Je, Mungu Ni Halisi Kwako?

UNAPOPATWA na matatizo yenye kutaabisha, je, wewe humfikia Mungu kwa sala? Ikiwa ndivyo, je, wewe huhisi kwamba unazungumza na mtu halisi?

Akimrejezea Baba yake wa kimbingu, Yesu Kristo alisema: “Yeye aliyenituma ni halisi.” (Yohana 7:28) Ndiyo, Yehova Mungu ni halisi, na kutoa sala kwake ni kama kumwendea rafiki wa karibu wa kibinadamu ili kupata msaada au shauri. Bila shaka, ili Mungu atusikilize, ni lazima sala zetu zipatane na matakwa ya Kimaandiko ya sala zenye kukubalika. Kwa mfano, ni lazima kwa unyenyekevu tumfikie “Msikiaji wa sala” kupitia Mwana wake Yesu Kristo.—Zaburi 65:2, NW; 138:6; Yohana 14:6.

Huenda wengine wakahisi kwamba kwa kuwa Mungu haonekani, yeye hana utu. Huenda kwao Mungu akaonekana kuwa wa kuwaziwa tu. Hata nyakati nyingine huenda Wakristo fulani ambao wamejifunza juu ya sifa za ajabu za Mungu wakashindwa kufahamu jinsi yeye alivyo halisi. Je, umepatwa na hali kama hiyo? Ikiwa ndivyo, ni nini kiwezacho kukusaidia kufanya Yehova Mungu awe halisi kwako?

Jifunze Maandiko

Je, wewe hujifunza Maandiko Matakatifu kwa ukawaida? Kadiri vipindi vyako vya kujifunza Biblia viwavyo vingi zaidi na vyenye umakini zaidi, ndivyo Yehova Mungu atakavyokuwa halisi zaidi kwako. Hivyo, imani yako itaimarishwa, ikikusaidia kwa kweli ‘kumwona Yeye asiyeonekana.’ (Waebrania 11:6, 27) Kwa upande mwingine, yaelekea funzo la Biblia lisilo la kawaida au lisiloratibiwa halitakuwa na matokeo yenye maana kwa imani yako.

Kwa kutoa kielezi: Ebu wazia kwamba daktari wako amekuagiza ujipake dawa fulani ya kuchua mara mbili kwa siku ili kumaliza vipele visivyopona kwa haraka. Je, vipele vyako vingeisha kama ungepaka hiyo dawa ya kuchua mara moja au mara mbili kwa mwezi? Haiwezekani. Vivyo hivyo, mtunga-zaburi atupatia “agizo” fulani ili tuwe na afya ya kiroho. Soma Neno la Mungu “kwa sauti ya chini mchana na usiku.” (Zaburi 1:1, 2, NW) Ili tufurahie manufaa zenye kuongezeka twahitaji kufuata “agizo” hilo—kuchunguza Neno la Mungu kila siku kwa msaada wa vichapo vya Kikristo.—Yoshua 1:8.

Je, ungependa kufanya vipindi vyako vya kujifunza viwe vyenye kuimarisha imani zaidi? Hapa pana dokezo moja: Baada ya kusoma sura fulani katika Tafsiri ya Ulimwengu Mpya ya Maandiko Matakatifu au Biblia nyingineyo ambayo ina marejezo yanayolingana, teua mstari fulani wenye kupendeza, kisha chunguza maandiko yaliyorejezewa ambayo yametajwa. Kufanya hivyo kutaboresha kujifunza kwako, na bila shaka utavutiwa na upatano wa ndani wa Biblia. Hilo nalo litafanya Mtungaji wake, Yehova Mungu, awe halisi zaidi kwako.

Kutumia marejezo yanayolingana kwaweza pia kukufahamisha unabii mbalimbali wa Biblia na kutimizwa kwake. Labda wewe unafahamu unabii mbalimbali wa Biblia ulio mkuu, kama ule unaohusiana na kuharibiwa kwa Yerusalemu na Wababiloni. Hata hivyo, Biblia ina mfumo wa unabii mbalimbali unaohusiana, na pia utimizo wake. Baadhi ya unabii huo haujulikani vizuri.

