Sura ya 32

Kasirani ya Mungu Yaletwa Kwenye Tamati

1. Ni nini kitakuwa kimetukia wakati mabakuli saba yatakuwa yamemwagwa mpaka kwenye tamati na sasa ni maswali gani yanayozuka kwa habari ya mabakuli?

YOHANA amekwisha julisha malaika waliopewa utume wa kumimina mabakuli saba. Yeye anatuambia kwamba “haya ndiyo ya mwisho, kwa sababu kwa njia ya hayo kasirani ya Mungu inaletwa kwenye tamati.” (Ufunuo 15:1; 16:1, NW) Tauni hizi, zenye kufunua adhabu zinazotolewa na Yehova kwa ajili ya uovu duniani, ni lazima zimiminwe mpaka kwenye tamati. Zikiisha kumiminwa, hukumu za Mungu zitakuwa zimetekelezwa. Ulimwengu wa Shetani utakuwa haupo tena! Tauni hizi huonya juu ya nini kwa aina ya binadamu na watawala wa huu mfumo mbovu uliopo? Wakristo wanaweza kuepukaje kusumbuliwa kwa tauni pamoja na ulimwengu huu uliohukumiwa maangamizi? Haya ni maswali muhimu, na sasa yatajibiwa. Wote wanaotamani sana ushindi wenye shangwe wa uadilifu watapendezwa sana na vitu ambavyo Yohana anafuata kuona.

Hasira-Kisasi ya Yehova Dhidi ya “Dunia”

2. Hutokea nini malaika wa kwanza anapomimina bakuli lake katika dunia, na ni nini kinachofananishwa na dunia?

² Malaika wa kwanza aanza kutenda! “Na wa kwanza akaenda zake na akamimina bakuli lake ndani ya dunia. Na donda lenye kuumiza na lenye kudhuru likaja kuwa juu ya watu ambao walikuwa na alama ya hayawani-mwitu na ambao walikuwa wakiabudu mfano wake.” (Ufunuo 16:2, NW) Kama katika kile kisa cha ule mpigo wa kwanza wa tarumbeta, hapa “dunia” hufananisha ule mfumo wa kisiasa ambao huonekana kuwa imara ambao Shetani alianza kujenga hapa duniani huko nyuma katika wakati wa Nimrodi, miaka zaidi ya 4,000 iliyopita.—Ufunuo 8:7, NW.

3. (a) Serikali nyingi zimedaije kile kinachokuwa sawa na ibada kutoka kwa raia zao? (b) Mataifa yametokeza nini kuwa kibadala cha Ufalme wa Mungu, na tokeo ni nini kwa wale wanaokiabudu?

³ Katika hizi siku za mwisho, serikali nyingi zimedai kile ambacho kimekuwa kama ibada kutoka kwa raia wazo, zikisisitiza kwamba lazima Serikali itukuzwe juu ya Mungu au ushikamanifu mwingine wowote. (2 Timotheo 3:1; linga Luka 20:25; Yohana 19:15.) Tangu 1914 imekuwa kawaida kwa mataifa kuandikisha vijana wao jeshini kwa nguvu ili kupiga vita, au kuwa tayari kupiga vita, aina ya vita ya ujumla ambayo imetia sana kurasa za historia ya ki-siku-hizi madoa ya damu. Wakati wa siku ya Bwana mataifa yametokeza pia, kuwa kibadala cha Ufalme wa Mungu, mfano wa hayawani—Ushirika wa Mataifa na mwandamizi wao, Umoja wa Mataifa. Ni kufuru kama nini kupiga mbiu, kama vile wamefanya mapapa wa hivi karibuni, kwamba baraza hili lililofanywa na mwanadamu ndilo tumaini pekee la mataifa kwa amani! Hupinga kwa uthabiti Ufalme wa Mungu. Wale wanaoliabudu wanakuwa wachafu kiroho, wenye vidonda, kama vile Wamisri waliopinga Yehova katika siku ya Musa walipigwa kwa tauni ya vidonda na majipu halisi.—Kutoka 9:10, 11.

4. (a) Yaliyomo katika bakuli la kwanza la kasirani ya Mungu yanakazia nini kwa uthabiti? (b) Yehova huwaonaje wale wanaokubali alama ya hayawani-mwitu?

⁴ Yaliyomo katika bakuli hili hukazia kwa uthabiti uchaguzi ulio mbele ya wanadamu: Ni lazima wapatwe na ama kutoidhiniwa na ulimwengu ama ghadhabu ya Yehova. Aina ya binadamu imeshurutishwa kukubali alama ya hayawani-mwitu, kwa kusudi la kwamba “yeyote asipate kuweza kununua au kuuza isipokuwa mtu aliye na alama, jina la hayawani-mwitu au nambari ya jina lake.” (Ufunuo 13:16, 17, NW) Lakini kuna hasara katika hili! Yehova huwaona wale wanaokubali hiyo alama kuwa wakipigwa na “donda lenye kuumiza na lenye kudhuru.” Tangu 1919 wao wametiwa alama peupe kuwa wamekataa Mungu aliye hai. Mipango yao ya kisiasa haina fanikio, nao hupatwa na maumivu makali. Kiroho, wao ni wachafu. Wasipotubu, ugonjwa huu “wenye kuumiza” utaleta kifo, kwa kuwa hii ni siku ya Yehova ya hukumu. Hakuna uwanja wa kutokuwamo kati ya kuwa sehemu ya huu mfumo wa mambo wa ulimwengu na kutumikia Yehova upande wa Kristo wake.—Luka 11:23; linga Yakobo 4:4.

Bahari Yawa Damu

5. (a) Hutukia nini wakati lile bakuli la pili linapomiminwa? (b) Yehova anawaonaje wale wanaokaa katika ile bahari ya mfano?

⁵ Bakuli la pili la kasirani ya Mungu lazima sasa limiminwe. Itamaanisha nini kwa aina ya binadamu? Yohana atuambia: “Na wa pili akamimina bakuli lake ndani ya bahari. Na hiyo ikawa damu kama ya binadamu mfu, na kila nafsi hai ikafa, ndiyo, vitu vilivyo katika bahari.” (Ufunuo 16:3, NW) Kama mpigo wa pili wa tarumbeta, bakuli hili linaelekezwa dhidi ya “bahari”—tungamo la binadamu lenye kuvurugika, lenye kuasi, lililotenganishwa na Yehova. (Isaya 57:20, 21; Ufunuo 8:8, 9, NW) Machoni pa Yehova, “bahari” hii ni kama damu, isiyowafaa viumbe kuishi ndani yayo. Ndiyo sababu Wakristo lazima wawe si sehemu ya ulimwengu. (Yohana 17:14, NW) Kumiminwa kwa bakuli la pili la kasirani ya Mungu hufunua kwamba aina ya binadamu yote inayokaa katika bahari hii imekufa machoni pa Yehova. Kwa sababu ya daraka la jumuiya, aina ya binadamu ina hatia kubwa ya umwagaji-damu isiyo na hatia. Siku ya kasirani ya Yehova iwasilipo, wao watakufa kihalisi mikononi mwa majeshi yake ya kufisha.—Ufunuo 19:17, 18; linga Waefeso 2:1; Wakolosai 2:13.

Kuwapa Damu Wanywe

6. Hutukia nini wakati bakuli la tatu linapomiminwa, na ni maneno gani yanayosikiwa kutoka kwa malaika na kutoka madhabahu?

⁶ Bakuli la tatu la kasirani ya Mungu kama mpigo wa tatu wa tarumbeta, huathiri machimbuko ya maji matamu. “Na wa tatu akamimina bakuli lake ndani ya mito na vibubujiko vya maji. Na hiyo ikawa damu. Na mimi nikasikia malaika aliye na amri juu ya maji akisema: ‘Wewe, Mmoja ambaye yuko na ambaye alikuwako, Mshikamanifu, u mwadilifu, kwa sababu wewe umekata maamuzi haya, kwa sababu wao walimimina damu ya watakatifu na ya manabii, na wewe umewapa damu wanywe. Wao hustahili hiyo.’ Na mimi nikasikia madhabahu ikisema: ‘Ndiyo, Yehova Mungu, Mweza Yote, ya kweli na ya uadilifu ni maamuzi yako ya hukumu.’”—Ufunuo 16:4-7, NW.

