‘Hivyo Ndivyo Walivyofanya’
“Huku ndiko kumpenda Mungu, kwamba tuzishike amri zake.” —1 YOHANA 5:3.
1. Ni nini laweza kusemwa kuhusu kadiri ya upendo wa Mungu?
“MUNGU NI UPENDO.” Wote wanaopata kumjua Mungu na kuzitii amri zake hupata kutambua zaidi kina cha upendo huo. “Hili ndilo pendo, si kwamba sisi tulimpenda Mungu, bali kwamba yeye alitupenda sisi, akamtuma Mwanawe kuwa kipatanisho kwa dhambi zetu.” Tudhihirishapo imani katika dhabihu ya fidia ya Yesu yenye thamani, ‘twakaa katika pendo la Mungu.’ (1 Yohana 4:8-10, 16) Hivyo, twaweza kufurahia baraka nyingi za kiroho sasa na katika mfumo wa mambo ujao, uhai udumuo milele.—Yohana 17:3; 1 Yohana 2:15, 17.
2. Kutii amri za Mungu kumewanufaishaje watumishi wake?
2 Rekodi ya Biblia imejaa vielelezo vya wale ambao wamezitii amri za Mungu na wamebarikiwa sana kwa kufanya hivyo. Hawa watia ndani mashahidi wa nyakati za kabla ya Ukristo, ambao kuhusu baadhi yao mtume Paulo aliandika hivi: “Hawa wote wakafa katika imani, wasijazipokea zile ahadi, bali wakaziona tokea mbali na kuzishangilia, na kukiri kwamba walikuwa wageni, na wasafiri [“wakaaji wa muda,” NW] juu ya nchi.” (Waebrania 11:13) Baadaye, watumishi wa Mungu waliokuwa Wakristo wenye ujitoaji walinufaika na “neema na kweli [ambazo] zilikuja kwa mkono wa Yesu Kristo.” (Yohana 1:17) Katika muda wote wa miaka ipatayo 6,000 ya historia ya kibinadamu, Yehova amewathawabisha mashahidi waaminifu ambao wametii amri zake, ambazo kwa kweli “si nzito.”—1 Yohana 5:2, 3.
Katika Siku za Noa
3. Ni kwa njia zipi Noa alifanya ‘vivyo hivyo’?
3 Rekodi ya Biblia husema: “Kwa imani Nuhu akiisha kuonywa na Mungu katika habari za mambo yasiyoonekana bado, kwa jinsi alivyomcha Mungu, aliunda safina, apate kuokoa nyumba yake. Na hivyo akauhukumu makosa ulimwengu, akawa mrithi wa haki ipatikanayo kwa imani.” Akiwa “mhubiri wa uadilifu,” Noa alimtii Mungu kabisa, akionya ulimwengu wenye jeuri wa kabla ya Furiko kuhusu hukumu ya kimungu iliyokuwa ikikaribia. (Waebrania 11:7; 2 Petro 2:5, NW) Katika kujenga safina, yeye alifuata kwa uangalifu plani aliyopewa na Mungu. Kisha akawaleta wanyama walioteuliwa na akiba ya chakula. “Ndivyo alivyofanya Nuhu, sawasawa na vyote alivyomwamuru Mungu, hivyo ndivyo alivyofanya.”—Mwanzo 6:22.
4, 5. (a) Uvutano mbaya umeathirije wanadamu kufikia leo hii? (b) Kwa nini twapaswa kufanya ‘vivyo hivyo’ katika kutii maagizo ya kimungu?
4 Noa na familia yake walilazimika kukabili uvutano mbaya wa malaika wasiotii. Hawa wana wa Mungu walitwaa miili ya kibinadamu na kuishi pamoja na wanawake, wakizaa watu wenye nguvu kupita za wanadamu waliowatesa wanadamu. “Dunia ikaharibika mbele za Mungu, dunia ikajaa dhuluma.” Yehova akaleta Gharika ifagilie mbali kizazi hicho kiovu. (Mwanzo 6:4, 11-17; 7:1) Tangu siku ya Noa malaika ambao ni roho waovu hawakuruhusiwa kutwaa miili ya kibinadamu. Hata hivyo, ‘ulimwengu wote waendelea kukaa katika nguvu ya yule mwovu,’ Shetani Ibilisi. (1 Yohana 5:19, NW; Ufunuo 12:9) Kiunabii, Yesu alilinganisha hicho kizazi chenye kuasi cha siku ya Noa na kile kizazi cha wanadamu ambacho kimemkataa tangu ishara ya “kuwapo” kwake ilipoanza kuonekana wazi katika 1914.—Mathayo 24:3, 34, 37-39, NW; Luka 17:26, 27.
