Kwa Nini Umhofu Mungu wa Kweli Sasa?

“Mhofu Mungu wa kweli na kuzishika amri zake. Kwa maana huu ndio wajibu wote wa mwanadamu.”—MHUBIRI 12:13, NW.

1, 2. Kwa nini hofu ifaayo ya Mungu inastahili?

HOFU ya Mungu inayofaa na yenye staha nyingi ni nzuri kwa mwanadamu. Ndiyo, ingawa hofu nyingi za wanadamu ni zenye kusumbua kihisia-moyo, hata kuwa zenye kudhuru hali-njema yetu, ni vizuri tumhofu Yehova Mungu.—Zaburi 112:1; Mhubiri 8:12.

² Muumba ajua hili. Kwa sababu ya kuupenda uumbaji wake, anawaamuru wanadamu wote wamhofu na kumwabudu. Twasoma: “Nikaona malaika mwingine, akiruka katikati ya mbingu, mwenye Injili ya milele, awahubiri hao wakaao juu ya nchi, na kila taifa na kabila na lugha na jamaa, akasema kwa sauti kuu, Mcheni [“Mhofuni,” NW] Mungu, na kumtukuza, kwa maana saa ya hukumu yake imekuja. Msujudieni yeye aliyezifanya mbingu na nchi na bahari na chemchemi za maji.”—Ufunuo 14:6, 7.

3. Muumba aliwafanyia wazazi wetu wa kwanza nini?

³ Kwa kweli hatupaswi kumpuuza Muumba wa vitu vyote, aliye Chanzo cha uhai, kwa sababu anatumiliki pamoja na dunia yetu. (Zaburi 24:1) Katika kuonyesha upendo wake mkuu, Yehova aliwapa watoto wake wa kidunia uhai akawaandalia mahali pazuri ajabu pa kuishi—paradiso yenye kuvutia. Na zawadi hiyo nzuri ajabu haikupatikana bila masharti. Kwa kweli, walipewa amana. Wazazi wetu wa kwanza walipaswa kuyatunza makao yao na kuyapanua hadi waijaze na kuitiisha dunia nzima. Walipata mapendeleo na madaraka juu ya wanyama wa bara, ndege, na samaki—viumbe vingine vyote vyenye uhai ambavyo vingeishi duniani pamoja nao na wazao wao. Kwa sababu ya amana hii kubwa, mwanadamu angetozwa hesabu.

4. Mwanadamu amefanyia uumbaji wa Mungu nini?

⁴ Ujapokuwa mwanzo huo mzuri ajabu, ona kile mwanadamu amefanya kuchafua makao yake ya kidunia yenye kupendeza! Kwa kupuuza kwa madharau jambo la kwamba Mungu ndiye mwenye kito hiki, wanadamu wamechafua sana dunia. Uchafuzi umefikia hatua ya kutisha kuwako kwa jamii zaidi na zaidi za wanyama, ndege, na samaki. Mungu wetu mwenye haki na upendo hatavumilia hali hii kwa wakati usio dhahiri. Kuharibiwa kwa dunia kwadai hesabu itozwe, ambalo ni jambo linalofanya wengi wawe na hofu. Kwa upande mwingine, kwa wale wanaomtumaini Mungu kwa staha, linafariji kujua kile kitakachotokea. Yehova atatoza hesabu, na dunia itarudishwa. Kwa kweli hizo ni habari njema kwa wote wenye mioyo minyoofu walio duniani.

5, 6. Yehova ataitikiaje kile mwanadamu amefanyia uumbaji Wake?

⁵ Mungu atatekeleza hukumu yake kupitia njia gani? Kupitia Yesu Kristo, ambaye sasa ametawazwa akiwa Mfalme wa Ufalme wa kimbingu wa Mungu. Kupitia Mwana huyo wa kimbingu, Yehova atakomesha mfumo mchafu uliopo, wenye uasi. (2 Wathesalonike 1:6-9; Ufunuo 19:11) Kwa njia hiyo yeye atawapa kitulizo wale wanaomhofu, na wakati uo huo, kuokoa na kuhifadhi makao yetu ya kidunia.

⁶ Hili litatukiaje? Biblia husema juu ya dhiki kubwa inayofikia upeo katika vita ya Har–Magedoni. (Ufunuo 7:14; 16:16) Hiyo itakuwa hukumu ya Mungu dhidi ya mfumo huu wa mambo uliochafuka na wale wanaouchafua. Je, kuna wanadamu watakaookoka? Ndiyo! Watakuwa wale wasio na hofu mbaya isiyofaa kwa Mungu bali wenye hofu ya staha nyingi na kicho kwake. Wao watakombolewa.—Mithali 2:21, 22.

