“Njia na Kweli na Uzima”

1, 2. Kwa nini tunahitaji msaada ili kumfikia Yehova, na Yesu Kristo ametuandalia msaada gani?

JE, UMEWAHI kupotea? Labda siku moja ulipotea ukienda kumtembelea rafiki yako au mtu wa ukoo. Ulipokuwa katika barabara usiyoijua, je, ulisimama na kumwomba mtu fulani akuonyeshe njia? Namna gani ikiwa mtu mwenye fadhili, badala ya kukuonyesha njia tu, angekuambia: “Nifuate, nitakupeleka mpaka huko”? Ungefurahi sana, sivyo?

² Tunaweza kusema kwamba Yesu Kristo anatufanyia jambo kama hilo. Tunahitaji msaada ili kumfikia Mungu. Kwa sababu ya dhambi iliyorithiwa na kutokamilika, wanadamu wamepotea, ‘wametenganishwa mbali na uzima ambao ni wa Mungu.’ (Waefeso 4:17, 18) Tunahitaji msaada ili kuipata njia. Yesu, Kielelezo chetu, ambaye ni mwenye fadhili, hatushauri na kutuelekeza tu, bali anafanya mengi zaidi. Kama tulivyoona katika Sura ya 1, Yesu anatualika, akisema: ‘Njoo uwe mfuasi wangu.’ (Marko 10:21) Isitoshe, anatupa sababu inayotuchochea kuukubali mwaliko huo. Pindi moja Yesu alisema: “Mimi ndiye njia na kweli na uzima. Hakuna anayekuja kwa Baba ila kupitia kwangu.” (Yohana 14:6) Acheni tuzungumzie ni kwa nini haiwezekani kumfikia Baba isipokuwa kupitia Mwana tu. Kisha, tutachanganua jinsi ambavyo Yesu ndiye “njia na kweli na uzima.”

3. Kwa nini tunaweza kumfikia Mungu kupitia Yesu tu?

³ Kwanza kabisa, tunaweza kumfikia Mungu kupitia Yesu tu kwa sababu Yehova ameona inafaa kumpa Mwana wake daraka la pekee.a Baba amemtumia kwa njia kubwa zaidi kutimiza makusudi Yake yote. (2 Wakorintho 1:20; Wakolosai 1:18-20) Ili kuelewa daraka la pekee la Mwana huyo, tunahitaji kujikumbusha mambo yaliyotukia katika bustani ya Edeni, ambako wenzi wa kwanza wa ndoa walijiunga na Shetani kumwasi Yehova.—Mwanzo 2:16, 17; 3:1-6.

4. Uasi uliotokea katika Edeni ulitokeza suala gani, naye Yehova aliamua kufanya nini ili kujibu suala hilo?

⁴ Uasi uliotokea Edeni ulitokeza suala lililohusisha viumbe wote wa Mungu: Je, Yehova Mungu anawatawala viumbe wake kwa njia inayofaa? Ili kujibu suala hilo la maana, Yehova aliamua kumtuma duniani mmoja kati ya wana wake wa roho walio wakamilifu. Mwana huyo alikuwa na mgawo wa maana sana. Alipaswa kufa ili kuitetea enzi kuu ya Yehova na kuwa fidia ya kuwaokoa wanadamu. Kwa kuendelea kuwa mwaminifu mpaka kifo, mwana huyo aliyechaguliwa angefungua njia ya kuondoa matatizo yote yaliyosababishwa na uasi wa Shetani. (Waebrania 2:14, 15; 1 Yohana 3:8) Lakini Yehova alikuwa na mamilioni ya mamilioni ya wana wa roho walio wakamilifu. (Danieli 7:9, 10) Alichagua nani kati yao atimize mgawo huo wa maana sana? Yehova alimchagua “Mwana wake mzaliwa-pekee,” ambaye baadaye alikuja kuitwa Yesu Kristo.—Yohana 3:16.

5, 6. Yehova alionyesha jinsi gani kwamba anamwamini Mwana wake, na kwa nini alimwamini hivyo?

⁵ Je, inashangaza kwamba Yehova alimchagua Yesu? Sivyo hata kidogo! Baba alimwamini kabisa Mwana wake mzaliwa-pekee. Karne nyingi kabla ya Mwana wake kuja hapa duniani, Yehova alitabiri kwamba Mwana huyo angeendelea kuwa mshikamanifu ijapokuwa angeteseka sana. (Isaya 53:3-7, 10-12; Matendo 8:32-35) Fikiria hilo lilimaanisha nini. Kama viumbe wengine wote wenye akili, Mwana huyo alikuwa na uhuru wa kuchagua, naye angeweza kujiamulia mwenyewe jambo la kufanya. Hata hivyo, Yehova alimwamini sana hivi kwamba angeweza kutabiri uaminifu wa Mwana wake. Kwa nini alimwamini hivyo? Kwa sababu ya mambo anayojua kumhusu. Yehova anamjua vizuri Mwana wake na anajua kwamba Mwana wake anataka sana kumpendeza. (Yohana 8:29; 14:31) Mwana huyo anampenda Baba yake, naye Yehova anampenda Mwana Wake. (Yohana 3:35) Upendo kati ya Baba na Mwana unawafanya wawe na kifungo cha muungano na kutumainiana kabisa.—Wakolosai 3:14.

