Mambo Makuu ya Biblia Zaburi 73 mpaka 106

“Mbarikini Yehova”​—Kwa Sababu Gani?

Ni nani kati yetu anayeweza kukosa shukrani tunapofikiria yale ambayo Yehova ametufanyia, anafanya, na atatufanyia? Naam, mioyo yetu lazima itusukume tumbariki Mungu wetu. Uhakika wa kwamba tuna sababu ya kutosha kumbariki Yehova unakaziwa katika Vitabu vya Tatu na Nne vya Zaburi. Tunapoangalia Zaburi 73 mpaka 106, jiulize mwenyewe, ‘Mimi binafsi nina sababu gani za kumbariki Yehova?’

Usiwaonee Kijicho Waovu

Tafadhali soma Zaburi 73 mpaka 77. Asafu, kwa wazi ikitia ndani wana wake, anahesabiwa kuwa mwandikaji wa Zaburi hizo. Asafu anakiri kwamba aliwaonea kijicho waovu​—mpaka alipozirudia fahamu zake. (Zaburi 73) Kisha uharibifu wa Yerusalemu unaombolezwa. (Zaburi 74) Halafu ni maneno ya shukrani kwa Mungu wa ‘kutisha,’ yakifuatwa na sala kwa “Mungu mkuu” kuwakumbuka watu wake wanaoteswa.​—Zaburi 75-77.

◆ 73:24—Yehova alimchukua mtunga zaburi kwenye “utukufu” gani?

Mpaka mtunga zaburi alipotambua ya kwamba ‘kumkaribia Mungu ni kwema kwake,’ alikuwa amehisi kwamba waovu walikuwa afadhali kuliko wenye haki. (Zaburi 73:2-12, 28) Kukubali kwake “shauri” la Mungu limwongoze kulitokeza kupokea kwake “utukufu,” yaani, upendeleo pamoja na Yehova, uhusiano uliobarikiwa pamoja Naye.

◆ 76:6, NW—“Mwendesha gari” na “farasi” ‘walishikwaje na usingizi mzito’?

Waisraeli walifunzwa kumtumaini Yehova badala ya farasi na magari. (Zaburi 20:7; Mithali 21:31) Hawakuwa na sababu ya kuogopa farasi na magari yenye mundu mkubwa ya maadui, kwa kuwa Yehova angewageuza maadui wao wakose nguvu, akiwafanya ‘washikwe na usingizi mzito.’ Mtajo hapa unaelekeza kwenye “usingizi wa milele”​—kifo chenyewe. (Yeremia 51:39) Hili linapasa kuwa onyo kwa wafalme wa ulimwengu leo wanaoweka tumanini katika silaha zao.​—Zaburi 76:12.

Somo Kwetu Sisi: Zaburi 75 inaonya dhidi ya kiburi inaposema, “Msiinue pembe yenu juu.” (Mstari 5) Pembe ilifananisha nguvu, uwezo. (Kumbukumbu la torati 33:17) Mtu kuinua pembe yake kulimaanisha kutenda kwa kiburi. Mtunga zaburi hapa anawaonya waovu wasijivune kwa sababu ya kile kinachoonekana kuwa cheo chao cha uwezo, kwa kuwa ‘pembe zote za wasio haki zitakatwa’ na Yehova. (Zaburi 75:10) Kujua hivi kunawatia moyo watumishi wa Yehova waendelee kuwa waaminifu ijapokuwa usitawi unaoonekana wa waovu.​—Linganisha Zaburi 144:11-15a.

Mtii“Aliye Juu”

Soma Zaburi 78 mpaka 83. Zaburi ya Asafu inaendelea. Masomo ya historia ya Waisraeli yanasimuliwa. (Zaburi 78) Kisha ukiwa wa hekalu unaombolezwa, ukifuatiwa na sala ya kurudishwa kwa Israeli. (Zaburi 79, 80) Baada ya wimbo unaovuta fikira kwenye wokovu kupitia kwa Mungu na ombi kwa watu wake kumtii, maombi yanatolewa kwa Yehova afikilize hukumu juu ya mahakimu waliopotoka na juu ya maadui wa Waisraeli.​—Zaburi 81-83.

◆ 82:1—Yehova anahukumuje “katikati ya miungu”?

Kwa wazi, “miungu” walikuwa mahakimu wa Israeli. Waliitwa miungu kwa kuwa walikuwa na nguvu katika uwezo wa kufikiliza hukumu. Yehova, akiwa Hakimu Mkuu, alikuwa na haki ya kimungu kuingia katikati ya mahakimu hao na kuwakemea kwa kukosa kutoa hukumu kulingana na sheria yake.​—Isaya 33:22; Zaburi 82:2-4.

◆ 83:9-15—Je! kusudi la mtunga zaburi lilikuwa kulipiza kisasi?

Sivyo. Alikuwa akisali ili Mungu afikilize hukumu juu ya wale ambao ‘wanamchukia’ Yehova. (Mstari 2) Mataifa mengine yangejifunza kwamba Mungu ambaye jina lake ni Yehova kwa kweli ‘ndiye pekee yake aliye juu, juu ya dunia yote.’ (Mstari 18) Wonyesho huo wa uwezo ungetokeza kutukuzwa kwa jina la Mungu, Yehova, duniani pote.

