Tengenezo la Yehova Hutegemeza Huduma Yako

“Nikaona malaika mwingine akiruka katika mbingu ya kati, naye alikuwa na habari njema idumuyo milele ili aitangaze kuwa taarifa za mteremo.”—UFUNUO 14:6.

 1. Mashahidi wa Yehova wametahiniwaje, na kwa nini wameendelea kuishi?

KWA nini ni jambo la maana kutambua daraka la tengenezo la Yehova la kimbingu katika kutegemeza huduma ya Kikristo? Je, Mashahidi wa Yehova wangeweza kutimiza kuhubiri habari njema ya Ufalme wa Mungu kotekote katika ulimwengu wenye uhasama bila tegemezo kutoka kwa majeshi ya kimbingu ya Yehova? Mashahidi wamehubiri katika karne yenye utukuzo mwingi wa taifa, mifumo ya kisiasa ya kiimla, vita vya ulimwengu, na majanga kadha wa kadha. Bila msaada wa Yehova, je, Mashahidi wangeendelea kuishi kujapokuwa mfululizo wa upendeleo, ubaguzi, na mara nyingi mnyanyaso wenye jeuri ambao umekuwa ukielekezwa kwao?—Zaburi 34:7.

Kuendelea Kuishi Ujapokuwa Upinzani wa Ulimwenguni Pote

 2. Kuna ulinganifu gani kati ya Wakristo wa karne ya kwanza na wale wa leo?

² Katika karne hii ya 20, maadui wa kidini na wa kisiasa, wametokeza kila namna ya kizuizi, cha kisheria na vinginevyo, kujaribu kuzuia au kuzima kazi ya Yehova. Ndugu na dada Wakristo wamenyanyaswa, wamesemwa vibaya, wametolewa maandishi yenye kukashifu, na kuchongewa—wengi hata wameuawa—mara nyingi mauaji hayo yakichochewa na makasisi wa Babiloni Mkubwa. Yaweza kusemwa kwamba, kama ilivyokuwa na Wakristo wa awali, “kweli kwa habari ya farakano hili yajulikana kwetu kwamba kila mahali huwa lasemwa vibaya.” Kama tu makasisi wa Kiyahudi wa nyakati za Kristo walivyojitahidi sana kukomesha huduma, ndivyo ambavyo makasisi na waasi-imani, wakishirikiana na hawara wao wa kisiasa, wamejaribu kusimamisha kazi ya elimu ya watu wa Yehova.—Matendo 28:22; Mathayo 26:59, 65-67.

 3. Twaweza kujifunza nini kutokana na uaminifu-maadili wa Henryka Żur?

³ Fikiria mfano wa lililotukia katika Poland Machi 1, 1946. Henryka Żur, msichana Shahidi mwenye umri wa miaka 15 kutoka karibu na Chełm, aliandamana na Shahidi mwingine, aliyekuwa ndugu, kutembelea watu wenye kupendezwa katika kijiji cha karibu. Walikamatwa na wanachama wa kikosi cha kijeshi cha Katoliki kiitwacho Narodowe Siły Zbrojne (Wanajeshi wa Taifa). Ndugu huyo alipigwa vibaya sana lakini akaponea chupuchupu. Haikuwa hivyo na Henryka. Aliteswa vibaya sana kwa muda wa saa nyingi walipojaribu kumlazimisha afanye ishara ya Katoliki ya msalaba. Mmoja wa watesi wake alisema: “Waweza kuamini chochote utakacho, fanya tu ishara ya Katoliki ya msalaba. La sivyo risasi yakungoja!” Je, alilegea katika uaminifu-maadili wake? La. Hao waoga wa kidini walimkokota kwenye msitu uliokuwa karibu na kumpiga risasi. Hata hivyo, alikuwa mwenye ushindi! Walishindwa kuvunja uaminifu-maadili wake.a—Waroma 8:35-39.