⁶ Kwa kuwa Mwana ana daraka la pekee sana, naye Baba anamwamini sana, nao wana upendo unaowaunganisha, basi haishangazi kwamba Yesu tu ndiye njia ya kumfikia Mungu. Hata hivyo, kuna sababu nyingine inayoonyesha kwa nini Mwana tu ndiye anayeweza kutuongoza kwa Baba.

7, 8. Kwa nini Yesu hakukosea aliposema kwamba hakuna anayemjua Baba kabisa “ila Mwana”?

⁷ Ili kumfikia Yehova, lazima tutimize matakwa fulani. (Zaburi 15:1-5) Ni nani mwingine isipokuwa Mwana, anayejua vizuri zaidi jinsi ya kutimiza matakwa ya Mungu na kupata kibali Chake? Yesu alisema: “Baba yangu amenipa mimi vitu vyote, na hakuna yeyote anayemjua Mwana kabisa ila Baba, wala yeyote hamjui Baba kabisa ila Mwana, na yeyote ambaye Mwana anapenda kumfunulia.” (Mathayo 11:27) Acheni tuone kwa nini Yesu hakukosea wala kutia chumvi aliposema kwamba hakuna anayemjua Baba kabisa “ila Mwana.”

⁸ Kwa kuwa ndiye “mzaliwa wa kwanza wa viumbe vyote,” Mwana huyo ana uhusiano wa pekee pamoja na Yehova. (Wakolosai 1:15) Fikiria uhusiano wa karibu sana uliositawi kati ya Baba na Mwana kwa miaka mingi ambayo walikuwa peke yao, tangu mwanzo wa uumbaji mpaka viumbe wengine wa roho walipoumbwa! (Yohana 1:3; Wakolosai 1:16, 17) Fikiria pia pendeleo la pekee ambalo Mwana huyo alipata alipokuwa pamoja na Baba yake, akijifunza kutoka kwa Baba yake na kujifunza mapenzi yake, viwango vyake, na njia zake. Kwa kweli, kusema kwamba Yesu anamjua Baba vizuri kuliko mtu mwingine yeyote, si kutia chumvi. Bila shaka uhusiano huo wa karibu ulimwezesha Yesu kumfunua Baba yake kwa njia ambazo hakuna mtu mwingine angeweza.

9, 10. (a) Yesu alimfunua Baba yake katika njia gani? (b) Tunapaswa kufanya nini ili tupate kibali cha Yehova?

⁹ Mafundisho ya Yesu yalionyesha kwamba alijua kabisa maoni na hisia za Yehova na mambo anayotaka waabudu Wake wafanye.b Yesu alimfunua Baba yake katika njia nyingine ya pekee. Yesu alisema: “Yule ambaye ameniona mimi amemwona Baba pia.” (Yohana 14:9) Yesu alimwiga Baba yake kikamili katika kila jambo alilosema na kutenda. Kwa hiyo, tunaposoma juu ya Yesu katika Biblia, iwe tunasoma maneno yenye kuchochea na yenye kuvutia aliyotumia alipokuwa akifundisha, au jinsi alivyochochewa na huruma kuwaponya wengine na kutokwa na machozi, tunaweza kumwazia Yehova mwenyewe akisema na kutenda mambo hayohayo. (Mathayo 7:28, 29; Marko 1:40-42; Yohana 11:32-36) Maneno na matendo ya Mwana yanaonyesha kikamili njia na mapenzi ya Baba. (Yohana 5:19; 8:28; 12:49, 50) Kwa hiyo, ili tupate kibali cha Yehova, tunapaswa kutii mafundisho ya Yesu na kufuata mfano wake.—Yohana 14:23.

¹⁰ Kwa kuwa Yesu anamjua Yehova kabisa na anamwiga kikamili, haishangazi kwamba Yehova ameamua Mwana awe njia ya kumfikia Baba. Baada ya kuzungumzia kwa nini tunaweza kumfikia Yehova kupitia Yesu tu, acheni sasa tuzungumzie maana ya maneno haya ya Yesu: “Mimi ndiye njia na kweli na uzima. Hakuna anayekuja kwa Baba ila kupitia kwangu.”—Yohana 14:6.

