Karibuni Uhuru Mtukufu kwa Ajili ya Watoto wa Mungu

“Viumbe vilitiishwa chini ya ubatili . . . juu ya msingi wa tumaini kwamba viumbe vyenyewe pia vitawekwa huru kutoka katika utumwa wa uharibifu na kuwa na uhuru wenye utukufu wa watoto wa Mungu.”—WAROMA 8:20, 21.

1. Dhabihu ya Yesu iliwakilishwaje katika Siku ya Kufunika?

YEHOVA alimtoa Mwana mzaliwa-pekee wake akiwa dhabihu ya fidia iliyofungua njia kwenye uhai wa kimbingu kwa wanadamu 144,000 na kwenye matazamio ya kidunia ya milele kwa wanadamu wale wengine. (1 Yohana 2:1, 2) Kama ilivyotajwa katika makala inayotangulia, dhabihu ya Yesu kwa ajili ya Wakristo wazaliwa kwa roho iliwakilishwa wakati ambapo kuhani wa cheo cha juu wa Israeli alimdhabihu fahali akiwa toleo la dhambi kwa ajili yake mwenyewe, nyumba yake, na kabila la Lawi Siku ya Kufunika ya kila mwaka. Siku hiyohiyo, alimdhabihu mbuzi akiwa toleo la dhambi kwa ajili ya Waisraeli wale wengine wote, kama vile dhabihu ya Kristo itakavyowanufaisha wanadamu kwa ujumla. Kitamathali, mbuzi aliye hai alichukulia mbali kwa ujumla dhambi za watu za mwaka uliokuwa umepita, akitoweka nyikani.a—Mambo ya Walawi 16:7-15, 20-22, 26.

2, 3. Ni nini kimaanishwacho na taarifa ya Paulo iliyorekodiwa kwenye Waroma 8:20, 21?

² Baada ya kueleza juu ya wanadamu ambao wangekuwa “wana wa Mungu” wa kimbingu, mtume Paulo alisema hivi: “Taraja lenye hamu la viumbe linangoja kufunuliwa kwa wana wa Mungu. Kwa maana viumbe vilitiishwa chini ya ubatili, si kwa mapenzi yavyo vyenyewe bali kupitia yeye aliyevitiisha hivyo, juu ya msingi wa tumaini kwamba viumbe vyenyewe pia vitawekwa huru kutoka katika utumwa wa uharibifu na kuwa na uhuru wenye utukufu wa watoto wa Mungu.” (Waroma 8:14, 17, 19-21) Taarifa hii yamaanisha nini?

³ Baba yetu wa zamani Adamu alipoumbwa akiwa binadamu mkamilifu, alikuwa “mwana [au, mtoto] wa Mungu.” (Luka 3:38) Kwa sababu ya kufanya dhambi, aliingia katika “utumwa wa uharibifu” na kupitishia jamii ya kibinadamu hali hiyo. (Waroma 5:12) Mungu aliwaruhusu wanadamu wazaliwe “ubatili” ukiwa unawakabili kwa sababu ya kutokamilika kwao kulikorithiwa, lakini aliwapa tumaini kupitia “mbegu,” Yesu Kristo. (Mwanzo 3:15; 22:18; Wagalatia 3:16) Ufunuo 21:1-4 huelekeza kwenye wakati ambapo ‘kifo, ombolezo, kupaaza kilio, na umivu halitakuwapo tena kamwe.’ Kwa kuwa hiyo ni ahadi kwa “wanadamu,” yatuhakikishia kwamba jamii mpya ya wanadamu yenye kuishi chini ya utawala wa Ufalme itapata kurudishiwa kikamili afya ya akili na mwili na kupata uhai udumuo milele wakiwa “watoto wa Mungu” wa kidunia. Katika Utawala wa Miaka Elfu wa Kristo, wanadamu watiifu “watawekwa huru kutoka katika utumwa wa uharibifu.” Baada ya kuthibitisha uaminifu-mshikaminifu wao kwa Yehova wakati wa mtihani wa mwisho, watakuwa huru milele kutoka katika dhambi na kifo kilichorithiwa. (Ufunuo 20:7-10) Wakati huo wale walio duniani “[watakuwa] na uhuru wenye utukufu wa watoto wa Mungu.”

