Maswali Kutoka kwa Wasomaji

■ Akiwa kwenye mti wa mateso, Yesu alilia: “Mungu wangu, Mungu wangu, mbona umeniacha?” Je! yeye alikosa imani, akisadiki kwamba Mungu alikuwa amemwacha?

Baada ya kusoma maneno hayo kwenye Mathayo 27:46 au Marko 15:34, wengine wamekata maneno kwamba Yesu alipoelekeana na kifo chenye maumivu, uhakika wake katika Yehova uliyumba-yumba. Wengine wamesema kwamba jambo hilo lilikuwa tu itikio la kibinadamu la Yesu, kilio kinachoeleweka cha kukata tamaa kwa mwanadamu mwenye nyama na damu akipatwa na maumivu makali. Ingawaje, kuna sababu nzuri, ya kuangalia mbele zaidi ya makadirio haya ya kibinadamu yanayotegemea jinsi mambo yanavyoonekana kwa nje tu. Ingawaje hakuna mmoja wetu leo anayeweza kujua kwa uhakika yale yaliyohusika katika kilio cha Yesu kama alivyofanya, tunaweza kuyaangalia yale ambayo huenda yakawa makusudio mawili.

Yesu alijua kwamba angelazimika “kwenda Yerusalemu, na kupata mateso mengi . . . , na kuuawa, na siku ya tatu kufufuka.” (Mathayo 16:21) Katika mbingu Mwana wa Mungu alikuwa ametazama hata wanadamu wasiokamilika wakipatwa na kifo chenye kutia maumivu huku wakidumisha ushikamanifu wao. (Waebrania 11:36-38) Hivyo hakuna sababu ya kusadiki kwamba Yesu—mwanadamu mkamilifu—angeshikwa na woga juu ya yale ambayo alielekeana nayo; wala kifo kwenye mti wa mateso hakingemdokezea kwamba Baba yake alikuwa amemkataa yeye. Yesu alijua kimbele “ni mauti gani atakayokufa,” yaani, kifo kwa kutundikwa. (Yohana 12:32, 33) Pia yeye alikuwa na uhakika wa kwamba angefufuliwa siku ya tatu. Basi, Yesu angesemaje kwamba Mungu alikuwa amemwacha yeye?

Kwanza, huenda yeye alimaanisha kwamba ni katika maana inayostahili kwamba Yehova alikuwa ameuondoa ulinzi kwa Mwana wake ili kwamba ushikamanifu wa Yesu ungejaribiwa mpaka upeo, kifo chenye maumivu na chenye kuaibisha. Lakini tendo la Mungu la kumtoa Yesu kwa ghadhabu ya adui walioongozwa na Shetani hakukuonyesha kwamba yeye alikuwa amemwacha kabisa. Yehova aliendelea kumwonyesha Yesu upendo, kama inavyothibitishwa katika siku ya tatu wakati Yeye alipomfufua Mwana wake, jambo ambalo Yesu alikuwa amejua lingetokea.—Matendo 2:31-36; 10:40; 17:31.

Jambo linalohusiana na hilo lililotangulia ni lile linaloelekea kuwa sababu ya pili ya maneno ya Yesu akiwa mtini, kwamba kwa kutumia maneno hayo yeye angeweza kutimiza wonyesho wa unabii kuhusu Masihi. Saa chache mapema Yesu aliwaambia mitume kwamba mambo yangetukia “kama ilivyoandikiwa [kuhusu yeye].” (Mathayo 26:24; Marko 14:21) Ndiyo, yeye alitaka kutimiza mambo ambayo yalikuwa yameandikwa, kutia na mambo katika Zaburi 22. Huenda ukaliona kuwa jambo lenye kusisimua ukilinganisha Zaburi 22:7, 8—Mathayo 27:39, 43; Zaburi 22:15—Yohana 19:28, 29; Zaburi 22:16—Marko 15:25 na Yohana 20:27; Zaburi 22:18—Mathayo 27:35. Zaburi 22, ambayo inatoa wonyesho mwingi wa kiunabii kwa mambo ambayo yangempata Masihi, inaanza: “Mungu wangu, Mungu wangu, mbona umeniacha?” Kwa sababu hiyo, Yesu alipolia kama alivyofanya, alikuwa akiongezea kwenye maandishi ya unabii aliyotimiza.—Luka 24:44.

Mtunga zaburi hakusadiki kwamba Mungu wake alikuwa amemkataa tu au kumwacha yeye, kwa kuwa Daudi aliendelea kusema kwamba yeye ‘angelihubiri jina la Mungu kwa ndugu zake,’ naye aliwasihi wengine wamsifu Yehova. (Zaburi 22:22, 23) Vilevile, Yesu, ambaye aliifahamu Zaburi 22 vizuri, pia alikuwa na sababu ya kuwa na uhakika wa kwamba Baba yake alikuwa angali anamkubali na kumpenda yeye, ijapokuwa yale ambayo Mungu alimruhusu apate akiwa mtini.