“Taarifa za Mteremo” Kutoka Kwenye Apokalipsi

“Nikaona malaika mwingine akiruka katika mbingu ya kati, naye alikuwa na habari njema idumuyo milele ili aitangaze kuwa taarifa za mteremo kwa wale wakaao juu ya dunia.”—UFUNUO 14:6.

1. Ingawa Mashahidi wa Yehova wanaamini kwamba kitabu cha Apokalipsi kimepuliziwa, kwa nini wao si “madhehebu ya kutabiri maangamizi tu”?

TOFAUTI na mashtaka wanayofanyiwa, Mashahidi wa Yehova si “madhehebu ya kutabiri maangamizi tu” wala “madhehebu inayotabiri uharibifu.” Hata hivyo, wao hukubali Apokalipsi, au kitabu cha Ufunuo, kuwa sehemu ya Neno la Mungu lililopuliziwa. Ni kweli kwamba kitabu cha Ufunuo kina ujumbe wenye hukumu dhidi ya waovu. Lakini wanapohubiri waziwazi watumishi wa Mungu hukazia hasa tumaini zuri ajabu linalotajwa katika Biblia, kutia ndani tumaini linalopatikana katika Apokalipsi, au Ufunuo. Hivyo, wao hawaongezei wala hawaondoi neno lolote kwenye maneno ya unabii yanayopatikana humo.—Ufunuo 22:18, 19.

Matangazo ya Taarifa za Mteremo

2. Mashahidi wa Yehova hutumia maandiko gani katika kazi yao ya kuhubiri?

² Andiko ambalo hutajwa mara nyingi kuwa msingi wa huduma ya waziwazi ya Mashahidi wa Yehova ni taarifa hii ya Yesu: “Habari njema hii ya ufalme itatangazwa katika dunia yote inayokaliwa kwa ajili ya kuwa ushahidi kwa mataifa yote; na ndipo mwisho utakapokuja.” (Mathayo 24:14, kielezi-chini katika New World Translation of the Holy Scriptures—With References) “Habari njema hii ya ufalme” ni nini? Mashahidi wengi hujibu kwa kunukuu mistari ya Ufunuo sura ya 20 na 21 inayorejezea ule Utawala wa Miaka Elfu wa Kristo na serikali yake ya Ufalme na jamii ya wanadamu, ambamo kifo, maombolezo, na maumivu ‘hazitakuwapo tena kamwe.’—Ufunuo 20:6; 21:1, 4.

3. Huduma ya waziwazi ya Mashahidi wa Yehova yalingana na utume gani?

³ Kwa kuwa Mashahidi wa Yehova ni watangazaji wa taarifa hizi za mteremo, kwa kweli wao ni wasemaji wa mjumbe wa kimbingu wa mfano ambaye utume wake unatajwa pia katika Ufunuo. “Nikaona malaika mwingine akiruka katika mbingu ya kati, naye alikuwa na habari njema idumuyo milele ili aitangaze kuwa taarifa za mteremo kwa wale wakaao juu ya dunia, na kwa kila taifa na kabila na lugha na watu.” (Ufunuo 14:6) Hiyo “habari njema idumuyo milele” yatia ndani tangazo la kwamba “ufalme [au, utawala] wa ulimwengu” umekuwa “ufalme wa Bwana wetu na wa Kristo wake” na kwamba “wakati [wa Yehova] uliowekwa rasmi” umefika wa “kuwaleta kwenye uangamizi wale wanaoiangamiza dunia.” (Ufunuo 11:15, 17, 18) Je, kweli hiyo si habari njema?

Mambo Ambayo Kitabu cha Ufunuo Kinatufunulia

4. (a) Ni kweli zipi za msingi ambazo zimetajwa katika sura ya 1 ya Ufunuo? (b) Wale wanaotaka kunufaika na taarifa za mteremo wanahitajiwa wafanye nini?

⁴ Sura ya kwanza ya kitabu cha Ufunuo yamtaja Yehova kuwa “Alfa na Omega, . . . yule Aliyeko na aliyekuwako na anayekuja, Mweza-Yote.” Na inamwonyesha Mwana wake, Yesu Kristo, kuwa “Shahidi aliye Mwaminifu,” “mzaliwa wa kwanza kutoka kwa wafu,” na “Mtawala wa wafalme wa dunia.” Pia inamtaja Yesu kuwa “yeye atupendaye na aliyetufungua kutoka katika dhambi zetu kwa njia ya damu yake mwenyewe.” (Ufunuo 1:5, 8) Basi, tokea mwanzo, kitabu cha Ufunuo kinataja kweli muhimu zinazookoa uhai. “Wale wakaao juu ya dunia” hawatafaidika na taarifa za mteremo wanazoletewa ila tu watambue enzi kuu ya Yehova, waweke imani katika damu ya Yesu iliyomwagika, na kuamini kwamba Yehova alimfufua na kwamba sasa Kristo ni Mtawala wa dunia aliyewekwa na Mungu.—Zaburi 2:6-8.

5. Sura ya 2 na ya 3 ya Ufunuo yamwonyesha Kristo akiwa na daraka gani?

⁵ Sura mbili zifuatazo zaonyesha Kristo Yesu akiwa Mwangalizi wa kimbingu mwenye upendo anayeangalia makutaniko ya wanafunzi wake duniani. Hati-kunjo iliyoandikiwa makutaniko saba ya Kikristo yaliyoteuliwa ambayo yalikuwa katika Asia Ndogo katika karne ya kwanza W.K. ilikuwa na kitia-moyo na mashauri thabiti ambayo yangali yanatumika hata leo. Mara nyingi ujumbe ambao makutaniko yalipelekewa ulianza kwa maneno “mimi navijua vitendo vyako” au ‘najua dhiki yako.’ (Ufunuo 2:2, 9) Ndiyo, Kristo alijua barabara mambo yaliyokuwa yakiendelea katika makutaniko ya wanafunzi wake. Aliwapongeza wengine kwa sababu ya upendo wao, imani yao, bidii yao katika huduma, uvumilivu wao, na uaminifu wao kwa jina na neno lake. Aliwakaripia wengine kwa sababu upendo wao kwa Yehova na kwa Mwana wake ulikuwa umepoa, au walikuwa wameingilia ukosefu wa adili kingono, ibada ya sanamu, au mafarakano yenye uasi.

6. Ono lililoandikwa katika sura ya 4 husaidia watu kuelewa nini?

⁶ Sura ya 4 yaandaa ono lenye kutia kicho la kiti cha ufalme cha kimbingu cha Yehova Mungu. Yatuonyesha utukufu wa kuwapo kwa Yehova na pia mpangilio wa utawala wa kimbingu ambao atatumia. Watawala ambao wamevikwa taji, ambao viti vyao vya ufalme vimezunguka kiti kikuu cha ufalme cha ulimwengu, wamsujudu Yehova na kutangaza: “Wewe wastahili, Yehova, naam, Mungu wetu, kupokea utukufu na heshima na nguvu, kwa sababu uliumba vitu vyote, na kwa sababu ya mapenzi yako vilikuwako na vikaumbwa.”—Ufunuo 4:11.

7. (a) Malaika anawaambia wakaao duniani wafanye nini? (b) Ni nini sehemu muhimu ya kazi yetu ya kufundisha watu?

⁷ Je, jambo hilo lina maana yoyote kwa watu leo? Ndiyo, bila shaka. Ikiwa wanataka kuishi chini ya Ufalme wa Milenia, ni lazima watii mambo ambayo ‘malaika anayeruka katika mbingu ya kati’ atangaza: “Hofuni Mungu na kumpa utukufu, kwa sababu saa ya hukumu yake imewasili.” (Ufunuo 14:6, 7) Mojawapo ya makusudi makuu ya kazi ya kufundisha watu Biblia inayofanywa na Mashahidi wa Yehova ni kuwasaidia “wale wakaao juu ya dunia” wamjue Yehova na kumwabudu, watambue kwamba yeye ndiye Muumba, na kunyenyekea kwa hiari enzi yake kuu yenye uadilifu.

Mwana-Kondoo Astahiliye Heshima

8. (a) Kristo anaonyeshwaje katika sura ya 5 na 6? (b) Wote wasikilizao taarifa za mteremo wanaweza kujifunza nini kutokana na ono hili?

⁸ Sura mbili zifuatazo, 5 na 6, zamwonyesha Yesu Kristo akiwa Mwana-Kondoo anayestahili kufungua hati-kunjo yenye mihuri saba, na basi kufunua kwa lugha ya mfano matukio ya wakati wetu. (Linganisha Yohana 1:29.) Sauti za kimbingu zamwambia hivi Mwana-kondoo huyu wa mfano: “Wewe wastahili kuchukua hiyo hati-kunjo na kufungua mihuri yayo, kwa sababu ulichinjwa na kwa damu yako ukanunua watu kwa ajili ya Mungu kutoka kila kabila na ulimi na watu na taifa, nawe ukawafanya kuwa ufalme na makuhani kwa Mungu wetu, nao watatawala wakiwa wafalme juu ya dunia.” (Ufunuo 5:9, 10) Ono hili lafundisha kwamba kwa msingi wa damu ya Kristo iliyomwagika, wanadamu fulani wa jamii zote wameitwa wawe naye kule mbinguni na ‘kutawala wakiwa wafalme juu ya dunia.’ (Linganisha Ufunuo 1:5, 6.) Idadi yao ndogo imetajwa baadaye katika Ufunuo.

