Mwimbie Yehova Sifa
“Nitamwimbia BWANA, kwa maana ametukuka sana.”—KUTOKA 15:1.
1. Ni sifa zipi za Yehova zinazotupa sababu ya kumsifu?
ZABURI 150 yaamuru mara 13 tumwimbie Yehova au Yah sifa. Mstari wa mwisho watangaza hivi (NW): “Kila kitu chenye uhai—na kimsifu Yah. Sifuni Yah, enyi watu!” Tukiwa Mashahidi wa Yehova, twajua kwamba Yehova astahili sifa zetu. Yeye ndiye Mwenye Enzi Kuu wa Ulimwengu Wote Mzima, Aliye Juu Zaidi, Mfalme wa umilele, Muumbaji wetu, Mfadhili wetu. Yeye hana kifani, ni wa kipekee, halinganiki katika njia nyingi. Anajua mambo yote, ana uwezo wote, ni mkamilifu katika haki, na ni wonyesho halisi wa upendo. Zaidi ya wengine wote yeye ni mwema; yeye ni mwaminifu-mshikamanifu. (Luka 18:19; Ufunuo 15:3, 4) Je! kweli anastahili sifa zetu? Hakika anastahili!
2. Tuna sababu zipi za kumshukuru Yehova?
2 Mbali na ibada yetu na sifa zetu Yehova astahili pia shukrani zetu kwa sababu ya mambo yote ambayo ametufanyia. Yeye ni Mpaji wa “kila zawadi njema na kila upaji mkamilifu.” (Yakobo 1:17, NW) Yeye ndiye Chemchemi, Chanzo, cha uhai wote. (Zaburi 36:9) Vitu vyote tunavyofurahia tukiwa jamii ya binadamu vyatokana naye, kwa sababu yeye ni Muumbaji wetu Mtukufu. (Isaya 42:5) Yeye pia ni Mpaji wa baraka zote za kiroho zinazotujia kupitia roho yake, tengenezo lake, na Neno lake. Twasamehewa dhambi zetu kwa sababu aliandaa Mwana wake awe fidia yetu. (Yohana 3:16) Tuna tumaini la Ufalme la “mbingu mpya na nchi mpya, ambayo haki yakaa ndani yake.” (2 Petro 3:13) Tuna ushirika mzuri pamoja na Wakristo wenzetu. (Warumi 1:11, 12) Tuna pendeleo na baraka za kuwa Mashahidi wake. (Isaya 43:10-12) Na tuna pendeleo kubwa la sala. (Mathayo 6:9-13) Kwa kweli, tuna sababu nyingi za kumshukuru Yehova!
Njia Ambazo Twaweza Kumsifu Yehova
3. Twaweza kumsifu Yehova na kumshukuru kwa njia zipi kadhaa?
3 Tukiwa watumishi waliojitoa kwa Yehova, twaweza kumsifuje na kumshukuru? Twaweza kufanya hivyo kwa kushiriki katika huduma ya Kikristo—kutoa ushahidi nyumba kwa nyumba, kufanya ziara za kurudia, kuongoza mafunzo ya Biblia, na kutoa ushahidi barabarani. Pia twaweza kumsifu kwa kutoa ushahidi kivivi-hivi tupatapo fursa. Kisha twaweza pia kumsifu Yehova kwa mwenendo wetu mnyoofu, hata kwa kuvaa na kujipamba kwa unadhifu na kwa kiasi. Mara nyingi Mashahidi wa Yehova wamesifiwa kuwa wenye kielelezo chema kwa habari ya mapambo. Na zaidi, twaweza kumsifu Yehova na kumshukuru kupitia sala.—Ona 1 Mambo ya Nyakati 29:10-13.
