Sura 4
Kwanza Uharibifu wa Ulimwengu—Ndipo Amani ya Ulimwengu
1-3. (a) Ni uharibifu gani wa ulimwengu ambao viongozi wa kibinadamu wanaonya juu yao? (b) Kwa sababu gani huo si ule ambao Biblia inautaja kuwa uharibifu wa ulimwengu utakaotayarisha njia ya kuleta amani na usalama wa kudumu?
KULINGANA na unabii wa Biblia, kabla ya wanadamu kuweza kufurahia amani yenye kudumu wakati wo wote, ni lazima kwanza uharibifu fulani wa ulimwengu utukie. (2 Petro 3:5-7) Lakini kwa sababu gani jambo hilo linahitajiwa kabisa? Uharibifu huo unatoka wapi? Na unamaanisha nini kwa wanadamu katika sayari hii?
2 Kwanza tunahitaji kufahamu kwamba uharibifu wa ulimwengu ambao Biblia inatabiri si sawa na angamizo kubwa la duniani pote ambalo juu yalo viongozi wengi wa ulimwengu, wanasayansi, na wengine wanaonya. Msiba wanaozungumzia ungekuja kwa namna ya afa fulani lenye kufanyizwa na wanadamu likitokezwa na mambo kama uchafuzi au mashindano ya kuunda silaha za nyukilia, au yote mawili. Lakini, bila shaka, angamizo hilo kubwa lisingeacha tumaini lo lote kwa amani na usalama wenye kudumu katika sayari hii.
3 Dunia ingeharibiwa isiwafae viumbe walio hai. Kwa mfano, mnururiko wa nyukilia au “kipupwe cha nyukilia” kinachowaziwa-waziwa kingeacha waokokaji wakiwa na hali isiyo afadhali zaidi—labda hata wakiwa na hali mbaya zaidi—kuliko wale ambao wangekufa. Ingekuwa vigumu sana kuokoka, ijapokuwa maskini ndio wangeelekea kuwa kati ya watu wa kwanza kutaabika. Ni tumaini gani ambalo wewe ungekuwa nalo la kuwa kati ya waokokaji wa angamizo hilo kubwa la ulimwengu? Hata ikiwa ungeokoka, wewe ungeweza kuwa na tumaini gani kwamba maisha hayangerudia hali ile ile ya mashaka-mashaka yenye kujaa ugomvi iliyopo sasa?
Mambo Ambayo Biblia Inatabiri Hutoa Tumaini
4. Ni nani watakaoharibiwa katika uharibifu wa ulimwengu ambao Biblia inasema juu yao?
4 Jambo linalofanya uharibifu wa ulimwengu ambao Biblia inatabiri uwe tofauti ni kwamba utakuwa wenye kuchagua, wenye kusudi. Hautakuwa balaa fulani inayotokea kama upeo wa makosa tu ya kibinadamu. Badala ya kumuua ye yote tu bila kupambanua, utawaondoa duniani wale tu wanaostahili kweli kuharibiwa. Uharibifu wa ulimwengu wa aina hii unapatana na kusudi la kimungu lililo katika Mithali 2:21, 22: “Maana wanyofu watakaa katika nchi, na wakamilifu watadumu ndani yake. Bali waovu watatengwa na nchi, nao wafanyao hila watang’olewa.”
5, 6. (a) Itakuwaje kwa dunia yenyewe wakati wa uharibifu huo wa ulimwengu? (b) Katika habari hii, itakuwaje “kama vile ilivyokuwa siku za [Noa]”?
5 Basi ni kitu gani kitakachoharibiwa? Wengi wanafikiri Biblia inatabiri kuteketezwa kabisa kwa Dunia-sayari na kila kitu kilichomo. Lakini hivyo sivyo ilivyo. Yesu Kristo mwenyewe alisema hivi: “Wenye furaha ni wapole, kwa kuwa watairithi dunia.” (Mathayo 5:5, NW) Bila shaka ‘urithi’ huo hautakuwa makao yaliyounguzwa yakabaki bila uhai! Vilevile Biblia inatoa uhakikisho kamili wa Mungu kwamba dunia itaendelea milele kama mahali pa watu kuishi.—Zaburi 104:5; Isaya 45:18; Mathayo 6:9, 10.
