Abrahamu​—Kielelezo kwa Wote Wanaotafuta Urafiki wa Mungu

“Yeye hakukuza udhaifu katika imani, . . . akisadiki kikamili kwamba jambo ambalo [Mungu] alikuwa ameahidi alikuwa na uwezo wa kulifanya pia.”​—WARUMI 4:19-21, NW.

 1. Kwa nini Shetani amejaribu kupuuza ustahili wa maandishi yanayohusu Abrahamu?

NENO la kimungu lililowekwa wazi katika Maandiko “li hai, tena lina nguvu.” (Waebrania 4:12) Hivyo, usimulizi wa shughuli za Yehova pamoja na Abrahamu ni chanzo cha kuwatia moyo wote wanaotafuta urafiki wa Mungu, ingawa uliandikwa zaidi ya miaka 3,500 iliyopita. (Warumi 15:4) Yule adui mkuu, Shetani, anajua jambo hili na ametumia viongozi wa kidini kujaribu kupuuza ustahili wa maandishi hayo ili yaonwe kama hadithi tu.​—2 Wakorintho 11:14, 15.

 2. Wanafunzi wa Yesu walikuwa na maoni gani juu ya Abrahamu?

² Historia ya Abrahamu ni ya ukweli na ‘ina manufaa kwa fundisho la Kikristo,’ kwa kuwa ni sehemu ya ‘andiko lote lililovuviwa na Mungu.’ (2 Timotheo 3:16; Yohana 17:17, NW) Kwa uhakika wanafunzi wa mapema wa Yesu walithamini jambo hili, kwa maana Abrahamu anatajwa mara 74 katika Maandiko ya Kigiriki ya Kikristo. Katika ile sura ya 11 ya Waebrania iliyo ya kuvuvia imani nguvu, nafasi nyingi zaidi imetumiwa kuhusu yeye kuliko mtumishi mwingine yeyote wa Mungu wa nyakati zilizotangulia Ukristo.

 3. Abrahamu alipewaje heshima kubwa?

³ Abrahamu hakuwa “mnabii” wa kawaida tu, kwa maana Yehova alimtumia kuigiza “tamasha ya ufananisho” wenye maana kubwa, ambamo huyo mzee wa ukoo alipewa heshima kubwa kwa kuigiza akiwa kifananishi cha kiunabii cha Mungu mwenyewe. (Mwanzo 20:7; Wagalatia 4:21-26) Hivyo, Yesu alinena juu ya “mahali pa kifua cha Abrahamu” alipokuwa akitoa kielezi juu ya hali ya kuwa na upendeleo wa Mungu.​—Luka 16:22, NW.

Kitendo Chake cha Kwanza cha Imani

 4. Kulingana na Biblia, shughuli za Mungu pamoja na Abramu zilianzaje?

⁴ Abramu, kama alivyoitwa hapo awali, alilelewa katika “Uru la Wakaldayo.” Alipokuwa akikaa huko, Yehova Mungu alimtokea na kusema: “Shika njia utoke katika nchi yako na kutoka kwa watu wa ukoo wako na kutoka kwenye nyumba ya baba yako uende kwenye nchi ambayo mimi nitakuonyesha wewe; na mimi nitafanyiza taifa kubwa kutoka katika wewe na mimi nitakubariki wewe na kufanya jina lako liwe kubwa; na kuthibitisha wewe mwenyewe kuwa baraka. Na mimi nitabariki wale wanaokubariki wewe, na yeye anayeitisha mabaya yawe juu yako nitamlaani, na jamaa zote za ardhi zitajibariki zenyewe kwa njia ya wewe.”​—Mwanzo 12:1-3; 15:7; Matendo 7:2, 3, NW.

 5. (a) Ni lazima ahadi ya Mungu iwe iliugusaje moyo wa Abramu? (b) Abramu aliitikiaje ahadi hiyo?

