Mambo Makuu ya Biblia Zaburi 107 Mpaka 150

Mungu Mwenye Furaha, Watu Wenye Furaha!

Furaha ni mradi ambao watu walio wengi hawaufikii kamwe. Ingawa hivyo, furaha ni njia ya maisha kwa kikundi kidogo cha wengine. Ufunguo wao wa kuipata ni nini? Ni ibada ya kweli! Zaburi zinatusadikisha kwamba Yehova ni Mungu mwenye furaha, na basi sisi tunaweza kuwa wenye furaha kwa kumwabudu yeye. Ili tupate ushuhuda wa jambo hili acheni tutazame Kitabu cha Tano cha Zaburi, yaani Zaburi 107 mpaka 150.

Yehova Mkombozi

Tafadhali soma Zaburi 107 mpaka 119. Sala ya Wayahudi ya kuomba ukombozi kutoka utekwa wa Kibabuloni inajibiwa, na ‘waliokombolewa na Yehova’ wanasherehekea kurudishwa kwao kwa wimbo. (Zaburi 107) Alipokwisha kukombolewa muda fulani kabla ya hapo, Daudi ‘aliimbia’ Mungu mdundo mtamu na akatangaza wema na upendo Wake. (Zaburi 108, 109) Akiwa na nguvu kutoka kwa Yehova, Bwana wa Daudi, ambaye yeye ni Yesu Kristo, alipaswa kutiisha adui za Mungu. (Zaburi 110) Zaidi ya kuokoa watu Wake, Yehova anabariki mtu mnyofu ambaye anamwogopa Yeye. (Zaburi 111, 112) Baada ya kukombolewa kwao kutoka Babuloni, Wayahudi waliziimba Zaburi za Haleli, au nyimbo za sifa, kwenye karamu kubwa za kila mwaka. (Zaburi 113-118) Zaburi ya 119 ndiyo iliyo ndefu zaidi ya zote, na mistari yote 176 ya sura hiyo inaelekeza kwenye neno au sheria ya Mungu isipokuwa 2.

◆ 107:27—‘Akili zao ziliwapotea’ jinsi gani?

Kama mabaharia walionaswa katika dhoruba yenye uharibifu, hekima (akili, UV) ya Wayahudi ilithibitika kuwa ubatili wakati wa hali ya kutekwa katika Babuloni; njia zote za kibinadamu za kuokoa zilikuwa zimeshindwa. Lakini kwa kugeukia Yehova katikati ya hali hiyo yenye dhoruba, ukombozi ukawa umekuja. Yeye aliifanya dhoruba ile ya mfano ipungue na akawakomboa kuwafikisha kwenye “bandari” salama—nchi ya Yuda.—Zaburi 107:30

◆ 110:3—Ni nini maana ya kuwa na “wanaume vijana kama tu matone ya umande”? (NW)

Umande unashirikishwa na baraka, uzaaji, na utele. (Mwanzo 27:28) Matone ya umande ni yenye uanana pia, yenye kuburudisha, yenye kutegemeza uhai, na ni mengi sana. Katika siku ya jeshi la kivita la Mfalme wa Kimasihi, raia zake wanajitoa wenyewe kwa haraka, kwa uchangamfu, kwa hesabu kubwa sana hivi kwamba wanaweza kulinganishwa na matone ya umande. Kama tu na matone ya umande yenye kuburudisha, katika sehemu zote za tengenezo la Yehova leo wanaume na wanawake vijana walio wengi sana wanatolea Mungu na waabudu wenzao utumishi.

◆ 116:3—“Kamba za mauti” ni nini?

Ilielekea kama kifo kilikuwa kimemfunga kwa imara sana mtunza zaburi kwa kamba zisizovunjika hata ikawa haiwezekani aponyoke. Kamba zenye kufungwa kwa imara sana kuzunguka mikono na miguu ya mtu zinaleta maumivu makali, au maumivu makali ya ghafula, na tafsiri ya Kigiriki Septuagint inafasili neno la Kiebrania la “kamba” kuwa “maumivu makali ya ghafula.” Kwa sababu hiyo, wakati Yesu Kristo alipokufa, yeye alikuwa katika mkamato imara wenye kupoozesha, au maumivu makali ya ghafula, ya kifo. Basi, wakati Yehova alipomfufua Yesu Yeye alikuwa “akiufungua uchungu wa mauti.” — Matendo 2:24.

