‘Je, Moyo Wako Umenyoka Pamoja na Moyo Wangu?’

“Fuatana nami ukaone kutovumilia kwangu ushindani wowote kuelekea Yehova.”—2 WAFALME 10:16, NW.

1, 2. (a) Hali ya kidini ya Israeli ilipataje kuwa mbaya zaidi hatua kwa hatua? (b) Ni mabadiliko gani yenye kutokeza yaliyokuwa karibu kutukia katika Israeli mwaka wa 905 K.W.K.?

MWAKA wa 905 K.W.K. ulikuwa wakati wa mabadiliko makubwa katika Israeli. Miaka karibu 100 mapema, Yehova alikuwa amesababisha ufalme wa Israeli wenye muungano ugawanyike kwa sababu ya uasi wa Solomoni. (1 Wafalme 11:9-13) Ufalme wa kusini, Yuda, wakati huo ulitawalwa na Rehoboamu mwana wa Solomoni huku ufalme wa kaskazini, Israeli, ukawa chini ya Mfalme Yeroboamu, aliyekuwa Mwefraimu. Kwa kusikitisha, ufalme wa kaskazini ulikuwa na mwanzo wenye kuleta msiba. Yeroboamu hakutaka raia wake waende hadi ufalme wa kusini ili kuabudu kwenye hekalu, akihofia kwamba wangepata wazo la kurudia nyumba ya Daudi. Kwa hiyo alianzisha ibada ya ndama katika Israeli na hivyo kuanzisha utaratibu wa ibada ya sanamu uliodumu kwa kadiri fulani katika historia yote ya ufalme wa kaskazini.—1 Wafalme 12:26-33.

² Hali ilipata kuwa mbaya zaidi wakati ambapo Ahabu, mwana wa Omri, alipata kuwa mfalme. Yezebeli, mke wake wa kigeni, aliendeleza ibada ya Baali na kuwaua manabii wa Yehova. Ahabu hakufanya lolote ili kumzuia, ajapoonywa waziwazi na nabii Eliya. Hata hivyo, mwaka wa 905 K.W.K., Ahabu alikuwa mfu, na Yehoramu, mwanaye, alitawala. Sasa ulikuwa wakati wa nchi kutakaswa. Elisha, mwandamizi wa Eliya, alimwarifu kamanda wa kijeshi, Yehu, kwamba Yehova alikuwa akimtia mafuta awe mfalme wa Israeli ambaye angefuata. Utume wake? Kuipiga nyumba ya Ahabu yenye dhambi na kulipiza damu ya manabii iliyokuwa imemwagwa na Yezebeli!—2 Wafalme 9:1-10.

3, 4. Yehonadabu alionyeshaje kwamba moyo wake ulikuwa ‘umenyoka pamoja na moyo wa Yehu’?

³ Kwa kuwa mtiifu kwa amri ya Mungu, Yehu aliamuru Yezebeli mwovu auawe, na baada ya hapo akaondoka kwenda kutakasa Israeli kwa kuipiga nyumba ya Ahabu. (2 Wafalme 9:15–10:14, 17) Ndipo akakutana na mwungaji-mkono fulani. “Akamkuta Yehonadabu mwana wa Rekabu akija kumlaki; akamsalimu akamwambia, Je! moyo wako umenyoka, kama moyo wangu ulivyo pamoja na moyo wako? Akajibu Yehonadabu, Ndio. Yehu akamwambia, Kama ndio, nipe mkono wako. Akampa mkono, akamkalisha pamoja naye garini. Akasema, Fuatana nami, ukaone wivu wangu kwa BWANA [“kutovumilia kwangu ushindani wowote kuelekea Yehova,” NW]. Wakampandisha garini mwake.”—2 Wafalme 10:15, 16.

