Weka Siku ya Yehova Karibu Akilini

“Siku za mwisho watakuja wadhihaki.”—2 PETRO 3:3.

1. Mkristo mmoja wa siku ya kisasa alikuwa na hisia gani ya uharaka?

MHUDUMU wa wakati wote kwa zaidi ya miaka 66 aliandika hivi: “Sikuzote nimekuwa na hisia kubwa ya uharaka. Akilini mwangu, sikuzote Har–Magedoni imekuwa ije keshokutwa. (Ufunuo 16:14, 16) Kama baba yangu, na babu yangu, nimeishi maisha yangu kama vile mtume [Petro] alivyohimiza, ‘nikiweka karibu akilini kuwapo kwa siku ya Yehova.’ Sikuzote nimeuona ulimwengu mpya ulioahidiwa kuwa ‘jambo halisi ingawa halionwi.’”—2 Petro 3:11, 12; Waebrania 11:1; Isaya 11:6-9; Ufunuo 21:3, 4.

2. Yamaanisha nini kuiweka karibu akilini siku ya Yehova?

² Usemi wa Petro “kuweka karibu akilini” akirejezea siku ya Yehova wamaanisha kwamba hatuiondoi akilini mwetu. Hatupaswi kusahau kwamba siku ambayo Yehova ataharibu mfumo huu wa mambo kabla ya kuanzisha ulimwengu wake mpya ulioahidiwa iko karibu sana. Yapaswa kuwa halisi sana kwetu hivi kwamba twaiona waziwazi, kana kwamba iko karibu sana mbele yetu. Ndivyo ilivyokuwa halisi kwa manabii wa kale wa Mungu, na mara nyingi walizungumza juu ya siku hiyo kuwa karibu.—Isaya 13:6; Yoeli 1:15; 2:1; Obadia 15; Sefania 1:7, 14.

3. Ni nini ambacho kwa wazi kilichochea shauri la Petro kuhusu siku ya Yehova?

³ Kwa nini Petro alituhimiza tuione siku ya Yehova kana kwamba ingeweza kuja “keshokutwa,” kwa kusema kitamathali? Kwa sababu kwa wazi wengine walikuwa wameanza kudhihaki lile wazo la kuwapo kwa Kristo kulikoahidiwa, wakati ambapo wakosaji wangeadhibiwa. (2 Petro 3:3, 4) Kwa hiyo katika sura ya 3 ya barua yake ya pili, ambayo tutaichunguza sasa, Petro ajibu madai ya wadhihaki hawa.

Ombi Lenye Uchangamfu la Kukumbuka

4. Petro ataka tukumbuke nini?

⁴ Shauku ya Petro kwa ndugu zake yaonyeshwa kwa kuwaita tena na tena katika sura hii “wapendwa.” Akiwaomba kwa uchangamfu wasisahau waliyokuwa wamefundishwa, Petro aanza kwa kusema: “Wapendwa, . . . ninaamsha uwezo wenu mwangavu wa kufikiri kwa njia ya kikumbusha, kwamba mwapaswa kukumbuka semi zilizosemwa hapo awali na manabii watakatifu na amri ya Bwana na Mwokozi kupitia mitume wenu.”—2 Petro 3:1, 2, 8, 14, 17; Yuda 17.

5. Manabii fulani walisema nini juu ya siku ya Yehova?

⁵ Petro awahimiza wasomaji wakumbuke “semi [zipi] zilizosemwa hapo awali na manabii”? Ni zile juu ya kuwapo kwa Kristo katika nguvu za Ufalme na juu ya kuhukumiwa kwa wasiomwogopa Mungu. Petro alikuwa amevutia uangalifu semi hizo mapema. (2 Petro 1:16-19; 2:3-10) Yuda arejezea Enoki, aliyekuwa nabii wa kwanza aliyerekodiwa kuonya juu ya hukumu mbaya ya Mungu dhidi ya watenda-maovu. (Yuda 14, 15) Manabii wengine walikuwako baada ya Enoki, na Petro hataki tusahau waliyoandika.—Isaya 66:15, 16; Sefania 1:15-18; Zekaria 14:6-9.

