Kondoo wa Yehova Wahitaji Utunzaji Mwororo

“Jueni kwamba BWANA ndiye Mungu; . . . Tu watu wake, na kondoo wa malisho yake.”—ZABURI 100:3.

1. Yehova huwatendeaje watumishi wake?

YEHOVA ndiye Mchungaji Mkuu. Ikiwa sisi ni watumishi wake, yeye hutuona kuwa kondoo wake naye hutupa sisi utunzaji mwororo. Baba yetu wa kimbingu hutufariji na hutuburudisha katika “njia za haki kwa ajili ya jina lake.” (Zaburi 23:1-4) Mchungaji Mwema, Yesu Kristo, hutupenda sana hivi kwamba alitoa nafsi yake kwa ajili yetu.—Yohana 10:7-15.

2. Watu wa Mungu hujipata wakiwa katika hali gani?

² Tukiwa wenye kupokea utunzaji mwororo, twaweza kusema hivi pamoja na mtunga-zaburi: “Mtumikieni BWANA kwa furaha; njoni mbele zake kwa kuimba [“kwa kilio chenye shangwe,” NW]; jueni kwamba BWANA ndiye Mungu; ndiye aliyetuumba na sisi tu watu wake; tu watu wake, na kondoo wa malisho yake.” (Zaburi 100:2, 3) Ndiyo, sisi ni wenye shangwe na tu salama. Ni kana kwamba tulikuwa salama kutoka wawindaji waovu tukiwa katika zizi lenye kuta za mawe zenye nguvu.—Hesabu 32:16; 1 Samweli 24:3; Sefania 2:6.

Wachungaji wa Kundi Wenye Nia

3. Wazee Wakristo waliowekwa rasmi hutendeaje kundi la Mungu?

³ Si ajabu kwamba sisi ni wenye shangwe tukiwa kondoo wa Mungu! Wazee waliowekwa rasmi huongoza miongoni mwetu. Wao ‘hawajikuzi wenyewe kuwa wakuu,” hawajifanyi mabwana juu yetu, wala kujaribu kuwa mabwana-wakubwa juu ya imani yetu. (Hesabu 16:13; Mathayo 20:25-28; 2 Wakorintho 1:24; Waebrania 13:7) Badala ya hivyo, wao ni wachungaji wenye upendo watumiao shauri hili la mtume Petro: “Lichungeni kundi la Mungu lililo kwenu, na kulisimamia, si kwa kulazimishwa, bali kwa hiari kama Mungu atakavyo; si kwa kutaka fedha ya aibu, bali kwa moyo. Wala si kama wajifanyao mabwana juu ya mitaa yao, bali kwa kujifanya vielelezo kwa lile kundi.” (1 Petro 5:2, 3) Mtume Paulo aliwaambia wazee wenzake hivi: “Kazieni uangalifu kwenu wenyewe na kwa kundi lote, ambalo miongoni mwalo roho takatifu imewaweka nyinyi rasmi kuwa waangalizi, kulichunga kutaniko la Mungu, ambalo alilinunua kwa damu ya Mwana wake mwenyewe.” Na kondoo hushukuru kama nini kwamba watu hawa waliowekwa rasmi na roho takatifu ‘hulitendea kundi kwa wororo’!—Matendo 20:28-30, NW.

4. Charles T. Russell alijulikana sana kwa sababu ya uhusiano wa aina gani kati yake na kundi?

⁴ Yesu alilitolea kutaniko “zawadi zikiwa wanaume,” (NW) wengine wakiwa “mapasta,” au wachungaji, ambao hulitendea kundi la Yehova katika njia nyororo. (Waefeso 4:8, 11; King James Version) Mmoja wa wanaume hao alikuwa Charles T. Russell, msimamizi wa kwanza wa Watch Tower Society. Yeye aliitwa Pasta Russell kwa sababu ya utendaji wake mbalimbali wenye upendo na huruma katika kulichunga kundi lililo chini ya Mchungaji Mkuu, Yesu Kristo. Leo, wazee Wakristo wanawekwa rasmi na Baraza Linaloongoza la Mashahidi wa Yehova, na uangalifu huonyeshwa ili kutotumia majina kama vile “pasta,” “mzee,” au “mwalimu” kuwa vyeo. (Mathayo 23:8-12) Hata hivyo, wazee wa sasa hufanya kazi ya kipasta, au uchungaji, kazi ambayo ni kwa manufaa ya kondoo wa malisho ya Yehova.