Wonyesho wa Ajabu wa Nguvu

7. Kwa nini Mungu aliingilia mambo kwa niaba ya Israeli katika siku za Musa?

⁷ Hatua hiyo yenye kutokeza ya Yehova Mungu ilitangulia kuonyeshwa kwa tendo kubwa sana alilofanya kwa niaba ya waabudu wake miaka yapata 1,500 kabla ya Wakati wa Kawaida wetu. Mamlaka kubwa ya kijeshi ya Misri ilikuwa imetia utumwani wafanya-kazi wao Waisraeli waliokuwa wamehamia huko, hata wakafikia hatua ya kujaribu kuua jamii hiyo nzima wakati mtawala wao, Farao, alipoamuru kifo cha Waisraeli wote wa kiume waliotoka kuzaliwa. Ushindi wa Mungu juu ya Misri ulikuwa ukomboe Israeli kutoka katika mfumo huo wa kisiasa wenye uonevu, ndiyo, uhuru kutoka katika taifa lililochafuka kwa ibada ya miungu mingi.

8, 9. Musa na Waisraeli waliitikiaje hali ya Mungu kuingilia mambo?

⁸ Kutoka sura ya 15 imerekodi jinsi Israeli lilivyoitikia ukombozi wao kutoka Misri. Kuchanganua masimulizi hayo kutatusaidia kuthamini jinsi Wakristo wawezavyo kukombolewa kutoka katika mfumo wa sasa ulio najisi kiroho na kimwili. Ebu tuzungumzie Kutoka sura ya 15, tukikazia akili mistari iliyoteuliwa ili tujifunze ni kwa nini tuchague kumhofu Yehova, Mungu wa kweli. Twaanza na mstari wa 1 na wa 2:

⁹ “Ndipo Musa na wana wa Israeli wakamwimbia BWANA wimbo huu wakanena, na kusema, Nitamwimbia BWANA, kwa maana ametukuka sana; farasi na mpanda farasi amewatupa baharini. BWANA ni nguvu zangu, na wimbo wangu; naye amekuwa wokovu wangu.”

10. Ni nini kilichomfanya Mungu aharibu majeshi ya Misri?

¹⁰ Watu duniani kote wanafahamu masimulizi ya jinsi Yehova alivyokomboa Israeli kutoka Misri. Alileta mapigo juu ya mamlaka hiyo kubwa ya ulimwengu mpaka hatimaye Farao akawaruhusu Waisraeli waondoke. Lakini majeshi ya Farao wakafuatia watu hawa wasio na kinga ikaonekana kana kwamba wamewanasa katika ukingo wa Bahari Nyekundu. Ingawa ilionekana kana kwamba wana wa Israeli wangepoteza upesi uhuru waliotoka tu kuupata, Yehova alikuwa akifikiria jambo jingine. Kwa muujiza alifungua kijia kupitia bahari hiyo akawaleta watu wake kwenye usalama. Wamisri walipofuata, alifunga Bahari Nyekundu juu yao akazamisha Farao na majeshi yake.—Kutoka 14:1-31.

11. Ni nini kilichotokea kutokana na tendo la Mungu dhidi ya Misri?

¹¹ Tendo la Yehova la kuharibu majeshi ya Misri lilimtukuza machoni pa waabudu wake likafanya jina lake lijulikane kotekote. (Yoshua 2:9, 10; 4:23, 24) Ndiyo, jina lake liliinuliwa juu ya miungu bandia ya Misri isiyo na nguvu, iliyoshindwa kukomboa waabudu wayo. Tumaini katika viabudiwa vyao na katika mwanadamu awezaye kufa na katika nguvu za kijeshi liliwakatisha tamaa sana. (Zaburi 146:3) Si ajabu kwamba Waisraeli walisukumwa kuimba sifa zilizoonyesha hofu ifaayo ya Mungu aliye hai, akomboaye watu wake kwa uwezo mkubwa!

12, 13. Twapaswa kujifunza nini kutokana na ushindi wa Mungu katika Bahari Nyekundu?