 4. Vikundi vya kisiasa na vya kidini vimejaribu kuzimaje kazi ya kuhubiri Ufalme?

⁴ Zaidi ya miaka mia moja, watumishi wa Mungu wa kisasa wametendwa vibaya kwa kukosa staha. Kwa kuwa Mashahidi wa Yehova hawataki kuwa sehemu ya dini mashuhuri za Shetani, wanaonwa kuwa kama windo lifaalo hukumu yoyote kali au upinzani mshupavu. Wameshambuliwa vikali na vikundi vya kisiasa. Mashahidi wengi wameuawa kwa ajili ya imani yao. Hata ziitwazo eti demokrasia zimejaribu kuzuia kuhubiriwa kwa habari njema. Huko nyuma mwaka wa 1917 katika Kanada na Marekani, makasisi walichochea mashtaka kwamba, Wanafunzi wa Biblia, kama vile Mashahidi walivyojulikana wakati huo, walitaka kufanya mapinduzi. Wasimamizi wa Watch Tower Society walitiwa gerezani kimakosa, wakiondolewa hatia tu baadaye.—Ufunuo 11:7-9; 12:17.

 5. Ni maneno gani yametumika kuwatia moyo watumishi wa Yehova?

⁵ Shetani ametumia kila njia aliyo nayo ili kukomesha kazi ya kutoa ushahidi ya ndugu za Kristo na waandamani wao walio waaminifu-washikamanifu. Lakini, kama vile mambo mengi yaliyoonwa yaonyeshavyo, wala vitisho, ogofyo, jeuri ya kimwili, vifungo vya gerezani, kambi za mateso, wala hata kifo hakiwezi kunyamazisha Mashahidi wa Yehova. Na ndivyo ambavyo imekuwa katika historia yote. Kila mara, maneno ya Elisha yametumika kuwa kitia-moyo: “Usiogope; maana walio pamoja nasi ni wengi kuliko wale walio pamoja nao.” Sababu moja ni kwamba malaika waaminifu wanashinda idadi ya magenge ya Ibilisi!—2 Wafalme 6:16; Matendo 5:27-32, 41, 42.

Yehova Hubariki Bidii ya Kuhubiri

 6, 7. (a) Ni jitihada gani za mapema zilizofanywa ili kuhubiri habari njema? (b) Ni badiliko gani lenye manufaa lililotukia kuanzia 1943?

⁶ Katika karne ya 20, Mashahidi wa Yehova wametumia maendeleo mengi ya kitekinolojia ili kupanua na kuongeza mwendo wa kazi kubwa ya kutoa ushahidi kabla ya mwisho kuja. Huko nyuma mwaka wa 1914, Pasta Russell, msimamizi wa kwanza wa Watch Tower Bible and Tract Society, alianzisha utumizi wa mapema wa slaidi na sinema zilizoambatana na maelezo yenye kutegemea Biblia yaliyorekodiwa katika sahani za santuri, katika wonyesho wa Biblia wa muda wa saa nane ulioitwa “The Photo-Drama of Creation.” Zilishangaza watazamaji katika nchi nyingi nyakati hizo. Baadaye, katika miaka ya 1930 na 1940, Mashahidi wakajulikana kwa kuhubiri kwao nyumba hadi nyumba wakiwa na vinanda vya gramafoni vyenye kubebeka kwa urahisi, wakitumia mirekodi ya hotuba za Biblia zilizotolewa na msimamizi wa pili wa Sosaiti, J. F. Rutherford.

⁷ Mwaka wa 1943, hatua yenye ujasiri ilichukuliwa chini ya mwelekezo wa Nathan H. Knorr, msimamizi wa tatu wa Sosaiti, ilipoamuliwa kuanzishwe shule ya wahudumu katika kila kutaniko. Mashahidi wangezoezwa kuhubiri na kufundisha kutoka nyumba hadi nyumba bila ya kutumia mirekodi ya kinanda cha gramafoni. Tangu wakati huo shule nyinginezo zimepangwa ili kuzoeza wamishonari, mapainia walio wahudumu wa wakati wote, wazee wa kutaniko, na waangalizi wenye madaraka katika ofisi za tawi za Watch Tower Society. Matokeo yamekuwa nini?

 8. Mashahidi walionyeshaje imani kubwa mwaka wa 1943?

⁸ Huko nyuma mwaka wa 1943, katikati ya Vita ya Ulimwengu ya Pili, kulikuwako tu Mashahidi watendaji 129,000 katika nchi 54. Hata hivyo, walikuwa na imani na azimio kwamba Mathayo 24:14 ingetimizwa kabla ya mwisho kuja. Walisadikishwa kwamba Yehova angeacha ujumbe muhimu wa onyo utangazwe kwanza kabla ya mwisho wa mfumo huu wa mambo wenye ufisadi kukoma. (Mathayo 24:21; Ufunuo 16:16; 19:11-16, 19-21; 20:1-3) Je, jitihada zao zimethawabishwa?