5. Kwa nini watu wapya wapate kujua wazee waliowekwa rasmi katika kutaniko la Kikristo?

⁵ Wakiwa wachungaji, wazee wana sehemu ya maana katika maendeleo ya kiroho ya watu wapya. Kwa hiyo, kitabu kipya Ujuzi Uongozao Kwenye Uhai Udumuo Milele chasema hivi kwenye ukurasa 168: “Pata kuwajua wazee wa kutaniko waliowekwa rasmi. Wao wana uzoefu mwingi katika kutumia ujuzi juu ya Mungu, kwani wametimiza sifa za waangalizi zilizoandikwa katika Biblia. (1 Timotheo 3:1-7; Tito 1:5-9) Usisite kumfikia mmoja wao ikiwa unahitaji msaada wa kiroho ili kushinda tabia au mazoea yanayopingana na matakwa ya Mungu. Utagundua kwamba wazee wanafuata himizo hili la Paulo: ‘Watieni moyo walio dhaifu; watieni nguvu wanyonge; vumilieni na watu wote.’—1 Wathesalonike 2:7, 8; 5:14.”

Watu Wapya Wanapotaka Kuhubiri

6. Ni utaratibu gani unaofuatwa ikiwa mwanafunzi wa Biblia ataka kuwa mhubiri wa Ufalme?

⁶ Baada ya mwanafunzi wa Biblia kutwaa ujuzi na amehudhuria mikutano kwa muda fulani, huenda akataka kuwa mhubiri wa Ufalme, mtangazaji wa habari njema. (Marko 13:10) Ikiwa ndivyo, Shahidi anayeongoza funzo la Biblia pamoja naye apaswa kumpasha habari mwangalizi-msimamizi, ambaye atapanga kwamba mmoja wa wazee katika Halmashauri ya Utumishi ya Kutaniko na mzee mwingine wakutane na mwanafunzi wa Biblia pamoja na mwalimu wake. Mazungumzo yatategemea kitabu Tumefanywa Tengenezo Tutimize Huduma Yetu, ukurasa wa 98 na wa 99. Ikiwa wazee hao wawili waona kwamba mtu huyu mpya aamini mafundisho ya Biblia ya msingi naye amejipatanisha na kanuni za Mungu, yeye ataambiwa kwamba anastahili kushiriki katika huduma ya hadharani.a Anaporipoti huduma yake kwa kutoa ripoti ya utumishi wa shambani, habari hiyo itatiwa katika kadi ya Maandishi ya Mhubiri wa Kundi (Kutaniko) yenye jina lake. Huyu mtu mpya aweza sasa kuripoti utendaji wake wa kutoa ushahidi pamoja na mamilioni ya wengine ‘wanaohubiri neno la Mungu’ kwa shangwe. (Matendo 13:5) Tangazo la kwamba yeye ni mhubiri asiyebatizwa litatolewa kwa kutaniko.

7, 8. Ni katika njia zipi mhubiri asiyebatizwa aweza kupewa msaada unaohitajiwa katika huduma?

⁷ Mhubiri asiyebatizwa ahitaji msaada wa wazee na Wakristo wengine wakomavu. Kwa kielelezo, maendeleo yake ya kiroho ni jambo la kumpendeza kiongozi wa Funzo la Kitabu la Kutaniko ambalo ahudhuria. Mhubiri mpya huenda akaona ni vigumu kusema kwa matokeo katika kazi ya nyumba kwa nyumba. (Matendo 20:20) Kwa hiyo yaelekea kwamba atakaribisha msaada, hasa kutoka kwa yule ambaye amekuwa akiongoza mafunzo ya Biblia naye katika kitabu Ujuzi. Msaada huo wenye kutumika unafaa, kwani Yesu Kristo aliwatayarisha wanafunzi wake kwa ajili ya huduma.—Marko 6:7-13; Luka 10:1-22.

