Sura 15
Edomu wa Mfano, wa Kisasa Kuondolewa
1, 2. Muumba anayaonaje mataifa yaliyo na silaha nyingi zenye nguvu, na Yehova ameazimia nini kulingana na unabii wa Isaya?
LEO ULIMWENGU umejipatia silaha nyingi zenye nguvu zaidi ya wakati mwinginewo wote uliotangulia. Silaha za nyukilia za mataifa ni tisho halisi la kuwapo kwenyewe kwa wanadamu. Hivyo, basi, Muumba wa jamaa ya kibinadamu, Yehova Mungu, anaionaje hali hiyo? Hilo limeelezwa wazi katika sura ya 34 ya unabii wa Isaya, unaoanza kwa maneno haya:
2 “[Karibieni], enyi mataifa, mpate kusikia; sikilizeni, enyi kabila za watu; dunia na isikie, nacho kiijazacho; [dunia yenye kuzaa na mazao yayo yote]. Maana [Yehova] ana ghadhabu juu ya mataifa yote, na hasira kali juu ya jeshi lao lote; [atawaangamiza] kabisa, [atawatoa] waende kuchinjwa. Watu wao waliouawa watatupwa nje, na uvundo wa maiti zao utapaa juu, na milima itayeyushwa kwa damu yao. Na jeshi lote la mbinguni litafumuliwa, na mbingu [serikali za kibinadamu zisizofaa kitu] zitakunjwa kama karatasi, na jeshi lao lote litanyauka kama vile jani la mzabibu linyaukavyo na kupukutika, na kama jani la mtini linyaukavyo na kupukutika.” (Isaya 34:1-4) Unabii wa kuogopesha kweli kweli!
3. (a) Mataifa hayo yanaitwa yasikilize nini, na kwa sababu gani Yehova anaweza kuyaamuru kwa kufaa hivyo? (b) Ni jambo gani linaonyesha kwamba mataifa hayo hayakusikiliza?
3 Muumba wa ulimwengu mzima ana mabishano na mataifa leo. Ndiyo sababu mataifa yanaitwa yasikilize ujumbe wenye msingi wa Biblia ambao yeye ametoa utangazwe ulimwenguni pote tangu mwaka wa 1919. Inayapasa kusikiliza anayosema kupitia Mashahidi wake. Lakini mwelekeo wa matukio ya ulimwengu unathibitisha kwamba hayakufanya hivyo, na hawakuchukuliwa kwa uzito na mataifa Mashahidi wake, yaliyopendelea Umoja wa Mataifa wala si Ufalme wa kimbingu ulio mikononi mwa Mwanaye aliyetawazwa, yeye aliye “Mwana-Mfalme wa Amani.”
Unabii wa Isaya Dhidi ya Edomu
4, 5. (a) Waedomu walikuwa nani, na walichukua mwelekeo gani juu ya taifa ndugu-pacha yake Israeli? (b) Kwa hiyo, Yehova aliamuru nini kwa habari ya Edomu?
4 Miongoni mwa kabila za watu za leo kuna sehemu moja inayotenda ikiwa na daraka kubwa. Sehemu hiyo ilifananishwa na taifa la Edomu ambalo linatajwa wazi kwa jina katika unabii huu. Waedomu walikuwa wazao wa Esau, aliyeuza haki yake ya uzaliwa wa kwanza kwa ndugu yake pacha Yakobo, kwa ajili ya “mkate na chakula cha dengu.” Ni wakati huo kwamba Esau akaja kuitwa Edomu, maana yake “Mwekundu.” (Mwanzo 25:24-34) Kwa sababu Yakobo alichukua mahali pake katika haki yenye thamani kubwa ya uzaliwa wa kwanza, Esau alijawa na chuki kuelekea ndugu yake pacha. Edomu akawa adui asiyesamehe wa taifa la kale la Israeli, au Yakobo, hata ingawa yalikuwa mataifa ndugu-pacha. Kwa sababu ya uhasama huo dhidi ya watu wa Mungu, Edomu ikajiletea ghadhabu iliyostahili, ya Yehova Mungu wa Israeli, na Yeye aliihukumia Edomu uangamivu wa milele. Azimio hilo la kimungu limetolewa katika maneno haya ya nabii Isaya:
5 “Maana upanga wangu umekunywa na kushiba mbinguni; tazama, utashukia Edomu, na juu ya watu wa laana yangu, ili kuwahukumu. Upanga wa [Yehova] umeshiba damu, umenona kwa unono, kwa damu ya wana-kondoo na mbuzi, kwa mafuta ya figo za kondoo waume; maana [Yehova] ana dhabihu huko Bozra [mji maarufu sana wa Edomu], machinjo makubwa katika nchi ya Edomu.”—Isaya 34:5, 6.
