Je! Wewe Ni Kama Mmoja wa Hao?
‘NI BORA kuwa simba kwa siku moja kuliko kuwa mwana-kondoo kwa miaka mia moja.’ Maneno hayo yalisemwa na Benito Mussolini, aliyekuwa mtawala wa kimabavu wa Italia wakati mmoja.
Kama vile Mussolini watu wengi wangekataa kufananishwa na wana-kondoo na kondoo. Hata hivyo, mfalme mtunga zaburi wa Israeli wa kale Daudi alijulisha rasmi hivi: “BWANA [Yehova, NW] ndiye mchungaji wangu, . . . Kando ya maji ya utulivu huniongoza.” (Zaburi 23:1, 2) Naam, Yehova Mungu ndiye Mchungaji Mkuu, anayewapa watu wake utunzaji wororo kana kwamba wao ni kondoo wasioweza kudhuru.
Watu wa Mungu husemwa kuwa kondoo wa ufananisho kwenye Zaburi 95:7, ambapo twasoma hivi: “Kwa maana [Yehova] ndiye Mungu wetu, na sisi tu watu wa malisho yake, na kondoo za mkono wake.” Huenda ikawa wengine wangemtazamia mtunga zaburi aseme juu ya “kondoo wa malisho yake” na “watu wa mkono wake.” Lakini hapa mambo yamepinduliwa, na hivyo watu wa Yehova wenyewe wanatambulishwa kuwa kondoo zake. Wanafurahia faida za malisho ya Mungu na huongozwa na mkono wake wenye upendo.
Mwana wa Yehova, Yesu Kristo, ndiye Mchungaji Mwema. Mara nyingi aliwarejezea watu kuwa kondoo. Kwa mfano, Yesu alisema juu ya “kundi dogo” na juu ya “kondoo [zake] wengine.” (Luka 12:32; Yohana 10:14-16) Kuhusu wanafunzi wake wanyenyekevu wenye mfano wa kondoo, Yesu alisema hivi: “Kondoo wangu waisikia sauti yangu; nami nawajua, nao wanifuata. Nami nawapa uzima wa milele; wala hawatapotea kamwe; wala hakuna mtu atakayewapokonya katika mkono wangu.” (Yohana 10:27, 28) Katika mkono wa mtawala mkarimu, raia hufaidika na nguvu, upendeleo, mwongozo na ulinzi wake.—Ufunuo 1:16, 20; 2:1.
Hakuna awezaye kuwapokonya watu wenye mfano wa kondoo kwelikweli kutoka katika mkono wa Yesu wenye ulinzi. Leo, yeye anawatenganisha watu ama wakiwa “mbuzi” ambao hawana upendeleo wake ama wakiwa “kondoo” watakaofurahia uhai wa milele chini ya utawala wa Ufalme wa Mungu wa kimbingu. (Mathayo 25:31-46) Je! utathibitika kuwa mmoja wa kondoo hao waliobarikiwa?
[Hisani ya Picha katika ukurasa wa 32]
Garo Nalbandian