Sura ya Kumi na Mbili
Maana ya Ubatizo Wako
1. Kwa nini kila mmoja wetu anapaswa kufikiria kubatizwa katika maji?
YESU alibatizwa mwaka wa 29 W.K., alipozamishwa katika Mto Yordani na Yohana Mbatizaji. Yehova alikuwa akitazama na akamkubali. (Mathayo 3:16, 17) Kwa hiyo Yesu aliwawekea mfano wanafunzi wake wote. Miaka mitatu na nusu baadaye, Yesu aliwapa wanafunzi wake maagizo haya: “Nimepewa mamlaka yote mbinguni na juu ya dunia. Kwa hiyo nendeni mkafanye wanafunzi kutoka kwa watu wa mataifa yote, kuwabatiza katika jina la Baba na la Mwana na la roho takatifu.” (Mathayo 28:18, 19) Je, umebatizwa kama Yesu alivyoamuru? Ikiwa bado, je, unajitayarisha kufanya hivyo?
2. Ni maswali gani kuhusu ubatizo yanayohitaji kujibiwa?
2 Vyovyote iwavyo, kila mtu anayetaka kumtumikia Yehova na kuishi katika ulimwengu wake mpya wenye uadilifu anapaswa kufahamu vizuri maana ya ubatizo. Maswali yafuatayo yanahitaji kujibiwa: Je, ubatizo wa Wakristo leo una maana sawa na ule wa Yesu? Ni nini maana ya kubatizwa “katika jina la Baba na la Mwana na la roho takatifu”? Kuishi kupatana na maana ya ubatizo wa maji wa Wakristo kwahusisha nini?
Ubatizo Uliofanywa na Yohana
3. Yohana aliwabatiza watu gani pekee?
3 Miezi sita hivi kabla ya Yesu kubatizwa, Yohana Mbatizaji alianza kuhubiri katika nyika ya Yudea akisema: “Tubuni, kwa maana ufalme wa mbingu umekaribia.” (Mathayo 3:1, 2) Watu walisikia na kutii mahubiri ya Yohana. Waliungama dhambi zao hadharani, wakatubu na wakamjia Yohana ili awabatize katika Mto Yordani. Ubatizo huo ulikuwa wa Wayahudi peke yao.—Luka 1:13-16; Matendo 13:23, 24.
4. Kwa nini Wayahudi katika karne ya kwanza walihitaji kutubu haraka?
4 Wayahudi hao walihitaji kutubu haraka. Mnamo mwaka wa 1513 K.W.K., mababu zao walifanya agano la kitaifa, yaani, mkataba rasmi mtakatifu, pamoja na Yehova Mungu kwenye Mlima Sinai. Lakini kwa sababu ya dhambi zao nzito, hawakutekeleza majukumu yao kupatana na agano hilo, kwa hiyo agano hilo liliwashutumu. Walikuwa katika hali ya hatari katika siku za Yesu. ‘Siku ya BWANA, iliyo kuu na ya kuogofya’ ambayo ilitabiriwa na Malaki ilikuwa karibu. Katika mwaka wa 70 W.K., “siku” hiyo ilifika majeshi ya Roma yalipoharibu Yerusalemu, hekalu lake na kuwaua Wayahudi zaidi ya milioni moja. Yohana Mbatizaji, aliyekuwa na bidii kwa ajili ya ibada ya kweli, alitumwa mapema kabla ya uharibifu huo, ili ‘aweke tayari kwa ajili ya Yehova watu waliotayarishwa.’ Walihitaji kutubu dhambi walizotenda dhidi ya agano la Sheria ya Musa na kuwa tayari kumkubali Mwana wa Mungu, Yesu, aliyetumwa kwao na Yehova.—Malaki 4:4-6; Luka 1:17; Matendo 19:4.
5. (a) Kwa nini Yohana alisita kumbatiza Yesu? (b) Ubatizo wa Yesu ulionyesha nini?