6. Ni semi gani za Kristo na mitume wake hutuelimisha juu ya siku ya Yehova?

⁶ Kwa kuongezea, Petro awaambia wasomaji wake wakumbuke “amri ya Bwana na Mwokozi.” Amri ya Yesu yatia ndani lile himizo: “Kazieni uangalifu kwa nyinyi wenyewe kwamba mioyo yenu isiwe kamwe yenye kulemewa . . . na kwa ghafula siku hiyo iwe juu yenu mara hiyo kama mtego.” “Fulizeni kutazama, fulizeni kuwa macho, kwa maana hamjui ni lini ulio wakati uliowekwa rasmi.” (Luka 21:34-36; Marko 13:33) Petro atuhimiza pia tusikize semi za mitume. Kwa kielelezo, mtume Paulo aliandika hivi: “Siku ya Yehova inakuja sawasawa kabisa na mwizi usiku. Kwa hiyo, basi, acheni tusiendelee kulala usingizi kama wengine, bali acheni tukae macho na kutunza hisia zetu.”—1 Wathesalonike 5:2, 6.

Tamaa za Wadhihaki

7, 8. (a) Ni watu wa aina gani ambao hudhihaki jumbe zenye kuonya za Mungu? (b) Wadhihaki hudai nini?

⁷ Kama tulivyotangulia kuona, sababu ya onyo la upole la Petro ni kwamba watu fulani walikuwa wameanza kudhihaki maonyo hayo, sawa na Waisraeli wa nyakati za mapema walivyodhihaki manabii wa Yehova. (2 Mambo ya Nyakati 36:16) Petro aeleza hivi: “Kwa maana mwajua hili kwanza, kwamba katika siku za mwisho watakuja wadhihaki pamoja na dhihaka zao, wakiendelea kulingana na tamaa zao wenyewe.” (2 Petro 3:3) Yuda asema kwamba tamaa za wadhihaki hao ni “kwa ajili ya mambo ya kutomwogopa Mungu.” Anawaita “watu wa kinyama, wakiwa hawana ukiroho.”—Yuda 17-19.

⁸ Walimu wasio wa kweli ambao Petro alisema “huendelea kufuata mwili wakiwa na tamaa ya kuutia unajisi” yaelekea wamo miongoni mwa wadhihaki hawa wasio na ukiroho. (2 Petro 2:1, 10, 14) Kwa kudhihaki, wao huwauliza hivi Wakristo waaminifu: “Kuko wapi kuwapo kwake huku kulikoahidiwa? Kwani, kutoka siku baba zetu wa zamani walipolala katika kifo, mambo yote yanaendelea sawasawa kabisa kama kutoka mwanzo wa kuumba.”—2 Petro 3:4.

9. (a) Kwa nini wadhihaki hujaribu kupuuza hisia ya uharaka iliyomo katika Neno la Mungu? (b) Kuweka siku ya Yehova karibu akilini ni ulinzi kwetu namna gani?

⁹ Mbona dhihaka hiyo? Mbona wadokeze kwamba kuwapo kwa Kristo huenda kusipate kutukia, kwamba Mungu hajapata kuingilia mambo ya kibinadamu na hatafanya hivyo kamwe? Kwa kupuuza hisia ya uharaka iliyomo katika Neno la Mungu, wadhihaki hao wa kinyama hutafuta kubembeleza wengine waingie katika hali ya ubaridi wa kiroho na hivyo kuwafanya wawe mawindo rahisi ya ushawishi wenye ubinafsi. Ni kitia-moyo chenye nguvu kama nini kwetu leo ili tukae macho kiroho! Na tuiweke karibu akilini siku ya Yehova na sikuzote tukumbuke kwamba macho yake yanatuona! Hivyo tutachochewa kumtumikia Yehova kwa bidii na kudumisha usafi wetu wa kiadili.—Zaburi 11:4; Isaya 29:15; Ezekieli 8:12; 12:27; Sefania 1:12.