Wanasema “Njoo!”

4. “[Ku]chukua maji ya uhai bure” kwamaanisha nini?

⁴ Ni tumaini lenye kustaajabisha kama nini ambalo limewekwa mbele ya wanadamu! Si ajabu kwamba Wakristo wazaliwa kwa roho ambao bado wamo duniani wanaongoza kwa bidii katika kuwaambia wengine juu yake! Wakiwa wale watakaokuwa sehemu ya “bibi-arusi” wa Mwana-Kondoo aliyetukuzwa, Yesu Kristo, mabaki ya watiwa-mafuta wahusika katika utimizo wa maneno haya ya kiunabii: “Na roho na bibi-arusi hufuliza kusema: ‘Njoo!’ Na acha yeyote anayesikia aseme: ‘Njoo!’ Na acha yeyote anayeona kiu aje; acha yeyote atakaye achukue maji ya uhai bure.” (Ufunuo 21:2, 9; 22:1, 2, 17) La, dhabihu ya fidia ya Yesu haiwanufaishi wale watiwa-mafuta 144,000 tu. Roho ya Mungu hufuliza kufanya kazi kupitia wanaobaki duniani wa jamii ya bibi-arusi katika kusema “Njoo.” Yeyote anayesikia ambaye ni mwenye kiu ya uadilifu akaribishwa kusema “Njoo,” akijinufaisha na wingi wa uandalizi wa Yehova kwa ajili ya wokovu.

5. Mashahidi wa Yehova wanafurahia kuwa na nani katikati yao?

⁵ Mashahidi wa Yehova wana imani katika uandalizi wa Mungu kwa ajili ya uhai kupitia Yesu Kristo. (Matendo 4:12) Wanafurahia kuwa na watu wenye mioyo ya haki katikati yao ambao watamani kujifunza juu ya makusudi ya Mungu na kufanya mapenzi yake. Majumba ya Ufalme yao yamefunguliwa kwa wote ambao wataka ‘kuja na kuchukua maji ya uhai bure,’ ‘wakati huu wa mwisho.’—Danieli 12:4.

Mabadiliko ya Kupita kwa Wakati

6. Roho ya Mungu imetendaje juu ya watumishi wa Yehova katika pindi mbalimbali za wakati?

⁶ Mungu ana wakati wa kutekeleza makusudi yake, nao huathiri kushughulika kwake na wanadamu. (Mhubiri 3:1; Matendo 1:7) Ingawa roho ya Mungu iliwajia watumishi wa nyakati za kabla ya Ukristo, hawakuzaliwa kuwa wana wake wa kiroho. Hata hivyo, kuanzia na Yesu, wakati wa Yehova ulikuwa umefika wa kutumia roho takatifu ili kuzaa wanaume na wanawake waliojiweka wakfu kwenye urithi wa kimbingu. Na vipi siku yetu? Roho hiyohiyo inatenda kazi juu ya “kondoo wengine” wa Yesu, lakini haiamshi ndani yao tumaini na tamaa ya uhai wa kimbingu. (Yohana 10:16) Wakiwa na tumaini walilopewa na Mungu la uhai wa milele katika dunia iliyo paradiso, wao hutegemeza kwa shangwe mabaki ya watiwa-mafuta kwa kutoa ushahidi katika kipindi hiki cha mpito kutoka ulimwengu wa zamani hadi ulimwengu mpya wa Mungu ulio mwadilifu.—2 Petro 3:5-13.

