Ukarimu Unapokuwa Mwingi
KAMA ungekuwa na fursa ya kumpa mfalme zawadi, wewe ungempa nini? Namna gani kama angekuwa mtawala tajiri zaidi na mwenye hekima zaidi duniani? Je, ungeweza kufikiria zawadi yoyote ambayo ingempendeza? Miaka ipatayo elfu tatu iliyopita, malkia wa Sheba alitafakari maswali hayo alipokuwa akijitayarisha kumzuru mfalme kama huyo—Mfalme Solomoni wa Israeli.
Biblia hutuambia kwamba zawadi yake ilitia ndani talanta 120 za dhahabu “na manukato mengi, mengi sana, na vito vya thamani.” Kwa bei ya leo, dhahabu hiyo peke yake ingekuwa na thamani ya dola 40,000,000 za Marekani. Manukato, mafuta yenye kunukia vizuri na yenye kuponya, yalikuwa na thamani kama ya dhahabu. Ingawa Biblia haisemi malkia huyo alimpa Solomoni mafuta mengi kadiri gani, hiyo hutuambia kwamba zawadi yake haikuwa na kifani.—1 Wafalme 10:10.
Kwa wazi, malkia wa Sheba alikuwa mwanamke tajiri na mkarimu. Isitoshe, yeye pia alitendewa kwa ukarimu. “Mfalme Sulemani” Biblia yasema, “a[li]mpa malkia wa Sheba haja yake yote, kila alilotaka, zaidi ya vile alivyomletea mfalme.” (2 Mambo ya Nyakati 9:12, italiki ni zetu) Ni kweli kwamba huenda ilikuwa desturi kwa watawala kubadilishana zawadi; lakini Biblia hutaja kihususa “ukarimu” wa Solomoni. (1 Wafalme 10:13) Solomoni mwenyewe aliandika: “Nafsi ya mtu mkarimu itawandishwa; anyweshaye atanyweshwa mwenyewe.”—Mithali 11:25.
Bila shaka, malkia wa Sheba pia alitumia wakati wake mwingi na jitihada pia ili kumzuru Solomoni. Yaonekana Sheba ilikuwa katika eneo ambalo sasa ni Jamhuri ya Yemeni; hivyo malkia huyo, na msafara wake wa ngamia, alisafiri zaidi ya kilometa 1,600 kwenda Yerusalemu. Kama vile Yesu alivyosema, “alikuja kutoka miisho ya dunia.” Kwa nini malkia wa Sheba alifanya jitihada kubwa hivyo? Alikuja hasa “aisikie hekima ya Solomoni.”—Luka 11:31.
Kitabu cha 1 Wafalme 10:1, 2 chasema kwamba malkia wa Sheba “alikuja ili amjaribu [Solomoni] kwa maswali ya fumbo. . . . Akazungumza naye mambo yote aliyokuwa nayo moyoni.” Solomoni aliitikiaje? “Naye Sulemani akamfumbulia maswali yake yote; wala hakukuwa na neno alilofichiwa mfalme asimwambie.”—1 Wafalme 10:3.
Akiwa ameshangazwa na yale aliyosikia na kuona, malkia huyo alijibu kwa unyenyekevu hivi: “Heri watumishi hawa wako, wasimamao mbele yako siku zote, wakisikia hekima yako.” (1 Wafalme 10:4-8) Hakuwatangaza watumishi wa Solomoni kuwa wenye furaha kwa sababu walizungukwa na utajiri—ingawa ndivyo ilivyokuwa. Badala yake, watumishi wa Solomoni walibarikiwa kwa sababu wangeweza kusikiliza daima hekima ambayo Solomoni alipewa na Mungu. Malkia wa Sheba ni kielelezo kizuri kama nini kwa watu wa Yehova leo, ambao wanapata kwa wingi hekima ya Muumba mwenywe na ya Mwana wake, Yesu Kristo!
Maneno ambayo malkia alifuatisha kumwambia Solomoni yafaa pia kuangaliwa: “Na ahimidiwe BWANA, Mungu wako.” (1 Wafalme 10:9) Inaonekana kwamba aliona mkono wa Yehova katika hekima na ufanisi wa Solomoni. Jambo hilo lapatana na lile ambalo Yehova alikuwa amewaahidi Waisraeli hapo awali. ‘Kushika amri zangu,’ akasema, “ndiyo hekima yenu na akili zenu, machoni pa mataifa watakaozisikia amri hizi zote, nao watasema, Hakika taifa hili kubwa ni watu wenye hekima na akili.”—Kumbukumbu la Torati 4:5-7.
