• Ni Nini Kitakachokusaidia Uendelee Kujifunza Biblia?
    Furahia Maisha Milele!—Masomo ya Kujifunza Biblia
    • Somo la 12. Mama mwenye watoto wawili anajifunza Biblia pamoja na Shahidi wa Yehova.

      SOMO LA 12

      Ni Nini Kitakachokusaidia Uendelee Kujifunza Biblia?

      Kujifunza Biblia ni kama safari. Hata hivyo, kuna changamoto. Wakati mwingine, huenda ukawa na shaka kama utaendelea kujifunza Biblia. Kwa nini ni muhimu kuendelea kujitahidi? Ni nini kitakachokusaidia uendelee licha ya changamoto?

      1. Kwa nini kujifunza Biblia ni jambo muhimu?

      “Neno la Mungu liko hai nalo ni lenye nguvu.” (Waebrania 4:​12) Biblia ni yenye thamani kwa sababu inafunua mawazo na hisia za Mungu kukuelekea. Inakusaidia kupata ujuzi, tumaini, na hekima ya kweli. Jambo muhimu zaidi ni kwamba Biblia inakusaidia uwe rafiki ya Yehova. Unapojifunza Biblia unaruhusu nguvu zake zifanye maisha yako yawe bora.

      2. Kwa nini ni muhimu kutambua thamani ya kweli za Biblia?

      Kweli zilizo katika Biblia ni kama hazina zenye thamani. Ndiyo sababu Biblia inatutia moyo ‘tununue kweli na tusiiuze kamwe.’ (Methali 23:23) Tunapotambua thamani ya kweli za Biblia, tutajitahidi kuendelea kujifunza hata tukikabili changamoto.​—Soma Methali 2:4, 5.

      3. Yehova anaweza kukusaidiaje kuendelea kujifunza?

      Kwa kuwa yeye ni Muumba mweza-yote na Rafiki yako, Yehova anataka kukusaidia ujifunze kumhusu. Atakupa “hamu na nguvu za kutenda.” (Soma Wafilipi 2:13.) Basi, ikiwa nyakati nyingine unakosa hamu ya kujifunza au kufuata mambo unayojifunza, anaweza kukusaidia. Anaweza pia kukupa nguvu za kushinda changamoto na upinzani. Sali kwa Yehova kwa ukawaida ukimwomba akusaidie uendelee kujifunza Biblia.​—1 Wathesalonike 5:17.

      CHIMBA ZAIDI

      Ona jinsi unavyoweza kuendelea kujifunza Biblia licha ya kuwa na shughuli nyingi au unapokabili upinzani kutoka kwa wengine. Kisha fikiria jinsi Yehova anavyoweza kukusaidia uendelee kujifunza.

      4. Hakikisha kwamba kujifunza Biblia ni jambo muhimu kwako

      Nyakati fulani huenda ukahisi una shughuli nyingi sana hivi kwamba huna wakati wa kujifunza Biblia. Ni nini kinachoweza kukusaidia? Soma Wafilipi 1:10, kisha mzungumzie maswali haya:

      • Unafikiri ni mambo gani yaliyo “muhimu zaidi” maishani?

      • Unaweza kufanya nini ili kujifunza Biblia kuwe jambo muhimu kwako?

      A. Picha: Mchoro unaoonyesha ndoo ikijazwa mawe na mchanga. 1. Rundo la mchanga na rundo la mawe. 2. Ndoo iliyo na mchanga. 3. Mawe yamewekwa juu ya mchanga na mengine yamebaki nje. B. Picha: 1. Rundo lilelile la mchanga na rundo lilelile la mawe. 2. Ndoo ileile ikiwa imejazwa mawe. 3. Mchanga unajaa kuzunguka mawe. Rundo dogo la mchanga linabaki nje ya ndoo.

      1. Ukiweka mchanga kwenye ndoo kisha ujaribu kuongeza mawe, mawe hayatakuwa na nafasi ya kutosha

      2. Ukiweka mawe kwanza kwenye ndoo utakuwa na nafasi ya kuongeza mchanga. Vivyo hivyo, ukitanguliza “mambo muhimu zaidi” maishani, utafaulu kuyatimiza na pia utakuwa na muda wa kufanya mambo mengine

      Kujifunza Biblia hutimiza uhitaji wetu wa kiroho, yaani, uhitaji wetu wa kumjua na kumwabudu Mungu. Soma Mathayo 5:3, kisha mzungumzie swali hili:

      • Tutanufaikaje ikiwa tutaona kujifunza Biblia kuwa jambo muhimu maishani mwetu?