⁵ Ni wito wa ushindani kama nini! Kwa Abramu, kutii wito huo kulimaanisha kuacha mazingira mazuri sana na watu wa ukoo wake akaishi mbali katika bara la kigeni. Lakini moyo wa Abramu uliguswa kwa kina kirefu na ahadi ya Mungu yenye upendo. Akiwa mzee asiye na mtoto na mke tasa, ilionekana kwamba muda si muda jina lake lingesahauliwa. Ahadi ya Mungu ilihakikisha kinyume cha hivyo: “Taifa kubwa” lingetokana naye. Zaidi ya hilo, ahadi ya Mungu ilihusisha tangazo zuri ajabu la habari njema kwa aina ya wanadamu wote, ikielekeza mbele kwenye wakati ambapo mataifa yote yangebarikiwa. (Wagalatia 3:8) Abramu alijizoeza imani katika ahadi ya Yehova na kuacha kitovu cha utamaduni wenye maendeleo makubwa. Biblia yatuambia, “akatoka asijue aendako.”​—Waebrania 11:8.

 6. (a) Kwa nini Mwanzo 11:31 unampa Tera sifa ya kufanya mhamo ule? (Matendo 7:2-4) (b) Ni kwa njia gani mbalimbali Sara alikuwa kielelezo kwa wanawake Wakristo leo?

⁶ Imani ya Abramu iliathiri wengine. Watu wa nyumba yake, na pia Tera, baba yake, na Loti, mpwa wake, waliondoka pamoja naye. Hata hivyo, kwa sababu Tera alikuwa ndiye kichwa cha jamaa hiyo ya kiukoo, yeye ndiye anayepewa sifa ya mhamo huo. (Mwanzo 11:31) Inastahili kuangalia kwamba Abramu aliungwa mkono na mke wake, Sarai, aliyeitwa Sara baadaye. Mke huyo alichukuliana na kiwango cha maisha ya chini zaidi muda wote uliobaki wa maisha yake. (Mwanzo 13:18; 24:67) Basi inaeleweka ni kwa nini “Abrahamu aliingia ndani kumlilia Sara na kulia machozi juu yake” alipokufa. (Mwanzo 23:1, 2, NW) Kwa sababu ya imani imara ya Sara na ujitiisho wake wa moyo mzima akiwa mke, yeye amewekwa wazi kuwa kielelezo cha sura ya kiroho iliyo nzuri kikweli kwa wanawake Wakristo.​—Waebrania 11:11, 13-15; 1 Petro 3:1-6.

 7. Ni kwa njia gani mbalimbali Wakristo leo wanaonyesha imani kama ile ya Abrahamu na Sara?

⁷ Wakristo wengi leo wameonyesha imani kama hiyo kwa kujitolea kueneza ujumbe wa Mungu mahali mbalimbali ambako kuna uhitaji mkubwa wa wahubiri wa Ufalme na wa kujenga na kuendesha vifaa vipya vya kuchapa na kusafirisha nje fasihi za Biblia. (Mathayo 24:14) Wakristo hawa wameshiriki katika kuitii amri ya kwamba, “Nendeni mkafanye wanafunzi kutoka kwa watu wa mataifa yote.” Kwa kuhama kwenda nchi wasiyoijua, mara nyingi wamelazimika kujirekebisha wapatane na kiwango tofauti cha maisha. Wengine wamefanya dhabihu kubwa za vitu vya kimwili ili wafanye wanafunzi katika eneo lao wenyewe.​—Mathayo 28:19, 20, NW.

Vitendo Vingine vya Imani

 8. Ni nini kilichoongoza kwenye mtokeo wa pili wa Yehova kwa Abramu?

⁸ Abramu alitua katika jiji la Harani mpaka kifo cha baba yake, Tera. (Mwanzo 11:31, 32) Ndipo yeye na watu wa nyumba yake walipovuka Mto Eufrati na kuelekea kusini. Mwishowe walifika “mahali ilipo Shekemu” katikati ya bara la Kanaani. Ni lazima mahali hapo pawe paliwapendeza sana macho! Shekemu imo katika bonde lenye rutuba katikati ya safu mbili za milima-milima ambayo inafikia kilele kwenye Mlima Ebali na Mlima Gerizimu. Imeelezwa kuwa ndiyo “paradiso ya lile Bara Takatifu.” Kwa kufaa, hapa Yehova alimtokea tena Abramu na kusema: “Mbegu yako ndiyo nitaipa bara hili.”​—Mwanzo 12:5-7, NW.

