“Hivi Ndivyo Mungu Alivyotupenda”

“Ikiwa hivi ndivyo Mungu alivyotupenda, basi sisi wenyewe tuko chini ya wajibu kupendana.”—1 YOHANA 4:11.

1. Kwenye Machi 23 baada ya jua kushuka, kwa nini mamilioni ya watu watakusanyika katika Majumba ya Ufalme na mahali pengine mbalimbali pa kukutania tufeni pote?

JUMAPILI, Machi 23, 1997, baada ya jua kushuka, bila shaka kutakuwa na watu zaidi ya 13,000,000 ulimwenguni pote watakaokusanyika katika Majumba ya Ufalme na mahali pengine mbalimbali pa kukutania panapotumiwa na Mashahidi wa Yehova. Kwa nini? Kwa sababu mioyo yao imeguswa na wonyesho ulio mkubwa kupita yote wa upendo wa Mungu kuelekea jamii ya kibinadamu. Yesu Kristo alikazia uangalifu uthibitisho huo mtukufu wa upendo wa Mungu, kwa kusema hivi: “Mungu aliupenda ulimwengu sana hivi kwamba akatoa Mwana mzaliwa-pekee wake, ili kila mtu anayedhihirisha imani katika yeye asipate kuangamizwa bali awe na uhai udumuo milele.”—Yohana 3:16.

2. Ni maswali gani ambayo sote tunaweza kujiuliza kwa manufaa kwa habari ya kuitikia kwetu upendo wa Mungu?

² Tuuchunguzapo upendo ambao Mungu ameonyesha, yafaa tujiulize hivi, ‘Je, kwa kweli ninathamini yale ambayo Mungu amefanya? Je, jinsi ninavyotumia maisha yangu hutoa uthibitisho wa uthamini huo?’

“Mungu Ni Upendo”

3. (a) Kwa nini si jambo lisilo la kawaida kwa Mungu kuonyesha upendo? (b) Nguvu na hekima zadhihirishwaje katika kazi zake za uumbaji?

³ Kwa kuwa “Mungu ni upendo,” si jambo lisilo la kawaida kwake kuonyesha upendo. (1 Yohana 4:8) Upendo ni sifa yake kuu. Alipokuwa akiitayarisha dunia ikaliwe na binadamu, kuinua kwake milima na kukusanya kwake maji yawe maziwa na bahari-kuu mbalimbali kulikuwa wonyesho wa nguvu wenye kutazamisha. (Mwanzo 1:9, 10) Mungu alipoanzisha utendaji-kazi wa duru ya maji na duru ya oksijeni, alipobuni vidubini (viumbe vidogo sana) visivyohesabika na unamna-namna wa mimea ili kubadili elementi za kikemikali za dunia ziwe chakula ambacho wanadamu waliweza kula ili waendeleze uhai wao, alipofanya saa zetu za kibiolojia zifaane na urefu wa siku na miezi kwenye sayari Dunia, hayo yalionyesha hekima kubwa. (Zaburi 104:24; Yeremia 10:12) Hata hivyo, wenye kutokeza hata zaidi katika uumbaji wa maumbile ni uthibitisho wa upendo wa Mungu.

