Tumaini Lako—Je, Ni Mungu au Mali?
“Kwa miaka mingi mwanamke huyo alikaa akiwa amejitenga peke yake katika nyumba [yake] maridadi sana iliyozungukwa na seng’enge iliyoungana-ungana na kukingwa sana na malango mawili ya chuma yenye kufuli.”
RIPOTI ilimsimulia hivyo mwanamke mjane tajiri aliyeuawa na wanyang’anyi walioiba vitu vya thamani na dola milioni 1 nyumbani kwake. Maiti yake ilipopatikana, polisi walitumia kigari cha kuchukulia vitu dukani ili watoe nyumbani mwake pesa taslimu zilizokuwa dola milioni 5. Polisi pia walipata maelfu ya “zawadi za sikukuu ya kuzaliwa” zikiwa zimefunganishwa na kadi zilizoandikwa “Kwa Yesu Kristo” na “Mungu.
Mwanamke huyu aliyekuwa amerithi mali hizo hakuelekea kuwa na rafiki wo wote, naye aliishi daima katika woga. Jiulize, Mamilioni ya pesa alizozithamini sana yalikuwa na thamani gani kwa kweli? Zaidi ya hilo, yeye alikuwa tajiri kadiri gani kuelekea Mungu? Hakika wewe unajua kwamba upendeleo wa Mungu hauwezi kupatikana kwa kutumia “zawadi za sikukuu ya kuzaliwa,” wala amani ya Mungu haiji kwa sababu mtu ana mali. Tunaweza kuona jambo hilo kutokana na shauri la Biblia kwamba “tumtumaini Mungu atupaye vitu vyote kwa wingi ili tuvitumie kwa furaha.”—1 Timotheo 6:17.
Kwa sababu gani mali ni za wasiwasi sana? Basi, wewe labda unajua jinsi maneno haya ya Yesu yalivyo ya kweli: “Msijiwekee hazina duniani, nondo na kutu viharibupo, na wevi huvunja na kuiba. “(Mathayo 6:19) Kama vile wewe unavyotambua, siku zote kuna hatari ya kwamba moto unaweza kuteketeza nyumba. Watu wengine wanaweka mali zao zenye thamani katika benki, lakini je, wanyang’anyi hawajaiba katika sehemu hizo pia? Hata gari jipya litapata kutu.
Namna gani uchumi wa mataifa? Katika nchi nyingi kupungua kwa thamani ya pesa ni kama mwivi; kunapunguza mali za mtu alizoweka. “Baada ya upungufu mkubwa sana wa thamani ya pesa kuikumba Ujeremani mwanzoni-mwanzoni mwa miaka 1920, watu walihitaji kwenda madukani wakiwa wameweka pesa zao katika vikapu . . . ili kununua vitu . . . Bei za vitu katika Ujeremani ziliongezeka zaidi ya asilimia trilioni 1 kutoka Agosti 1922 mpaka Novemba 1923.” (The World Book Encyclopedia) Kutumaini pesa kunaweza kukatisha tamaa kweli kweli!
Yesu alishauri hivi kwa hekima: “Jiwekeeni hazina mbinguni, kusikoharibika kitu kwa nondo wala kutu, wala wevi hawavunji wala hawaibi.” (Mathayo 6:20) “Hazina” hizo ni nini? Hizo ni kumbukumbu ambalo kila mtu anajiwekea la matendo mema, kuwa kwetu matajiri kuelekea Mungu. Labda wewe utauliza, “Jambo hilo linanitaka nifanye nini?” Kwa sehemu, Biblia inajibu kwamba maana yake ni ‘kutenda mema, kuwa matajiri kwa kutenda mema, kuwa tayari kutoa mali zetu, kushirikiana na wengine kwa moyo.’—1 Timotheo 6:18.
Katika sehemu zote za dunia leo kuna mamilioni ya Mashahidi wa Yehova wanaoweza kushuhudia kwa unyofu wa moyo kwamba kugawana mambo ya kiroho na vitu vya kimwili pamoja na wengine—hasa kusaidia watu wajifunze juu ya tumaini la Ufalme kwa kufanya utendaji wa kuhubiri, kufundisha, na kufanya wanafunzi—hayo ndiyo matendo mema yaliyo na kibali ya Yehova, nayo yanaleta uradhi wa kweli. Hata kifo hakiwezi kunyang’anya mtu thawabu zinazotokana na kuweka hazina mbinguni. Kwa sababu gani? Yesu aliahidi hivi: “Mimi ndimi huo ufufuo, na uzima. Yeye aniaminiye mimi, ajapokufa, atakuwa anaishi.”—Yohana 11:25.
Hazina za Thamani Kubwa Sana Tunazoweza Kufurahia Sasa
Baada ya kusema kwamba inatupasa tuweke tumaini letu juu ya Mungu, Paulo anaendelea kusema kwamba ni “Mungu atupaye vitu vyote kwa wingi ili tuvitumie kwa furaha.” (1 Timotheo 6:17) Mbali na mahitaji ya kila siku, Aliye Juu Zaidi anawapa kwa upendo hazina za thamani kubwa sana watu ambao anawakubali. Hazina hizo ni nini?
Angalia vile Mithali 3:13-18 inavyosema: “Heri mtu yule aonaye hekima, na mtu yule apataye ufahamu. Maana biashara yake ni bora kuliko biashara ya fedha, na faida yake ni nyingi kuliko dhahabu safi. Yeye ana thamani kuliko marijani, wala vyote uvitamanivyo havilingani naye. Ana wingi wa siku katika mkono wake wa kuume, utajiri na heshima katika mkono wake wa kushoto . . . Yeye ni mti wa uzima kwao wamshikao sana; ana heri kila mtu ashikamanaye naye.” Kwa hiyo “hekima” ni hazina inayoipita thamani ya mali zote za ulimwengu.
