Ujumbe Ambao Ni Lazima Tuutangaze

MUDA mrefu kabla ya Ukristo, Yehova alimtajia Abrahamu mwaminifu mpango ambao ‘mataifa yote ya dunia’ wangejibarikia. (Mwa. 22:18) Pia alimpulizia Solomoni aandike kuhusu daraka la msingi la kila mwanadamu: “Hofu Mungu wa kweli na uzishike amri zake. Kwa maana huo ndio wajibu wote wa binadamu.” (Mhu. 12:13, NW) Lakini watu wa mataifa wanawezaje kujua mambo hayo?

Ingawa nyakati zote kumekuwako watu wanaoamini neno la Mungu, Biblia inaonyesha kwamba kazi ya kuhubiri habari njema duniani kote kwa watu wa mataifa yote ingefanywa katika “siku ya Bwana.” Siku hiyo ilianza mwaka wa 1914. (Ufu. 1:10) Kuhusu wakati huo, Ufunuo 14:6, 7 lilitabiri kwamba malaika angeongoza kazi ya kutoa tangazo muhimu “kwa kila taifa na kabila na lugha na watu.” Watu wangehimizwa: “Hofuni Mungu na kumpa utukufu, kwa sababu saa ya hukumu yake imewasili, na kwa hiyo mwabuduni Yeye aliyezifanya mbingu na dunia na bahari na mabubujiko ya maji.” Mungu anataka ujumbe huu utangazwe. Tuna pendeleo la kushiriki kazi hiyo.

“Mungu wa Kweli.” Kulikuwa na ubishi juu ya Uungu Yehova alipotangaza, “Ninyi ni mashahidi wangu.” (Isa. 43:10) Ujumbe ambao ni lazima tuutangaze hausemi tu kwamba ni lazima kila mtu awe na dini au amwamini mungu fulani. Badala yake, watu wanahitaji kupewa nafasi ya kujifunza kwamba Muumba wa mbingu na dunia ndiye Mungu wa pekee wa kweli. (Isa. 45:5, 18, 21, 22; Yn. 17:3) Ni Mungu wa kweli pekee anayeweza kutabiri matukio ya wakati ujao. Tuna pendeleo la kutaja kwamba utimizo wa neno la Yehova katika nyakati zilizopita ni msingi mzuri wa kuwa na hakika kwamba ahadi zake zote kuhusu wakati ujao zitatimizwa.—Yos. 23:14; Isa. 55:10, 11.

Bila shaka wengi tunaowahubiria huabudu miungu mingine au wanadai kwamba hawamwabudu mungu yeyote. Lakini ili waweze kutusikiliza, ni lazima tuanze mazungumzo kwa jambo linalotupendeza sisi na wao. Mfano ulio katika Matendo 17:22-31 unaweza kutusaidia sana. Ona kwamba ingawa mtume Paulo alitumia busara, alionyesha wazi kwamba kila mtu anawajibika kwa Mungu aliye Muumba wa mbingu na dunia.

Kutangaza Jina la Mungu. Usikose kumtambulisha Mungu wa kweli kwa jina lake. Yehova anapenda jina lake. (Kut. 3:15; Isa. 42:8) Anataka watu walijue. Alifanya jina lake tukufu liandikwe katika Biblia zaidi ya mara 7,000. Basi ni daraka letu kuwajulisha watu jina hilo.—Kum. 4:35.

Wakati ujao wa wanadamu wote unategemea kumjua Yehova na kumwita kwa imani. (Yoe. 2:32; Mal. 3:16; 2 The. 1:8) Lakini watu wengi hawamjui Yehova, kutia ndani wengi wanaodai wanamwabudu Mungu wa Biblia. Hata kama wana Biblia na wanaisoma, labda bado hawajui jina la Mungu kwa sababu limeondolewa katika tafsiri nyingi za kisasa. Watu wengine hulisikia tu jina la Yehova wanapokatazwa na viongozi wao wa kidini wasilitumie.