      5. Endelea kujifunza licha ya upinzani

      Wakati mwingine, huenda watu wakajaribu kukuvunja moyo uache kujifunza Biblia. Ona mfano wa Francesco. Onyesha VIDEO, kisha mzungumzie maswali yanayofuata.

      VIDEO: Alipata Baraka kwa Kuvumilia (5:22)

      Picha ya video ‘Alipata Baraka kwa Kuvumilia.’ Francesco anawaacha rafiki zake baada ya kuwaambia kwamba hatashirikiana nao tena.

      • Katika video hiyo, familia na marafiki wa Francesco walitendaje alipowaambia mambo aliyokuwa akijifunza?

      • Alinufaikaje kwa kuendelea kujifunza Biblia?

      Soma 2 Timotheo 2:24, 25, kisha mzungumzie maswali haya:

      • Marafiki na watu wa familia yako wanahisije kuhusu mambo unayojifunza?

      • Kulingana na mistari hii, unapaswa kufanya nini ikiwa mtu fulani hafurahii kukuona ukijifunza Biblia? Kwa nini?

      6. Mtegemee Yehova akusaidie

      Tunapoendelea kumkaribia Yehova, ndivyo tamaa yetu ya kumfurahisha inavyozidi kuongezeka. Hata hivyo, inaweza kuwa vigumu kufanya mabadiliko maishani ili kuishi kulingana na viwango vyake. Usikate tamaa ikiwa utahisi hivyo. Yehova atakusaidia. Onyesha VIDEO, kisha mzungumzie maswali yanayofuata.

      VIDEO: Yehova Hutusaidia Kufanya Mabadiliko (3:56)

      • Katika video hiyo, Jim alifanya mabadiliko gani ili amfurahishe Yehova?

      • Ni nini kilichokuvutia kuhusu mfano wake?

      Soma Waebrania 11:6, kisha mzungumzie maswali haya:

      • Yehova atawafanyia nini wale “wanaomtafuta kwa bidii,” yaani, wale wanaojitahidi kumjua na kufanya mambo yanayomfurahisha?

      • Hilo linakufundisha nini kuhusu jinsi Yehova anavyohisi anapoona jitihada zako za kujifunza Biblia?

      HUENDA MTU AKAULIZA: “Kwa nini unajifunza Biblia?”

      • Utajibuje swali hilo?

      MUHTASARI

      Ingawa mara nyingi si rahisi kujifunza Biblia, kufanya hivyo kunaweza kukusaidia ufurahie maisha milele. Endelea kumtegemea Yehova, naye atakubariki.

      Ungejibuje?

      • Kwa nini kweli za Biblia ni zenye thamani kwako?

      • Unaweza kuhakikishaje kwamba unatanguliza “mambo muhimu zaidi”?

      • Kwa nini unapaswa kumwomba Yehova akusaidie uendelee kujifunza Biblia?

      Lengo

      CHUNGUZA ZAIDI

      Chunguza mambo manne ambayo yamewasaidia watu wengi kutumia wakati wao vizuri.

      “Jinsi ya Kutumia Wakati Wako Vizuri” (Amkeni!, Februari 2014)

      Ona jinsi Yehova alivyomsaidia mwanamke fulani ambaye mume wake hakuelewa kwa nini anajitahidi kumpendeza Mungu.

      Yehova Anatuimarisha Ili Tubebe Mzigo Wetu (5:05)

      Ona jinsi mwanamume fulani alivyonufaika kwa sababu mke wake aliendelea kujifunza Biblia.

      Nilichunguza Ukweli kwa Makini (6:30)

      Wakati mwingine watu husema Mashahidi wa Yehova wanavunja familia. Je, huo ni ukweli?

      “Je, Mashahidi wa Yehova Huvunja Familia au Huziimarisha?” (Makala iliyo kwenye mtandao)

  • Jinsi ya Kufanya Maamuzi Mazuri
    Furahia Maisha Milele!—Masomo ya Kujifunza Biblia
    • Somo la 35. Mume anaangalia matangazo ya kuuza magari kwenye Intaneti huku mke wake na watoto wakimtazama.