⁴ Yehonadabu (au, Yonadabu) hakuwa Mwisraeli. Hata hivyo, kupatana na jina lake (linalomaanisha “Yehova Anapenda,” “Yehova Ni Mwenye Sifa za Kipekee,” au “Yehova Ni Mkarimu”) alikuwa mwabudu wa Yehova. (Yeremia 35:6) Hakika, alikuwa na upendezi usio wa kawaida katika kuona “kutovumilia [kwa Yehu] ushindani wowote kuelekea Yehova.” Twajuaje hivyo? Hakukutana kiaksidenti na mfalme mtiwa-mafuta wa Israeli. Yehonadabu alikuwa “akija kumlaki,” naye alifanya hivyo wakati ambapo Yehu alikuwa tayari amechinja Yezebeli na wengineo katika nyumba ya Ahabu. Yehonadabu alijua kilichokuwa kikitukia alipokubali mwaliko wa Yehu wa kuingia garini mwake. Kwa njia ya wazi alikuwa upande wa Yehu—na upande wa Yehova—katika pambano hilo kati ya ibada ya kweli na isiyo ya kweli.

Yehu wa Siku ya Kisasa na Yehonadabu wa Siku ya Kisasa

5. (a) Ni mabadiliko gani ambayo karibuni yatatukia kwa wanadamu wote? (b) Ni nani aliye Yehu Mkubwa Zaidi, naye huwakilishwa na nani duniani?

⁵ Leo, karibuni mambo yatabadilika sana kwa wanadamu wote kama vile yalivyobadilika kwa Israeli huko nyuma mwaka wa 905 K.W.K. Wakati umekaribia ambapo Yehova ataitakasa dunia na kuondoa matokeo yote mabaya ya uvutano wa Shetani, kutia na dini isiyo ya kweli. Yehu wa siku ya kisasa ni nani? Si mwingine ila Yesu Kristo, ambaye kwake maneno haya ya unabii yaelekezwa: “Jifungie upanga wako pajani, wewe uliye hodari, utukufu ni wako na fahari ni yako. Katika fahari yako usitawi uendelee kwa ajili ya kweli na upole na haki.” (Zaburi 45:3, 4) Yesu awakilishwa duniani na “Israeli wa Mungu,” Wakristo watiwa-mafuta “washikao amri za Mungu na walio na kazi ya kutoa ushahidi kuhusu Yesu.” (Wagalatia 6:16; Ufunuo 12:17) Tangu mwaka wa 1922 ndugu hawa wa Yesu watiwa-mafuta wametoa onyo bila hofu juu ya matendo ya Yehova ya hukumu yanayokuja.—Isaya 61:1, 2; Ufunuo 8:7–9:21; 16:2-21.

6. Ni nani waliotoka katika mataifa ili kuwaunga-mkono Wakristo watiwa-mafuta, nao wameingiaje garini mwa yule Yehu Mkubwa Zaidi, kwa kusema kitamathali?

⁶ Wakristo watiwa-mafuta hawajawa peke yao. Kama vile Yehonadabu alivyotoka kwenda kumlaki Yehu, wengi kutoka katika mataifa wametoka ili kumwunga mkono Yesu, yule Yehu Mkubwa Zaidi, na kuwaunga-mkono wawakilishi wake wa kidunia katika msimamo wao kwa ajili ya ibada ya kweli. (Zekaria 8:23) Mwaka wa 1932, walioitwa na Yesu “kondoo wengine,” walitambulishwa kuwa ulinganifu wa siku ya kisasa wa Yehonadabu wa zamani na walialikwa ‘kuingia katika gari’ la Yehu wa siku ya kisasa. (Yohana 10:16) Jinsi gani? Kwa ‘kushika amri za Mungu’ na kushiriki pamoja na watiwa-mafuta katika “kazi ya kutoa ushahidi kuhusu Yesu.” Nyakati za kisasa, hilo hutia ndani kuhubiri habari njema ya Ufalme wa Mungu uliosimamishwa chini ya Yesu akiwa Mfalme. (Marko 13:10) Mwaka wa 1935 “Wayonadabu” hao walitambulishwa kuwa ule “umati mkubwa” wa Ufunuo 7:9-17.