11. (a) Kwa nini tunaweza kuwa na uhusiano mzuri pamoja na Mungu kupitia Yesu tu? (b) Andiko la Yohana 14:6 linakazia jinsi gani cheo cha pekee cha Yesu? (Ona maelezo ya chini.)

¹¹ Tayari tumejifunza kwamba hatuwezi kumfikia Mungu isipokuwa kupitia Yesu. Fikiria jinsi sisi binafsi tunavyohusika. Yesu ndiye “njia” katika maana ya kwamba tunaweza kuwa na uhusiano mzuri pamoja na Mungu kupitia kwake tu. Kwa nini? Yesu alikuwa mwaminifu mpaka alipokufa, naye aliutoa uhai wake uwe dhabihu ya fidia. (Mathayo 20:28) Bila fidia hiyo, hatuwezi kumfikia Mungu. Dhambi inawazuia wanadamu wasimfikie Mungu, kwa kuwa Yehova ni mtakatifu naye hawezi kukubali dhambi. (Isaya 6:3; 59:2) Lakini dhabihu ya Yesu iliondolea mbali kizuizi hicho; ilifunika dhambi, au kutupatanisha na Mungu. (Waebrania 10:12; 1 Yohana 1:7) Tukiukubali mpango huo wa Mungu kupitia Kristo na kuuamini, tunaweza kupata kibali cha Yehova. Hakuna njia nyingine ya ‘kupatanishwa na Mungu.’c—Waroma 5:6-11.

12. Yesu “ndiye njia” katika maana gani?

¹² Yesu “ndiye njia” ya kumfikia Mungu katika sala. Ni kupitia Yesu tu tunaweza kumfikia Yehova katika sala tukiwa na uhakika kwamba maombi yetu ya kutoka moyoni yatasikiwa vizuri. (1 Yohana 5:13, 14) Yesu mwenyewe alisema: “Mkimwomba Baba jambo lolote atawapa katika jina langu. . . . Ombeni nanyi mtapokea, ili shangwe yenu ipate kujazwa.” (Yohana 16:23, 24) Kwa hiyo, tukitumia jina la Yesu, tunaweza kumfikia Yehova katika sala na kumwita “Baba yetu.” (Mathayo 6:9) Yesu “ndiye njia” katika maana nyingine, yaani, alituwekea mfano wa kufuata. Kama ilivyokwisha kutajwa, Yesu alimwiga Baba yake kikamili. Hivyo, mfano wa Yesu unaonyesha jinsi tunavyoweza kumpendeza Yehova katika maisha yetu. Basi ili kumfikia Yehova, lazima tutembee katika hatua za Yesu.—1 Petro 2:21.

13, 14. (a) Yesu alisema kweli kwa njia gani? (b) Ili Yesu awe “kweli” alipaswa kufanya nini, na kwa nini?

¹³ Nyakati zote, Yesu alisema kweli kuhusu neno la kinabii la Baba yake. (Yohana 8:40, 45, 46) Udanganyifu haukupatikana kinywani mwa Yesu. (1 Petro 2:22) Hata wale waliokuwa wakimpinga walikubali kwamba alifundisha “njia ya Mungu kupatana na ile kweli.” (Marko 12:13, 14) Hata hivyo, Yesu aliposema “mimi ndiye . . . kweli,” hakuwa akimaanisha tu kwamba alisema kweli alipozungumza, alipohubiri, na kufundisha. Mbali na kusema kweli, mengi zaidi yalihusika.

¹⁴ Kumbuka kwamba mamia ya miaka mapema, Yehova aliwaongoza kwa roho yake waandikaji wa Biblia waandike unabii mwingi kumhusu Masihi, au Kristo. Unabii huo ulitia ndani mambo mbalimbali kuhusu maisha, huduma, na kifo chake. Isitoshe, mambo fulani yaliyokuwa katika Sheria ya Musa yalikuwa kivuli au yaliwakilisha mambo ambayo yangetimizwa na Masihi. (Waebrania 10:1) Je, Yesu angeendelea kuwa mwaminifu mpaka kifo, na hivyo kutimiza mambo yote yaliyotabiriwa kumhusu? Kufanya hivyo kungethibitisha kwamba Yehova ni Mungu wa unabii wa kweli. Yesu ndiye aliyekuwa na daraka hilo zito. Kupitia maisha yake, yaani, kila neno alilosema na kila tendo alilotenda, Yesu alionyesha kwamba mambo yaliyotabiriwa juu yake yalikuwa kweli. (2 Wakorintho 1:20) Kwa hiyo, Yesu alikuwa “kweli.” Tunaweza kusema kwamba Neno la Yehova la kinabii lilithibitika kuwa kweli Yesu alipokuja duniani.—Yohana 1:17; Wakolosai 2:16, 17.

