Ni Nini Kinachohitajiwa Kukufurahisha?
WANASIASA wanaochaguliwa na watu hujaribu sana kuwafurahisha watu hao. Kwani, kazi zao zategemea jambo hilo. Lakini gazeti moja la habari linasema juu ya “wapiga kura ambao wamekatishwa tamaa na ni wenye ubaridi” katika Polandi. Mwandishi wa habari mmoja aeleza kwamba United States ni jamii “isiyotumaini hata kidogo siasa rasmi.” Mwandishi mwingine atuambia juu ya “ubaridi wa kisiasa unaoongezeka katika Ufaransa.” Ubaridi na kutoridhika huko kwenye kuenea—ambalo si tatizo la nchi hizo tatu tu—hudokeza kwamba wanasiasa wanashindwa katika jitihada zao za kuwafurahisha watu.
Viongozi wa kidini huahidi furaha pia, ikiwa si katika maisha haya, basi angalau katika maisha ya wakati ujao. Wao hutegemeza ahadi hiyo juu ya msingi wa kwamba wanadamu wana nafsi isiyoweza kufa au ni yenye kuhama-hama, wazo ambalo watu wengi hukatalia mbali kwa sababu mbalimbali na ambalo Biblia hukanusha waziwazi. Makanisa matupu na orodha za washiriki zenye kupungua huonyesha kwamba mamilioni hawaoni dini kuwa ya muhimu tena ili kupata furaha.—Linganisha Mwanzo 2:7, 17; Ezekieli 18:4, 20.
Wapendao Fedha Wasioridhika
Ikiwa furaha haiwezi kupatikana katika siasa au katika dini, inaweza kupatikana wapi? Labda katika eneo la biashara? Hilo pia hudai kuwa na uwezo wa kuandaa furaha. Linatoa hoja yayo kupitia vyombo vya kutangazia, likisema hivi waziwazi: Furaha hutokana na kuwa na vitu vyote vya kimwili na utumishi uwezao kununuliwa kwa fedha.
Idadi ya watu wanaotafuta furaha katika njia hiyo yaonekana kuwa inaongezeka. Iliripotiwa miaka kadhaa iliyopita kwamba asilimia 50 ya familia zote katika Ujerumani ilikuwa na madeni mengi sana. Basi, haishangazi kwamba lile gazeti la habari maarufu la Kijerumani Die Zeit lilitabiri kwamba “nyingi zazo hazitalipia madeni yazo kamwe.” Lilieleza hivi: “Ni rahisi sana kupata ruhusa ya Benki ya kukopa fedha zaidi ya kiasi kilicho akibani mwa mtu—na ni vigumu sana kutoka katika mtego wa kuwa na madeni.”
Hali katika nchi nyingine ambazo zimefanya maendeleo mengi ya kiviwanda ni iyo hiyo. Miaka michache iliyopita, David Caplovitz, mwanasoshiolojia mmoja kwenye chuo kikuu kiitwacho City University of New York, alikadiri kwamba katika United States, kati ya familia milioni 20 na milioni 25 zilikuwa na madeni mengi sana. “Watu wamelemewa sana na madeni,” akasema, “na hayo yanaharibu maisha zao.”
Hiyo haisikiki kuwa furaha hata kidogo! Lakini je, tutazamie ulimwengu wa biashara uweze kutimiza yale ambayo mambo yale mengine mawili (siasa na dini) hayawezi kwa wazi kutimiza? Mfalme Sulemani aliyekuwa tajiri aliandika hivi wakati mmoja: “Apendaye fedha hatashiba fedha, wala apendaye wingi hatashiba maongeo. Hayo pia ni ubatili.”—Mhubiri 5:10.
Kutafuta furaha katika vitu vya kimwili ni kama kuota ndoto za utajiri na furaha. Huenda ikawa jambo la kusisimua kuota ndoto hizo, lakini utakuwa na matatizo ukijaribu kuishi kulingana na ndoto hizo.
Furaha Yaweza Kupatikana Lakini Jinsi Gani?
