Sura 5
Suala Linalokuhusu Wewe
1.Kwa sababu gani watu wameona ni vigumu kufahamu ni kwa sababu gani Mungu ameruhusu mabaya kati ya wanadamu?
IJAPOKUWA watu wote wanatamani amani na usalama, historia ya wanadamu imeharibiwa na umwagaji wa damu na uumizaji. Kwa kuwa Biblia inaonyesha kwamba Mungu anayachukia sana mambo hayo, ni kwa sababu gani hakuzikomesha hali hizi kabla ya sasa? Bila shaka haiwezi kuwa ni kwa sababu ya kutopendezwa. Biblia, vilevile uzuri wa kazi ya kidunia ya Mungu, vinatoa ushuhuda mwingi wa upendo wake na kuwajali wanadamu. (1 Yohana 4:8) Jambo la maana zaidi ni kwamba, heshima ya jina la Mungu mwenyewe inahusika, kwa kuwa hali hizi zimewafanya watu wamsute. Basi, kungeweza kuwako sababu gani ya kuvumilia kwake maelfu ya miaka ya msukosuko na jeuri?
2. (a) Ni wapi katika Biblia tunapopata kujua ni kwa sababu gani Mungu ameruhusu hali mbaya kwa muda mrefu sana? (b) Jambo gani laonyesha wazi kwamba habari ya Biblia juu ya Adamu na Hawa ni ya kweli?
2 Jibu linapatikana katika usimulizi unaoifungua Biblia unaohusu Adamu na Hawa. Huo si usimulizi unaohusu watu wa kihadithi tu. Ni habari ya kweli. Biblia inatoa kumbukumbu la maandishi kamili lenye kuthibitika la nasaba yenye kuanzia karne ya kwanza ya Wakati wa Kawaida kurudi nyuma mpaka kwa wale binadamu wa kwanza. (Luka 3:23-38; Mwanzo 5:1-32; 11:10-32) Wakiwa wazazi wetu wa kwanza, Adamu na Hawa walikuwa na uvutano wa halisi juu yetu. Na yale ambayo Biblia inatuambia juu yao yanatusaidia tufahamu hali zinazoathiri maisha zetu leo.
3. Ni maandalizi ya aina gani ambayo Mungu aliwafanyia wanadamu mwanzoni?
3 Biblia inafunua kwamba maandalizi yote ya Mungu kwa binadamu wa kwanza wawili yalikuwa mema sana. Walikuwa na kila kitu kinachotakiwa kwa maisha yenye furaha—makao yaliyo mfano wa bustani katika Edeni, namna nyingi za chakula, kazi yenye kuridhisha, taraja la kuona jamaa yao ikikua na kujaa dunia, na baraka ya Muumba wao. (Mwanzo 1:28, 29; 2:8, 9, 15) Ni nani ambaye angaliweza kutaka zaidi ya hayo?
4. (a) Wakati wa kuumbwa kwao, ni katika njia gani binadamu walikuwa tofauti na viumbe wengine wa kidunia? (b) Waliandaliwaje mwongozo uliohitajiwa?
4 Habari iliyoongozwa na roho ya Mungu katika Mwanzo inafunua kwamba binadamu walikuwa na cheo cha pekee duniani. Tofauti na wanyama, walikuwa na hali ya kuhisi maadili na walipewa uhuru wa hiari. Ndiyo sababu walipatiwa nguvu za kufikiri na kuamua. Ili kuwaongoza, Mungu alitia katika mwanamume na mwanamke uwezo wa dhamiri ili, wakiwa wanadamu wakamilifu, elekeo lao la kawaida lingekuwa kwenye mema. (Warumi 2:15) Zaidi ya yote haya, Mungu aliwaambia sababu gani walikuwa hai, jambo walilopaswa kufanya, na ni nani aliyekuwa ameandaa vitu vyote vilivyowazunguka. (Mwanzo 1:28-30) Basi, tunaelezaje ni kwa sababu gani hali mbaya sana ziko sasa?
