wengine wafanyizao wingu kubwa ya mashahidi wa kabla ya Ukristo ‘wote walikufa’ na “hawakupata utimizo wa ahadi.” (Waebrania 11:13, 39) Kwa sababu gani? Kwa sababu wanadamu wote, kutia ndani Enoki, wamerithi dhambi kutoka kwa Adamu. (Zaburi 51:5; Waroma 5:12) Njia pekee ya wokovu ni kupitia dhabihu ya fidia ya Kristo Yesu. (Matendo 4:12; 1 Yohana 2:1, 2) Katika siku ya Enoki fidia hiyo haikuwa imelipwa bado. Kwa hiyo, Enoki hakuenda mbinguni, lakini amelala katika kifo akingojea ufufuo duniani.—Yohana 5:28, 29.

[Picha katika ukurasa wa 29 zimeandaliwa na 29]

Imetolewa tena kutoka Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s