Tunawezaje kuwajulisha watu jina la Mungu? Njia bora zaidi ni kuwaonyesha jina hilo katika Biblia yao ikiwezekana. Kuna tafsiri za Biblia ambamo jina hilo linapatikana kwa maelfu na maelfu. Na kuna tafsiri nyinginezo ambamo jina hilo linaweza kupatikana katika Zaburi 83:18 au Kutoka 6:3-6 pekee, au labda katika kielezi-chini cha Kutoka 3:14, 15 au 6:3. Katika tafsiri nyinginezo, maneno mengine kama “Bwana” na “Mungu,” yameandikwa kwa herufi tofauti yanapokuwa yametumiwa mahali ambapo jina la Mungu lilitumiwa katika maandishi ya lugha za awali. Ikiwa watafsiri wa kisasa wameliondoa jina la Mungu kabisa, unaweza kutumia tafsiri ya zamani ya Biblia ili kuwaonyesha watu jambo hilo Katika nchi nyingine unaweza kuwaonyesha watu jina la Mungu katika nyimbo za kidini au katika maandishi yaliyochongwa katika majengo fulani.

Unaweza kutumia vizuri Yeremia 10:10-13 katika New World Translation kuzungumza hata na wale ambao wanaabudu miungu mingine. Maandiko hayo yanataja jina la Mungu na kumfafanua.

Usifiche jina hili Yehova kwa kutumia mitajo kama “Mungu” na “Bwana” kama wanavyofanya Jumuiya ya Wakristo. Lakini hiyo haimaanishi kwamba sasa ni lazima tutumie jina Yehova kila wakati tunapoanza kusema jambo. Watu wengine wanaweza kukatisha mazungumzo kwa sababu hawalipendi jina hilo. Lakini baada ya kuweka msingi mzuri wa mazungumzo, usiogope kutumia jina la Mungu.

Ni jambo muhimu kwamba Biblia inatumia jina la Mungu zaidi ya maneno “Bwana” na “Mungu” kwa ujumla. Hata hivyo, waandishi wa Biblia hawakujaribu kutia jina la Mungu katika kila sentensi. Walifanya hivyo kwa njia ya kawaida tu, kwa uhuru, na kwa heshima. Huo ni mfano mzuri wa kuiga.

Utu wa Yehova. Ingawa jambo la kwamba Mungu ana jina lake ni kweli muhimu, huo ni mwanzo tu.

Ili watu waweze kumpenda Yehova na kumwita kwa imani, wanahitaji kujua utu wake. Yehova alipomjulisha Musa jina lake kwenye Mlima Sinai, hakurudia-rudia tu kutaja “Yehova.” Alikazia baadhi ya sifa Zake zenye kutokeza sana. (Kut. 34:6, 7) Tunaweza kumwiga.

Iwe unawahubiria watu wanaopendezwa au unahutubu kutanikoni, unapozungumzia baraka za Ufalme, taja sifa za Mungu tunazojifunza kupitia baraka hizo. Unapotaja amri zake, kazia hekima na upendo wa amri hizo. Waeleweshe kwamba matakwa ya Mungu si mzigo, bali yamekusudiwa yatufaidi. (Isa. 48:17, 18; Mika 6:8) Zungumzia jinsi kila wonyesho wa nguvu za Yehova unavyofunua jambo fulani kuhusu utu wake, kanuni zake, na kusudi lake. Taja jinsi Yehova anavyosawazisha sifa zake. Watu wakusikie ukieleza hisia zako kuhusu Yehova. Jinsi unavyompenda Yehova inaweza kusaidia kuchochea upendo wao pia.

Ujumbe muhimu leo unawahimiza watu wote wamhofu Mungu. Tunapaswa kujaribu kumhofu Mungu kwa maneno yetu. Hofu hiyo inafaa, na ni kumcha Yehova na kumheshimu sana. (Zab. 89:7) Hiyo inatia ndani kufahamu kwamba Yehova ni Hakimu mkuu na kwamba matazamio yetu ya wakati ujao hutegemea kibali chake. (Luka 12:5; Rom. 14:12) Basi hofu hiyo inaambatana na upendo mwingi kwake, na hivyo mtu anakuwa na hamu kubwa ya kutaka kumpendeza. (Kum. 10:12, 13) Hofu ya Mungu pia hutuchochea tuchukie mabaya, tutii amri zake, na kumwabudu kwa moyo wote. (Kum. 5:29; 1 Nya. 28:9; Mit. 8:13) Hofu hiyo inatuzuia tusijaribu kumtumikia Mungu huku tukipenda mambo ya ulimwengu.—1 Yoh. 2:15-17.