Wenye Kukusudia na Wenye Kudharau

10. Petro anathibitishaje kwamba wadhihaki wamekosea?

¹⁰ Wadhihaki hao hupuuza jambo muhimu. Hulipuuza kimakusudi na hujaribu kuwafanya wengine walisahau. Kwa nini? Ili kwa urahisi zaidi waweze kuwashawishi watu. “Kwa maana, kulingana na kutaka kwao,” Petro aandika, “jambo hili huponyoka kujali kwao.” Jambo gani? “Kwamba mbingu zilikuwako tangu zamani za kale na dunia ikisimama kwa kutungamana kutoka katika maji na katikati ya maji kwa neno la Mungu; na kwa njia hizo ulimwengu wa wakati huo ulipatwa na uangamizo ulipogharikishwa kwa maji.” (2 Petro 3:5, 6) Ndiyo, Yehova aliondolea mbali uovu kutoka duniani wakati wa Furiko la siku ya Noa, jambo la hakika ambalo Yesu pia alikazia. (Mathayo 24:37-39; Luka 17:26, 27; 2 Petro 2:5) Kwa hiyo, tofauti na wasemavyo wadhihaki, mambo yote hayakuendelea “sawasawa kabisa kama kutoka mwanzo wa kuumba.”

11. Ni mataraja gani ya Wakristo wa mapema ya kabla ya wakati yaliyowafanya watu fulani wawadhihaki?

¹¹ Huenda wadhihaki wakawa waliwadhihaki Wakristo waaminifu kwa sababu wao walikuwa na mataraja ambayo hayakuwa yametimizwa bado. Muda mfupi kabla ya Yesu kufa, wanafunzi wake “walikuwa wakiwazia kwamba ufalme wa Mungu ulikuwa ukielekea kujionyesha mara hiyo.” Kisha, baada ya kufufuliwa kwake wakauliza ikiwa Ufalme ungesimamishwa mara moja. Pia, yapata miaka kumi kabla ya Petro kuandika barua yake ya pili, baadhi ya watu ‘walisisimuliwa’ kupitia “ujumbe wa maneno” au kupitia “barua,” yadhaniwa ilikuwa kutoka kwa Paulo au waandamani wake, “ya kuwa siku ya Yehova ipo hapa.” (Luka 19:11; 2 Wathesalonike 2:2; Matendo 1:6) Hata hivyo, mataraja hayo ya wanafunzi wa Yesu hayakuwa yasiyo ya kweli, ila tu yalikuwa ya kabla ya wakati. Siku ya Yehova ingekuja!

Neno la Mungu Lategemeka

12. Neno la Mungu limethibitikaje kuwa lenye kutegemeka katika unabii wake mbalimbali juu ya ‘siku ya Yehova”?

¹² Kama tulivyoona mapema, manabii wa kabla ya Ukristo walionya mara nyingi kwamba siku ya Yehova ya kisasi ilikuwa karibu. ‘Siku ya Yehova’ ilikuwako kwa kiwango kidogo mwaka wa 607 K.W.K. Yehova alipotekeleza kisasi dhidi ya watu wake wakaidi. (Sefania 1:14-18) Baadaye, mataifa mengine, kutia na Babiloni na Misri, yalipatwa na ‘siku ya Yehova’ kama hiyo. (Isaya 13:6-9; Yeremia 46:1-10; Obadia 15) Mwisho wa mfumo wa mambo wa Kiyahudi wa karne ya kwanza ulitabiriwa pia, nao ulitukia wakati ambapo majeshi ya Kiroma yaliharibu kabisa Yudea mwaka wa 70 W.K. (Luka 19:41-44; 1 Petro 4:7) Lakini Petro aelekezea “siku ya Yehova,” ambayo itadunisha hata lile Furiko la tufeni pote kwa ukubwa!