4. Ni ipi mojapo njia nzuri zaidi tuwezayo kumsifu Baba yetu wa kimbingu mwenye upendo?
4 Kwa kuongezea hayo, mojapo njia nzuri zaidi tuwezayo kumsifu Baba yetu wa kimbingu ni kwa kumtukuza yeye na sifa zake kwa nyimbo tamu za Ufalme. Wanamuziki na watungaji wengi wa muziki wakubali kwamba ala nzuri zaidi ya muziki ni sauti ya binadamu. Wastadi wa muziki bora walijitahidi sana kuandika muziki wa kuimbwa na watu kwa sababu kuna uradhi mwingi sana kusikiliza sauti ya binadamu ikiimba kwa sauti ya juu.
5. Ni kwa sababu gani twapaswa kuchukua kwa uzito jinsi tunavyoimba nyimbo za Ufalme?
5 Ni lazima Yehova awe anafurahi kama nini kusikiliza wanadamu wakiimba, hasa wanapoimba nyimbo za kumsifu na za shukrani! Kwa hakika basi, twapaswa kuchukua kwa uzito jinsi tunavyoimba nyimbo za Ufalme katika mikusanyiko yetu mbalimbali—mikutano ya kutaniko, makusanyiko ya mzunguko, siku za kusanyiko la pekee, mikusanyiko ya wilaya, na mikusanyiko ya kimataifa. Kitabu chetu cha nyimbo kimejaa nyimbo tamu kwelikweli, utamu ambao umesifiwa mara kwa mara na watu wa nje. Kadiri tupatavyo ile roho ya kuimba nyimbo za Ufalme, ndivyo tuwaleteavyo wengine furaha na kujinufaisha wenyewe.
Kumwimbia Yehova Sifa Katika Nyakati za Biblia
6. Waisraeli walionyeshaje uthamini kwa ajili ya kuokolewa kwao kwenye Bahari Nyekundu?
6 Neno la Mungu latuambia kwamba Musa na Waisraeli wote waliimba kwa ushindi baada ya kukombolewa kutoka kwa majeshi ya Farao kwenye Bahari Nyekundu. Wimbo wao ulianza kwa maneno haya: “Nitamwimbia BWANA, kwa maana ametukuka sana; farasi na mpanda farasi amewatupa baharini. BWANA ni nguvu zangu, na wimbo wangu; naye amekuwa wokovu wangu. Yeye ni Mungu wangu, nami nitamsifu.” (Kutoka 15:1, 2) Twaweza kuwazia ile shauku na shangwe ya Waisraeli walipoimba maneno hayo baada ya wao kuokolewa kimuujiza!
7. Ni pindi zipi nyingine za maana zilizo katika Maandiko ya Kiebrania za Waisraeli wakimsifu Yehova kwa wimbo?
7 Twasoma kwenye 1 Mambo ya Nyakati 16:1, 4-36, kwamba Yehova alisifiwa kwa wimbo na ala za muziki Daudi alipoleta lile Sanduku Yerusalemu. Kwa kweli hiyo ilikuwa pindi ya shangwe sana. Pia kulikuwa na wimbo wa kumsifu Yehova ulioandamana na ala za muziki wakati Mfalme Sulemani alipoweka wakfu hekalu katika Yerusalemu. Twasoma kwenye 2 Mambo ya Nyakati 5:13, 14: “Wenye panda na waimbaji walipokuwa kama mmoja, wakisikizisha sauti moja ya kumsifu na kumshukuru BWANA; nao wakipaza sauti pamoja na panda na matoazi na vinanda, wakimsifu BWANA, wakisema, Kwa kuwa ni mwema; kwa maana fadhili zake ni za milele; ndipo nyumba ikajawa na wingu, naam, nyumba ya BWANA, hata makuhani hawakuweza kusimama ili kufanya huduma yao, kwa sababu ya lile wingu; kwa kuwa nyumba ya Mungu imejaa utukufu wa BWANA.” Jambo hilo laonyesha nini? Kwamba Yehova alikuwa akisikiliza wimbo huo mtamu wa kumsifu naye aliufurahia sana, kama ilivyoonyeshwa na lile wingu lisilo la kawaida. Baadaye, kwaya mbili ziliimba wakati wa kuwekwa wakfu kwa kuta za Yerusalemu katika siku za Nehemia.—Nehemia 12:27-42.