6 Kupatana na hilo, Biblia inasema juu ya waokokaji watakaobaki duniani baada ya hiyo “dhiki kubwa” kupita. Yesu Kristo alisema kwamba “kama vile ilivyokuwa siku za [Noa], ndivyo kutakavyokuwa [kuwapo] kwake Mwana wa Adamu.” Wakati uharibifu wa dunia yote ulipotukia katika wakati wa Noa walikuwako waokokaji vilevile.—Mathayo 24:21, 37; 2 Petro 2:5, 9; Ufunuo 7:9, 10, 13, 14.
7. Ni kitu gani kitakachofikia mwisho wacho wakati huo?
7 Ni nini kitakachoharibiwa? Ni mfumo wa mambo wa ulimwenguni pote ambao wanadamu wamejenga duniani—pamoja na wale wote wanaoutegemeza kuliko kumtegemea Mungu na utawala wake ulioahidiwa kwa ajili ya dunia. (Zaburi 73:27, 28) Ndiyo sababu kifungu cha maneno “mwisho wa ulimwengu,” kinachopatikana katika tafsiri fulani za Biblia, kinafasiliwa kwa usahihi zaidi kama “mwisho wa kipindi” (NE), “umalizio wa kipindi” (Ro), “umalizio wa mfumo wa mambo” (NW).—Mathayo 24:3.
8. (a) Uharibifu huo utatokana na chanzo gani? (b) Ni lazima hilo litukie kabla mfumo wa sasa wa ulimwengu haujafikia hali gani?
8 Chanzo cha uharibifu wa ulimwengu unaokuja kitakuwa—si wanadamu—bali Yehova Mungu. Viharibifu vya kisasa vya ukosefu mkubwa wa chakula, uchafuzi, ogopesho la nyukilia, na mambo yanayofanana na hayo ambayo yametokana na ujinga wa kibinadamu, makosa, na ufisadi sivyo vitakavyoleta uharibifu. Badala yake, mambo hayo ni uthibitisho wa ubinafsi na kushindwa kabisa kwa mfumo wa sasa wa ulimwengu. Yanaandaa sababu ya haki kumfanya Yehova Mungu auondoe kabisa mfumo huo. Yeye anaahidi kuchukua hatua hiyo kabla ulimwengu wa sasa haujaweza kamwe kufikia hali ya kuanguka au kujiharibu wenyewe. (Ufunuo 11:17, 18) Lakini je! kweli hatua hiyo kali ndiyo njia pekee?
Sababu Mfumo Huu Lazima Uishe Ili Amani ya Kweli Ije
9, 10. Historia ya kibinadamu inaonyeshaje kwamba kunahitajiwa jambo fulani lenye nguvu zaidi ya kutengeneza tu ulimwengu wa sasa?
9 Huenda wengine wakahisi kwamba Mungu anapaswa kufanya tu mabadiliko fulani katika mfumo wa sasa, kuliko kuuharibu. Lakini Biblia inaonyesha kwamba Mungu anatambua ifaavyo kwamba umeruka mipaka ya kutengenezeka.