◆ 119:83—Mtunga zaburi alikuwaje “kama kiriba”?

Alipokuwa akingojea Yehova amfariji, mtunga zaburi alikuwa amekuwa kama kiriba (chupa ya ngozi) ambacho kingeangikwa mahali wakati kisipokuwa kinatumiwa. Kwa sababu ya moshi uliokuwa ndani ya hema au nyumba isiyo na shimo la kutolea moshi nje, chupa ya namna hiyo ingekuja baadaye kuwa nyeusi, ikauke, na kukunjamana. Kulingana na hali hiyo, hilo ndilo jambo lililompata mtunga zaburi mikononi mwa watesi. (Mstari 84) Hali yake ya kutaabika sana labda ilionekana wazi katika sura yake ya kufa moyo na uso uliokunjamana, na huenda ikawa mwili wake mzima ulipatwa na matokeo mabaya sana hata ukapoteza kiasi fulani cha umajimaji wao. (Linganisha Zaburi 32:4.) Hivyo huenda yeye akawa alihisi akiwa mtu asiyefaa kitu kama kiriba kilichonyauka ambacho wengine walitupilia mbali kuwa kisichofaa kuwekea vitu vya maji maji. Hata hivyo yeye hakuwa ‘amesahau sheria za Mungu.’

◆ 119:119—Ni jinsi gani Mungu anafanya waovu wakome “kama takataka” ya chuma?

Takataka inayofanyiza juu ya madini iliyoyeyushwa au katika tanuri la kuyeyushia ni takataka isiyofaa kitu, kitu kisicho safi cha kutupiliwa mbali. Hivyo mtakasaji anatenganisha madini kama dhahabu au fedha itoke kwenye “takataka” ya chuma. Vivyo hivyo, Yehova anawafikiria waovu kuwa wanafaa tu kutupwa kwenye rundo la takataka ya madini na kuwafanya wakome, akiwatenganisha na wale walio na ubora ambao wana upendeleo wake.—Linganisha Ezekieli 22:17-22.

Somo kwetu sisi: Kama Wayahudi wa kale, Mashahidi wa Yehova leo wanangojea ukombozi —safari hii ikiwa ni kupita katika dhoruba ya Har–Magedoni. (Ufunuo 16:14, 16) Kwenye wakati uliowekwa rasmi na Mungu, mfumo huu wa mambo utafagiliwa mbali na vita hiyo kuu. Wale wasiomtegemea Yehova kwa wokovu watakuwa hoi kabisa wanapotupwa-tupwa na mawimbi ya uharibifu huo mkubwa. Hata hivyo, waokokaji ‘watampa Yehova shukrani kwa fadhili za upendo zake.’ Basi, katika siku za mwisho hizi, wafuasi wapakwa mafuta wa Yehova na “mkutano mkubwa” pia wanaweza kuweka tumaini lao kamili katika Yehova.—Zaburi 107:31; Ufunuo 7:9.

‘Nyimbo za Mapando’

Soma Zaburi 120 mpaka 134. Zaburi hizi 15 zinaitwa nyimbo “za mapando.” Wanachuo hawakubaliani juu ya maana halisi ya neno “mapando,” lakini labda zaburi hizo ziliimbwa na Waisraeli walipoenda juu, au walipopanda, wakielekea mji ulioinuka wa Yerusalemu ili kuhudhuria sikukuu zao tatu za kila mwaka. — Zaburi 122:1.

◆ 120:4—Ilikuwa nini hiyo‘mishale iliyochongoka’ na “makaa ya mretemu”?

Ulimi wenye uchongezi unaweza kuwa na uharibifu kama silaha au moto. (Mithali 12:18; Yakobo 3:6) Katika kulipa kisasi, Yehova anahakikisha kwamba ulimi wenye uchongezi unanyamazishwa kama kwamba kwa mishale ya shujaa wa vita. Kwa kupendeza, makaa yaliyofanyizwa kutokana na mti wa fagio unaofanana na kichaka unawaka kwa moto mwingi sana, hiyo ikionyesha ukali mwingi wa hukumu ya kimungu juu ya “ulimi wa hila.”—Zaburi 120:2, 3.

