USHAURI, MSHAURI

Mshauri ni mtu anayetoa ushauri. Ushauri ni shauri analotoa.

Kati ya maneno mengi ya Kiebrania na Kiaramu yanayotumiwa katika Maandiko kurejelea “shauri,” nomino ya Kiebrania ʽe·tsahʹ na kitenzi ya·ʽatsʹ hutumiwa mara nyingi zaidi. Ingawa kwa kawaida neno ʽe·tsahʹ hutafsiriwa kuwa “shauri,” limetafsiriwa pia kuwa “mpango.” (Isa 8:10) Katika Maandiko ya Kigiriki ya Kikristo, nomino bou·leʹ au sym·bouʹli·on yametafsiriwa kuwa “shauri” au “ushauri.” Neno bou·leʹ pia linatafsiriwa kuwa “njama” (Lu 23:51), “mpango” (Mdo 5:38), “mapenzi” (Mdo 13:36, maelezo ya chini), na ‘uamuzi’ (Mdo 27:42).

Basi neno “shauri” linaweza pia kumaanisha “mapenzi,” “kusudi,” ‘uamuzi,’ “njama,” kwa mfano Yehova anapotangaza: “Shauri langu mwenyewe litasimama.” (Isa 46:10) “Nia za mioyo,” yaani, mipango, njama, makusudio, au maazimio, yaliyo ndani kabisa ya mtu yatafunuliwa Bwana Yesu Kristo atakapokuja kutekeleza hukumu. (1Ko 4:5) Katika Waefeso 1:11, maneno “kulingana na mapenzi yake” (kihalisi, “kulingana na ushauri wa mapenzi yake”) yanaweza kumaanisha “kulingana na kusudi, au azimio, yaani, kufunuliwa kwa mapenzi ya Mungu.” Mtume Paulo alisema kwamba hakuwa na hatia ya damu kwa sababu hakukosa kuwaambia “mashauri yote ya Mungu” (“kusudi lote la Mungu,” UV; “mapenzi yote ya Mungu,” NBT), yaani, mambo yote yanayohitajika kwa ajili ya wokovu.​—Mdo 20:27.

Wanaume waliojulikana kuwa na hekima walithaminiwa sana na kutumiwa kuwa washauri wa wafalme. (Ona 2Sa 16:23.) Kwa sababu ya cheo walichokuwa nacho, nyakati nyingine walipewa rushwa ili watumie ushawishi wao kwa njia isiyofaa. Maadui wa Wayahudi walipowakodi washauri, huenda waliwapa rushwa Waajemi waliokuwa na cheo hicho.​—Ezr 4:5.

Hakuna mwanadamu anayejua kila jambo. Kwa hiyo, mtu anayefuata ushauri mzuri ni mwenye hekima. (Met 12:15) Mtu anayekataa ushauri mzuri kutoka kwa washauri wenye uzoefu, kama Mfalme Rehoboamu alivyofanya, ni mpumbavu sana.​—1Fa 12:8.

Yehova ndiye mwenye hekima kamilifu. Ni yeye peke yake asiyehitaji mshauri. (Isa 40:13; Ro 11:34) Mwana wake, ambaye ni “Mshauri wa Ajabu,” hutoa mwongozo na mwelekezo, kwa sababu alipokea na kufuata ushauri wa Baba yake, naye ana roho ya Mungu. (Isa 9:6; 11:2; Yoh 5:19, 30) Hilo linakazia kwamba ili ushauri uwe wenye kunufaisha, lazima upatane na maoni ya Yehova. Ushauri wowote unaompinga Aliye Juu Zaidi hauna thamani. Si ushauri hata kidogo.—Met 19:21; 21:30.