4. Katika uumbaji wa maumbile, ni uthibitisho upi wa upendo wa Mungu ambao sisi sote twapaswa kuuona na kuuthamini?

⁴ Hisi zetu za kuonja hutuambia juu ya upendo wa Mungu tuumapo tunda bivu, lenye umajimaji ambalo kwa wazi liliumbwa si ili kutuendeleza tukiwa hai tu bali pia kutuletea raha. Macho yetu huona uthibitisho wa wazi wa huo upendo katika machweo yenye kutazamisha, mbingu zilizojaa nyota katika usiku usio na mawingu, aina mbalimbali na rangi zenye kung’aa za maua, michezo ya wanyama wadogo, na tabasamu changamfu za marafiki. Pua zetu hutujulisha juu ya huo upendo tupumuapo mnukio mtamu wa maua ya wakati wa masika. Masikio yetu huutambua huo upendo tusikilizapo mvumo wa maporomoko ya maji, nyimbo za ndege, na sauti za wapendwa. Twauhisi huo upendo wakati mtu tumpendaye anapotupa sisi kumbatio lenye shauku. Wanyama fulani wana uwezo mbalimbali wa kuona, kusikia, au kunusa vitu ambavyo wanadamu hawana. Lakini jamii ya kibinadamu, iliyoumbwa katika mfano wa Mungu, ina uwezo wa kuhisi upendo wa Mungu katika njia ambayo hakuna mnyama awezaye kuhisi.—Mwanzo 1:27.

5. Yehova alionyeshaje wingi wa upendo kwa Adamu na Hawa?

⁵ Yehova Mungu alipowaumba wanadamu wa kwanza, Adamu na Hawa, aliwazingira kwa uthibitisho wa upendo wake. Alikuwa amepanda shamba, paradiso, na kufanya miti ya kila aina imee humo. Alikuwa ameandaa mto ulitilie maji na akalijaza ndege na wanyama wenye kupendeza. Aliwapa Adamu na Hawa yote hayo yawe makao yao. (Mwanzo 2:8-10, 19) Yehova alishughulika nao kama watoto wake, sehemu ya familia yake ya ulimwengu wote mzima. (Luka 3:38) Baada ya kuandaa Edeni likiwa kiolezo, Baba wa kimbingu wa wanadamu hao wawili wa kwanza aliwapa mgawo wenye kuridhisha wa kueneza Paradiso ifunike tufe. Dunia nzima ilipasa kujazwa wazao wao.—Mwanzo 1:28.

6. (a) Wewe wahisije juu ya mwendo wa uasi uliochukuliwa na Adamu na Hawa? (b) Ni nini kiwezacho kuonyesha kwamba tumejifunza kutokana na yale yaliyotukia katika Edeni na kwamba tumenufaika kutokana na ujuzi huo?

⁶ Hata hivyo, punde si punde Adamu na Hawa walikabili jaribu la utii, mtihani wa uaminifu-mshikamanifu. Kwanza mmoja kisha mwingine alishindwa kuonyesha kuthamini kwa upendo ambao walikuwa wameonyeshwa. Walilofanya lilikuwa la kuchukiza. Lisilo na udhuru! Tokeo lilikuwa kwamba, walipoteza uhusiano wao na Mungu, wakafukuzwa kutoka familia yake, wakaondoshwa Edeni. Sisi leo tungali twahisi matokeo ya dhambi yao. (Mwanzo 2:16, 17; 3:1-6, 16-19, 24; Waroma 5:12) Lakini je, tumejifunza kutokana na yale yaliyotukia? Sisi tunaitikiaje upendo wa Mungu? Je, maamuzi tunayofanya kila siku yanaonyesha kwamba tunathamini upendo wake?—1 Yohana 5:3.

7. Yajapokuwa yale waliyofanya Adamu na Hawa, Yehova alionyeshaje upendo kwa wazao wao?

⁷ Hata ule ukosefu mbaya sana wa uthamini walioonyesha wazazi wetu wa kibinadamu wa kwanza kuelekea yote ambayo Mungu alikuwa amewafanyia, haukukomesha upendo wenyewe wa Mungu. Kwa sababu ya huruma kwa wanadamu ambao hawakuwa wamezaliwa wakati huo—kutia nasi tulio hai leo—Mungu aliwaruhusu Adamu na Hawa wawe na familia kabla ya kufa. (Mwanzo 5:1-5; Mathayo 5:44, 45) Ikiwa hangalifanya hivyo, hakuna yeyote kati yetu angalikuwa amezaliwa. Kupitia ufunuo wa hatua kwa hatua wa mapenzi yake, Yehova aliandaa pia msingi wa tumaini kwa wale wote wa uzao wa Adamu ambao wangedhihirisha imani. (Mwanzo 3:15; 22:18; Isaya 9:6, 7) Mpango wake ulitia ndani njia ambayo watu wa mataifa yote wangeweza kupata tena alichopoteza Adamu, yaani, uhai mkamilifu wakiwa washiriki waliokubalika wa familia ya Mungu ya ulimwengu wote mzima. Alifanya hilo kwa kuandaa fidia.