Mtume Paulo amwita Yehova “Mungu mwenye furaha.” (1 Timotheo 1:11, NW) Kwa kuwaumba wanadamu katika mfano wake, Mungu mwenye furaha aliwapa pia uwezo wa kuwa na furaha. (Mwanzo 1:26) Lakini furaha yao ilitegemea kumtumikia Mungu kwao, kama vile mtunga zaburi alivyoonyesha: “Heri [wenye furaha ni, NW] watu wenye BWANA [Yehova, NW] kuwa Mungu wao.” (Zaburi 144:15b) Yale yanayotiwa ndani ya utumishi wetu kwa Mungu na jinsi kumtumikia kwetu kunavyoongoza kwenye furaha ya kweli yaweza kueleweka vema zaidi tukichunguza mahali-mahali pachache kati ya pale 110 katika New World Translation ambapo maneno “-enye furaha” na “furaha” yanatokea.
Kutambua Mahitaji ya Kiroho
Yesu Kristo, Mwana wa Mungu, alisema hivi katika Mahubiri yake maarufu ya Mlimani: “Wenye furaha ni wale wanaotambua uhitaji wao wa kiroho.” (Mathayo 5:3, NW) Ulimwengu wa biashara hujaribu kutuongoza vibaya tufikiri kwamba kununua vitu vya anasa kwatosha ili kupata furaha. Watuambia kwamba furaha ni kuwa na kompyuta ya nyumbani, kamera ya vidio, simu, gari, na vifaa vya kisasa vya michezo, mavazi ya kimtindo. Lile ambalo halituambii ni kwamba makumi ya mamilioni ya watu ulimwenguni hawana vitu hivyo na hata hivyo si lazima iwe hawana furaha. Ingawa yawezekana vitu hivyo hufanya maisha yawe yenye starehe na rahisi zaidi, si vya muhimu ili kupata furaha.
Kama vile Paulo, wale wanaotambua uhitaji wao wa kiroho wasema hivi: “Tukiwa na chakula na nguo tutaridhika na vitu hivyo.” (1 Timotheo 6:8) Kwa nini? Kwa sababu kule kuridhisha mahitaji ya kiroho ndiko kunakoongoza kwenye uhai wa milele.—Yohana 17:3.
Je! kuna ubaya wowote wa kufurahia vitu vizuri ikiwa tuna fedha za kuvinunua? Labda sivyo. Bado, tunaimarishwa kiroho kujifunza kutoridhisha kila tamaa au kununua kitu kwa sababu tu twaweza kukinunua. Hivyo jifunze kuwa radhi na kudumisha furaha, kama Yesu alivyofanya, hata kama hali yake ya kiuchumi haikuwa nzuri sana kulingana na viwango vya kilimwengu. (Mathayo 8:20) Na Paulo hakuwa akionyesha kutokuwa na furaha alipoandika hivi: “Nimejifunza kuwa radhi na hali yo yote niliyo nayo. Najua kudhiliwa, tena najua kufanikiwa; katika hali yo yote, na katika mambo yo yote, nimefundishwa kushiba na kuona njaa, kuwa na vingi na kupungukiwa.”—Wafilipi 4:11, 12.
Kumtumainia Yehova
Ufahamu wa uhitaji wa kiroho wa mtu unaonyesha nia ya kumtumainia Mungu. Hilo hutokeza furaha, kama vile Mfalme Sulemani alivyoeleza: “Kila amwaminiye BWANA [Yehova, NW] ana heri [furaha, NW].”—Mithali 16:20.
Lakini, je, si kweli kwamba watu wengi hutumainia fedha na mali zaidi ya kumtumainia Mungu? Kulingana na maoni hayo, ni jambo lisilofaa hata kidogo kuweka maneno haya ya shime (kuhimiza) “Tunamtumainia Mungu” kwenye fedha, ingawa maneno hayo huonekana kwenye fedha za U.S.