10 Ebu fikiria wewe mwenyewe mabadiliko mengi ambayo yamefanywa na wanadamu katika karne zote. Fikiria namna zote za serikali ambazo wanadamu wamestawisha. Kumekuwa na serikali za mji, za wafalme, za kidemokrasi, za kikomunisti na za kisosholisti, na za madikteta. Kumbuka namna mara nyingi mtawala au serikali yenye kuwako imeondolewa katika mamlaka na badala yake ikakaa serikali mpya—kwa kuchaguliwa, kwa kupinduliwa na wachache, au mapinduzi ya watu wengi. Hata hivyo, hakujakuwa na utatuzi wenye kudumu kwa matatizo ya wanadamu. Hata watu wenye makusudio mazuri wanaojaribu kusitawisha hali za wanadamu wanaona jitihada zao zikivurugwa na mfumo wa mambo ambamo wao wenyewe wamefungwa ndani. Kama mtawala mwenye hekima wa nyakati za kale alivyogundua, “yaliyopotoka hayawezi kunyoshwa” kwa jitihada za kibinadamu peke yazo.—Mhubiri 1:14, 15.
11-13. (a) Ni mambo gani yanayozuia wanadamu wasifanye mabadiliko katika mfumo wa sasa kwa manufaa ya wanadamu wote? (b) Kwa hiyo, kadiri ya badiliko linalohitajiwa inaweza kufananishwaje?
11 Kwa mfano, miji ya ulimwengu inasumbuliwa na matatizo. Lakini wanadamu hawawezi kuibomoa na kuanza kuijenga upya. Hali ni iyo hiyo kwa mfumo mzima wa ulimwengu wa uchumi na viwanda. Mapendezi ya ubinafsi na utukuzo wa taifa hudhoofisha na kuzuia badiliko lo lote la kweli kwa faida ya wanadamu kwa ujumla.
12 Hivyo mfumo mzima wa ulimwengu ni kama nyumba iliyojengwa juu ya msingi mbaya, kulingana na ramani mbaya, na kujengwa kwa vifaa vyenye kasoro. Kutafaa nini kupangua na kupanga upya vyombo vya nyumbani au kuitengeneza nyumba? Maadamu inasimama, matatizo yataendelea nayo nyumba itaendelea kuharibika. Jambo pekee lenye akili la kufanya ni kuibomoa na kujenga nyingine, juu ya msingi mzuri.
13 Yesu Kristo alitumia mfano unaofanana kidogo na huo katika kusema kwamba watu “hawatii divai mpya katika viriba vikuukuu.” Vile viriba vikuukuu vingepasuliwa na divai mpya. (Mathayo 9:17) Kwa hiyo yeye hakujaribu kuutengeneza mfumo wa mambo wa Kiyahudi alioishi chini yao. Badala yake, alihubiri Ufalme wa Mungu kuwa tumaini pekee la amani na usalama. (Luka 8:1; 11:2; 12:31) Vivyo hivyo, katika wakati wetu Yehova Mungu hataurekebisha tu mfumo wa sasa wa ulimwengu, kwa sababu hilo halingeweza kuleta manufaa yenye kudumu.
14. Je! kupitishwa kwa sheria mpya kungewafanya watu wapende uadilifu?
14 Neno la Mungu linakazia ukweli wa kwamba haiwezekani kutia uadilifu ndani ya mioyo ya watu kwa sheria. Ikiwa hawakipendi kilicho chema, utungaji wa sheria nyingi hautakitia humo. Katika Isaya 26:10, NW tunasoma: “Ijapokuwa mwovu aonyeshwa upendeleo, yeye hatajifunza uadilifu kamwe. Katika nchi ya unyofu yeye atatenda isivyo haki na hatauona ukuu wa Yehova.”—Linganisha Mithali 29:1.
15, 16. Ukosefu wa upendo wa kweli kwa uadilifu unaonyeshwaje kwa upande wa watu wengi katika itikio lao kwa mapenzi ya Mungu?