Fidia Ilikuwa ya Nini?

8. Kwa nini Mungu asingaliweza kuagiza tu kwamba ingawa Adamu na Hawa lazima wafe, hakuna yeyote wa wazao wao watiifu ambao wangelazimika kufa?

⁸ Je, kwa kweli ilikuwa lazima bei ya fidia ya namna ya uhai wa kibinadamu ilipwe? Je, Mungu asingaliweza kuagiza tu kwamba ingawa Adamu na Hawa lazima wafe kwa sababu ya uasi wao, wazao wao wote ambao wangemtii Mungu wangeweza kuishi milele? Kwa maoni ya kibinadamu yasiyofikiri mbele, hilo laweza kusikika kuwa lenye kufaa. Hata hivyo, Yehova “huzipenda haki na hukumu.” (Zaburi 33:5) Ni baada tu ya Adamu na Hawa kuwa watenda-dhambi ndipo walipozaa watoto; kwa hiyo hakuna yeyote wa watoto wao aliyezaliwa akiwa mkamilifu. (Zaburi 51:5) Wao wote walikuwa na urithi wa dhambi, na adhabu ya dhambi ni kifo. Ikiwa Yehova angalikuwa amepuuza hili, ni kielelezo cha aina gani ambacho kingalikuwa kimewekewa washiriki wa familia yake ya ulimwengu wote mzima? Hangaliweza kupuuza viwango vyake mwenyewe vya uadilifu. Alistahi matakwa ya haki. Hakuna yeyote ambaye angeweza kupata kosa kihalali katika njia ambayo Mungu alishughulikia masuala yaliyohusika.—Waroma 3:21-23.

9. Kulingana na kiwango cha kimungu cha haki, ni fidia ya aina gani iliyohitajiwa?

⁹ Hivyo, basi, msingi ufaao wa kukomboa wazao wa Adamu ambao wangedhihirisha utii wenye upendo kwa Yehova ungeandaliwaje? Ikiwa mwanadamu mkamilifu angekufa kidhabihu, haki ingeweza kuruhusu thamani ya uhai huo mkamilifu iandae ufuniko wa dhambi za wale ambao wangeikubali fidia kwa imani. Kwa kuwa dhambi ya mtu mmoja, Adamu, ilihusika katika kusababisha familia yote ya kibinadamu iwe watenda-dhambi, damu iliyomwagwa ya binadamu mwingine mkamilifu, yenye thamani inayolingana, ingeweza kusawazisha mizani ya haki. (1 Timotheo 2:5, 6) Lakini mtu huyo angepatikana wapi?

Gharama Ilikuwa Kubwa Kiasi Gani?

10. Kwa nini wazao wa Adamu hawangeweza kuandaa fidia iliyohitajiwa?

¹⁰ Miongoni mwa wazao wa mtenda-dhambi Adamu, hakukuwa na yeyote ambaye angeweza kuandaa kilichohitajiwa ili kurudisha matazamio ya uhai ambayo Adamu alikuwa amepoteza. “Hakuna mtu awezaye kumkomboa ndugu yake, wala kumpa Mungu fidia kwa ajili yake, (maana fidia ya nafsi zao ina gharama, wala hana budi kuiacha hata milele;) ili aishi sikuzote asilione kaburi.” (Zaburi 49:7-9) Badala ya kuiacha jamii ya kibinadamu bila tumaini, Yehova mwenyewe alifanya uandalizi kwa rehema.