◆ 131:2—Nafsi inakuwaje kama “mtoto aliyeachishwa” kunyonya?

Kabla ya kuachishwa kunyonya, kitoto kichanga kinatamani sana mama aridhishe tamaa yacho ya kulishwa. Na kitoto kinachoachishwa kunyonya kilicho katika mikono ya mama yacho kinapata uradhi, usalama, na kitulizo. Akiwa ametosheka kufuatia mwendo wa unyenyekevu (mstari 1), mtunga zaburi alihisi ‘akiwa ametulizwa na kunyamazishwa,’ kama mtoto aliyeachishwa kunyonya aliye katika mikono ya mama yake. Kungojea Yehova kwa unyenyekevu na kufanya mapenzi yake kunaleta usalama na baraka nyingi.

Somo kwetu sisi: Ingawa Yehova anaweza kuokoa watu wake katika balaa, yeye hawakingi wasipatwe na taabu zote. Kwa kweli, taabu ndizo zilisukuma watungaji watamke zaburi hizo. Hata hivyo, Mungu “hatawaacha mjaribiwe kupita mwezavyo” bali “atafanya na mlango wa kutokea.” (1 Wakorintho 10:13) Yehova anatulinda na uharibifu wa kiroho. Anaweza ama kuelekeza matukio kwa maarifa mengi ili aondolee mbali balaa yenyewe au atutie nguvu ili tuweze kuvumilia mkazo uliopo. Kwa kusudi hilo, umoja ambao tunafurahia kwenye mikutano yetu ya Kikristo ni wenye kutuliza sana na wenye manufaa. —Zaburi 133:1-3.

Yule Mungu Anayestahili Sifa

Soma Zaburi 135 mpaka 145. Tofauti na sanamu ambazo wenye kuzifanya wanakuwa sawasawa nazo, Yehova ndiye Mungu anayestahili sifa na Mkombozi. (Zaburi 135, 136) Hata wakati watu wake walipokuwa Babuloni, wao hawakusahau “nyimbo za Sayuni.” (Zaburi 137) Daudi anasema ‘wafalme watamsifu Yehova,’ naye anashangilia kwa jinsi amefanywa kwa njia ya ajabu. (Zaburi 138, 139, NW) Yeye anaomba ulinzi wa Mungu na kusifu sana wema Wake, akijua kwamba ni uhusiano wema tu pamoja na Yehova unaoleta furaha ya kweli. —Zaburi 140-145.

◆ 138:2—Mungu alitukuzaje ahadi yake juu ya jina lake?

Wakati Yehova anapotangaza jambo fulani juu ya msingi wa jina lake, tunatazamia mengi yatimizwe. Hata hivyo, sikuzote yeye anafanya zaidi ya matazamio yetu, akifanya mambo yatimie kwa njia inayopita sana tazamio tulilokuwa nalo. Mungu anatukuza “ahadi” yake kwa kufanya iwe na utimizo mkubwa kuliko tulioutazamia.

◆ 139:9—Ni nini maana ya “mbawa za asubuhi”?

Maneno hayo yanaonyesha nuru ya mapambazuko, kama kwamba yana mabawa, yakiendelea kwa haraka sana kutandaa juu ya anga kutoka mashariki kwenda magharibi. Kama Daudi ‘angezitwaa mbawa za asubuhi’ na kufika kwenye sehemu iliyo mbali zaidi ya magharibi, kule yeye bado angekuwa chini ya utunzaji na uongozi wa Yehova. —139:10; linganisha Amozi 9:2, 3.

◆ 141:3—Kwa sababu gani Daudi alitaka ‘mngojezi mlangoni pa midomo yake’?

Daudi aliyajua madhara ambayo ulimi unaweza kufanya na jinsi wanadamu wasiokamilika wanashawishwa kusema haraka haraka mno, hasa wakati hasira yao inapochochewa. Musa alikuwa mwanamume mpole zaidi ya wote duniani. Hata hivyo yeye alitenda dhambi kwa ulimi wake kuhusiana na maji ya Meriba. (Hesabu 12:3; 20:9-13) Basi, inahitajiwa kabisa kuzuia vizuri midomo ili kuepuka usemi wenye madhara na kuhifadhi moyo mwema. —Yakobo 3:5-12.