 9. Ni mambo gani yanayoonyesha kwamba kazi ya kutoa ushahidi imesitawi?

⁹ Sasa kuna angalau nchi 13 ambazo kila moja zina Mashahidi watendaji zaidi ya 100,000. Baadhi ya nchi hizo ni zile zenye wafuasi wengi wa Kanisa Katoliki. Hata hivyo, tazama hali ilivyo. Brazili ina wahubiri wa habari njema wapatao 450,000, na zaidi ya watu 1,200,000 walihudhuria Ukumbusho wa kifo cha Kristo mwaka wa 1997. Mexico ni kielelezo kingine, ikiwa na karibu Mashahidi 500,000 na zaidi ya watu 1,600,000 waliohudhuria mwadhimisho wa Ukumbusho. Nchi nyingine za Katoliki ni Italia (karibu Mashahidi 225,000), Ufaransa (karibu 125,000), Hispania (zaidi ya 105,000), na Argentina (zaidi ya 115,000). Katika Marekani, ambako dini ya Protestanti, Katoliki, na ya Kiyahudi ndizo nyingi, kuna karibu Mashahidi 975,000 na zaidi ya watu 2,000,000 walihudhuria Ukumbusho. Kwa hakika, umati mkubwa unamiminika kutoka Babiloni Mkubwa, ile milki ya dini isiyo ya kweli, na mafundisho yake ya kifumbo, nao wanageukia ahadi za Mungu zilizo sahili na za hakika za “mbingu mpya na dunia mpya.”—2 Petro 3:13; Isaya 2:3, 4; 65:17; Ufunuo 18:4, 5; 21:1-4.

Kubadilikana ili Kufaa Mahitaji ya Watu

10. Hali zimebadilikaje katika maeneo mengine?

¹⁰ Wengi ambao wamemgeukia Yehova kupitia Kristo Yesu walipatikana katika mahubiri ya kutoka nyumba hadi nyumba. (Yohana 3:16; Matendo 20:20) Lakini njia nyingine zimetumiwa. Nyakati zimebadilika, na hali za kiuchumi zimewalazimu wanawake wengi sasa wafanye kazi nje ya nyumbani. Mara nyingi, wakati wa juma, ni watu wachache wawezao kupatikana nyumbani. Hivyo, Mashahidi wa Yehova wamebadilikana ili kufaa hali hiyo. Kama vile Yesu na wanafunzi wake wa awali, wao huenda mahali na wakati ambapo watu wanapatikana.—Mathayo 5:1, 2; 9:35; Marko 6:34; 10:1; Matendo 2:14; 17:16, 17.

11. Mashahidi wa Yehova wanahubiri wapi leo, na wana matokeo gani?

¹¹ Mashahidi wanachukua hatua ya kwanza nao wanahubiria watu kwa busara katika maeneo makubwa ya maegesho ya magari, maduka makubwa ya ununuzi, viwanda, maofisi na kwenye mabiashara, shuleni, vituo vya polisi, vituo vya petroli, mahoteli na mikahawa, na barabarani. Kwa kweli, wanahubiri popote ambapo watu wanaweza kupatikana. Na watu wanapokuwa nyumbani, basi Mashahidi huendelea kuwatembelea huko. Mfikio huu wa kubadilikana ili kufaana na hali na wa vitendo unatokeza ugawanyaji mwingi wa fasihi za Biblia. Watu wenye mfano wa kondoo wanapatikana. Mafunzo ya Biblia mapya yanaanzishwa. Kazi kubwa zaidi ya kielimu katika historia ya binadamu inafanywa kwa bidii na wahudumu wenye kujitolea ambao ni zaidi ya milioni tano unusu! Je, una pendeleo la kuwa mmoja wao?—2 Wakorintho 2:14-17; 3:5, 6.

Ni Nini Ambacho Huchochea Mashahidi wa Yehova?