11. Yehova aliandaa kwa njia gani uhai mkamilifu wa kibinadamu uliohitajiwa kwa ajili ya fidia inayostahili?

¹¹ Yehova hakutuma malaika duniani ajifanye kuwa amekufa kwa kutoa umbo mwili wa kibinadamu huku akiendelea kuishi akiwa roho. Badala ya hivyo, kwa kufanya muujiza ambao ni Mungu tu, Muumba, angaliweza kubuni, alihamisha kani ya uhai na kiolezo cha utu wa mwana wa kimbingu hadi tumbo la uzazi la mwanamke, Maria binti Heli, wa kabila la Yuda. Kani ya utendaji ya Mungu, roho takatifu yake, ililinda salama ukuzi wa huyo mtoto katika tumbo la uzazi la mama yake, naye akazaliwa akiwa binadamu mkamilifu. (Luka 1:35; 1 Petro 2:22) Huyo basi alikuwa na bei iliyohitajiwa ili kuandaa fidia ambayo ingetimiza kikamili matakwa ya haki ya kimungu.—Waebrania 10:5.

12. (a) Ni katika maana gani Yesu ni “Mwana mzaliwa-pekee” wa Mungu? (b) Kutumwa na Mungu kwake ili kuandaa fidia kulikaziaje upendo Wake kwetu?

¹² Ni yupi kati ya makumi ya maelfu ya wana wake wa kimbingu aliyepewa mgawo huo na Yehova? Ni yule aliyefafanuliwa katika Maandiko kuwa “Mwana wake mzaliwa-pekee.” (1 Yohana 4:9) Maneno hayo yanatumiwa kufafanua, si alichokuja kuwa alipozaliwa akiwa binadamu, bali alichokuwa mbinguni kabla ya hilo. Yeye ndiye mmoja pekee ambaye Yehova aliumba moja kwa moja bila kushirikiana na mwingine yeyote. Yeye ndiye Mzaliwa wa Kwanza wa uumbaji wote. Yeye ndiye aliyetumiwa na Mungu kufanya viumbe vyote viweko. Malaika ni wana wa Mungu, jinsi Adamu alivyokuwa mwana wa Mungu. Lakini Yesu afafanuliwa kuwa na “utukufu kama ule ulio wa mwana mzaliwa-pekee kutoka kwa baba.” Anasemekana kuwa yuko “katika mahali pa kifua na Baba.” (Yohana 1:14, 18) Uhusiano wake na Baba ni wa karibu, wa ndani, na mwororo. Anashiriki upendo wa Baba yake kwa jamii ya kibinadamu. Mithali 8:30, 31 hueleza jinsi Baba yake anavyohisi juu ya Mwana huyu na jinsi Mwana anavyohisi juu ya jamii ya kibinadamu: “Nikawa furaha yake [Yehova] kila siku; nikifurahi daima mbele zake; . . . na furaha yangu [mimi Yesu, Stadi wa Kazi wa Yehova, niliye udhihirisho halisi wa hekima] ilikuwa pamoja na wanadamu.” Huyo Mwana mwenye thamani zaidi sana ndiye aliyetumwa na Mungu duniani aandae fidia. Kwa hiyo, jinsi ilivyo na maana taarifa hii ya Yesu: “Kwa maana Mungu aliupenda ulimwengu sana hivi kwamba akatoa Mwana mzaliwa-pekee wake”!—Yohana 3:16.

13, 14. Rekodi ya Biblia juu ya kujaribu kwa Abrahamu kumtoa Isaka yapaswa kutusaidia tuthamini nini juu ya alilofanya Yehova? (1 Yohana 4:10)

¹³ Ili kutusaidia kuelewa kwa kiasi fulani hilo lamaanisha nini, zamani za kale kabla ya Yesu kuja duniani, Mungu alimwagiza Abrahamu hivi, miaka ipatayo 3,890 iliyopita: “Umchukue mwanao, mwana wako wa pekee, umpendaye, Isaka, ukaende zako mpaka nchi ya Moria, ukamtoe sadaka ya kuteketezwa huko juu ya mlima mmojawapo nitakaokuambia.” (Mwanzo 22:1, 2) Kwa imani, Abrahamu alitii. Jiweke katika hali ya Abrahamu. Vipi ikiwa huyo angekuwa mwanao, mwanao pekee ambaye wampenda sana? Ungekuwa na hisia zipi huku ukipasua kuni kwa ajili ya toleo la kuteketezwa, ufungapo safari ya siku kadhaa kuelekea nchi ya Moria, na umwekapo mwanao kwenye madhabahu?

