Hazina Yetu, Huduma Tukufu ya Ki-Siku-Hizi

“Sisi tuna hazina hii katika vyombo vya ardhini, ili kwamba uwezo uzidio ulio wa kawaida upate kuwa wa Mungu wala si ule wa kutoka kwetu wenyewe.”—2 WAKORINTHO 4:7, NW.

HUDUMA ya kuhubiri “habari njema hizi za ufalme” wakati wa umalizio wa mfumo wa mambo ni hazina kweli kweli, mali yenye kuthaminika sana. Kwa sababu Yehova ni Mungu wa utukufu, kutumikia Mungu ni huduma ya utukufu, hivyo ni hazina. (Mathayo 24:14; 2 Wakorintho 3:18–4:1) Kuhusu upaji mtukufu wa Sheria ya Kimusa, imeandikwa hivi kwenye Kutoka 34:29, 30: “Hata ikawa, Musa aliposhuka katika mlima Sinai, na zile mbao mbili za ushuhuda zilikuwa mkononi mwa Musa, hapo alishuka katika mlima, Musa hakujua ya kuwa ngozi ya uso wake iling’aa [ilitokeza mionzi, NW] kwa sababu amesema naye. Basi Haruni na wana wote wa Israeli walipomwona Musa, tazama, ngozi ya uso wake iling’aa; nao wakaogopa kumkaribia.”

² Mistari 32 hadi 34 yaongezea hivi: “Baadaye wana wa Israeli wote wakakaribia; akawausia maneno yote ambayo BWANA [Yehova, NW] amemwambia katika mlima Sinai. Na Musa alipokuwa amekwisha kusema nao, akatia utaji [shela] juu ya uso wake. Lakini desturi ya Musa ilikuwa alipoingia mbele za BWANA [Yehova, NW] kusema naye, kuuvua huo utaji mpaka atoke.” Utumishi wa Sheria ya Kimusa ulitangulia kuwa kivuli cha huduma ya lile agano jipya lililofanywa na Mpatanishi, Yesu Kristo. Hivyo, ikiwa huduma ya kwanza ilikuwa tukufu, ni lazima “ule utendeshaji wa roho” uwe una utukufu mwingi hata zaidi! (2 Wakorintho 3:7-11, NW) Ni wenye utukufu zaidi kwa sababu una utukufu ubakio, na wafuasi wa Yesu Kristo huushiriki.—Warumi 12:11.

³ Kwa hiyo, basi, huduma ya Mashahidi wa Yehova ni tukufu. Hata hivyo, jambo hilo halionekani wazi na watu wengi ambao wamepofushwa na dini bandia. Ingawa wengi wana Biblia na huenda wakaisoma, wao hawana ‘macho yenye kuona.’ (2 Petro 1:5-9, NW) Ili kuondoa utaji (shela) huo mbele ya macho yao, ni lazima wamgeukie Yehova Mungu kwa imani, kwa maana Musa alipoenda mbele za kuwapo kwa Yehova, yeye aliondoa utaji ulioficha uso wake kutoonwa na Wayahudi. (2 Wakorintho 3:16) Waisraeli walikuwa wenye hofu ya kuuona utukufu wa Mungu katika uso wa mpatanishi wao na wakaomba kwamba utiwe utaji ili macho yao yasiuone. Kama vile kitu ambacho ni kipashwa-nuru huja baadaye kuangaza gizani nuru ambayo kilipokea kutoka kwa kiangazia-nuru, ndivyo Musa, mpatanishi wao, alivyoonyesha utukufu wa Yehova, hiyo ikithibitisha kwamba alikuwa amekuwa mbele za Yehova.

⁴ Musa alitangulia kuwa kivuli cha Nabii mkubwa wa Mungu, Yesu Kristo. Akiwa kama mfano wake wa asili, huyu Musa Mkubwa Zaidi haogopi kutazama utukufu wa Yehova moja kwa moja. Hata hivyo, hadi siku hii watu wasioamini wenye kupofushwa na Ibilisi na dini yake ya Kibabuloni huiga hao Wayahudi wa kale na kukataa kuuona, au kuufahamu, utukufu wa yule Musa Mkubwa Zaidi, Yesu Kristo. (2 Wakorintho 3:12-15) Na bado, wafuasi wake wa kweli hawahofu kuutazama mrudisho wa utukufu wa Yehova kama utokezwavyo kutoka kwenye uso wa Yesu Kristo. Wakiwa wamewekwa huru kutoka kwenye uvutano wa Kibabuloni, wao hujasirishwa kuonyesha utukufu wa Mungu. “Kwa hiyo,” akaandika Paulo, “kwa kuwa sisi tuna tumaini la jinsi hiyo, sisi tunatumia uhuru mkubwa wa uneni.”—2 Wakorintho 3:12, NW.