7. Ni nini kinachotolewa picha na “mito na vibubujiko vya maji”?

⁷ Hii “mito na vibubujiko vya maji” ni picha ya yale yaitwayo eti machimbuko ya kisasa hivi ya mwongozo na hekima ambayo hukubaliwa na ulimwengu huu, kama vile falsafa za kisiasa, kiuchumi, kisayansi, kielimu, kijamii, na kidini ambazo huongoza matendo na maamuzi ya binadamu. Badala ya kutegemea Yehova, kwa ajili ya ukweli wenye kutoa uhai, ambaye ndiye Kibubujiko cha uhai, wanadamu ‘wamejichongea wenyewe visima vilivyovunjika’ nao wamekunywa sana “hekima ya ulimwengu huu [ambayo] ni upumbavu kwa Mungu.”—Yeremia 2:13; 1 Wakorintho 1:19; 2:6; 3:19; Zaburi 36:9, NW.

8. Ni katika njia zipi aina ya binadamu imejiletea hatia ya damu?

⁸ “Maji” kama hayo yaliyochafuliwa yameongoza wanadamu kuwa na hatia ya damu, mathalani, katika kuwatia moyo wamwage damu kwa kadiri kubwa katika vita ambavyo karne iliyopita vilitwaa maisha zaidi ya milioni mia moja. Hususa katika Jumuiya ya Wakristo, ambako vililipuka vita viwili vya ulimwengu, wanadamu wamekuwa “katika uharaka wa kumwaga damu isiyo na hatia,” na hiyo imetia ndani damu ya mashahidi wa Mungu mwenyewe. (Isaya 59:7; Yeremia 2:34, NW) Aina ya binadamu imejiletea pia hatia ya damu kwa kutumia vibaya kiasi kikubwa mno cha damu kwa ajili ya kutia mishipani, katika kukiuka sheria za Yehova za uadilifu. (Mwanzo 9:3-5; Walawi 17:14; Matendo 15:28, 29) Kwa sababu hiyo, kupitia kutiwa damu mishipani, tayari wao wamevuna sikitiko la kuwa na UKIMWI, ugonjwa wa kufura ini, na magonjwa mengine. Lipo kamili kwa ajili ya hatia ya damu litakuja karibuni wakati wakiukaji watakapolipa adhabu iliyo kuu zaidi, wakikanyagwa katika “shinikizo la divai ya kasirani ya Mungu.”—Ufunuo 14:19, 20, NW.

9. Kumiminwa kwa bakuli la tatu kunahusu nini?

⁹ Katika siku ya Musa, wakati Mto Naili ulipogeuzwa kuwa damu, Wamisri waliweza kuendelea kuwa hai kwa kutafuta machimbuko mengine ya maji. (Kutoka 7:24) Ingawa hivyo, leo, katika pindi ya tauni hii ya kiroho, hakuna mahali katika ulimwengu wa Shetani ambako watu wanaweza kupata maji yenye kutoa uhai. ‘Kumiminwa’ kwa bakuli hili la tatu kunahusu kupiga mbiu kwamba “mito na vibubujiko vya maji” vya ulimwengu viko kama damu, vikileta kifo cha kiroho kwa wote wanaoyanywa. Watu wasipomwendea Yehova, wanavuna hukumu yake mbaya.—Linga Ezekieli 33:11.

10. “Malaika aliye na amri juu ya maji” anajulisha nini, na ni ushahidi gani ambao “madhabahu” inaongezea?

¹⁰ “Malaika aliye na amri juu ya maji,” yaani, malaika amiminaye bakuli hili juu ya maji, anatukuza Yehova kuwa ndiye Hakimu wa Ulimwengu Wote Mzima, ambaye maamuzi yake ya uadilifu ni kamili. Kwa hiyo, yeye anasema juu ya hukumu hii: “Wao hustahili hiyo.” Pasipo shaka, huyo malaika alijionea mwenyewe umwagaji-damu mwingi na ukatili uliochochewa na mafundisho bandia na falsafa za ulimwengu huu mbovu kwa muda wa maelfu mengi ya miaka. Kwa sababu hiyo, yeye anajua kwamba uamuzi wa hukumu wa Yehova ni wa haki. Hata “madhabahu” ya Mungu inasema kwa mpaazo. Kwenye Ufunuo 6:9, 10, nafsi za wale ambao waliuawa kiimani husemwa kuwa kwenye msingi wa madhabahu hiyo. Kwa hiyo “madhabahu” inaongeza ushahidi wenye nguvu nyingi kwa habari ya haki na uadilifu wa maamuzi ya Yehova.a Hakika, inawafaa wale ambao wamemwaga na kutumia vibaya damu wenyewe wanyweshwe damu kinguvu, kama ufananisho wa Yehova kuwahukumia kifo.

Kuunguza Wanadamu kwa Moto

11. Ni nini iliyo shabaha ya bakuli la nne la kasirani ya Mungu na hutukia nini linapomiminwa?

¹¹ Shabaha ya bakuli la nne la kasirani ya Mungu ni jua. Yohana atuambia sisi: “Na wa nne akamimina bakuli lake juu ya jua; na jua likapewa ruhusa ya kuunguza wanadamu kwa moto. Na wanadamu wakaunguzwa kwa joto kubwa, lakini wao walikufuru jina la Mungu, ambaye ana mamlaka juu ya tauni hizi na wao hawakutubu ili wampe yeye utukufu.”—Ufunuo 16:8, 9, NW.

12. Ni nini lililo “jua” la ulimwengu huu, na jua hili la ufananisho lapewa ruhusa gani?

¹² Leo, kwenye huu “umalizio wa mfumo wa mambo,” ndugu za kiroho za Yesu ‘hung’aa kwa uangavu kama jua katika ufalme wa Baba yao.’ (Mathayo 13:40, 43, NW) Yesu mwenyewe ndiye “jua la uadilifu.” (Malaki 4:2, NW) Ingawa hivyo, aina ya binadamu, ina “jua” layo yenyewe, watawala wayo yenyewe ambao hujaribu kung’aa katika kupinga Ufalme wa Mungu. Ule mpigo wa nne wa tarumbeta ulitangaza kwamba ‘jua, mwezi, na nyota’ katika mbingu za Jumuiya ya Wakristo kwa kweli ni machimbuko ya giza, si ya nuru. (Ufunuo 8:12, NW) Bakuli la nne la kasirani ya Mungu huonyesha sasa kwamba “jua” la ulimwengu lingekuwa lenye joto sana isivyovumilika. Wale wanaotegemewa kuwa viongozi kama jua ‘wangeunguza’ aina ya binadamu. Hiyo ruhusa ingepewa kwa jua la ufananisho. Kwa maneno mengine, Yehova angeruhusu hilo kuwa sehemu ya hukumu yake yenye moto juu ya aina ya binadamu. Ni katika njia gani kuunguzwa huku kumetukia?

