Kuhitimu kwa Darasa la 129 la Gileadi

“Hii Ni Siku Yenu”

MNAMO Septemba 11, 2010, watu 8,000 hivi walikusanyika kwa ajili ya tukio la pekee—kuhitimu kwa darasa la 129 la Shule ya Gileadi (Watchtower Bible School of Gilead). “Hii ni siku yenu,” Samuel Herd wa Baraza Linaloongoza la Mashahidi wa Yehova akawaambia wanafunzi. “Tupo hapa kushangilia pamoja nanyi!”

“Sikio Lenye Kusikia”

Ndugu Herd alianza programu hiyo kwa kuzungumzia umuhimu wa Wakristo wote kulitumia vizuri “sikio lenye kusikia” kwa kusikiliza Neno la Mungu. (Methali 20:12) “Kwa miezi michache iliyopita mmekuwa mkimsikiliza Yehova,” Ndugu Herd akawaambia wanafunzi, “na mtaendelea kufanya hivyo kwa umilele.”

Wamishonari wapya wanaweza kutumia masikio yao kwa hekima jinsi gani? “Ni kwa kusikiliza Neno la Mungu,” akasema ndugu Herd. Kisha akaongeza: “Mengi yatasemwa katika programu ya leo ambayo yatawaandaa kwa ajili ya kazi yenu ya umishonari kwa miaka ijayo.”

“Mtegemee Yehova kwa Moyo Wako Wote”

Gerrit Lösch, mshiriki wa Baraza Linaloongoza, alizungumza na wanafunzi kuhusu kichwa hicho chenye kuchochea fikira. Alieleza jinsi ambavyo mara nyingi watu wa Mungu, wa kale na wa kisasa, wameonyesha imani yao kwa Yehova.

Katika hali inayofanana na hiyo, “wamishonari wanahitaji kuwa na imani kuhusu migawo yao,” Ndugu Lösch akaeleza. “Kwa mfano,” akasema, “mnaweza kujiuliza: ‘Je, nitaweza kujifunza lugha mpya? Je, nitaweza kuzoea utamaduni mpya? Je, nitaweza kushinda hisia ya kutamani kurudi nyumbani?’” Kuhusiana na maswali hayo Ndugu Lösch aliwahimiza wanafunzi ‘wamtegemee Yehova.’

Pia, Ndugu Lösch alisoma andiko la Methali 14:26 linalosema: “Katika kumwogopa Yehova kuna uhakika wenye nguvu.” Imani yetu katika Yehova itaimarika ikiwa tutatafakari kuhusu jinsi ambavyo ametubariki katika njia nyingi.

Biblia inasema kwamba mtu anayeweka imani yake katika Yehova “atakuwa kama mti uliopandwa kando ya maji, unaopeleka mizizi yake kando ya mto; naye hataona joto linapoingia, bali kwa kweli majani yake yatakuwa mengi.”—Yeremia 17:7, 8.

Jambo tunalojifunza liko wazi: “Hata mkabili hali gani,” Ndugu Lösch akasema, “imani yenu inapaswa kuwa katika Yehova.”

“Igeni Malaika Waaminifu”

Hicho ndicho kichwa cha hotuba iliyotolewa na mshiriki wa Baraza Linaloongoza, Stephen Lett. Malaika wanatuwekea mfano mzuri. “Kila kitu ambacho Biblia inasema kuwahusu kinastahili kuigwa,” akasema Ndugu Lett. Kisha akaonyesha sifa nne za malaika waaminifu ambazo tutafanya vizuri kuziiga—uvumilivu wao, unyenyekevu wao, utayari wao wa kusaidia, na utimilifu wao.

Biblia inataja kwamba malaika mmoja alimpinga ‘mkuu wa Uajemi’—roho mwovu mwenye nguvu—kwa siku 21. (Danieli 10:13) Malaika huyo alionyesha uvumilivu. Ndugu Lett alionyesha kuwa Wakristo pia ‘wanashindana mweleka . . . dhidi ya majeshi ya roho waovu.’ (Waefeso 6:12) “Mpambane vikali ili mweze kutimiza mgawo wenu,” akawaeleza wanafunzi.

Wakati Manoa, baba ya Samsoni, alipomuuliza malaika amwambie jina lake, malaika alikataa kumwambia. Malaika huyo alionyesha unyenyekevu. (Waamuzi 13:17, 18) Ndugu Lett aliwaambia wanafunzi hivi: “Mtu fulani atakapojaribu kuwatukuza au kuwasifu kwa sababu ya uwezo wenu msikubali jambo hilo, bali iweni wanyenyekevu na kuonyesha kuwa sifa zinapaswa kumwendea Yehova na tengenezo lake.”—1 Wakorintho 4:7.