 9. (a) Ni kwa njia gani ya kutokeza Abramu aliendelea kuonyesha imani? (b) Tunajifunza somo gani kutokana na jambo hili?

⁹ Abramu aliitikia kwa kitendo kingine cha imani. Kama vile usimulizi unavyosema: “Huko akamjengea madhabahu Bwana [Yehova, NW].” (Mwanzo 12:7) Inaelekea kwamba kwa kufanya hivi alitoa pia dhabihu ya mnyama, kwa maana neno la Kiebrania la “madhabahu” linamaanisha “mahali pa dhabihu.” Baadaye, Abramu alirudia vitendo hivi vya imani katika sehemu nyingine za bara hilo. Kwa kuongezea hilo, yeye ‘aliitia jina la Yehova.’ (Mwanzo 12:8; 13:18; 21:33, NW) Kifungu cha Kiebrania kinachosema ‘kuitia jina’ kinamaanisha pia ‘kujulisha wazi (kuhubiri) jina hilo.’ Watu wa nyumba ya Abramu na pia Wakanaani ni lazima wawe walimsikia akilijulisha wazi jina la Mungu wake, Yehova, kwa ujasiri. (Mwanzo 14:22-24) Vilevile, wote wanaotafuta urafiki wa Mungu leo ni lazima waliitie jina lake kwa imani. Hii ingehusisha ndani kushiriki kuhubiri peupe, ‘sikuzote wakimtolea Mungu dhabihu ya sifa, yaani, tunda la midomo linalofanyiza tangazo la peupe kwa jina lake.’​—Waebrania 13:15; Warumi 10:10, NW.

10. (a) Abramu alijizoeza imani kwa njia gani nyinginezo? (b) Ni kielelezo gani alichowekea vichwa vya jamaa za Kikristo? (1 Timotheo 3:12)

¹⁰ Abramu alijizoeza imani katika Yehova kwa njia nyingine nyingi. Yeye alitoa dhabihu ili kuwe na amani lakini hata hivyo akapambana na migogoro mikubwa kwa ushujaa. (Mwanzo 13:7-11; 14:1-16) Angawa tajiri, hakuwa mfuatiaji vitu vya kimwili. (Mwanzo 14:21-24) Bali, alikuwa mkaribishaji na aliiunga mkono ibada ya Yehova kwa ukarimu. (Mwanzo 14:18-20; 18:1-8) La maana zaidi ni kwamba, alikuwa kichwa cha jamaa aliye kielelezo chema na alifuata agizo la Yehova kwa kuamuru wanaye na watu wa nyumba yake wamfuate hivi kwamba wakaendelea kushika “njia ya Yehova kufanya uadilifu.” (Mwanzo 18:19, NW) Katika jambo hili, watu wa nyumba ya Abramu walifuata mwendo uliotofautiana wazi sana na ule wa wapotosha-ngono Wakanaani katika Sodoma na Gomora jirani. Kwa uhakika Abramu hangekuwa amevumilia kuona dhambi nzito hizo zikifanywa kati ya watu wa nyumba yake. Kwamba aliwasimamia watu wa nyumba yake kwa njia nzuri inaonekana kwa jinsi washiriki wa nyumba hiyo walivyomwiga yeye kwa kuitia jina la Yehova katika imani.​—Mwanzo 16:5, 13; 24:26, 27; 25:21.