13. Ni katika njia gani watawala wa ulimwengu huu walio ufananisho wa jua ‘wameunguza’ aina ya binadamu?

¹³ Baada ya vita ya ulimwengu ya kwanza, watawala wa ulimwengu huu walifanyiza Ushirika wa Mataifa katika jitihada ya kutatua tatizo la ulimwengu la usalama, lakini huu ulishindwa. Kwa hiyo aina nyingine za utawala wa kujaribia zilionjwa, kama vile Ufashisti na Unazi. Ukomunisti uliendelea kupanuka. Badala ya fungu la aina ya binadamu kuwa bora, hao watawala walio kama jua katika mifumo hiyo wakaanza ‘kuunguza aina ya binadamu kwa joto kubwa.’ Vita vya wenyewe kwa wenyewe katika Hispania, Ethiopia, na Manchuria viliongoza kwenye vita ya ulimwengu ya pili. Historia ya ki-siku-hizi hurekodi kwamba Mussolini, Hitla, na Stalini wakiwa madikteta wakawa na daraka la moja kwa moja na lisilo la moja kwa moja la vifo vya makumi ya mamilioni, kutia ndani wengi wa wanataifa wao wenyewe. Hivi majuzi zaidi, mipambano ya kimataifa au ya wenyewe kwa wenyewe ‘imeunguza’ watu wa nchi kama vile Vietnamu, Kampuchea, Irani, Lebanoni, na Ailandi, pamoja na mabara mengine katika Amerika ya Kilatini na Afrika. Ongezea hayo ule mng’ang’ano wenye kuendelea kati ya mataifa yenye nguvu zaidi, ambayo silaha zayo za nyukilia zenye kutia hofu sana zinaweza kuteketeza aina ya binadamu yote. Katika hizi siku za mwisho, hakika binadamu wamewekwa katika hatari ya kuunguzwa na “jua,” watawala wao wasio waadilifu. Kumiminwa kwa bakuli la nne la kasirani ya Mungu kumelenga barabara mambo haya ya hakika ya historia, na watu wa Mungu wameyapigia mbiu kotekote duniani.

14. Mashahidi wa Yehova wamefundisha nini bila ugeugeu kuwa ndio ufumbuzi pekee wa matatizo ya aina ya binadamu, na kwa itikio gani kwa aina ya binadamu kwa ujumla?

¹⁴ Mashahidi wa Yehova wamefundisha bila ugeugeu kwamba ufumbuzi pekee wa matatizo magumu ya aina ya binadamu ni Ufalme wa Mungu, ambao kupitia huo Yehova anakusudia kutakasa jina lake. (Zaburi 83:4, 17, 18; Mathayo 6:9, 10) Hata hivyo, aina ya binadamu kwa ujumla imeziba sikio kwa ufumbuzi huu. Wengi ambao wanakataa Ufalme huo, wanakufuru jina la Mungu pia, hata kama vile Farao alivyofanya wakati alipokataa kukiri enzi kuu ya Yehova. (Kutoka 1:8-10; 5:2) Wakiwa hawapendezwi na Ufalme wa Kimesiya, wapinzani hawa wanachagua kutaabika chini ya “jua” kali lao wenyewe la utawala wa kibinadamu wenye uonevu.

Kiti cha Ufalme cha Hayawani-Mwitu

15. (a) Bakuli la tano lamiminwa juu ya nini? (b) Ni nini kilicho “kiti cha ufalme cha hayawani-mwitu,” na ni nini kinachohusika katika kumiminwa kwa bakuli juu yacho?

¹⁵ Malaika anayefuata anamimina bakuli lake juu ya nini? “Na wa tano akamimina bakuli lake juu ya kiti cha ufalme cha hayawani-mwitu.” (Ufunuo 16:10a, NW) “Hayawani-mwitu” ni mfumo wa kiserikali wa Shetani. Hauna kiti cha ufalme halisi, kama vile hayawani-mwitu asivyo halisi. Hata hivyo, mtajo wa kiti cha ufalme, huonyesha kwamba huyo hayawani-mwitu ametumia mamlaka ya kifalme juu ya aina ya binadamu; hii inapatana na uhakika wa kwamba kila moja ya pembe za hayawani-mwitu ina taji la kifalme. Kwa kweli, hicho “kiti cha ufalme cha hayawani-mwitu” ndicho msingi, au chimbuko, la mamlaka hiyo.b Biblia hufunua hali ya kweli ya mamlaka ya kifalme ya huyo hayawani-mwitu wakati inaposema kwamba “drakoni akampa hayawani nguvu zake na kiti cha ufalme chake na mamlaka kubwa.” (Ufunuo 13:1, 2; 1 Yohana 5:19, NW) Hivyo, kumiminwa kwa bakuli juu ya kiti cha ufalme cha hayawani-mwitu kunahusu mbiu yenye kufunua daraka la kweli ambalo Shetani amekuwa nalo na ambalo angali nalo katika kuunga mkono na kuendeleza huyo hayawani-mwitu.

16. (a) Mataifa yanatumikia nani, yawe yanajua hivyo au hayajui? Fafanua. (b) Ulimwengu huonyeshaje utu wa Shetani? (c) Kiti cha ufalme cha hayawani-mwitu kitapinduliwa lini?

¹⁶ Uhusiano huu kati ya Shetani na mataifa unadumishwaje? Shetani alipomshawishi Yesu, yeye alimwonyesha falme zote za ulimwengu katika njozi na akamtolea “mamlaka yote hii na utukufu wazo.” Lakini lilikuwako sharti moja—kwanza Yesu alipaswa afanye tendo la ibada mbele ya Shetani. (Luka 4:5-7, NW) Je! sisi tunaweza kudhani kwamba serikali za ulimwengu zinapokea mamlaka yazo kwa bei ndogo zaidi ya hiyo? Hasha. Kulingana na Biblia, Shetani ndiye kamungu ka huu mfumo wa mambo, hivi kwamba, yawe mataifa yanajua au hayajui, yanatumikia yeye. (2 Wakorintho 4:3, 4, NW)c Hali hii inafunuliwa na muundo wa mfumo wa ulimwengu uliopo, ambao umejengwa juu ya utukuzaji taifa wa kijinga, chuki, na kujipendeza kibinafsi. Umeundwa kitengenezo namna Shetani anavyotaka—kufuliza kutunza aina ya binadamu chini ya udhibiti wake. Ufisadi katika serikali, pupa ya kutaka mamlaka, ubalozi wa uwongo-uwongo, shindano la kuunda silaha—hayo huonyesha utu wa Shetani uliotwezwa. Ulimwengu unachangia viwango vya Shetani vyenye utovu wa uadilifu, hivyo kumfanya yeye kuwa kamungu kao. Kiti cha ufalme cha hayawani-mwitu kitapinduliwa wakati huyo hayawani apatwapo na mzimiko na mwishowe Mbegu ya mwanamke wa Mungu imtiapo Shetani mwenyewe ndani ya abiso.—Mwanzo 3:15; Ufunuo 19:20, 21; 20:1-3, NW.

Giza na Umivu Lenye Kugugunya

17. (a) Kumiminwa kwa bakuli la tano huhusianaje na giza la kiroho ambalo sikuzote limefunika ufalme wa hayawani-mwitu? (b) Watu wanatendaje kwa kuitikia kumiminwa kwa bakuli la tano la kasirani ya Mungu?

¹⁷ Ufalme wa hayawani-mwitu huyu umekuwa katika giza la kiroho tangu ulipoanza. (Linga Mathayo 8:12; Waefeso 6:11, 12.) Bakuli la tano linaleta tangazo la peupe lenye mkazo mkubwa juu ya giza hili. Hata linalifanyia drama, kwa kuwa bakuli hili la kasirani ya Mungu humiminwa juu ya kiti cha ufalme chenyewe cha hayawani-mwitu wa ufananisho. “Na ufalme wake ukatiwa giza, na wao wakaanza kugugunya ndimi zao kwa ajili ya maumivu yao, lakini wao wakamkufuru Mungu wa mbingu kwa ajili ya maumivu yao na kwa ajili ya vidonda vyao, na wao hawakutubu kazi zao.”—Ufunuo 16:10b, 11, NW.