9. Kristo anaonyeshwaje katika sura ya 6?

⁹ Katika ono jingine, Kristo anaonyeshwa akiwa amepanda farasi mweupe na akiwa amevaa taji, akienda “akishinda na kukamilisha ushindi wake.” Kwa furaha atashinda matokeo maovu yanayofananishwa na wapanda-farasi wengine watatu wa Apokalipsi, ambao mwendo wao wa kasi umeleta vita, njaa kuu, na kifo kwa wanadamu tangu mwaka muhimu wa 1914. (Ufunuo 6:1-8) Fungu la kipekee la Kristo, Mwana-Kondoo wa Mungu, katika wokovu wa wanadamu na kutekelezwa kwa makusudi mazuri ajabu ya Yehova ni habari kuu ya kazi ya kufundisha watu Biblia inayofanywa na Mashahidi wa Yehova.

10. (a) Sura ya 7 ina habari gani muhimu? (b) Kristo alisemaje kuhusu wale wanaopokea Ufalme?

¹⁰ Sura ya 7 ina taarifa za mteremo kwelikweli. Ni katika kitabu cha Ufunuo tu ambapo tunapata idadi ya wale ambao Yesu aliwaita “kundi dogo” ambao Baba ya Mwana-Kondoo awapa Ufalme. (Luka 12:32; 22:28-30) Hao wametiwa muhuri na Yehova Mungu kupitia roho yake. (2 Wakorintho 1:21, 22) Mtume Yohana, ambaye alipokea Ufunuo, athibitisha jambo hilo: “Nikasikia idadi ya wale waliotiwa muhuri, mia arobaini na nne elfu.” (Ufunuo 7:4) Idadi hiyo hususa inathibitishwa baadaye katika sura moja kuwa jumla ya wale ‘walionunuliwa kutoka miongoni mwa wanadamu’ wakatawale pamoja na Mwana-Kondoo kwenye Mlima Zayoni wa kimbingu. (Ufunuo 14:1-4) Huku makanisa ya Jumuiya ya Wakristo yakifafanua idadi hiyo kwa njia isiyoeleweka na isiyosadikisha, inapendeza kwamba msomi wa Biblia E. W. Bullinger asema hivi kuhusu idadi hiyo: “Ni taarifa sahili ya hakika: idadi hususa tofauti na idadi isiyo dhahiri katika sura hiihii.”

11. (a) Ni taarifa zipi za mteremo zinazopatikana katika sura ya 7? (b) Washiriki wa “umati mkubwa” wana matarajio gani?

¹¹ Ni idadi gani isiyo dhahiri ambayo Bullinger alitaja? Katika mstari wa 9, mtume Yohana aliandika: “Baada ya mambo haya nikaona, na, tazama! umati mkubwa, ambao hakuna mtu aliyeweza kuuhesabu, kutoka katika mataifa yote na makabila na vikundi vya watu na lugha.” (Ufunuo 7:9) Ni nani ambao wamefanyiza huo umati mkubwa, na wana msimamo gani sasa mbele za Mungu, na wana matarajio gani ya wakati ujao? Jibu la Apokalipsi ni habari njema kwa wakaao duniani. Twasoma: “Hawa ndio wale watokao katika dhiki kubwa, nao wamefua kanzu zao na kuzifanya nyeupe katika damu ya Mwana-Kondoo.” Kupitia imani katika damu ya Kristo iliyomwagika, wao watahifadhiwa wakati wa “dhiki kubwa.” Kristo ‘atawaongoza kwenye mabubujiko ya maji ya uhai. Na Mungu atafuta kabisa kila chozi kutoka katika macho yao.’ (Ufunuo 7:14-17) Naam, mamilioni ya watu wanaoishi leo wanaweza kuwa sehemu ya watu wengi sana wasioweza kuhesabika watakaookoka mwisho wa mfumo wa mambo wa sasa ulio mwovu. Wakiwa raia wa Mfalme Yesu Kristo wakati wa Utawala wake wa Milenia, yeye atawaongoza wapate uhai udumuo milele duniani. Je, hiyo si habari njema?

“Hukumu Zake Ni za Kweli na za Uadilifu”

12, 13. (a) Sura ya 8 hadi 19 zina nini? (b) Kwa nini watu wenye mioyo minyofu hawapasi kusumbuliwa na unabii kama huo?