5 Leo, kama ilivyokuwa katika siku ya Noa, Shetani anajaribu kuharibu wanadamu na sayari yetu. (Ufunuo 11:15-18) Hivyo, ni jambo la hima kwamba tutii amri hii iliyopuliziwa: “Vaeni silaha zote za Mungu, mpate kuweza kuzipinga hila za [“matendo ya ujanja ya,” NW, kielezi-chini] Shetani.” (Waefeso 6:11) Katika jambo hili, tunaimarishwa kwa kujifunza Neno la Mungu na kulitumia katika maisha zetu. Na zaidi, tuna tengenezo la Yehova lenye kujali, likiwa na “mtumwa [walo] mwaminifu mwenye akili” aliyetiwa mafuta na pia wazee walo wenye upendo, ili kutuchunga kwa subira katika njia tupaswayo kwenda. Tuna kazi ya kutimiza ya kuhubiri duniani kote. (Mathayo 24:14, 45-47) Kama Noa, ambaye alitii maagizo ya kimungu kwa uangalifu sana, na sikuzote tufanye ‘vivyo hivyo.’
Musa —Yule Mtu Mpole Zaidi Kuliko Wote
6, 7. (a) Musa alifanya uchaguzi gani wenye kuthawabisha? (b) Musa alituachia kiolezo gani chenye moyo mkuu?
6 Fikiria mtu mwingine wa imani—Musa. Yeye angeweza kufurahia maisha ya kujiridhisha kupita kiasi katika anasa za Misri. Lakini alichagua “kupata mateso pamoja na watu wa Mungu kuliko kujifurahisha katika dhambi kwa kitambo.” Akiwa mtumishi wa Yehova aliyepewa agizo, ‘aliyatazamia hayo malipo na kustahimili kama amwonaye Yeye asiyeonekana.’—Waebrania 11:23-28.
7 Kwenye Hesabu 12:3, twasoma: “Huyo Musa, alikuwa mpole sana zaidi ya wanadamu wote waliokuwa juu ya uso wa nchi.” Kwa kinyume, Farao wa Misri alitenda kama mtu mwenye kiburi zaidi ya watu wote. Yehova alipowaamuru Musa na Haruni watangaze hukumu yake kwa Farao, wao walifanyaje? Twaambiwa: “Musa na Haruni wakafanya vivyo; kama BWANA alivyowaambia, ndivyo walivyofanya.” (Kutoka 7:4-7) Ni kiolezo chenye moyo mkuu kama nini kwetu sisi ambao hutangaza hukumu za Mungu leo!
8. Waisraeli walipaswa kufanyaje ‘vivyo hivyo,’ na shangilio lililotokea litafananishwaje katika wakati ujao ulio karibu?
8 Je, Waisraeli walimuunga mkono Musa kwa uaminifu-mshikamanifu? Baada ya Yehova kupiga Misri kwa mapigo tisa ya yale kumi, alilipatia Israeli maagizo yenye mambo mengi juu ya kusherehekea Sikukuu ya Kupitwa. “Watu wakainama vichwa na kusujudia. Basi wana wa Israeli wakaenda na kufanya mambo hayo; vile vile kama BWANA alivyowaamuru Musa na Haruni, ndivyo walivyofanya.” (Kutoka 12:27, 28) Katikati ya usiku wa siku hiyo iliyojaa matukio, Nisani 14, 1513 K.W.K., malaika wa Mungu aliwaua wazaliwa wa kwanza wote wa Misri lakini akapita nyumba za Waisraeli. Kwa nini wazaliwa wa kwanza wa Israeli hawakuuawa? Kwa sababu walikuwa wamepata ulinzi wa damu ya mwana-kondoo wa Sikukuu ya Kupitwa, iliyokuwa imemwagwa kwenye milango yao. Walifanya tu kama Yehova alivyokuwa amewaamuru Musa na Haruni. Ndiyo, “ndivyo walivyofanya.” (Kutoka 12:50, 51) Kwenye Bahari Nyekundu, Yehova alifanya muujiza mwingine kwa kuokoa watu wake watiifu huku akiangamiza Farao na majeshi yake. Waisraeli walichachawa kama nini! Vivyo hivyo leo, wengi ambao wamezitii amri za Yehova watashangilia kuwa wajioneaji wa kutetewa kwake kwenye Har–Margedoni.—Kutoka 15:1, 2; Ufunuo 15:3, 4.