8. Ni nini kinachoonyesha kwamba Waisraeli walichukua kwa uzito habari ya kuimba?
8 Kwa kweli, kuimba kulikuwa sehemu muhimu sana ya ibada hekaluni hivi kwamba Walawi 4,000 walipewa mgawo wa pekee wa utumishi wa muziki. (1 Mambo ya Nyakati 23:4, 5) Hao walikuwa wakiandamana na waimbaji. Muziki, hasa waimbaji, ulikuwa na fungu la maana katika ibada, si tu kwa kukazia mambo mazito ya Sheria, bali kwa kuandaa roho ifaayo ya ibada. Muziki ulisaidia Waisraeli waabudu Yehova kwa idili. Ona yale matayarisho na uangalifu kwa mambo madogo-madogo uliofanywa kwa ajili ya muziki: “Hesabu yao, pamoja na ndugu zao waliofundishwa kumwimbia BWANA, wote waliokuwa wastadi, walikuwa mia mbili na themanini na wanane.” (1 Mambo ya Nyakati 25:7) Ona jinsi walivyochukua kwa uzito jambo la kumwimbia Yehova sifa. Walizoezwa kuimba na walikuwa wastadi!
9. Ni mkazo gani unaotolewa kwa kuimba katika Maandiko ya Kigiriki ya Kikristo?
9 Tukija kwenye karne ya kwanza ya wakati wetu wa kawaida, twapata nini? Yesu, katika ule usiku aliosalitiwa, akiwa na mambo mengi mazito akilini mwake, bado aliona uhitaji wa kumaliza mwadhimisho wake wa Sikukuu ya Kupitwa na wa kuanzishwa kwa Ukumbusho wa kifo chake kwa kumwimbia Yehova sifa. (Mathayo 26:30) Twasoma vilevile kwamba “panapo usiku wa manane,” Paulo na Sila, baada ya kupigwa na kufungwa gerezani, “walikuwa wakimwomba Mungu na kumwimbia nyimbo za kumsifu, na wafungwa wengine walikuwa wakiwasikiliza.”—Matendo 16:25.
Kuimba Sifa —Sehemu Muhimu ya Ibada Yetu
10. Neno la Mungu latoa amri zipi kwa habari ya kumsifu kwa wimbo?
10 Je! labda unahisi kwamba kuimba nyimbo za Ufalme si jambo muhimu kwako usilipatie uangalifu wa moyo wote? Ikiwa ni hivyo, mbona usilifikirie jambo hilo tena, kwa sababu ya umaana ambao Yehova Mungu na Yesu Kristo wameweka juu ya kuimba sifa? Kwani, Neno la Mungu limejaa amri za kumsifu Yehova na kumwimbia sifa! Kwa kielelezo, kwenye Isaya 42:10, twasoma hivi: “Mwimbieni BWANA wimbo mpya, na sifa zake tokea mwisho wa dunia; ninyi mshukao baharini, na vyote vilivyomo, na visiwa, nao wakaao humo.”—Ona pia Zaburi 96:1; 98:1.
11. Mtume Paulo alitoa himizo gani kwa habari ya kuimba?
11 Mtume Paulo alijua kwamba kuimba kungeweza kuchangamsha mioyo yetu, kwa hiyo alituhimiza mara mbili kuhusu jambo hilo. Twasoma hivi kwenye Waefeso 5:18, 19: “Mjazwe Roho; mkisemezana kwa zaburi na tenzi na nyimbo za rohoni, huku mkiimba na kumshangilia Bwana mioyoni mwenu.” Na kwenye Wakolosai 3:16, twasoma hivi: “Neno la Kristo na likae kwa wingi ndani yenu katika hekima yote, mkifundishana na kuonyana kwa zaburi, na nyimbo, na tenzi za rohoni; huku mkimwimbia Mungu kwa neema mioyoni mwenu.”