7. Wakristo leo wameonyeshaje kwamba ‘moyo wao bado umenyoka’ pamoja na moyo wa Yesu?

⁷ Tangu miaka ya 1930, huo umati mkubwa na ndugu zao watiwa-mafuta wamethibitisha kwa ujasiri kuunga mkono kwao ibada ya kweli. Katika nchi fulani huko Ulaya Mashariki na Ulaya Magharibi, Mashariki ya Mbali, na Afrika, wengi wao wamekufa kwa sababu ya imani yao. (Luka 9:23, 24) Katika nchi nyingine, wametiwa gerezani, wakashambuliwa na wafanya-ghasia, au kama sivyo wakanyanyaswa. (2 Timotheo 3:12) Wamefanya rekodi ya imani iliyoje! Na Ripoti ya Mwaka wa Utumishi wa 1997 yaonyesha kwamba bado wameazimia kumtumikia Mungu, haidhuru tokeo litakuwa nini. ‘Moyo wao bado umenyoka’ pamoja na moyo wa Yesu. Hilo lilidhihirishwa katika 1997, wakati ambapo wahubiri wa Ufalme 5,599,931, karibu wote wakiwa “Wayonadabu,” walitumia jumla ya saa 1,179,735,841 katika kazi ya kutoa ushahidi kuhusu Yesu.

Bado Wanahubiri kwa Bidii

8. Mashahidi wa Yehova huonyeshaje bidii yao kwa ibada ya kweli?

⁸ Yehu alikuwa na sifa ya kuendesha gari lake kwa kasi sana—uthibitisho wa bidii yake ya kutimiza kazi yake. (2 Wafalme 9:20) Yesu, yule Yehu Mkubwa Zaidi, afafanuliwa kuwa ‘ameliwa’ na bidii. (Zaburi 69:9) Basi, haishangazi kwamba, Wakristo wa kweli leo, wajulikana kwa bidii yao. Ndani ya kutaniko na kwa watu wote, wao ‘hulihubiri neno, kwa hima katika majira yenye kufaa, katika majira yenye taabu.’ (2 Timotheo 4:2) Bidii yao ilithibitishwa hasa mapema mwaka wa 1997 baada ya makala katika Huduma ya Ufalme Yetu kuwatia moyo wengi iwezekanavyo washiriki katika utumishi wa painia-msaidizi. Katika kila nchi mradi wa kufikia idadi fulani ya mapainia-wasaidizi uliwekwa. Itikio lilikuwa namna gani? Lenye kutokeza! Ofisi nyingi za tawi zilizidi idadi iliyowekwa. Ekuado iliweka mradi wa mapainia-wasaidizi 4,000 lakini katika Machi iliripoti mapainia-wasaidizi 6,936. Japani iliripoti jumla ya mapainia-wasaidizi 104,215 katika miezi hiyo mitatu. Katika Zambia, ambako mradi ulikuwa 6,000, mapainia-wasaidizi 6,414 waliripoti katika Machi; na 6,532 katika Aprili; na 7,695 katika Mei. Tufeni pote, kilele cha mapainia-wasaidizi pamoja na wa kawaida kilikuwa 1,110,251, ongezeko la asilimia 34.2 kupita mwaka wa 1996.

9. Kwa kuongezea kazi ya nyumba hadi nyumba, ni katika njia gani nyingine Mashahidi wa Yehova hupata watu ili kuwaambia habari njema?

⁹ Mtume Paulo aliwaambia wazee kutoka Efeso hivi: “Sikuepuka kuwaambia nyinyi lolote kati ya mambo yaliyokuwa yenye kuleta faida wala kuwafundisha nyinyi hadharani na kutoka nyumba hadi nyumba.” (Matendo 20:20) Mashahidi wa Yehova leo huiga kielelezo cha Paulo na kuhubiri habari njema kwa bidii kutoka nyumba hadi nyumba. Hata hivyo, huenda isiwe rahisi kupata watu nyumbani mwao. Kwa sababu hiyo, “mtumwa mwaminifu na mwenye busara” huwatia moyo wahubiri wa Ufalme wafikie watu katika mahali pao pa biashara, barabarani, ufuoni, katika bustani za watu wote—popote pale watu waweza kupatikana. (Mathayo 24:45-47) Matokeo yamekuwa bora kabisa.