5 Yesu alikuwa miongoni mwa wale waliokuja kubatizwa na Yohana. Lakini kwa nini? Huku akijua kwamba Yesu hakuwa na dhambi yoyote, Yohana alisema hivi: “Mimi ndimi ninayehitaji kubatizwa nawe, na je, wewe unakuja kwangu?” Lakini ubatizo wa Yesu ulionyesha jambo tofauti. Kwa hiyo Yesu alijibu: “Acha iwe hivyo, wakati huu, kwa maana katika njia hiyo yafaa kwetu kutekeleza yote yaliyo ya uadilifu.” (Mathayo 3:13-15) Yesu hakuwa na dhambi yoyote, kwa hiyo ubatizo wake haukuwa ishara ya kutubu dhambi; wala hakuhitaji kujiweka wakfu kwa Mungu kwa kuwa alizaliwa katika taifa ambalo tayari lilikuwa wakfu kwa Yehova. Badala yake, ubatizo wake akiwa na umri wa miaka 30 ulikuwa wa pekee sana, na ulionyesha kwamba alijitoa mwenyewe kwa Baba yake wa mbinguni ili afanye mapenzi Yake zaidi.
6. Kufanya mapenzi ya Mungu kulikuwa na umuhimu gani kwa Yesu?
6 Mapenzi ambayo Mungu alitaka Kristo Yesu afanye yalihusiana na Ufalme. (Luka 8:1) Yalitia ndani pia kudhabihu uhai wake mkamilifu wa kibinadamu kuwa fidia na msingi wa agano jipya. (Mathayo 20:28; 26:26-28; Waebrania 10:5-10) Yesu aliona maana ya ubatizo wake katika maji kuwa muhimu sana. Hakujiruhusu akengeushwe fikira na mambo mengine. Alifanya mapenzi ya Mungu kwa uaminifu hadi mwisho wa maisha yake duniani. Kazi yake kuu ilikuwa kuhubiri juu ya Ufalme wa Mungu.—Yohana 4:34.
Wanafunzi Wakristo Wabatizwa Katika Maji
7. Kuanzia Pentekoste ya mwaka wa 33 W.K., Wakristo waliamriwa wafanye nini kuhusiana na ubatizo?
7 Yohana aliwabatiza wanafunzi wa kwanza wa Yesu katika maji kisha akawaelekeza kwa Yesu wakiwa na taraja la kuwa washiriki wa Ufalme wa mbinguni. (Yohana 3:25-30) Wanafunzi hao pia waliwabatiza watu chini ya mwongozo wa Yesu, ubatizo huo ulikuwa na maana ileile na ubatizo uliofanywa na Yohana. (Yohana 4:1, 2) Hata hivyo, kuanzia Pentekoste ya mwaka wa 33 W.K., walianza kuwabatiza watu “katika jina la Baba na la Mwana na la roho takatifu” kama walivyoamriwa. (Mathayo 28:19) Utafaidika sana ukichunguza maana ya ubatizo huo.
8. Ni nini maana ya kubatizwa “katika jina la Baba”?
8 Ni nini maana ya kubatizwa “katika jina la Baba”? Yamaanisha kukubali jina lake, cheo chake, mamlaka yake, kusudi lake na sheria zake. Kwatia ndani mambo yafuatayo. (1) Zaburi 83:18 yasema hivi kuhusu jina lake: “Wewe, uitwaye jina lako YEHOVA, ndiwe peke yako uliye juu, juu ya nchi yote.” (2) Andiko la 2 Wafalme 19:15, lasema hivi kuhusu cheo chake: “Ee BWANA . . . , wewe peke yako ndiwe Mungu [wa kweli].” (3) Andiko la Ufunuo 4:11 latuambia hivi kuhusu mamlaka yake: “Wewe wastahili, Yehova, naam, Mungu wetu, kupokea utukufu na heshima na nguvu, kwa sababu uliumba vitu vyote, na kwa sababu ya mapenzi yako vilikuwako na vikaumbwa.” (4) Ni lazima pia tumtambue Yehova kuwa Mpaji-Uhai, ambaye anakusudia kutuokoa kutoka katika dhambi na kifo: “Wokovu una BWANA.” (Zaburi 3:8; 36:9) (5) Tunapaswa kumkubali Yehova kuwa Mpaji-Sheria Mkuu: “BWANA ndiye mwamuzi wetu; BWANA ndiye mfanya sheria wetu; BWANA ndiye mfalme wetu.” (Isaya 33:22) Kwa sababu ya wadhifa huo wote, tunahimizwa hivi: “Lazima umpende Yehova Mungu wako kwa moyo wako wote na kwa nafsi yako yote na kwa akili yako yote.”—Mathayo 22:37.