Jina la Mungu Ni “Ngome Imara.” Watu wanaopata kumjua Yehova vizuri hupata ulinzi mkubwa sana. Hawalindwi kwa sababu tu ya kujua jina lake au kwa sababu tu wanajua baadhi ya sifa zake. La, wanalindwa kwa sababu wanamtumaini Yehova mwenyewe. Mithali 18:10 inasema hivi kuwahusu: “Jina la BWANA ni ngome imara; mwenye haki huikimbilia, akawa salama.”

Tumia vizuri nafasi unazopata ili kuwahimiza wengine wamtumaini Yehova. (Zab. 37:3; Mit. 3:5, 6) Tumaini kama hilo linaonyesha kwamba tuna imani katika Yehova na ahadi zake. (Ebr. 11:6) Watu ‘wanapoitia jina la Yehova’ kwa sababu wanajua kwamba yeye ni Mwenye Enzi Kuu ya Ulimwengu Wote Mzima, na wanapenda njia zake, na wanaamini kabisa kwamba wokovu wa kweli unatokana na yeye, basi Neno la Mungu linatuhakikishia kwamba wataokolewa. (Rom. 10:13, 14) Unapowafundisha wengine, wasaidie kujenga imani ya aina hiyo katika maisha yao yote.

Watu wengi wamelemewa na matatizo, na labda hawaoni suluhisho la matatizo hayo. Wahimize wajifunze mapenzi ya Yehova, wamtumaini, na kutumia jambo wanalojifunza. (Zab. 25:5) Watie moyo wasali kwa bidii wakiomba msaada wa Mungu na kumshukuru kwa baraka zake. (Flp. 4:6, 7) Wanapomjua Yehova kwa kujionea utimizo wa baraka zake katika maisha yao, mbali na kusoma masimulizi fulani katika Biblia, wataanza kupata usalama unaotokana na kule kuthamini sana maana ya jina la Yehova.—Zab. 34:8; Yer. 17:7, 8. 

Tumia vizuri kila nafasi unayopata kuwasaidia watu wafahamu hekima ya kumhofu Mungu wa kweli, Yehova, na kushika amri zake.

BAADA ya Yesu Kristo kufufuliwa na kurudi mbinguni, aliwaagiza wanafunzi wake hivi: “Mtakuwa mashahidi wangu . . . hadi sehemu ya mbali zaidi sana ya dunia.” (Mdo. 1:8) Watumishi waaminifu wa Mungu katika wakati wetu wanatajwa kuwa wale “walio na kazi ya kutoa ushahidi kuhusu Yesu.” (Ufu. 12:17) Wewe unatoa ushahidi huo kwa bidii kadiri gani?

Watu wengi ambao wanasema kutoka moyoni kwamba wanamwamini Yesu hawajui lolote kuhusu maisha yake kabla hajaja duniani. Hawatambui kwamba kwa hakika Yesu alikuwa binadamu alipokuwa duniani. Hawafahamu kwa nini Yesu anaitwa Mwana wa Mungu. Hawajui daraka lake katika kutimizwa kwa kusudi la Mungu. Hawajui anafanya nini sasa, wala hawatambui jinsi matendo ya Yesu ya wakati ujao yatakavyohusu maisha yao. Hata wanaweza kufikiri kimakosa kwamba Mashahidi wa Yehova hawamwamini Yesu. Tuna pendeleo la kuwafundisha kweli kuhusu mambo hayo yote.

Na kuna watu ambao hawaamini kwamba Yesu anayetajwa katika Biblia ni mtu halisi aliyeishi. Wengine humwona Yesu kuwa tu mtu fulani mashuhuri. Wengi hubisha kwamba yeye si Mwana wa Mungu. ‘Kuwatolea watu hao ushahidi kuhusu Yesu’ kunahitaji jitihada sana, subira, na busara.