Wenye Kuangaza Mrudisho wa Utukufu wa Mungu

⁵ Yesu Kristo ameuondoa utaji kwa kutufunulia na kutujulisha wazi juu ya Yehova Mungu. (Yohana 1:14, 17, 18) Kwa hiyo ni lazima sisi tung’ae, na hivyo utukufu wa Mungu hung’aa kupitia “zile habari njema tukufu juu ya Kristo, ambaye ndiye mfano wa Mungu,” ambazo ni lazima sisi tuzipigie mbiu. Mng’ao wazo ni “maarifa matukufu juu ya Mungu kwa uso wa Kristo.” Ni lazima sisi tuangaze mrudisho wa utukufu huu kwa kusema juu ya utukufu wa Yehova na utukufu wa Ufalme wake ulio mikononi mwa Mwana wake. (2 Wakorintho 4:4-6) Kama Musa juu ya mlima akiwa katika kuwapo kwa Yehova, Mashahidi Wake walio duniani hawaweki utaji kwenye mioyo yao ili kuepuka utukufu wa Yehova. Wao huvutiwa na mrudisho wa utukufu uangazwao katika uso wa Mwana na Mfalme wa Yehova, Yesu Kristo. Hivyo, ni lazima wao waangazie wengine nuru kuhusu utukufu wa Mungu.

⁶ Kwa mashahidi wenzake wote wa utukufu wa Yehova, mtume Paulo aeleza utukufu huo kwa maneno haya: “Na sisi sote, tukiwa na nyuso zilizotiwa utaji [shela] twarudisha kama vioo mwangazo wa utukufu wa Yehova, twageuzwa umbo kuwa mfano ule ule kutoka utukufu hadi utukufu, sawasawa vile ilivyofanywa na Yehova yule Roho.” (2 Wakorintho 3:18, NW) Kadiri tupokeavyo utukufu mwingi zaidi wa nuru hii, ni lazima tuiangaze zaidi, na hivyo ndivyo sisi twazidi kugeuzwa umbo. Akili zafanywa upya na kutengenezwa upya, ingawa huenda mabadiliko ya mwili au ya usoni yasionekane. Ile nuru ya ujumbe mtukufu tuuangazao ndiyo hutokeza tofauti ndani yetu. Maisha zetu hugeuzwa umbo ziwe kama Kristo, huku sisi tukijipanga kutekeleza ule utumishi wenye pendeleo la kueneza nuru tukufu hii kotekote kwa wengine.—Waebrania 13:15.

⁷ Mgeuzo wote huo wa umbo husababishwa na roho, au kani ya utendaji, ya Mungu. Makasisi wa Jumuiya ya Wakristo hawarudishi mwangazo wa utukufu wa Yehova Mungu bali wao hugeukia kujionyesha ili wawe tamasha ya kutazamwa. Utukufu huo si utukufu wetu, nasi hatuhitaji kujipamba wenyewe katika mavazi ya kidini yenye urangirangi wa hariri, dhahabu, na vito vyenye umerimeti. Utukufu wa kweli hutolewa kwa roho ya Mungu na huonyeshwa katika kutoa ushahidi mtukufu kuhusu Yehova aliye Roho.

Wote Ni Wachukua-Nuru Wenye Pendeleo

⁸ Kwenye 2 Wakorintho 4:1, 2, NW, twasoma hivi: “Hiyo ndiyo sababu, kwa kuwa sisi tuna huduma hii kulingana na rehema tuliyoonyeshwa, sisi hatukati tamaa; bali tumekana mambo ya kichinichini ya kuaibikia, bila kutembea kwa ujanja, wala kutohoa neno la Mungu, bali kwa kufanya ukweli udhihirike tukijipendekeza wenyewe kwa kila dhamiri ya kibinadamu machoni pa Mungu.” Mungu amekuwa na rehema juu yetu hata akatugawia huduma hii. Hilo ni himizo la kututia moyo tuendelee mbele kwa moyo mkuu, nasi tutafanya hivyo! Kwa kuwa tumependelewa kwa nuru kutoka kwenye Neno la Mungu, tuna wajibu wa kuiangaza kwa wengine.—Linganisha Mathayo 5:14-16.