6. (a) Kwa sababu gani Yehova angeweza kusema juu ya kupunga-punga “upanga” wake dhidi ya Edomu “mbinguni”? (b) Ufalme wa Yuda uliposhambuliwa na Babuloni, Edomu ilionyesha mwelekeo gani usio wa kidugu dhidi ya watu wa Yehova?
6 Nchi ya taifa lenye akili ya uuaji la Edomu lazima iloweshwe damu yayo yenyewe kupitia “upanga” wa Yehova. Edomu ilikalia sehemu ya nchi ya juu yenye milima-milima. (Yeremia 49:16) Kwa hiyo, kwa kufanya kuwe na machinjo katika nchi hiyo, Yehova angeweza kusema kwa njia ya mfano kwamba alikuwa akipunga-punga upanga wake wa hukumu “mbinguni.” Edomu ilikuwa na majeshi yenye nguvu, na majeshi yake yenye silaha yalizunguka-zunguka misururu iliyoinuka kufika mbinguni ili kulinda nchi hiyo dhidi ya wavamizi. Kwa hiyo kwa kufaa jeshi la Edomu lingeweza kuitwa “jeshi lote la mbinguni.” Lakini Edomu yenye nguvu haikutoa msaada kwa taifa ndugu-pacha yake, Israeli, liliposhambuliwa na majeshi ya Babuloni. Badala yake, Edomu ilishangilia kuona Ufalme wa Yuda ukiangushwa na hata ikawahimiza waharabu walo. (Zaburi 137:7) Uhaini wa Edomu ulifikia hatua ya kuwafuatia watu mmoja mmoja waliokuwa wakikimbia kwa ajili ya maisha zao na kuwatoa kwa adui zao. (Obadia 10-14) Waedomu hao walipanga kuitwaa nchi iliyoachwa ya Waisraeli, wakisema kwa kujisifu dhidi ya Yehova.—Ezekieli 35:10-15.
7. Mungu wa Israeli alionaje mwenendo wa uhaini wa taifa la Edomu?
7 Je! Yehova, Mungu wa Israeli wa kale, aliachilia mwenendo huo usio wa kidugu wa Waedomu kuelekea watu wake waliochaguliwa? Hapana. Ndiyo sababu moyo wa Mungu ulikusudia “siku ya kisasi” na “mwaka wa malipo” ili kulipia madhara yaliyokuwa yametendwa kwa tengenezo lake la kidunia, linaloitwa Sayuni. Unabii huo ulisema hivi: “Maana ni siku ya kisasi cha [Yehova], mwaka wa malipo, ili kushindania Sayuni [mbele ya Mahakama ya Ulimwengu Mzima].” —Isaya 34:8; Ezekieli 25:12-14.
8. (a) Yehova alitumia nani kuleta adhabu juu ya Edomu? (b) Nabii Obadia alitabiri nini juu ya Edomu?