18. Kuna ulingano gani kati ya mpigo wa tano wa tarumbeta na bakuli la tano la kasirani ya Mungu?

¹⁸ Mpigo wa tano wa tarumbeta si sawa kabisa na bakuli la tano la kasirani ya Mungu, kwa kuwa mpigo wa tarumbeta ulitangaza tauni ya nzige. Lakini angalia kwamba wakati wa kuachiliwa tauni hiyo ya nzige, kulikuwako na kutiwa giza kwa jua na hewa. (Ufunuo 9:2-5) Na kwenye Kutoka 10:14, 15 (NW), tunasoma hivi kuhusu wale nzige ambao kwa hao Yehova alipiga Misri: “Walikuwa wenye kulemea sana. Kabla ya wao kulikuwa hakujatokea kamwe nzige kama wao, na hakutatokea kamwe wengine katika njia hii baada yao. Na wao wakaenda wakifunika uso wote wenye kuonekana wa bara zima, na bara likapata kuwa giza ti.” Ndiyo, giza ti! Leo, giza la kiroho la ulimwengu limekuwa wazi sana likiwa tokeo la kuvumishwa kwa tarumbeta ya tano na kumiminwa kwa bakuli la tano la kasirani ya Mungu. Ujumbe wenye kuchoma kwa uchungu ambao umepigiwa mbiu na bumba la nzige wa ki-siku-hizi huleta mateso na maumivu kwa wale waovu ambao “wamependa giza badala ya nuru.”—Yohana 3:19, NW.

19. Kupatana na Ufunuo 16:10, 11, kufichuliwa peupe kwa Shetani kuwa mungu wa huu mfumo wa mambo kunasababisha nini?

¹⁹ Akiwa mtawala wa ulimwengu, Shetani amesababisha utofurahifu mwingi na mateso. Njaa kuu, vita, jeuri, uhalifu, matumizi mabaya ya dawa za kulevya, utovu wa adili, magonjwa yenye kupitishwa kingono, utovu wa haki, unafiki wa kidini—haya na zaidi ni alama za mfumo wa mambo wa Shetani. (Linga Wagalatia 5:19-21.) Hata hivyo, ufichulio wa peupe wa Shetani kuwa ndiye mungu wa huu mfumo wa mambo ulisababisha maumivu na tahayari kwa wale ambao huishi kwa viwango vyake. “Wao wakaanza kugugunya ndimi zao kwa ajili ya maumivu yao,” hasa katika Jumuiya ya Wakristo. Wengi huona uchungu moyoni kwa vile ukweli hufunua mtindo wao wa maisha. Baadhi yao huuona kuwa tisho, nao hunyanyasa wale wanaoutangaza. Wanakataa Ufalme wa Mungu na kutusi jina takatifu la Yehova. Hali yao ya kidini yenye ugonjwa na yenye madonda madonda inafunuliwa wazi, hivi kwamba wao wanakufuru Mungu wa mbingu. La, wao ‘hawatubu kazi zao.’ Kwa hiyo sisi hatuwezi kutazamia kuongolewa kwa tungamo la watu kabla ya mwisho wa huu mfumo wa mambo.—Isaya 32:6.

Mto Eufrati Wakaushwa

20. Mpigo wa sita wa tarumbeta na pia kumwagwa kwa bakuli la sita huhusishaje ndani mto Eufrati?

²⁰ Mpigo wa sita wa tarumbeta ulitoa habari ya kuachiliwa kwa “malaika wanne ambao wamefungwa kwenye mto mkubwa Eufrati.” (Ufunuo 9:14, NW) Kihistoria, Babuloni lilikuwa jiji kubwa ambalo lilikalia mto Eufrati. Na katika 1919 kuachiliwa kwa malaika wanne wa ufananisho kuliandamana na anguko la maana la Babuloni Mkubwa. (Ufunuo 14:8, NW) Basi, inastahili kuangaliwa kwamba, bakuli la sita la kasirani ya Mungu huhusisha ndani pia mto Eufrati: “Na wa sita akamimina bakuli lake juu ya mto mkubwa Eufrati, na maji yao yakakauka kabisa, ili njia iweze kutayarishwa kwa ajili ya wafalme kutoka zukio la jua.” (Ufunuo 16:12, NW) Hii vilevile ni habari mbaya kwa Babuloni Mkubwa!

21, 22. (a) Maji yenye kinga ya mto Eufrati yalikaukiaje Babuloni katika 539 K.W.K.? (b) Maji ambayo Babuloni Mkubwa anaketia ni nini, na hata sasa maji haya ya ufananisho yanakaukaje?

²¹ Katika wakati wa upeo wa Babuloni la kale, maji mengi ya Eufrati yalikuwa sehemu kubwa ya mfumo wa kinga yalo. Katika 539 K.W.K. maji hayo yalikaushwa wakati yalipogeuzwa kando kutoka njia yayo na Sairasi kiongozi Mwajemi. Hivyo, njia ikafunguliwa kwa Sairaisi Mwajemi na Dario Mmedi, wafalme kutoka “zukio la jua” (yaani, mashariki), waingie Babuloni na kulishinda. Katika ile saa ya hatari, mto Eufrati ulishindwa kuwa kinga ya hilo jiji kubwa. (Isaya 44:27–45:7; Yeremia 51:36, NW) Jambo fulani kama hilo linakaribia kutukia kwa Babuloni wa ki-siku-hizi, mfumo wa ulimwenguni pote wa dini bandia.

²² Babuloni Mkubwa “huketi juu ya maji mengi.” Kulingana na Ufunuo 17:1, 15, (NW), hayo hufananisha “vikundi vya watu na umati wa watu na mataifa na ndimi”—magenge ya wafuasi ambao yeye huwaona kuwa himaya. Lakini “maji” yanakauka! Katika Ulaya Magharibi, ambako hapo kwanza alikuwa na uvutano mwingi, mamia ya maelfu wamepuuza dini waziwazi. Katika mabara fulani, kwa miaka mingi kulikuwa na sera iliyojulishwa wazi kujaribu kuharibu uvutano wa dini. Matungamo katika mabara hayo hayakuinuka kumsaidia. Hali kadhalika, ujapo wakati wa Babuloni Mkubwa kuharibiwa, hesabu yenye kupungua ya wafuasi wake haitathibitika kuwa himaya kwa vyovyote. (Ufunuo 17:16) Ingawa yeye hudai kuwa na washiriki mamia ya mamilioni, Babuloni Mkubwa atajikuta akiwa bila kinga dhidi ya “wafalme kutoka zukio la jua.”

23. (a) Ni nani waliokuwa wafalme kutoka “zukio la jua” katika 539 K.W.K.? (b) Ni nani walio “wafalme kutoka zukio la jua” wakati wa siku ya Bwana, nao wataharibuje Babuloni Mkubwa?

²³ Hawa wafalme ni nani? Katika 539 K.W.K. wao walikuwa Dario Mmedi na Sairasi Mwajemi, ambao walitumiwa na Yehova kushinda jiji la kale la Babuloni. Katika hii siku ya Bwana, dini bandia ya Babuloni Mkubwa itaharibiwa pia na watawala wa kibinadamu. Lakini kwa mara nyingine tena, hii itakuwa hukumu ya kimungu. Yehova Mungu na Yesu Kristo, “wafalme kutoka zukio la jua,” watakuwa wametia katika mioyo ya watawala wa kibinadamu “fikira” wamgeukie Babuloni Mkubwa na kumharibu kabisa. (Ufunuo 17:16, 17, NW) Kumwagwa kwa bakuli la sita hupiga mbiu peupe kwamba hukumu hii inakaribia kutekelezwa!

24. (a) Yaliyomo ndani ya mabakuli ya kwanza sita ya kasirani ya Mungu yametangazwaje wazi, na kukiwa na tokeo gani? (b) Kabla ya kutuambia juu ya bakuli libakilo la kasirani ya Mungu Ufunuo unafunua nini?