7. Ni kazi gani ya kuvuna ambayo Wanafunzi wa Biblia walihangaikia, lakini walijua nini juu ya paradiso?

⁷ Mungu alianza ‘kuwaleta wana wengi kwenye utukufu’ kwa kumwaga roho takatifu kwenye Pentekoste mwaka wa 33 W.K., na yaonekana aliweka wakati wa kukamilisha “Israeli wa Mungu” wa kiroho wanaojumlika kuwa watu 144,000. (Waebrania 2:10; Wagalatia 6:16; Ufunuo 7:1-8) Kuanzia mwaka wa 1879, kazi ya kuvuna yenye kuhusisha Wakristo watiwa-mafuta ilitajwa mara nyingi katika gazeti hili. Lakini Wanafunzi wa Biblia (waitwao sasa Mashahidi wa Yehova) walijua pia kwamba Maandiko hutoa tumaini la uhai wa milele katika dunia iliyo paradiso. Kwa kielelezo, toleo la Mnara wa Mlinzi la Julai 1883, la Kiingereza lilisema hivi: “Yesu atakaposimamisha ufalme wake, kuharibu uovu, n.k., dunia hii itapata kuwa paradiso, . . . na wote walio makaburini mwao wataingia ndani yake. Na kwa kuzitii amri zake huenda wakaishi milele ndani yake.” Wakati ulipopita, kuvunwa kwa watiwa-mafuta kulipungua, na hatua kwa hatua watu mmoja-mmoja ambao hawakuwa na tumaini la kimbingu wakavunwa kuingia katika tengenezo la Yehova. Wakati huohuo, Mungu aliwapa watumishi wake watiwa-mafuta, Wakristo waliozaliwa mara ya pili, ufahamu wenye kina, ufaao kuangaliwa.—Danieli 12:3; Wafilipi 2:15; Ufunuo 14:15, 16.

8. Uelewevu wa tumaini la kidunia ulisitawije mapema miaka ya 1930?

⁸ Hasa tangu mwaka wa 1931 wale wenye tumaini la kidunia wamekuwa wakishirikiana na kutaniko la Kikristo. Mwaka huo, Yehova aliwaelimisha mabaki ya Wakristo wazaliwa kwa roho ili waone kwamba Ezekieli sura ya 9 hurejezea jamii hiyo ya kidunia, inayotiwa alama kwa ajili ya kuokoka kuingia katika ulimwengu mpya wa Mungu. Mwaka wa 1932 mkataa ulifikiwa kwamba watu hao wa siku ya kisasa wenye mfano wa kondoo walifananishwa kimbele na Yonadabu (Yehonadabu) mwenzi wa Yehu. (2 Wafalme 10:15-17) Mwaka wa 1934 ilieleweshwa wazi kabisa kwamba “Wayonadabu” wapaswa ‘kujiweka wakfu’ kwa Mungu. Mwaka wa 1935 “halaiki kubwa,” au “umati mkubwa”—ambao hapo zamani ulifikiriwa kuwa jamii ya kiroho ya pili ambayo ingekuwa “waandamani” wa bibi-arusi wa Kristo mbinguni—ulitambulishwa kuwa kondoo wengine wenye tumaini la kidunia. (Ufunuo 7:4-15; 21:2, 9; Zaburi 45:14, 15) Na hasa tangu mwaka wa 1935 watiwa-mafuta wamekuwa wakiongoza utafutaji wa watu wanyoofu wanaotamani sana kuishi milele katika dunia iliyo paradiso.

9. Kwa nini Wakristo fulani waliacha kushiriki mifano kwenye Mlo wa Jioni wa Bwana baada ya mwaka wa 1935?

⁹ Baada ya mwaka wa 1935 Wakristo fulani waliokuwa wakishiriki mkate na divai kwenye Mlo wa Jioni wa Bwana waliacha kushiriki. Kwa nini? Kwa sababu waling’amua kwamba tumaini lao lilikuwa la kidunia, bali si la kimbingu. Mwanamke mmoja aliyebatizwa mwaka wa 1930 alisema hivi: “Ijapokuwa [kushiriki] kulifikiriwa kuwa jambo lifaalo kufanya, hasa kwa wahudumu wa wakati wote wenye bidii, sikusadikishwa kamwe kwamba nilikuwa na tumaini la kimbingu. Kisha, mwaka wa 1935, tulieleweshwa wazi kabisa kwamba umati mkubwa wenye tumaini la kuishi milele duniani ulikuwa ukikusanywa. Wengi wetu tulishangilia kuelewa kwamba tulikuwa sehemu ya umati huo mkubwa, nasi tukaacha kushiriki mifano.” Hata hali ya vichapo vya Kikristo ilibadilika. Ingawa vile vya miaka ya hapo zamani kimsingi vilikuwa vimekusudiwa wafuasi wa Yesu wazaliwa kwa roho, kuanzia mwaka wa 1935 na kuendelea Mnara wa Mlinzi na fasihi nyingine za ‘mtumwa mwaminifu’ ziliandaa chakula cha kiroho kilichofaa mahitaji ya watiwa-mafuta na wenzao wenye tumaini la kidunia.—Mathayo 24:45-47.