Hata wale unaozungumza nao wawe na maoni gani kuhusu Yesu Kristo, wanahitaji kumjua ikiwa wanataka kupata maandalizi ya Mungu ya kuishi milele. (Yn. 17:3) Mungu amesema dhahiri kwamba ni lazima watu wote wanaoishi ‘wakiri waziwazi kwamba Yesu Kristo ni Bwana’ na kunyenyekea mamlaka yake. (Flp. 2:9-11) Kwa hiyo, hatuwezi kuepuka suala hilo tunapozungumza na watu ambao wameshikilia sana maoni yasiyofaa au wenye chuki. Ingawa nyakati nyingine tunaweza kuzungumza kwa urahisi kuhusu Yesu Kristo, hata katika ziara za kwanza, nyakati nyingine tunahitaji kutumia busara ili maneno yetu yaweze kuwasaidia wasikilizaji waanze kuwa na maoni yanayofaa kumhusu. Pia katika ziara za baadaye tunaweza kufikiria njia za kuzungumzia mambo zaidi kumhusu Yesu. Lakini, labda haiwezekani kuzungumzia mambo yote kumhusu Yesu mpaka tuanze kuongoza funzo la Biblia la nyumbani na mtu huyo.—1 Tim. 2:3-7.

Daraka Muhimu la Yesu Katika Kusudi la Mungu. Tunahitaji kuwasaidia watu wafahamu kwamba kwa kuwa Yesu ndiye “njia” na ‘hakuna ajaye kwa Baba ila kupitia yeye,’ haiwezekani kuwa na uhusiano mzuri pamoja na Mungu bila kuwa na imani katika Yesu Kristo. (Yn. 14:6) Mtu asipotambua daraka muhimu ambalo Yehova amemkabidhi Mwanaye mzaliwa wa kwanza, hawezi kuelewa Biblia. Kwa nini? Kwa sababu Yehova amempa Mwanaye daraka muhimu katika kutimiza makusudi Yake yote. (Kol. 1:17-20) Unabii wa Biblia unahusu daraka hilo la Yesu katika utimizo wa makusudi ya Yehova. (Ufu. 19:10) Matatizo yote yaliyosababishwa na uasi wa Shetani na dhambi ya Adamu yatasuluhishwa kupitia Yesu Kristo.—Ebr. 2:5-9, 14, 15.

Ili mtu aelewe vizuri daraka la Kristo, ni lazima atambue kwamba wanadamu wako katika hali mbaya sana ambamo hawawezi kujitoa wenyewe. Sisi sote tumezaliwa katika dhambi. Na dhambi hiyo inaweza kutuathiri kwa njia mbalimbali maishani mwetu. Na baada ya muda fulani dhambi hiyo hutokeza kifo. (Rom. 3:23; 5:12) Zungumzia mambo kama hayo unapohubiri. Kisha taja kwamba kupitia dhabihu ya fidia ya Yesu Kristo, kwa upendo Yehova amefanya maandalizi ya kuwaokoa kutokana na dhambi na kifo wale wanaoweka imani katika fidia. (Mk. 10:45; Ebr. 2:9) Hiyo inawapa nafasi ya kuishi milele wakiwa wakamilifu. (Yn. 3:16, 36) Hiyo tu ndiyo njia, na hakuna nyingine. (Mdo. 4:12) Tunapomfundisha mtu au kutaniko, tusitaje tu mambo hayo ya hakika. Kwa fadhili na kwa subira, wachochee wasikilizaji wawe na shukrani kwa ajili ya daraka la Kristo akiwa Mkombozi wetu. Kuthamini maandalizi haya kunaweza kubadili sana mtazamo wa mtu, mwenendo wake, na miradi yake maishani.—2 Kor. 5:14, 15.

Bila shaka, Yesu alitoa dhabihu ya uhai wake mara moja tu. (Ebr. 9:28) Lakini, sasa anatumikia akiwa Kuhani wa Cheo cha Juu. Wasaidie wengine waelewe maana ya jambo hilo. Je, watu hao wana mikazo, wamevunjika moyo, wanateseka, au wana matatizo kwa sababu hawaonyeshwi fadhili? Yesu alipokuwa binadamu alipatwa na mambo hayo yote. Anajua jinsi tunavyohisi. Je, hali yetu ya kutokamilika inatufanya tuhisi kwamba tunahitaji rehema ya Mungu? Tukimwomba Mungu atusamehe kwa msingi wa dhabihu ya Yesu, Yesu anatenda kama “msaidiaji kwa Baba.” ‘Anatuombea’ kwa huruma. (1 Yoh. 2:1, 2; Rom. 8:34) Kwa msingi wa dhabihu ya Yesu na kupitia utumishi wake akiwa Kuhani wa Cheo cha Juu, tunaweza kufikia ‘kiti cha ufalme cha Yehova cha fadhili isiyostahiliwa’ ili kupokea msaada kwa wakati unaofaa. (Ebr. 4:15, 16) Ingawa sisi si wakamilifu, msaada wa Yesu akiwa Kuhani wa Cheo cha Juu unatusaidia kumtumikia Mungu kwa dhamiri safi.—Ebr. 9:13, 14.