²⁴ Haya mabakuli ya kwanza sita ya kasirani ya Yehova yana ujumbe mzito. Watumishi wa Mungu wa kidunia, wakiungwa mkono na malaika, wamekuwa na shughuli wakitangaza peupe yaliyomo kwa kadiri ya ulimwenguni pote. Kwa njia hiyo, sehemu zote za mfumo wa ulimwengu wa Shetani zimepewa onyo zinalostahili, na Yehova ameandalia watu mmoja mmoja fursa ya kutafuta uadilifu wafulize kuishi. (Ezekieli 33:14-16, NW) Bado, labaki bakuli moja zaidi la kasirani ya Mungu. Lakini kabla ya kutuambia juu yalo, Ufunuo unafunua jinsi Shetani na mawakili wake wa kidunia wanavyojaribu kukanusha kutangazwa peupe kwa hukumu za Yehova.

Mkusanyo Kuelekea Har–Magedoni

25. (a) Yohana anatuambia nini juu ya semi chafu zilizovuviwa, zilizo kama vyura? (b) Kumekuwaje na msiba wenye kunyarafisha kama wa vyura wa ‘semi chafu zilizovuviwa’ katika siku ya Bwana, na tokeo likiwa nini?

²⁵ Yohana anatuambia: “Na mimi nikaona semi chafu tatu zilizovuviwa ambazo zilionekana kama vyura zinatoka katika kinywa cha drakoni na katika kinywa cha hayawani-mwitu na katika kinywa cha nabii bandia. Kwa hakika, hizo ni semi zilizovuviwa na roho waovu na hufanya ishara, nazo hutoka kwenda kwa wafalme wa dunia nzima yote inayokaliwa, kukusanya wao pamoja kwenye vita ya ile siku kubwa ya Mungu Mweza Yote.” (Ufunuo 16:13, 14, NW) Katika siku ya Musa Yehova alileta tauni makuruhu ya vyura juu ya Misri ya Farao, hivi kwamba “bara likaanza kuvunda.” (Kutoka 8:5-15, NW) Wakati wa siku ya Bwana, kumekuwako pia msiba wenye kunyarafisha kama wa vyura, ingawa ni kutoka chimbuko tofauti. Ndani ya huo mna ‘semi chafu zilizovuviwa’ za Shetani, kwa wazi zikifananisha propaganda zinazokusudiwa kuongoza kwa werevu watawala wote wa kibinadamu, “wafalme,” katika kumpinga Yehova Mungu. Hivyo Shetani anahakikisha kwamba wao hawaathiriwi na kule kumiminwa kwa mabakuli ya kasirani ya Mungu bali kwa imara wao wako upande wa Shetani wakati “vita ya ile siku kubwa ya Mungu Mweza Yote” inapoanza.

26. (a) Propaganda ya kishetani hutoka kwenye machimbuko gani matatu? (b) “Nabii bandia” ni nini, nasi tunajuaje?

²⁶ Hiyo propaganda huja kutoka kwa “drakoni” (Shetani) na “hayawani-mwitu” (mpango wa Shetani wa kisiasa wa kidunia), viumbe ambavyo tumekwisha kupata habari zavyo katika Ufunuo. Ingawa hivyo, huyu “nabii bandia” ni nini? Huyu ni mja-leo kwa jina tu. Wakati uliopita, sisi tulionyeshwa hayawani-mwitu wa pembe mbili mithili ya mwana-kondoo ambaye alifanya ishara mbele ya hayawani-mwitu mwenye vichwa saba. Kiumbe huyu mwenye kudanganya alitenda kama nabii kwa ajili ya huyo hayawani-mwitu. Aliendeleza ibada ya hayawani-mwitu, hata akasababisha mfano wake ujengwe. (Ufunuo 13:11-14, NW) Huyu hayawani-mwitu mwenye pembe mbili mithili ya mwana-kondoo lazima awe ndiye yule yule “nabii bandia,” anayetajwa hapa. Kuthibitisha hili, sisi tunasoma baadaye kwamba “nabii bandia” kama hayawani-mwitu wa ufananisho mwenye pembe mbili, “alifanya mbele [ya hayawani-mwitu mwenye vichwa saba] ishara ambazo kwa hizo yeye aliongoza vibaya wale ambao walipokea alama ya hayawani-mwitu na wale ambao hutoa ibada kwa mfano wake.”—Ufunuo 19:20, NW.

27. (a) Ni onyo gani la wakati unaofaa ambalo Yesu Kristo mwenyewe hutoa? (b) Ni onyo gani ambalo Yesu Kristo alitoa alipokuwa duniani? (c) Mtume Paulo alirudishaje mwangwi wa onyo la Yesu?

²⁷ Kukiwako na propaganda nyingi sana za kishetani, maneno ambayo Yohana anafuata kurekodi ni ya wakati unaofaa kweli kweli: “Tazama! Mimi ninakuja kama mwivi. Mwenye furaha ni mmoja ambaye hukaa ameamka na kutunza mavazi yake ya nje, ili asipate kutembea uchi na watu watazame aibu yake.” (Ufunuo 16:15, NW) Ni nani anayekuja “kama mwivi”? Yesu mwenyewe, akija kwa wakati usiotangazwa akiwa Mfishaji wa Yehova. (Ufunuo 3:3; 2 Petro 3:10) Alipokuwa angali duniani, Yesu pia alifananisha kuja kwake na kule kwa mwivi, akisema: “Fulizeni kutazama, basi, kwa sababu nyinyi hamjui ni siku gani Bwana yenu anakuja. Kwa sababu hiyo, nyinyi vilevile jithibitisheni wenyewe kuwa tayari, kwa sababu kwenye saa ambayo nyinyi hamfikiri kuwa ndiyo, Mwana wa binadamu anakuja.” (Mathayo 24:42, 44; Luka 12:37, 40, NW) Akirudisha mwangwi wa onyo hilo, mtume Paulo alisema: “Siku ya Yehova inakuja sawasawa kama mwivi katika usiku. Wakati wowote wanaposema: ‘Amani na usalama!’ ndipo uharibifu wa ghafula utakuwa juu ya wao papo hapo.” Shetani ndiye anayechochea mbiu zozote bandia za “amani na usalama!”—1 Wathesalonike 5:2, 3, NW.

28. Yesu alitoa onyo gani juu ya kukinza mibano ya ulimwengu, na “siku hiyo” ni ipi ambayo Wakristo hawataki iwe juu yao “kama tanzi”?

²⁸ Yesu alionya pia juu ya aina ya mibano ambayo ulimwengu huu, wenye kulowa propaganda, ungetia juu ya Wakristo. Alisema: “Toeni uangalifu kwa nyinyi wenyewe kwamba mioyo yenu isipate kulemewa kamwe na kula kupita kiasi na kunywa sana na wasiwasi wa maisha, na ghafula siku hiyo iwe juu ya nyinyi papo hapo kama tanzi. . . . Fulizeni kuamka, basi, wakati wote mkifanya dua kwamba nyinyi mpate kufaulu katika kuponyoka vitu hivi vyote ambavyo vimekusudiwa kutukia, na katika kusimama mbele ya Mwana wa binadamu.” (Luka 21:34-36, NW) “Siku hiyo” ni “ile siku kubwa ya Mungu Mweza Yote.” (Ufunuo 16:14, NW) Kadiri “siku hiyo” ya kutetewa kwa enzi kuu ya Yehova ikaribiavyo, inazidi kuwa vigumu zaidi kupambana kwa kufaulu na “wasiwasi wa maisha.” Wakristo wanahitaji kuwa chonjo na wenye kutazama, wakikaa hali wameamka mpaka siku hiyo iwasilipo.

29, 30. (a) Ni nini kinachodokezwa na onyo la Yesu kwamba wale wanaopatikana wakilala wangeona aibu kwa kupoteza “mavazi ya nje” yao? (b) “Mavazi ya nje” yanamtambulisha mvaaji kuwa nini? (c) Mtu anaweza kupotezaje mavazi yake ya nje ya ufananisho, na tokeo likiwa nini?