Kumwendea Mpaji wa Hekima
Katika siku zetu, mamilioni ya watu wamevutwa kwa tengenezo la Yehova kwa sababu wamefahamu kwamba “Israeli wa Mungu” ni “watu wenye hekima na akili,”si kiasili, lakini kwa sababu wanaongozwa na sheria na kanuni kamilifu za Mungu. (Wagalatia 6:16) Takwimu za ubatizo zaonyesha kwamba katika miaka ya karibuni mamia ya maelfu ya wanafunzi wapya wamewaambia Israeli wa kiroho hivi: “Tutakwenda pamoja nanyi, kwa maana tumesikia kwamba Mungu yu pamoja nanyi.” (Zekaria 8:23) Wanashangaa kama nini watu hao wapya waonapo karamu ya chakula cha kiroho ambayo Yehova amewaandalia watumishi wake! Hawajawahi kuona karamu ya aina hiyo katika dini zao za zamani.—Isaya 25:6.
Kumpa Mpaji Mkuu Zaidi
Wakiwa wamepokea vitu vingi hivyo, kwa kawaida watu wenye uthamini hujiuliza kile wawezacho kumpa Mfalme na Mpaji mkuu zaidi, Yehova Mungu. Biblia hufunua kwamba zawadi iliyo bora zaidi tuwezayo kumpa Yehova ni “dhabihu ya sifa.” (Waebrania 13:15) Kwa nini? Kwa sababu dhabihu hiyo inahusiana moja kwa moja na kuokoa uhai, jambo ambalo Yehova anahangaikia zaidi wakati huu wa mwisho. (Ezekieli 18:23) Kwa kuongezea, kutumia nguvu zako na wakati wako ili kuwasaidia wagonjwa, walioshuka moyo, na wengineo ni dhabihu yenye kukubalika.—1 Wathesalonike 5:14; Waebrania 13:16; Yakobo 1:27.
Michango ya kifedha pia hutimiza fungu muhimu. Inafanya iwezekane kuchapisha Biblia, fasihi zinazotegemea Biblia, na kupata mahali ambapo Wakristo wanaweza kukutania. (Waebrania 10:24, 25) Michango pia huandaa fedha za kusaidia walioathiriwa na vita na misiba ya asili.
Ili tupate mwongozo kuhusiana na kutoa, Neno la Mungu lataja kanuni fulani nzuri. Kwa mfano, hilo hufundisha kwamba Wakristo hawatoi kiasi fulani walichopangiwa, bali kiasi ambacho kwa kufaa wanaweza kutoa, wakifanya hivyo kwa kupenda na kwa moyo mchangamfu. (2 Wakorintho 9:7) Wengine wanaweza kutoa kiasi kikubwa; huenda wengine, kama yule mjane mwenye uhitaji wakati wa Yesu, wakaweza kutoa kiasi kidogo tu. (Luka 21:2-4) Je, si jambo lenye kutokeza kwamba Yehova—Mmilikaji wa ulimwengu wote—huthamini kila zawadi na dhabihu itolewayo kwa nia nzuri kwa ajili ya jina lake?—Waebrania 6:10.
Ili waweze kutoa kwa uchangamfu, watu wa Yehova hujulishwa mahitaji mbalimbali na njia zenye matokeo za kuyashughulikia. Nayo, roho takatifu ya Yehova huchochea wenye mioyo ya hiari waitikie. Katika Israeli la kale utaratibu huo ulifuatwa katika kujenga tabenakulo na baadaye, hekalu. (Kutoka 25:2; 35:5, 21, 29; 36:5-7; 39:32; 1 Mambo ya Nyakati 29:1-19) Katika karne ya kwanza W.K., utaratibu huohuo uliwawezesha Wakristo kupata rasilimali walizohitaji ili kuyapelekea mataifa habari njema za Ufalme na kuwategemeza ndugu katika Israeli wakati wa njaa kuu.—1 Wakorintho 16:2-4; 2 Wakorintho 8:4, 15; Wakolosai 1:23.
Hali kadhalika leo, Yehova amewabariki watu wake, naye ataendelea kuwabariki, kwa kuwapa kile wanachohitaji ili kukamilisha kampeni kubwa sana ya kuhubiri na kufundisha ambayo ulimwengu haujapata kuiona.—Mathayo 24:14; 28:19, 20.