      SOMO LA 35

      Jinsi ya Kufanya Maamuzi Mazuri

      Kila mtu hufanya maamuzi. Maamuzi tunayofanya yanaweza kuwa na matokeo mazuri au mabaya na yanaweza kuathiri urafiki wetu na Yehova. Kwa mfano, huenda tukahitaji kuamua mahali tutakapoishi, kazi tutakayofanya, au ikiwa tutafunga ndoa. Tunapofanya maamuzi mazuri, tunakuwa na maisha yenye furaha na tunamfurahisha Yehova.

      1. Biblia inaweza kukusaidiaje kufanya maamuzi mazuri?

      Kabla ya kufanya uamuzi, sali kwa Yehova umwombe akusaidie kisha uchunguze maoni yake katika Biblia kuhusu jambo hilo. (Soma Methali 2:3-6.) Wakati fulani, Yehova hutuambia jambo hususa la kufanya. Ikiwa kuna amri hususa, jambo la busara ni kutii mwongozo huo.

      Namna gani ikiwa hakuna amri hususa katika Biblia kuhusu jambo unalopaswa kufanya? Bado Yehova atakuongoza “katika njia unayopaswa kutembea.” (Isaya 48:17) Jinsi gani? Unaweza kupata kanuni ambazo zitakuongoza. Kanuni za Biblia ni kweli za msingi zinazofunua mawazo na hisia za Mungu. Kwa kawaida tunaelewa maoni ya Mungu kuhusu jambo fulani tunaposoma simulizi la Biblia. Tunapoelewa jinsi Yehova anavyohisi, tunaweza kufanya maamuzi yanayomfurahisha.

      2. Unapaswa kufikiria mambo gani kabla ya kufanya uamuzi?

      Biblia inasema: “Mwerevu hutafakari kila hatua.” (Methali 14:15) Hilo linamaanisha kwamba kabla ya kufanya uamuzi tunapaswa kufikiria kwa makini mambo yote yanayohusika. Unapochunguza kila jambo, jiulize hivi: ‘Ni kanuni gani za Biblia zinazohusika? Ni uamuzi gani ambao utaniletea amani ya akili? Uamuzi wangu utakuwa na matokeo gani kwa watu wengine? Jambo muhimu zaidi, je, uamuzi huu utamfurahisha Yehova?’​—Kumbukumbu la Torati 32:29.

      Yehova ana haki ya kutuamulia mambo mema na mabaya. Tunapoelewa vizuri sheria na kanuni zake na kuazimia kuzifuata, tunazoeza dhamiri yetu. Dhamiri ni uwezo ulio ndani yetu wa kutambua mambo yanayofaa na yasiyofaa. (Waroma 2:14, 15) Tukizoeza dhamiri yetu, itatusaidia kufanya maamuzi mazuri.

      CHIMBA ZAIDI

      Jifunze jinsi dhamiri na kanuni za Biblia zinavyoweza kutusaidia kufanya maamuzi.

      3. Fuata mwongozo wa Biblia

      Kanuni za Biblia zinaweza kutusaidiaje kufanya maamuzi? Onyesha VIDEO, kisha mzungumzie maswali yanayofuata.

      VIDEO: Acha Kanuni za Biblia Zikuongoze (5:54)

      • Yehova ametupatia zawadi gani ya pekee?

      • Kwa nini Yehova alitupatia uhuru wa kujiamulia?

      • Ametupatia nini ili kutusaidia kufanya maamuzi bora?

      Ili uone mfano wa kanuni ya Biblia, soma Waefeso 5:15, 16. Kisha mzungumzie jinsi unavyoweza ‘kutumia vizuri kabisa wakati wako’ ili . . .

      • kusoma Biblia kwa ukawaida.

      • kuwa mume, mke, mzazi, mwana, au binti bora.

      • kuhudhuria mikutano ya kutaniko.

      4. Zoeza dhamiri yako kufanya maamuzi mazuri

      Kunapokuwa na amri hususa ya Maandiko kuhusu jambo, ni rahisi kufanya uamuzi unaofaa. Lakini vipi ikiwa hakuna amri hususa? Onyesha VIDEO, kisha mzungumzie swali linalofuata.

      VIDEO: “Dumisha Dhamiri Njema” (5:13)

      • Dada katika video hiyo alichukua hatua gani ili kuzoeza dhamiri yake na kufanya uamuzi uliomfurahisha Yehova?