15. Inamaanisha nini kumwamini Mwana, na kufanya hivyo kutatuwezesha kupata nini?

¹⁵ Yesu ndiye “uzima,” kwa kuwa ni kupitia yeye tu tunaweza kupata uzima, “uzima ulio wa kweli.” (1 Timotheo 6:19) Biblia inasema: “Yule anayemwamini Mwana ana uzima wa milele; yule asiyemtii Mwana hataona uzima, bali ghadhabu ya Mungu hukaa juu yake.” (Yohana 3:36) Inamaanisha nini kumwamini Mwana wa Mungu? Inamaanisha kuamini kwamba hatuwezi kupata uzima bila yeye. Pia, inamaanisha kuonyesha imani yetu kwa matendo, kuendelea kujifunza kutoka kwa Yesu, na kufanya yote tuwezayo kufuata mafundisho yake na mfano wake. (Yakobo 2:26) Kwa hiyo basi, kumwamini Mwana wa Mungu kunatuwezesha kupata uzima wa milele. “Kundi dogo” la Wakristo waliotiwa mafuta litapata uhai wa kiroho usioweza kuharibika katika mbingu, nao “umati mkubwa” wa “kondoo wengine” utapata uhai mkamilifu wa kibinadamu katika paradiso duniani.—Luka 12:32; 23:43; Ufunuo 7:9-17; Yohana 10:16.

16, 17. (a) Yesu atakuwa “uzima” jinsi gani hata kwa wale ambao tayari wamekufa? (b) Tunaweza kuwa na uhakika gani?

¹⁶ Namna gani wale ambao tayari wamekufa? Kwao pia, Yesu ndiye “uzima.” Muda mfupi kabla ya kumfufua rafiki yake, Lazaro, Yesu alimwambia hivi Martha, dada ya Lazaro: “Mimi ndiye ufufuo na uzima. Yule anayeniamini, hata akifa, atarudi kwenye uzima.” (Yohana 11:25) Yehova amempa Mwana wake uwezo wa kufufua kwa kumpa “funguo za kifo na za Kaburi.” (Ufunuo 1:17, 18) Yesu aliyetukuzwa atatumia funguo hizo kufungua malango ya Kaburi na hivyo kuwaachilia wote walio humo.—Yohana 5:28, 29.

¹⁷ “Mimi ndiye njia na kweli na uzima.” Kwa maneno hayo, Yesu alionyesha kusudi la maisha na huduma yake duniani. Maneno hayo ni ya maana sana kwetu leo. Kumbuka kwamba baada ya kusema maneno hayo, Yesu alisema hivi: “Hakuna anayekuja kwa Baba ila kupitia kwangu.” (Yohana 14:6) Maneno ya Yesu ni ya maana sana leo kama yalivyokuwa alipoyasema. Hivyo basi, tunaweza kuwa na uhakika kabisa kwamba tukimfuata Yesu, hatutapotea. Yeye tu ndiye anayeweza kutuonyesha njia ya kumfikia “Baba.”

18. Kuwa wafuasi wa kweli wa Yesu kunatia ndani nini?

¹⁸ Kwa kuwa Yesu ana daraka la pekee na anamjua Baba kabisa, tuna sababu nzuri ya kumfuata Mwana huyo. Kama tulivyoona katika sura iliyotangulia, kuwa wafuasi wa kweli wa Yesu kunatia ndani matendo, si maneno au hisia tu. Kumfuata Kristo hutia ndani kuishi kulingana na mafundisho na mfano wake. (Yohana 13:15) Kitabu hiki kinaweza kukusaidia kufanya hivyo.

19, 20. Kitabu hiki kina habari gani zinazoweza kukusaidia kumfuata Kristo?

¹⁹ Katika sura zinazofuata, tutachunguza kwa makini maisha na huduma ya Yesu. Sura hizo zimegawanywa katika sehemu tatu. Kwanza, tutazungumzia sifa na njia zake. Kisha, tutachunguza jinsi alivyohubiri na kufundisha kwa bidii. Halafu, tutaona jinsi alivyoonyesha upendo. Kuanzia Sura ya 3, kuna sanduku la kufundisha lenye kichwa: “Unaweza Kumfuata Yesu Jinsi Gani?” Maandiko na maswali yaliyo katika sanduku hilo yamekusudiwa kutusaidia kutafakari jinsi tunavyoweza kumwiga Yesu katika neno na tendo.

²⁰ Yehova Mungu ametuandalia msaada ili tusipotee, au kutenganishwa naye kwa sababu ya dhambi tuliyorithi. Ingawa aligharimika sana, Yehova alionyesha upendo wake alipomtuma Mwana wake atuonyeshe njia ya kuwa na uhusiano mzuri pamoja Naye. (1 Yohana 4:9, 10) Na uchochewe, ndiyo, usukumwe kuitikia upendo huo mkubwa kwa kuupokea na kuukubali mwaliko wa Yesu: “Uwe mfuasi wangu.”—Yohana 1:43.