9. Ni nini maana ya kubatizwa “katika jina la . . . Mwana”?
9 Ni nini maana ya kubatizwa “katika jina la . . . Mwana”? Yamaanisha kutambua jina, cheo, na mamlaka ya Yesu Kristo. Jina lake, Yesu, lamaanisha “Yehova Ni Wokovu.” Amepewa cheo cha juu kwa sababu yeye ni Mwana mzaliwa-pekee wa Mungu, na ndiye aliyeumbwa kwanza na Mungu. (Mathayo 16:16; Wakolosai 1:15, 16) Andiko la Yohana 3:16 linasema hivi kumhusu Mwana huyo: “Mungu aliupenda ulimwengu [wa wanadamu wanaoweza kukombolewa] sana hivi kwamba akatoa Mwana mzaliwa-pekee wake, ili kila mtu anayedhihirisha imani katika yeye asipate kuangamizwa bali awe na uhai udumuo milele.” Kwa sababu Yesu alikufa akiwa mwaminifu, Mungu alimfufua na kumpa mamlaka zaidi. Mtume Paulo alisema kwamba Mungu “alimkweza [Yesu] kwenye cheo cha juu zaidi” katika ulimwengu wote. Yehova peke yake ndiye aliye na cheo kikuu kuliko yeye. Ndiyo sababu ‘katika jina la Yesu kila goti linapaswa kukunjwa na kila ulimi unapaswa kukiri waziwazi kwamba Yesu Kristo ni Bwana kwa utukufu wa Mungu Baba.’ (Wafilipi 2:9-11) Hilo lamaanisha kutii amri za Yesu, ambazo zinatoka kwa Yehova mwenyewe.—Yohana 15:10.
10. Ni nini maana ya kubatizwa “katika jina la . . . roho takatifu”?
10 Ni nini maana ya kubatizwa “katika jina . . . la roho takatifu”? Inamaanisha kutambua utendaji na kazi ya roho takatifu. Roho takatifu ni nini? Ni nguvu ya Yehova ya utendaji, ambayo anatumia kutimiza makusudi yake. Yesu aliwaambia wafuasi wake: “Nitamwomba Baba naye atawapa nyinyi msaidiaji mwingine awe pamoja nanyi milele, roho ya ile kweli.” (Yohana 14:16, 17) Roho hiyo ingewasaidiaje? Yesu aliendelea kuwaambia hivi: “Mtapokea nguvu wakati roho takatifu iwasilipo juu yenu, nanyi mtakuwa mashahidi wangu katika Yerusalemu na pia katika Yudea yote na Samaria na hadi sehemu ya mbali zaidi sana ya dunia.” (Matendo 1:8) Yehova alitumia roho hiyo takatifu kuiandika Biblia pia: “Unabii haukuletwa wakati wowote kamwe kwa mapenzi ya binadamu, bali wanadamu walisema kutoka kwa Mungu walipokuwa wakichukuliwa na roho takatifu.” (2 Petro 1:21) Kwa hiyo, tunapojifunza Biblia, tunatambua kazi ya roho takatifu. Tunatambua pia utendaji wa roho takatifu tunapomwomba Yehova atusaidie kukuza “matunda ya roho,” ambayo ni “upendo, shangwe, amani, ustahimilivu, fadhili, wema, imani, upole, kujidhibiti.”—Wagalatia 5:22, 23.