⁹ Mambo ambayo wanadamu huaibikia, kama vile ukopi (upunjaji), wao huyaficha kwa udanganyifu na hila. Lakini sisi hatuna kisababishi cha kuona aibu kwa sababu ujumbe na kazi yetu si mambo ya ukopi bali ya uadilifu na ya kweli. Hivyo, sisi twaweza kuangaza utukufu kamili wa ile nuru. Sisi hatushughulikii Neno la Mungu kwa udanganyifu. Kufanya hivyo kungemaanisha kulishughulikia kwa ubinafsi ili sisi wenyewe tupate faida, utukufu, manufaa, na umashuhuri wa kilimwengu na kuepuka upinzani na mnyanyaso kutoka kwenye ulimwengu. Vilevile wale wasiohofu kumjia Yehova wakiwa na nyuso zisizotiwa utaji (shela) na kuikazia macho ile nuru tukufu ya ukweli hawatahofu kukabili daraka lao. Wataacha nuru irudi kutoka kwao iwaangazie wengine.

¹⁰ Ikiwa wowote wametiliwa utaji wa kutoziona habari njema za Ufalme, kosa si la Mashahidi wa Yehova, bali ni kosa lao wenyewe. Habari njema za Ufalme hazifichwi. Kazi ya Mashahidi wa Yehova ya kuhubiri ulimwenguni pote yajulikana sana. Hivyo, wao waweza kusema kama mtume Paulo: “Jambo hili halikufanywa katika kona.” Kwa kweli, kama alivyoandika, habari njema ‘zimehubiriwa katika uumbaji wote ulio chini ya mbingu.’—Matendo 26:26; Wakolosai 1:23, NW.

¹¹ Wale ambao habari njema za Ufalme wa Mungu zimefichwa kwao ni wapinzani, wale waliopofushwa na Ibilisi. (Linganisha Mathayo 12:30.) Wasipoondoka wawe huru na dini bandia na mitego ya Ibilisi, wao wamo katika mstari wa uharibifu. Wakiwa chini ya uvutano wa roho waovu, watu hao huvuta utaji ili uwe kifuniko mbele ya macho yao wenyewe, kwa maana mtume Paulo asema hivi kwenye 2 Wakorintho 4:3-5, NW: “Ikiwa kwa uhakika, sasa, habari njema ambazo sisi twajulisha wazi zimetiwa utaji [shela], zimetiwa utaji [shela] miongoni mwa wale wanaoangamia, ambao miongoni mwao mungu wa huu mfumo wa mambo amepofusha akili za wasioamini, ili kwamba mmuliko wa zile habari njema tukufu juu ya Kristo, ambaye ni mfano wa Mungu, zisipate kuangaza na kupita. Kwa maana sisi tunahubiri, si juu yetu wenyewe, bali juu ya Kristo Yesu akiwa Bwana, na sisi wenyewe tukiwa watumwa kwa ajili ya Yesu.”

¹² Waliopofushwa kiakili hawataki kuamini. Kutoamini kwao hufungua akili yao ili ivamiwe na roho waovu. (1 Timotheo 4:1) Wao hawawezi kuona utukufu wa Yehova wala mwangazo wa utukufu huo kutoka kwenye sura ya Yesu, yule Musa Mkubwa Zaidi. Watu wa Yehova huona ile nuru tukufu kutoka kwenye Biblia na kuiangaza kwa wengine. Kwa hiyo watumishi wote wa Mungu ni wachukua nuru, na Mungu huamuru kwamba nuru ing’ae. Ni lazima nuru hiyo irudi kwa kuangaza kutoka kwa watu wa Mungu na kumweka-mweka juu ya wengine walio katika giza na katika hatari ya uharibifu. Ni kama vile 2 Wakorintho 4:6, NW, iwekavyo wazo hilo: “Kwa maana ni yeye Mungu aliyesema: ‘Acha nuru ing’ae kutoka kwenye giza,’ na yeye ameangazia mioyo yetu ili kuimulika kwa maarifa matukufu ya Mungu kwa uso wa Kristo.” Kwa sababu hiyo, Mashahidi wa Yehova huitii amri ya kimungu na kuacha nuru iangazie wengine, kwa utukufu wa Mungu.