“Yeye Hakukuza Udhaifu Katika Imani”

11. Abramu aliwezaje kuvumilia akiwa “mkaaji wa kigeni . . . katika bara la kigeni” kwa miaka mia moja?

¹¹ Imani imara ya Abramu ilimsaidia kuvumilia magumu akiishi miaka mia moja miongoni mwa watu waliodai kwamba bara lile lilikuwa lao wenyewe. (Mwanzo 12:4; 23:4; 25:7) Biblia inasema: “Yeye alikaa akiwa mkaaji wa kigeni katika bara la ahadi kama kwamba yumo katika bara la kigeni, na akafanya maskani katika mahema pamoja na Isaka na Yakobo, walio warithi pamoja naye wa ahadi ile ile moja. Kwa maana yeye alikuwa akingojea jiji [Ufalme wa Mungu] lenye misingi halisi, ambaye mjenzi na mfanyizi wa jiji hilo ni Mungu. Na bado, kama [yeye] angaliendelea kweli kukumbuka mahali pale ambapo [yeye] alipokuwa amepatoka, [yeye] angalipata fursa ya kurudi.”​—Waebrania 11:9, 10, 15; linganisha Waebrania 12:22, 28, NW.

12. Abramu alipata fursa gani ya mapema kurudi Uru, naye alishughulikiaje mgogoro huo mkubwa?

¹² Abramu hakuwa amekaa Kanaani kwa muda mrefu wakati njaa kali ilipompa “fursa ya kurudi.” Jiji la Uru halikutegemea mvua ya moja kwa moja, kwa maana lilipata maji tele ya Mto Eufrati. Hata hivyo, badala ya kurudi huko, Abramu alitia imani katika Yehova na kusonga mbele upande ulio kinyume​—Misri. Hiyo ilikuwa hatari. Uhai wa mgeni huyo, Abramu, ulikuwa hatarini katika bara hilo asilolijua, kwa maana mke wake alikuwa na sura nzuri. Hata hivyo, yeye alichukua hatua za tahadhari kwa kumwomba Sarai afiche kwamba wana uhusiano wa ndoa. Yehova alibariki Abramu kwa imani yake, na muda si muda akaweza kurudia Bara la Ahadi akiwa na utajiri mkubwa kuliko wowote ule aliopata kuwa nao.​—Mwanzo 12:10–13:2; 20:12.

13. Utasa wa Sarai na kuficha kwa Abramu uhusiano wake wa ndoa pamoja naye vilikuwa picha ya nini?

¹³ Hii pia ikawa sehemu ya tamasha ya kiunabii ambayo Abramu aliigiza bila kujua ili iwe ya kutuagiza sisi. Sarai, aliyekuwa angali tasa, alikuwa picha ya tengenezo la Yehova la kimbingu lililo kama mke la malaika washikamanifu. Ilikuwa lazima mke huyu wa kitamathali mwenye sura nzuri angoje zaidi ya miaka 4,000 kabla ya kuweza kufanya uandalizi wa ile mbegu ya kweli ya Abrahamu Mkubwa Zaidi, Yehova Mungu. Nyakati fulani kunyanyaswa kubaya sana kwa watumishi waaminifu wa Mungu katika miaka yote hiyo ya kungojea kulifanya ionekane ni kama Yehova alikuwa ameficha uhusiano wake wa kimume pamoja na mke huyo.​—Mwanzo 3:15; Isaya 54:1-8; Wagalatia 3:16, 27, 29; 4:26.

14. (a) Mwishowe Sarai alitendaje kuhusu utasa wake? (b) Ni nini lililotukia katika mwaka wa 99 wa Abramu, na kwa nini?

¹⁴ Baada ya kuvumilia akiwa mkaaji wa kigeni kwa miaka kumi, bado Abramu hakupata mwana wa kuwa mrithi. Kwa kutatizwa sana na hali hiyo, Sarai alimwomba-omba azae watoto kutokana na mwanamke mtumwa wa Sarai, Hajiri. Abramu alikubali kisha Ishmaeli akazaliwa. (Mwanzo 12:4; 16:1-4, 16) Lakini ile mbegu ya baraka ingekuja kupitia mtu mwingine. Katika mwaka wa 99 wa Abramu, jina lake lilibadilishwa likawa Abrahamu kwa sababu, kama vile Mungu alivyosema, “mimi nitakufanya wewe kuwa baba ya umati wa mataifa.” Jina la Sarai lilibadilishwa likawa Sara kwa ahadi ya kwamba angezaa mwana.​—Mwanzo 17:1, 5, 15-19, NW.