Mfalme Sulemani, ambaye hakukosa hata kitu kimoja kizuri ambacho fedha ingeweza kununua, alitambua kwamba kutumainia vitu vya kimwili hakuongozi kwenye furaha ya kudumu. (Mhubiri 5:12-15) Fedha katika benki zaweza kupotezwa kupitia ufilisi au infleshoni. Mashamba na nyumba zinaweza kuharibiwa na dhoruba zenye nguvu. Ingawa bima hurudisha kwa kadiri fulani vitu vya kimwili vilivyopotezwa, haziwezi kamwe kulipia maumivu ya kihisiamoyo. Hisa na dhamana zaweza kupoteza thamani katika usiku mmoja katika anguko la ghafula la soko la hisa. Hata kazi yenye mshahara mzuri yaweza—kwa sababu nyingi—kuwa ya muda tu.
Kwa sababu hizo yeye amtumainiye Yehova huona hekima ya kusikiliza onyo hili la Yesu: “Msijiwekee hazina duniani, nondo na kutu viharibupo, na wevi huvunja na kuiba; bali jiwekeeni hazina mbinguni, kusikoharibika kitu kwa nondo wala kutu, wala wevi hawavunji wala hawaibi.”—Mathayo 6:19, 20.
Kungeweza kuwako hisi gani kubwa zaidi ya usalama na kuhisi furaha kuliko kujua kwamba mtu ameweka tumaini lake katika Mungu Mweza Yote, anayetuandalia sikuzote?—Zaburi 94:14; Waebrania 13:5, 6.
Kukubali Karipio la Kimungu
Shauri, hata karipio, hukubaliwa linapotolewa na rafiki wa kweli katika roho ya upendo. Mmoja aliyedai kuwa rafiki wa Ayubu mtumishi wa Mungu, alimwambia hivi wakati mmoja kwa kujihisi kuwa mwadilifu: “Yu heri [mwenye furaha, NW] mtu yule Mungu amwadhibuye.” Ingawa taarifa hiyo ni kweli, lile ambalo Elifazi alidokeza kwa maneno hayo—kwamba Ayubu alikuwa na hatia ya kosa zito—halikuwa kweli. Alikuwa ‘mfariji mwenye kutaabisha’ kama nini! Lakini, baadaye wakati Yehova alipomkaripia Ayubu katika njia ya upendo, Ayubu alikubali karipio hilo kwa unyenyekevu akajiweka kwenye njia ya kupata furaha nyingi zaidi.—Ayubu 5:17; 16:2; 42:6, 10-17.
Leo, Mungu hasemi na watumishi wake moja kwa moja kama alivyosema na Ayubu. Badala ya hivyo, yeye huwakaripia kupitia Neno lake na tengenezo lake linaloongozwa kwa roho. Hata hivyo Wakristo wanaofuatia mapendezi ya vitu vya kimwili, mara nyingi hawana wakati, nguvu, wala mwelekeo wa kujifunza Biblia kwa ukawaida na kuhudhuria mikutano yote ambayo tengenezo la Yehova huandaa.
Mtu ambaye Mungu hukaripia, kulingana na Mithali 3:11-18, hutambua hekima ya kukubali karipio hilo: “Heri [mwenye furaha ni, NW] mtu yule aonaye hekima, na mtu yule apataye ufahamu. Maana biashara yake ni bora kuliko biashara ya fedha, na faida yake ni nyingi kuliko dhahabu safi. Yeye ana thamani kuliko marijani, wala vyote uvitamanivyo havilingani naye. Ana wingi wa siku katika mkono wake wa kuume, utajiri na heshima katika mkono wake wa kushoto. Njia zake ni njia za kupendeza sana, na mapito yake yote ni amani. Yeye ni mti wa uzima kwao wamshikao sana; ana heri [ni mwenye furaha, NW] kila mtu ashikamanaye naye.”
Kuwa Safi na Kupenda Amani
Yesu aliwasimulia watu wenye furaha kuwa “wenye moyo safi” na “wapatanishi [wenye amani, NW]” (Mathayo 5:8, 9) Lakini katika ulimwengu unaotia moyo mtindo-maisha wa kufuatia vitu vya kimwili, ni rahisi kama nini kwa tamaa zenye ubinafsi, na labda zisizo safi, kutia mzizi moyoni mwetu! Ikiwa hatuongozwi na hekima ya kimungu, ni rahisi kama nini kwetu hata kuongozwa vibaya katika kutafuta hali njema ya kifedha kupitia njia zenye kutilika shaka ambazo zingeharibu mahusiano ya amani pamoja na wengine! Kwa sababu nzuri, Biblia huonya hivi: “Shina moja la mabaya ya kila namna ni kupenda fedha; ambayo wengine hali wakiitamani hiyo wamefarakana na Imani, na kujichoma kwa maumivu mengi.”—1 Timotheo 6:10.