Kwa mfano, soma unabii kuhusu adhabu ya kujenga upya Yeriko kisha uchunguze kutimizwa kwake. Andiko la Yoshua 6:26 lasema: “Yoshua akawaapisha kiapo wakati ule, akasema, Na alaaniwe mbele za BWANA mtu yule atakayeinuka na kuujenga tena mji huu wa Yeriko; ataweka msingi wake kwa kufiliwa na mzaliwa wa kwanza wake, tena atayasimamisha malango yake kwa kufiliwa na mtoto wake mwanamume aliye mdogo.” Unabii huo ulitimizwa yapata miaka 500 baadaye, kwa vile twasoma hivi kwenye 1 Wafalme 16:34: “Katika [siku za Mfalme Ahabu], Hieli Mbetheli akajenga Yeriko; akatia misingi yake kwa kufiwa na Abiramu mzaliwa wake wa kwanza, na kuyaweka malango yake kwa kufiwa na mwana wake mdogo Segubu; sawasawa na neno la BWANA alilolinena kwa Yoshua mwana wa Nuni.”a Mungu aliye halisi tu ndiye angeweza kupulizia unabii mbalimbali kama huo na kushughulikia kutimizwa kwake.

Unaposoma Biblia, huenda ukataka kujua juu ya jambo fulani. Kwa mfano, huenda ukajiuliza ni miaka mingapi iliyopita kati ya kutolewa kwa unabii fulani na kutimizwa kwake. Badala ya kuuliza tu mtu mwingine, kwa nini usijitahidi kujitafutia mwenyewe? Kwa kutumia chati na misaada ya kujifunzia Biblia, tafuta kwa bidii kupata majibu ya maswali hayo kama vile ambavyo ungejitahidi kuvumbua mahali ilipo hazina kwenye ramani. (Mithali 2:4, 5) Kupata majibu kutakuwa na matokeo makubwa juu ya imani yako na kutafanya Yehova Mungu awe halisi zaidi kwako.

Sali kwa Ukawaida na kwa Bidii

Usipuuze umuhimu wa sala na imani. Wanafunzi wa Yesu walitoa ombi hili la moja kwa moja: “Tupe sisi imani zaidi.” (Luka 17:5) Ikiwa Yehova hajaonekana kuwa halisi kwako, kwa nini usisali kwake kuhusu uhitaji wako wa kuwa na imani zaidi? Mwombe Baba yako wa kimbingu kwa uhakika ili akusaidie umfanye yeye mwenyewe kuwa halisi kwako.

Ukiwa na tatizo linalokusumbua, chukua wakati unaohitajika kujieleza kwa Rafiki yako wa kimbingu kwa njia ya kuhisiwa moyoni. Yesu alipokaribia kifo, alisali kwa juhudi nyingi. Ingawa alilaumu zoea la kidini la kutoa sala ndefu kwa kusudi la kujionyesha, yeye alitumia usiku mzima akisali faraghani kabla ya kuwateua mitume wake 12. (Marko 12:38-40; Luka 6:12-16) Tunaweza pia kujifunza kutokana na Hana, aliyekuja kuwa mama ya nabii Samweli. Kwa kutamani sana mtoto wa kiume, ‘alidumu kuomba mbele za BWANA.’—1 Samweli 1:12.

Twapata somo gani la msingi katika hayo yote? Ikiwa watumaini kupata majibu kwa sala zako, ni lazima usali kwa bidii, bila kukoma—na, bila shaka, kwa kupatana na mapenzi ya Mungu. (Luka 22:44; Waroma 12:12; 1 Wathesalonike 5:17; 1 Yohana 5:13-15) Kufanya hivyo kutamfanya Mungu awe halisi kwako.

Chunguza Uumbaji

Utu wa msanii waweza kufunuliwa na michoro yake. Vivyo hivyo, “sifa zisizoonekana” za Yehova, Mbuni na Muumba wa ulimwengu, zaonekana waziwazi katika uumbaji. (Waroma 1:20) Tuchunguzapo kwa makini kazi ya Yehova, sisi hupata kuelewa utu wake vizuri zaidi, na hivyo yeye huwa halisi zaidi kwetu.

Ukichunguza kwa makini vitu ambavyo Mungu aliumba, huenda ukavutiwa sana na uhalisi wa sifa zake. Kwa mfano, habari kuhusu uwezo wa ndege wa kusafiri angani zaweza kuzidisha uthamini wako kwa hekima ya Yehova. Unaposoma juu ya ulimwengu, waweza kujifunza kwamba Njia ya Kimaziwa, iliyo na upana wa miaka-nuru 100,000, ni mojawapo tu ya mamilioni ya galaksi katika anga yote. Je, hilo halifanyi uvutiwe na uhalisi wa hekima ya Muumba?