9. Ni mapendeleo gani ya kisasa yaliyoonyeshwa kimbele na hali ya Waisraeli kufanya ‘vivyo hivyo’ kuhusu tabenakulo?
9 Yehova alipoamuru Israeli lifanye mchango na kujenga tabenakulo nyikani, watu waliunga mkono mradi huo kwa ukarimu sana. Kisha, hata katika mambo madogo kabisa, Musa pamoja na wafanyakazi wenzake wenye hiari walifuata plani za michoro zilizoandaliwa na Yehova. “Basi ndivyo ilivyomalizwa kazi yote ya maskani [“tabenakulo,” NW] ya hema ya kukutania; na wana wa Israeli walifanya kama yote BWANA aliyomwagiza Musa, ndivyo walivyofanya.” Kwa njia iyo hiyo, wakati wa kuanzishwa kwa ukuhani, ‘Musa alifanya hayo yote; kama yote BWANA aliyoagiza ndivyo alivyofanya.’ (Kutoka 39:32; 40:16) Katika nyakati za kisasa, tuna fursa ya kuunga mkono kwa moyo wote kazi ya kuhubiri na mipango ya upanuzi wa Ufalme. Hivyo, ni pendeleo letu kuungana katika kufanya ‘vivyo hivyo.’
Yoshua—Mwenye Moyo Mkuu na Mwenye Nguvu Sana
10, 11. (a) Ni nini kilichomtayarisha Yoshua apate mafanikio? (b) Tunaweza kuimarishwaje kukabili majaribu ya siku hizi?
10 Musa alipomwagiza Yoshua aongoze Israeli kuingia katika bara la ahadi, yaelekea Neno la Yehova lililoandikwa lenye kupuliziwa ambalo lilikuwapo lilikuwa vitabu vitano pekee vya Musa, zaburi moja au mbili, na kitabu cha Ayubu. Musa alikuwa amemwagiza Yoshua akutanishe watu walipofika Bara Lililoahidiwa na ‘kuisoma torati hii mbele ya Israeli wote masikioni mwao.’ (Kumbukumbu la Torati 31:10-12) Na zaidi, Yehova mwenyewe alimwamuru Yoshua: “Kitabu hiki cha torati kisiondoke kinywani mwako, bali yatafakari maneno yake mchana na usiku, upate kuangalia kutenda sawasawa na maneno yote yaliyoandikwa humo; maana ndipo utakapoifanikisha njia yako, kisha ndipo utakapositawi sana.”—Yoshua 1:8.
11 Kusoma “kitabu” cha Yehova kila siku kulimtayarisha Yoshua ashughulikie majaribu yaliyokuwa mbele, kama vile kusoma Neno la Yehova, Biblia, kuimarishavyo Mashahidi Wake wa kisasa kukabili majaribu ya hizi “siku za mwisho” zenye hatari. (2 Timotheo 3:1) Tukiwa tumezingirwa hivi na ulimwengu wenye jeuri, na tutii onyo la upole la Mungu kwa Yoshua: “Uwe hodari na moyo wa ushujaa; usiogope wala usifadhaike; kwa kuwa BWANA, Mungu wako, yu pamoja nawe kila uendako.” (Yoshua 1:9) Baada ya kushinda Kanaani, makabila ya Israeli yalithawabishwa sana yalipokuwa yakipata urithi wayo. “Vile vile kama BWANA alivyomwamuru Musa, hao wana wa Israeli walifanya vivyo.” (Yoshua 14:5) Thawabu kama hiyo yatungoja sisi sote ambao husoma Neno la Mungu na kulitumia maishani mwetu, kwa utii tukifanya ‘vivyo hivyo.’
Wafalme—Waaminifu na Wasiotii
12. (a) Wafalme katika Israeli walipewa amri gani? (b) Ukosefu wa mfalme kutii ulitokeza nini?
12 Namna gani juu ya wafalme katika Israeli? Yehova alikuwa ameagiza mfalme atii takwa hili: “Aketipo juu ya kiti cha ufalme wake, ajiandikie nakala ya torati hii katika chuo, kufuata hicho kilicho mbele ya makuhani Walawi; na awe nayo, asome humo siku zote atakazoishi; ili apate kujifunza kumcha BWANA, Mungu wake, ayashike maneno yote ya torati hii na amri hizi, kwa kuyafanya.” (Kumbukumbu la Torati 17:18, 19) Je, wafalme wa Israeli walitii amri hiyo? Kwa sehemu kubwa zaidi, walishindwa kabisa, wakapatwa na laana zilizotabiriwa kwenye Kumbukumbu la Torati 28:15-68. Hatimaye, Israeli likatawanywa “tokea ncha hii ya dunia hata ncha hii ya dunia.”
