“Kabla ya Utukufu Kuna Unyenyekevu”

MWANAMUME fulani kijana alikuwa katika gereza moja la Misri kwa kutungiwa shtaka la uongo. Alikuwa ameshushiwa sana heshima, na ilionekana hakukuwa na tumaini la kufunguliwa gerezani. Halafu akaagizwa aende mbele ya Farao. Walinda gereza walimtoa humo haraka. Yeye akanyoa, akabadili joho zake, kisha akaenda mbele ya mtawala huyo.

Mshangao ulimngojea Yusufu. Kwa msaada wa Yehova Yusufu alifasiri kwa usahihi ndoto mbili za Farao. Farao akasema: “Tazama, nimekuweka juu ya nchi yote ya Misri.” (Mwanzo 41:41) Ajabu gani​—kutoka gerezani na kuja kwenye jumba la kifalme, tena kwa siku moja! Lililopata Yusufu lingeweza kutoa kielezi juu ya yale ambayo baadaye Mfalme Sulemani alivuviwa kuyaandika: “Kutoka gerezani alikuja kumiliki.” Kwa kufaa, Sulemani aliandika mara mbili hivi: “Kabla ya utukufu kuna unyenyekevu.”​—Mhubiri 4:14, UV; Mithali 15:33; 18:12, NW.

Ili kunufaika na ukweli huo wa kimungu, jiulize hivi: Ni nini kilichotegemeza Yusufu alipokuwa akipatwa na mambo ya kumshushia heshima? Mtumishi huyu mwaminifu wa Yehova alikabilianaje na shtaka lile bandia lililomtia gerezani? Yehova alikuwa akimkusudia Yusufu utukufu gani? Ni utukufu wa aina gani unaowangojea wale ambao muda wa karne zote zilizopita wamekuwa mashujaa wanaponyanyaswa na kushushiwa heshima? Zaidi ya yote, ni nini kinachotusaidia kuendeleza mwelekeo wenye usawaziko tunaposhushiwa heshima?

Ni lazima Yusufu awe alitafakari mara nyingi juu ya ndoto mbili za kiunabii zilizotukia mapema kidogo ambazo zilionyesha kwamba ndugu zake na hata wazazi wake ‘wangeinama’ mbele yake. Kwa uhakika, ndugu zake, waliposikia juu ya ndoto ile ya kwanza, walisema: “Je! wewe utakuwa mfalme juu yetu?”​—Mwanzo 37:8-10, NW.

Ndugu za Yusufu wenye wivu karibu wamuue! Lakini chini ya mwelekezo wa Yehova, kijana huyo wa miaka 17 aliuzwa kwa wachuuzi, nao, tena, wakamuuza kwa Potifa, mkuu wa walinzi wa Farao.

Mwishowe, Yusufu akawa mtumishi mkuu wa nyumba ya Potifa, ambaye mke wake alijaribu kumtongoza kijana huyo mwenye sura nzuri. Hata hivyo Yusufu alikuwa mshikamanifu kwa Yehova akakimbia. Mke huyo mjanja-mjanja akamshtaki Yusufu kwa uwongo kuwa alijaribu kumnajisi, na Potifa akamwamini, kwa hiyo Yusufu maskini katiwa gerezani.

Hata hivyo, yeye alibaki mshikamanifu kwa Yehova, ambaye, kama ilivyokwisha kutajwa, alipanga kwamba apelekwe kwa Farao akafasiri ndoto. Baada ya hapo Farao alimweka Yusufu kwenye pendeleo tukufu la kupanga ugawaji wa chakula cha Misri. Njaa ilipoenea kufika Kanaani, ndugu za Yusufu walimwinamia kweli kweli ili wapate chakula kwa ajili ya jamaa.

Wengine Ambao Walitoka Kwenye ‘Unyenyekevu Wakaja Kwenye Utukufu’

Mtumishi mwingine mwaminifu wa Yehova ambaye kiolezo cha maisha yake kinathibitisha ukweli wa kimungu kwamba “kabla ya utukufu kuna unyenyekevu” alikuwa Musa. Akiwa amelelewa katika baraza lenye vinono la Farao, Musa alikuwa na wakati mzuri sana mbele yake. Ndipo mambo yakaonekana yakianza kuharibika. Musa alitenda kwa imani katika Yehova na hangaikio lenye upendo kwa watu wake, hivi kwamba alilazimika kukimbia aponye uhai wake kutoka kwa Farao mwenye hasira. Akiwa peke yake kabisa alisafiri kwenda Midiani. Kwa miaka 40 alionyesha unyenyekevu wake kwa kuishi maisha rahisi-rahisi ya mchungaji, akitumikia Yethro baba-mkwe wake. Wakati wa miaka yake 40 ya kumgeuza utu ni lazima Musa awe alitiwa moyo sana kwa kufikiria njia ya Yehova ya kumnyenyekeza na kufikiria sana mambo ambayo huenda yakawa yalikuwa bado yakimngojea!