Kuna Mahitaji Gani Wakati Huu?
Katika miaka ya karibuni Mashahidi wa Yehova wamesajiliwa katika nchi nyingi ambako kazi yao ilikuwa imezuiwa. Matokeo yamekuwa kwamba wahubiri wameongezeka sana katika nyingi za nchi hizo. Ni jambo linaloeleweka kwamba Biblia na fasihi zinazotegemea Biblia zinahitajika sana.
Majumba ya Ufalme yanahitajiwa pia. Majumba ya Ufalme mapya yapatayo 9,000 yanahitajiwa ulimwenguni pote sasa hivi. Ikiwa Jumba la Ufalme moja lingejengwa kila siku, ingechukua zaidi ya miaka 24 kutimiza mahitaji ya wakati huu! Wakati huohuo, makutaniko yapatayo saba hufanyizwa kila siku, mengi katika sehemu za ulimwengu ambako hakuna fedha za kutosha. Kwa upande mwingine, mengi ya maeneo hayo hayahitaji majengo yenye gharama kubwa. Katika maeneo mengine, Jumba la Ufalme linalotosha na lenye kutoa ushahidi mzuri kwa jumuiya laweza kukamilishwa kwa dola 6,000 tu za Marekani.
Katika karne ya kwanza, Wakristo wengine walikuwa na mali nyingi kushinda wengine, kwa hiyo mtume Paulo aliandika: “Kupitia usawazisho wa ziada yenu sasa hivi ipate kujazia upungufu wao, ili ziada yao ipate pia kujazia upungufu wenu, ili usawazisho upate kutukia.” (2 Wakorintho 8:14) Leo, “usawazisho” unaofanana na huo unatoa fedha zinazohitajiwa ili kuandaa Biblia, fasihi za Biblia, Majumba ya Ufalme, misaada ya misiba, na mambo mengine katika sehemu nyingi za ulimwengu. Utoaji huo ni baraka iliyoje—kwa mtoaji na mpokeaji pia!—Matendo 20:35.
Kama ionyeshwavyo na barua ambazo Sosaiti hupokea kutoka kwa watu wenye mioyo mikarimu, wasomaji wengi wa gazeti hili wangetaka kusaidia lakini hawajui sana juu ya njia mbalimbali ambazo wanaweza kutoa michango yao. Hapana shaka kwamba sanduku linaloandamana na makala hii litawasaidia kujibu maswali hayo.
Wakati wa utawala wenye utukufu wa Solomoni, “wafalme wote wa duniani” waliomsikia walikuja kumtembelea. Hata hivyo, Biblia hutaja mtawala mmoja tu—malkia wa Sheba. (2 Mambo ya Nyakati 9:23) Alijidhabihu kama nini! Lakini alithawabishwa sana—sana hivi kwamba mwishoni mwa ziara yake, ‘alishangaa sana.’—2 Mambo ya Nyakati 9:4, BHN.
Wakati ujao, Yehova, Mfalme na Mpaji mkuu zaidi, atawafanyia wale wanaojidhabihu kwa ajili Yake mengi zaidi ya yale ambayo Solomoni angeweza kufanya. Hao wataitikia kwa kusimama wakiwa ‘wameshangaa sana,’ kwa kuwa Yehova hatawahifadhi tu katika siku yake ya hukumu yenye kutia hofu lakini baadaye ‘ataufumbua mkono wake na kushibisha kila kilicho hai matakwa yake.’—Zaburi 145:16.
[Sanduku katika ukurasa wa 22]
Njia Ambazo Watu Fulani Huchagua Kutoa
MICHANGO KWA KAZI YA ULIMWENGUNI POTE
WENGI huweka kando, au hupangia kiasi cha fedha ambazo wao hutia katika masanduku ya michango yenye kibandiko “Michango kwa Kazi ya Sosaiti ya Ulimwenguni Pote—Mathayo 24:14.” Kila mwezi makutaniko hupeleka kiasi hicho ama kwenye makao makuu ya ulimwengu katika Brooklyn, New York, ama kwenye ofisi ya tawi ya kwao.
Upaji wa hiari wa fedha waweza kupelekwa pia moja kwa moja kwenye Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, au kwenye ofisi ya tawi ya Sosaiti inayotumikia nchi yako. Vito au mali nyingine zenye thamani zaweza kutolewa pia. Barua fupi yenye kutaarifu kwamba hiyo ni zawadi ya moja kwa moja yapaswa iambatane na michango hiyo.