13. Tunaweza kunufaishwaje, kama alivyonufaishwa Daudi, kwa kuonyesha upendo kwa Neno la Yehova?
13 Hata hivyo, Daudi—mfalme wa kwanza wa kibinadamu aliyekuwa mwaminifu katika Israeli—alionyesha ujitoaji wa kipekee kwa Yehova. Alithibitika kuwa ‘mwana-simba katika Yuda,’ akionyesha kimbele Kristo Yesu, aliye ‘simba ashindaye wa kabila la Yuda, shina la Daudi.’ (Mwanzo 49:8, 9; Ufunuo 5:5) Nguvu za Daudi zilitokana na nini? Alithamini kwa kina Neno la Yehova lililoandikwa akaishi kupatana nalo. Katika Zaburi 19, “melodia ya Daudi,” (NW) twasoma: “Sheria ya BWANA ni kamilifu.” Baada ya kurejezea kumbusho, maagizo, amri, na maamuzi ya kihukumu za Yehova, Daudi aendelea kusema: “Ni za kutamanika kuliko dhahabu, kuliko wingi wa dhahabu safi. Nazo ni tamu kuliko asali, kuliko sega la asali. Tena mtumishi wako huonywa kwazo; katika kuzishika kuna thawabu nyingi.” (Zaburi 19:7-11) Ikiwa kusoma Neno la Yehova kila siku na kulitafakari kulithawabisha miaka ipatayo 3,000 iliyopita, kunathawabisha zaidi kama nini leo!—Zaburi 1:1-3; 13:6; 119:72, 97, 111.
14. Ni katika njia ipi mwendo wa Sulemani waonyesha uhitaji wa kuwa na zaidi ya ujuzi tu?
14 Na bado, haitoshi tu kupata ujuzi. Ni muhimu pia kwa watumishi wa Mungu kutenda kulingana na ujuzi huo, kuutumia kupatana na mapenzi ya kimungu—ndiyo, kufanya ‘vivyo hivyo.’ Hilo laweza kutolewa kielezi katika hali ya Sulemani mwana wa Daudi, ambaye Yehova alimchagua “ili aketi juu ya kiti cha enzi cha ufalme wa BWANA, juu ya Israeli.” Sulemani alipokea mgawo wa kujenga hekalu, akitumia plani za ujenzi ambazo Daudi alipokea “kwa upulizio.” (1 Mambo ya Nyakati 28:5, 11-13, NW) Sulemani angeweza kutimizaje kazi hii kubwa mno? Katika kujibu sala, Yehova alimpa hekima na ujuzi. Akiwa nazo, na kwa kufuata kwa ukaribu plani zilizotolewa kimungu, Sulemani aliweza kujenga nyumba hiyo tukufu, ambayo ilikuja kujawa na utukufu wa Yehova. (2 Mambo ya Nyakati 7:2, 3) Hata hivyo, baadaye Sulemani alishindwa. Kwa jambo jipi? Sheria ya Yehova ilikuwa imesema kuhusu mfalme katika Israeli: “Asijizidishie wake, ili moyo wake usikengeuke.” (Kumbukumbu la Torati 17:17) Lakini Sulemani “akawa na wake mia saba binti za kifalme, na masuria mia tatu; nao wakeze . . . wakamgeuza moyo wake, afuate miungu mingine.” Katika miaka yake ya baadaye, Sulemani alikengeuka kutoka kufanya ‘vivyo hivyo.’—1 Wafalme 11:3, 4; Nehemia 13:26.