Hazina Tukufu Katika Vyombo Dhaifu

¹³ Katika hili pendeleo la utumishi wenye fahari isiyoelezeka, ni jambo la maana sana kwamba wachukua nuru wathibitike kuwa wanastahiki kuwa na nuru hiyo kwa kushika ukamilifu wao kwa Mungu. Ili kulifanya hili pendeleo la utumishi mzuri ajabu, Mungu hakutumia malaika watakatifu, ambao hutamani kuchungulia mambo haya, bali amekabidhi utumishi huu wenye baraka kwa viumbe wa mnofu. (1 Petro 1:12) Amefanya hivyo hata akatukuza nguvu zake mwenyewe kati ya udhaifu wa kibinadamu. Kama vile 2 Wakorintho 4:7, NW, yataarifu: “Sisi tuna hazina hii katika vyombo vya ardhini, ili kwamba nguvu ipitayo iliyo ya kawaida ipate kuwa ya Mungu wala si ile ya kutoka kwetu wenyewe.”

¹⁴ Mara nyingi vyombo vya ardhini nyakati za kale vilitumiwa kuwa vyombo vya kuwekea vitu vya thamani. Ni nini hii hazina tukufu iliyo na Mashahidi wa Yehova katika vyombo dhaifu, vya ardhini, yaani, wao wenyewe wakiwa viumbe vinyonge vya kutoka kwenye mavumbi ya ardhi? Hazina hii si ile nuru ambayo imeng’aa tu ikaingia katika mioyo yao. Ni huduma ya nuru hiyo, na huduma hiyo, au utumishi, ni lazima ifanywe katika miili yao ya kiardhi. Huduma hiyo ni kule kupeleka nje nuru ambayo Mungu ameangaza juu ya mioyo yao. Huduma hiyo ni hazina nzuri kwa kuwa ni pendeleo lenye kuthaminika la utumishi ushirikiwao leo si na mabaki wapakwa-mafuta tu wa “kundi dogo” bali pia na “umati mkubwa” wa “kondoo wengine” wa Mchungaji Mwema, Yesu Kristo. (Luka 12:32; Yohana 10:14-16; Ufunuo 7:9, NW) Musa na mfananishwa wake, Yesu Kristo, ni vielelezo vyenye hekima vya kufuatwa nasi, kukazia mioyo yetu hazina hii ya utumishi wa kimungu, “kwa kuwa hazina yako ilipo, ndipo utakapokuwapo na moyo wako.”—Mathayo 6:19-21; Waebrania 11:26.

¹⁵ Basi, uwezo upitao ule wa kawaida huonyeshwaje kuwa watoka kwa Mungu wala si ule wetu wenyewe? Kwa njia hii: Sisi vyombo dhaifu sana vya ardhini ambao tuna utumishi na utume huu wenye kuhaziniwa hatustahiki na hatungeweza kamwe kuchukua heshima ya jinsi hiyo tukiwa peke yetu. Tena, sisi Mashahidi wa Yehova hupasishwa aina zote za mbano wa adui ili kujaribu kutuvunja na kutupasua ili tusifae kuuchukua utume utokao kwa Mungu. Hivyo, ni lazima iwe kwamba uwezo wa yule Mpa-utume Mkubwa ndio hutusaidia kuvumilia kutendwa ubaya mkubwa na ulimwengu huu na kushika sana utume huo na kuthibitisha kuwa twastahiki kudumishwa katika utumishi wake. Hivyo, upinzani wote wa ulimwengu utashindwa kuvunja vyombo vya Mungu vya ardhini na kuwanyang’anya hazina yao yenye thamani, kwa maana imeandikwa hivi kwenye 2 Wakorintho 4:8-12:

¹⁶ “Pande zote twadhikika, bali hatusongwi; twaona shaka, bali hatukati tamaa; twaudhiwa, bali hatuachwi; twatupwa chini, bali hatuangamizwi; sikuzote twachukua katika mwili kuuawa kwake Yesu, ili uzima wa Yesu nao udhihirishwe katika miili yetu. Kwa maana sisi tulio hai, sikuzote twatolewa tufe kwa ajili ya Yesu, ili uzima wa Yesu nao udhihirishwe katika miili yetu ipatikanayo na mauti. Basi hapo mauti hufanya kazi nda-ni yetu, bali uzima ndani yenu [kupitia kuhubiriwa kwa habari njema za Ufalme].”