¹² Vivyo hivyo, twapaswa kutambua kwamba hakuna miungu bandia ya wakati wetu wala mamlaka yenye nguvu, hata ile yenye silaha za nyukilia, iwezayo kushindana na Yehova. Yeye aweza, naye atakomboa watu wake. “[Yeye] hufanya kama atakavyo, katika jeshi la mbinguni, na katika hao wanaokaa duniani; wala hapana awezaye kuuzuia mkono wake, wala kumwuliza, Unafanya nini wewe?” (Danieli 4:35) Tupatapo maana kamili ya maneno haya, sisi pia husukumwa kuimba sifa zake kwa furaha.

¹³ Wimbo wa ushindi katika Bahari Nyekundu waendelea: “BWANA ni mtu wa vita, BWANA [“Yehova,” NW] ndilo jina lake.” Kwa hiyo, Shujaa huyu asiyeweza kushindwa si ubuni usio na jina na wa kuwaziwa tu na mwanadamu. Ana jina! Yeye ndiye ‘Yule asababishaye kuwa,’ Mfanyi Mtukufu, Yule ‘aitwaye jina lake Yehova, . . . Aliye juu, juu ya nchi yote.’ (Kutoka 3:14; 15:3-5; Zaburi 83:18) Je, wewe hukubali kwamba lingalikuwa jambo la busara kwa wale Wamisri wa kale kuwa na hisi ifaayo yenye staha kwa Mweza Yote badala ya kumkaidi?

14. Thamani ya hofu ya kimungu ilionyeshwaje katika Bahari Nyekundu?

¹⁴ Akiwa ndiye Mbuni wa dunia, huyu Mfanyi wa bahari ana udhibiti kamili juu ya matungamo ya maji. (Kutoka 15:8) Kwa kutumia udhibiti wake juu ya upepo pia, alitimiza kile kilichoonekana hakiwezekani. Aligawanya vilindi vya maji katika mahali fulani akavilazimisha virudi nyuma ili kufanyiza kipitio chenye kuta za maji cha kupitiwa na watu wake. Ebu wazia mandhari hiyo: mamilioni ya tani za maji ya bahari zikiwa zimerundamana hadi juu katika kuta zilizo sambamba, zikifanyiza njia yenye ulinzi ya Israeli kutorokea. Ndiyo, wale walioonyesha hofu ifaayo ya Mungu walipata ulinzi. Kisha, Yehova aliyaachilia maji, akiyaruhusu yarudi kwa nguvu kama gharika kubwa sana, yakizamisha majeshi ya Farao na vifaa vyayo vyote. Ni wonyesho ulioje wa nguvu ya kimungu juu ya miungu isiyofaa kitu na nguvu za kijeshi za kibinadamu! Hakika, Yehova ndiye wa kuhofiwa, sivyo?—Kutoka 14:21, 22, 28; 15:8.

Kuonyesha Hofu Yetu ya Mungu

15. Twapaswa kuitikiaje matendo yenye nguvu na yenye kuokoa ya Mungu?

¹⁵ Tungalikuwa tumesimama kwa usalama pamoja na Musa, hakika tungalisukumwa kuimba: “Ee BWANA, katika miungu ni nani aliye kama wewe? Ni nani aliye kama wewe, mtukufu katika utakatifu, mwenye kuogopwa [“kuhofiwa,” NW] katika sifa zako, mfanya maajabu?” (Kutoka 15:11) Hisi kama hizo zimerudiwa katika karne zote tangu wakati huo. Katika kitabu cha mwisho cha Biblia, mtume Yohana afafanua kikundi cha watumishi waaminifu wa Mungu waliotiwa mafuta: “Wanaimba wimbo wa Musa mtumwa wa Mungu na wimbo wa Mwana-Kondoo.” Ni nini wimbo huo mkuu? “Ni kubwa na za ajabu sana kazi zako, Yehova Mungu, Mweza Yote. Ni za uadilifu na za kweli njia zako, Mfalme wa umilele. Ni nani ambaye kwa kweli hatakuhofu wewe, Yehova, na kulitukuza jina lako, kwa sababu wewe peke yako ni mwaminifu-mshikamanifu?”—Ufunuo 15:2-4, NW.

16, 17. Ni maendeleo gani mazuri ajabu twaona yakitokea leo?