15 Ijapokuwa mfumo huu umeshindwa na una maovu, ukweli wenye kutatiza ni kwamba watu wengi wanaona afadhali waendelee kuwa nao. Hawataki kufuata uadilifu na kujiweka chini ya utawala unaotoka kwa Mungu. Huenda wakauona ufisadi wa mifumo ya kisiasa ya ulimwengu huu, ubatili wa vita vyake, unafiki wa dini zake za ulimwengu, na ushuhuda ulio wazi wa kwamba tekinolojia imefanyiza hata matatizo makubwa kuliko ambayo imetatua. Ingawa yote hayo, watu wengi wanaona kwamba viongozi wa kidini na kisiasa walio na mapendezi ya kudumisha hali iliyopo ni afadhali wawatulize wao katika hisia ya uwongo ya kujiona wakiwa na usalama. Wako kama Waisraeli ambao Mungu alisema juu yao hivi: “Manabii wanatabiri uwongo, na makuhani wanatawala kwa msaada wa hao; na watu wangu wanapenda mambo yawe hivyo. Nanyi mtafanya nini mwisho wake?”—Yeremia 5:31; Isaya 30:12, 13.
16 Huenda wewe unawajua watu ambao wana tabia zinazohatarisha afya na usalama wao wenyewe na ule wa jamaa zao. Hata hivyo wanapinga jitihada zote za kuwasaidia wageuke. Lakini wakati watu wanapolipinga shauri na uongozi wa Mungu, hili linakuwa jambo zito zaidi sana. Wanaofanya hivi wanaonyesha kwamba hawapendi ukweli na uadilifu. Kwa habari ya watu wanaofanana na hao, Yesu alisema: “Maana mioyo ya watu hawa imekuwa mizito, na kwa masikio yao hawasikii vema, na macho yao wameyafumba; wasije wakaona kwa macho yao, wakasikia kwa masikio yao, wakaelewa kwa mioyo yao, wakaongoka, [nami Mungu] nikawaponya.”—Mathayo 13:15.
17. Ikiwa ni kweli kwamba Mungu hapendezwi kuleta uharibifu juu ya wanadamu, ni kwa sababu gani atauleta?
17 Kwa kufaa, subira na rehema ya Mungu vina ukomo. Ikiwa sivyo, angekuwaje mwenye kupenda waadilifu? Yeye hawezi kuziba masikio asisikie malalamiko yao kwa ajili ya ondoleo la taabu inayoletwa na uovu juu ya dunia hii. (Luka 18:7, 8; Mithali 29:2, 16) Hivyo, hali zataka uharibifu wa ulimwengu. Zinamlazimisha Mungu afanye hivyo ikiwa atabaki mwaminifu kwa yaliyo mema na ikiwa atawaonyesha huruma wale ambao pia wanapenda mema. Hata hivyo si shauri la kwamba Mungu anapendezwa kuleta uharibifu juu ya wanadamu. “‘Je! mimi napendezwa na kufa kwa mtu fulani mwovu,’ ndio usemi wa Mwenye Enzi Kuu Bwana Yehova, ‘na je! si kwamba ageuke kutoka njia zake na kwa hakika aendelee kuishi? . . . Kwa hiyo fanyeni mgeuko na mwendelee kuishi, Enyi watu.’”—Ezekieli 18:23, 32, NW.
18. Ni bei gani ambayo lazima ilipwe ili kuwakomboa watu wanaopenda mema kutoka katika ukosefu wa usalama?
18 Basi, uharibifu wa wale wanaopendelea mfumo huu wa sasa wa ulimwengu ndiyo bei ambayo lazima ilipwe ili kuwakomboa wale wanaopenda mema watoke katika ukosefu wa usalama na taabu. Hii inapatana na kanuni ya Biblia: “Mwovu ni ukombozi kwa mwadilifu.”—Mithali 21:18, NW; linganisha Isaya 43:1, 3, 4.