MPANGO WA UPAJI WENYE MASHARTI
Fedha zaweza kupewa Watch Tower Society kukiwa na uandalizi maalumu kwamba kukiwa na uhitaji wa kibinafsi, zitarudishwa kwa mpaji. Kwa habari zaidi, tafadhali wasiliana na Treasurer’s Office kwenye anwani iliyoonyeshwa juu.
UTOAJI ULIOPANGWA
Kuongezea zawadi za fedha za moja kwa moja na upaji wa fedha wenye masharti, kuna njia nyinginezo za kutoa ili kufaidi utumishi wa Ufalme wa ulimwenguni pote. Hizo zatia ndani:
Bima: Watch Tower Society yaweza kutajwa kuwa mfaidikaji wa sera ya bima ya maisha au katika mpango wa kustaafu kazi/malipo ya uzeeni.
Akiba za Benki: Akiba za benki, hati za amana, au akiba za fedha za kustaafu za watu mmoja-mmoja zaweza kuwekwa zikiwa amana kwa ajili ya au kuweza kulipwa wakati wa kifo kwa Watch Tower Society, kulingana na matakwa ya benki ya hapo.
Hisa na Dhamana: Hisa na dhamana zaweza kupewa Watch Tower Society ama zikiwa zawadi ya moja kwa moja ama zikiwa chini ya mpango ambao mapato yaendelea kulipwa kwa mpaji.
Mashamba na Nyumba: Mashamba na nyumba ziwezazo kuuzwa zaweza kupewa Watch Tower Society ama kwa kutoa zawadi ya moja kwa moja ama kwa kuweka shamba au nyumba ya maisha kwa ajili ya mpaji, ambaye aweza kuendelea kuishi humo muda wa maisha yake. Mtu apaswa kuarifu Sosaiti kabla ya kuipa Sosaiti hati yoyote ya mashamba na nyumba.
Wasia na Amana: Watch Tower Society yaweza kurithishwa mali au fedha kwa njia ya wasia wenye kutekelezwa kisheria, au Sosaiti yaweza kutajwa kuwa mfaidikaji wa mkataba wa amana. Amana inayofaidi tengenezo la kidini yaweza kuandaa faida fulani za kodi.
Kama vile mtajo “utoaji uliopangwa” udokezavyo, upaji wa aina hii hutaka mpaji afanye mipango fulani hasa. Ili kuwasaidia watu mmoja-mmoja wanaotamani kunufaisha Sosaiti kupitia aina fulani ya utoaji uliofanyiwa mpango, Sosaiti imetayarisha broshua ya Kiingereza yenye kichwa Planned Giving to Benefit Kingdom Service Worldwide. Broshua hiyo iliandikwa kufuatia maswali mengi ambayo Sosaiti imepokea kuhusu zawadi, wasia, na amana. Pia ina habari ya ziada yenye mafaa juu ya mipango ya mashamba, ya kifedha, na kodi. Nayo imekusudiwa kuwasaidia watu mmoja-mmoja walio Marekani wanaopanga kuipa Sosaiti zawadi ya kipekee sasa au kuacha wasia wafapo wateue njia zenye matokeo na zenye kufaa zaidi kwa kufikiria hali za familia na za kibinafsi. Unaweza kupata broshua hii kwa kuiomba moja kwa moja kwenye Ofisi ya Utoaji Uliopangwa.
Baada ya kusoma broshua hiyo na kushauriana na Ofisi ya Utoaji Uliopangwa, watu wengi wameweza kusaidia Sosaiti na wakati uleule kupata faida kubwa zaidi ya manufaa ya kodi ya kufanya hivyo. Ofisi ya Utoaji Uliopangwa yapasa kujulishwa na kupokea hati yoyote ile yenye kuhusiana na yoyote ya mipango hiyo. Ikiwa unapendezwa na yoyote ya mipango hiyo ya utoaji iliyofanyiwa mpango, unapaswa uwasiliane na Ofisi ya Utoaji Uliopangwa ama kwa kuandika ama kwa kupiga simu kwenye anwani iliyoonyeshwa hapa chini au kwenye ofisi ya tawi inayotumikia nchi yako.
OFISI YA UTOAJI ULIOPANGWA
International Bible Students Association
P.O. Box 47788
Nairobi, Kenya
Simu: 573211-20
[Picha katika ukurasa wa 23]
Utendaji wa Mashahidi wa Yehova hutegemezwa kwa michango ya hiari