Na zaidi, Yesu pia ana mamlaka kubwa kwa sababu ameteuliwa na Mungu kuwa Kichwa cha kutaniko la Kikristo. (Mt. 28:18; Efe. 1:22, 23) Akiwa na mamlaka hiyo, anaandaa mwongozo unaohitajiwa kulingana na mapenzi ya Mungu. Unapowafundisha wengine, wasaidie kufahamu kwamba Kichwa cha kutaniko ni Yesu Kristo wala si mwanadamu yeyote. (Mt. 23:10) Tangu mwanzoni unapokutana na watu wanaopendezwa, waalike kwenye mikutano ya kutaniko, ambako tunajifunza Biblia tukitumia habari inayoandaliwa kupitia “mtumwa mwaminifu na mwenye busara.” Waeleze “mtumwa” huyo ni nani na pia Bwana-Mkubwa ni nani ili waelewe kwamba Yesu ndiye kichwa. (Mt. 24:45-47) Wajulishe kwa wazee, na uwaeleze sifa za Maandiko ambazo ni lazima wazee watimize. (1 Tim. 3:1-7; Tito 1:5-9) Taja kwamba kutaniko si la wazee bali kazi yao ni kutusaidia kufuata hatua za Yesu Kristo. (Mdo. 20:28; Efe. 4:16; 1 Pet. 5:2, 3) Wasaidie wanaopendezwa waone kwamba kuna jamii ulimwenguni pote ambayo imepangwa vizuri na inayotenda chini ya uongozi wa Kristo.

Tunajifunza katika vitabu vya Injili kwamba Yesu alipoingia Yerusalemu muda mfupi kabla ya kifo chake, wanafunzi wake walimtukuza kuwa “Yule anayekuja akiwa ndiye Mfalme katika jina la Yehova!” (Luka 19:38) Watu wanapojifunza Biblia kwa undani zaidi, wanajifunza kwamba sasa Yehova amempa Yesu mamlaka ya kutawala watu wa mataifa yote. (Dan. 7:13, 14) Unapotoa hotuba kutanikoni au unapoongoza mafunzo, wasaidie watu wathamini zaidi jinsi utawala wa Yesu unavyotufaidi.

Kazia kwamba maisha yetu yanaonyesha kama kweli tunaamini Yesu Kristo ni Mfalme na kama tunanyenyekea kwa hiari utawala wake. Taja kazi ambayo Yesu aliwaagiza wanafunzi wake wafanye baada ya kutawazwa kuwa Mfalme. (Mt. 24:14; 28:18-20) Zungumzia mambo ambayo Yesu, yule Mshauri wa Ajabu, alisema yanapasa kutangulizwa maishani. (Isa. 9:6, 7; Mt. 6:19-34) Taja roho ambayo Mfalme huyo wa Amani alisema wafuasi wake wangeonyesha. (Mt. 20:25-27; Yn. 13:35) Uwe mwangalifu usihukumu wengine kwamba hawafanyi kadiri wanavyoweza, lakini watie moyo watafakari juu ya matendo yao, kama kweli yanaonyesha wanatii mamlaka ya Kristo. Unapowasaidia hivyo, utambue kwamba hata wewe mwenyewe unahitaji kufanya yale unayowaambia.

Kuweka Kristo Kuwa Msingi. Biblia inalinganisha kazi ya kufanya mwanafunzi Mkristo na kazi ya kujenga jengo ambalo Yesu Krist ndiye msingi. (1 Kor. 3:10-15) Ili ufaulu katika kazi hiyo, wasaidie watu wamjue Yesu kama anavyoelezwa katika Biblia. Jihadhari wasikuone kuwa kiongozi wao. (1 Kor. 3:4-7) Waelekeze kwa Yesu Kristo.

