Tumikia Yehova kwa Shangwe ya Moyo

“Na laana hizi zote zitakujilia juu yako, . . . kwa kuwa hukumtumikia BWANA, Mungu wako, kwa furaha na moyo wa kushukuru [“kwa kushangilia na kwa shangwe ya moyo,” “NW”].”—KUMBUKUMBU LA TORATI 28:45-47.

1. Kuna uthibitisho gani kwamba wale wanaomtumikia Yehova wana shangwe, kokote wanakomtumikia?

WATUMISHI wa Yehova ni wenye shangwe, wawe wanafanya mapenzi yake mbinguni au duniani. “Nyota za asubuhi” za kimalaika zilitoa sauti kuu za shangwe wakati wa kuwekwa misingi ya dunia, na bila shaka kwa shangwe mamiriadi wa malaika wa kimbingu ‘wanatenda neno la Mungu.’ (Ayubu 38:4-7; Zaburi 103:20) Mwana wa pekee wa Yehova alikuwa “stadi wa kazi” mwenye shangwe mbinguni naye alifurahia sana kufanya mapenzi ya kimungu akiwa mwanadamu Yesu Kristo duniani. Isitoshe, “kwa ajili ya shangwe iliyowekwa mbele yake alivumilia mti wa mateso, akidharau aibu, na ameketi kwenye mkono wa kuume wa kiti cha ufalme cha Mungu.”—Mithali 8:30, 31; Waebrania 10:5-10; 12:2, NW.

2. Ni nini kilichofanya Waisraeli ama wapate baraka ama laana?

² Waisraeli walipata shangwe walipomfurahisha Mungu. Lakini vipi wakati hawakumtii? Wao walionywa hivi: “[Laana] zitakuwa juu yako kwa ishara na ajabu, na juu ya uzao wako milele; kwa kuwa hukumtumikia BWANA, Mungu wako, kwa furaha na moyo wa kushukuru [“kwa kushangilia na kwa shangwe ya moyo,” NW], kwa ajili ya ule wingi wa vitu vyote; kwa hiyo utawatumikia adui zako atakaowaleta BWANA juu yako, kwa njaa, na kwa kiu, na kwa uchi, na kwa uhitaji wa vitu vyote; naye atakuvika kongwa la chuma shingoni mwako, hata atakapokwisha kukuangamiza.” (Kumbukumbu la Torati 28:45-48) Baraka na laana zilionyesha wazi ni nani waliokuwa watumishi wa Yehova na ni nani hawakuwa. Laana hizo pia zilithibitisha kwamba kanuni na makusudi ya Mungu hayawezi kuchukuliwa kivivi-hivi, wala kudharauliwa. Kwa sababu Waisraeli walikataa kutii maonyo ya Yehova ya kufanywa ukiwa na kupelekwa uhamishoni, Yerusalemu lilikuja kuwa “laana kwa taifa zote za dunia.” (Yeremia 26:6) Hivyo basi tumtii Mungu tufurahie upendeleo wake. Shangwe ni mojapo baraka nyingi za kimungu zinazofurahiwa na watu wa kimungu.

Jinsi ya Kutumikia kwa “Shangwe ya Moyo”

3. Moyo wa mfano ni nini?

³ Waisraeli walipaswa kumtumikia Yehova “kwa kushangilia na kwa shangwe ya moyo.” Ndivyo ilivyo lazima kwa watumishi wa Mungu wa siku ya kisasa. Kushangilia ni “kufurahi; kujawa na shangwe.” Ingawa moyo halisi watajwa katika Maandiko, haufikiri au kusababu kihalisi. (Kutoka 28:30) Kazi yao kubwa ni kupeleka damu ilishayo chembe za mwili. Hata hivyo, katika hali nyingi sana, Biblia hurejezea moyo wa mfano, ambao ni zaidi ya kuwa chanzo cha shauku, kichocheo, na akili. Huo husemwa kuwa unawakilisha “sehemu kuu kwa ujumla, undani, na kwa hiyo wawakilisha mtu wa ndani kama ajionyeshavyo katika utendaji wake mbalimbali, tamaa zake, shauku, hisia za moyoni, harara, makusudi, mafikirio yake, mawazo yake, utambuzi wake, madhanio, hekima yake, ujuzi, ustadi, itikadi na kusababu kwake, kumbukumbu lake na ufahamu wake.” (Journal of the Society of Biblical Literature and Exegesis, 1882, ukurasa 67) Moyo wetu wa mfano wahusisha hisi na hisia zetu za moyoni, kutia ndani shangwe.—Yohana 16:22.