5. (a) Ni takwa gani jepesi ambalo Mungu aliwekea binadamu wawili wa kwanza, na kwa sababu gani? (b) Kwa sababu gani mataraja yao ya wakati ujao yalihusika kwa kufaa?
5 Kumbukumbu la Kimaandiko linaonyesha kwamba kulitokea suala fulani—lile linalomhusu kila mmoja wa sisi leo. Lilitokana na hali zilizotukia muda usio mrefu baada ya binadamu wa kwanza wawili kuumbwa. Mungu aliwapa mwanamume na mwanamke nafasi ya kuonyesha uthamini wenye upendo kwa Muumba wao kwa kutii takwa fulani. Takwa hilo halikuwa jambo ambalo lingedokeza kwamba wao walikuwa na maelekeo yenye kushusha heshima yaliyopaswa kuzuiwa. Badala ya hivyo, lilihusu jambo fulani lililokuwa la kawaida na lenye kufaa—kuliwa kwa chakula. Kama Mungu alivyomwambia mwanamume huyo: “Unaweza kula mpaka ushibe kutokana na kila mti wa bustani. Lakini kwa habari ya mti wa maarifa ya mema na mabaya ni lazima usile kutokana nao, kwa maana siku utakayokula kutokana nao utakufa bila shaka.” (Mwanzo 2:16, 17, NW) Takwa hili halikuwanyima watu wale wawili wa kwanza cho chote kilicho cha lazima kwa uhai. Wangeweza kula kutokana na miti mingine yote katika bustani. Hata hivyo kwa wazi mataraja yao ya uzima kwa wakati ujao yalihusika, na kwa kufaa hivyo. Kwa sababu gani? Kwa sababu Yeye aliyetaka utii ndiye hasa Chanzo na Mwendelezaji wa uzima wa kibinadamu.
6. (a) Wazazi wetu wa kwanza wangaliishi milele kama wangalitenda kulingana na ukweli gani wa msingi kuhusu utawala? (b) Kwa sababu gani wangalipaswa kuhisi wakivutwa na moyo wamtii Mungu?
6 Halikuwa kusudi la Mungu binadamu wafe. Kifo hakikutajwa kwa Adamu na Hawa isipokuwa kwa kutokutii. Wazazi wetu wa kwanza walikuwa na taraja mbele yao la kuishi milele katika makao yao yenye amani, yaliyo mfano wa bustani. Ili walifikie jambo hilo, walitakwa wafanye nini? Walitakwa wakubali kwamba dunia ambayo juu yayo waliishi ni mali ya Yeye aliyeifanya, na kwamba, akiwa Muumba, Mungu ana mamlaka halali juu ya uumbaji wake. (Zaburi 24:1, 10) Bila shaka Yeye huyu, aliyekuwa amempa mwanadamu kila kitu alichohitaji, kutia na uhai wenyewe, alistahili utii kwa jambo lo lote ambalo aliwaomba. Hata hivyo, yeye hakutaka utii huo ulazimishwe. Bali, ulikuwa lazima utoke katika mioyo yenye nia, yenye kusukumwa na upendo. (1 Yohana 5:3) Lakini wazazi wetu wa kwanza wa kibinadamu walishindwa kuonyesha upendo huo. Hilo lilitokeaje?
Mwanzo wa Kuupinga Utawala wa Kimungu
7. (a) Kulingana na Biblia, ni wapi ulikoanzia upingaji wa utawala wa Mungu? (b) Kwa sababu gani ni jambo lenye akili kuamini kuna makao ya kiroho?