Ukiweka msingi vizuri, wanafunzi watafahamu kwamba Kristo ametuachia mfano wa ‘kufuata hatua zake kwa ukaribu.’ (1 Pet. 2:21) Ili ufaulu, wasaidie wanafunzi wasivisome vitabu vya Injili kama hadithi tu, bali wavisome na kutenda kwa kupatana navyo. Wasaidie kuiga mitazamo na sifa za Yesu maishani mwao. Watie moyo waone jinsi Yesu alivyohisi kumhusu Baba yake, jinsi alivyoshughulika na vishawishi na majaribu, jinsi alivyomnyenyekea Mungu, na jinsi alivyoshughulika na watu katika hali mbalimbali. Kazia utendaji mkuu katika maisha ya Yesu. Kisha, mwanafunzi anapokabili maamuzi na majaribu maishani, anaweza kujiuliza: ‘Yesu angefanya nini katika hali hii? Je, hatua nitakayochukua inaonyesha nathamini yale ambayo amenifanyia?’

Unapotoa hotuba kutanikoni, usidhani kwamba kwa kuwa tayari akina ndugu wanamwamini Yesu, hakuna haja ya kukazia mambo yake sana. Jambo unalosema litawasaidia sana ukijenga kwenye imani hiyo. Unapozungumza kuhusu mikutano, onyesha daraka la Yesu akiwa Kichwa cha kutaniko. Unapozungumza juu ya huduma ya shambani, kazia roho ambayo Yesu alionyesha alipokuwa akitimiza huduma yake, na ukiwa katika huduma taja jambo ambalo Kristo anafanya akiwa Mfalme ili akusanye watu ambao watahifadhiwa na kuingia katika ulimwengu mpya.

Ni wazi kwamba tunahitaji kufanya mengi mbali na kujifunza mambo ya msingi tu kumhusu Yesu. Ili watu wawe Wakristo wa kweli, ni lazima waweke imani kwake na kumpenda kwelikweli. Upendo kama huo unachochea wengine wamtii kwa unyofu. (Yn. 14:15, 21) Upendo huo unawawezesha watu wasimame imara katika imani wanapokabili magumu, unawasaidia waendelee kutembea katika hatua za Kristo maishani mwao, unawasaidia kuthibitisha kwamba wao ni Wakristo wakomavu ambao ‘wametia mizizi na kuimarishwa juu ya ule msingi.’ (Efe. 3:17) Hali hiyo humtukuza Yehova, Mungu na vilevile Baba ya Yesu Kristo.

YESU alitabiri hivi alipotaja ishara ya kuwapo kwake na ya umalizio wa mfumo wa mambo: “Habari njema hii ya ufalme itahubiriwa katika dunia yote inayokaliwa kwa ajili ya kuwa ushahidi kwa mataifa yote; na ndipo mwisho utakapokuja.”—Mt. 24:14.

Ni ujumbe gani huu ambao ungetangazwa kotekote? Ni ujumbe unaohusu Ufalme ambao Yesu alitufundisha tumwombe Mungu hivi kuuhusu: “Ufalme wako uje.” (Mt. 6:10) Ufunuo 11:15 linaufafanua kuwa “ufalme wa Bwana wetu [Yehova] na wa Kristo wake” kwa sababu Yehova ndiye chanzo cha mamlaka ya kutawala, na amemkabidhi Kristo mamlaka ya kuwa Mfalme. Lakini, ona kwamba ujumbe ambao Yesu alisema ungetangazwa wakati wetu ungeenea sana kuliko ujumbe ambao wafuasi wake walitangaza katika karne ya kwanza. Waliwaambia watu hivi: “Ufalme wa Mungu umekuja karibu nanyi.” (Luka 10:9) Yesu, ambaye alitiwa mafuta kuwa Mfalme, alikuwa katikati yao wakati huo. Lakini kama Mathayo 24:14 linavyosema, Yesu alitabiri kwamba tukio fulani muhimu lingetangazwa ulimwenguni kote ili kutimiza kusudi la Mungu.