      Kwa nini hatupaswi kuwaomba watu wengine watufanyie maamuzi? Soma Waebrania 5:14, kisha mzungumzie maswali haya:

      • Ingawa huenda ikawa rahisi kuwaomba wengine watufanyie maamuzi, tunapaswa kuwa na uwezo wa kutofautisha nini?

      • Ni mambo gani yanayoweza kutusaidia kuzoeza dhamiri yetu na kufanya maamuzi mazuri?

      Mtu akiendesha gari barabarani. Kifaa cha ramani ya GPS kwenye sehemu ya mbele ya gari kinamsaidia dereva kubaki kwenye njia sahihi.

      Dhamiri ni kama ramani inayotuongoza kufanya maamuzi maishani

      5. Heshimu dhamiri za watu wengine

      Maamuzi yetu hutofautiana na maamuzi ya watu wengine. Tunaweza kuonyeshaje kwamba tunaheshimu dhamiri za watu wengine? Fikiria hali mbili zinazofuata:

      Hali ya 1: Dada anayependa kujipamba anahamia kutaniko ambalo dada wengi wanakwazika wanapoona watu wakijipamba.

      Soma Waroma 15:1 na 1 Wakorintho 10:23, 24, kisha mzungumzie maswali haya:

      • Kulingana na maandiko haya, dada huyo anaweza kuamua kufanya nini? Utafanya nini unaposhughulika na mtu ambaye dhamiri yake inamkataza kufanya jambo ambalo dhamiri yako inakubali?

      Hali ya 2: Ndugu ambaye anajua kwamba Biblia haikatazi kunywa kileo kwa kiasi, lakini anaamua kutokunywa kileo. Anakaribishwa kwenye tafrija ambapo anaona akina ndugu wakinywa kileo.

      Soma Mhubiri 7:16 na Waroma 14:1, 10, kisha mzungumzie maswali haya:

      • Kulingana na maandiko haya, ndugu huyo anaweza kuamua kufanya nini? Utafanya nini ukimwona mtu anafanya jambo ambalo dhamiri yako inakuzuia kufanya?

      Hatua zinazotusaidia kufanya maamuzi mazuri.

      Mwanamke akisali.

      1. Mwombe Yehova akusaidie kuamua jambo la kufanya.​—Yakobo 1:5.

      Mwanamke huyo akifanya utafiti kwa kutumia Biblia, machapisho yanayotegemea Biblia, na kompyuta.

      2. Fanya utafiti katika Biblia na machapisho yanayotegemea Biblia ili upate kanuni zinazohusika. Unaweza pia kuzungumza na Wakristo wenye uzoefu.

      Mwanamke huyo akifikiria.

      3. Fikiria matokeo ya uamuzi utakaofanya, yaani, jinsi utakavyoathiri dhamiri yako na dhamiri za watu wengine.

      WATU FULANI HUSEMA: “Una haki ya kufanya chochote unachopenda, bila kujali maoni ya watu wengine.”

      • Kwa nini tunapaswa kufikiria maoni ya Mungu, na maoni ya watu wengine?

      MUHTASARI

      Tunafanya maamuzi mazuri tunapochunguza maoni ya Yehova kuhusu jambo fulani na kufikiria ikiwa maamuzi yetu yatawasaidia watu wengine au kuwasababishia madhara.

      Ungejibuje?

      • Unawezaje kufanya maamuzi yanayomfurahisha Yehova?

      • Unawezaje kuizoeza dhamiri yako?

      • Unaweza kuonyesha jinsi gani kwamba unaheshimu dhamiri za watu wengine?

      Lengo

      CHUNGUZA ZAIDI

      Unawezaje kufanya maamuzi yatakayoimarisha urafiki wako na Mungu?

      “Fanya Maamuzi Ambayo Yanamletea Mungu Heshima” (Mnara wa Mlinzi, Aprili 15, 2011)

      Jifunze jinsi Yehova anavyotupatia ushauri.

      Yehova Anawaongoza Watu Wake (9:50)

      Ona mambo yaliyomsaidia mwanamume fulani kufanya uamuzi mgumu.

      Yehova Anahakikisha Tunapata Mambo Mazuri (5:46)

      Jifunze kufanya mambo yanayomfurahisha Yehova hata kama hakuna sheria hususa.

      “Je, Sikuzote Unahitaji Amri ya Biblia?” (Mnara wa Mlinzi, Desemba 1, 2003)