13. Ni kielelezo gani cha kihistoria kionyeshacho uhakika wa mwisho wa mfumo huu wa mambo?

¹³ Petro atolea utangulizi ufafanuzi wake juu ya uangamizo ujao kwa kusema hivi: “Lakini kwa neno hilohilo.” Alikuwa ametoka tu kusema kwamba “kwa neno la Mungu,” dunia ya kabla ya Furiko ilisimama “kutoka katika maji na katikati ya maji.” Hali hiyo, ifafanuliwayo katika simulizi la uumbaji la Biblia, iliwezesha Gharika itukie wakati ambapo maji yalimwagika kufuatia mwelekezo, au neno la Mungu. Petro aendelea kusema hivi: “Kwa neno hilohilo [la Mungu] mbingu na dunia zilizopo sasa zimewekwa akiba kwa ajili ya moto na zinawekwa akiba hadi siku ya hukumu na ya uangamizo wa watu wasiomwogopa Mungu.” (2 Petro 3:5-7; Mwanzo 1:6-8) Tuna neno la Yehova lenye kutegemeka kuweza kuamini hilo! Atakomesha “mbingu na dunia”—mfumo huu wa mambo—katika hasira yenye kuwaka ya siku yake kuu! (Sefania 3:8) Lakini lini?

Hamu Nyingi ya Kutaka Mwisho Uje

14. Kwa nini twaweza kuwa na uhakika kwamba sasa tunaishi katika “siku za mwisho”?

¹⁴ Wanafunzi wa Yesu walitaka kujua mwisho ungekuja lini, kwa hiyo walimwuliza hivi: “Itakuwa ni nini ishara ya kuwapo kwako na ya umalizio wa mfumo wa mambo?” Kwa wazi walikuwa wakiuliza juu ya wakati ambapo mfumo wa Kiyahudi ungekoma, lakini jibu la Yesu lilikazia kimsingi wakati ambapo “mbingu na dunia” zilizopo zingeangamizwa. Yesu alitabiri mambo kama vile vita vikubwa, upungufu wa chakula, matetemeko ya dunia, maradhi, na uhalifu. (Mathayo 24:3-14; Luka 21:5-36) Tangu mwaka wa 1914, tumeona hiyo ishara ikitimizwa ambayo Yesu alitoa ya “umalizio wa mfumo wa mambo” pamoja na mambo ambayo mtume Paulo alitaja yangetambulisha “siku za mwisho.” (2 Timotheo 3:1-5) Kwa kweli, uthibitisho ni mwingi unaoonyesha kwamba tunaishi katika wakati wa mwisho wa mfumo huu wa mambo!

15. Wakristo wameelekea kufanya nini lijapokuwa onyo la Yesu?

¹⁵ Mashahidi wa Yehova wamekuwa na hamu ya kujua wakati ambapo siku ya Yehova itatukia. Nyakati nyingine kwa sababu ya hamu yao wamejaribu kukadiria wakati ambapo huenda siku hiyo ikaja. Lakini kwa kufanya hivyo, kama vile walivyofanya wanafunzi wa mapema wa Yesu, wameshindwa kutii onyo la Bwana-Mkubwa wao kwamba sisi “ha[tu]jui ni lini ulio wakati uliowekwa rasmi.” (Marko 13:32, 33) Wadhihaki wamewadhihaki Wakristo waaminifu kwa sababu ya mataraja yao ya kabla ya wakati. (2 Petro 3:3, 4) Hata hivyo, Petro athibitisha kwamba siku ya Yehova itakuja, kulingana na ratiba Yake.

Uhitaji wa Kuwa na Maoni ya Yehova

16. Twatii onyo gani la upole kwa hekima?

¹⁶ Twahitaji kuwa na maoni ya Yehova juu ya wakati, kama vile Petro atukumbushavyo sasa: “Hata hivyo, wapendwa, acheni jambo hili moja lisiwe likiponyoka kujali kwenu, kwamba siku moja kwa Yehova ni kama miaka elfu na miaka elfu kama siku moja.” Jinsi maisha yetu yenye urefu wa miaka 70 au 80 yalivyo mafupi kwa kulinganishwa! (2 Petro 3:8; Zaburi 90:4, 10) Kwa hiyo ikiwa utimizo wa ahadi za Mungu waonekana kukawia, twahitaji kukubali lile onyo la upole la nabii wa Mungu: “Ijapokawia [wakati uliowekwa rasmi], ingojee; kwa kuwa haina budi kuja, haitakawia.”—Habakuki 2:3, italiki ni zetu.