10. Huenda mahali pa mtiwa-mafuta asiye mwaminifu pakachukuliwaje?

¹⁰ Tuseme mtiwa-mafuta mmoja angekosa kuwa mwaminifu. Je, mahali pake pangechukuliwa? Paulo alionyesha jambo hilohilo katika mazungumzo yake juu ya mzeituni wa ufananisho. (Waroma 11:11-32) Ikiwa mahali pa mmoja aliye mzaliwa kwa roho pahitaji kuchukuliwa, yaelekea Mungu angempa wito wa kimbingu mtu fulani ambaye imani yake imekuwa kielelezo chema katika kumtolea utumishi mtakatifu kwa miaka mingi.—Linganisha Luka 22:28, 29; 1 Petro 1:6, 7.

Sababu Nyingi za Kuwa Wenye Shukrani

11. Hata tumaini letu liwe la aina gani, Yakobo 1:17 hutuhakikishia nini?

¹¹ Popote pale ambapo twamtumikia Yehova kwa uaminifu, atatosheleza mahitaji yetu na tamaa zetu nyoofu. (Zaburi 145:16; Luka 1:67-74) Iwe tuna tumaini la kimbingu kikweli au tazamio letu ni la kidunia, tuna sababu nyingi zilizo nzuri za kuwa wenye shukrani kwa Mungu. Sikuzote yeye hufanya mambo kwa masilahi bora ya wale wampendao. Mwanafunzi Yakobo alisema kwamba “kila zawadi njema na kila upaji mkamilifu ni kutoka juu, kwa maana huteremka kutoka kwa Baba wa mianga ya kimbingu,” Yehova Mungu. (Yakobo 1:17) Acheni tuangalie baadhi ya zawadi na baraka hizi.

12. Kwa nini twaweza kusema kwamba Yehova amempa kila mmoja wa watumishi wake waaminifu tumaini la ajabu sana?

¹² Yehova ametolea kila mmoja wa watumishi wake waaminifu tumaini la ajabu sana. Amewaita wengine kwenye uhai wa kimbingu. Kwa mashahidi wake wa kabla ya Ukristo, Yehova alitoa tumaini zuri la kufufuliwa kwenye uhai udumuo milele duniani. Kwa mfano, Abrahamu alikuwa na imani katika ufufuo na alingojea “jiji lililo na misingi halisi”—Ufalme wa kimbingu ambao chini yake atafufuliwa kwenye uhai wa kidunia. (Waebrania 11:10, 17-19) Kwa mara nyingine tena, wakati huu wa mwisho, Mungu anawapa mamilioni ya watu tumaini la uhai udumuo milele katika dunia iliyo paradiso. (Luka 23:43; Yohana 17:3) Hapana shaka, wowote ambao Yehova amewatolea tumaini hilo tukufu wapaswa kuwa wenye shukrani sana kwa ajili yalo.

13. Roho takatifu ya Mungu imetendaje kazi juu ya watu wake?

¹³ Yehova huwapa watu wake roho takatifu ikiwa zawadi. Wakristo waliopewa tumaini la kimbingu wametiwa mafuta kwa roho takatifu. (1 Yohana 2:20; 5:1-4, 18) Lakini, watumishi wa Mungu walio na matazamio ya kidunia wana msaada na mwongozo wa roho. Miongoni mwao alikuwa Musa, aliyekuwa na roho ya Yehova, sawa na wale wanaume 70 waliowekwa rasmi kumsaidia. (Hesabu 11:24, 25) Chini ya uvutano wa roho takatifu, Bezaleli alitumikia akiwa msanii stadi kuhusiana na tabenakulo la Israeli. (Kutoka 31:1-11) Roho ya Mungu ilimjia Gideoni, Yeftha, Samsoni, Daudi, Eliya, Elisha, na wengineo. Ingawa watu hawa wa nyakati za kale hawataletwa kwenye utukuzo wa kimbingu, waliongozwa na kusaidiwa na roho takatifu, sawa na kondoo wengine wa Yesu leo. Kwa hiyo, basi, kupata roho ya Mungu hakumaanishi kwamba lazima tuwe na wito wa kimbingu. Lakini, roho ya Yehova huandaa mwongozo, hutusaidia kuhubiri na kutimiza migawo mingine tuliyopewa na Mungu, hutoa nguvu ipitayo iliyo ya kawaida, na hutokeza ndani yetu matunda yake ya upendo, shangwe, amani, ustahimilivu, fadhili, wema, imani, upole, na kujidhibiti. (Yohana 16:13; Matendo 1:8; 2 Wakorintho 4:7-10; Wagalatia 5:22, 23) Je, hatupaswi kuwa wenye shukrani kwa ajili ya zawadi hiyo yenye neema kutoka kwa Mungu?