4. Ni nini kiwezacho kutusaidia kumtumikia Yehova Mungu kwa shangwe ya moyo?

⁴ Ni nini kiwezacho kutusaidia kumtumikia Yehova kwa shangwe ya moyo? Maoni mazuri na yenye uthamini ya baraka zetu na mapendeleo tuliyopewa na Mungu yaweza kuwa yenye msaada. Mathalani, twaweza kufikiria kwa shangwe pendeleo letu la kutoa “utumishi mtakatifu” kwa Mungu wa kweli. (Luka 1:74, NW) Kuna pendeleo linalohusika nalo la kuchukua jina la Yehova tukiwa Mashahidi wake. (Isaya 43:10-12) Kwa hayo twaweza kuongeza ile shangwe ya kujua kwamba kwa kufuata Neno la Mungu twamfurahisha. Na kuna shangwe kama nini katika kuangaza nuru ya kiroho na hivyo kusaidia wengi kutoka gizani!—Mathayo 5:14-16; linganisha 1 Petro 2:9.

5. Ni nini chanzo cha shangwe ya kimungu?

⁵ Lakini, kumtumikia Yehova kwa shangwe ya moyo hakuhusishi tu kufikiri kuzuri. Yafaa kuwa na maoni mazuri. Lakini shangwe ya kimungu si sifa tutokezayo tu kupitia usitawishaji wa tabia. Hiyo ni tunda la roho ya Yehova. (Wagalatia 5:22, 23) Ikiwa hatuna shangwe hiyo, twaweza kuhitaji kufanya marekebisho ili kuepuka kufikiri na kutenda kwa njia fulani isiyo ya Kimaandiko iwezayo kuhuzunisha roho ya Mungu. (Waefeso 4:30) Hata hivyo, tukiwa watu waliojitoa kwa Yehova, tusihofu kwamba ukosefu wa shangwe ya kutoka moyoni katika pindi fulani kuwa uthibitisho wa kukataliwa kimungu. Hatujakamilika nasi hupatwa na maumivu, huzuni, na hata kuvunjika moyo nyakati nyingine, lakini Yehova hutuelewa. (Zaburi 103:10-14) Basi, na tuombe kwa ajili ya roho takatifu yake, tukikumbuka kwamba tunda layo la shangwe latokana na Mungu. Baba yetu wa kimbingu mwenye upendo atajibu sala kama hizo naye atatuwezesha kumtumikia kwa shangwe ya moyo.—Luka 11:13.

Shangwe Ikosekanapo

6. Ikiwa hatuna shangwe katika utumishi wetu kwa Mungu, tufanye nini?

⁶ Shangwe ikosekanapo katika utumishi wetu, huenda hatimaye tukapunguza bidii yetu katika kumtumikia Yehova au hata kukosa uaminifu kwake. Kwa hiyo, lingekuwa jambo la hekima kufikiria makusudio yetu kwa unyenyekevu na kwa sala na kufanya marekebisho yatakikanayo. Ili kuwa na shangwe inayotolewa na Mungu, ni lazima tumtumikie Yehova kwa kupenda na kwa moyo wote, nafsi yote, na akili yote. (Mathayo 22:37) Tusitumikie kamwe kwa mtazamo wa ushindani, kwa kuwa Paulo aliandika: “Tukiishi kwa Roho, na tuenende kwa Roho. Tusijisifu bure, tukichokozana na kuhusudiana.” (Wagalatia 5:25, 26) Hatutakuwa na shangwe ya kweli ikiwa twatumikia kwa sababu ya kutaka kushinda wengine au kwa kutaka sifa.

7. Twaweza kuamshaje tena shangwe yetu ya moyo?

⁷ Kuna shangwe katika kutimiza wakfu wetu kwa Yehova. Tulipokuwa wapya katika kujiweka wakfu kwa Mungu, tulianza njia ya maisha ya Kikristo kwa bidii. Tulijifunza Maandiko na kushiriki kwa ukawaida katika mikutano. (Waebrania 10:24, 25) Tulipata shangwe kushiriki katika huduma. Lakini, vipi ikiwa shangwe yetu imepungua? Funzo la Biblia, hudhurio la mkutano, kushiriki katika huduma—kwa kweli, kushiriki kikamili katika kila pande ya Ukristo—kwapasa kuyapa maisha yetu uthabiti wa kiroho na kuamsha tena upendo tuliokuwa nao mwanzoni pamoja na shangwe yetu ya zamani ya moyoni. (Ufunuo 2:4) Kisha hatutakuwa kama wengine ambao kwa njia fulani hawana shangwe na mara nyingi huhitaji msaada wa kiroho. Wazee hufurahi kusaidia, lakini ni lazima sisi mmoja-mmoja tutimize wakfu wetu kwa Mungu. Hakuna mtu yeyote awezaye kutufanyia jambo hilo. Basi na tuwe na mradi wa kufuata mambo ya kawaida ya Kikristo ili kutimiza wakfu wetu kwa Yehova na kuwa na shangwe ya kweli.