10, 11. Wahubiri katika nchi mbili wameonyeshaje uanzisho mzuri katika kuwapata wenye kupendezwa ambao kwa kawaida hawawezi kupatikana nyumbani?

¹⁰ Huko Copenhagen, Denmark, kikundi kidogo cha wahubiri kimekuwa kikitoa ushahidi barabarani nje ya stesheni za garimoshi. Kuanzia Januari hadi Juni, kiliangusha magazeti 4,733, kikaweza kuongea na watu wengi, na kufanya ziara za kurudia nyingi. Wahubiri kadhaa nchini humo wamepata watu wa kuwapelekea magazeti kwa ukawaida katika sehemu ya biashara. Mji mmoja huwa na soko kubwa kila Ijumaa, kukiwa na maelfu ya wenye kuzuru. Kwa hiyo kutaniko limepanga kutoa ushahidi wa kawaida sokoni. Katika eneo moja shule hutembelewa na kupelekewa kifurushi cha habari chenye vichapo ambavyo hasa vyawafaa walimu wa shule.

¹¹ Huko Hawaii pia jitihada zimefanywa ili kuwafikia watu ambao hawawezi kupatikana nyumbani. Maeneo ya pekee hutia ndani maeneo ya watu wote (barabara, bustani, maegesho, na vituo vya mabasi), maeneo ya mji yaliyo na shughuli nyingi za kibiashara, maduka, na nyanja za ndege, kutoa ushahidi kwa simu, usafirishaji wa umma (kuhubiri katika mabasi), na maeneo ya vyuo vya elimu. Kutaniko huhakikisha kwamba kila eneo lagawiwa idadi ifaayo ya Mashahidi na kwamba wale wenye kugawiwa wamezoezwa ifaavyo. Jitihada kama hizo zilizopangwa vizuri zaripotiwa katika nchi nyingi. Tokeo ni kwamba, wenye kupendezwa ambao yaelekea hawangepatikana kamwe katika huduma ya nyumba hadi nyumba, wanapatikana.

Kusimama Imara

12, 13. (a) Shetani alitumia mbinu gani dhidi ya Mashahidi wa Yehova mwaka wa 1997? (b) Ni katika njia gani propaganda isiyo ya kweli ilikuwa na matokeo yaliyo kinyume cha matarajio katika nchi moja?

¹² Katika nchi kadhaa mwaka wa 1997, Mashahidi wa Yehova walikuwa wahasiriwa wa propaganda mbaya, isiyo ya kweli ambayo iliendelezwa yaonekana kukiwa na lengo la uwezekano wa kuchukua hatua ya kisheria dhidi yao. Lakini Mashahidi walisimama imara! (Zaburi 112:7, 8) Walikumbuka sala hii ya mtunga-zaburi: “Wenye kiburi wamenizulia uongo, kwa moyo wangu wote nitayashika mausia yako.” (Zaburi 119:69) Utangazaji huo wa uwongo ni uthibitisho tu wa kuchukiwa kwa Wakristo wa kweli kama vile ilivyotabiriwa na Yesu. (Mathayo 24:9) Na nyakati fulani utangazaji huo umekuwa na matokeo yaliyo kinyume cha matarajio. Mwanamume fulani katika Ubelgiji alisoma makala moja yenye kuwashushia hadhi Mashahidi wa Yehova katika gazeti la habari la kila siku linalojulikana sana. Akiwa ameshtushwa na maneno yenye uchongezi, alihudhuria mkutano kwenye Jumba la Ufalme Jumapili iliyofuata. Alipanga kujifunza Biblia pamoja na Mashahidi na kuendelea kufanya maendeleo ya haraka. Hapo awali, mwanamume huyo alikuwa amekuwa mshiriki wa genge fulani. Funzo lake la Biblia lilimsaidia kupatanisha mtindo-maisha wake na Biblia, jambo ambalo lilijulikana na watu waliomzunguka. Hakika, mwandikaji wa makala hiyo yenye uchongezi hakufikiria tokeo la namna hiyo!