14. Sisi hunufaikaje kutokana na zawadi za Mungu za ujuzi na hekima?

¹⁴ Ujuzi na hekima ni zawadi kutoka kwa Mungu ambazo kwa ajili yazo twapaswa kuwa wenye shukrani, tumaini letu liwe ni la kimbingu au la kidunia. Ujuzi sahihi juu ya Yehova hutusaidia “kuhakikisha mambo yaliyo ya maana zaidi” na “[kutembea] kwa kumstahili Yehova kwa madhumuni ya kumpendeza yeye kikamili.” (Wafilipi 1:9-11; Wakolosai 1:9, 10) Hekima ya kimungu hutumika ikiwa ulinzi na kiongozi maishani. (Mithali 4:5-7; Mhubiri 7:12) Ujuzi na hekima ya kweli hutegemea Neno la Mungu, na wachache wa watiwa-mafuta wanaobaki huvutiwa hasa na yale isemayo juu ya tumaini lao la kimbingu. Hata hivyo, kupenda Neno la Mungu na uelewevu wake mzuri, siyo njia ya Mungu ya kuonyesha kwamba tumeitwa kwenye uhai wa kimbingu. Wanaume kama Musa na Danieli hata waliandika visehemu vya Biblia, lakini watafufuliwa kwenye uhai duniani. Tumaini letu liwe ni la kimbingu au ni la kidunia, sisi sote hupokea chakula cha kiroho kupitia “mtumwa mwaminifu na mwenye busara” mwenye kukubaliwa na Yehova. (Mathayo 24:45-47) Sisi sote tu wenye shukrani kama nini kwa ajili ya ujuzi ambao tumejipatia kwa njia hiyo!

15. Ni nini mojawapo ya zawadi kubwa zaidi za Mungu, nawe waionaje?

¹⁵ Mojawapo ya zawadi kubwa zaidi ya Mungu ni uandalizi wenye upendo wa dhabihu ya fidia ya Yesu, ambayo hutunufaisha tuwe na matazamio ya kimbingu au matumaini ya kidunia. Mungu aliupenda ulimwengu wa wanadamu “sana hivi kwamba akatoa Mwana mzaliwa-pekee wake, ili kila mtu anayedhihirisha imani katika yeye asipate kuangamizwa bali awe na uhai udumuo milele.” (Yohana 3:16) Nao upendo wa Yesu ulimchochea “kutoa nafsi yake kuwa fidia katika kubadilishana kwa ajili ya wengi.” (Mathayo 20:28) Kama vile mtume Yohana alivyoeleza, Yesu Kristo “ni dhabihu yenye kufunika kwa ajili ya dhambi zetu [zile za watiwa-mafuta], lakini si kwa ajili ya zetu tu bali pia kwa ajili ya zile za ulimwengu wote.” (1 Yohana 2:1, 2) Kwa sababu hiyo, sisi sote twapaswa kuwa wenye shukrani sana kwa ajili ya uandalizi huo wa kuokoka ili kupata uhai wa milele.b

Je, Utakuwapo?