Matokeo Yenye Manufaa
19. Ni mambo gani yanayozuia amani ya ulimwengu yatakayoondolewa na uharibifu wa mfumo huu wa mambo?
19 Uharibifu wa mfumo wa sasa wa ulimwengu na wanaoutegemeza utaacha nafasi ili kuweko mfumo mpya wenye uadilifu duniani pote ambamo katika huo waokokaji wataweza kufanya kazi kwa umoja, si kwa shindano la ubinafsi. Mipaka ya kitaifa na mipaka ya kisiasa itaondolewa. Gharama zenye kulemea za matumizi ya kijeshi zitatoweka. Pia vizuizi vya kijamii vinavyowazuia wanadamu wasiwe jamaa yenye umoja duniani vitatoweka. Sababu ya maana sana itakayotokeza yote haya ni ya kwamba wote watakaokuwa wakiishi wakati huo watasemezana mmoja na mwenzake ‘lugha moja iliyo safi’ ya ukweli, wakimwabudu Muumba wao “katika roho na kweli.” Jambo hili litawaweka huru na mambo yenye kugawanya ya ushirikina wa kidini, mapokeo, na imani zilizofanywa na wanadamu.—Sefania 3:8, 9; Yohana 4:23, 24.
20. Kama inavyoonyeshwa na Zaburi 72, ni hali gani itakayokuwapo duniani pote?
20 Serikali ya Mungu ikiwa inatumia enzi moja tu juu ya dunia yote kupitia Mwana wake Kristo Yesu, zaburi ya kale ya Biblia itapata utimizo: “Katika siku zake mwadilifu atachipuka, na wingi wa amani mpaka mwezi utakapokuwa haupo. Naye atakuwa na raia kutoka bahari mpaka bahari na kutoka Mto mpaka miisho ya dunia.”—Zaburi 72:7, 8, NW.
21. Dunia yenyewe itanufaikaje na uharibifu wa ulimwengu unaokuja?
21 Dunia itanufaika na uharibifu wa ulimwengu unaokuja. Haitaumbuliwa sura tena na wachafuaji wenye pupa na waharabu wasio na huruma. Maziwa, mito, bahari kuu, na hewa vitapata ondoleo la takataka yote inayomiminwa ndani yavyo na upesi vitajisafisha vyenyewe. Hivyo Mungu ataonyesha kwamba yeye hajaliacha kusudi lake la awali la kuwa na sayari safi iliyo kama bustani iliyojaa watu wanaoonyesha sifa bora za Muumba wao.—Mwanzo 1:26-28; Isaya 45:18; 55:10, 11.
22. Kuletwa kwa uharibifu huo kunapatanaje na Mungu kuwa ‘Mungu wa amani’?
22 Kwa hiyo, kuleta kwa Mungu uharibifu wa ulimwengu hakutofautiani na kuwa kwake ‘Mungu wa amani.’ Wala hakutofautiani na kuwa kwa Yesu “Mwana-Mfalme wa Amani.” Wao wanachukua hatua hii ya kuirudisha dunia kwenye hali safi yenye uadilifu kwa sababu ya kupenda kwao amani na haki.—1 Wakorintho 14:33; Isaya 9:6, 7, NW.
23, 24. Ikiwa tutajifurahisha wakati ujao wenye amani na usalama, ni jambo gani lililo la muhimu kwetu watu mmoja mmoja kufanya sasa?
23 Basi, sisi tukiwa watu mmoja mmoja twapaswa kufanya nini? Yesu alionyesha kwamba wale wasiojali maagizo ya Mungu walikuwa wakijenga matumaini yao ya wakati ujao juu ya “mchanga,” na kwamba jengo hilo lisingevumilia kamwe dhoruba zenye uharibifu zinazokuja. Yeye alionyesha umuhimu wa kujenga matumaini yetu juu ya utii kwa Neno la Mungu ikiwa tutakuwa na wakati ujao wenye amani na usalama.—Mathayo 7:24-27.
24 Lakini sababu gani Mungu amengoja muda mrefu sana kukomesha uovu na taabu? Biblia inajibu ulizo hilo pia, na inaonyesha jambo ambalo Mungu amekuwa akifanya wakati wa karne zote zilizopita katika kutimiza kusudi lake.
[Picha katika ukurasa wa 37]
Kama vile watu walivyookoka Gharika, kutakuwa na waokokaji wa “dhiki kubwa”