12. Tuna vielelezo gani vya jinsi nyimbo zetu zinavyotusaidia kufundishana na kuonyana?
12 Ona kwamba katika kila pindi Paulo arejezea mara nyingi kuimba, anapotaja ‘zaburi, kumwimbia Mungu, nyimbo za rohoni, kuimba mioyoni mwenu.’ Pia, afungua maneno yake kwa Wakolosai kwa kusema kwamba kwa njia hiyo twaweza ‘kufundishana na kuonyana.’ Na kwa hakika hivyo ndivyo tunavyofanya, kama vichwa vya nyimbo zetu vionyeshavyo—“Uumbaji Wote, Sifuni Yehova!” (namba 5), “Iweni Imara, Bila Kuondoleka!” (namba 10), “Furahia Tumaini la Ufalme!” (namba 16), “Msiwaogope”! (namba 27), “Sifu Yehova Mungu Wetu!” (namba 100), tukitoa vielelezo vichache tu.
13. “Mtumwa mwaminifu mwenye akili” ameonyeshaje umaana wa kuimba ikiwa sehemu ya ibada yetu?
13 Kwa kupatana na amri hizo, “mtumwa mwaminifu mwenye akili” amepanga kwamba mikusanyiko yetu—mikutano ya kutaniko, makusanyiko ya mzunguko, siku za kusanyiko la pekee, mikusanyiko ya wilaya, na mikusanyiko ya kimataifa—ifunguliwe na kufungwa kwa kuimba nyimbo za Ufalme. (Mathayo 24:45) Kwa kuongezea, kuna mipango ya kuimba nyimbo katika pindi nyinginezo wakati wa mikusanyiko hiyo. Kwa kuwa mikutano yetu kwa kawaida huanza kwa wimbo wa Ufalme, mbona tusiazimie kufika kwa wakati, mapema vya kutosha tushiriki katika sehemu hiyo ya ibada yetu? Na kwa kuwa mikutano hiyo hufungwa kwa wimbo, mbona tusibaki hadi wakati wa wimbo wa kufunga na sala inayofuata mara hiyo?
14. Tuna vielelezo gani vya uchaguzi wa nyimbo zinazofaa kwa ajili ya programu zetu?
14 Nyimbo zinazotumiwa kwenye mikutano yetu huchaguliwa kwa uangalifu ili zipatane na programu. Kwa kielelezo, kwenye “Ufundishaji wa Kimungu” Mikusanyiko ya Wilaya katika 1993, wimbo namba 191, “Ufanye Ukweli Uwe Mali Yako Mwenyewe,” unaotia moyo Wakristo washindane na Shetani, ulimwengu, na mwili dhaifu, ulifuata mara hiyo zile hotuba tatu zilizozungumzia adui hao watatu. Vilevile, wimbo namba 164, “Watoto—Zawadi Bora za Kutoka kwa Mungu,” wenye kuhimiza sana wazazi, ulifuata mara tu baada ya hotuba iliyokazia madaraka ya wazazi ya kuzoeza watoto wao. Wimbo namba 70, “Uwe Kama Yeremia,” ulitangulia mfululizo wa hotuba zilizotegemea unabii mbalimbali wa Yeremia. Na baada ya mfululizo wa hotuba juu ya pande mbalimbali za huduma yetu ya Ufalme kukaja wimbo namba 156, “Nataka,” wimbo wenye kukazia sana utumishi. Uangalifu kama huo unatumiwa pia katika kuchagua nyimbo za Funzo la Mnara wa Mlinzi, Mkutano wa Utumishi, na Shule ya Huduma ya Kitheokrasi. Inatakikana kwamba wazee wanapotoa hotuba za watu wote na kuonyesha wimbo wa kufungua programu, wao wapaswa wachague wimbo unaopatana na kichwa cha hotuba yao.