⁸ Ili huduma yetu iwe yenye matokeo, utayarishaji mzuri wa kimbele ni muhimu. Kwa hiyo, hao wahubiri wawili waweza kwanza kukutana ili wajizoeze utoaji mbalimbali uliodokezwa katika matoleo ya kila mwezi ya Huduma Yetu ya Ufalme. Waanzapo utumishi wao wa shambani, yule mwenye uzoefu zaidi aweza kuongea katika nyumba ya kwanza au ya kwanza na ya pili. Baada ya utangulizi wenye urafiki, wahubiri wote wawili wangeweza kushiriki katika kutoa ushahidi. Kufanya kazi pamoja katika huduma kwa majuma machache huenda kukaongoza kwenye ziara nzuri za kurudia na hata kwenye funzo la Biblia nyumbani katika kitabu Ujuzi Uongozao Kwenye Uhai Udumuo Milele. Mhubiri mwenye uzoefu zaidi aweza kuongoza hilo funzo kwa muda fulani kisha ampe huyo mpiga-mbiu mpya wa Ufalme. Wahubiri wote wawili watakuwa wenye furaha kama nini ikiwa mwanafunzi wa Biblia adhihirisha uthamini kuelekea ujuzi juu ya Mungu!

9. Ni mipango ipi inayofanywa wakati mhubiri atamani kubatizwa?

⁹ Mhubiri asiyebatizwa afanyapo maendeleo ya kiroho, huenda akajiweka wakfu kwa Mungu katika sala na kutaka kubatizwa. (Linganisha Marko 1:9-11.) Apaswa kujulisha tamaa yake ya kubatizwa kwa mwangalizi-msimamizi wa kutaniko, atakayepanga kwamba wazee wapitie pamoja na mhubiri huyo maswali kwenye ukurasa 175 hadi 218 wa kitabu Tumefanywa Tengenezo Tutimize Huduma Yetu. Zile sehemu nne ambazo maswali yamegawanywa zaweza kupitiwa katika vipindi vitatu na wazee watatu tofauti-tofauti ikiwezekana. Wakikubali kwamba mhubiri asiyebatizwa ana uelewevu ufaao wa mafundisho ya Biblia na astahili katika njia nyinginezo, wao watamwambia kwamba aweza kubatizwa. Kwa sababu ya wakfu na ubatizo wake, yeye anakuwa ‘mwenye kutiwa alama’ kwa ajili ya wokovu.—Ezekieli 9:4-6.

Kushughulikia Mahitaji ya Pekee

10. Baada ya kumaliza funzo lake la kitabu Ujuzi na kubatizwa, mtu ataongezeaje ujuzi wake wa Kimaandiko?

¹⁰ Baada ya mtu kumaliza funzo lake la Biblia katika kitabu Ujuzi naye amebatizwa, huenda lisiwe jambo la lazima kuongoza funzo la rasmi pamoja naye katika kitabu cha pili, kama vile Wenye Umoja Katika Ibada ya Mungu wa Pekee wa Kweli.b Bila shaka, yule ambaye amebatizwa juzijuzi atajifunza mengi ajitayarishapo kwa ajili ya mikutano ya Kikristo na aihudhuriapo kwa kawaida. Atajipatia pia ujuzi wa ziada kadiri kiu yake ya kupata kweli imsukumapo kusoma na kujifunza vichapo vya Kikristo faraghani na kuzungumza juu ya mambo ya Kimaandiko pamoja na waamini wenzake. Lakini namna gani ikiwa mahitaji ya pekee yatokea?

11. (a) Apolo alisaidiwaje na Prisila na Akila? (b) Ni msaada upi uwezao kupewa kwa mtu mzima kijana aliyebatizwa juzijuzi ambaye anafikiria ndoa?

