Ni Nani Aliye wa Kulaumiwa?

Watu wengi humlaumu Mungu kwa matatizo yao. Mithali moja ya Biblia hutaarifu hivi: “Upumbavu wa mtu huangamiza maisha yake; kisha huwa na kinyongo dhidi ya Bwana.” (Mithali 19:3, The New English Bible) Hata hivyo, kumlaumu Mungu kwa matatizo ya mwanadamu ni kama kumlaumu mtengenezaji wa gari kwa sababu ya kuenea kwa aksidenti zisababishwazo na madereva walevi.

Katika Neno lake Biblia, Mungu amewatolea wanadamu mwongozo wenye thamani. Kwa kusoma maktaba hiyo ya Mungu na kuishi kulingana na sheria na kanuni itokezazo, tunaweza kuepuka hatari nyingi za maisha zisizoonekana. Kinyume cha hilo, kutenda kinyume cha mwongozo wa Mungu huleta msiba. Kwa mfano, wanaokula kupita kiasi, kuvuta sigara, kunywa kupita kiasi, au kufanya mambo yasiyo ya adili hupatwa na matokeo mabaya ya kiafya. (Luka 21:34; 1 Wakorintho 6:18; 2 Wakorintho 7:1) Mtume Mkristo Paulo aliandika hivi: “Lolote lile mtu analopanda, hilo atavuna pia; kwa sababu yeye anayepanda katika mwili wake atavuna ufisadi kutokana na mwili wake, lakini yeye anayepanda katika roho atavuna uhai udumuo milele kutokana na roho.”—Wagalatia 6:7, 8.

Ni vema zaidi kama nini kuishi kulingana na sheria na kanuni za Mungu! Tukifanya hivyo, tutapata kuona uhalisi wa ahadi ya Mungu iliyotolewa kupitia nabii Isaya: “Mimi ni BWANA, Mungu wako nikufundishaye ili upate faida, nikuongozaye kwa njia ikupasayo kuifuata. Laiti ungalisikiliza amri zangu! ndipo amani yako ingalikuwa kama mto wa maji, na haki yako kama mawimbi ya bahari.”—Isaya 48:17, 18.