12. (a) Yehova anafundishaje watu wake? (b) Ufundishaji huo una matokeo gani?

¹² Tengenezo la kimbingu lahusikaje na yote hayo? Isaya alitoa unabii hivi: “Watoto wako wote watafundishwa na BWANA; na amani ya watoto wako itakuwa nyingi.” (Isaya 54:13) Yehova anafundisha udugu huu wenye muungano wa ulimwenguni pote kupitia tengenezo lake lionekanalo lililo duniani—kwenye Majumba ya Ufalme, kwenye mikusanyiko, na makusanyiko. Muungano na amani hupatikana. Ufundishaji wa Yehova umetokeza watu wa pekee, walioelimishwa kupendana na kuwapenda jirani zao kama wajipendavyo wenyewe, si kuwachukia jirani zao, mahali popote ambapo huenda wakawa wanaishi katika ulimwengu huu uliotengana na kugawanyika.—Mathayo 22:36-40.

13. Twaweza kuwaje na uhakika kwamba mwelekezo wa kimalaika wahusika katika kazi ya kuhubiri?

¹³ Upendo ndio huchochea Mashahidi wa Yehova waendelee kuhubiri ujapokuwa ubaridi au mnyanyaso. (1 Wakorintho 13:1-8) Wanajua kwamba kazi yao ya kuokoa uhai inaelekezwa kutoka mbinguni, kama kitabu cha Ufunuo 14:6 kisemavyo. Ni ujumbe gani unaotangazwa chini ya mwelekezo wa malaika? “Hofuni Mungu na kumpa utukufu, kwa sababu saa ya hukumu yake imewasili, na kwa hiyo mwabuduni Yeye aliyezifanya mbingu na dunia na bahari na mabubujiko ya maji.” Kuhubiriwa kwa habari njema hukweza jina la Yehova. Watu wanaalikwa wampe Mungu utukufu, aliye Muumba, si viumbe na mageuzi yasiyo na mwongozo. Na kwa nini kazi ya kuhubiri ni yenye uharaka hivyo? Kwa sababu saa ya hukumu imewasili, yaani, hukumu dhidi ya Babiloni Mkubwa na sehemu nyingine zote za mfumo wa mambo wenye kuonekana wa Shetani.—Ufunuo 14:7; 18:8-10.

14. Ni nani wanaohusika katika kampeni hii ya ufundishaji mkubwa?

¹⁴ Hakuna Mkristo aliyejiweka wakfu asiyehusishwa katika kazi hii ya kuhubiri. Wazee wa kiroho huchukua uongozi katika kuhubiri pamoja na kutaniko. Mapainia waliozoezwa wanashiriki kikamili katika hiyo kazi. Wahubiri wenye bidii wa ujumbe wa Ufalme, iwe wanaweza kuhubiri kwa muda wa saa chache tu kila mwezi au kwa muda wa saa nyingi, wanaeneza ujumbe huo katika kila pembe ya dunia.—Mathayo 28:19, 20; Waebrania 13:7, 17.

15. Ni nini kinachoonyesha uvutano wa kuhubiri kwa Mashahidi wa Yehova?

¹⁵ Je, jitihada yote hii imekuwa na uvutano kwa ulimwengu? Ithibati moja sahili ya kuonyesha hivyo ni mara nyingi ambazo Mashahidi wa Yehova wameonyeshwa katika programu za televisheni na katika safu za habari. Mara nyingi hizo huonyesha udumifu na azimio letu la kufikia kila mtu. Naam, bidii yetu na kuwapo kwetu kwa mara nyingi huwa na uvutano mkubwa, hata kama watu walio wengi wakataa ujumbe na wajumbe wenyewe!