Ndipo ulipokuja utukufu. Yehova alimpa Musa mgawo wa kuwa mjumbe Wake kwa Farao na kutoa watu Wake katika Misri. Musa alikuwa na mapendeleo matukufu kama nini alipohusika moja kwa moja katika yale mapigo kumi na akaongoza Israeli kupita katika Bahari Nyekundu! Baadaye, Musa alipokea Sheria kutoka kwa Yehova juu ya Mlima Sinai. Aliposhuka, watu “hawakuweza kuukazia macho uso wa Musa, kwa sababu ya utukufu wa uso wake.”​—2 Wakorintho 3:7.

Fikiria pia Ayubu, mtu mashuhuri kuliko Wanamashariki wote. Yeye alikuwa “mtu mkamilifu na uelekevu, mwenye kumcha Mungu na kuepukana na uovu.” (Ayubu 1:2, 3, 8) Ndipo, kwa ghafula, akafiwa na watoto wake kumi na maelfu yake yote ya kondoo, ngamia, ng’ombe, na punda majike.

Isitoshe. Ayubu alijawa mwili wote na majipu yenye kudhuru sana, yakisababisha mwili wake utoe harufu ya kutapisha. Mke wake mwenyewe alimdhihaki hivi: “Je! wewe hata sasa washikamana na utimilifu wako? umkufuru Mungu, ukafe.” (Ayubu 2:9) Ayubu alikuwa akijaribiwa vikali na kushushiwa heshima, lakini hakuwa kamwe na habari juu ya mkabiliano wa kimbingu uliokuwa kati ya Yehova na yule asi mkuu, Shetani. Hali haikutiwa nafuu na zungumzio refu pamoja na “marafiki” watatu wa Ayubu. Hata hivyo, Ayubu alidumisha ukamilifu wake. Hata alikubali kwa unyenyekevu shauri la hekima kutoka kwa Elihu​—mwanamume mwenye umri mdogo sana kuliko yeye. ​—Ayubu 32:4.

Je! Ayubu alithawabishwa? Ndiyo. Yehova alimrudishia Ayubu hali yake ya kwanza, akarudufisha ukubwa wa makundi yake ya kondoo, na kumpa wana saba na binti watatu ​—walio warembo zaidi katika bara lote! Lo, ni tokeo tukufu kama nini la unyenyekevu wa Ayubu! Likathibitika kuwa jambo la kweli kama nini​—“kabla ya utukufu kuna unyenyekevu.”​—Ayubu 42:12-15.

Aina Tofauti za Utukufu

Kwa uwazi kuna aina nyingi tofauti-tofauti za utukufu​—tangu utukufu wa nywele za mwanamke hadi utukufu wa uso wa Musa alipokuwa akiushuka Mlima Sinai. (1 Wakorintho 11:15; 2 Wakorintho 3:7) Machweo yenye kutazamisha sana yana utukufu unaopendeza ajabu, na nyota zina utukufu mwingine.​—1 Wakorintho 15:41.

Namna tofauti za neno “utukufu” zinatumiwa mara mia nyingi katika Biblia. Kwa kuchunguza mitajo hiyo na habari zinazoizunguka, inakuwa wazi kwamba Yehova ndiye chanzo cha utukufu wote. Watumishi wake waaminifu na mastadi yake ya uumbaji yanauonyesha sana utukufu huu kwa njia nyingi na kwa kadiri tofauti-tofauti.

Katika karne yetu ya 20, sisi tuna ushuhuda mwingi wa visa vya kushushiwa heshima vilivyowapata wale wenye tumaini tukufu la uhai wa kimbingu. Wakati wa Vita ya Ulimwengu 1, washiriki waongozi wa Sosaiti ya Mnara wa Mlinzi katika Brooklyn, New York, walihukumiwa kufungwa gerezani miaka 20 kwa mashtaka bandia. Karibu wakati uo huo, mnyanyaso ulifoka mahali pengi. Kwa kielelezo, J. B. Siebenlist alitiwa jela kwa siku tatu bila uthibitishio wa haki na bila chakula, isipokuwa vipande vitatu vya mkate wa mahindi ulioharibika. Alitolewa jela na wanaghasia, akavuliwa nguo, akapakwa lami yenye moto, na kupigwa kwa kiboko cha gari-farasi chenye waya nchani. Kwenye pindi moja ya kesi yake mkuu wa mashtaka alisema: “Kapotelee mbali huko helo pamoja na Biblia yako; wewe unapaswa kuingizwa helo ukiwa umevunjika mgongo; unapaswa kunyongwa.”