Kupenda fedha kunachochea maoni yenye ubinafsi yanayotokeza kutoridhika, kutokuwa na shukrani, na kuwa na pupa. Ili kuzuia roho hiyo isiyofaa isikue, Wakristo wengine kabla ya kufanya maamuzi makuu ya kifedha hujiuliza maswali kama vile: Je! kweli nakihitaji? Je! kweli nahitaji kununua kitu hicho chenye bei ya juu au kazi hiyo yenye mshahara mzuri, yenye kutumia wakati mwingi kuliko mamilioni ya watu wengine ambao ni lazima waishi bila hayo mambo? Je! ningeweza labda kutumia fedha na wakati wangu katika kupanua ushirika wangu katika ibada ya kweli, katika kutegemeza ile kazi ya kuhubiri ulimwenguni pote, au katika kuwasaidia wale waliopungukiwa kuliko mimi?
Kuonyesha Uvumilivu
Mojawapo majaribu ambayo Ayubu alilazimika kuvumilia lilikuwa hasara ya kiuchumi. (Ayubu 1:14-17) Kama vile kielelezo chake kinavyoonyesha, uvumilivu unatakwa katika kila sehemu ya maisha. Ni lazima Wakristo wengine wavumilie mnyanyaso; wengine, kishawishi; wengine bado, hali za kiuchumi zisizofaa. Lakini uvumilivu wa kila aina utathawabishwa na Yehova, kama vile mwanafunzi Mkristo Yakobo alivyoandika kuhusu Ayubu: “Twawaita heri [wenye furaha, NW] wao waliosubiri.”—Yakobo 5:11.
Kupuuza masilahi ya kiroho ili kufanya hali yetu ya kiuchumi iwe bora zaidi huenda kukaleta kitulizo cha muda, lakini je, kutasaidia kudumisha njozi yetu nyangavu ya kitulizo cha kiuchumi chenye kudumu chini ya Ufalme wa Mungu? Je! yastahili kujihatarisha hivyo?—2 Wakorintho 4:18.
Kupata Furaha Sasa na Milele
Watu wengine hupinga maoni ya Yehova waziwazi kuhusu lile linalohitajiwa kuwafurahisha wanadamu. Wakipuuza manufaa za maana zaidi zenye kudumu muda mrefu, hawaoni faida yoyote ya kibinafsi ya wakati uu huu ya kufanya lile ambalo Mungu hushauri. Wanashindwa kutambua kwamba kutumainia vitu vya kimwili ni ubatili na huongoza kwenye hali ya kukata tamaa. Mwandishi wa Biblia huuliza hivi kwa usahihi: “Mali yakiongezeka, hao walao nao waongezeka; na mwenyewe hufaidiwa nini, ila kuyatazama kwa macho yake tu?” (Mhubiri 5:11; ona pia Mhubiri 2:4-11; 7:12.) Kupendezwa hufifia upesi kama nini navyo vitu tulivyofikiri ni lazima kabisa tuwe navyo huja hatimaye kuwekwa kando na kusahauliwa!
Mkristo wa kweli hatajiruhusu kamwe kukazwa afanye yanayofanywa na wenzake katika njia ya kimwili. Yeye ajua kwamba thamani ya kweli hupimwa si kulingana na yale ambayo mtu anayo, lakini kulingana na vile mtu alivyo. Hakuna shaka lolote akilini mwake kuhusu ni nini kinachohitajiwa kumfurahisha mtu—kumfurahisha kikweli: kufurahia uhusiano mzuri na Yehova na kuendelea kuwa mwenye shughuli katika utumishi Wake.
[Picha katika ukurasa wa 20]
Vitu vya kimwili pekee haviwezi kamwe kuleta furaha ya kudumu
[Picha katika ukurasa wa 22]
Biblia husema hivi: “Wenye furaha ni wale wanaotambua uhitaji wao wa kiroho”