¹¹ Hata Apolo, aliyekuwa “mwenye ujuzi mkubwa wa Maandiko” na aliyefundisha kuhusu Yesu kwa usahihi, alinufaika wakati Wakristo wakomavu Prisila na Akila ‘walipomchukua wakamfundisha hiyo Njia ya Mungu kwa usahihi zaidi.’ (Matendo 18:24-26, Habari Njema kwa Watu Wote; linganisha Matendo 19:1-7.) Kwa hiyo, labda mtu mzima kijana aliyebatizwa juzijuzi anafikiria kutafuta uchumba na ndoa. Mkristo mwenye uzoefu zaidi aweza kumsaidia kupata habari juu ya mambo haya katika vichapo vya Watch Tower. Mathalani, habari yenye kusaidia kuhusiana na mambo hayo imo katika kitabu Maswali Ambayo Vijana Huuliza—Majibu Yafanyayo Kazi, Sehemu ya 7.c Mhubiri aliyeongoza funzo la Biblia pamoja naye aweza kuzungumza juu ya habari hii pamoja na huyu mtu mpya, ingawa funzo la kawaida lisingehusika.

12. Ni msaada upi uwezao kuandaliwa kwa wenzi wa ndoa waliobatizwa karibuni walio na matatizo?

¹² Fikiria kielelezo kingine. Labda wenzi wa ndoa waliobatizwa karibuni wanakuwa na matatizo kutumia kanuni za kimungu. Wao waweza kumwendea mzee, ambaye angeweza kutumia jioni chache akizungumza juu ya Maandiko pamoja nao na kuelekeza uangalifu wao kwenye habari inayopatikana katika vichapo vya Watch Tower. Hata hivyo, huyu mzee asingeanzisha tena funzo la Biblia la kawaida pamoja na huyo mume na mke.

Mtu Mpya Akikosea

13. Kwa nini wazee wa kutaniko waonyeshe rehema kwa mtu aliyebatizwa karibuni anayekosea lakini ni mwenye kutubu?

¹³ Wazee humwiga Mchungaji Mkuu, Yehova, asemaye hivi: “Mimi mwenyewe nitawalisha kondoo zangu, . . . nitawafunga waliovunjika, nitawatia nguvu wagonjwa.” (Ezekieli 34:15, 16; Waefeso 5:1) Kwa kupatana na roho hiyo, mwanafunzi Yuda alihimiza kwamba rehema ionyeshwe Wakristo watiwa-mafuta waliokuwa na shaka au waliokuwa wametumbukia katika dhambi. (Yuda 22, 23) Kwa kuwa sisi kwa kufaa hutazamia mengi zaidi kutoka kwa Wakristo wenye uzoefu, kwa hakika rehema yapasa ionyeshwe mtu aliyebatizwa karibuni—aliye mwana-kondoo tu—afanyaye kosa lakini ni mwenye kutubu. (Luka 12:48; 15:1-7) Kwa hiyo wazee ambao ‘humfanyia Yehova hukumu,’ huwapa kondoo hao utunzaji mwororo na kuwarekebisha katika roho ya upole.—2 Mambo ya Nyakati 19:6; Matendo 20:28, 29; Wagalatia 6:1.d

14. Ni jambo gani lipasalo kufanywa wakati mhubiri aliyebatizwa juzijuzi afanya dhambi nzito, naye aweza kusaidiwaje?

¹⁴ Basi, tuseme kwamba mhubiri aliyebatizwa juzijuzi alikuwa na tatizo la kunywa hapo awali naye akatumbukia tena katika kunywa kupindukia pindi moja au mbili. Au labda alishinda zoea la tumbaku la muda mrefu lakini akashindwa na kishawishi cha kuvuta sigareti faraghani mara moja au mbili. Hata ingawa ndugu yetu mpya amemwomba Mungu msamaha, yeye apaswa kutafuta msaada wa mzee ili dhambi hiyo isiwe zoea. (Zaburi 32:1-5; Yakobo 5:14, 15) Anapotaja kosa lake kwa mmoja wa wazee, mzee huyo apaswa kujaribu kumrekebisha huyo mtu mpya katika njia yenye rehema. (Zaburi 130:3) Shauri la Kimaandiko huenda likatosha ili kumsaidia aifanyie miguu yake njia za kunyooka baadaye. (Waebrania 12:12, 13) Mzee huyo angezungumza juu ya hali pamoja na mwangalizi-msimamizi wa kutaniko ili kuamua ni msaada gani zaidi upasao kutolewa.