Wakati wa Vita ya Ulimwengu 2, baadhi ya watumishi waaminifu wa Yehova waliteseka ajabu katika kambi za mateso za Nazi. Mmoja alikuwa Martin Poetzinger, Shahidi mpakwa-mafuta aliyeendelea kuwa hai akawa mshiriki wa Baraza Linaloongoza la Mashahidi wa Yehova. Yeye alieleza Dachau kuwa “nyumbakichaa ya roho waovu.” Katika kambi ya Mauthausen, “polisi wa siri walijaribu kila njia ili watushawishi kuvunja imani yetu katika Yehova. Kupimiwa posho yenye kufisha njaa, kuonyeshwa urafiki wa udanganyifu, kutendwa mambo ya unyama, kulazimishwa kusimama katika fremu siku baada ya siku, kuning’inizwa kwenye kiguzo cha futi kumi huku viwiko vya mikono vikiwa vimepindanishwa mgongoni, kupigwa viboko​—yote haya na mengine . . . yalijaribiwa.”

Ni Nini Kilichotegemeza Wakristo Hawa Waaminifu?

Wakiwa chini ya hali hizo za kusikitisha sana na zenye kuvunja heshima, walisaidiwa kuvumilia na imani yao katika tokeo la mwishowe, kutia na tazamio la wakati ujao wenye utukufu kwa wale wanaodumisha ukamilifu wao. Kwa “kundi dogo” la Mashahidi wapakwa-mafuta, tazamio hili ni urithi wa kimbingu. (Luka 12:32) Utukufu wa aina ya pekee duniani umewekwa akibani kwa ajili ya wanadamu wengine waaminifu. Baadhi yao, kama Yusufu na Musa, wanatajwa katika Waebrania sura ya 11. Tafadhali soma Ebr 11 mistari 32-40 na utafakari juu ya matendo ya kushushiwa heshima yaliyovumiliwa na baadhi ya waaminifu hawa. Zaidi ya hilo, “umati mkubwa” unamtumikia Yehova duniani leo. (Ufunuo 7:9, 15, NW) Wakati ujao wao ni nini?

Wanangojewa na wakati ujao wenye utajiri. Serikali ya kimbingu chini ya Yesu Kristo itakuwa na wawakilishi wa kidunia watakaotumia agizo lililoandikwa katika hatikunjo zinazotajwa kwenye Ufunuo 20:12, NW. Hao watakuwa na mapendeleo yenye utukufu, si wakiwa wafalme, bali “wakiwa wana-wafalme katika dunia yote,” na pamoja nao, wanadamu wanyenyekevu wasiohesabika, kutia na wafufuliwa, watafikia uhai wa milele katika dunia iliyo paradiso yenye utukufu.​—Zaburi 45:16, NW.

Leo kuna mamilioni ambao wameonyesha unyenyekevu wao kwa kuacha dini bandia na kushiriki kwa mteremo katika kazi ya Mashahidi wa Yehova ya kuhubiri nyumba kwa nyumba. Wengi wa hawa wamedhihakiwa na washiriki wa jamaa na marafiki, lakini wameshikamana na ibada ya kweli. Kwa unyenyekevu wamekubali sahihisho na nidhamu ili wamtumikie Mungu wa kweli, Yehova. Tumaini lao ni kuishi katika Paradiso itakayorudishwa, wakati ambapo “dunia itajazwa maarifa ya utukufu wa Bwana [Yehova, NW], kama maji yaifunikavyo bahari.”​—Habakuki 2:14.

Hizi ni siku za kuwatahini watu wa Yehova. Hali yetu ni kana kwamba yakaribia kufanana na ya watu wasiojulikana katika bara la kigeni. Bonde la mgawanyo lililo kati ya ibada ya kweli na ya bandia linaongezeka kina na upana. Sisi sote twashushiwa heshima kwa kadiri fulani. Lakini kama vile Yesu alivyofarijiwa na kuimarishwa na shangwe iliyowekwa mbele yake, sisi pia tunaweza kushinda mitihani kwa kulikumbuka tokeo la mwisho.

Biblia inatushauri hivi: “Nyenyekeeni mbele ya Bwana [Yehova, NW], naye atawainueni.” (Yakobo 4:10, HNWW) Wakati wowote unapotahiniwa vikali, fikiria maneno haya: “Kabla ya utukufu kuna unyenyekevu.” Kumbuka, pia, kwamba Yehova hawezi kushindwa!