¹² Sura ya 8 hadi ya 19 hasa ndiyo imefanya kitabu cha Apokalipsi, au Ufunuo, kuonwa kuwa kitabu kinachotabiri misiba yenye kuogofya sana. Zina ujumbe wenye nguvu sana (unaofananishwa na mapigo ya tarumbeta, tauni, na mabakuli ya hasira ya Mungu) dhidi ya sehemu mbalimbali za mfumo wa mambo wa Shetani. Kwanza hukumu hizo zitatekelezwa dhidi ya dini isiyo ya kweli (“Babiloni Mkubwa”), kisha dhidi ya mifumo ya kisiasa isiyomcha Mungu, inayofananishwa na mahayawani-mwitu.—Ufunuo 13:1, 2; 17:5-7, 15, 16.a

¹³ Sura hizo zaonyesha kutakaswa kwa mbingu, huku Shetani na roho wake waovu wakitupwa chini duniani. Hiyo inatupa sababu pekee inayopatana na akili ya kuwapo kwa msononeko mkubwa sana duniani tangu mwaka wa 1914. (Ufunuo 12:7-12) Pia zinaeleza katika lugha ya mfano kuharibiwa kwa mfumo mwovu wa Shetani hapa duniani. (Ufunuo 19:19-21) Je, watu wenye mioyo minyofu wanapasa kushtushwa na matukio hayo yenye kutokeza? La, kwa sababu wakati wa kutekelezwa kwa hukumu za Mungu, jeshi la kimbingu lapaza sauti: “Sifuni Yah, nyinyi watu! Wokovu na utukufu na nguvu ni za Mungu wetu, kwa sababu hukumu zake ni za kweli na za uadilifu.”—Ufunuo 19:1, 2.

14, 15. (a) Mfumo mwovu wa sasa utamalizwaje kwa uadilifu? (b) Kwa nini sehemu hii ya Apokalipsi ifanye watu wenye mioyo minyofu washangilie?

¹⁴ Yehova hataleta mfumo mwadilifu wa mambo bila kuiondolea dunia wale wanaoiharibu. (Ufunuo 11:17, 18; 19:11-16; 20:1, 2) Hata hivyo, hakuna binadamu au taifa la kisiasa ambalo lina mamlaka au uwezo wa kutimiza jambo hilo. Ni Yehova na Kristo Yesu tu, Mfalme na Hakimu aliyemweka, ambao wanaweza kutimiza jambo hilo kwa uadilifu.— 2 Wathesalonike 1:6-9.

¹⁵ Kama vile Apokalipsi inavyoonyesha wazi, Yehova anakusudia kumaliza mfumo mwovu wa sasa. Jambo hili lapaswa kuwaletea shangwe wanaume na wanawake “wanaougua na kulia kwa sababu ya machukizo yote yanayofanyika.” (Ezekieli 9:4) Jambo hilo lapaswa kuwakazia uhitaji wa haraka wa kutii mwito wa yule malaika mwenye taarifa za mteremo, aliyetangaza hivi: “Hofuni Mungu . . . kwa sababu saa ya hukumu yake imewasili, na kwa hiyo mwabuduni Yeye aliyezifanya mbingu na dunia.” (Ufunuo 14:7) Watu hao na wamwabudu Yehova na kumtumikia pamoja na Mashahidi wake, “washikao amri za Mungu na walio na kazi ya kutoa ushahidi kuhusu Yesu.”—Ufunuo 12:17.

Utawala Mtukufu wa Milenia

16. (a) Kwa nini makanisa ya Jumuiya ya Wakristo yamekataa tumaini la Milenia? (b) Kwa nini Mashahidi wa Yehova wanaamini kwamba ile sala ya kigezo itajibiwa?

¹⁶ Sura ya 20 hadi 22 ya kitabu cha Ufunuo zina msingi wa Kimaandiko ufanyao watu watumainie Utawala wa Milenia. Hiyo ndiyo sehemu pekee ya Biblia ambayo inataja kihususa kipindi cha miaka elfu ambacho kitatangulia furaha ya milele mbinguni na duniani. Makanisa ya Jumuiya ya Wakristo yamekataa tumaini hilo la Milenia. Kwa kuwa fundisho la kanisa lasema kwamba waadilifu wataenda mbinguni na waovu kwenda kwenye helo, hilo halitaji dunia paradiso. Ile sala ya kigezo, ambayo inataja kwamba “mapenzi ya [Mungu] yafanyike duniani kama ilivyo mbinguni,” imepoteza maana miongoni mwa wafuasi wa makanisa ya Jumuiya ya Wakristo. (Mathayo 6:10, New International Version) Lakini sivyo ilivyo na Mashahidi wa Yehova. Wao huamini kabisa kwamba Yehova Mungu hakuiumba dunia “ukiwa,” bali “ikaliwe.” (Isaya 45:12, 18) Hivyo, unabii wa kale, ile sala ya kigezo, na tumaini la apokalipsi la Milenia, zote zakubaliana. Wakati wa Utawala wake wa Miaka Elfu, Kristo atahakikisha kwamba mapenzi ya Yehova yanafanyika duniani, kama ilivyo mbinguni.