¹⁴ Kwa nini mzazi mwenye huruma ana hisia hizo? Mwanzo 1:27 husema kwamba Mungu alimwumba mwanadamu katika mfano Wake. Hisia zetu za upendo na huruma huonyesha katika njia ndogo sana upendo na huruma ya Yehova mwenyewe. Katika kisa cha Abrahamu, Mungu aliingilia mambo, hivi kwamba Isaka hakutolewa akiwa dhabihu kihalisi. (Mwanzo 22:12, 13; Waebrania 11:17-19) Hata hivyo, katika kisa chake mwenyewe, Yehova hakuacha kuiandaa fidia dakika ya mwisho, ingawa hilo lilifanywa kwa gharama kubwa kwake na pia kwa Mwana wake. Lililofanywa lilikuwa, si kwa sababu ya wajibu wowote kwa upande wa Mungu, bali, badala ya hivyo, lilikuwa wonyesho usio wa kawaida wa fadhili isiyostahiliwa. Je, twauthamini kikweli?—Waebrania 2:9.

Kinachowezeshwa na Fidia

15. Fidia imeathirije maisha hata katika mfumo huu uliopo wa mambo?

¹⁵ Uandalizi huo wenye upendo uliofanywa na Mungu una matokeo makubwa maishani mwa wale wanaoukubali kwa imani. Hapo zamani walikuwa mbali na Mungu kwa sababu ya dhambi. Kama Neno lake lisemavyo, walikuwa ‘maadui kwa sababu akili zao zilikuwa juu ya kazi zilizokuwa zenye uovu.’ (Wakolosai 1:21-23) Lakini walipata “kupatanishwa na Mungu kupitia kifo cha Mwana wake.” (Waroma 5:8-10) Wakiwa wamebadili njia yao ya maisha na wakiwa wamekubali msamaha ambao Mungu hufanya upatikane kwa wale wanaodhihirisha imani katika dhabihu ya Kristo, wanapewa dhamiri safi.—Waebrania 9:14; 1 Petro 3:21.

16. Ni baraka zipi wanazopewa kundi dogo kwa sababu ya imani yao katika fidia?

¹⁶ Yehova ametolea wachache kati ya hao, kundi dogo, upendeleo usiostahiliwa wa kuwa washiriki pamoja na Mwana wake katika Ufalme wa kimbingu, ili kutimiza kusudi la awali la Mungu kwa dunia. (Luka 12:32) Hao wametwaliwa “kutoka kila kabila na ulimi na watu na taifa . . . kuwa ufalme na makuhani kwa Mungu wetu, nao watatawala wakiwa wafalme juu ya dunia.” (Ufunuo 5:9, 10) Mtume Paulo aliwaandikia hao hivi: “Mlipokea roho ya tendo la kufanywa kuwa wana, roho ambayo kwayo twapaaza kilio: ‘Abba, Baba!’ Hiyo roho yenyewe hutoa ushahidi pamoja na roho yetu kwamba sisi ni watoto wa Mungu. Basi, ikiwa sisi ni watoto, sisi pia ni warithi: warithi wa Mungu kwelikweli, lakini warithi-washirika pamoja na Kristo.” (Waroma 8:15-17) Mungu awafanyapo kuwa wana wake, wanapewa uhusiano wenye upendo aliopoteza Adamu; lakini wana hao watapewa mapendeleo zaidi ya utumishi wa kimbingu—jambo ambalo Adamu hakuwa nalo kamwe. Si ajabu mtume Yohana alisema hivi: “Ona ni namna gani ya upendo ambao Baba ametupa sisi, ili tuitwe watoto wa Mungu”! (1 Yohana 3:1) Kuelekea hao Mungu huonyesha si upendo wenye kanuni tu (a·gaʹpe) bali pia shauku nyororo (phi·liʹa), ambayo ni sifa ya ufungamano ulioko kati ya marafiki wa kweli.—Yohana 16:27.