Somo Kwetu Sisi: Uhakika wa kwamba Yehova anawabariki wale ambao wanamtii unaonyeshwa na mtajo wa “unono wa nganu.” (Zaburi 81:16) Hapa neno “unono” linatumiwa kwa njia ya mfano kuonyesha kilicho bora zaidi. (Linganisha Zaburi 63:5.) Ikiwa Waisraeli ‘wangeisikiliza sauti ya Yehova,’ yeye angewabariki kwa “unono wa nganu”​—kilicho bora zaidi, vitu vyenye kufaa zaidi. (Zaburi 81:11; Kumbukumbu la Torati 32:13, 14) Vivyo hivyo, ikiwa sisi ‘tutaisikiliza sauti ya Yehova,’ atatubariki.​—Mithali 10:22.

Kumkaribia Yehova

Soma Zaburi 84 mpaka 89. Watunga zaburi wanaonyesha shauku nyingi kwa nyumba ya Mungu. (Zaburi 84) Baadaye, mateka waliorudishwa wanauliza hasira ya Yehova iondolewe. (Zaburi 85) Mtunga zaburi anasali ili apate mwongozo na ulinzi, akiwa na uhakika wa kwamba Yehova atamjibu. (Zaburi 86) Wimbo mtamu unaohusu wale ‘waliozaliwa Sayuni’ unafuatwa na ombi la anayeteswa. (Zaburi 87, 88) Kisha inafuata Zaburi inayoonyesha mambo makuu kuhusu fadhili zisizostahilika za Yehova kama inavyoonyeshwa katika agano la Daudi.​—Zaburi 89.

◆ 84:3—Mbona ndege watajwe?

Mtunga zaburi, Mlawi mzao wa Kora, alitamani sana kuwa katika “maskani” ya Yehova. (Mistari 1, 2) Lakini kulikuwako makumi ya maelfu ya Walawi. Ni mara moja tu katika nusu mwaka ambapo kungekuwa na mgawanyo wa Walawi waliopewa mgawo wa kutumikia kwenye hekalu kila juma. Tofauti na hilo, hata ndege walikuwa na nyumba yao yenye kudumu kwenye mahali patakatifu kwa kujenga viota vyao huko. Lo! mtunga zaburi angefurahi kama nini kumsifu Yehova vivyo hivyo kwa kukaa daima katika nyumba yake!

◆ 84:49—‘Matendo hayo ya fadhili zisizostahilika’ yalikuwa yapi?

Usemi ‘matendo ya fadhili zisizostahilika’ unaelekeza kwenye agano la Ufalme pamoja na sehemu zalo zote. Nyakati za taabu, lilikuwa jambo lenye kufaa Waisraeli wataje ahadi hizo kwa Yehova, si kwamba walitilia mashaka agano, bali kwa njia ya kumsihi Yehova kwa msingi walo.

Somo Kwetu Sisi: Zaburi 85 inatilia mkazo jambo ambalo linapaswa kutufanya sisi tuwe na shauku kuhusu mfumo mpya wa Mungu. Ni mtajo mfupi tu unaoonyeshwa kuhusu mibaraka ya vitu vya kimwili. (Mstari 12) Maana kubwa zaidi inakaziwa kwenye mibaraka ya kiroho: fadhili zisizostahilika, ukweli, uadilifu, na amani. (Mistari 10-13) Yehova hatuvuti kwa kutumia vitu vya kimwili bali anaonyesha mibaraka ya kiroho katika mfumo mpya kuwa ndiyo inayopasa kuwa nguvu kubwa yenye kutusukuma sisi.

‘Yehova Amekuwa Mfalme!’

Soma Zaburi 90 mpaka 100. Musa anatofautisha umilele wa Yehova na maisha mafupi ya mwanadamu, kisha anamtaja Yehova kuwa chanzo cha usalama wetu. (Zaburi 90, 91) Sifa kuu za Yehova zinatukuzwa, na zaburi zinazofuata zinataja uwezo wa Mungu, fadhili zisizostahilika, uadilifu na pia kichwa cha Ufalme.​—Zaburi 92-100.

◆ 90:10—Je! Musa hakuishi zaidi ya miaka 80?

Musa aliyeishi kwa miaka 120, hakuwa mfano wa watu wote kwa ujumla. Kizazi kilichokosa imani kilichotoka Misri, wale walioandikishwa “tangu waliopata umri wa miaka ishirini na zaidi” wangekufa katika muda wa miaka 40, ndani ya muda unaotajwa na Musa. (Hesabu 14:29-34) Maelezo ya kwamba wakati Musa alipokufa “jicho lake halikupofuka, wala nguvu za mwili wake hazikupunguka” yanaonyesha kwamba alikuwa na nguvu ya Mungu yenye kutegemeza.​—Kumbukumbu 34:7.

◆ 95:3—Yehova anakuwaje “Mfalme mkuu juu ya miungu yote”?