Bidii Yetu ya Kukamilisha Ushahidi Huo

16. Ni mtazamo gani unaopasa kuonyeshwa sasa katika wakati mfupi unaobaki?

¹⁶ Hatujui ni muda gani unaobaki kwa mfumo huu wa mambo, wala hatuhitaji kujua maadamu mtazamo wetu wa kumtumikia Yehova ni safi. (Mathayo 24:36; 1 Wakorintho 13:1-3) Lakini twajua kwamba ili upendo wa Yehova, nguvu, na haki yake vionekane, habari njema lazima ihubiriwe “kwanza.” (Marko 13:10) Kwa hiyo, haidhuru ni miaka mingapi ambayo huenda ikawa tumengoja kwa hamu ule mwisho wa ulimwengu huu mwovu, usio na haki, na wenye jeuri, lazima tutimize wakfu wetu kwa bidii kulingana na hali zetu. Huenda tukawa wazee-wazee au wagonjwa, lakini bado twaweza kumtumikia Yehova kwa bidii tuliyokuwa nayo katika ujana wetu au tulipokuwa na afya nzuri. Huenda tusiweze kutumia muda mwingi katika huduma kama tulivyofanya awali, lakini kwa hakika twaweza kudumisha ubora wa dhabihu yetu ya sifa kwa Yehova.—Waebrania 13:15.

17. Simulia jambo lililoonwa lenye kutia moyo ambalo laweza kutusaidia sote.

¹⁷ Kwa hiyo, tuwe wachanga au wazee, acheni tuonyeshe bidii na kushiriki ujumbe wetu ujengao wa ulimwengu mpya na wote tukutao. Acheni tuwe kama msichana mwenye haya mwenye umri wa miaka saba Mwaustralia aliyekwenda na mama yake dukani. Alikuwa amesikia kwenye Jumba la Ufalme jinsi lilivyo jambo la maana kuhubiri, kwa hiyo aliweka broshua mbili za Biblia mkobani mwake. Mama yake alipokuwa mwenye shughuli kwenye kaunta, huyo msichana mdogo alitoweka. Mama yake alipomtafuta, alimpata akimtolea bibi mmoja broshua! Mama alienda kuomba msamaha kwa sababu ya usumbufu wowote ambao huenda ikawa binti yake alimsababishia. Lakini bibi huyo alikuwa ameikubali broshua kwa neema. Mama yake alipokuwa peke yake na binti yake tena, alimwuliza jinsi alivyopata moyo mkuu wa kumfikia mtu huyo asiyemfahamu. “Nilisema tu, Tayari, Kaa chonjo, Nenda! Na nikaenda!”

18. Twaweza kuonyeshaje roho yenye kutamanika?

¹⁸ Sisi sote twahitaji roho kama hiyo ya msichana Mwaustralia, hasa ili tufikie watu tusiowafahamu au hata maofisa kwa habari njema. Huenda tukahofu kukataliwa. Acheni tusisahau yale ambayo Yesu alisema: “Msiwe wenye kuhangaikia jinsi gani au ni jambo gani mtasema kwa kujitetea au ni jambo gani mtasema; kwa maana roho takatifu itawafundisha nyinyi saa hiyohiyo mambo mpaswayo kusema.”—Luka 12:11, 12.

19. Wewe wahisije kuhusu huduma yako?

¹⁹ Kwa hiyo itibari msaada wa roho ya Mungu unapofikia watu kwa njia ya fadhili ukiwa na habari njema. Mamilioni huweka itibari yao kwa wanaume na wanawake wasiostahili ambao uhai wao ni wa muda tu. Twamwitibari Yehova na tengenezo lake la kimbingu, yaani, Kristo Yesu, malaika watakatifu, na watiwa-mafuta waliofufuliwa—wanaoishi milele! Kwa hiyo, kumbuka hivi: “Walio pamoja nasi ni wengi kuliko wale walio pamoja nao”!—2 Wafalme 6:16.

[Maelezo ya Chini]

Wewe Wajibuje?

◻ Tengenezo la Mungu la kimbingu limetimiza daraka gani katika kuendelea kuishi kwa watu wa Yehova?

◻ Ni vikundi gani vya kisiasa na vya kidini ambavyo vimeshambulia Mashahidi wa Yehova katika karne ya 20?

◻ Mashahidi wa Yehova wameibadilije huduma yao ili ifae mahitaji ya nyakati?

◻ Ni nini ambacho hukuchochea kuhubiri?

[Picha katika ukurasa wa 17]

Henryka Żur

[Picha katika ukurasa wa 18]

Japani

Martinique

Marekani

Kenya

Marekani

Mashahidi wa Yehova huhubiri wakati wowote na mahali popote watu wapatikanapo

[Picha katika ukurasa wa 20]

Mapema katika karne hii, vinanda vya gramafoni vilitumiwa kueneza ujumbe wa Ufalme