7 Biblia inaonyesha kwamba kuupinga utawala wa Mungu kulianza kwanza, si duniani, bali katika makao yasiyoonekana kwa macho ya kibinadamu. Je! kama watu wengi, sisi tutie shaka juu ya kuwako kwa makao hayo ati kwa sababu si yenye kuonekana kwetu? Nguvu ya uvutano, wala upepo haviwezi kuonwa. Hata hivyo matokeo yavyo ni mambo ya kikweli sana. Vivyo hivyo, matokeo ya makao ya kiroho yaweza kuonwa. Ijapokuwa “Mungu ni Roho,” kazi zake zote za uumbaji zinaweza kuonwa kutuzunguka sisi. Ikiwa twamwamini yeye, tuna wajibu wa kuamini kuna makao ya kiroho. (Yohana 4:24; Warumi 1:20) Lakini je! kuna mtu mwingine ye yote anayekaa katika makao hayo?
8. Malaika ni watu wa aina gani?
8 Kulingana na Biblia, mamilioni ya watu wa kiroho, malaika, waliumbwa kabla ya mwanadamu. (Ayubu 38:4, 7; Zaburi 103:20; Danieli 7:10) Wote hao waliumbwa wakamilifu, bila maelekeo maovu. Hata hivyo, kama vile kiumbe cha Mungu cha baadaye, mwanadamu, walipewa uhuru wa hiari. Basi wangeweza kuchagua mwendo wa uaminifu au wa ukosefu wa uaminifu kuelekea Mungu.
9, 10. (a) Inawezekanaje kiumbe mkamilifu wa kiroho kuhisi akiwa na elekeo la kufanya makosa? (b) Kwa hiyo, mmoja wa malaika aligeukaje akawa Shetani?
9 Lakini ulizo linaloulizwa na watu wengi ni: Ye yote kati yao angewezaje hata kuhisi akielekea kufanya makosa, hali wao ni viumbe wakamilifu? Basi, ni mara ngapi katika maisha zetu wenyewe hali zinapotukabili kukiwa na mawezekano mbalimbali—mengine mema, mengine mabaya? Kuwa na akili ya kuyafahamu mawezekano mabaya hakutufanyi sisi moja kwa moja tuwe wabaya, sivyo? Ulizo lenyewe ni: Tutakaza akili na moyo wetu juu ya mwendo gani? Ikiwa tungeendelea kufikiria mabaya, tungevutwa katika kusitawisha tamaa mbaya katika mioyo yetu. Tamaa hiyo ingetuongoza hatimaye tufanye vitendo vibaya. Mfululizo huu wenye kuharibu ulielezwa na mwandikaji wa Biblia Yakobo: “Kila mmoja hujaribiwa na tamaa yake mwenyewe huku akivutwa na kudanganywa. Halafu ile tamaa ikiisha kuchukua mimba huzaa dhambi, na ile dhambi ikiisha kukomaa huzaa mauti.”—Yakobo 1:14, 15.
10 Maandiko yanafunua kwamba jambo hilo lilitokea kwa mmoja wa wana wa Mungu wa kiroho. Alishawishwa na tamaa zake mwenyewe. Aliona mawezekano katika uumbaji wa kibinadamu wa Mungu. Je! wangeweza kumtii yeye kuliko kumtii Mungu? Kwa wazi alianza kutamani angaa ushiriki fulani katika ibada iliyo mali ya Mungu. (Luka 4:5-8) Akitenda kupatana na tamaa yake, akawa mpinzani wa Mungu. Kwa sababu hiyo yeye anatajwa katika Biblia kuwa Shetani, maana yake Mpinzani.—Ayubu 1:6.
11. Kuna msingi gani mzuri kuamini kwamba kweli Shetani yuko?
11 Katika karne hii ya 20 yenye kufuatia vitu vya kimwili, si watu wengi wanaoamini kwamba kuna mtu wa kiroho kama Shetani. Lakini, basi, je! kufikiri kwa watu wengi kumepata kuwa uongozi hakika wa kuelekeza kwenye ukweli? Miongoni mwa wale wanaofanya uchunguzi wa magonjwa, hapo kwanza si wengi walioamini kwamba kweli kuna vijidudu visivyoonekana vyenye kuleta ugonjwa. Lakini sasa matokeo ya vijidudu hivyo yanajulikana sana. Basi, ni hakika kwamba kutofuatwa kwa jambo na watu wengi hakumaanishi kwamba linaweza kupuuzwa tu. Yesu Kristo, mwenyewe alikuwa ametoka katika makao ya kiroho na kwa hiyo angeweza kusema kwa uhakika juu ya maisha huko. Yeye alimtambulisha Shetani kwa wazi kuwa mtu wa kiroho mwovu. (Yohana 8:23; Luka 13:16; 22:31) Ni kwa kuthamini tu kuwako kwa hasimu huyo wa kiroho inapowezekana kufahamu jinsi hali hizi mbaya sana zilivyoanzishwa katika dunia hii.