Nabii Danieli alipewa maono ya tukio hilo. Aliona “mmoja aliye mfano wa mwanadamu,” Yesu Kristo, akipokea kutoka kwa “Mzee wa Siku,” Yehova Mungu, “mamlaka, na utukufu, na ufalme, ili watu wa kabila zote, na taifa zote, na lugha zote, wamtumikie.” (Dan. 7:13, 14) Tukio hilo linalohusu ulimwengu wote mzima lilitukia mbinguni mwaka wa 1914. Baadaye, Ibilisi na malaika waovu walitupwa chini duniani. (Ufu. 12:7-10) Mfumo huu wa kale ukaingia siku zake za mwisho. Lakini kabla ya mfumo huu kuondolewa kabisa, kuna tangazo linalofanywa duniani kote kwamba Mfalme wa Kimesiya aliyewekwa na Yehova sasa anatawala katika kiti chake cha ufalme mbinguni. Kotekote watu wanajulishwa jambo hili. Itikio lao linaonyesha jinsi wanavyomwona Aliye Juu akiwa Mtawala katika “ufalme wa wanadamu.”—Dan. 4:32.

Ni kweli kwamba bado kuna mambo mengi sana ambayo yanakuja! Tungali tunasali, “Ufalme wako uje,” lakini hiyo haimaanishi kwamba tunasali tukiwa na wazo la kwamba Ufalme wa Mungu bado haujasimamishwa. Badala yake, tunasali kwamba Ufalme wa mbinguni utende kwa njia kuu ili kutimiza unabii kama ule wa Danieli 2:44 na Ufunuo 21:2-4. Ufalme huo utaigeuza dunia iwe paradiso iliyojaa watu ambao wanampenda Mungu na wanaopendana. Tunapohubiri “habari njema hii ya ufalme,” tunataja mambo hayo mazuri ya wakati ujao. Na pia tunatangaza tukiwa na hakika kwamba tayari Yehova amempa Mwana wake mamlaka kamili ya utawala. Je, unakazia habari hii njema unapotoa ushahidi kuhusu Ufalme?

Kufafanua Maana ya Ufalme. Tunaweza kutimizaje agizo letu la kutangaza Ufalme wa Mungu? Tunaweza kuamsha upendezi wa watu kwa kuanzisha mazungumzo juu ya habari mbalimbali, lakini upesi inapaswa kuwa wazi kwamba ujumbe wetu unahusu Ufalme wa Mungu.

Sehemu muhimu ya kazi hii inahusu kusoma au kunukuu maandiko yanayohusu Ufalme huo. Unapozungumza juu ya Ufalme, hakikisha kwamba watu wanaelewa maana yake. Labda haitoshi tu kusema kwamba Ufalme wa Mungu ni serikali. Watu wengine wanaweza kushindwa kuelewa jinsi serikali inavyoweza kuwa kitu ambacho hakionekani. Unaweza kusababu nao kwa njia mbalimbali. Kwa mfano, upepo hauonekani, lakini upepo unaweza kuwa na nguvu sana. Hatuwezi kumwona Yule aliyefanyiza upepo, lakini ni wazi kwamba ana nguvu nyingi sana. Biblia inamwita “Mfalme wa umilele.” (1 Tim. 1:17) Au unaweza kusababu kwamba katika nchi kubwa, watu wengi hawajawahi kuona jiji kuu wala kumwona mtawala kwa macho yao. Wanamsikia tu katika habari. Kwa njia iyo hiyo, Biblia, ambayo imechapishwa kwa lugha zaidi ya 2,200, inatuambia kuhusu Ufalme wa Mungu, yule ambaye amepewa mamlaka, na kazi ambayo Ufalme huo unafanya. Kusudi kuu la gazeti la Mnara wa Mlinzi, ambalo linachapishwa kwa lugha nyingi kuliko jarida jingine lolote, ni ‘Kutangaza Ufalme wa Yehova,’ kama jalada lake linavyosema.

Ili uwasaidie watu waelewe Ufalme, unaweza kutaja baadhi ya mambo ambayo wangependa serikali itimize kama vile uchumi mzuri, amani, kuondoa uhalifu, usawa wa makabila yote, elimu, na afya bora. Onyesha kwamba ni Ufalme wa Mungu pekee utatimiza mambo hayo kwa ukamili na mambo mengine mazuri ambayo wanadamu wametamani.—Zab. 145:16.