Akiwa Mwenye Enzi Kuu, Yehova ni mkuu na Mfalme juu ya miungu yote ya uwongo kwa njia ya kwamba amewapita wote. Hakuna ulinganifu wo wote kati ya Yehova Mungu na malaika wo wote au kitu cho chote ambacho huenda wengine wakakiabudu, kutia na miungu ya uwongo isiyokuwapo.

Somo Kwetu Sisi: Zaburi 91 inakazia sababu nyingine inayotufanya tumbariki Yehova​—“mahali pa siri pake Aliye juu.” (Mstari 1) Ni mahali pa usalama wa kiroho, pa ulinzi kutokana na madhara ya kiroho, kwa wale wanaotimiza matakwa yanayoonyeshwa kwenye zaburi hii. Ni “siri” kwa kuwa haijulikani na watu wa ulimwengu, wanaokosa kuona kwa njia ya kiroho. Uhakika wa kwamba ni mahali pa siri pa “Aliye juu” unaonyesha kwamba tukishikilia upande wa Yehova wa lile suala la enzi kuu ya ulimwengu tutapata usalama hapo.

‘Mshukuruni [Yah], Enyi Watu!’

Soma Zaburi 101 mpaka 106. Hapa, Daudi anaeleza njia yake ya kusimamia mambo ya kifalme. (Zaburi 101) Anayeteseka anamwomba Yehova ‘aijenge Sayuni.’ (Zaburi 102) Miito ya ‘kumhimidi [Yehova]’ inafuata katika zaburi zinazovuta fikira juu ya rehema ya Mungu, utukufu, na kazi za uumbaji. Hapa pia, ndipo pa kwanza pa mahali zaidi ya 20 katika hizi Zaburi ambapo maneno, “Msifuni Yah Enyi Watu!’ yanaonekana. (Zaburi 103, 104, NW) Kwa kumaliza, Zaburi mbili za kihistoria zinambariki Yehova kwa matendo yake kwa ajili ya watu wake.​—Zaburi 105, 106.

◆ 102:25—Ni nani ‘aliyeitia misingi ya dunia’?

Mtunga zaburi alikuwa akizungumza juu ya Mungu, lakini mtume Paulo aliyatumia maneno hayo kwa Yesu Kristo. (Waebrania 1:10, 11) Kama inavyoonekana, maneno hayo yanahusu Yesu pia, kwa kuwa alitenda akiwa Wakili wa Yehova katika kuumba ulimwengu wote mzima. (Wakolosai 1:15, 16) Kwa hiyo Yesu, pia, angeweza kusemwa kuwa ‘aliitia misingi ya dunia.’

◆ 103:14—“Umbo” linamaanisha nini?

Neno linalotumiwa hapa “umbo” linahusiana na kitenzi “kufanya umbo,” linalotumiwa kwenye Mwanzo 2:7, (NW), na neno “mfinyanzi,” linalotumiwa kwa maana ya yule anayefinyanga udongo. (Isaya 29:16; Yeremia 18:2-6) Kwa hiyo mtunga zaburi anatukumbusha kwamba Yehova, aliye Mfinyanzi Mkuu anatushika kwa upole, akijua ya kwamba sisi ni wenye kuvunjika kwa urahisi kama vyombo vya udongo.​—Linganisha 2 Wakorintho 4:7.

◆ 104:4, NW—Yehova ‘anawafanyaje malaika zake kuwa roho’?

Kwa kuwa malaika tayari ni viumbe vya kiroho, jambo hili halingeweza kumaanisha miili yao ya kiroho. Ingawaje, neno “roho” linaweza pia kumaanisha “upepo” au “kani ya utendaji.” Hivyo Mungu anaweza kutumia malaika wake kuwa viumbe wenye nguvu wafanye mapenzi yake. Wanaweza pia kutumiwa kuwa mawakili wa kufikiliza hukumu​—kama “moto wa miali.” Ni jambo lenye kutumaanisha kwa Wakristo kujua kwamba kazi yao ya kuhubiri inategemezwa na viumbe hao wenye nguvu wa kimalaika.​—Linganisha Ufunuo 14:6, 7.

Somo Kwetu Sisi: Zaburi 106 inatusaidia tuthamini kwamba Kora, Dathani, na Abiramu wenye kuasi walikionea kijicho cheo cha Musa cha kuwa msimamizi wa taifa la Mungu. (Zaburi 106:16; Hesabu 16:2-11) Mwishowe, uasi huo ulivunjwa-vunjwa wakati ‘moto ulipowaka’ kati ya waasi hao. (Zaburi 106:18) Hakika hatari za kiburi na kuona kijicho zinaonyeshwa hapa waziwazi. Kusema isivyofaa dhidi ya watumishi waliowekwa na Yehova kunaweza kuleta hasira yake vivyo hivyo leo.​—Waebrania 13:17; Yuda 4, 8, 11.

Kweli kweli, Yehova ametupa mengi ambayo tunahitaji kushukuru. Tunapofikiria mibaraka mingi ambayo ametumwagia, je! hatupaswi kufanya kama alivyosihi mtunga zaburi, “Ee nafsi yangu, umhimidi [Yehova]”?​—Zaburi 103:1.