11. (a) Ubatizo wamaanisha nini leo? (b) Kwa nini ubatizo ni kama kufa na kufufuliwa?
11 Wayahudi na watu wa mataifa waliojiunga na dini ya Wayahudi ndio waliokuwa wa kwanza kubatizwa kupatana na maagizo ya Yesu, kuanzia mwaka wa 33 W.K. Muda mfupi baadaye, Wasamaria walipewa nafasi ya pekee ya kuwa wanafunzi Wakristo. Kisha mnamo mwaka wa 36 W.K., watu wa Mataifa wasiotahiriwa walipewa nafasi hiyo pia. Kabla ya kubatizwa, Wasamaria na watu wa Mataifa walihitaji kujiweka wakfu kwa Yehova ili kumtumikia wakiwa wanafunzi wa Mwanaye. Hiyo ndiyo maana ya ubatizo wa maji wa Wakristo hadi leo hii. Kuzamishwa kabisa katika maji ni njia inayofaa ya kuonyesha kwamba mtu amejiweka wakfu, kwa kuwa ni kana kwamba anazikwa kwa njia ya mfano. Unapozamishwa kabisa katika maji wakati wa ubatizo ni kana kwamba unakufa kuhusiana na maisha yako ya awali. Na unapoinuliwa kutoka majini ni kana kwamba unafufuliwa ili ufanye mapenzi ya Mungu. Watu wote wanaokuwa Wakristo wa kweli wanapata ‘ubatizo huo mmoja.’ Wanapobatizwa wanakuwa Mashahidi Wakristo wa Yehova, wahudumu wa Mungu waliowekwa rasmi.—Waefeso 4:5; 2 Wakorintho 6:3, 4.
12. Ubatizo wa maji wa Wakristo walingana na nini, na jinsi gani?
12 Mungu anaona ubatizo kuwa muhimu sana kwa ajili ya wokovu. Kwa mfano, baada ya kutaja kwamba Noa alijenga safina, ambamo yeye na familia yake waliokolewa wakati wa Gharika, mtume Petro aliandika hivi: “Lile ambalo hulingana na hili linaokoa nyinyi sasa pia, yaani, ubatizo, (si kule kuwekewa mbali kwa uchafu wenye kuchukiza wa mwili, bali ombi lifanywalo kwa Mungu ili kupata dhamiri njema,) kupitia ufufuo wa Yesu Kristo.” (1 Petro 3:21) Safina ilithibitisha waziwazi kwamba Noa alikuwa amefanya kwa uaminifu kazi aliyopewa na Mungu. Ujenzi wa safina ulipokwisha, “ulimwengu wa wakati huo ulipatwa na uangamizo ulipogharikishwa kwa maji.” (2 Petro 3:6) Lakini Noa na familia yake, “nafsi nane, walichukuliwa salama kupitia maji.”—1 Petro 3:20.
13. Ubatizo wa maji humwokoa Mkristo kutokana na nini?
13 Leo, wale wanaojiweka wakfu kwa Yehova kwa msingi wa imani katika Kristo aliyefufuliwa, huonyesha kwamba wamejiweka wakfu kwa kubatizwa. Kisha wanafanya yale ambayo Mungu anataka tufanye leo na kuokolewa kutoka katika ulimwengu huu mwovu. (Wagalatia 1:3, 4) Hawakabili tena hatari ya kuangamizwa pamoja na ulimwengu huu mwovu. Wanaokolewa kutoka katika uharibifu huo na Mungu anawapa dhamiri safi. Mtume Yohana anawahakikishia watumishi wa Mungu hivi: “Ulimwengu unapitilia mbali na ndivyo na tamaa yao, lakini yeye ambaye hufanya mapenzi ya Mungu hudumu milele.”—1 Yohana 2:17.