¹⁶ Leo vilevile kuna waabudu waliokombolewa wathaminio si kazi za Mungu za uumbaji tu bali pia amri zake. Watu kutoka mataifa yote wamekombolewa kiroho, wametengwa na ulimwengu huu uliochafuka kwa sababu wao hutambua na kufuata amri za Mungu zenye uadilifu. Kila mwaka, mamia ya maelfu hutoroka ulimwengu huu mfisadi ili kukaa pamoja na tengenezo la waabudu wa Yehova lililo safi na lenye unyoofu. Karibuni, baada ya kutekelezwa kwa hukumu moto-moto za Mungu dhidi ya dini bandia na huu mfumo wote mwovu unaosalia, wao wataishi milele katika ulimwengu mpya wenye uadilifu.

¹⁷ Kwa kupatana na Ufunuo 14:6, 7, wanadamu sasa wanasikia ujumbe wa kutoa onyo ukitangazwa na Mashahidi wa Yehova wakielekezwa na malaika. Katika nchi zaidi ya 230 mwaka uliopita, Mashahidi wa Yehova wapatao milioni tano walitangaza habari njema ya Ufalme wa Mungu na saa yake ya hukumu. Ili kuwaelimisha wanadamu wenzao wapate wokovu, Mashahidi hawa walifanya ziara za kawaida nyumbani mwa watu, wakiongoza mafunzo ya Biblia bila malipo. Hivyo, mamia ya maelfu ya watu kila mwaka hujifunza vya kutosha kumhofu Mungu wa kweli kiakili, huweka maisha zao wakfu kwake, na kubatizwa. Inafurahisha kama nini kwamba wao wamekuja kumhofu Mungu wa kweli!—Luka 1:49-51; Matendo 9:31; linganisha Waebrania 11:7.

18. Ni nini kinachoonyesha kwamba malaika wanahusika katika kuhubiri?

¹⁸ Je, ni kweli kwamba malaika wanahusika katika kazi ya kuhubiri? Yaonekana wazi kwamba mwongozo wa kimalaika mara nyingi umeleta Mashahidi wa Yehova kwenye nyumba ambamo mtu mwenye kufadhaika alikuwa akitaka sana, hata kusali, kupata msaada wa kiroho! Kwa kielelezo, Mashahidi wa Yehova wawili wakiwa na mtoto mdogo walikuwa wakitangaza habari njema katika kisiwa kimoja cha Karibea. Adhuhuri ilipokaribia, wale Mashahidi wawili wakaamua kuacha mahubiri saa hizo. Lakini yule mtoto alikuwa na hamu isiyo ya kawaida kuzuru nyumba iliyofuata. Alipoona kwamba wale wawili hawakuwa na mwelekeo wa kuendelea kuhubiri, akaenda peke yake na kubisha. Mwanamke mchanga akafungua mlango. Wale Mashahidi walipoona hilo, wakaenda kuzungumza na mwanamke huyo. Akawaalika ndani, akiwaeleza kwamba wakati uo huo aliposikia mlango ukibishwa, alikuwa akisali kwamba Mungu atume Mashahidi kwake kumfunza Biblia. Mipango ikafanywa kwa ajili ya funzo la Biblia.

19. Twaweza kutaja nini kuwa manufaa ya kumhofu Mungu?

¹⁹ Tutoapo kwa uaminifu ujumbe wa Mungu wenye hukumu, sisi hufundisha pia amri zake zenye uadilifu. Hizo zinapotumiwa maishani mwa watu, baraka nyingi za kimwili na za kiroho hutokea. Kwa kielelezo, Biblia hulaani waziwazi aina zote za ukosefu wa adili katika mambo ya ngono. (Warumi 1:26, 27, 32) Leo, viwango hivi vya kimungu hupuuzwa sana ulimwenguni. Tokeo likiwa nini? Ndoa zinavunjika. Utovu wa tabia unaongezeka. Maradhi yanayopitishwa kingono yenye kulemaza au yaliyo hatari, ambayo yameathiri wengi sana katika karne hii ya 20, yanaenea. Kwa kweli, maradhi ya kuogofya ya UKIMWI huenezwa hasa kwa ukosefu wa adili katika ngono. Lakini je, hofu yenye staha kwa Mungu haijakuwa ulinzi mkubwa kwa waabudu wa kweli?—2 Wakorintho 7:1; Wafilipi 2:12; ona pia Matendo 15:28, 29.