8 Si muda mrefu baada ya Yerusalemu kuharibiwa, Yehova alianza kuonyesha kisasi chake cha uadilifu juu ya Waedomu kupitia mfalme wa Babuloni, Nebukadreza. (Yeremia 25:8, 15, 17, 21) Majeshi ya Babuloni yalipogeukia Edomu, hakuna kitu ambacho kingeokoa Waedomu! Majeshi ya Babuloni yaliwaangusha Waedomu hao kutoka vilele vya miamba yao. Ulikuwa ni “mwaka wa malipo” juu ya Edomu. Kama Yehova alivyotabiri kupitia nabii mwingine: “Kwa sababu ya udhalimu aliotendwa ndugu yako Yakobo, aibu itakufunika, nawe utakatiliwa mbali hata milele. . . . Kama ulivyotenda, ndivyo utakavyotendwa; malipo yako yatakurudia juu ya kichwa chako mwenyewe.”—Obadia 10, 15.
9. Ni nani Edomu wa mfano wa kisasa, na kwa sababu gani?
9 Hilo pia linaonyesha mwelekeo wa Yehova dhidi ya Edomu wa mfano wa kisasa. Yeye ni nani? Basi, katika hii karne ya 20, ni nani ameongoza katika kushutumu na kutesa watumishi wa Yehova? Je! si Jumuiya ya Wakristo yenye kuasi imani kupitia jamii ya viongozi wayo wa kidini wenye kiburi? Ndiyo! Jumuiya ya Wakristo, yale makao ya Ukristo wa uwongo, imejiinua juu kufika vilele virefu vya milima katika mambo ya ulimwengu huu. Ndiyo sehemu iliyoinuka zaidi ya tengenezo la mfumo wa mambo wa wanadamu, na dini zayo ndizo sehemu kuu yenye kutawala ya Babuloni Mkuu. Lakini Yehova ameamuru kuwe na “mwaka wa malipo” dhidi ya Edomu wa mfano, wa kisasa kwa ajili ya mwenendo wayo mbaya wenye jeuri kuelekea watu wake, Mashahidi wake.
Msiba Kama Ule wa Edomu
10. Unabii wa Isaya 34:9, 10 unaelezaje msiba wa Edomu, lakini unabii huo unahusu nani leo?
10 Tunapoendelea kuzungumza juu ya ile sehemu nyingine ya unabii huu wa Isaya, tunaweza kuifikiria Jumuiya ya Wakristo ya leo: “Na vijito vyake vitageuzwa kuwa lami na, mavumbi yake yatageuzwa kuwa kiberiti, na ardhi yake itakuwa lami iwakayo. Haitazimwa mchana wala usiku, moshi wake utapaa milele.” (Isaya 34:9, 10) Hivyo, nchi ya Edomu inaonyeshwa ikiwa imekauka sana hivi kwamba vijito vyake vilikuwa vikitiririka lami na kana kwamba mavumbi yake yalikuwa kiberiti, kisha vitu hivi vyenye kushika moto vikawashwa moto.—Linganisha Ufunuo 17:16.
11, 12. Kutokana na maelezo ya kiunabii yanayotolewa kwenye Isaya 34:10-15, ni nini kingeipata nchi ya Edomu, na hali hiyo ya nchi ingeendelea kwa muda gani?
11 Unabii wa Isaya unaendelea kusema hivi: “Tangu kizazi hata kizazi itakuwa ukiwa; hapana mtu atakayepita kati yake milele na milele. Kaati na nungu wataimiliki, bundi na kunguru watakaa huko, naye atanyosha juu yake kamba ya ukiwa na timazi ya utupu. Watawaitia wakuu wake ufalme, lakini hawatakuwapo; wakuu wake wote wamekuwa si kitu. Miiba itamea majumbani mwake, upupu na mbigili ndani ya maboma yake; nayo itakuwa kao la mbweha, na ua la mbuni. Na hayawani wa nyikani watakutana na mbwa-mwitu, na beberu anamwita mwenziwe; naam, babewatoto anakaa huko na kujipatia raha. Huko pili atafanya kioto chake, na kuzaa na kuotamia.”—Isaya 34:10-15.
