‘Yehova Asipoijenga Nyumba . . . ’

HATA uwe unaishi wapi, yaelekea kwamba wewe waurudisha mwangwi wa mawazo ya moyoni yaliyo katika maneno hayo. Mitindo ya makao na njia za ujenzi hutofautiana sana. Kuna vijumba vya fito zilizokandikwa matope, vibanda vya magogo, nyumba-saruji zenye kujengewa chini—orodha yenyewe yaonekana kutokuwa na mwisho. Watu fulani huhisi wakiwa wamestareheka vizuri katika kijumba cha nyasi kama vile wengine hustareheka wakiwa katika makao ya gharama kubwa zaidi. Kwa nini iko hivyo?

Kuhisi starehe, kuridhika, hutegemea hasa uandamani wa watu ambao mtu hushinda nao. (Mithali 18:24) Ujapokuwako umetimeti wote na uvutio mwingi uliomo ulimwenguni, nyumbani ndipo mahali ambapo kisilika mtu hutaka kupageukia ili apate amani na kitulizo. Hata hivyo, kwa kuamua kulingana na ripoti zenye kuhusu maisha ya ki-siku-hizi nyumbani, hakuna uhakikisho kamili kwamba sikuzote mtu atapata amani na kitulizo nyumbani. Kwa kadiri kubwa, wale wenye kuishi pamoja nawe—jamaa yako—waweza ama kushiriki amani yako au kuiharibu. Basi, ni nini siri ya kujenga nyumba yenye furaha na amani?

Kuijenga Nyumba

“Bwana [Yehova, NW] asipoijenga nyumba waijengao wafanya kazi bure,” wasema mstari wa kwanza wa Zaburi 127. Wale ambao hushiriki kujenga majengo kwa ajili ya ibada ya Mungu wa kweli, Yehova, hulipata hilo kuwa kweli. Ingawa wafanya kazi stadi hujitolea wakati na jitihada zao ili kusimamisha haraka Majumba ya Ufalme yaliyo mazuri, baraka ya Yehova ndiyo hutoa uhakikisho kamili wa mafanikio. Hata watazamaji waweza mara nyingi kuona kwamba jambo fulani lisilo la kikawaida lafanya kazi. Kwa kielelezo, gazeti moja likiripoti juu ya mradi wa jinsi hiyo katika Colchester, Uingereza, lilitumia mtajo wa kwamba “Yehova Aiinua Paa.”

Hata hivyo, mafanikio katika jitihada nyinginezo zisizohusu miradi ya majengo halisi hutegemea pia baraka ya Yehova. Fikiria maneno ya Sulemani katika mstari wa tatu wa Zaburi 127: “Tazama, wana ndio urithi wa BwANA [Yehova, NW], uzao wa tumbo ni thawabu.” Yehova ni Mjenzi bora kabisa pia kuhusiana na jamaa za watu, na wazazi wana pendeleo zuri ajabu la kuwa wafanya kazi wenzake, au vibarua-wenzi.a (Waebrania 11:10) Wazazi Wakristo waweza kutumiaje uenzi huu wenye pendeleo kwa manufaa nzuri na kufanikiwa kujenga jamaa yenye furaha na amani, moja ambayo yamletea heshima Muumba, Yehova Mungu?

Ujenzi wa Jamaa Wenye Mafanikio

Kiasili kimoja chenye kuhitajiwa sana katika ujenzi wenye mafanikio ni mchoro thabiti wa ramani ya ujenzi. Ili kujenga wasifaji wachanga wa Mungu, hakuna ramani ya ujenzi iliyo nzuri kuliko Neno lake lililovuviwa, Biblia. (2 Timotheo 3:16, 17) “Mlee mtoto katika njia impasayo, naye hataiacha, hata atakapokuwa mzee,” akaandika Sulemani. (Mithali 22:6) “Njia impasayo” ni njia ya Yehova, na wazazi waifuatapo, wao hutolea wachanga wao tazamio la kusitawi wawe watumishi wa Mungu wenye imani.

Jengo thabiti hutaka vifaa thabiti vya ujenzi. Mwafrika mmoja mwenye kuzuru Ulaya aliona ikiwa vigumu kuamini kwamba baadhi ya majengo aliyoona yalikuwa na umri wa mamia ya miaka. Ilikuwa ni kama amepata ufunuo kwa kuona vifaa vile vya kudumu sana vilivyotumiwa katika majengo haya. Kwa upande ule mwingine, wajenzi watumiapo vifaa haba ili kuokoa gharama, mara nyingi matokeo huwa yenye msiba, hata yenye kifo. Hiyo yaweza kuwa kweli pia katika kulea watoto.