Umati Mkubwa Wathamini Sana

“Hazina Hii”

¹⁷ “Kifo chafanya kazi ndani yetu, lakini uhai ndani yenu.” Taarifa hii yatumika kwa Wakristo waliopakwa mafuta kwa roho. Hata hivyo, huenda hata ikatufanya tufikirie uhusiano wa mabaki wa Mungu waliopakwa mafuta na umati mkubwa wa kondoo wengine. Wapakwa-mafuta wajua ni lazima hatimaye wamalize mwendo wao wa kidunia katika kifo kama vile Yesu alivyofanya, lakini wana waandamani wa kushiriki nao ile hazina tukufu ya utumishi, kuwasaidia kwa kufanya furushi kubwa zaidi la kazi ya kuhubiriwa kwa habari njema za Ufalme. Kama mabaki wapakwa mafuta, umati mkubwa wa kondoo wengine leo wathamini kwamba hazina pekee itakayookoka lile pigano moto la Har–Magedoni na kuendelea mbele bila kuchomwa mahali na bila kuteketezwa ili iingie katika ulimwengu mpya ni hazina hii ya huduma iliyobarikiwa, ule utumishi utolewao kwa Yehova Mungu na Mfalme wake mtukufu, Yesu Kristo. Umati mkubwa utafumbata hazina hiyo, ‘ukimtolea Mungu utumishi mtakatifu mchana na usiku katika hekalu lake.’—Ufunuo 7:15, NW.

¹⁸ Punde si punde, Mungu atamaliza utukufu bandia wa huu mfumo mwovu wa mambo—“utukufu” ambao umeendelea kuwapo tangu Shetani Ibilisi alipopeleka Yesu katika mlima ulioinuka na kumwonyesha falme zote za ulimwengu na “utukufu wazo.” (Luka 4:5, 6, NW) Yesu alikataa toleo la utukufu kutoka chanzo cha jinsi hiyo naye akaendelea kufuatia duniani mwendo wa kitendo ambacho Mungu alikubali. Kwa kufanya hivyo, angevikwa taji la utukufu mkuu kuliko hata utukufu ule ambao yeye, Mwana mzaliwa pekee wa Mungu, alikuwa ameuonea shangwe mbinguni kabla hajatwaa mgawo wake wa kidunia kama ulivyopangiliwa na Yehova.—Yohana 5:36; 17:5; Wafilipi 2:9-11.

¹⁹ Mwisho uliotabiriwa wa mfumo huu wa mambo ya kidiabolo (kiibilisi) hautakuja mpaka ushahidi wa Ufalme utolewe katika dunia yote kuwa upeo mtukufu kwa utendaji wa wafuasi wa Yesu Kristo, wale Mashahidi wa Yehova. (Mathayo 24:14) Ushahidi wa Ufalme umetolewa sasa kwa robo tatu za karne, na kama ionyeshwavyo na matukio ya ulimwengu ya nyakati zetu, ni lazima iwe mwisho huo uliotabiriwa uko karibu. Kwa hiyo, lile pendeleo lenye kuheshimika la kushiriki katika huduma ya ile serikali takatifu ya kifalme linakaribia kufikia utimilizo walo kamili. (Mathayo, sura 24, 25; Marko, sura ya 13; Luka, sura ya 21) Pendeleo letu la kushiriki katika kutoa ushahidi wa duniani pote juu ya Ufalme uliosimamishwa ni hazina tukufu kweli kweli ambayo Mashahidi wa Yehova, wakiwa wafuasi wa Mwana wake aliyetawazwa, Yesu Kristo, hulithamini sana. Kwa moyo wa bidii wao hutamani waendelee kuwa nayo mpaka ushahidi wa Ufalme umalizwe kisha Mungu Mweza Yote, Yehova, alete upeo wa kilele cha hali ya ulimwengu wote mzima kwa ushahidi wake binafsi wenye kutetea enzi kuu yake ya ulimwengu wote mzima.—Sefania 3:8.