12 Edomu ingekuwa nchi ya “utupu” kwa habari ya wanadamu. Ingekuwa nchi iliyo ukiwa yenye wanyama-mwitu tu, ndege, na nyoka. Hali kavu hiyo ya nchi ingeendelea, kama ulivyosema mstari wa 10, “milele na milele.” Hakungekuwa kurudishwa kwa wale ambao hapo kwanza walikuwa wakaaji wayo.—Obadia 18.
13. Ni jambo gani linatabiriwa juu ya Jumuiya ya Wakristo katika “kitabu cha [Yehova],” na kwa kutaja waziwazi, kitabu hicho ni nini?
13 Hilo lilitangulia kufananisha hali mbaya kama nini ya Edomu wa mfano wa kisasa—Jumuiya ya Wakristo! Imejionyesha yenyewe kuwa adui mkali wa Yehova Mungu, ambaye Mashahidi wake imewatesa vikali sana. Kwa hiyo huu uharibifu wayo unaokaribia sana kabla ya Har–Magedoni umetabiriwa katika “kitabu cha [Yehova].” (Isaya 34:16) Kutaja waziwazi, hiki “kitabu cha [Yehova]” ni kitabu chake cha hesabu, kinachoeleza kirefu hesabu ambazo lazima afanye pamoja na wale adui zake na waonezi wa watu wake. Yale yaliyoandikwa katika “kitabu cha [Yehova]” kuhusu Edomu ya kale yalitimia, hilo linahakikisha kwamba unabii huo kama vile unavyohusu Jumuiya ya Wakristo, ile Edomu ya kisasa, vilevile utatimia.
14. Waedomu wa mfano wa leo hawajakubali nini, na ni mfano gani wa watu wa Yehova ambao wameshindwa kufuata?
14 Waedomu wa mfano wa leo hawajamkubali Yehova Mungu kuwa Mfalme wakati huu wa “umalizio wa mfumo wa mambo.” Zaidi ya hilo, kwa kuwa Jumuiya ya Wakristo ni sehemu yenye kutokeza zaidi sana ya Babuloni Mkuu, imehukumiwa kushiriki mapigo yake. Haikutii amri ya Yehova ya ‘kutoka’ katika Babuloni Mkuu. (Ufunuo 18:4) Haikufuata mfano wa mabaki ya Waisraeli wa kiroho au ule wa “mkutano mkubwa” wa “kondoo wengine.”
15, 16. Wakati ujao ulio karibu wa Jumuiya ya Wakristo ukoje, kama ulivyotabiriwa katika Ufunuo 17 na 18 na Isaya 34?
15 Wakati ujao ulio karibu wa Jumuiya ya Wakristo kweli kweli hauna matumaini mazuri. Inajaribu yote iwezayo kufanya amani na rafiki zayo za kisiasa na kuwazuia wasiungane pamoja katika tendo lenye jeuri dhidi yayo, na kuiharibu kabisa, lakini wapi!
16 Kulingana na Ufunuo sura za 17 na 18, Mungu Mwenye Nguvu Zote, Yehova, atalitia katika mioyo yao wazo la kutoa nguvu zao za kisiasa na kijeshi kwa tendo la kinyama dhidi ya Babuloni Mkuu katika sehemu zake zote za kidini, kutia na Jumuiya ya Wakristo. Hilo litaiondolea dunia yote ule Ukristo wa bandia. Hali ya Jumuiya ya Wakristo itakuwa kama ile isiyo na matumaini mazuri inayoelezwa katika Isaya 34. Haitakuwapo ione matokeo ya ile “vita ya siku ile kuu ya Mungu Mwenyezi” yenye kukata maneno dhidi ya mataifa, ambayo yatakuwa yamekwisha mwangamiza Babuloni Mkuu. Edomu ya mfano, Jumuiya ya Wakristo, itakuwa imefagiliwa mbali kabisa kabisa isiwepo usoni pa dunia, “milele na milele.”
[Picha katika ukurasa wa 122]
Jumuiya ya Wakristo itapokea hukumu inayofanana na ile ya Waedomu, wazao wa Esau, aliyeuza haki yake ya uzaliwa wa kwanza kwa mlo mmoja