Wakati wa kuchukuliwa mimba, watoto hupokea sheria ya urithi-tabia ambayo huwa na kutokamilika kwa sababu ya dhambi. (Zaburi 51:5) Ndiyo kusema, wao hutiwa dosari tangu pale pale mwanzoni. Ni lazima wazazi Wakristo wakinze jambo hili kwa kujitahidi kujenga sifa za kuhofu Mungu zilizo za kudumu katika watoto wao. (1 Wakorintho 3:10-15) Jambo hili lisipofanywa, hata wazazi wafanye bidii kadiri gani katika maeneo mengine, kama vile kuandalia wana na binti zao chakula, mavazi na makao yaliyo bora zaidi, jitihada zao za ujenzi zitakuwa kazi bure tu.

Ndiyo sababu wazazi, hasa akina baba, wapewa shauri hili la kimungu: “Endeleeni kuwalea [watoto] katika nidhamu na rekebisho la akilini la Yehova.” (Waefeso 6:4, NW) Nidhamu na rekebisho la akilini la Yehova lahusisha ndani ramani na vifaa vya ujenzi vilivyo bora zaidi. Kuvitumia kutatokeza manufaa za milele kwa ajili ya jamaa nzima.

Mazoezi ya Papo Hapo Bila Kupoteza Wakati

Kujapokuwa na ramani za ujenzi zilizo bora zaidi, sikuzote migogoro isiyotarajiwa hutokea wakati wa ujenzi wowote. Vivyo hivyo, ni lazima wazazi wajifunze kutazamia matatizo yasiyotarajiwa katika maisha ya siku kwa siku ya washirika wa jamaa na kujitayarisha kushughulika nayo. Hilo laweza kufanywaje?

Uwasiliano mwema kati ya wazazi wale wawili ni muhimu. Wakati baba na mama wazungumzapo kwa sala kuhusu maendeleo ya wachanga wao wakiwa pamoja, watapata maeneo fulani ambapo pongezi lastahiliwa na mengine ambapo “ujenzi” zaidi wahitajiwa. Udhaifu huo mbalimbali ukiisha kutambuliwa, wazazi hao waweza kutenda pamoja na kuchukua hatua zifaazo kushughulika nao.

Lakini labda wewe una jamaa kubwa, na huenda ukashangaa kwa kujiuliza hivi: ‘Sisi twaweza kufanyaje jitihada zetu ziyafae mahitaji moja moja ya watoto wetu wengi?’ Kwa nini msitoe mazoezi ya papo hapo bila kupoteza wakati ili watoto wenu waweze kusaidiana? Wakurufunzi hutumia miaka mingi wakijifunza stadi za kazi mbalimbali wakiwa kando ya mafundi stadi. Labda kwenye funzo lenu la jamaa, mwaweza kujaribu kuwaomba watoto wenu matineja wawaeleze walio wachanga zaidi mambo fulani. Ufuataji haki, uchaguzi wa marafiki, kukinza sana mavutano mabaya shuleni, na kadhalika, ni vichwa vya mazungumzo ambavyo watoto wa umri mkubwa na mchanga zaidi waweza kusimulia vizuri sana. Kwa kuwapa watoto walio wa umri mkubwa zaidi mgawo wa kusimulia miradi hiyo ya maisha halisi, waweza kusaidia kuwazoeza wasitawishe nguvu zao za ufahamivu na uwezo wa kufundisha na huku ukifundisha walio wachanga zaidi mambo ambayo wao wahitaji kuyajua. (Waebrania 5:14) Jambo hili lina ile manufaa zaidi ya kusitawisha udugu wa kweli miongoni mwa watoto wa ujamaa mmoja.

Labda jamaa yako ni ndogo, yenye mtoto mmoja tu. Basi, wewe una fursa nyingi za kupata kumjua na kumwelewa mchanga wako. Hata hivyo, uwe na habari juu ya hatari ya kumharibu mtoto wako kwa kumfanya mno awe ndiye wa kuelekezewa uangalifu wa watu wote. Nyinyi ni watatu, sivyo? Kwa hiyo fanyeni mambo pamoja. Hiyo itamfundisha kuwasiliana na wengine na kugeuza uangalifu wake njenje, hivyo kumzuia kuwa mwenye kujifikiria yeye mwenyewe tu.