Jaribu kuchochea tamaa ya watu ya kuwa raia wa Ufalme huo, unaotawalwa na Yesu Kristo. Taja miujiza aliyofanya ili kuonyesha mambo ambayo atafanya akiwa Mfalme mbinguni. Mara nyingi zungumzia sifa zinazovutia alizoonyesha. (Mt. 8:2, 3; 11:28-30) Eleza kwamba alikufa kwa niaba yetu kisha Mungu akamfufua na kumpa uhai usioweza kufa kule mbinguni. Anatawala kutoka huko akiwa Mfalme.—Mdo. 2:29-35.

Kazia kwamba Ufalme wa Mungu unatawala sasa kutoka mbinguni. Lakini ujue kwamba watu wengi hawaoni hali zinazoonyesha kwamba Ufalme huo unatawala sasa. Kubali jambo hilo kisha uwaulize kama wanajua mambo ambayo Yesu Kristo alisema yangethibitisha utawala wake. Taja baadhi ya ishara hiyo ya ujumla katika Mathayo sura ya 24, Marko sura ya 13, au Luka sura ya 21. Halafu uwaulize hivi, ‘Kwa nini kutawazwa kwa Kristo mbinguni kungetokeza hali hizo duniani?’ Kisha waonyeshe Ufunuo 12:7-10, 12.

Soma Mathayo 24:14 ili kuonyesha mambo halisi ambayo Ufalme wa Mungu unafanya, na ueleze kwamba programu hiyo ya elimu ya Biblia inaendeshwa ulimwenguni pote wakati huu. (Isa. 54:13) Waeleze juu ya shule mbalimbali ambazo zinawafaidi Mashahidi wa Yehova, na kwamba zote zinategemea Biblia na hazitozi malipo yoyote. Eleza kwamba mbali na huduma yetu ya nyumba kwa nyumba, tunawafundisha watu Biblia kutia na familia nzima-nzima nyumbani kwao bila malipo katika nchi zaidi ya 230. Ni serikali gani ya wanadamu ambayo inaweza kuandalia raia zake na hata watu duniani pote mpango mkubwa wa elimu kama hiyo? Waalike watu kwenye Jumba la Ufalme na makusanyiko ya Mashahidi wa Yehova ili waone uthibitisho wa jinsi elimu hiyo inavyobadili maisha ya watu.—Isa. 2:2-4; 32:1, 17; Yn. 13:35.

Lakini je, mwenye nyumba atatambua jinsi maisha yake yanavyohusika? Unaweza kutaja kwa busara kwamba kusudi la ziara yako ni kuzungumzia nafasi ambayo kila mtu anaweza kupata ya kuchagua kuishi chini ya Ufalme wa Mungu. Kwa njia gani? Kwa kujifunza matakwa ya Mungu na kuyafuata maishani.—Kum. 30:19, 20; Ufu. 22:17.

Kuwasaidia Wengine Kuweka Ufalme Kwanza. Hata baada ya mtu kukubali ujumbe wa Ufalme, kuna maamuzi ambayo ni lazima afanye. Ataweka Ufalme wa Mungu mahali gani katika maisha yake? Yesu aliwahimiza wanafunzi wake ‘wafulize kutafuta kwanza ufalme.’ (Mt. 6:33) Tunawezaje kuwasaidia Wakristo wenzetu waweke Ufalme kwanza? Kwa kuweka mfano mzuri sisi wenyewe na kwa kuzungumzia njia zilizopo za kuweka Ufalme kwanza. Nyakati nyingine tunafanya hivyo kwa kumwuliza mtu kama amefikiria mambo fulani ambayo anaweza kurekebisha na kwa kuwasimulia mambo ambayo wengine wanafanya. Kw kuzungumzia masimulizi ya Biblia kwa njia inayomfanya ampende Yehova zaidi. Kwa kukazia kwamba Ufalme huo ni halisi. Kwa kukazia jinsi kazi hii ya kutangaza Ufalme ilivyo muhimu. Mara nyingi ni vizuri zaidi kuwachochea watu wawe na tamaa ya kufanya jambo kuliko kuwaambia tu jambo wanalopaswa kufanya.

Bila shaka, ujumbe muhimu ambao ni lazima sisi sote tutangaze unakazia hasa Yehova Mungu, Yesu Kristo, na Ufalme. Tunapaswa kukazia kweli hizi muhimu tunapowahubiria watu, katika makutaniko, na katika maisha yetu. Tukifanya hivyo, tunaonyesha kwamba kwa kweli tunafaidika na elimu ya Shule ya Huduma ya Kitheokrasi.