16. Ni tukio gani maarufu litakalokumbukwa baada ya mshuko-jua Aprili 11, 1998, na ni nani wapaswao kuwapo?

¹⁶ Shukrani kwa ajili ya fidia iliyoandaliwa na Mungu kupitia Mwana wake yapaswa itusukume tuwepo kwenye Majumba ya Ufalme au kwingineko ambako Mashahidi wa Yehova watakusanyika Aprili 11, 1998, baada ya mshuko-jua, ili kukumbuka kifo cha Kristo. Alipoanzisha ushikaji wa mwadhimisho huo pamoja na mitume wake waaminifu usiku wa mwisho wa maisha yake ya kidunia, Yesu alisema hivi: “Fulizeni kufanya hili katika ukumbuko wangu.” (Luka 22:19, 20; Mathayo 26:26-30) Wachache wanaobaki wa watiwa-mafuta watashiriki mkate usiotiwa chachu, unaowakilisha mwili wa kibinadamu wa Yesu usio na dhambi, na divai nyekundu isiyokolezwa, inayomaanisha damu yake iliyomwagwa katika dhabihu. Wakristo wazaliwa kwa roho tu ndio wapaswao kushiriki kwa sababu ni wao tu walio katika agano jipya na katika agano la Ufalme na wana ushuhuda usiokanika wa roho takatifu ya Mungu kwamba tumaini lao ni la kimbingu. Mamilioni ya wengine watakuwapo wakiwa watazamaji wenye staha ambao ni wenye shukrani kwa ajili ya upendo ulioonyeshwa na Mungu na Kristo kuhusiana na dhabihu ya Yesu ambayo hufanya uhai wa milele uwezekane.—Waroma 6:23.

17. Twapaswa kukumbuka nini kuhusiana na kutiwa mafuta kwa roho?

¹⁷ Maoni ya kidini ya hapo zamani, hisia-moyo zenye nguvu zitokanazo na kifo cha mpendwa, shida ambazo sasa hushirikishwa na uhai wa kidunia, au kule kuhisi kuwa wamepokea baraka fulani ya pekee kutoka kwa Yehova huenda kukaongoza watu fulani kudhani kimakosa kwamba wana wito wa kimbingu. Lakini sisi sote twapaswa kukumbuka kwamba Maandiko hayatuamuru kushiriki mifano ya Ukumbusho ili kuonyesha shukrani zetu kwa dhabihu ya fidia ya Kristo. Isitoshe, kutiwa mafuta kwa roho “[kwategemea], si yeye anayetaka wala yeye anayekimbia, bali Mungu,” Yule ambaye alimzaa Yesu akiwa Mwana wa kiroho na ambaye huwaleta wana wengine 144,000 tu kwenye utukufu.—Waroma 9:16; Isaya 64:8.

18. Kwa walio wengi ambao wanamtumikia Yehova leo, ni baraka gani zilizoko mbele?

¹⁸ Uhai udumuo milele katika dunia iliyo paradiso ni tumaini lililotolewa na Mungu la wanadamu wengi sana ambao wanatumikia Yehova siku hizi za mwisho. (2 Timotheo 3:1-5) Karibuni, wataonea shangwe paradiso hiyo yenye kustaajabisha. Wakati huo wakuu watasimamia mambo ya kidunia chini ya utawala wa kimbingu. (Zaburi 45:16) Hali zenye amani zitakuwako wakazi wa dunia watiipo sheria za Mungu na kujifunza mengi zaidi juu ya njia za Yehova. (Isaya 9:6, 7; Ufunuo 20:12) Kutakuwa na kazi nyingi ya kufanya, katika kujenga nyumba na kuitiisha dunia. (Isaya 65:17-25) Na ebu fikiria kurudiana kwenye furaha kwa familia wakati ambapo wafu warudi kwenye uhai! (Yohana 5:28, 29) Baada ya mtihani wa mwisho, uovu wote utakuwa umetoweka. (Ufunuo 20:7-10) Milele baadaye, dunia itajazwa wanadamu wakamilifu ambao ‘wamewekwa huru kutoka katika utumwa wa uharibifu na walio na uhuru wenye utukufu wa watoto wa Mungu.’

[Maelezo ya Chini]

Ungejibuje?

◻ Yamaanisha nini “[ku]chukua maji ya uhai bure”?

◻ Tuna sababu zipi za kumshukuru Mungu, tumaini letu liwe ni la kimbingu au ni la kidunia?

◻ Ni ushikaji wa mwadhimisho gani wa kila mwaka ambao sote twapaswa kuhudhuria?

◻ Wakati ujao una nini kwa walio wengi wa watu wa Yehova?

[Picha katika ukurasa wa 18]

Mamilioni ya watu wameanza ‘kuchukua maji ya uhai bure.’ Je, wewe umo miongoni mwao?