Matokeo ya Kumhofu Mungu Sasa

20. Ni nini kinachoonyesha kwamba wengine wanajua sifa ya Mashahidi wa Yehova?

²⁰ Kuna baraka nyingi kwa wale wanaomhofu Mungu na kufuata amri zake. Fikiria tukio lionyeshalo kwamba Mashahidi wa Yehova wanazidi kutambulika kuwa udugu wenye amani wa Wakristo wenye adili. Mashahidi kadhaa, waliokuwa wajumbe wa mkusanyiko wa kimataifa katika Amerika Kusini, walikuwa wakikaa katika hoteli moja ambayo ilitumiwa pia usiku mmoja na kikusanyiko cha watu wasio Mashahidi ambacho kingehutubiwa na rais wa taifa hilo. Walinzi walipokuwa wakifanya haraka kumwingiza rais ndani ya lifti, Shahidi fulani ambaye hakujua ni nani aliyekuwa ndani ya lifti hiyo akaingia ndani, kwa mshangao mkubwa wa wale walinzi! Shahidi huyo alipong’amua kile alichokuwa amefanya, aliomba radhi kwa kujidukiza humo. Akaonyesha beji yake ya mkusanyiko iliyomtambulisha kuwa Shahidi akisema kwamba hakuwa tisho kwa rais. Mlinzi mmoja akitabasamu akasema: “Ikiwa watu wote wangekuwa kama Mashahidi wa Yehova, tusingehitaji ulinzi wa aina hii.”—Isaya 2:2-4.

21. Ni njia zipi za kuchukulia hatua zilizo wazi kwa watu leo?

²¹ Hawa ndio aina ya watu ambao Yehova anakusanya sasa na kutayarisha ili ‘waokoke ile dhiki kubwa’ itakayomaliza mfumo huu. (Ufunuo 7:9, 10, 14) Kuokoka dhiki hiyo si jambo la nasibu. Ili kuokoka, ni lazima mtu amhofu Yehova, amtambue kuwa mwenye haki ya Enzi Kuu, na kujiweka wakfu kwake. Hata hivyo, uhakika ni kwamba wengi wa watu hawatasitawisha aina ya hofu itakayowafanya wastahili ulinzi. (Zaburi 2:1-6) Kulingana na uthibitisho wote unaopatikana, Mtawala aliyechaguliwa na Yehova, Yesu Kristo, amekuwa akitawala akiwa Mfalme tangu mwaka muhimu wa 1914. Hili lamaanisha kwamba wakati ubakio unaisha upesi kwa watu kusitawisha na kudhihirisha hofu ifaayo ya Yehova. Lakini, bado Muumba wetu anaruhusu watu, hata wale wenye vyeo vikubwa, kuitikia: “Na sasa, enyi wafalme, fanyeni akili, enyi waamuzi wa dunia, mwadibiwe. Mtumikieni BWANA kwa kicho, shangilieni kwa kutetemeka. Shikeni yaliyo bora, asije akafanya hasira nanyi mkapotea njiani, kwa kuwa hasira yake itawaka upesi; heri wote wanaomkimbilia.”—Zaburi 2:7-12.

22. Wakati ujao utawaletea nini wale wanaomhofu Mungu sasa?

²² Na tuwe miongoni mwa wale watakaomsifu Muumba wetu kuwa Yule aliyetuokoa. Hata hivyo, hilo lahitaji kwamba tumhofu Mungu wa kweli sasa! (Linganisha Zaburi 2:11; Waebrania 12:28; 1 Petro 1:17.) Ni lazima tuendelee kujifunza sheria zake zenye uadilifu na kuzitii. Wimbo wa Musa na wa Mwana-Kondoo, uliorekodiwa kwenye Ufunuo 15:3, 4, utafikia upeo wakati Yehova afutiliapo mbali uovu wote duniani na aanzapo kuponya mwanadamu na makao yake ya kidunia kutokana na matokeo ya dhambi yenye uchafuzi. Kisha, tutaimba hivi kwa mioyo yetu yote: “Ni makuu, na ya ajabu, matendo yako, Ee Bwana Mungu mwenyezi; ni za haki, na za kweli, njia zako, Ee Mfalme wa mataifa. Ni nani asiyekucha [“hatakuhofu,” NW], Ee Bwana na kulitukuza jina lako?”

Je, Wakumbuka?

◻ Kwa nini Yehova astahili hofu yetu ifaayo?

◻ Ni nini kilichodhihirishwa na matimizo ya Mungu katika Bahari Nyekundu?

◻ Ni manufaa zipi zinazotokana na hofu yetu yenye staha ya Yehova?

◻ Ni wakati ujao gani unaowangoja wale wanaomhofu Mungu wa kweli sasa?