15. Mwenyekiti wa mkutano anaweza kuongezaje uthamini kwa wimbo utakaoimbwa?
15 Anapotangaza wimbo utakaotumiwa, mwenyekiti aweza kuongeza uthamini wa wimbo kwa kutaja kichwa cha wimbo huo. Sisi hatuimbi namba za nyimbo bali twaimba vichwa vya Kimaandiko. Pia kutaniko lingesaidiwa kuthamini wimbo huo zaidi ikiwa andiko lililotajwa chini ya kichwa lingetajwa. Kisha tena, maneno machache kama haya yanaweza kusemwa, kwamba wote waimbe kwa roho ya wimbo huo.
Onyesha Uthamini kwa Wema wa Yehova kwa Kuimba
16. Tunaweza kupataje roho ya nyimbo zetu?
16 Kwa kuwa maneno ya nyimbo zetu za Ufalme yana umaana sana, twahitaji kukaza fikira kwenye maneno tunapoyaimba. Twataka kuwa na roho ya kila wimbo. Nyimbo nyingi, kama zile zinazoshughulikia upendo, ambalo ni tunda la roho, ni za kuhisiwa moyoni. (Wagalatia 5:22) Hizo ni nyimbo za kuimbwa kwa nguvu na uchangamfu. Nyimbo nyingine ni za shangwe, na twapaswa tuziimbe kwa furaha. Na nyingine nazo ni zenye nguvu na za kufuata mwendo fulani, nazo zapaswa ziimbwe kwa shauku na uhakika wenye nguvu. Katika Shule yetu ya Huduma ya Kitheokrasi, tunashauriwa kuonyesha uchangamfu na hisia pamoja na shauku katika hotuba zetu. Ni muhimu hata zaidi kuonyesha uchangamfu, hisia, na shauku tunapoimba nyimbo zetu.
17. (a) Waisraeli waliokosa uaminifu walipokea karipio gani ambalo hatutaki litumiwe kwa jinsi tunavyoimba? (b) Matokeo yanakuwa nini tunapochukua kwa uzito himizo la nyimbo zetu?
17 Kama tungaliimba nyimbo zetu za Ufalme huku akili zetu zikiwa kwenye mambo mengine, tusitambue kabisa maana ya maneno, je, kwa njia fulani hatungalikuwa kama Waisraeli waliokaripiwa kwa kukosa imani kwa sababu, ingawa walimsifu Mungu kwa midomo yao, mioyo yao ilikuwa mbali sana naye? (Mathayo 15:8) Hatutaki karipio hilo litumiwe kwetu kwa jinsi tunavyoimba nyimbo za Ufalme, sivyo? Kwa kuimba nyimbo zetu za Ufalme ifaavyo, tutajichochea na vilevile kuchochea wale walio karibu nasi, kutia na wachanga. Naam, ikiwa watu wote wanaoimba katika Majumba ya Ufalme yetu wachukua kwa uzito himizo la nyimbo hizo, hilo lingekuwa kitia-moyo chenye nguvu sana cha kuwa na bidii katika huduma na kuepuka mitego ya kufanya makosa.
18. Kuimba nyimbo za Ufalme kulikuwa na uvutano gani juu ya mwanamke fulani?
18 Mara kwa mara, watu wa nje huvutiwa na kuimba kwetu nyimbo za Ufalme. Pindi moja Mnara wa Mlinzi lilichapisha maneno haya: “Jambo la kwamba jinsi tunavyoimba nyimbo [zetu] laweza kufanya watu wapate ujuzi wa Yehova Mungu lilionyeshwa kwa ono la mwanamke fulani aliyebatizwa kwenye ‘Ushindi wa Kimungu’ Kusanyiko la 1973, katika Stediamu ya Yankee, Jiji la New York. Alikuwa amezuru kwa mara ya kwanza Jumba la Ufalme la kwao akiwa peke yake naye akasikiliza mikutano yote miwili. Kutaniko lilipoimba . . . ‘Kazia Zawadi Macho Yako!,’ alivutiwa sana na maneno na vilevile jinsi maneno hayo yalivyoimbwa hivi kwamba akaamua hapo ndipo mahali alipotaka awepo. Baadaye alimwendea mmoja wa Mashahidi na kuomba funzo la Biblia, [naye] alifanya maendeleo hadi kuwa Mkristo aliye shahidi wa Yehova.”
