Matokeo ya Hasira

UNAPOKASIRIKA, moyo wako huugua. Uchunguzi wa hivi karibuni uliofanywa katika Chuo Kikuu cha Stanford katika United States ulipata kwamba wagonjwa wa moyo walipoulizwa wakumbuke visa ambavyo bado huwafanya wakasirike, uwezo wa moyo wao wa kufanya kazi ulipungua kwa asilimia 5. Ingawa upungufu huo haukudumu, madaktari wanaona kuwa ni jambo kubwa kwa sababu ya uthibitisho unaoendelea kuonekana kwamba watu wakali wana uwezekano zaidi wa kupatwa na maradhi ya moyo kuliko watu wenye kupenda amani.

“Ile asilimia tano ya upungufu wa moyo wa mgonjwa wakati wa hasira ni jambo kubwa, ingawa ni upungufu kidogo,” akasema Dakt. Gail Ironson, aliyeongoza utafiti huo. “Wagonjwa walisema kwamba hawakukasirika sana kama vile walivyokasirika wakati visa hivyo vilipokuwa vikitendeka. Inaonekana kwamba uwezo wa moyo wa kupiga damu ulipunguka zaidi wakati wa visa hivyo vyenyewe.”

Uchunguzi huo ndio wa kwanza kuonyesha kwamba hasira inaweza kubadili kwa njia ya moja kwa moja uwezo wa moyo wa kufanya kazi. Na ingawa hasira pekee haitokezi maradhi ya moyo—chakula, mazoezi, na urithi pia zina fungu kubwa—watafiti wanaamini kwamba hasira inaweza kuchangia kwa sehemu kubwa.

Madaktari wamejua kwa muda mrefu kwamba hasira huharibu mwili wa kibinadamu. Inaweza kusababisha mwinuko kwa msongo wa damu, mabadiliko katika mishipa ya arteri, matatizo ya kupumua, matatizo ya ini, mabadiliko katika kutokezwa kwa nyongo, na madhara kwa kongosho. Inafikiriwa pia kwamba hasira huzidisha matatizo kama ugonjwa wa pumu, magonjwa ya macho, magonjwa ya ngozi, ugonjwa wa walio (hives), vidonda vya tumbo, pamoja na magonjwa ya meno na ya tumbo katika kusaga chakula.

Hivyo, mbali na manufaa za kiroho na za kijamii, kuna manufaa ya kimwili katika kutii shauri la Biblia la ‘kukomesha hasira, na kuacha ghadhabu’ na “usifanye haraka kukasirika rohoni mwako.” Ni busara kama nini kusitawisha ‘ufahamu’ unaofanya mtu “asiwe mwepesi wa hasira.” Kwa kweli, “moyo ulio mzima ni uhai wa mwili.”—Zaburi 37:8; Mhubiri 7:9; Mithali 14:29, 30.

Ikiwa ungependa kupata habari zaidi au funzo la Biblia nyumbani bila malipo pamoja na mmoja wa Mashahidi wa Yehova, tafadhali andikia I.B.S.A., Box 47788, Nairobi, Kenya, au tumia anwani ifaayo iliyoorodheshwa kwenye ukurasa wa 5.