17. (a) Kwa wote wanaodhihirisha imani katika fidia, ni fursa ipi inayotolewa? (b) “Uhuru wenye utukufu wa watoto wa Mungu” utamaanisha nini kwao?

¹⁷ Kwa wengine pia—wote wanaodhihirisha imani katika uandalizi wenye ukarimu wa Mungu wa uhai kupitia Yesu Kristo—Yehova hufungua fursa ya kupata uhusiano wenye thamani aliopoteza Adamu. Mtume Paulo alieleza hivi: “Taraja lenye hamu la viumbe [uumbaji wa kibinadamu uliotoka kwa Adamu] linangoja kufunuliwa kwa wana wa Mungu [yaani, wanangoja wakati inapothibitika waziwazi kwamba wana wa Mungu walio warithi pamoja na Kristo wa Ufalme wa kimbingu wanachukua hatua ya wazi kwa niaba ya jamii ya kibinadamu]. Kwa maana viumbe vilitiishwa chini ya ubatili [walizaliwa katika dhambi wakiwa na tazamio la kifo, na hakukuwa na njia ambayo wangeweza kujiweka huru], si kwa mapenzi yavyo vyenyewe bali kupitia yeye aliyevitiisha hivyo, juu ya msingi wa tumaini [litolewalo na Mungu] kwamba viumbe vyenyewe pia vitawekwa huru kutoka katika utumwa wa uharibifu na kuwa na uhuru wenye utukufu wa watoto wa Mungu.” (Waroma 8:19-21) Uhuru huo utamaanisha nini? Kwamba watakuwa wamewekwa huru kutoka katika utumwa wa dhambi na kifo. Watakuwa na ukamilifu wa akili na mwili, Paradiso ikiwa makao yao, na uhai wa milele ambao kwao watafurahia ukamilifu wao na kuonyesha uthamini wao kwa Yehova, Mungu pekee wa kweli. Na yote hayo yaliwezeshwaje? Kupitia dhabihu ya fidia ya Mwana mzaliwa-pekee wa Mungu.

18. Machi 23 baada ya jua kushuka, sisi tutakuwa tukifanya nini, na kwa nini?

¹⁸ Nisani 14, 33 W.K., katika chumba cha juu Yerusalemu, Yesu alianzisha Ukumbusho wa kifo chake. Ukumbusho wa kila mwaka wa kifo chake umekuwa tukio la maana maishani mwa Wakristo wote wa kweli. Yesu mwenyewe aliamuru hivi: “Fulizeni kufanya hili katika ukumbuko wangu.” (Luka 22:19) Mwaka wa 1997 Ukumbusho utafanywa baada ya jua kushuka Machi 23 (ambao ndio wakati Nisani 14 ianzapo). Siku hiyo, hakuna lolote ambalo lingeweza kuwa la maana zaidi ya kuwapo kwa ajili ya pindi hiyo ya Ukumbusho.

Ungejibuje?

◻ Mungu ameonyesha wingi wa upendo kwa jamii ya kibinadamu katika njia zipi?

◻ Kwa nini uhai mkamilifu wa kibinadamu ulihitajiwa ili kufidi wazao wa Adamu?

◻ Yehova aliandaa fidia hiyo kwa gharama gani kubwa?

◻ Ni nini kinachowezeshwa na fidia?

[Picha katika ukurasa wa 10]

Mungu alitoa Mwana mzaliwa-pekee wake