15. (a) Kwa nini Abrahamu alicheka wazo la Sara kumzalia mwana? (b) Abrahamu alitoa uthibitisho gani zaidi wa imani yake imara?

¹⁵ Abrahamu (na baadaye Sara) alicheka wazo hilo kwa sababu nguvu zake za uzazi na za Sara pia zilikuwa zimekoma. (Mwanzo 17:17; 18:9-15) Lakini hiki hakikuwa kicheko cha kukosa imani. Kama vile Biblia inavyoeleza: “Yeye hakukuza udhaifu katika imani . . . Lakini kwa sababu ya ahadi ya Mungu . . . akawa mwenye nguvu nyingi kwa imani yake, akimpa Mungu utukufu na akisadiki kikamili kwamba jambo ambalo yeye alikuwa ameahidi alikuwa na uwezo wa kulifanya pia.” (Warumi 4:18-21, NW) Siku iyo hiyo, Abrahamu alitoa uthibitisho wa imani yake imara. Ikiwa ni ishara ya agano la Mungu pamoja naye, Yehova alimwambia Abrahamu atahiriwe pamoja na kila mwanamume katika nyumba yake kubwa. (Mwanzo 15:18-21; 17:7-12, 26) Yeye aliitikiaje amri hii yenye maumivu mengi? “Akaenda na kutahiri mnofu wa govi zao siku hii hii, sawa na vile Mungu alivyokuwa amenena naye.”​—Mwanzo 17:22-27, NW.

16. (a) Ni jambo gani lililotukia siku ile ya Isaka kuachishwa kunyonya? (b) Kuondoshwa kwa Hagari na Ishmaeli kulikuwa picha ya nini?

¹⁶ Isaka, ambaye jina lake linamaanisha “Kicheko,” alizaliwa kwa Sara mwaka uliofuata. (Mwanzo 21:5, 6) Muda si muda ukaja wakati wake wa kuachishwa kunyonya. Wakati wa karamu, Ishmaeli mwenye wivu alinyanyasa Isaka. Kuona hivi, Sara akamhimiza Abrahamu kwa dhati amwondoshe mwanamke huyo mtumwa, Hagari, na mwana wake watoke kati ya watu wa nyumba yake. Yehova Mungu alitegemeza ombi la Sara. Ingawa alihisi maumivu, Abrahamu alifanya haraka kutii. (Mwanzo 21:8-14) Kulingana na Wagalatia 4:21-30, hii ilikuwa picha ya jinsi Abrahamu Mkubwa Zaidi angemaliza uhusiano wake pamoja na taifa la Israeli wa asili. Wao walizaliwa wakiwa watumwa wa dhambi, kama wengine wote wa aina ya binadamu. (Warumi 5:12) Lakini pia walimkataa Yesu Kristo, yule Mbegu wa kweli wa Abrahamu, aliyekuja kuwaweka huru. (Yohana 8:34-36; Wagalatia 3:16) Na kama vile Ishmaeli alivyonyanyasa Isaka, wao walinyanyasa kundi la Kikristo lililofanyizwa karibuni la Israeli wa kiroho, waliokuwa sehemu ya pili ya mbegu ya Abrahamu.​—Mathayo 21:43; Luka 3:7-9; Warumi 2:28, 29; 8:14-17; 9:6-9; Wagalatia 3:29.

Mtihani Wake Ulio Mkubwa Zaidi wa Imani

17. Halafu imani ya Abrahamu ilitahiniwaje vikali?

¹⁷ Haielekei kwamba kuna baba mwingine yeyote wa kibinadamu aliyekuwa na upendo mwingi kwa mwana kuliko ule ambao Abrahamu mzee alikuwa nao kwa Isaka. Basi, ni lazima awe alipata mshtuko mbaya sana alipopokea amri hii: “Mchukue, tafadhali, mwana wako, mwana wako wa pekee ambaye wewe unapenda sana hivyo, Isaka, ufunge safari kwenda bara la Moria ukamtoe huko kama toleo la kuteketezwa juu ya mmoja ya milima ambao mimi nitakuonyesha wewe.”​—Mwanzo 22:1, 2, NW.

