Ni Nani Aliyezibuni Zote Hizi?

AKIFYEKA msitu katika Kambodia ili apate njia ya kupitia, Henri Mouhot, mvumbuzi Mfaransa wa karne ya 19, alifikia handaki pana la maji lililozunguka hekalu. Kilometa moja hivi kutoka mahali aliposimama, minara mitano ya hekalu yenye urefu wa zaidi ya meta 60 ilipaa hewani. Ilikuwa ile nguzo ya ukumbusho ya kidini iliyo kubwa zaidi duniani, iitwayo Angkor Wat. Wakati Mouhot alipoivumbua, tayari ilikuwa imehimili hali za hewa zisababishwazo na vitu vya asili, kwa karne saba.

Kwa kuyatupia jicho, Mouhot angeweza kuona kwamba majengo hayo yaliyofunikwa kwa kuvumwani yalikuwa yametengenezwa kwa mikono ya wanadamu. “Yalisimamishwa na mjenzi wa kale mwenye stadi kama za Michelangelo na ni makubwa zaidi kuliko mabaki yoyote ya jengo lililobuniwa na Ugiriki au Roma,” akaandika. Ijapokuwa yalikuwa yameachwa kwa karne kadhaa, yeye hakuwa na shaka kwamba kulikuwa na mbuni wa majengo hayo yenye fahari.

Kwa kupendeza, kitabu chenye hekima kilichoandikwa karne kadhaa zilizopita kilitumia kusababu kama huko kuelezea kwa nini ulimwengu unaotuzunguka lazima uwe ulitokezwa na Mbuni fulani. Lazima uwe uliumbwa. Mtume Paulo aliandika hivi: “Bila shaka, kila nyumba imejengwa na mtu fulani, lakini yeye aliyejenga vitu vyote ni Mungu.” (Waebrania 3:4) Huenda wengine wasikubaliane na ulinganifu huo, wakisema: ‘Namna za utendaji wa asili ni tofauti na zile za kutengenezwa na watu.’ Hata hivyo, si wanasayansi wote ambao hukubaliana na kipingamizi hicho. Baada ya kukubali kwamba “mifumo ya kibiokemia si vyombo visivyo na uhai,” Michael Behe, profesa-mshiriki wa biokemia kwenye Chuo Kikuu cha Lehigh, auliza hivi: “Je, mifumo ya biokemia yenye kutenda kazi yaweza kubuniwa kwa kutumia akili?” Aendelea kuonyesha kwamba wanasayansi sasa wanabuni mabadiliko ya msingi katika viumbehai vinavyoishi kupitia njia kama vile kupanga na kuanzisha tabia za urithi. Kwa wazi, vitu visivyo na uhai na vilivyo na uhai vyaweza kubuniwa, kupangwa na kuanzishwa! Kwa kuchunguza kwa ukaribu chembe zilizo hai ambazo ni ndogo sana, Behe azungumza kuhusu mifumo yenye kustaajabisha iliyo migumu kufahamika, inayofanyizwa na tanzu zinazotegemeana ili kufanya kazi. Umalizio wake ni nini? “Matokeo ya jitihada nyingi za kuchunguza chembe—kuchunguza uhai kwa kiwango cha molekuli—ni kilio kikubwa kilicho kikali kisemacho ‘ubuni!’”

Wataalamu wa anga na wanafizikia vilevile wameangalia kwa uangalifu ulimwengu na wamepata mambo ya hakika yenye kushtua. Kwa kielelezo, sasa wanajua kwamba ikiwa kungekuwako hata badiliko dogo mno katika kiwango cha namba za ulimwengu zisizobadilika, ulimwengu ungekuwa bila uhai.a Mtaalamu wa anga, Brandon Carter, aliyaita mambo hayo ya hakika na yenye kustaajabisha, sadfa. Ikiwa ungekabili mfululizo wa mambo ya kifumbo yanayolingana na yanayohusiana, je, hungedhania angalau kwamba mtu fulani aliyabuni?

Kwa kweli, kuna Mbuni aliyeibuni mifumo yote hii iliyo migumu kufahamika na hizi “sadfa” zilizorekebishwa ifaavyo. Ni nani? “Kumtambulisha mbuni kwa njia za kisayansi huenda kukawa jambo gumu sana,” akubali Profesa Behe, naye aachia hilo swali “falsafa na theolojia” ijaribu kulijibu. Huenda wewe binafsi ukahisi kwamba swali hilo halikuhusu. Hata hivyo, ikiwa ungepokea kifurushi kilichofungwa vizuri kilichojazwa vitu ulivyohitaji hasa, je, hungetaka kujua ni nani aliyeipeleka?

Kwa kusema kitamathali, sisi tumepokea kifurushi kama hicho, yaani, kifurushi kilichojazwa zawadi nzuri ajabu ambazo zafanya iwezekane kwetu kuishi na kufurahia maisha. Kifurushi hicho ni dunia, pamoja na mifumo yake yote yenye kutokeza ya kuendeleza uhai. Je, tusingepaswa kutafuta mtu aliyetupa zawadi hizo?

Kwa furaha, Mpelekaji wa kifurushi hicho aliambatanisha taarifa pamoja nacho. Hiyo “taarifa” ni kile kitabu cha kale chenye hekima kilichonukuliwa awali, Biblia. Katika maneno yake ya kufungua, Biblia hujibu kwa njia sahili ajabu na waziwazi lile swali juu ya yule aliyetupa kifurushi hiki: “Hapo mwanzo Mungu aliziumba mbingu na nchi.”—Mwanzo 1:1.

Katika “taarifa” yake Muumba hujitambulisha mwenyewe kwa jina lake: “Mungu BWANA [“Yehova,” “NW”] anena, yeye aliyeziumba mbingu, . . . ; yeye aliyeitandaza nchi na mazao yake; yeye awapaye pumzi watu walio juu yake.” (Isaya 42:5, italiki ni zetu.) Naam, Yehova ndilo jina la Mungu aliyeubuni ulimwengu na kuwaumba wanaume na wanawake duniani. Lakini Yehova ni nani? Yeye ni Mungu wa aina gani? Na kwa nini watu wote wa dunia wamsikilize yeye?

[Maelezo ya Chini]

[Picha katika ukurasa wa 3]

Angkor Wat ilijengwa na wanadamu

[Picha katika ukurasa wa 4]

Unapopokea zawadi, je, hutaki kujua aliyeipeleka?