²⁹ Ingawa hivyo, ni nini kinachodokezwa na onyo la kwamba wale wanaopatikana wakilala wangeona aibu kwa kupoteza “mavazi ya nje” yao? Katika Israeli wa kale, kuhani au Mlawi yeyote aliyekuwa katika kazi ya lindo kwenye hekalu alikuwa na daraka zito. Waelezaji Wayahudi hutuambia kwamba ikiwa yeyote alikutwa akilala akiwa katika kazi kama hiyo, mavazi yake yangeweza kuvuliwa kutoka kwake na kuchomwa, hivi kwamba aliaibishwa hadharani.

³⁰ Yesu anaonya hapa kwamba jambo kama hilo laweza kutukia leo. Makuhani na Walawi walikuwa kivuli cha ndugu wapakwa-mafuta wa Yesu. (1 Petro 2:9) Lakini kwa upanuzi onyo la Yesu linatumika vilevile kuhusu umati mkubwa. Hapa mavazi ya nje yanayorejezewa hutambulisha mvaaji kuwa Shahidi Mkristo wa Yehova. (Linga Ufunuo 3:18; 7:14.) Ikiwa wowote wanaruhusu mibano ya ulimwengu wa Shetani iwabembeleze walale usingizi au waingie ndani ya kutotenda, wao wanaelekea kupoteza mavazi ya nje, kwa maneno mengine, wapoteze utambulisho wao safi wa kuwa Wakristo. Hali kama hiyo ingekuwa yenye aibu. Ingemweka mmoja katika hatari ya kupoteza kabisa kila kitu.

31. (a) Ufunuo 16:16 unakaziaje uhitaji kwa Wakristo kukaa wakiwa wameamka? (b) Baadhi ya viongozi wa kidini wamekisiakisia nini kwa habari ya Har–Magedoni?

³¹ Uhitaji kwa Wakristo kukaa wakiwa wameamka unakuwa wenye kusonga hata zaidi kadiri mstari unaofuata wa Ufunuo ukaribiapo utimizo: “Na hizo [semi zilizovuviwa na roho waovu] zikakusanya wao [wafalme wa kidunia, au watawala] pamoja kwenye mahali ambapo huitwa kwa Kiebrania Har–Magedoni.” (Ufunuo 16:16, NW) Jina hili, ambalo wengi zaidi hufasiri Armagedoni hutokea mara moja tu katika Biblia. Lakini limechochea wazo la aina ya binadamu. Viongozi wa ulimwengu wameonya juu ya uwezekano wa Armagedoni ya nyukilia. Armagedoni imefungamanishwa pia na jiji la kale la Megido, mahali pa vita vingi vya kukata maneno katika nyakati za Biblia, na kwa hiyo baadhi ya viongozi wa kidini wamekisiakisia kwamba ile vita ya mwisho duniani itapiganwa mahali hapo padogo. Katika hili, wako mbali sana na ukweli.

32, 33. (a) Badala ya kuwa mahali halisi, jina Har–Magedoni, au Armagedoni, huwakilisha nini? (b) Ni semi gani nyingine za Biblia zinazofanana na “Har–Magedoni” au zinazohusiana nayo? (c) Utakuwa wakati gani kwa malaika wa saba kumimina bakuli la mwisho kabisa la kasirani ya Mungu?

³² Neno hili Har–Magedoni lamaanisha “Mlima wa Megido.” Lakini badala ya kuwa mahali halisi, linawakilisha hali ya ulimwengu ambayo ndani yayo mataifa yote yanakusanywa katika upinzani na Yehova Mungu na ambapo mwishowe yeye atawaharibu. Hii ni ya kadiri ya kuenea tufe lote. (Yeremia 25:31-33; Danieli 2:44) Inafanana na “shinikizo kubwa la divai ya kasirani ya Mungu” na “uwanda-bonde wa uamuzi,” au “uwanda-bonde wa Yehoshafati,” ambamo mataifa yanakusanywa yakauawe na Yehova. (Ufunuo 14:19; Yoeli 3:12, 14, NW) Inahusiana pia na “udongo wa Israeli” ambako majeshi ya kishetani ya Gogu wa Magogu yanaharibiwa na kata iliyo “kati ya bahari tukufu na mlima mtakatifu wa Urembo” ambako mfalme wa kaskazini anakuja “njia yote mpaka mwisho wake” mikononi mwa Mikaeli mwana-mfalme mkuu.—Ezekieli 38:16-18, 22, 23; Danieli 11:45–12:1, NW.

³³ Wakati mataifa yamekwisha kuongozwa kwa werevu ndani ya hali hii kupitia propaganda yenye kukoroma inayotokana na Shetani na mawakili wake wa kidunia, utakuwa ndio wakati wa malaika wa saba kumimina bakuli la mwisho kabisa la kasirani ya Mungu.

“Imetukia!”

34. Malaika wa saba humimina bakuli lake juu ya nini, na ni mbiu gani ‘hutoka katika patakatifu na katika kiti cha ufalme’?

³⁴ “Na wa saba akamimina bakuli lake juu ya hewa. Ndipo sauti kubwa ikatoka katika patakatifu kutoka kiti cha ufalme, kusema: ‘Imetukia!’”—Ufunuo 16:17, NW.

35. (a) “Hewa” ya Ufunuo 16:17 ni nini? (b) Katika kumimina bakuli lake juu ya hewa malaika wa saba huonyesha nini?

³⁵ “Hewa” ndiyo njia ya mwisho kabisa ya kuendeleza uhai kupata tauni. Lakini hii si hewa halisi. Hakuna jambo lolote kuhusu hewa halisi linaloifanya istahili hukumu mbaya ya Yehova kama vile dunia, bahari, machimbuko ya maji matamu, au jua halisi visivyostahili kupatwa na hukumu mkononi mwa Yehova. Badala ya hivyo, hii ni ile “hewa” ambayo Paulo alikuwa akizungumzia wakati alipomwita Shetani “mtawala wa mamlaka ya hewa.” (Waefeso 2:2, NW) Ni “hewa” ya kishetani ambayo ulimwengu hupumua leo, ile roho, au mbetuko wa akili wa ujumla, inayoonyesha tabia ya mfumo mbovu wake wote wa mambo, kule kufikiri kwa kishetani kunakoenea katika kila upande wa maisha nje ya tengenezo la Yehova. Hivyo katika kumimina bakuli lake juu ya hewa, malaika wa saba anaonyesha kasirani ya Mungu dhidi ya Shetani, tengenezo lake, na kila kitu kinachosukuma aina ya binadamu iunge mkono Shetani katika kukaidi enzi kuu ya Yehova.

36. (a) Tauni saba huwa nini? (b) Ni nini linalodokezwa na mbiu ya Yehova: “Imetukia!”?

³⁶ Tauni hii na zile sita zilizotangulia hutoa jumla ya hukumu za Yehova dhidi ya Shetani na mfumo wake. Hizo ni ujulisho-wazi wa angamio la Shetani na mbegu yake. Wakati bakuli hili la mwisho kabisa linapomiminwa, Yehova mwenyewe hupiga mbiu hivi: “Imetukia!” Hakuna jambo zaidi la kusema. Wakati yaliyomo ndani ya mabakuli ya kasirani ya Mungu yamekwisha kutangazwa peupe kwa kutosheka kwa Yehova, hakutakuwa na ukawio katika kutekeleza kwake hukumu zinazopigiwa mbiu na jumbe hizi.