¹³ Watu fulani wenye mioyo ya haki katika Ubelgiji wamesema kwa ujasiri dhidi ya hiyo propaganda yenye udanganyifu. Miongoni mwao alikuwa waziri mkuu wa zamani aliyekiri kuwa amejawa na mshangao kuhusiana na yale ambayo Mashahidi wa Yehova wametimiza. Na mbunge fulani aliandika hivi: “Kinyume cha masingizio yaenezwayo pindi kwa pindi, [Mashahidi wa Yehova] hawaonekani kwangu kutokeza hatari yoyote kwa Serikali. Wao ni raia wapendao amani, wenye kudhamiria, na wenye kustahi wenye mamlaka.” Yenye hekima kwa kweli, ni maneno haya ya mtume Petro: “Dumisheni mwenendo wenu ukiwa bora miongoni mwa mataifa, ili, katika jambo ambalo katika hilo wao wanasema dhidi yenu kuwa watenda-maovu, likiwa tokeo la kazi zenu bora ambazo wamekuwa mashahidi wa kujionea wapate kumtukuza Mungu katika siku ya ukaguzi wake.”—1 Petro 2:12.

Sherehe ya Ukumbusho Yenye Kutokeza

14. Ni nini baadhi ya ripoti zenye kusisimua za mahudhurio ya Ukumbusho mwaka wa 1997?

¹⁴ Ni jambo lifaalo kwamba wale watoao ushahidi kuhusu Yesu wapaswa kuona Ukumbusho wa kifo chake kuwa jambo kuu katika mwaka wao. Mwaka wa 1997, watu 14,322,226 walikuwapo katika Machi 23 ili kusherehekea hilo tukio. Hiyo ilikuwa idadi ya watu zaidi ya 1,400,000 kupita mwaka wa 1996. (Luka 22:14-20) Katika nchi nyingi hudhurio la Ukumbusho lilizidi sana idadi ya wahubiri wa Ufalme, kuonyesha matazamio mazuri ya ongezeko wakati ujao. Kwa kielelezo, katika Haiti, mwaka wa 1997 ulikuwa na kilele cha wahubiri 10,621, huku watu 67,259 wakihudhuria Ukumbusho. Waweza kuchunguza ripoti ya mwaka kwenye ukurasa wa 18 hadi wa 21 uone ni nchi ngapi nyingine ambazo zilikuwa na mahudhurio ya juu kama hayo kwa kulinganishwa na idadi ya wahubiri.

15. Katika nchi fulani, ndugu zetu walishindaje matatizo mazito ili kusherehekea Ukumbusho?

¹⁵ Kwa watu fulani, kuhudhuria Ukumbusho hakukuwa jambo rahisi. Katika Albania kulikuwa na kafiu ya saa 1:00 jioni kwa sababu ya msukosuko wa raia. Katika vikundi vidogo 115 nchini, Ukumbusho ulianza saa 11:45 jioni. Jua lilitua saa 12:08 jioni, likitia alama kuanza kwa Nisani 14. Mifano ilipitishwa saa 12:15 hivi jioni. Katika visa vilivyo vingi sala ya mwisho ilitolewa kufikia saa 12:30 jioni, na waliohudhuria wakaharakisha kwenda nyumbani kabla ya kafiu. Hata hivyo, hudhurio la Ukumbusho lilikuwa watu 3,154, likilinganishwa na kilele cha wahubiri 1,090. Katika nchi moja ya Afrika, msukosuko wa raia ulifanya Jumba la Ufalme lisifikike, kwa hiyo wazee wawili wakaamua wakutane katika nyumba ya mzee wa tatu ili kupanga kufanya hiyo sherehe katika vikundi vidogo-vidogo. Ili kufikia hiyo nyumba, iliwabidi hao wazee wawili wavuke mtaro wa kuondolea maji. Hata hivyo, kulikuwa na mapigano katika hilo eneo, na askari-doria walimfyatulia risasi mtu yeyote aliyejaribu kuvuka huo mtaro. Mzee mmoja alikimbia na kuvuka bila jambo kutukia. Yule wa pili alikuwa akivuka aliposikia mlio wa risasi. Alijitupa chini kwenye ardhi na kutambaa hadi penye usalama huku risasi zikivuma juu ya kichwa chake. Mkutano wa hao wazee ulifanywa kwa mafanikio, na mahitaji ya kutaniko yakashughulikiwa.