15. Yosia alifanyaje ‘vivyo hivyo’?
15 Kulikuwa na wafalme wachache watiifu katika Yuda, wa mwisho kati yao alikuwa Yosia. Katika mwaka wa 648 K.W.K., alianza kuondoa ibada ya sanamu barani na kurekebisha hekalu la Yehova. Ni humo ambamo kuhani wa cheo cha juu alipata “kitabu cha torati ya BWANA iliyotolewa kwa mkono wa Musa.” Yosia alifanya nini kuhusu jambo hili? “Akapanda mfalme nyumbani kwa BWANA, na watu wote wa Yuda, na wenyeji wa Yerusalemu, na makuhani na Walawi, na watu wote, wakubwa kwa wadogo; naye akasoma masikioni mwao maneno yote ya kitabu cha agano kilichoonekana nyumbani mwa BWANA. Akasimama mfalme mahali pake, akafanya agano mbele za BWANA, kumfuata BWANA, na kuzishika amri zake, na shuhuda zake, na sheria zake, kwa moyo wake wote, na kwa roho yake yote, kuyatenda maneno ya agano yaliyoandikwa kitabuni humo.” (2 Mambo ya Nyakati 34:14, 30, 31) Ndiyo, “hivyo ndivyo alivyofanya” Yosia. Kwa sababu ya mwendo wake wenye uaminifu, kutekelezwa kwa hukumu ya Yehova juu ya Yuda lisilo na uaminifu kulikawizwa mpaka siku za wana wake wenye makosa.
Kuishi Kupatana na Neno la Mungu
16, 17. (a) Ni lazima tufuate hatua za Yesu katika mambo yapi? (b) Ni watumishi gani wengine wa Mungu walio waaminifu watuandaliao vielelezo vya kufuata?
16 Kwa watu wote waliopata kuishi, kielelezo bora zaidi cha mtu mwenye kutafakari Neno la Mungu na kuishi kupatana nalo ni Bwana Yesu Kristo. Neno la Mungu lilikuwa kama chakula kwake. (Yohana 4:34) Aliwaambia wasikilizaji wake: “Mwana hawezi kutenda neno mwenyewe ila lile ambalo amwona Baba analitenda; kwa maana yote ayatendayo yeye, ndiyo ayatendayo Mwana vile vile.” (Yohana 5:19, 30; 7:28; 8:28, 42) “Hivyo ndivyo alivyofanya” Yesu, akitangaza: “Sikushuka kutoka mbinguni ili niyafanye mapenzi yangu, bali mapenzi yake aliyenipeleka.” (Yohana 6:38) Sisi tulio Mashahidi wa Yehova waliojiweka wakfu twatakiwa kufanya ‘vivyo hivyo’ kwa kufuata hatua za Yesu.—Luka 9:23; 14:27; 1 Petro 2:21.
17 Kufanya mapenzi ya Mungu kulikuwa jambo la kwanza kabisa akilini mwa Yesu sikuzote. Alifahamu kabisa Neno la Mungu na hivyo alikuwa amejitayarisha kutoa majibu ya Kimaandiko. (Mathayo 4:1-11; 12:24-31) Kwa kutoa uangalifu wa daima kwa Neno la Mungu, sisi pia twaweza kuja kuwa ‘kamili tukiwa tumekamilishwa kutenda kila tendo jema.’ (2 Timotheo 3:16, 17) Na tufuate kielelezo cha watumishi waaminifu wa Yehova katika nyakati za kale na katika nyakati za baadaye na zaidi ya yote kile kielelezo cha Bwana-Mkubwa, Yesu Kristo, aliyesema: “Ulimwengu ujue ya kuwa nampenda Baba; na kama vile Baba alivyoniamuru; ndivyo nifanyavyo.” (Yohana 14:31) Sisi pia na tuonyeshe upendo wetu kwa Mungu kwa kuendelea kufanya ‘vivyo hivyo.’—Marko 12:29-31.
18. Ni nini chapaswa kutuchochea ‘kuwa watendaji wa neno,’ na ni nini kitakachofuata kuzungumzwa?
18 Tutafakaripo juu ya mwendo wenye utii wa watumishi wa Mungu katika nyakati za Biblia, je, hatutiwi moyo kufanya utumishi mwaminifu katika siku za mwisho za mfumo mwovu wa Shetani? (Warumi 15:4-6) Kwa kweli twapaswa kuchochewa ‘kuwa watendaji wa neno’ kikamili, kama makala ifuatayo itakavyozungumzia.—Yakobo 1:22.
Je, Wakumbuka?
◻ “Upendo wa Mungu” wapaswa kumaanisha nini kwetu?
◻ Twajifunza nini kutokana na vielelezo vya Noa, Musa, na Yoshua?
◻ Ni kwa kadiri gani wafalme wa Israeli walitii “neno” la Mungu?
◻ Yesu ni Kigezo chetu kwa njia gani katika kufanya ‘vivyo hivyo’?
[Picha katika ukurasa wa15]
‘Hivyo ndivyo walivyofanya’ Noa, Musa, na Yoshua