37. Yohana anaelezaje kinachotukia baada ya kumiminwa kwa bakuli la saba la kasirani ya Mungu?

³⁷ Yohana huendelea: “Na meme na sauti na ngurumo zikatukia, na tetemeko la dunia kubwa likatukia kama ambalo halikuwa limetukia tangu watu walipokuja kuwa juu ya dunia, tetemeko la dunia lenye kuenea mno, kubwa mno. Na jiji kubwa likatengana kuwa sehemu tatu, na majiji ya mataifa yakaanguka; na Babuloni Mkubwa akakumbukwa katika mwono wa Mungu, ili kumpa yeye kikombe cha divai ya kasirani ya hasira-kisasi yake. Pia, kila kisiwa kikakimbia, na milima haikupatikana. Na mvua-mawe kubwa yenye kila jiwe la uzani wapata talanta ikashuka kutoka katika mbingu juu ya watu, na wale watu wakakufuru Mungu kwa sababu ya tauni ya mvua-mawe, kwa sababu tauni yayo ilikuwa kubwa isivyo kawaida.”—Ufunuo 16:18-21, NW.

38. Ni nini kinachofananishwa na (a) “tetemeko la dunia kubwa”? (b) uhakika wa kwamba “jiji kubwa,” Babuloni Mkubwa, linatengana kuwa “sehemu tatu”? (c) uhakika wa kwamba “kila kisiwa kilikimbia, na milima haikupatikana”? (d) “tauni ya mvua-mawe”?

³⁸ Kwa mara nyingine tena, bila kukosea Yehova anatenda kuelekea aina ya binadamu, hii ikiwa inaashiriwa na “meme na sauti na ngurumo.” (Linga Ufunuo 4:5; 8:5, NW.) Aina ya binadamu itatikiswa kwa njia ambayo haijatukia kamwe kabla ya hapo, kana kwamba kwa tetemeko la dunia lenye kukumba. (Linga Isaya 13:13; Yoeli 3:16.) Mtikiso huu wenye kulipua kama bomu utabomoa “jiji kubwa,” Babuloni Mkubwa, hivi kwamba hutengana kuwa “sehemu tatu”—ufananisho wa kuanguka kwalo ndani ya uangamivu usiokomboleka. Pia, “majiji ya mataifa” yataanguka. “Kila kisiwa” na “milima”—mashirika na matengenezo yanayoonekana ni ya kudumu sana katika huu mfumo—yataenda. “Mvua-mawe kubwa,” kubwa zaidi ya ile iliyopiga Misri wakati wa tauni ya saba, kila jiwe-mvua likiwa na uzani upatao talanta, litapigapiga aina ya binadamu kwa maumivu mengi.d (Kutoka 9:22-26) Huu mmimino-chini wenye kuadhibu, wa maji yaliyogandamana yaelekea unatoa picha ya semi za maneno zilizo nzito isivyo kawaida za hukumu za Yehova zikiashiria kwamba mwisho wa huu mfumo wa mambo umewasili hatimaye! Vilevile, Yehova angeweza kutumia mvua-mawe halisi katika kazi yake yenye uharibifu.—Ayubu 38:22, 23.

39. Ijapokuwa kumiminwa kwa tauni saba, walio wengi wa aina ya binadamu watachukua mwendo gani wa tendo?

³⁹ Hivyo, ulimwengu wa Shetani utakutana na hukumu za Yehova zenye uadilifu. Hadi mwisho, walio wengi wa aina ya binadamu wataendelea kukaidi na kukufuru Mungu. Kama vile Farao wa kale, mioyo yao haitalainishwa na tauni zenye kurudiwarudiwa wala na upeo wa kumalizia wenye kuleta kifo wa tauni hizo. (Kutoka 11:9, 10) Hakutakuwa na mabadiliko makubwa ya moyo katika dakika ya mwisho. Kwa pumzi yao ya wakati wa kufa, wao watalaumu vikali Mungu anayejulisha wazi: “Wao watalazimika kujua kwamba mimi ni Yehova.” (Ezekieli 38:23, NW) Hata hivyo enzi kuu ya Yehova Mungu itakuwa imekwisha tetewa.

[Maelezo ya Chini]

[Picha katika ukurasa wa 221]

“Ndani ya Dunia”

Jamii ya Yohana imetangaza wazi hasira-kisasi ya Yehova dhidi ya “dunia” kwa taarifa kama zifuatazo:

“Baada ya karne nyingi za jitihada, vyama vya kisiasa vimejithibitisha kutoweza kwavyo kukabiliana na hali za wakati uliopo na kutatua matatizo yenye kutaabisha. Watalaamu wa uchumi na wakuu wa serikali, wakichunguza swali hilo kwa bidii-endelevu, wanapata kwamba hawawezi kufanya kitu.”—Millions Now Living Will Never Die, 1920, ukurasa 61.

“Hakuna serikali hata moja duniani leo inayotosheleza kisehemu cha ulimwengu kwa kadiri yoyote yenye kuridhisha. Mengi ya mataifa yanatawalwa na madikteta. Ulimwengu kwa ujumla karibu umefilisika.”—A Desirable Government, 1924, ukurasa 5.

“Kukomesha taratibu ya mambo haya . . . ndiyo njia peke yake ya kuondoa uovu katika dunia na kuipa nafasi amani na haki kusitawi.”—“Habari Njema Hizi za Ufalme,” ukurasa 25.

“Mpango uliopo sasa wa ulimwengu umejionyesha wazi namna ulivyo kwa kuzidi kutenda dhambi nyingi, mabaya na uasi juu ya Mungu na mapenzi yake. . . . Hauwezi kubadilishwa uwe mzuri. Kwa hiyo, lazima upotelee mbali!”—Mnara wa Mlinzi, Juni 15, 1982, ukurasa 6.

[Picha katika ukurasa wa 223]

“Ndani ya Bahari”

Zifuatazo ni chache tu za taarifa zilizochapishwa kwa muda wa miaka iliyopita na jamii ya Yohana zikipiga mbiu ya hasira-kisasi ya Mungu dhidi ya “bahari” isiyotulia, yenye uasi ya aina ya binadamu isiyohofu Mungu iliyotenganishwa na Yehova:

“Historia ya kila taifa huonyesha kwamba imekuwa ni mng’ang’ano kati ya matabaka. Imekuwa ni wachache dhidi ya wengi. . . . Ming’ang’ano hii imetokeza mapinduzi makubwa mengi, kuteseka kwingi na umwagaji-damu mwingi.”—Government, 1928, ukurasa 244.

Katika ulimwengu mpya, “‘bahari’ ya mfano ya watu wasiotulia, wenye kuasi, wasiohofu Mungu ambao kutoka kwao hayawani-mwitu alipanda muda mrefu uliopita atumiwe na Ibilisi itakuwa imeenda.”—The Watchtower, Septemba 15, 1967, ukurasa 567.

“Jamii ya sasa ya kibinadamu ni yenye ugonjwa kiroho. Hakuna mmoja wa sisi awezaye kuiokoa, kwa maana Neno la Mungu laonyesha kwamba ugonjwa wayo unaongoza kwenye mauti yake.”—Amani ya Kweli na Usalama wa Kweli—Kutoka Chanzo Gani?, 1974, ukurasa 131.

[Picha katika ukurasa wa 224]

“Ndani ya Mito na Vibubujiko”

Tauni ya tatu imefunua “mito na vibubujiko vya maji” kwa taarifa kama zifuatazo:

“Viongozi wa kidini, wanaodai kuwa walimu wa mafundisho [ya Kristo], wametakasa vita na kuifanya kuwa kitu kitakatifu. Wao wamependezwa kuwa na taswira zao na sanamu-umbo zionyeshwe kando kwa kando na zile za mashujaa wenye kumwaga damu.”—The Watch Tower, Septemba 15, 1924, ukurasa 275.

“Uwasiliano na roho msingi wao ni utokweli mkubwa, uwongo wa kuendelea kuishi baada ya kifo na kutokufa kwa nafsi ya kibinadamu.”—What Do the Scriptures Say About “Survival After Death?,” 1955, ukurasa 51.

“Falsafa za kibinadamu, wananadharia wa kisiasa, watengenezaji jamii, washauri wa kiuchumi na wateteaji wa mapokeo ya kidini hawakutokeza burudiko lolote halisi lenye kutoa uhai. Maji kama hayo hata yameongoza wanywaji kuhalifu sheria ya Muumba kuhusu utakatifu wa damu na kujitia katika minyanyaso ya kidini.”—Azimio lililokubaliwa kwenye “Habari Njema za Milele” Mkusanyiko wa Kimataifa, 1963.