◆ 142:7—Kwa sababu gani Daudi akafikiri nafsi yake ilikuwa katika “kifungoni.”?

Yeye alihisi akiwa peke yake pamoja na matatizo yake, kama kwamba katika gereza hatari lenye giza, akiwa asiyeeleweka vizuri na akiwa ametenganishwa na wanadamu wote. Wakati sisi tunapokuwa na hisia kama hizo na kufikiri kwamba “mkono wa kuume” wetu unaweza kushambuliwa kwa kukosa kinga, tunaweza kupaazia Yehova sauti tukiwa na uhakika kuomba msaada wake.—Zaburi 142:3-7.

Somo kwetu sisi: Katika Zaburi 139, Daudi alionyesha alifurahia uwezo wa Mungu wa ‘kumchunguza-chunguza’ na ‘kumjua’ yeye na njia zake. Badala ya kutafuta njia ya kuepa, Daudi alitaka kujiacha kwa ukamili zaidi awe chini ya mwongozo na usimamizi wa Yehova. Alijua kwamba sikuzote Mungu alimwona yeye. Kujua hivyo hakuzuii mtu asifanye kosa tu bali pia kunamwandalia faraja iliyo upeo. Uhakika wa kwamba Yehova anaona matendo yetu, anafahamu matatizo yetu, na sikuzote yuko tayari kutusaidia unatokeza hisia yenye kina kirefu ya usalama na amani, mambo ambayo ni muhimu kwa furaha yetu.

Sifu Yah!

Soma Zaburi 146 mpaka 150. Zaburi hizi zinatokeza kichwa cha Kitabu cha Zaburi chote—“Sifuni Yah, enyi watu!” (NW) Kila moja yazo inaanza na kumalizika kwa maneno hayo matukufu. Yote hayo yanainuka na kufikia kilele katika Zaburi ya 150, inayoita uumbaji wote ‘usifu Yah!’

◆ Zaburi 146:3 — Kwa sababu gani kutoweka uhakika katika viongozi wa kibinadamu?

Viongozi wa kibinadamu wanaweza kufa. Hawawezi kujiokoa wao wenyewe wala wale wanaowatumaini. Hivi, kuweka uhakika katika uongozi wa kibinadamu kunabomolewa na lile tukio la mwisho la kifo. Lakini “mwenye furaha ni mmoja . . . ambaye tumaini lake ni katika Yehova Mungu wake.” (Zaburi 146:5, 6, NW) Mtunga zaburi aliona uhitaji wa kupata mwongozo ulio bora kuliko ule ambao wanadamu wakiwa peke yao wanaweza kutoa.

◆ 148:4—Ni nini ‘maji yaliyo juu ya mbingu’?

Inaonekana mtunga zaburi alimaanisha mawingu yaliyo juu ya dunia yenye kuchukua maji ambayo yanamwaga maji hayo mara kwa mara yakiwa mvua, ambayo hatimaye yanatiririka kurudi ndani ya bahari kuu. Utaratibu huo wa kurudiwarudiwa nyakati zote ni muhimu kwa uhai, na kuwapo kwenyewe kwa utaratibu huo kunampa sifa Muumba. Kwa kuwa anga iliyo kati ya dunia na mawingu inaweza kusemwa kuwa mbingu, mtunga zaburi alirejeza kwenye mawingu aliyotaja kuwa ‘maji yaliyo juu ya mbingu.’

Zaburi zinafanya ukweli huu ujionyeshe wazi wenyewe: Ili tuwe wenye furaha kweli kweli, tunahitaji kuwa na uhusiano mwema pamoja na Yehova. Hivyo, shabaha yote ya watu wa Mungu na kusudi la kuwapo kwetu vinaweza kujumlishwa pamoja katika mwito wa kumalizia wa mtunga zaburi: “Kila kitu kinachopumua—acheni kisifu Yah. Sifuni Yah, enyi watu!”—Zaburi 150:6, NW.