15. Katika hali nyingine, ni jambo jipi huenda likawa la lazima wakati mtu aliyebatizwa karibuni anapofanya dhambi?

¹⁵ Katika hali nyinginezo huenda mengi zaidi yakahitajiwa. Ikiwa sifa mbaya, hatari kwa kundi, au matatizo mazito mengine yanahusika, baraza la wazee lingewapa wazee wawili mgawo wa kuchunguza jambo hilo. Ikiwa wazee hao wapata kwamba jambo hilo ni zito vya kutosha hivi kwamba halmashauri ya kihukumu inahitajiwa, wanapaswa kuripoti hilo kwa baraza la wazee. Kisha baraza la wazee lingeweka rasmi halmashauri ya kihukumu ili kumsaidia mkosaji. Halmashauri ya kihukumu yapaswa ishughulike naye katika njia nyororo. Wanapaswa kujitahidi kumrekebisha kwa Maandiko. Akiitikia jitihada zenye fadhili za halmashauri ya kihukumu, basi wangeamua kama kungekuwa na manufaa yoyote ya yeye kutotumiwa kwa sehemu jukwaani kwenye mikutano katika Jumba la Ufalme au ikiwa apaswa kuruhusiwa kutoa maelezo mikutanoni.

16. Wazee waweza kufanya nini ili kumsaidia mkosaji?

¹⁶ Mkosaji akiitikia, mzee mmoja au wawili katika halmashauri ya kihukumu waweza kupanga kufanya ziara za uchungaji zenye nia ya kuimarisha imani yake na kujenga uthamini wake kuelekea viwango vya Mungu vyenye uadilifu. Kila mmoja wao aweza kufanya kazi pamoja naye katika huduma ya shambani mara kwa mara. Wao waweza kuwa na mazungumzo machache ya Kimaandiko pamoja naye, labda wakitumia makala zifaazo za Mnara wa Mlinzi na Amkeni! lakini si kuanzisha funzo la Biblia la kawaida. Kukiwa na utunzaji huo mwororo, mkosaji aweza kuimarishwa ili kukinza udhaifu mbalimbali wa kimwili katika siku za usoni.

17. Ni hatua zipi zinazochukuliwa ikiwa mkosaji aliyebatizwa hatubu na kuacha mwendo wake wenye dhambi?

¹⁷ Bila shaka, kubatizwa juzijuzi si udhuru wa kuzoea dhambi bila kutubu. (Waebrania 10:26, 27; Yuda 4) Ikiwa mkosaji yeyote aliyebatizwa hatubu na kuacha mwendo wake wenye dhambi, yeye angeondoshwa kutanikoni. (1 Wakorintho 5:6, 11-13; 2 Wathesalonike 2:11, 12; 2 Yohana 9-11) Hatua hii ionekanapo kuwa ya lazima, baraza la wazee litachagua halmashauri ya kihukumu. Ikiwa kuondosha kunatukia, tangazo hili fupi laweza kufanywa: “ . . . ametengwa na ushirika.”e

Wasaidie “Kusonga Mbele Kwenye Ukomavu”

18. Kwa nini twaweza kuwa na hakika kwamba sikuzote Wakristo waliobatizwa karibuni na wengine watakuwa na mengi zaidi ya kujifunza juu ya Yehova na mapenzi yake?