Bila shaka hekima ya Yehova ni halisi! Lakini hilo lamaanisha nini kwako? Yeye hawezi kutatanishwa na matatizo ambayo yeyote kati yetu humpelekea katika sala. Ndiyo, hata ujuzi kidogo juu ya uumbaji waweza kumfanya Yehova awe halisi zaidi kwako.

Tembea Pamoja na Yehova

Je, wewe unaweza kujionea jinsi Yehova alivyo halisi? Ndiyo, ikiwa wewe ni kama Noa, mzee wa ukoo mwaminifu. Sikuzote alimtii Yehova sana hivi kwamba ingeweza kusemwa: ‘Noa alitembea pamoja na Mungu.’ (Mwanzo 6:9) Noa aliishi kana kwamba Yehova alikuwa karibu sana naye. Mungu aweza kuwa halisi hivyo kwako.

Ikiwa unatembea pamoja na Mungu, basi unatumaini ahadi za Kimaandiko na kutenda kupatana nazo. Kwa mfano, unaamini maneno haya ya Yesu: “Fulizeni kutafuta kwanza ufalme na uadilifu [wa Mungu], na vitu vingine vyote hivi [mahitaji ya kimwili] mtaongezewa.” (Mathayo 6:25-33) Ni kweli kwamba, huenda Yehova asikuandalie kila unachohitaji kwa njia utarajiayo. Hata hivyo, usalipo na kuona msaada wa Mungu, atakuwa halisi kwako kama vile mtu aliye karibu nawe awezavyo kuwa.

Uhusiano wa karibu kama huo pamoja na Yehova husitawi kadiri mtu adumuvyo kutembea pamoja na Mungu. Fikiria Manuela, Shahidi mwenye kuzungumza Kihispania, ambaye alivumilia majaribu mengi. Yeye asema: “Kila ninaposumbuka au ninapokuwa na uhitaji, nimetumia kanuni ipatikanayo kwenye Mithali 18:10. Mimi humkimbilia Yehova kupata msaada. Sikuzote yeye amekuwa ‘ngome imara’ kwangu.” Manuela aweza kusema hivyo baada ya kumtegemea Yehova kwa miaka 36 na kujionea utegemezo wake.

Je, wewe ndio tu unaanza kumfanya Yehova kuwa tumaini lako? Usivunjike moyo ikiwa uhusiano wako pamoja naye bado haujapata kuwa vile ambavyo ungetaka uwe. Ishi kila siku kama mtu ambaye anatembea pamoja na Mungu. Unapositawisha mtindo wa maisha wenye uaminifu, utafurahia uhusiano wa karibu zaidi pamoja na Yehova.—Zaburi 25:14; Mithali 3:26, 32.

Njia nyingine ya kutembea pamoja na Mungu ni kuwa na shughuli nyingi katika utumishi wake. Unaposhiriki katika utendaji wa kuhubiri Ufalme, wewe ni mfanyakazi mwenzi pamoja na Yehova. (1 Wakorintho 3:9) Kufahamu hilo husaidia kufanya Mungu awe halisi sana kwako.

Mtunga-zaburi ahimiza: “Umkabidhi BWANA njia yako, pia umtumaini, naye atafanya [“atachukua hatua,” NW].” (Zaburi 37:5) Usikose kamwe kumkabidhi Mungu mizigo yoyote yenye kulemea au mahangaiko yoyote uliyo nayo. Sikuzote mtegemee ili upate msaada na mwongozo. Ukimtegemea Yehova Mungu kwa sala na kumtumaini kwa uthabiti sikuzote, utajihisi salama kwa sababu unajua kwamba hatakosa kuchukua hatua kwa niaba yako. Je, una uhakika unapomfikia Yehova ukiwa na mahangaiko ya kibinafsi? Utakuwa nao—ikiwa Mungu ni halisi kwako.

[Maelezo ya Chini]

[Picha katika ukurasa wa 21]

Fanya vipindi vyako vya kujifunza viwe vyenye kuimarisha imani

[Picha katika ukurasa wa 22]

Tenga wakati kwa ajili ya sala ya kawaida yenye bidii

[Picha katika ukurasa wa 23]

Chunguza jinsi sifa za Mungu zinavyodhihiri- shwa katika uumbaji

[Hisani]

Ndege-mvumi: U.S. Fish and Wildlife Service, Washington, D.C./Dean Biggins; nyota: Photo: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands