Maswali Kutoka kwa Wasomaji
Nyoka aliwasilianaje na Hawa katika bustani ya Edeni ili avunje sheria ya Mungu kuhusu mti wa ujuzi wa mema na mabaya?
Andiko la Mwanzo 3:1 linasema: “Basi nyoka alikuwa mwerevu kuliko wanyama wote wa mwitu aliowafanya BWANA Mungu. Akamwambia mwanamke, Ati! hivi ndivyo alivyosema Mungu, msile matunda ya miti yote ya bustani?” Watu wamefikiria njia mbalimbali ambazo huenda ikawa nyoka alitumia kuwasiliana na Hawa. Njia moja wanayofikiria alitumia ni ishara. Kwa mfano, kasisi Mwingereza Joseph Benson alisema: “Yaonekana alitumia ishara za namna fulani. Hata wengine wanadhani kwamba wakati huo nyoka alijulikana kuwa ana uwezo wa kufikiri na kusema, . . . lakini jambo hilo haliwezi kuthibitishwa.”
Hata hivyo, kwa kutumia tu ishara za mwili, nyoka angewezaje kumweleza Hawa kwamba kwa kula tunda lililokatazwa angekuwa kama Mungu, na kuweza kuamua yaliyo mema na yaliyo mabaya? Isitoshe, Hawa alishiriki mazungumzo hayo, na kujibu maswali yaliyozushwa na nyoka. (Mwanzo 3:2-5) Maoni ya kwamba nyoka aliwasiliana na Hawa kwa ishara tu yangefanya tufikie mkataa kwamba Hawa alijibu kwa kutumia ishara, ingawa Biblia inasema kwamba alizungumza.
Akirejezea tukio hilo, mtume Paulo aliwaonya Wakristo wenzake hivi: “Naogopa kwamba kwa njia fulani, kama nyoka alivyomshawishi Hawa kwa ujanja wake, huenda akili zenu zikafisidiwa.” Hatari alizozungumzia Paulo zilitokana na “mitume wasio wa kweli, wafanyakazi wenye udanganyifu.” Hatari iliyotokezwa na ‘mitume hao walio bora sana’ haikuhusisha tu ishara za mwili. Ilihusisha usemi wao—maneno yao ya ujanja, yaliyosemwa ili kupotosha wengine.—2 Wakorintho 11:3-5, 13.
Ijapokuwa usemi ulitumiwa kumdanganya Hawa katika bustani ya Edeni, hakuna jambo linalodokeza kwamba nyoka halisi alikuwa na vinyuzi-sauti. Hakuvihitaji. Wakati malaika wa Mungu alipozungumza na Balaamu kwa kutumia punda, mnyama huyo hakuhitaji zoloto ya hali ya juu kama ya wanadamu. (Hesabu 22:26-31) Bila shaka, wakati ‘hayawani mchukua-mizigo yenye kulemea asiye na sauti, alipofanya tamko kwa sauti ya mtu,’ uwezo wa kufanya hivyo ulitoka katika makao ya roho.—2 Petro 2:16.
Kiumbe wa roho aliyetumia nyoka kuzungumza na Hawa anatambulishwa katika Biblia kuwa “nyoka wa awali, yeye aitwaye Ibilisi na Shetani.” (Ufunuo 12:9) Maneno aliyosikia Hawa na kuyajibu yalitoka kwa Shetani, ambaye “hufuliza kujigeuza umbo mwenyewe kuwa malaika wa nuru.”—2 Wakorintho 11:14.
[Picha katika ukurasa wa 27]
“Nanyi mtakuwa kama Mungu, mkijua mema na mabaya”