12. Shetani aliwasilianaje na mwanamke Hawa, na kwa sababu gani katika njia hiyo?
12 Katika Mwanzo sura ya 3, maandishi yaliyoongozwa na roho ya Mungu yanasimulia namna Shetani alivyoanza kutosheleza tamaa yake mbaya. Katika bustani ya Edeni, alimfikia mwanamke Hawa, kwa njia iliyoficha utambulishi wake wa kweli. Yeye alitumia mnyama ambaye kwa kawaida alionekana kwa binadamu wawili—nyoka. Kwa wazi akitumia ustadi wa kufanya ionekane kama kwamba sauti na maneno yake vilitokana na kiumbe huyo. Uangalifu wa asili wa kiumbe huyo unapatana sana na wazo alilotaka kufanya Shetani.—Mwanzo 3:1; Ufunuo 12:9.
13. Shetani alimwambia Hawa nini, na akiwa na kusudi gani la wazi?
13 Badala ya kumwambia mwanamke moja kwa moja amtumaini yeye kama mtawala wake, kwanza Shetani alitafuta kutia shaka katika akili zake, akiuliza hivi: “Ati! hivi ndivyo alivyosema Mungu, Msile matunda ya miti yote ya bustani?” Kwa kweli, yeye alikuwa akisema hivi: ‘Ni sikitiko kwamba Mungu amesema msile kutokana na miti yote iliyo katika bustani.’ Kwa kusema hivyo yeye alidokeza kwamba labda Mungu alikuwa akiwanyima kitu fulani chema. Hawa alijibu kwa kutaja katazo la Mungu, lililohusu mti mmoja tu, vilevile akasema kwamba adhabu ya kutokutii ingekuwa kifo. Ndipo Shetani alipojaribu kupunguza heshima ya Hawa kwa sheria ya Mungu, akisema: “Hakika hamtakufa, kwa maana Mungu anajua ya kwamba siku mtakayokula matunda ya mti huo, mtafumbuliwa macho, nanyi mtakuwa kama Mungu, mkijua mema na mabaya.” (Mwanzo 3:1-5) Ukielekewa na hali kama hiyo, wewe ungalifanya nini?
14. (a) Kwa sababu gani Hawa alidanganywa na Shetani? (b) Adamu alifanya nini?
14 Hawa alijiacha mwenyewe avutwe na tamaa ya ubinafsi. Akala kile ambacho Mungu alikuwa amekataza. Halafu, kwa kusihi kwake, Adamu mume wake akala pia. Alichagua kujiunga pamoja na mke wake badala ya kuchagua kumtii Muumba wake. (Mwanzo 3:6; 1 Timotheo 2:14) Matokeo yalikuwa nini?
15. Kwa hiyo, basi, ni nini iliyo sababu ya uvunjaji sheria na jeuri, na vilevile magonjwa na kifo, ambavyo vimekuwapo muda mwingi wa maisha ya kibinadamu?
15 Jamaa nzima ya kibinadamu iliingizwa katika dhambi na kutokamilika. Sasa Adamu na Hawa hawakuweza kuwapelekea watoto wao kukamilika walikokuwa nako hapo kwanza. Kama ilivyo katika kufanyiza nakala za jambo fulani kutokana na mfano ulio na makosa, watoto wote wa Adamu walizaliwa katika dhambi, wakiwa na elekeo la ubinafsi uliorithiwa. (Mwanzo 8:21) Elekeo hilo, lililoachwa bila kuzuiwa, limeongoza kwenye mabaya ambayo yameondoa amani na usalama kwa wanadamu. Ni urithi huo wa dhambi ambao umetokeza pia magonjwa na kifo.—Warumi 5:12.