19. Ni kitia-moyo kipi cha mwisho tunachopewa kwa habari ya kuimba nyimbo zetu za Ufalme kwa moyo wote?
19 Katika mikutano yetu mingi, kuna fursa chache za wasikilizaji kushiriki ili kuonyesha hisia zao na uthamini. Lakini sisi sote twaweza kuonyesha jinsi tunavyohisi juu ya wema wa Yehova kwa kuimba kwa moyo nyimbo za Ufalme. Isitoshe, tukutanapo pamoja, je, hatuko na roho nzuri? Kwa hiyo twapaswa kuhisi kutaka kuimba! (Yakobo 5:13) Kwa kweli, kwa kadiri ambayo twathamini wema wa Yehova na fadhili zake zisizostahiliwa, tutamwimbia sifa kwa moyo wote.
Unajibuje?
◻ Kuna sababu gani mbili za msingi za kumsifu Yehova?
◻ Twaweza kumsifu Yehova kwa njia zipi kadhaa?
◻ Ni ipi mojapo njia nzuri zaidi tuwezayo kumsifu Yehova?
◻ Tuna vielelezo vipi vya Kimaandiko vya kumsifu Yehova kwa wimbo?
◻ Twaweza kuimbaje ifaavyo nyimbo zetu za Ufalme?
[Sanduku katika ukurasa wa 11]
Furahia Nyimbo Hizo!
Inaonekana kwamba wengine wamepata ugumu kidogo wa kujifunza nyimbo kadhaa. Hata hivyo, baadhi ya makutaniko hayajapata ugumu wa kuimba nyimbo nyingi. Labda jambo linalohitajika tu ni kujitahidi kidogo kujifunza nyimbo ambazo kwanza zaweza kuonekana kama hazifahamiki. Baada ya kuzifahamu nyimbo hizo, mara nyingi kutaniko huzithamini kuliko zile ambazo hawakuhitaji kujitahidi kujifunza. Kisha kutaniko zima laweza kuziimba kwa uhakika. Naam, wao waweza kufurahia nyimbo hizo!
[Sanduku katika ukurasa wa 12]
Imbeni Nyimbo za Ufalme Katika Vikusanyiko vya Kirafiki
Si lazima nyimbo zetu za Ufalme ziimbwe katika Jumba la Ufalme tu. Paulo na Sila walimwimbia Yehova sifa wakiwa gerezani. (Matendo 16:25) Na mwanafunzi Yakobo alisema hivi: “Kuna yeyote mwenye roho changamfu? Acheni aziimbe sifa kwa Mungu.” (Yakobo 5:13, NW, kielezi-chini) Kila mtu ana roho changamfu kwenye vikusanyiko vya kirafiki. Kwa hiyo mbona msiimbe nyimbo za Ufalme? Kufanya hivyo kwaweza kufurahisha sana hasa ikiwa wimbo unaambatana na piano au gita. Ama sivyo, kuna kaseti za piano za nyimbo zetu za Ufalme; familia nyingi za Mashahidi zina albamu ya kaseti hizo. Hizo zatumika vizuri sana zikiandamana na wimbo na vilevile zafaa sana zikiwa muziki mtamu wa kichini-chini.
[Picha katika ukurasa wa 8, 9]
Baada ya wao kukombolewa kwenye Bahari Nyekundu, Waisraeli walionyesha shangwe yao kwa kuimba
[Picha katika ukurasa wa 10]
Kuimba kwa shangwe ni sehemu ya ibada ya Kikristo leo