Hekima ni matumizi ya maarifa katika njia inayofaa; Ni uwezo wa kutumia maarifa na ufahamu kwa mafanikio ili kutatua matatizo, kuepuka au kuondosha hatari, kufikia miradi fulani au kusaidia wengine wafanye hivyo. Je! hukubali kwamba leo tunahitaji hekima ya namna hiyo ili kushughulika na majaribu ya maisha kwa mafanikio na kudumisha msimamo mwema pamoja na Mungu?
Inapoeleza juu ya hekima, Mithali 3:13-18 inakazia furaha. Je! furaha si hazina ambayo sisi sote tunatamani? Hekima ya kimungu itatupa sisi furaha hiyo, kwa sababu furaha ya kweli inaweza kutoka tu kwenye Chanzo chayo, Yehova Mungu. Mambo ya kweli yaliyotukia yamethibitisha kwamba furaha ya kweli haiwezi kupatikana bila kumtii Aliye Juu Zaidi na kujiachilia tuendeshwe na roho yake. Furaha tunazoahidiwa katika Biblia zinategemea kuwa na uhusiano unaofaa, au msimamo unaokubaliwa, pamoja na Baba yetu wa kimbingu. (Mathayo 5:3-19) Basi, kwa kutumia mambo tunayojifunza kutokana na uchunguzi wa Biblia, tutakuwa tukionyesha “hekima itokayo juu” itakayotupa sisi furaha ambayo mali zote zilizo katika ulimwengu haziwezi kuipata.
Ingawa hivyo, kumbuka pia kwamba Mithali 3:16 inasema hivi: “Ana wingi wa siku katika mkono wake wa kuume.” Maneno hayo yanafahamiwa kuwa yanamaanisha mkono wa kuume wa ulinzi, mkono ulio tayari kusaidia na kulinda mtu katika nyakati za hatari. Leo watu wengi wanajitia katika maisha ya upotovu, ukosefu wa adili katika ngono, matumizi mabaya ya dawa za kulevya, na kadhalika. Inaelekea kuwa wewe umesoma kwamba UKIMWI (Ukosefu wa Kinga Mwilini) unahusiana na mazoea hayo. Kutokana na yale ambayo wewe umeona, je, watu wanaozoea mambo hayo ni wenye furaha kweli kweli? Au wanajiletea wao wenyewe na wengine huzuni nyingi na maumivu, na hata kifo?
Kinyume cha hivyo, matumizi ya mashauri yenye hekima kutoka katika Neno la Mungu yatakuwako siku zote kwenye “mkono wetu wa kuume” ili kutulinda na hatari hizo. Basi, hekima inaweza kurefusha maisha yetu, kutulinda na mwendo ambao ungeongoza kwenye kifo cha mapema. Hivyo, hekima ya kimungu kwa hakika itafanya maisha yetu ya sasa yawe ya kupendeza zaidi.
Tembea kwa Hekima Sasa
Ushuhuda unaotuzunguka kila mahali unaonyesha kwamba tunaishi katika “siku za mwisho” za mfumo huu wa mambo. (2 Timotheo 3:1-5) Kwa hiyo, inahitajiwa kabisa kwamba tujiangalie tusijiache tupatwe na roho ya ulimwengu. Roho hiyo inakazia vitu vya kimwili kwa kuvuta tamaa za kichoyo. Shtaka moja lililotokezwa juu ya Ayubu, mwanamume mwaminifu katika kumbukumbu la Biblia, ni kwamba mwanamume huyo alitumikia Mungu akiwa na fikira za kichoyo, ili apate vitu vya kimwili. (Ayubu 1:9-11) Je! sisi tungeweza kushtakiwa kweli kwamba ndivyo tulivyo?
Tukijibu hapana, tunaweza kuwa tunapinga kwa mafanikio ufuatiaji wa vitu vya kimwili uliopo leo. Lakini hatari hii, ufuatiaji wa vitu vya kimwili, ni moja ya zile zilizo kubwa zaidi tunazoweza kukabili. Yesu Kristo alisema kwamba “shughuli za dunia, na udanganyifu wa mali hulisonga lile neno.” (Mathayo 13:22) Kwa wazi, ni lazima tujihadhari daima na “udanganyifu wa mali,” kwa sababu hizo si zenye thamani kweli kweli.
Tunahitaji kujikumbusha wenyewe kwamba vitu vya kimwili vinafaa kwa kiasi tu. Neno la Mungu linasema: “Mali ya mtu tajiri ni mji wake wa nguvu; ni kama ukuta mrefu katika mawazo yake.” (Mithali 18:11) Ndiyo, usalama ambao mali zinaweza kutoa ni wa kuwaziwa tu, udanganyifu. Si kwamba vitu vya kimwili vyenyewe ni vibaya. Kilicho kibaya ni kutegemeza maisha zetu juu yavyo badala ya kuzitegemeza juu ya kupata kibali ya Mungu. Yesu, anayetambuliwa kuwa mmoja wa walimu wenye hekima zaidi katika historia, alitoboa wazi hivi: “Uzima wa mtu haumo katika wingi wa vitu vyake alivyo navyo.”—Luka 12:15.
Kwa hiyo acheni tufuatie mwendo wa maisha utakaotufanya ‘tujitajirishe kwa Mungu.’ (Luka 12:21) Hakuna kitu kilicho na thamani kubwa kuliko kuwa na msimamo unaokubaliwa na Muumba. Jitihada zote za kudumisha msimamo huo zinatusaidia ‘tujiwekee akiba iwe msingi mzuri kwa wakati ujao, ili tupate uzima, ulio kweli kweli.’1 Timotheo 6:19.