“Si wokovu wa kisayansi, bali uangamivu wa jamii ya kibinadamu ndilo jambo la kutarajiwa kutoka kwa mwanadamu mwenyewe. . . . Sisi hatuwezi kutegemea wasaikolojia na wasaikayatristi wote wa ulimwengu wabadili njia ya kufikiri ya aina ya binadamu . . . Sisi hatuwezi kutegemea kani ya polisi yoyote ya kimataifa ifanyizwe . . . kufanya dunia hii kuwa mahali salama pa kuishi.”—Saving the Human Race—In the Kingdom Way, 1970, ukurasa 5.

[Picha katika ukurasa wa 225]

“Juu ya Jua”

Huku “jua” la utawala wa kibinadamu likiwa ‘limeunguza’ aina ya binadamu wakati wa siku ya Bwana, jamii ya Yohana, imekuwa ikivuta uangalifu kwenye yanayotukia, kwa taarifa kama zifuatazo:

“Leo Hitla na Mussolini, madikteta wenye amri peke yao, wanatisha amani ya ulimwengu kwa ujumla, na wanaungwa mkono kikamili na jamii ya mapadri wa Katoliki ya Roma katika uharibifu wao wa uhuru.”—Fascism or Freedom, 1939, ukurasa 12.

“Muda wote wa historia sera iliyofuatwa na madikteta wa kibinadamu imekuwa, Tawala au angamiza! Lakini kirekebi cha kutumiwa sasa na Mfalme aliyewekwa na Mungu, Yesu Kristo, kwenye dunia yote, ni, Tawalwa au uangamizwe.”—When All Nations Unite Under God’s Kingdom, 1961, ukurasa 23.

“Tangu 1945 zaidi ya watu milioni 25 wameuawa katika vita 150 vilivyopiganwa kuzunguka dunia.”—Mnara wa Mlinzi, Julai 1, 1980, ukurasa 6.

“Mataifa kuuzunguka ulimwengu . . . hayajali sana daraka la kimataifa au amri za mwenendo. Ili kutimiza miradi yao, mataifa mengine yana maoni ya kwamba yana haki kabisa kutumia njia zo zote yanazoziona kuwa lazima—kuchinja watu kwa wingi, kuua, kuteka nyara, kulipua makombora, na kadhalika . . . Ni kwa muda gani mataifa yataendelea kuvumiliana katika mwendo huo wa upumbavu na usiofaa?”—Mnara wa Mlinzi, Julai 15, 1985, ukurasa 4.

[Picha katika ukurasa wa 227]

“Juu ya Kiti cha Ufalme cha Hayawani-Mwitu”

Mashahidi wa Yehova wamefichua kiti cha ufalme cha hayawani-mwitu na wakatangaza wazi shutumu la Yehova juu yacho kwa taarifa kama hizi:

“Watawala na waongozi wa kisiasa wa mataifa wanavutwa na kani zisizo za kibinadamu, zenye makusudi mabaya, zinazowaendesha bila kupingwa katika mwendo wa ujiuaji kwenye mpambano wa kukata maneno wa Har–Magedoni.”—After Armageddon—God’s New World, 1953, ukurasa 8.

“‘Hayawani-Mwitu’ wa serikali za kibinadamu zisizo za kitheokrasi alipata uwezo, mamlaka na kiti cha ufalme chake kutoka kwa Drakoni. Kwa hiyo lazima atii amri ya chama, amri ya Drakoni.”—After Armageddon—God’s New World, 1953, ukurasa 15.

“Mataifa Yasiyo ya Kiyahudi yanaweza kujikuta yenyewe tu . . . upande wa Hasimu Mkuu wa Mungu, Shetani Ibilisi.”—Azimio lililokubaliwa kwenye “Ushindi wa Kimungu” Mkusanyiko wa Kimataifa, 1973.

[Picha katika ukurasa wa 229]

“Maji Yao Yakakauka Kabisa”

Hata sasa, uungaji-mkono wa dini ya Kibabuloni unakauka kabisa mahali pengi, kuonyesha jambo litakalotukia wakati “wafalme kutoka zukio la jua” watakapofanya shambulio lao.

“Uchunguzi wa maoni ya watu wa taifa zima ulipata kwamba asilimia 75 ya wale wanaoishi katika maeneo ya manispaa [ya Thailandi] hawaendi hata kidogo kwenye mahekalu ya Kibuddha kusikiliza mahubiri, hali hesabu ya wale wanaozuru mahekalu mashambani inazidi kupungua kufika yapata asilimia hamsini.”—Bangkok Post, Septemba 7, 1987, ukurasa 4.

“Mzungu umekwisha katika Utao katika bara [China] ambako ulianzia zapata mileani mbili zilizopita. . . . Wakiwa bila vidude vya kufanyia mizungu ambavyo kwavyo wao na watangulizi wao walizoea kupata ufuasi mwingi, washiriki wa ukuhani wanajikuta wakiwa bila waandamizi, karibu wakikabili mzimiko wa Utao ukiwa imani iliyopangwa kitengenezo katika bara kuu.”—The Atlanta Journal and Constitution, Septemba 12, 1982, ukurasa 36-A.

“Japani . . . ina mmojapo misongano mikubwa zaidi sana ya wamisionari wa kigeni ulimwenguni, karibu 5,200, hata hivyo . . . punde kuliko asilimia 1 ya idadi ya watu ni Wakristo. . . . Padri mmoja wa Kifransiska anayefanya kazi hapa tangu miaka ya 1950 . . . anaitikadi kwamba ‘siku ya wamisionari wa kigeni katika Japani imekwisha.’”—The Wall Street Journal, Julai 9, 1986, ukurasa 1.

Katika Uingereza wakati wa miongo mitatu iliyopita, “karibu makanisa ya Kianglikana 2,000 kati ya yale 16,000 yamefungwa kwa sababu ya kutotumiwa. Hadhirina imepungua kuwa miongoni mwa zile za chini zaidi sana za nchi zinazokiri kuwa za Kikristo. . . . ‘Sasa hali ni kwamba Uingereza si nchi ya Kikristo,’ akasema [Askofu wa Durham].”—The New York Times, Mei 11, 1987, ukurasa A4.

“Baada ya saa nyingi za majadiliano makali, Bunge [la Ugiriki] liliidhinisha leo sheria itungwe, ikiiwezesha Serikali ya Kisoshalisti itwae mali zenye mashamba makubwa mno zinazoshikiliwa na Kanisa Orthodoksi la Ugiriki . . . Zaidi ya hilo, sheria hiyo inawapa wasio viongozi wa kanisa udhibiti wa mabaraza ya kanisa na halmashauri zenye madaraka ya kusimamia vitega-uchumi vya kanisa vyenye thamani kubwa kutia ndani mahoteli, mashimo ya kuchimba marumaru na majengo ya maofisi.”—The New York Times, Aprili 4, 1987, ukurasa 3.

[Picha katika ukurasa wa 222]

Mabakuli manne ya kwanza ya kasirani ya Mungu huleta tauni kama zile zilizotokana na mipigo minne ya kwanza ya tarumbeta

[Picha katika ukurasa wa 226]

Bakuli la tano hufichua kiti cha hayawani-mwitu kuwa ndiyo mamlaka ambayo Shetani amempa hayawani-mwitu

[Picha katika ukurasa wa 231]

Propaganda ya roho waovu inakusanya watawala wa dunia kwenye hali ya pamoja, Har–Magedoni, ambapo hukumu za Yehova zitamiminwa juu yao

[Picha katika ukurasa wa 233]

Wale wanaosukumwa na “hewa” chafu ya Shetani lazima wapatwe na utekelezo wa hukumu za Yehova zenye uadilifu