Wakati Yesu alipokuwa katika bustani ya Gethsemane, muda mfupi kabla ya kifo chake, ‘malaika kutoka mbinguni alimtokea na kumtia nguvu.’ (Luka 22:43) Malaika huyo alionyesha utayari wa kusaidia. “Jaribu kufikiria na kusali kuhusu uhitaji uliopo katika mgawo wako wa umishonari,” Ndugu Lett akasema, “kisha, kwa msaada wa Yehova, jaribu kuwasaidia watu wenye uhitaji huo.”

Kwa kuwa ni malaika wachache waliojiunga na Shetani katika uasi wake, tunaweza kusema kwamba malaika wengi ni vielelezo vizuri vya utimilifu.—Ufunuo 12:4.

“Kama malaika hao waaminifu, mpingeni Ibilisi,” Ndugu Lett akawahimiza wanafunzi. “Mpingeni Ibilisi, naye atawakimbia ninyi.”—Yakobo 4:7.

Mambo Mengine Matatu Makuu ya Programu

“Mfanye Yehova Kuwa Mwamba wa Moyo Wako.” Akizungumzia kichwa hicho chenye kunasa fikira, kilichotegemea Zaburi 73:26, Gary Breaux, mshiriki wa Halmashauri ya Tawi ya Marekani, aliwasaidia wanafunzi kuelewa uhitaji wa kumtegemea Yehova. Yehova ni kama mwamba katika maana gani? Ndugu Breaux alisema: “Yehova anaweza kuwa chanzo cha utulivu kinachoweza kuulinda moyo wako.” Bila shaka, moyo unaweza kutupotosha tunapokabili jaribu la ustahimilivu. (Yeremia 17:9) Hali mpya ya hewa, vyakula vipya, marafiki wapya katika makao ya wamishonari—lolote kati ya mambo hayo linaweza kumfanya mtu afikirie kuacha utumishi wake. “Mtakabili hali ambazo zitawafanya mpime mambo na kufanya maamuzi,” akasema Ndugu Breaux. “Je, utafanya maamuzi yatakayomfurahisha Yehova? Ikiwa utafanya hivyo, Yehova atakuwa ‘mwamba wa moyo wako.’ Ataongoza hatua zako.”

“Je, Una Imani ya Kutosha Kuingiza Miguu Yako Ndani ya Maji?” Mwalimu wa Shule ya Gileadi Sam Roberson alitoa hotuba yenye kichwa hicho, ikitegemea Yoshua sura ya 3. Mamilioni ya Waisraeli wangevuka Mto Yordani jinsi gani ukiwa umefurika? Yehova alimwambia Yoshua awaamuru makuhani ‘wasimame katika Yordani.’ Mungu aliahidi hivi: “Mara tu nyayo za miguu ya makuhani . . . zitakapokanyaga maji ya Yordani, maji ya Yordani yatazuiliwa, . . . nayo yatasimama kama ukuta wa maji.” (Yoshua 3:8, 13) Ndugu Roberson aliwaambia wanafunzi: “Kutakuwa na ‘mito mingi’ katika maisha yenu itakayowazuia msipate baraka ikiwa mtairuhusu iwazuie.” Kwa mfano, kutakuwa na changamoto za kuishi pamoja na wamishonari wenzenu. Suluhisho? “Angalia kazi; usiangalie wafanya kazi.” Ndugu Roberson akawahimiza wanafunzi hivi: “Ikiwa utakuwa na imani ya kutosha kuingiza miguu yako ndani ya maji, Yehova atakusaidia kuvuka ‘mito hiyo’ katika maisha yako ya umishonari.”

“Imarisha Kabisa Mipango Yako.” Hicho ndicho kichwa cha hotuba iliyotolewa na William Samuelson, mwalimu wa Shule ya Gileadi. Hotuba yake ilitegemea andiko la Methali 16:3 linalosema: “Mkabidhi Yehova mwenyewe kazi zako nayo mipango yako itafanywa imara.” Ndugu Samuelson aliwauliza wanafunzi hivi: “Je, mstari huo unamaanisha kwamba huna sehemu ya kutimiza katika kuimarisha mipango yako isipokuwa ‘kumkabidhi Yehova kazi zako’?” Hapana, Ndugu Samuelson akasema, kwa kuwa andiko la Methali 16:1 linasema: “Mipango ya moyo ni ya mtu wa udongo.” Ndugu Samuelson alisema: “Yehova hapangi kimuujiza mambo katika moyo wako. Badala yake, unapaswa kuhakikisha kwamba unachochewa kufanya mambo yanayofaa. Kupitia funzo, sala, na kushirikiana kwa ukaribu na ofisi ya tawi katika nchi utakayokuwa, utaendelea kuwa na moyo utakaokuhudumia vizuri, na Yehova mwenyewe ataimarisha kabisa mipango yako.”