¹⁸ Walio wengi sana kati ya watumishi wa Mungu watabaki kundini. Pia, kwa furaha, kila mmoja wetu ataweza kumkaribia hata zaidi Baba yetu wa kimbingu kwa sababu sikuzote tutaweza kujifunza zaidi juu yake na mapenzi yake. (Mhubiri 3:11; Yakobo 4:8) Yale maelfu yaliyobatizwa Pentekoste 33 W.K. kwa hakika yalikuwa na mengi zaidi ya kujifunza. (Matendo 2:5, 37-41; 4:4) Ndivyo na Wasio Wayahudi, ambao hawakuwa na malezi ya Kimaandiko. Mathalani, ndivyo ilivyokuwa kwa wale waliobatizwa baada ya hotuba ya Paulo kwenye Areopago katika Athene. (Matendo 17:33, 34) Leo pia, wale wanaobatizwa karibuni wana mengi zaidi ya kujifunza nao wahitaji wakati na msaada ili kuimarisha azimio lao la kuendelea kufanya lililo sawa machoni pa Mungu.—Wagalatia 6:9; 2 Wathesalonike 3:13.

19. Wale wanaobatizwa waweza kusaidiwaje “kusonga mbele kwenye ukomavu”?

¹⁹ Kila mwaka maelfu hubatizwa na huhitaji msaada ili yaweze “kusonga mbele kwenye ukomavu.” (Waebrania 6:1-3) Kwa neno, kielelezo, na msaada wenye kutumika katika huduma, huenda ukaweza kusaidia wengine wajivike utu mpya na ‘waendelee kwenda katika kweli.’ (3 Yohana 4; Wakolosai 3:9, 10) Ikiwa wewe ni mhubiri mwenye uzoefu, huenda wazee wakakualika umsaidie mwamini mwenzako mpya katika utumishi wa shambani au kuzungumza naye juu ya mambo fulani ya Kimaandiko kwa majuma machache ili kuimarisha imani yake katika Mungu, uthamini wake kuelekea mikutano ya Kikristo, na kadhalika. Uhusiano kati ya wachungaji na kundi ni kama ule wa baba katika kuhimiza na wa mama katika uanana. (1 Wathesalonike 2:7, 8, 11) Hata hivyo, wazee na watumishi wa huduma wachache hawawezi kushughulikia kila jambo linalohitajiwa kutanikoni. Sisi sote ni kama familia ambayo washiriki wayo husaidiana. Kila mmoja wetu aweza kufanya jambo fulani ili kusaidia waabudu wenzetu. Wewe mwenyewe huenda ukaweza kutoa kitia-moyo, kufariji walioshuka moyo, kutegemeza walio dhaifu.—1 Wathesalonike 5:14, 15.

20. Wewe waweza kufanya nini ili kueneza ujuzi juu ya Mungu na kuandaa utunzaji mwororo kwa kondoo wa malisho ya Yehova?

²⁰ Wanadamu wahitaji ujuzi juu ya Mungu, na ukiwa Shahidi wa Yehova, waweza kuwa na sehemu yenye shangwe katika kuueneza. Kondoo wa Yehova wahitaji utunzaji mwororo, nawe waweza kuwa na fungu lenye upendo katika kusaidia kuuandaa. Yehova na abariki huduma yako, naye akuthawabishe kwa jitihada zako za kuhisiwa moyoni za kusaidia kondoo wa malisho yake.

[Maelezo ya Chini]

Ungejibuje?

◻ Yehova huwatendeaje kondoo wake?

◻ Ni nini kinachofanywa watu wapya wanapotaka kuhubiri?

◻ Waamini wenzi waweza kusaidiaje watu wapya wenye mahitaji ya pekee?

◻ Wazee waweza kutoa msaada upi kwa wale wanaokosea lakini ni wenye kutubu?

◻ Wewe waweza kumsaidiaje mtu aliyebatizwa karibuni “kusonga mbele kwenye ukomavu”?

[Picha katika ukurasa wa 16]

Charles T. Russell alijulikana sana kuwa mchungaji mwenye upendo kwa kundi

[Picha katika ukurasa wa 18]

Wachungaji wenye huruma hutendea kundi la Mungu kwa wororo