17. Ijapokuwa siku za mwisho zimeendelea kwa muda mrefu zaidi ya vile wengi walivyotarajia, twaweza kuwa na uhakika wa jambo gani?

¹⁷ Kwa nini siku za mwisho za mfumo huu zimeendelea kwa muda mrefu kuliko vile watu wengi walivyotarajia? Kwa sababu nzuri, kama vile Petro aelezavyo: “Yehova si wa polepole kwa habari ya ahadi yake, kama watu fulani waonavyo kuwa ni upolepole, bali yeye ni mwenye subira kwenu kwa sababu hataki yeyote aangamizwe bali hutaka wote wafikie toba.” (2 Petro 3:9) Yehova huangalia mambo yawezayo kuwafaidi wanadamu wote. Yeye huhangaikia uhai wa watu, kama asemavyo: “Sikufurahii kufa kwake mtu mwovu; bali aghairi mtu mwovu, na kuiacha njia yake mbaya, akaishi.” (Ezekieli 33:11) Kwa hiyo twaweza kuwa na uhakika kwamba mwisho utakuja wakati ufaao tu ili kutimiza kusudi la Muumba wetu mwenye hekima yote na mwenye upendo!

Ni Nini Kitakachopitilia Mbali?

18, 19. (a) Kwa nini Yehova ameazimia kuharibu mfumo huu wa mambo? (b) Petro afafanuaje mwisho wa mfumo huu, na ni nini hasa ambacho kitaharibiwa?

¹⁸ Kwa sababu Yehova huwapenda kikweli wale ambao humtumikia, atafutilia mbali wale wote ambao huwataabisha. (Zaburi 37:9-11, 29) Akijua, kama alivyojua Paulo mapema, kwamba uangamizo huu utakuja wakati usiotarajiwa, Petro aandika hivi: “Siku ya Yehova itakuja kama mwizi, ambayo katika hiyo mbingu zitapitilia mbali kwa kelele ya kuchatachata, lakini elementi zikiwa moto sana zitafumuliwa, na dunia na kazi zilizo ndani yayo zitagunduliwa.” (2 Petro 3:10; 1 Wathesalonike 5:2) Mbingu na dunia halisi hazikuangamia wakati wa Gharika, wala hazitaangamia wakati wa siku ya Yehova. Basi, ni nini ‘kitakachopitilia mbali’ au kitakachoharibiwa?

¹⁹ Serikali za kibinadamu ambazo zimetawala wanadamu zikiwa kama “mbingu” zitaisha na ndivyo na “dunia,” au jamii ya kibinadamu isiyomwogopa Mungu. Labda ile “kelele ya kuchatachata” yadokeza kule kupita upesi kwa mbingu. “Elementi” zinazofanyiza jamii ya kibinadamu ya leo iliyooza, “zitafumuliwa,” au kuharibiwa. Nayo “dunia,” kutia na “kazi zilizo ndani yayo zitagunduliwa.” Yehova atafichua kikamili matendo maovu ya watu aletapo mfumo wote wa ulimwengu kwenye mwisho wake unaostahili.

Fuliza Kukazia Fikira Tumaini Lako

20. Maisha yetu yapaswa kuathiriwaje na kujua kwetu matukio yaliyo mbele?

²⁰ Kwa kuwa matukio haya yenye kutokeza yako karibu, Petro asema kwamba twapaswa kuhusika “katika matendo matakatifu ya mwenendo na vitendo vya ujitoaji-kimungu, [tu]kingojea na kuweka karibu akilini kuwapo kwa siku ya Yehova.” Hakuwezi kuwa na shaka juu ya hilo! “Mbingu zikiwa zimewaka moto zitafumuliwa na elementi zikiwa moto sana zitayeyuka!” (2 Petro 3:11, 12) Uhakika wa kwamba matukio hayo yenye kutokeza yangeweza kuanza kutokea kesho, wapaswa kuathiri kila jambo tufanyalo au tunalopanga kufanya.