Masuala Yaliyotokezwa
16, 17. (a) Ili tufahamu ni kwa sababu gani Mungu ameivumilia hali hii kwa muda mrefu sana, ni jambo gani ambalo ni lazima tuthamini? (b) Hasa ni suala gani lililotokezwa?
16 Kwa msaada wa mambo hayo hakika, akili zetu zalirudia lile ulizo juu ya sababu gani Mungu amechukuliana na hali hiyo, akiiacha isitawi kwa kadiri hiyo. Ni kwa sababu ya suala zito lililotokezwa na matokeo yalo juu ya ulimwengu wote. Hilo liko hivyo namna gani?
17 Kwa ubishi wake kwamba sheria ya Mungu waliyopewa Adamu na Hawa haikuwa nzuri kwao na kwa kupinga yale ambayo Mungu alisema yangekuwa matokeo ya kutokutii, Shetani alikuwa akiutilia shaka utawala wa Mungu. La, yeye hakuutilia shaka uhakika wa kwamba Mungu ni mtawala. Badala yake, suala ambalo Shetani alitokeza lilitegemea hasa uhalali wa utawala wa Yehova, enzi kuu Yake, na uadilifu wa njia Zake. Kwa udanganyifu, Shetani alibisha kwamba wanadamu wangeendelea vizuri zaidi kwa kujitegemea, wakijifanyia maamuzi yao wenyewe kuliko kutii uongozi wa Mungu. (Mwanzo 3:4, 5) Hata hivyo, ni hakika kwamba, kwa kufanya hivyo wangekuwa wakiufuata uongozi wa hasimu ya Mungu.
18. (a) Ni suala gani jingine lililohusika, na hili linaonyeshwa wapi katika Biblia? (b) Suala hilo linatuhusuje sisi?
18 Suala jingine lilihusika. Kwa kuwa viumbe hao wa Mungu waligeuka wakampinga mle Edeni, viumbe wengine wangefanya nini? Baadaye, katika siku za mwanamume Ayubu, Shetani alishtaki waziwazi kwamba wale wanaomtumikia Yehova wanafanya hivyo, si kwa sababu ya upendo wo wote kwa Mungu na utawala wake, bali kwa ubinafsi, kwa sababu Mungu anawaandalia kila kitu. Shetani alidokeza kwamba hakuna mtu ambaye angeiunga mkono kishikamanifu enzi kuu ya Yehova akitiwa chini ya mkazo. Kwa hiyo ushikamanifu na ukamilifu wa kila kiumbe mwenye akili mbinguni na duniani ulitiliwa shaka. Kwa njia hiyo lile suala linakuhusu wewe.—Ayubu 1:8-12; 2:4, 5.
19, 20. Kwa kutokuwaharibu waasi hao mara hiyo, ni nafasi gani ambayo Yehova aliwapa viumbe wake, wa kiroho na wa kibinadamu?
19 Akielekeana na shtaka hilo, Yehova angefanya nini? Yeye angaliweza kwa urahisi kuwaangamiza Shetani na Adamu na Hawa. Hiyo ingalionyesha nguvu za enzi kuu ya Yehova. Lakini je! ingalijibu maulizo ambayo sasa yalitokezwa katika akili za viumbe wote wa Mungu waliokuwa wametazama mambo hayo yenye kutukia? Amani na usalama wa milele wa ulimwengu wote mzima ulitaka maulizo haya yajibiwe kabisa, mara moja na kwa nyakati zote. Zaidi ya hilo, ukamilifu na ushikamanifu wa viumbe wote wa Mungu wenye akili ulikuwa umetiliwa shaka. Ikiwa walimpenda, wangetaka wajibu wenyewe shtaka hilo la uwongo. Yehova aliwapa nafasi wafanye hivyo hasa. Pia, kwa kuwaruhusu Adamu na Hawa wazae watoto (ingawa si wakamilifu), Mungu angezuia kumalizika kabisa kwa jamaa ya kibinadamu—jamaa ambayo imetia na sisi sote tunaoishi leo. Hii ingewapa wazao hawa nafasi ya kujichagulia wenyewe kama wangeutii utawala wa kimungu. Uchaguzi huo ndio unaokukabili wewe sasa!
20 Kwa hiyo, badala ya kuifikiliza adhabu ya kifo mara hiyo, Yehova aliwaruhusu hao wenye kuasi waendelee kwa muda. Adamu na Hawa walifukuzwa kutoka Edeni, wafe kabla ya kumalizika miaka elfu. (Mwanzo 5:5; linganisha Mwanzo 2:17 na 2 Petro 3:8.) Kwa wakati wake Shetani alipaswa aangamizwe pia, kana kwamba alikuwa nyoka aliyekuwa amepondwa kichwa chake.—Mwanzo 3:15; Warumi 16:20.
Yale Ambayo Kupita kwa Wakati Kumefunua
21, 22. (a) Kwa habari ya utawala, Shetani na wanadamu wamekuwa wakifanya nini wakati wa muda ulioruhusiwa na Mungu? (b) Historia ya kibinadamu inaonyesha nini kwa habari ya serikali inayojaribu kumpuuza Mungu?
21 Ni mambo gani ambayo yametokana na lile shtaka juu ya uhalali wa utawala wa Mungu? Je! mwanadamu amejinufaisha kwa kujaribu kuongoza mambo yake mwenyewe? Mwanadamu ameruhusiwa kujaribu kila namna ya serikali inayowazika. Yehova hakukomesha jitihada za wanadamu mapema mno kabla ya matokeo kamili hayajaweza kuonwa. Hata karne moja iliyopita ingalikuwa ni mapema mno. Wakati huo mwanadamu alikuwa ndipo ameanza tu kuingia katika “kipindi cha elimu ya ufundi” na alikuwa ameanza tu kujidai sana juu ya mambo ambayo angetimiza.
22 Lakini je! karne nyingine inahitajiwa ili kuona yatakavyokuwa matokeo ya mwendo wa mwanadamu wa kutokumtegemea Mungu? Hata watu mashuhuri katika serikali na sayansi wanakubali kwamba dunia inaelekewa na hatari kubwa ya angamizi. Bila shaka Mungu hahitaji kuruhusu liweko angamizi kamili ili aonyeshe kushindwa kabisa kwa utawala wa mwanadamu wa kujitegemea. Kwa kuwa ushuhuda wa miaka elfu sita unashuhudia linalotukia wakati serikali inapompuuza Mungu, haiwezi kusemwa hata kidogo kwamba hakukuwa na wakati wa kutosha wa kutimiliza utawala wa kibinadamu. Mambo ya hakika yanaonyesha kwamba hakuna serikali isiyomtegemea Mungu inayoweza kuwaletea wanadamu wote amani na usalama wa kweli.
23. Ni nini litakalotukia hivi karibuni, litakalotayarisha njia ya dunia kutawalwa kwa uadilifu na Mwana wa Mungu?
23 Kama tutakavyoona baadaye, Yehova Mungu alionyesha zamani na kwa wakati barabara kizazi fulani halisi ambacho kingeona akisafisha ulimwengu wote mzima uondolewe uasi wote dhidi ya utawala wake wa kimungu. Si wanadamu waovu peke yao watakaoangamizwa bali Shetani na mashetani wake pia watatiwa kizuizini kama kwamba katika shimo lisilo na mwisho, wasiweze kuwa na uvutano juu ya mambo ya wanadamu au ya malaika. Hiyo itaufungulia njia utawala wa uadilifu wa dunia kupitia serikali ya Mwana wa Mungu. Wakati wa kipindi cha miaka elfu, serikali hiyo itaondoa madhara yote yaliyoletwa na maelfu ya miaka ya utawala wa ubinafsi wa mwanadamu. Itairudisha dunia hii kwenye uzuri wa kiparadiso na kuwarudisha wanadamu watiifu kwenye ukamilifu uliofurahiwa katika Edeni.—Ufunuo 20:1, 2; 21:1-5; 1 Wakorintho 15:25, 26.
24. (a) Kwa sababu gani Shetani na mashetani wake watafunguliwa mwishoni mwa miaka elfu moja? (b) Matokeo yatakuwa nini?
24 Biblia inaeleza kwamba mwishoni mwa utawala huo wa miaka elfu Shetani na mashetani wake watafunguliwa watoke katika kizuizi chao kwa muda mfupi. Kwa sababu gani? Ili kwamba wote wale watakaokuwa wakiishi wakati huo wawe na nafasi ya kujionyesha kuwa washikamanifu kwa utawala wenye enzi kuu wa Yehova Mungu. Wakati huo idadi ya watu wasiohesabika watakuwa wametokea katika ufufuo. Kwa wengi wao hiyo itakuwa ndiyo nafasi yao ya kwanza kuonyesha upendo wao kwa Mungu chini ya jaribu. Suala litakuwa kama mojapo yale yaliyotokezwa katika Edeni—kama wataitegemeza enzi kuu ya Yehova kwa utii wenye uaminifu. Yehova anawatamani wawe raia zake wale tu ambao upendo wao ndio unaowasukuma waonyeshe ushikamanifu huo. Wale wanaotaka kuwa upande wa hasimu ya Mungu na mashetani wake katika majaribio yo yote ya bure ambayo hawa watafanya kuichafua tena amani ya ulimwengu wote mzima wa Mungu watakuwa huru kufanya uchaguzi huo. Lakini kwa kuikataa serikali ya Mungu kwa dharau hivyo, watastahili uharibifu. Na wakati huu utakuja upesi, kama kwamba kwa moto kutoka mbinguni. Waasi wote, wa kiroho na wa kibinadamu, ndipo watakapokuwa wameangamia wasiwepo kwa nyakati zote.—Ufunuo 20:7-10.
25, 26. Jinsi Yehova ameshughulikia mambo imenufaishaje kweli kweli kila mmoja wetu?
25 Kweli, kwa maelfu ya miaka wanadamu wamepata taabu nyingi. Lakini hii ilikuwa kwa sababu ya uchaguzi wa wazazi wetu wa kwanza, si wa Mungu. Mungu amevumilia suto na kwa wakati huu wote amechukuliana na mambo ambayo ni yenye kuchukiza sana kwake. Lakini Mungu, ambaye kwake ‘miaka elfu ni kama siku moja,’ hutangulia kuona mambo kwa mbali, na hiyo inaleta faida kwa viumbe wake. Kama anavyoandika mtume aliyeongozwa na roho ya Mungu: “[Yehova, NW] hakawii kuitimiza ahadi yake, kama wengine wanavyokudhani kukawia, bali huvumilia kwenu, maana hapendi mtu ye yote apotee, bali wote wafikilie toba.” (2 Petro 3:8, 9) Kama haingalikuwa ni kwa sababu ya subira na ustahilimivu wa Mungu, hakuna ye yote wa sisi angaliipata nafasi ya kupata wokovu.
26 Hata hivyo, haitupasi tukate shauri kwamba wakati wa miaka elfu sita iliyopita Mungu amekuwa hafanyi lo lote. Hapana, si kwamba yeye amekuwa akivumilia uovu tu, huku akingojea nafasi nzuri ijitokeze yenyewe tu kabla ya yeye mwenyewe kuchukua hatua. Kama tutakavyoona, mambo ya hakika yanaonyesha kinyume cha hilo.
[Picha katika ukurasa wa 51]
Shetani alibisha kwamba chini ya jaribu wanadamu wote wangevunja ukamilifu na kutenda bila kumtegemea Mungu