8. Kwa nini dhamiri safi ni yenye maana ikiwa twataka kuwa wenye shangwe?

⁸ Ikiwa tutakuwa na shangwe ambayo ni tunda la roho ya Mungu, twahitaji dhamiri safi. Maadamu Mfalme Daudi wa Israeli alijaribu kuficha dhambi yake, yeye alikuwa mwenye huzuni sana. Kwa hakika, umajimaji wa uhai wake ulionekana kutoweka, na huenda alikuja kuwa mgonjwa kihalisi. Alipata kitulizo kama nini alipotubu na kuungama! (Zaburi 32:1-5) Hatuwezi kuwa na shangwe ikiwa tunaficha dhambi fulani nzito. Hilo pia laweza kutufanya tuishi maisha ya masumbufu. Hakika, hiyo si njia ya kupata shangwe. Lakini ungamo na toba huleta kitulizo na kurudishiwa roho ya shangwe.—Mithali 28:13.

Kungojea kwa Shangwe

9, 10. (a) Abrahamu alipokea ahadi gani, lakini huenda imani yake na shangwe yake zilikuwa zimejaribiwaje? (b) Twaweza kunufaikaje kutokana na vielelezo vya Abrahamu, Isaka, na Yakobo?

⁹ Ni rahisi kuwa na shangwe tunapojifunza kwa mara ya kwanza kuhusu kusudi la kimungu lakini ni vigumu kudumisha shangwe miaka mingi ipitapo. Jambo hilo laweza kutolewa kielezi na kisa cha Abrahamu mwaminifu. Baada ya yeye kujaribu kumtoa mwanaye Isaka kwa amri ya Mungu, malaika alileta ujumbe huu: “Nimeapa kwa nafsi yangu asema BWANA, kwa kuwa umetenda neno hili, wala hukunizuilia mwanao, mwanao wa pekee, katika kubariki nitakubariki, na katika kuzidisha nitauzidisha uzao wako kama nyota za mbinguni, na kama mchanga ulioko pwani; na uzao wako utamiliki mlango wa adui zao; na katika uzao wako mataifa yote ya dunia watajibarikia; kwa sababu umetii sauti yangu.” (Mwanzo 22:15-18) Bila shaka, Abrahamu alijawa na shangwe kwa ahadi hiyo.

¹⁰ Huenda Abrahamu alitazamia kwamba Isaka angekuwa ule “uzao” ambao baraka zingekuja kupitia kwake. Lakini miaka mingi iliyopita bila kitu chochote cha ajabu kutimizwa kupitia Isaka huenda kulijaribu imani na shangwe ya Abrahamu na familia yake. Uthibitisho wa Mungu juu ya ile ahadi kwa Isaka na baadaye mwanaye Yakobo uliwahakikishia kwamba kuja kwa Uzao kungali kulikuwa kwa wakati ujao, na jambo hilo liliwasaidia kudumisha imani na shangwe. Lakini, Abrahamu, Isaka, na Yakobo walikufa bila kuona utimizo wa ahadi za Mungu kwao, lakini hawakuwa watumishi wa Yehova wasio na shangwe. (Waebrania 11:13) Sisi nasi twaweza kuendelea kumtumikia Yehova kwa imani na shangwe huku tukingojea utimizo wa ahadi zake.

Shangwe Japo Mnyanyaso

11. Kwa nini twaweza kuwa wenye shangwe tujaponyanyaswa?

¹¹ Tukiwa watumishi wa Yehova, twaweza kumtumikia Yehova kwa shangwe ya moyo, hata kama tunanyanyaswa. Yesu aliwataja kuwa wenye furaha wale wanaonyanyaswa kwa sababu yake, na mtume Petro alisema: “Lakini kama mnavyoyashiriki mateso ya Kristo, furahini [“shangilieni,” NW]; ili na katika ufunuo wa utukufu wake mfurahi kwa shangwe. Mkilaumiwa kwa ajili ya jina la Kristo ni heri yenu; kwa kuwa Roho wa utukufu na wa Mungu anawakalia.” (1 Petro 4:13, 14; Mathayo 5:11, 12) Ikiwa unavumilia mnyanyaso na kuteseka kwa sababu ya uadilifu, una roho na ukubali wa Yehova, na kwa hakika hilo huleta shangwe.