21. Ni nini kitakachochukua mahali pa mbingu na dunia zilizopo sasa?

²¹ Sasa Petro atuambia kitakachochukua mahali pa huu mfumo wa kale, akisema hivi: “Lakini ziko mbingu mpya na dunia mpya ambazo tunangojea kulingana na ahadi yake, na katika hizo uadilifu utakaa.” (2 Petro 3:13; Isaya 65:17) Aha, ni kitulizo kikubwa kama nini! Kristo na watawala wenzake 144,000 watafanyiza “mbingu” za kiserikali zilizo “mpya,” na watu wanaookoka mwisho wa ulimwengu huu watafanyiza “dunia mpya.”—1 Yohana 2:17; Ufunuo 5:9, 10; 14:1, 3.

Dumisha Uharaka na Usafi wa Kiadili

22. (a) Ni nini kitakachotusaidia kuepuka doa au waa lolote la kiroho? (b) Petro aonya juu ya hatari gani?

²² “Kwa sababu hiyo, wapendwa,” Petro aendelea kusema, “kwa kuwa mnangojea mambo haya, fanyeni kabisa yote mwezayo ili mwishowe mpatikane naye mkiwa bila doa na bila waa na katika amani. Zaidi ya hilo, ioneni subira ya Bwana wetu kuwa wokovu.” Kungojea kwa hamu nyingi na kuona kokote kuonekanako kuwa kukawia kwa siku ya Yehova kuwa wonyesho wa subira ya kimungu, kutakusaidia kuepuka doa au waa lolote la kiroho. Na bado, kuna hatari! Petro aonya kwamba katika maandishi ya “ndugu yetu mpendwa Paulo . . . mna mambo fulani magumu kuelewa, ambayo wale wasiofundishwa na wasio imara wanayapotoa, kama wafanyavyo na Maandiko mengine pia, kwa uangamizo wao wenyewe.”—2 Petro 3:14-16.

23. Onyo la upole la Petro la kumalizia ni jipi?

²³ Kwa wazi walimu wasio wa kweli walipotosha maandishi ya Paulo juu ya fadhili isiyostahiliwa ya Mungu, wakiyatumia kuwa udhuru wa mwenendo mlegevu. Labda Petro afikiria hilo aandikapo onyo lake la upole la kuachana: “Kwa hiyo, nyinyi, wapendwa, mkiwa mnakuwa na ujuzi huu wa kimbele, iweni wenye kulinda ili msipate kuongozwa kando pamoja nao kwa kosa la watu wanaokaidi sheria na kuanguka kutoka kwenye uimara wenu wenyewe.” Kisha amalizia maandishi yake, akihimiza hivi: “Endeleeni kukua katika fadhili isiyostahiliwa na ujuzi juu ya Bwana na Mwokozi wetu Yesu Kristo.”—2 Petro 3:17, 18.

24. Ni mtazamo gani ambao watumishi wote wa Yehova wapaswa kukubali?

²⁴ Ni wazi kwamba, Petro ataka kuwatia nguvu ndugu zake. Atamani wote wawe na mtazamo ulioonyeshwa na yule Shahidi mwaminifu mwenye umri wa miaka 82 ambaye alinukuliwa mwanzoni: “Nimeishi maisha yangu kama vile mtume alivyohimiza, ‘nikiweka karibu akilini kuwapo kwa siku ya Yehova.’ Sikuzote nimeuona ulimwengu mpya ulioahidiwa kuwa ‘jambo halisi ingawa halionwi.’” Sisi sote na tuishi maisha yetu vivyo hivyo.

Ungejibuje?

◻ “Kuweka karibu akilini” siku ya Yehova kwamaanisha nini?

◻ Wadhihaki hupuuza nini kimakusudi, na kwa nini?

◻ Wadhihaki wamedhihaki Wakristo waaminifu kwa sababu gani?

◻ Ni maoni gani tunayohitaji kudumisha?

[Picha katika ukurasa wa 23]

Weka karibu akilini siku ya Yehova . . .

[Picha katika ukurasa wa 24]

. . . na ulimwengu mpya utakaofuata