Kutimiza Madaraka Yetu
14. Kwa nini ubatizo peke yake hautoshi ili kupata wokovu?
14 Ni kosa kufikiri kwamba ubatizo peke yake unatosha ili kupata wokovu. Ubatizo ni wenye thamani tu ikiwa mtu amejiweka kabisa wakfu kwa Yehova kupitia Yesu Kristo na anafanya mapenzi ya Mungu kwa uaminifu hadi mwisho. “Yeye ambaye amevumilia hadi mwisho ndiye atakayeokolewa.”—Mathayo 24:13.
15. (a) Mapenzi ya Mungu kwa Wakristo waliobatizwa ni nini leo? (b) Kuwa mwanafunzi Mkristo kunapasa kuwa muhimu kadiri gani katika maisha yetu?
15 Mapenzi ya Mungu kwa Yesu yalihusisha jinsi alivyotumia maisha yake ya kibinadamu. Alipaswa kutoa uhai wake kuwa dhabihu kupitia kifo. Sisi tunapaswa kutoa miili yetu kwa Mungu, na kuishi maisha ya kujidhabihu kwa kufanya mapenzi ya Mungu. (Waroma 12:1, 2) Bila shaka hatutakuwa tukifanya mapenzi ya Mungu ikiwa mara kwa mara tunajiendesha kimakusudi kama watu wa ulimwengu au ikiwa tunafuatia tu mambo ya kichoyo, na kumtumikia Mungu kijuujuu tu. (1 Petro 4:1-3; 1 Yohana 2:15, 16) Myahudi fulani alipotaka kujua anachopaswa kufanya ili aishi milele, Yesu alionyesha kwamba kuishi maisha safi ya adili ni jambo muhimu. Lakini alitaja jambo jingine ambalo ni muhimu hata zaidi: uhitaji wa kuwa mwanafunzi Mkristo, mfuasi wa Yesu. Ni lazima hilo liwe jambo kuu maishani. Kutafuta mali hakuwezi kamwe kuwa muhimu kama kuwa mwanafunzi Mkristo.—Mathayo 19:16-21.
16. (a) Wakristo wote wana daraka la kufanya nini kuhusiana na Ufalme? (b) Picha kwenye ukurasa wa 116 na 117 zinaonyesha njia gani nzuri za kuutangaza Ufalme? (c) Kuhubiri kwetu kwa moyo wote kunathibitisha nini?
16 Ni lazima tukazie tena kwamba mapenzi ya Mungu kwa Yesu yalitia ndani kufanya kazi fulani muhimu iliyohusiana na Ufalme wa Mungu. Yesu alitiwa mafuta kuwa Mfalme. Lakini alihubiri kwa bidii kuhusu Ufalme alipokuwa duniani. Tuna kazi hiyohiyo ya kuhubiri, na tuna kila sababu ya kufanya kazi hiyo kwa moyo wetu wote. Tunapofanya hivyo, tunaonyesha kwamba tunathamini enzi kuu ya Yehova na tunawaonyesha wanadamu wenzetu upendo. (Mathayo 22:36-40) Tunaonyesha pia kwamba tuna umoja na waabudu wenzetu ulimwenguni pote, kwa sababu wote ni watangazaji wa Ufalme. Sote, tukiwa na umoja ulimwenguni pote, tunazidi kusonga mbele tukiwa na lengo la kuishi milele katika miliki ya kidunia ya Ufalme huo.
Mazungumzo ya Kurudia
• Kuna ulinganifu na tofauti gani kati ya ubatizo wa Yesu na ubatizo wa maji leo?
• Ni nini maana ya kubatizwa “katika jina la Baba na la Mwana na la roho takatifu”?
• Ubatizo wa maji wa Wakristo unampa mtu daraka gani?
[Picha katika ukurasa wa 116, 117]
NJIA FULANI ZA KUUTANGAZA UFALME
Nyumba kwa nyumba
Kwa watu wa ukoo
Kwa wafanyakazi wenzako
Kwa wanashule wenzako
Barabarani
Kuwarudia wale wanaopendezwa
Kuongoza mafunzo ya Biblia ya nyumbani