Lenga Shabaha ya Kupata Upamoja wa Jamaa

Bila shaka, mengi sana yahusika katika kujenga jamaa kuliko kuongoza funzo la Biblia na kutoa mashauri na nidhamu tu. Sulemani alisema: “Mwanadamu hapati jema kupita kula na kunywa, na kuiburudisha roho [nafsi, NW] yake kwa mema katika kazi yake [ya bidii, NW].” (Mhubiri 2:24) Bila shaka jamaa yako huona shangwe kula chakula wakati kitayarishwapo kwa ladha nzuri. Je! nyinyi hupanga kula milo yenu mkiwa pamoja kama jamaa? Huenda hiyo isiwezekane sikuzote wakati washirika tofauti-tofauti wa jamaa wapo kazini, shuleni, au katika shughuli nyingine. Ingawa hivyo, kwa kawaida kuna angalau mlo mmoja kwa siku ambao mwaweza kula pamoja mkiwa jamaa. Ni nini kiwezacho kuchangia hali ya kupendeza kwenye meza ya jamaa?

Ndugu mmoja hutumia pindi ile kutokeza swali la Biblia ili wote waliopo wazungumze. Bila shaka, yeye huepuka kuaibisha wale ambao huenda wasijue jibu. Wengine husimulia yaliyoonwa katika huduma ya shambani. Kwa kutoa uangalifu kwenye mambo ya kiroho, nyakati za milo huwa pindi za kujenga jamaa nzima. (Ona Warumi 14:19.) Ni kweli kwamba katika sehemu fulani za ulimwengu, si desturi kuongea sana wakati wa mlo. Hata hivyo, ni muhimu kufanya jitihada nyingi kudumisha hali yenye furaha. Mithali 15:17 yasema hivi: “Chakula cha mboga penye mapendano; ni bora kuliko ng’ombe aliyenona pamoja na kuchukiana.”

Burudiko na badiliko la mwendo lafaa pia katika maisha ya jamaa ya Kikristo. Wazazi wenye hekima hutumia pindi hizo kujenga muungo imara wa jamaa ya kitheokrasi. Jinsi gani?

Ingawa ni rahisi kuacha wachanga waende zao wakafuatie masilahi yao wenyewe, kufanya hivyo kuna hatari. Kwa kielelezo, laweza kuwa jambo la kukosa hekima kama nini kuruhusu wachanga wajihusishe sana katika michezo hivi kwamba tisho latokea kwa uhai ama kwa mguu au mkono! (1 Timotheo 4:8) Kwa kadiri iwezekanayo, chagueni utendaji mbalimbali ambao wahusisha kila mshirika wa jamaa. Baba aweza kuomba maoni na mawazo yao na kugawia kila mmoja jambo la kufanya katika kutayarisha.

Je! nyinyi kama jamaa mwaweza kupanuka katika upendo wenu na kualika washirika wengine wa kundi washiriki nanyi shangwe za jamaa yenu? Washirika wa kundi walio na umri mkubwa zaidi huona shangwe mara nyingi kuishiriki roho ya jamaa, hasa wakati iwapo kwamba jamaa zao wenyewe hazipo au haziishi kulingana na kanuni za Kikristo. (Yakobo 1:27) Katika makundi mengi, kuna jamaa za mzazi mmoja. Kwa kuonyesha ufikirio ufaao kwa ukichwa wa kitheokrasi na kwa kustahi adabu za Kikristo, wazee na wengine waweza kuwatolea makao ya kiroho washirika wa jamaa hizo. (Isaya 32:1) “Yatima” wengi wamechanua wakawa vichwa vya jamaa walio na usawaziko kutokana na upendezi wenye upendo walioonyeshwa na watu wazima walio Wakristo wakomavu.—Zaburi 82:3.

Kujenga nyumba ya watu walio Wakristo ni kazi ngumu. Lakini kwa msaada wa Yehova, nyinyi mtakuja kuthamini kikweli kwamba “wana ndio urithi wa Bwana [Yehova, 2VW], uzao wa tumbo ni thawabu.” (Zaburi 127:1, 3) Wao waweza kuwa chanzo cha sifa si kwa wazazi Wakristo tu bali pia kwa Muumba wao, Yehova Mungu.

[Maelezo ya Chini]