Ni Nini Majibu Yako?

◻ Kwa nini huduma ya Mashahidi wa Yehova ni tukufu?

◻ Kwa nini habari njema zimetiwa utaji miongoni mwa wengi sana leo?

◻ Ni nini “hazina hii katika vyombo vya ardhini”?

◻ Kwa nini Mungu ametumia vyombo dhaifu vya ardhini kwa utumishi wake wenye kuhaziniwa?

◻ Watu wa Yehova huikadiria “hazina hii” thamani gani, na kwa nini?

[Maswali ya Funzo]

 1. (a) Ni hazina gani tukufu ambayo twaweza kuwa nayo, na kwa nini? (b) Biblia yaelezaje juu ya upaji wa Sheria ya Kimusa?

 2. Ni nini kilichotangulia kuwekewa kivuli na utumishi wa Sheria ya Kimusa, na kwa nini ile huduma ya mwishoni ni tukufu zaidi?

 3. (a) Ni lazima jambo gani liwe ni la kweli juu ya huduma ya Mashahidi wa Yehova, lakini kwa nini jambo hilo halionekani wazi na watu wengi? (b) Ni nini kilichothibitisha kwamba Musa alikuwa amekuwa katika kuwapo kutukufu kwa Yehova?

 4. Leo watu wasioamini huigaje Wayahudi wa kale, lakini wafuasi wa Musa Mkubwa Zaidi hawahofu nini?

 5. Sisi twaweza kurudishaje mwangazo wa utukufu wa Mungu na kuwa kama Musa juu mlimani akiwa katika kuwapo kwa Yehova?

 6. Kwenye 2 Wakorintho 3:18, NW, Paulo huelezaje huduma yetu ya utukufu, nasi ‘twageuzwa umbo’ hivyo kwa njia zipi?

 7. Utukufu wa kweli ni kutoka chanzo gani, nasi twaweza kuonyeshaje utukufu huo?

 8, 9. Ni kitia-moyo gani ambacho Paulo atoa kwenye 2 Wakorintho 4:1, 2, nacho chataka kwetu hali gani ya kupiga moyo konde?

 10. Kwa nini si kosa la Mashahidi wa Yehova ikiwa habari njema za Ufalme zimetiwa utaji zisionwe na watu fulani?

 11. Kwa nini habari njema tukufu zimetiwa utaji miongoni mwa wengi sana wa ainabinadamu?

 12. Kinyume cha watu waliopofushwa kiakili, watu wa Yehova huitikiaje maneno kwenye 2 Wakorintho 4:6?

 13. Kuwakabidhi viumbe wa mnofu utumishi wenye baraka wa kuwa wachukua nuru hutokeza nini?

 14. (a) Ni nini “hazina hii katika vyombo vya ardhini”? (b) Kwa nini Musa na Yesu Kristo ni vielelezo vya hekima kwetu sisi kwa habari ya hazina?

 15, 16. (a) Uwezo uzidio ule wa kawaida waonyeshwaje kuwa watoka kwa Mungu wala si wa kutoka kwetu wenyewe? (b) Kwa nini upinzani wote wa ulimwengu utashindwa kuvunja vyombo vya ardhini vya Mungu?

 17. Umati mkubwa huikadiria thamani gani “hazina hii” ya huduma tukufu?

 18. (a) Karibuni ni jambo gani litapata utukufu bandia wa ulimwengu huu? (b) Yesu alikataa “utukufu” gani, naye alipata utukufu mkuu zaidi kwa kufanya nini?

 19. Ni pendeleo gani la utumishi wa kuheshimika linalokaribia utimizo walo kamili, nasi tumepiga moyo konde kufanya nini kwa habari hii?

[Picha katika ukurasa wa 17]

Utukufu wa Mungu hurudishwa kwa kuangazwa kutoka kwenye sura ya Yesu Kristo, yule Musa Mkubwa Zaidi. Mashahidi wa Yehova wana pendeleo la kushika nuru tukufu ya Mungu kutoka kwenye Biblia na kurudisha mwangazo wayo ili wengine waipate