“Kutoka Katika Mataifa Yote na Makabila . . . na Lugha”

16. Jamii ya mtumwa mwaminifu na mwenye busara imepangaje habari njema ienezwe miongoni mwa vikundi vidogo vya lugha?

¹⁶ Mtume Yohana alisema kwamba umati mkubwa ungetoka “katika mataifa yote na makabila na vikundi vya watu na lugha.” (Ufunuo 7:9) Kwa sababu hiyo, Baraza Linaloongoza hupanga fasihi ipatikane katika lugha nyingi zaidi na zaidi—kutia ndani zile zisemwazo na makabila madogo na vikundi vidogo vya watu. Kwa kielelezo, huko Msumbiji, ile trakti Uzima Katika Ulimwengu Mpya Wenye Amani ilitolewa katika lugha tano zaidi. Katika Nikaragua, ile broshua Furahia Milele Maisha Duniani! ilitolewa katika lugha ya Kimiskito—kichapo cha kwanza cha Watch Tower Society katika lugha hiyo. Wahindi Wamiskito wengi walikubali hiyo broshua kwa shangwe walipoona ilikuwa katika lugha yao wenyewe. Mwaka wa 1997 Sosaiti ilikubali uchapishaji wa fasihi katika lugha 25 zaidi na kuchapa magazeti zaidi ya bilioni moja.

17. Ni kikundi gani cha lugha kilichosaidiwa huko Korea, na kanda za vidio zimesaidiaje sana sehemu hii ya watu?

¹⁷ Huko Korea kikundi kingine cha lugha kilisaidiwa. Mwaka wa 1997 kulikuwa na mkusanyiko wa kwanza katika lugha ya ishara ya Kikorea. Kuna makutaniko 15 ya lugha ya ishara katika Korea yakiwa na wahubiri 543, lakini watu 1,174 walihudhuria mkusanyiko, na 21 wakabatizwa. Ili kuwasaidia viziwi ambao hawawezi kuelewa kwa urahisi maneno yasemwayo au kuandikwa, vichapo vimetolewa katika ukanda wa vidio katika lugha za ishara 13 tofauti. Hivyo, viziwi wanasaidiwa “kusoma” na hata kujifunza habari njema, kukiwa na matokeo mazuri. Huko Marekani, ilikuwa ikichukua hadi miaka mitano hapo zamani kwa kiziwi kufanya maendeleo kufikia hatua ya ubatizo. Sasa, kukiwa na vidio kadhaa katika Lugha ya Ishara ya Marekani, ambazo zapatikana kwa baadhi ya hao viziwi, muda huo umepunguzwa hadi karibu mwaka mmoja.

‘Kubaki Garini’

18. Baada ya kukutana na Yehonadabu, Yehu alianza kufanya nini?

¹⁸ Huko nyuma mwaka wa 905 K.W.K., Yehu alianza kuharibu ibada isiyo ya kweli, baada ya Yehonadabu kujiunga naye. Aliwatolea mwaliko huu waabudu wote wa Baali: “Takaseni kusanyiko la dini kwa Baali.” Kisha akatumana nchini kote ili kuhakikisha kwamba hakuna mwabudu yeyote wa Baali aliyeachwa. Umati ulipomiminika katika hekalu kubwa la huyo mungu asiye wa kweli, Yehu alihakikisha kwamba hakuna mwabudu yeyote wa Yehova aliyekuwa humo. Mwishowe, Yehu na jeshi lake wakawakatakata na kuwaua waabudu wa Baali. “Ndivyo Yehu alivyomharibu Baali katika Israeli.”—2 Wafalme 10:20-28.