18. Abrahamu aliitikiaje amri ya Yehova kumdhabihu Isaka?

¹⁸ Ni lazima iwe ilikuwa vigumu Abrahamu kuelewa sababu ya amri hii yenye kumtia kihoro. Hata hivyo alionyesha utii wake wa haraka kama kawaida. (Mwanzo 22:3) Ilimchukua siku tatu za maumivu makali ndipo akafikia mlima uliochaguliwa. Huko akajenga madhabahu na kuweka kuni juu. Kufikia wakati huu, ni lazima awe alikuwa amemweleza Isaka juu ya amri ya Mungu, na Isaka angaliweza kukimbia kwa urahisi. Badala ya hivyo, Isaka aliruhusu baba yake mzee amfunge mikono na miguu na kumweka juu ya madhabahu. (Mwanzo 22:4-9) Ni jambo gani tunaloweza kulihesabia sifa kwa utii huo?

19. (a) Tunaweza kuhesabia jambo gani sifa ya kujitiisha kishujaa kwa Isaka? (b) Ni jinsi gani uhusiano kati ya Abrahamu na Isaka ulivyo somo kwa jamaa za Kikristo leo?

¹⁹ Abrahamu alikuwa ametekeleza kwa uaminifu madaraka yake kuhusiana na Isaka, kama yalivyopangiliwa kwenye Mwanzo 18:19. Bila shaka alikuwa amemkazia Isaka kusudi la Yehova kuwafufua wafu. (Mwanzo 12:3; Waebrania 11:17-19) Kwa upande wake, Isaka, alikuwa ndiye kipenzi cha upendo wa kina kirefu wa Abrahamu na angalitaka kufurahisha baba yake katika kila jambo, hasa wakati kufanya penzi la Mungu kulipohusika. Hili ni somo zuri kama nini kwa jamaa za Kikristo leo!​—Waefeso 6:1, 4.

20. Abrahamu alitiije, na thawabu ikawa nini?

²⁰ Ndipo ukafika upeo wa mtihani wenyewe. Abrahamu akakishika kisu cha machinjo. Lakini alipokuwa karibu kuua mwana wake, Yehova alimsimamisha na kusema: “Sasa ninajua ya kuwa unamcha Mungu, iwapo hukunizuilia mwanao, mwanao wa pekee.” (Mwanzo 22:11, 12) Abrahamu alithawabishwa kama nini kwa kusikia Mungu mwenyewe akijulisha wazi kwamba yeye ni mtu mwenye uadilifu! Sasa yeye angeweza kuhisi uhakika wa kwamba alitimiza takwa la Mungu kwa mwanadamu asiye mkamilifu. La maana zaidi, ukadirio ambao Yehova alikuwa ameipa imani yake hapo kwanza ulishuhudizwa kuwa wa kweli. (Mwanzo 15:5, 6) Baada ya jambo hili, Abrahamu alidhabihu kondoo mume aliyeandaliwa kimuujiza awe badala ya Isaka. Ndipo akasikia Yehova akizitilia nguvu ahadi za agano lile, kwa kiapo chenye apizo thibitifu. Baadaye, akajulikana kuwa rafiki ya Yehova.​—Mwanzo 22:13-18; Yakobo 2:21-23.