12. (a) Kwa nini twaweza kukabili majaribu ya imani kwa shangwe? (b) Twaweza kujifunza somo gani la msingi kutokana na kisa cha Mlawi fulani aliyekuwa uhamishoni?

¹² Twaweza kukabili majaribu ya imani kwa shangwe kwa sababu Mungu ni Kimbilio letu. Jambo hili laonyeshwa wazi katika Zaburi 42 na 43. Kwa sababu fulani, Mlawi fulani alikuwa uhamishoni. Alitamani sana ibada katika patakatifu pa Mungu hivi kwamba alihisi kama ayala, au dia wa kike, atamaniye maji katika eneo kavu lisilo na kitu. Yeye ‘aliona kiu,’ au kutamani, Yehova na pendeleo la kumwabudu Mungu katika patakatifu Pake. (Zaburi 42:1, 2) Ono la mhamishwa huyo lapaswa kutusukuma kuonyesha shukrani kwa ajili ya ushirika tufurahiao pamoja na watu wa Yehova. Ikiwa hali kama kufungwa kwa sababu ya mnyanyaso yatuzuia kwa muda kutokuwa pamoja nao, basi tufikirie shangwe za zamani tulizopata pamoja nao katika utumishi mtakatifu na kusali kwa ajili ya uvumilivu huku ‘tukimngoja Mungu’ aturudishe kwenye utendaji wa kawaida pamoja na waabudu wake.—Zaburi 42:4, 5, 11, NW; 43:3-5.

“Tumikieni Yehova kwa Kushangilia”

13. Zaburi 100:1, 2 yaonyeshaje kwamba ni lazima shangwe iwe sehemu kuu ya utumishi wetu kwa Mungu?

¹³ Ni lazima shangwe iwe sehemu kuu ya utumishi wetu kwa Mungu. Jambo hilo lilionyeshwa katika wimbo wa shukrani ambamo mtunga-zaburi alisema hivi: “Pigeni kelele kwa ushindi kwa Yehova, enyi watu wote wa dunia. Tumikieni Yehova kwa kushangilia. Kujeni mbele yake kwa kilio cha shangwe.” (Zaburi 100:1, 2, NW) Yehova ni “Mungu mwenye furaha” naye anawataka watumishi wake wapate shangwe watekelezapo wakfu wao kwake. (1 Timotheo 1:11, NW) Watu wa mataifa yote wapaswa kumfurahia sana Yehova, na maneno yetu ya sifa yapaswa yawe yenye nguvu, kama ‘kelele za ushindi’ za jeshi lenye ushindi. Kwa kuwa utumishi kwa Mungu huburudisha, huo wapaswa kufanywa kwa kushangilia. Kwa sababu hiyo, mtunga-zaburi aliwahimiza watu waje katika kuwapo kwa Mungu “kwa kilio cha shangwe.”

14, 15. Zaburi 100:3-5 yatumikaje kwa watu wa Yehova wenye shangwe leo?

¹⁴ Mtunga-zaburi aliongezea hivi: “Jueni [tambueni, kirini] kwamba BWANA ndiye Mungu; ndiye aliyetuumba na sisi tu watu wake; tu watu wake, na kondoo wa malisho yake.” (Zaburi 100:3) Kwa kuwa Yehova ni Muumba wetu, yeye anatumiliki kama ambavyo mchungaji humiliki kondoo zake. Mungu hututunza vema sana hivi kwamba sisi humhimidi kwa shukrani. (Zaburi 23) Kuhusu Yehova, mtunga-zaburi aliimba hivi pia: “Ingieni malangoni mwake kwa kushukuru; nyuani mwake kwa kusifu; mshukuruni, lihimidini jina lake; kwa kuwa BWANA ndiye mwema; rehema zake ni za milele; na uaminifu wake vizazi na vizazi.”—Zaburi 100:4, 5.

¹⁵ Leo, watu wenye shangwe kutoka mataifa yote wanaingia katika nyua za patakatifu pa Yehova ili kutoa shukrani na sifa. Sisi hubariki kwa shangwe jina la Mungu kwa kusema vema sikuzote juu ya Yehova, na sifa zake kuu hutusukuma kumsifu. Yeye ni mwema kabisa kabisa, na fadhili zake za upendo au wororo wake kwa watumishi wake waweza kutegemewa sikuzote, kwa kuwa huo huendelea milele. Kwa “vizazi na vizazi,” Yehova ni mwaminifu katika kuonyesha upendo kuelekea wale wanaofanya mapenzi yake. (Warumi 8:38, 39) Basi, kwa hakika tuna sababu nzuri ya ‘kutumikia Yehova kwa kushangilia.’