19. Kwa kufikiria lililoko mbele ya wanadamu, twapaswa tuonyeshe roho gani, na twapaswa kujishughulisha kwa bidii yenye kuendelea katika kazi gani?

¹⁹ Leo, hukumu ya mwisho ya dini zote zisizo za kweli iko karibu sana. Chini ya mwongozo wa malaika Wakristo wanatangaza habari njema kwa wanadamu wote, wakiwatia moyo wamhofu Mungu na kujitenga na dini isiyo ya kweli. (Ufunuo 14:6-8; 18:2, 4) Walio wasikivu watiwa moyo wajinyenyekeze kwa Ufalme wa Mungu chini ya Mfalme-Mtawazwa wa Yehova, Yesu Kristo. (Ufunuo 12:10) Wakati huu wenye kusisimua, haitupasi kuruhusu bidii yetu idhoofike tusimamapo imara kwa ajili ya ibada ya kweli.

20.Utaazimia kufanya nini wakati wa mwaka wa utumishi wa 1998?

²⁰ Wakati mmoja, Mfalme Daudi alipokuwa chini ya mkazo mkubwa, alisali hivi: “Ee Mungu, moyo wangu u thabiti, moyo wangu u thabiti. Nitaimba, nitaimba zaburi. Ee Bwana, nitakushukuru kati ya watu.” (Zaburi 57:7, 9) Na tuwe imara pia. Katika mwaka wa utumishi wa 1997, kujapokuwako magumu mengi, sauti kuu ya sifa ilipaazwa kwa utukufu wa Yehova Mungu. Mpaazo wa sauti kama huo, hata ulio mkubwa zaidi, na usikike katika mwaka wa utumishi wa sasa. Na tuendelee kumsifu Yehova licha ya yale ambayo Shetani huenda akajaribu kufanya ili kutuvunja moyo au kutupinga. Hivyo, tutaonyesha kwamba moyo wetu waendelea kuwa umenyoka pamoja na moyo wa yule Yehu Mkubwa, Yesu Kristo, na tutaitikia kwa nafsi yetu yote himizo hili lililopuliziwa: “Mfurahieni BWANA; shangilieni, enyi wenye haki pigeni vigelegele vya furaha; ninyi nyote mlio wanyofu wa moyo.”—Zaburi 32:11.

Je, Waweza Kueleza?

◻ Ni mabadiliko gani yaliyotukia katika Israeli mwaka wa 905 K.W.K.?

◻ Ni nani yule Yehu wa siku ya kisasa, na “umati mkubwa” umeonyeshaje kwamba ‘mioyo yao imenyoka’ pamoja na moyo wake?

◻ Ni takwimu gani kutoka katika ripoti ya mwaka zitoleazo kielezi bidii ambayo Mashahidi wa Yehova walionyesha katika mwaka wa utumishi wa 1997?

◻ Hata liwe ni jambo gani ambalo Shetani huenda akafanya dhidi yetu, tutaonyesha roho gani katika mwaka wa utumishi wa 1998?

[Chati katika ukurasa wa 18-21]

RIPOTI YA MWAKA WA UTUMISHI WA 1997 YA MASHAHIDI WA YEHOVA ULIMWENGUNI POTE

(Ona buku lililojalidiwa)

[Picha katika ukurasa wa 15]

Hudhurio lenye kutokeza kwenye Ukumbusho laonyesha matazamio mazuri kwa ukuzi wa wakati ujao

[Picha katika ukurasa wa 16]

Kama vile Yehonadabu alivyomwunga mkono Yehu, ndivyo leo “umati mkubwa” humwunga mkono yule Yehu Mkubwa Zaidi, Yesu Kristo, na ndugu zake watiwa-mafuta