21. Ni kielezi gani cha kiunabii kilichoandaliwa hapa, na kinapasa kututia moyo tutafute nini?

²¹ Dhabihu ya Abrahamu ilikuwa ‘ya kielezi.’ (Waebrania 11:19, NW) Ilikuwa kifananishi cha dhabihu yenye kuleta maumivu makali na gharama kubwa ambayo Yehova Mungu alifanya alipotuma Mwana wake mpendwa aje duniani kufa akiwa “Mwana-kondoo wa Mungu, aichukuaye dhambi ya ulimwengu.” (Yohana 1:29) Na nia ya Isaka kufa inatoa kielezi jinsi Isaka Mkubwa Zaidi, Yesu Kristo, alijitiisha kwa upendo afanye penzi la Baba yake wa kimbingu. (Luka 22:41, 42; Yohana 8:28, 29) Mwishowe, sawa na vile Abrahamu alivyompokea mwana wake akiwa hai kutoka kwenye madhabahu, Yehova alimpokea tena Mwana wake mpendwa kutoka kwa wafu akiwa kiumbe roho mtukufu. (Yohana 3:16; 1 Petro 3:18) Hii inawatia moyo kama nini watafutaji wa urafiki wa Mungu leo!

22. Kikundi kichaguliwa cha wanadamu kimenufaikaje na upendo wa Mungu usio na kifani?

²² Kwa kujizoeza imani katika kitendo hiki cha upendo usio na kifani kwa upande wa Abrahamu Mkubwa Zaidi, Yehova Mungu, kikundi kichaguliwa cha wanadamu wamejulishwa wazi kuwa waadilifu wakiwa wana wa Mungu. (Warumi 5:1; 8:15-17) Kwa kuchukuliwa kwanza kutoka kwa Wayahudi halafu kutoka kwa Wasio Wayahudi, hawa wamebarikiwa kweli kweli kupitia Mbegu ya Abrahamu, Yesu Kristo. (Matendo 3:25, 26; Wagalatia 3:8, 16) Halafu wao nao wanakuwa sehemu ya pili ya mbegu ya Abrahamu. (Wagalatia 3:29) Mwishowe hesabu yao inakuwa 144,000 na, kama Yesu, wanafufuliwa kwenda kwenye uhai wa kimbingu baada ya kujithibitisha wenyewe kuwa waaminifu mpaka kifo.​—Warumi 6:5; Ufunuo 2:10; 14:1-3.

23. (a) Tayari mamilioni ya watu wanabarikiwaje kupitia mabaki ya mbegu ya Abrahamu? (2 Wakorintho 5:20) (b) Ni baraka gani zaidi zinazoungojea “umati mkubwa”?

²³ Kwa sasa, mamilioni ya watu kutoka mataifa yote ‘wanajibariki wenyewe’ kwa kuitikia huduma yenye upendo ya mabaki madogo ya mbegu ya Abrahamu. (Mwanzo 22:18, NW) Wao wamesisimuka kujua jinsi wanadamu wenye dhambi wanaweza kujulishwa wazi kuwa waadilifu wakiwa rafiki za Mungu. Tokeo ni kwamba, “umati mkubwa . . . kutoka mataifa yote” wanaona shangwe ya kuwa na upendeleo wa Mungu, wakiwa ‘wamefua majoho yao na kuyafanya meupe katika damu ya Mwana-Kondoo.” Mabaki wakiwa ndio waongozi, wao pia wanatolea Mungu “utumishi mtakatifu mchana na usiku.” Huu umati mkubwa umewekewa mbele yao lile tumaini zuri ajabu la uhai wa milele katika Paradiso wakiwa “watoto wa Mungu” wa kidunia. (Ufunuo 7:9-17; 21:3-5; Warumi 8:21; Zaburi 37:29, NW) Hata hivyo, kabla baraka hizo hazijawa uhalisi, matukio yenye umaana mkubwa zaidi ni lazima yatukie, kama tutakavyoona katika makala inayofuata.

Maswali kwa Kupitia

◻ Imani ya Abrahamu na watu wa ukoo wake ilitahiniwaje?

◻ Leo Wakristo wameonyeshaje imani kama hiyo?

◻ Abrahamu alijizoeza imani kwa njia gani nyinginezo?

◻ Ni jinsi gani Abrahamu, Sara, na Isaka walivyo vielelezo kwa jamaa za Kikristo?

◻ Kitendo cha imani ya Abrahamu kilicho kikubwa zaidi kilikuwa kielezi cha jambo gani?