Mambo Yaliyoonwa na Mahojiano

Wanafunzi wa Shule ya Gileadi hujiunga na makutaniko ya karibu ya Mashahidi wa Yehova katika kazi ya kuhubiri. Hiyo ni sehemu ya mafunzo yao. Mark Noumair, mwalimu mwingine wa Shule ya Gileadi, aliwahoji wanafunzi kadhaa kuhusu mambo waliyojionea. Jambo kuu katika mambo hayo yaliyoonwa lilikuwa umuhimu wa sala katika kuwatafuta watu wenye mioyo minyofu katika eneo.

Kwa mfano, wenzi fulani wa ndoa walikuwa katika mkahawa wa vyakula vyepesi. Mfanyakazi fulani aliona kwamba walikuwa wakisali kimyakimya. Aliwakaribia na kuwauliza ikiwa wao ni Mashahidi wa Yehova. Alipojua kwamba wao ni Mashahidi, mfanyakazi huyo aliwaeleza kwamba alilelewa na wazazi ambao ni Mashahidi, hata hivyo alianguka kutoka katika imani. Hata amewahi kufanya uhalifu na kufungwa gerezani. Hivyo, kijana huyo alihisi kwamba anamhitaji tena Yehova katika maisha yake. Pia, alisema kwamba kabla wenzi hao wa ndoa hawajaingia katika mkahawa huo, alikuwa akisali kwa Mungu, akimwomba amsaidie kurekebisha maisha yake. Sala yake ilijibiwa!

Akitoa hotuba yenye kichwa “Onjeni Mwone ya Kuwa Yehova Ni Mwema,” Rudi Hartl wa Idara ya Kushughulikia Maswali ya Wasomaji aliwahoji Wayne Wridgway kutoka Msumbiji, Jason Reed kutoka Chile, na Kenji Chichii kutoka Nepal. Wote watatu ni wamishonari waliozoezwa katika Shule ya Gileadi. Ndugu hao walieleza wazi baadhi ya hali ngumu ambazo walikabili wakiwa wamishonari wapya—kujifunza lugha mpya, kuzoea utamaduni mpya, au kukabiliana na hisia ya kutamani kurudi nyumbani. “Jambo moja lililonisaidia mimi na mke wangu ni kupata marafiki haraka iwezekanavyo katika kutaniko tulilogawiwa,” akasema Ndugu Chichii. “Kadiri tulivyositawisha uhusiano wa karibu na akina ndugu kutanikoni, ndivyo ilivyokuwa rahisi kukabiliana na hali ya kutamani kurudi nyumbani.”

Muda mfupi baadaye, wanafunzi wote 56 walipokea diploma zao, kisha, mwanafunzi mmoja akasoma barua ya shukrani yenye kugusa moyo kutoka kwa wanafunzi hao. Kwa sehemu barua hiyo ilisema hivi kwa Baraza Linaloongoza: “Tukiwa kama darasa, tumeshuhudia wenyewe jinsi mlivyojitoa kwa upendo na bila kuchoka, kutuandalia masomo, kututembelea, na kutupa maagizo mazuri ya kiroho. Kwa sababu tumepokea upendo wenu, tutafanya kadiri tuwezavyo kuiga mfano wenu mzuri wa upendo, subira, unyenyekevu, na kupendezwa kibinafsi na watu tutakapokuwa katika migawo yetu.”

[Blabu katika ukurasa wa 28]

“Mtu fulani atakapojaribu kuwatukuza . . . , msikubali jambo hilo”

[Blabu katika ukurasa wa 29]

“Kutakuwa na ‘mito mingi’ katika maisha yenu”

[Chati/Ramani katika ukurasa wa 31]

TAKWIMU ZA DARASA

9 nchi zilizowakilishwa

56 wanafunzi

28 wenzi wa ndoa

33.0 wastani wa umri

17.9 wastani wa miaka tangu kubatizwa

13.3 wastani wa miaka katika huduma ya wakati wote

[Ramani]

(Ona mpangilio kamili katika nakala iliyochapishwa)

Wahitimu walitumwa katika nchi 25 zilizoonyeshwa hapa chini

MIGAWO YA WAMISHONARI

BOLIVIA

BOTSWANA

BULGARIA

CONGO (KINSHASA)

CÔTE D’IVOIRE

GAMBIA

UJERUMANI

INDIA

INDONESIA

KENYA

LIBERIA

MAKEDONIA

MADAGASCAR

MALAYSIA

MSUMBIJI

PANAMA

PERU

POLAND

ROMANIA

SERBIA

SIERRA LEONE

SWAZILAND

TANZANIA

UGANDA

ZIMBABWE

[Picha katika ukurasa wa 30]

Wanafunzi wa Shule ya Gileadi wakiigiza jambo moja lililoonwa walipokuwa wakihubiri

[Picha katika ukurasa wa 31]

Darasa la 129 Lililohitimu la Shule ya Gileadi

Katika orodha iliyo chini, nambari za safu zinaanza mbele kwenda nyuma, na majina yameorodheshwa kuanzia kushoto kwenda kulia katika kila safu.

(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.

(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.

(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.

(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.

(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.

(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.

(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.