17. Ni nini kinachoonyesha kwamba “miaka elfu” inapasa kuchukuliwa kihalisi?

¹⁷ Usemi “miaka elfu” wapatikana mara sita katika mistari saba ya kwanza ya Ufunuo sura ya 20. Jambo kuu ni kwamba unatumiwa mara nne ukitangulizwa kwa neno “ile,” kuonyesha kwamba inarejezea miaka elfu halisi, wala si kipindi kirefu kisicho dhahiri, kama wasemavyo wafafanuzi wengi wa Jumuiya ya Wakristo. Ni nini kitakachotokea katika Milenia? Kwanza, Shetani hataweza kutenda chochote katika kipindi hicho chote. (Ufunuo 20:1-3; linganisha Waebrania 2:14.) Hiyo ni habari njema kama nini!

18. (a) Kwa nini Milenia yaweza kuitwa “siku” ya hukumu? (b) Ni nini kitakachotokea mwishoni mwa ile miaka elfu?

¹⁸ Kwa kuwa “mamlaka ya kuhukumu” wamepewa wale ambao ‘wanatawala wakiwa wafalme pamoja na Kristo kwa miaka elfu,’ kwa kweli kipindi hicho ni “siku” ya hukumu ya miaka elfu. (Ufunuo 20:4, 6; linganisha Matendo 17:31; 2 Petro 3:8.) Wafu watafufuliwa na, wakiwa pamoja na waokokaji wa “dhiki kuu,” wao watahukumiwa kwa haki kulingana na matendo yao wakati huo. (Ufunuo 20:12, 13) Mwishoni mwa miaka elfu, Shetani ataachiliwa kwa muda mfupi ili ajaribu wanadamu kwa mara ya mwisho na baadaye yeye, roho wake waovu, na waasi wowote duniani wanaomfuata wataangamizwa milele. (Ufunuo 20:7-10) Majina ya wanadamu wanaopita mtihani huu yataandikwa bila kufutika katika “kitabu cha uhai” nao watapata uhai wenye furaha milele, wakimtumikia Yehova na kumwabudu katika dunia paradiso.—Ufunuo 20:14, 15; Zaburi 37:9, 29; Isaya 66:22, 23.

19. (a) Kwa nini tuna hakika kwamba ahadi nzuri ajabu zinazotajwa katika kitabu cha Ufunuo zitatimizwa hakika? (b) Makala ifuatayo itazungumzia nini?

¹⁹ Taarifa kama hizo za mteremo ndizo zimo katika Apokalipsi. Ahadi hizo si maneno matupu ya wanadamu. Mtume Yohana aliandika: “Yeye aketiye juu ya kiti cha ufalme akasema: ‘Tazama! Mimi ninafanya vitu vyote kuwa vipya.’ Pia, asema: ‘Andika, kwa sababu maneno haya ni ya uaminifu na ya kweli.’” (Ufunuo 21:5) Ni lazima tufanye nini ili hata sisi tupate utimizo wa taarifa hizo za mteremo? Kitabu cha Ufunuo kina mashauri mengi kwa wale wanaotaka kumpendeza Mungu. Kufuata mashauri hayo kutatuletea furaha nyingi, sasa na milele, kama makala ifuatayo itakavyoonyesha.

[Maelezo ya chinis]

Mambo ya Kurudia

◻ Ni kweli zipi za msingi zinazopatikana katika Ufunuo sura ya 4 hadi 6 ambazo ni sehemu muhimu ya taarifa za mteremo?

◻ Ni taarifa zipi za mteremo zinazopatikana katika Ufunuo sura ya 7?

◻ Kwa nini watu wenye mioyo minyofu hawapasi kusumbuliwa na ujumbe wa hukumu unaopatikana katika Ufunuo?

◻ Ni katika njia zipi Milenia itakuwa “siku” ya hukumu?

[Picha katika ukurasa wa 10]

Mfalme Yesu Kristo ataondoa kabisa vita, njaa kuu, na kifo duniani