Shangilia Katika Tumaini Lako

16. Wakristo waweza kushangilia katika matumaini na matazamio gani?

¹⁶ Paulo aliandika: “Shangilieni katika tumaini.” (Warumi 12:12, NW) Wafuasi watiwa-mafuta wa Yesu Kristo hushangilia katika tumaini tukufu la uhai usioweza kufa wa kimbingu ambao Mungu alifanya waupate kupitia Mwana wake. (Warumi 8:16, 17; Wafilipi 3:20, 21) Wakristo wenye tumaini la kupata uhai wa milele katika Paradiso duniani vilevile wana sababu ya kushangilia. (Luka 23:43) Watumishi wote wa Yehova walio waaminifu wana sababu za kushangilia katika tumaini la Ufalme, kwa kuwa watakuwa ama sehemu ya serikali hiyo ya kimbingu ama wataishi chini ya utawala wayo wa kidunia. Hiyo ni baraka yenye shangwe kama nini!—Mathayo 6:9, 10; Warumi 8:18-21.

17, 18. (a) Ni nini kilichotabiriwa katika Isaya 25:6-8? (b) Unabii huu wa Isaya unatimizwaje sasa, na vipi juu ya utimizo wao katika wakati ujao?

¹⁷ Isaya pia alitabiri wakati ujao wenye shangwe kwa wanadamu watiifu. Yeye aliandika: “Katika mlima huu BWANA wa majeshi atawafanyia mataifa yote karamu ya vitu vinono, karamu ya divai iliyokaa juu ya urojorojo wake, karamu ya vinono vilivyojaa mafuta, karamu ya divai iliyokaa juu ya urojorojo wake, iliyochujwa sana. Naye katika mlima huu atauharibu uso wa sitara iliyowekwa juu ya watu wote, na utaji ule uliotandwa juu ya mataifa yote. Amemeza mauti hata milele; na Bwana MUNGU atafuta machozi katika nyuso zote; na aibu ya watu wake ataiondoa katika ulimwengu wote; maana BWANA amenena hayo.”—Isaya 25:6-8.

¹⁸ Karamu ya kiroho ambayo sisi hushiriki leo tukiwa waabudu wa Yehova ni karamu ya shangwe kwelikweli. Hakika, shangwe yetu hufurika tumtumikiapo Mungu kwa bidii tunapotazamia karamu ya vitu halisi vilivyo vizuri ambavyo ameahidi kwa ulimwengu mpya. (2 Petro 3:13) Kwa msingi wa dhabihu ya Yesu, Yehova ataondoa “utaji” uliotandwa juu ya watu kwa sababu ya dhambi ya Adamu. Itakuwa shangwe kama nini kuona dhambi na kifo vikiondolewa! Ni furaha kama nini kuwakaribisha tena wapendwa wafufuliwao, kuona kwamba machozi yametoweka, na kuishi katika dunia paradiso, ambamo watu wa Yehova hawatakuwa na aibu bali watakuwa wamempa Mungu jibu kwa yule mlawami mkuu, Shetani Ibilisi!—Mithali 27:11.

19. Twapaswa kuitikiaje kwa matazamio ambayo Yehova ameweka mbele yetu tukiwa Mashahidi wake?

¹⁹ Je, hujawi na shangwe na shukrani kujua mambo ambayo Yehova atafanyia watumishi wake? Hakika, matazamio hayo makuu huchangia shangwe yetu! Na zaidi tumaini letu lenye baraka hutufanya tumwone Mungu wetu mkarimu mwenye furaha na upendo kwa maneno kama haya: “Tazama, huyu ndiye Mungu wetu, ndiye tuliyemngoja atusaidie; huyu ndiye BWANA tuliyemngoja, na tushangilie na kuufurahia wokovu wake.” (Isaya 25:9) Tumaini letu zuri ajabu likiwa limekazwa kikiki akilini mwetu, na tutumie kila jitihada kumtumikia Yehova kwa shangwe ya moyo.

Ungejibuje?

◻ Twaweza kumtumikiaje Yehova kwa “shangwe ya moyo”?

◻ Twaweza kufanya nini ikiwa tunakosa shangwe katika utumishi wetu kwa Mungu?

◻ Kwa nini watu wa Yehova waweza kuwa na shangwe wajaponyanyaswa?

◻ Tuna sababu gani za kushangilia katika tumaini letu?

[Picha katika ukurasa wa 17]

Kushiriki katika pande zote za maisha ya Kikristo kutaongeza shangwe yetu